🎉🎉قريباً بإذن الله تنطلق قناتنا الجديدة لقصص الأنبياء و السيرة النبوية باللغة العربية الفصحى🎉🎉

#قصص_الأنبياء(٢)
#السيرة_النبوية
#الحلقة_مائتين_وتسعة_وثلاثين
#أحداث_السنة_الحادية_عشرة_من_الهجرة
#الأئمة_من_قريش

وقفنا المرة إللي فاتت عند مقولة أبو عبيدة بن الجراح للأنصار:
"يا معشر الأنصار! إنكم أول من نَصَر وآزَر فلا تكونوا أول من بَدّل وغيَّر"
فهنا بشير بن سعد الأنصاري الخزرجي إللي كان حضر بيعة العقبة الثانية، وهو أبو النعمان بن بشير أول مولود يُولد للأنصار في المدينة بعد الهجرة؛ قام فقال:
"يا معشر الأنصار!
إنا والله لئِن كنا أولِي فضيلة في جهاد المشركين، وسابقة في هذا الدين؛ ما أردنا به إلا رضاء ربنا، وطاعة نبينا، والكَدْح لأنفسنا،
فما ينبغي أن نستطيل بذلك، ولا نبتغي به من الدنيا عرضًا، فإن الله وليّ النعمة، ووليّ المنة علينا بذلك،
ألا إن محمدًا ﷺ من قريش، وقومُه أحقُّ به وأوْلَى، ولا يراني الله أُنازعهم في هذا الأمر أبدًا، فاتقوا الله، ولا تخالفوهم ولا تنازعوهم"
يعني بيقول للأنصار إنهم وإن كانوا أصحاب الفضل في جهاد المشركين بكثرة عددهم زي ما خطيب الأنصار قال من شوية،
لكن بيفكرهم إنهم معملوش كده إلا لأنهم كانوا عايزين رضا الله وطاعة رسوله، وإنهم بيعمَلوا لأنفسهم عشان ربنا ينجيهم في الآخرة ويدخلهم الجنة،
فعلى الأساس ده بيقولهم إن مينفعش بقى إننا نستغل الفضل ده عشان ناخد به مصلحة في الدنيا؛ لأن الموضوع كله فضل من الله وهو إللي هدانا لهذا فله الفضل والمنة،
ومحمد ﷺ من قريش وقومه أحق بخلافته وأوْلى،
وبعدين وضع من نفسه قدوة وقال لهم إنه معندوش استعداد إن ربنا يراه وهو يُنازع قوم رسول الله ﷺ في الخلافة،
وذكّرهم بالله وقال لهم لا يخالفوهم ويسمعوا كلامهم،
وكده نلاحظ تغير خط الحوار في السقيفة، وكده بدأت نفوس الجميع تهدأ،
وهنا قام سيد الأوس أُسَيْد بن حُضَيْر ودعا الأنصار إنهم يتركوا الأمر ويبايعوا المهاجرين وقال إنه خايف إن يحصل خلاف في المستقبل بين الأوس والخزرج إذا أحد الفريقين تولّى الخلافة، عشان كده هو بيُؤيّد المهاجرين👌
فلما رأى أبو بكر رضي الله عنه إن النفوس بدأت تطيب باختيار الخليفة من المهاجرين أراد إنه يضيف حجة تقوّي من هذا الاختيار،
فقال الصديق رضي الله عنه:
"إن الله سمّانا الصادقين وسمّاكم المفلحين...."

أبو بكر رضي الله عنه بيُشير إلى قول الله عز وجل في سورة الحشر:
" لِلْفُقَرَاءِ الْمُهَاجِرِينَ الَّذِينَ أُخْرِجُوا مِنْ دِيارِهِمْ وَأَمْوَالِهِمْ يَبْتَغُونَ فَضْلًا مِنَ اللَّهِ وَرِضْوَانًا وَيَنْصُرُونَ اللَّهَ وَرَسُولَهُ أُوْلَئِكَ هُمُ 《الصَّادِقُونَ》"
فده كده وصف المهاجرين، أما وصف الأنصار فجاء في الآية إللي بعدها، قال الله تعالى:
" وَالَّذِينَ تَبَوَّءُوا الدَّارَ وَالإِيمَانَ مِنْ قَبْلِهِمْ يُحِبُّونَ مَنْ هَاجَرَ إِلَيْهِمْ وَلا يَجِدُونَ فِي صُدُورِهِمْ حَاجَةً مِمَّا أُوتُوا وَيُؤْثِرُونَ عَلَى أَنْفُسِهِمْ وَلَوْ كَانَ بِهِمْ خَصَاصَةٌ وَمَنْ يُوقَ شُحَّ نَفْسِهِ فَأُوْلَئِكَ هُمُ《الْمُفْلِحُونَ》"
فكلامه رضي الله عنه بيدل على ذكاءه وسعة اطلاعه على القرآن،
وبعدين أبو بكر رضي الله عنه قال للأنصار:
وقد أمركم الله أن تكونوا معنا حيثما كُنا، فقال في سورة التوبة:
"يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ"
يعني هو استنبط حكم إن الخلافة تكون من المهاجرين من خلال الآية،
ومش بس كده، ده قال لهم حديث رسول الله ﷺ إللي بيقول:
"فمَن ولِيَ مِنكُم شيئًا يَضُرُّ فيه قَوْمًا ويَنْفَعُ فيه آخَرِينَ، فَلْيَقْبَلْ مِن مُحْسِنِهِمْ ويَتَجَاوَزْ عن مُسِيئِهِمْ"
احنا شرحنا الحديث كامل في الجزء المائة واثنان وثلاثين،
فرسول الله ﷺ هنا كان بيوصي بالأنصار، وكلامه فيه إشارة واضحة إن الخليفة ليس من الأنصار؛
يعني إزاي هيوصي الخليفة عليهم إذا كان هو منهم أصلا🤷‍♂️
وبكده هدأت النفوس أكثر وأكثر، وازداد توحد المسلمين في رأي واحد👌

كل الأحداث إللي بتحصل دي وسعد بن عبادة رضي الله عنه كان ساكت ومتكلمش خالص،
وموقفه يُعتبر موقف محرج😅
يعني من ساعة أو ساعتين كان مُرشح للخلافة وكان تقريبا شبه مؤكد إنه خلاص هيبقى فعلا الخليفة، وفجأة كده الوضع يتغير تماما،
ولعله أصلا كان في حيرة من كل إللي بيحصل، والأفكار تزاحمت في رأسه بجانب إرهاقه بسبب مرضه،
وأكيد دي حاجة مش هتعدي على أبي بكر رضي الله عنه، هو كان مراقب للموقف كله وبيتصرف بحكمة عشان يخرجوا من الموضوع بأفضل نتيجة بدون أي مشاكل،
ومن خلال الموقف كان واضح إن الأنصار رضي الله عنهم خلاص اقتنعوا عقلياً وقلبياً بأن المصلحة العليا للأمة تستلزم أن يكون الخليفة من المهاجرين وبالذات من قريش💁‍♂️
في اللحظة دي بقى أبو بكر رضي الله عنه أظهر بالدليل الدّامغ والحجة الظاهرة البيّنة التي لم تترك أي شك في قلب أحد، سواء من المهاجرين أو الأنصار👌

☆إيه هو الدليل ده بقى🤔

قال أبو بكر رضي الله عنه وهو يوجه الكلام لسعد بن عبادة نفسه:
لقد علمت يا سعد! أن رسول الله ﷺ قال

وأنت قاعد:
"ٌقريش وُلاةُ هذا الأمر فَبَرُّ الناس تبعٌ لبَرِّهم، وفاجرهم تَبع لفاجرهم"
يعني رسول الله ﷺ بيقول إن الخلافة في قريش؛ لأن الناس كلها بيتبعوهم،
الإنسان البار الكويس كان بيتع رسول الله ﷺ إللي هو من قريش،
والفاجر كان يتبع الفاجر والكافر من قريش، يعني باختصار إن قريش هي زعيمة العالم العربي والكل ماشي وراها بالسوء أو بالخير 👌
فدلوقتي بقى في كلام لرسول الله ﷺ قاله في وجود سعد بن عبادة وفي وجود أبي بكر، وهو هنا بيذكر سعد بالحديث،
وواضح إن سعد بن عبادة رضي الله عنه كان نِسي الحديث ده،
إما بقى بسبب إنه سمعه من رسول الله ﷺ من فترة طويلة أو بسبب الحزن على رسول الله ﷺ أو بسبب إنه مريض، أو غيرها من الأسباب👌
المهم إن لما سمع سعد بن عبادة رضي الله عنه كلام أبي بكر رد عليه وقال له:
"صَدَقت. أنتم الأمراء ونحن الوزراء"
يعني برغم كل الحوارات والجدال إللي حصل في السقيفة؛ الموضوع كله خلص في كلمتين😅
وسعد رضي الله عنه متكلمش من ساعة ما جاء المهاجرين الثلاثة للسقيفة غير الكلمتين دول،
وبكده يبقى هو حَسَم الموضوع تماما بإن الخلافة لقريش وليس للأنصار فيها أي حق؛ لأن الموضوع هنا اتحول لتشريع مش مجرد شورى واجتهاد 💁‍♂️
يعني الشورى بتكون في حاجة معندناش فيها حكم ثابت، فبيجتمع أهل الرأي عشان يتناقشوا ويقدروا يطلعوا أفضل الآراء وإللي فيها المصلحة،
لكن مينفعش مثلا يتشاوروا يبيعوا الخمر أو لأ؛ لأن ده له حكم ثابت في الإسلام،
فبعد الحديث إللي قاله أبو بكر وشهد له سعد بن عبادة بقى لا يجوز اختيار خليفة إلا من قريش؛
لأن الموضوع خرج من أيديهم وبقى حُكمه إلى الله عز وجل وإلى رسوله ﷺ، فلا يجوز مخالفته،
قال الله تعالى:
"وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلالًا مُبِينًا"
مش مجرد طاعة بس، لأ، ده لازم كمان تكون النفوس راضية بحكم الله ده، مش يقبل حكم ربنا على مضص ويقول أمري لله أعمل إيه يعني، ويطبق أمر ربنا وهو كاره ومضطر😬
ربنا بيقول:
"فَلَا وَرَبِّكَ لَا يُؤْمِنُونَ حَتَّىٰ يُحَكِّمُوكَ فِيمَا شَجَرَ بَيْنَهُمْ ثُمَّ لَا يَجِدُوا فِي أَنفُسِهِمْ حَرَجًا مِّمَّا قَضَيْتَ وَيُسَلِّمُوا تَسْلِيمًا"

☆ممكن هنا حد يقول زيي كده لما سمعت القصة دي أول مرة:
طب ما كان يقول الحديث من الأول😣
لو كان قاله من بداية القعدة من أول ما دخلوا كان زماننا قفلنا كل أبواب الجدل من البداية وخِلصنا 😬

لكن سبحان الله الموضوع طلع له حكمة، وكان من توفيق الله لأبي بكر رضي الله عنه إنه ميقولش الحديث ده من البداية، ليه بقى🤔
تخيلوا إيه إللي كان ممكن يحصل لو كان أبو بكر قال الحديث من غير ما يمهّد له بالبراهين الساطعة والأدلة الدامغة والحجة العقلية في كون قريش أقدر على إدارة الأمور في دولة الإسلام من غيرها، وإن العرب سيكونون أكثر طوعاً لقريش😕
كان ممكن ساعتها الأنصار يرفضوا الامتثال لكلام أبي بكر؛
لأن الأنصار كانوا مهيئين نفسياً لتولي الحكم،
وأدلتهم العقلية قوية، وحجتهم المنطقية مقبولة، ويُخشى عليهم ألا ينقادوا بهدوء لأمر الله ولرسوله،
وكانت هتبقى كارثة فعلا لو رفضوا الانقياد لكلام أبي بكر،
وحتى لو كانوا وافقوا كان ممكن يوافقوا مكرهين وفي نفوسهم شيء،
واحنا عايزين:
"لَا يَجِدُوا فِي أَنفُسِهِمْ حَرَجًا مِّمَّا قَضَيْتَ وَيُسَلِّمُوا تَسْلِيمًا"
فمن الحكمة إن الواحد ميطلبش أمر صعب أو عسير من أحد إلا بعد أن تهيئته نفسياً،
يعني لا تكن عوناً للشيطان على أخيك، واقدر للأمر قدره، وخاطبوا الناس على قدر عقولهم، وراعوا حالتهم النفسية والمزاجية،
وهو ده إللي عمله أبو بكر رضي الله عنه؛ عالج الأمر بحكمة، وتدرج معاهم في إيصال الحكم،
ولما جاء عرض الحكم عليهم قبلوه بدون أي تردد، واتبعوه دون شك وتقبلوا الأمر ومبقاش في نفوسهم أي حرج وسلموا تسليما كاملا لكلام رسول الله ﷺ 👌

وعلى فكرة الحديث إللي قاله أبو بكر رضي الله عنه مش هو الحديث الوحيد إللي بيحمل نفس المعنى،
ده في أحاديث تانية كتير غير الحديث ده، لكن الصحابة إللي كانوا سمعوا الأحاديث دي من رسول الله ﷺ وأخبروها للناس بعدين مكنوش حاضرين في السقيفة،
《وبالمناسبة الأحاديث دي كلها صحيحة👌》
يعني مثلا حديث في البخاري بيرويه معاوية بن أبي سفيان عن رسول الله ﷺ بيقول:
"إنّ هذا الأمرَ في قريش لا يُعاديهم أحد إلا كَبّه الله على وجهه ما أقاموا الدين"
لكن معاوية رضي الله عنه مكنش حاضر في السقيفة، وغيره من الصحابة يروي أحاديث بنفس المعنى ولم يكونوا حاضرين،
لكن مع ذلك لما أبو بكر رضي الله عنه قال الحديث محدش اعترض ولا ردّ الحديث وقال إن الكلام ده غير صحيح أو واحد قام وقعد يفسّره بمعنى تاني خالص غير المعنى الظاهر🙄
كلام رسول الله ﷺ في الأحاديث المختلفة واضح إن الخليفة من قريش👌
و هذا الشرط هو ما عليه جماهير علماء ال

مسلمين،
ومُجمَع عليه من الصحابة والتابعين والأئمة الأربعة.

أنا بقولكم الكلام ده لأن في ناس بتكذّب الأحاديث دي وبيقولوا إنها بتدعو للتعصب القبلي وإن الإسلام أصلا جاء لإلغاء التعصب وكلام كتير كده الغرض منه الطعن في السُّنة وفي أحاديث رسول الله ﷺ👌
فخليكم عارفين إن شرط الأئمة من قريش ده حديث رسول الله ﷺ وعليه إجماع من عهد الصحابة وكل المسلمين ولم يخالفهم إلا أهل البدع زي الخوارج وبعض المعتزلة وغيرهم👌

☆ وطبعا هيطلع لنا سؤالين مهمين محتاجين الإجابة عليهم:
◇السؤال الأول:
موضوع إن الخلافة تكون في قريش فقط ده، هو فعلا مش كده هيبقى تعصب لقبيلة بعينها🤔
يعني هل الإسلام دين عنصري جاء لنشر سيادة قريش وانتقاص حق بقية المسلمين في المساواة معهم وحقهم في تولي الخلافة😬
ثم فين حديث رسول الله ﷺ:
"اسمعوا وأطيعوا، وإنْ وَلِيَ عليكم عبدٌ حبشِي كأن رأسه زبيبة"
وفين:
" أَلَا لَا فَضْلَ لِعَرَبِيٍّ عَلَى أَعْجَمِيٍّ وَلَا لِعَجَمِيٍّ عَلَى عَرَبِيٍّ وَلَا لِأَحْمَرَ عَلَى أَسْوَدَ وَلَا أَسْوَدَ عَلَى أَحْمَرَ إِلَّا بِالتَّقْوَى"😕

براحة كده وواحدة واحدة،
بداية كده اختصاص قريش بالخلافة هو تشريع من رب العالمين،
يعني لا هو اجتهاد من رسول الله ﷺ ولا اجتهاد من الصحابة، ولا قبيلة قريش هي إللي فرضت نفسها🤷‍♂️
فلما يأتي التشريع من الله فيجب على الجميع أن يسمع ويطيع ويرضى بدون أي نقاش👌
واحنا عارفين إن ربنا عز وجل ولا يفعل شيء إلا لحكمة،
فاحنا بنعرف وبنسأل عن الحكمة من باب زيادة الإيمان واطمئنان القلب مش من باب الاعتراض على أمر الله،
تمام كده😁
نيجي بقى للتفصيل،
قريش هي أفضل قبائل العرب بنص الحديث عن رسول الله ﷺ:
"إن الله اصطفى قريشاً من كنانة، واصطفى من قريش بني هاشم، واصطفاني من بني هاشم"

فالظن أن يكون الخير في العرب أعظم منه في الأجناس الأخرى،
واحنا اتكلمنا في بداية السيرة خااالص عن أسباب اختصاص العرب أصلا بحمل رسالة الإسلام، وقلنا إن فيهم صفات مش موجودة في حد غيرهم،
والظن أن يكون الخير في قريش أعظم منها في قبائل العرب الأخرى،
عشان كده كان منهم رسول الله ﷺ أشرف خلق الله تعالى الذي لا يُماثله أحد في قريش، فضلاً عن وجوده في سائر العرب وغير العرب👌
فالحكمة بقى إن ربنا جعل الخلافة في قريش هي زي ما قال أبو بكر رضي الله عنه للأنصار:
"ولن تعرِفَ العربُ هذا الأمرَ إلَّا لهذا الحيِّ مِن قريشٍ هم أوسطُ العربِ نسبًا ودارًا"
يعني محدش هيرضى إنه يخضع لقبيلة إلا لقريش، والهدف أصلا توحيد كلمة المسلمين👌
وطبعا الموضوع مفهوش أي تعصب خالص؛ لأن اشتراط الخلافة في قريش ليست على الإطلاق ولكن مشروطة بإقامتهم للدين زي ما رسول الله ﷺ قال في حديث معاوية إللي قلناه من شوية:
《 ما أقاموا الدين》، وإلا فإن صاحب الدين يُقدم حتى لو لم يكن من قريش👌
والكلام كله لا يتعارض إطلاقا مع حديث العبد الحبشي إللي قلناه من شوية؛ لأن المقصود من الحديث هو طاعة من ولّاهُ الإمام، وإن كان حبشيًا،
يعني إللي الخليفة يعيّنه؛ المطلوب من الناس إنهم يطيعوه أيا كان هو مين أو جنسه إيه مادام لا يأمر بمعصية الله،
لكن مش إن الخليفة يكون الخليفة من الحبشة؛ لأ، لأن الخليفة العام للمسلمين زي ما قلنا يكون من قريش، أما أمراء المسلمين الذين ينُوبون عن الخليفة فلا يُشترط فيهم أن يكونوا من قريش.
《في معنى تاني في موضوع تولي العبد الحبشي وهو أن يكون إمام مُتغلّب، وده موضوع تاني خالص مش موضوعنا هنا دلوقتي》

¤المهم،
في هنا ملحوظة في الحديث بالنسبة لنقطة عبد حبشي،
الحديث من باب ضرب المثل،
لأن العبد لا يكون خليفة؛ لأن من شروط الخليفة إنه يكون حر وليس عبد،
زي كده لما رسول الله ﷺ بيقول:
"مَنْ بَنَى مَسْجِدًا لِلَّهِ كَمَفْحَصِ قَطَاةٍ ، أوْ أَصْغَرَ ، بَنَى اللَّهُ لَهُ بَيْتًا فِي الْجَنَّةِ"
يعني إللي يبني مسجد لله بحجم مَفْحَصِ قَطَاةٍ أو أصغر، الله يبني له بيت في الجنة،
ومَفْحَصِ قَطَاة معناه المكان إللي يبيض فيه طائر القَطَا داخل العش بتاعه، وانتم عارفين عش الطائر صغير أد إيه،
والهدف من بناء المسجد هو إقامة الصلوات فيه،
فإزاي الواحد هيصلي في مكان صغير جدا بالحجم ده؟
فالمقصود من الحديث ضرب المثل،
يعني مهما كان حجم المسجد إللي هتبنيه لله؛ ربنا هيجازيك ويبني لك بيه بيت في الجنة،
فحديث العبد الحبشي نفس المعنى،
مهما كان الشخص إللي الإمام هيولّيه عليكم = أو هو نفسه يتولى عليكم كحاكم مُتغلب ومش من قريش= مش عاجبكم أو انتم مستقذرينه فانتم يجب عليكم طاعته ما دام يُقيم فيكم كتاب الله ولم يأمركم بمعصية 👌

◇السؤال الثاني:
طيب قريش كانت معروفة في بداية الإسلام وفضلوا معروفين فترة بعد كده،
لكن بعد الفتوحات الإسلامية وخروج القُرشيين وبقية العرب من الجزيرة وانتشارهم في كل مكان على مدار السنين، احنا بقى هنعرفهم إزاي عشان نجعل فيهم الخلافة والموضوع بقى معقد😬

بكل بساطة، أي حد يتوافر فيه شرط إقامة الدين في المسلمين يكون هو ال

خليفة👌
وهو ده إللي استند عليه العثمانيون في خلافتهم للمسلمين💁‍♂️
انتم عارفين إن العثمانيين مكنوش من قريش ومع ذلك كانت لهم القوة، وكانت لهم الغَلَبة، وكان لهم السمع والطاعة، وهو ده المقصود من الخلافة،
يعني ما داموا بيحكموا بكتاب الله عز وجل وجمعوا الأمة على ذلك فلماذا لا يكونون هم الخلفاء؟
وبالذات إن في زمن العثمانيين لم يكن لقريش شَوْكة ولا قوة، فجمع العثمانيون الأمة تحت راية كتاب الله وسنة رسوله ﷺ👌

☆طبعا يا جماعة موضوع الخلافة والإمامة ده موضوع فقهي طوييييل 😅
أنا قلت لكم فيه الخطوط العريضة إللي تهمنا واحنا بنتكلم عشان نعرف بس الأمور كانت ماشية إزاي مع الصحابة،
وهتلاقوا في التعليقات مواقع فيها الموضوع بالتفصيل الممل😁👇

يبقى خلاصة الموضوع دلوقتي إن الصحابة جميعاً انقادوا وسلّموا تماماً لحديث أبي بكر الصديق رضي الله عنه ؛ لأنه تشريع، وسكنت السقيفة، وذهب الخلاف، واستقر الناس على قريش👌

مين بقى إللي يختاروه من قريش😅
ده إللي هنعرفه الجزء الجاي إن شاء الله 👌

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي.


#Eman_Shalapy

⭐المصادر⭐
https://islamstory.com/ar/artical/19876/أبو_بكر_الصديق_ويوم_السقيفة
https://dorar.net/hadith/sharh/5051
https://ar.islamway.net/article/79077/-22-الصديق-وتعامله-مع-النفوس-وقدرته-على-الإقناع
https://dorar.net/aqadia/3799/<br/>أولا:-طريقة-مبايعة-أبي-بكر
http://hadithportal.com/index.php?show=hadith&h_id=3493&uid=0&sharh=10000&book=31&bab_id=817
https://audio.islamweb.net/audio/index.php?page=FullContent&audioid=208318
https://www.islamweb.net/ar/fatwa/115872/شبهة-وجوابها-حول-حديث-الأئمة-من-قريش
https://www.islamweb.net/ar/fatwa/26262/الأدلة-على-كون-الأئمة-من-قريش،-والسر-في-ذلك
http://www.bayanelislam.net/Suspicion.aspx?id=03-03-0078
https://www.dorar.net/hadith/sharh/13878
https://www.islamweb.net/ar/fatwa/93979/
https://dorar.net/aqadia/4032/المبحث-العاشر:-القرشية
https://ar.islamway.net/article/79151/-26-حديث-الأئمة-من-قريش-وموقف-الأنصار-منه
https://www.alukah.net/web/alkathiri/0/107878/#_ftn36

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

قناة الفقة الميسر للشيخ /سامح حبيب

https://t.me/fiqhmoyasr

#قصص_الأنبياء(٢)
#السيرة_النبوية
#الحلقة_مائتين_أربعون_والأخيرة
#أحداث_السنة_الحادية_عشرة_من_الهجرة
#دَفْن_رسول_الله

وقفنا المرة إللي فاتت عند استقرار الأمور في السقيفة واتفاق الجميع على إن الخليفة يكون من قريش،
لكن السؤال المهم بقى: يا ترى يختاروا مين يكون هو الخليفة🤔
في البداية كان أبو بكر رضي الله عنه رشح للخلافة عمر وأبا عبيدة،
فدلوقتي الترشيح ما زال قائم، لكن عمر وأبو عبيدة كان لهم رأي تاني،
أبو عبيدة رضي الله عنه قال لأبي بكر:
لا ينبغي لأحد بعد رسول الله ﷺ أن يكون فوقك يا أبا بكر ! أنت صاحب الغار مع رسول الله ﷺ، وثاني اثنين،
وأمّرك رسول الله ﷺ حين اشتكى، وصليت بالناس، فأنت أحق الناس بهذا الأمر👌
يعني مينفعش حد يكون أمير عليك، انت إللي كنت مع رسول الله ﷺ في الهجرة وفي الغار زي ما ربنا ذكرك في القرآن، ولما رسول الله ﷺ كان مريض خلاك انت مكانه تصلي بالناس وترعى شؤونهم؛
فأنت احق بالخلافة من أي أحد، فهنا عمر رضي الله عنه قال للأنصار:
" يا معشر الأنصار، ألستُم تعلمون أن رسول الله ﷺ قد أمَر أبا بكر يَؤُم الناس؟!
فأيُّكم تطيبُ نفسه أن يتقدم أبا بكر رضي الله عنه؟
يعني مين إللي نفسه تكون راضية إنه يكون إمام لأبي بكر ورسول الله ﷺ نفسه هو إللي خلاه إمام للناس؟
فقال الأنصار: نعوذ بالله أن نتقدم أبا بكر🤚
فهنا عمر رضي الله عنه قال لأبي بكر:
ابسُطْ يدَك يا أبا بكرٍ.
فبسَطها، فبايَعه عمر، وقام أُسيد بن حضير زعيم الأوس، وقام بشير بن سعد رضي الله عنه يستبقان للبيعة،
يعني كانوا بيسابقوا بعض لمبياعة أبو بكر بالخلافة، فهنا وَثَب أهل السقيفة يَبْتَدِرُون البيعة،
يعني قفزوا من أماكنهم ناحية أبي بكر بيسابقوا بعض، كل واحد عايز يبايع هو الأول😅

فبايع الحُباب بن المنذر وبايع ثابت بن قيس، وبايع زيد بن ثابت رضي الله عنهم أجمعين،
وبايع كل الأنصار في السقيفة ما عدا سعد بن عبادة رضي الله عنه، بايع بعد كم يوم كده،
وهو معذور لأنه ساعته كان مريض والدنيا كانت زحمة وحصلت أحداث كتير،
فلما الأمور هدأت وخف مرضه بايع رضي الله عنه👌

دي كده كانت البيعة الأولى وحصلت بيعة تانية في المسجد لأبي بكر رضي الله عنه وفي تفاصيل كتير حصلت بس ده مش موضوعنا دلوقتي،
واحنا بنتكلم عن الخلفاء هنتكلم عن الأحداث دي بالتفصيل إن شاء الله، وهنتكلم عن الأحاديث إللي كان فيها إشارة لاستخلاف أبي بكر رضي الله عنه😊

احنا بقى هنسيب كل الأحداث دي ونرجع لحُجرة السيدة عائشة إللي كان فيها رسول الله ﷺ ونشوف حصل إيه، فهو ﷺ لم يُدفن حتى الآن👌

لما بيموت أي مسلم المفروض إنه بيتغسّل وبيتكفن ومعروف بيتعمل معاه إيه،
لكن موضوع تغسيل وتكفين ودفن رسول الله ﷺ يُعتبر قضية حساسة جداً ومُحيرة،
وهي من القضايا الأُولى إللي مطلوب من الصحابة إنهم يأخذوا فيها قرار بدون ما يكون رسول الله ﷺ موجود معاهم،
كان في حجرة رسول الله ﷺ مجموعة من الصحابة هم إللي هيقوموا بتغسيله هم:
◇علي بن أبي طالب رضي الله عنه، وكان هو إللي يغسله ﷺ.
◇أسامة بن زيد ومولى رسول الله ﷺ، وكانا يصبان الماء.
◇ العباس بن عبد المطلب عم النبي ﷺ واثنين من أبناء العباس هما قَثَم والفَضل، وكانوا يقلّبونه ﷺ.
◇أوْسُ بن خَوْلِيّ الأنصاري رضي الله عنه، وكان يسند رسول الله ﷺ على صدره.

احتار الصحابة في تغسيل رسول الله ﷺ، هل ينزعون ملابسه كما ينزعزن ملابس باقي الموتي عند الغسل إلا ما يستر العورة؛ ولّا يغسلونه وهو عليه ثيابه؟
لأن هناك من الأحكام الفقهية ما قد يكون خاص به ﷺ وهناك ما قد يكون عامًّا على عموم المسلمين🤷‍♂️

فلما اختلفوا ألقى اللهُ عليهم النومَ ثم كَلّمَهم مُكلّمٌ من ناحيةِ البيتِ لا يدرون مَن هو أنِ اغسلوا النبيَّ ﷺ وعليه ثيابُه،
يعني اختلفوا في الرأي، مجموعة قالت ننزع ملابسه ومجموعة قالت لأ نغسله وعليه ملابسه،
فهنا ربنا خلاهم كلهم يناموا، وبعدين سمعوا حد بيكلمهم من جانب البيت ميعرفوش هو مين وبيقول لهم إنهم يغسلوا رسول الله ﷺ وعليه ثيابه،
ممكن يكون إللي كلمهم ده مَلك والله أعلم🤷‍♂️
فقاموا إلى النبيِّ ﷺ فغسلوه وعليه قميص، يعني كانوا يصبوا الماء على الملابس إللي كان رسول الله ﷺ لابسها
ويُدَلِّكونَه بالقميصِ دونَ أيديهم"
يعني كانوا بيغسلون جسمه من فوق الثياب ولا يَمَسُّونَ بَشَرَتَه ﷺ بأيديهم👌

☆السيدة عائشة كانت تقول:
"لو استَقبلتُ من أمري ما استدبرتُ ، ما غسَلَهُ إلَّا نساؤُهُ"
يعني السيدة عائشة بتقول لو كانت عَلِمت وظَهَر لها ما كان مِن تغسيلِ رسولِ اللهِ ﷺ لكانت زوجات رسول الله ﷺ
هنَّ اللَّاتي غَسَّلوا النَّبيَّ ﷺ،
لكن لأن السيدة عائشة كانت حزينة جدا لموت رسول الله ﷺ فالفكرة دي لم تأتِ في بالها،
وهنا دليل على أن المرأة يجوز أن تغسل زوجها والعكس،
يعني الرجل يجوز إنه يغسّل زوجته،
وطبعا الكلام إللي بيقول إن المرأة إذا ماتت أصبحت أجنبية عن الزوج ومينفعش يشوفها ولا يدخل عليها والكلام ده، كل ده غير صحيح🙅‍♂️❌

بعد ما غسلوا رسول ال

له ﷺ؛ كفّنوه في ثلاثة أثواب بيض يمانية من القطن ليس فيها قميص ولا عِمَامة،
وكان تغسيل رسول الله ﷺ في صباح يوم الثلاثاء، يعني هو مات يوم الإثنين والصحابة غسلوه يوم الثلاثاء وتم دفنه في ليلة الأربعاء على الصحيح من أقوال أهل العلم؛
لأن في قول تاني بيقول إنه دُفن في آخر ليلة الثلاثاء قُرب الصبح، لكن القول الأول هو الأصح.

☆ثواني كده😳
يعني الصحابة تركوا رسول الله ﷺ أكثر من يوم كامل من غير ما يغسّلوه ولا يدفنوه😶
طب إزاي ورسول الله ﷺ كان قالهم:
" أَسْرِعُوا بِالْجَنَازَةِ ، فَإِنْ تَكُ صَالِحَةً فَخَيْرٌ تُقَدِّمُونَهَا إِلَيْهِ ، وَإِنْ تَكُ غَيْرَ ذَلِكَ فَشَرٌّ تَضَعُونَهُ عَنْ رِقَابِكُمْ"
وقال:
"إِذَا مَاتَ أَحَدكُمْ فَلَا تَحْبِسُوهُ وَأَسْرِعُوا بِهِ إِلَى قَبْره"
فإزاي بعد ده كله الصحابة يسيبوا رسول الله ﷺ الفترة دي كلها من غير غسل ولا دفن😬

مبدإيا كده عشان نبقى عارفين،
أجساد الأنبياء لا تتغير بعد الموت زي باقي أجساد البشر والأرض لا تأكل أجساد الأنبياء،
يعني حتى هذه اللحظة جسد رسول الله ﷺ كان زي ماهو لم يتغير،
والدليل على كده قول رسول الله ﷺ:
"إن الله عز وجل قد حرّم على الأرض أن تأكل أجسادَ الأنبياء عليهم السلام"
ممكن بعض الناس الصالحين والشهداء أجسادهم تفضل زي ما هي لا تتغير ولا تتحلل بعد الموت وده بيكون كرامة من الله لهم، زي كده شهداء أحد.

نيجي بقى لأسباب تأخير دفن رسول الله ﷺ:
◇أولا:
موت رسول الله ﷺ كان أمراً عظيماً، ودُهش له الناس، وطاشت قلوبهم،
واحنا شوفنا عمر القوي كان رد فعله عامل إزاي، فهم لو بإيدهم مش هيدفنوه أصلا،
يعني احنا لنا بيموت لنا حد عزيز بنبقى مش عايزين نفارقه أصلا وبنبقى مش مستوعبين إزاي هندفنه في التراب ونرجع من غيره،
فما بالكم إن إللي بنتكلم عنه ده مش أي عزيز، ده رسول الله ﷺ إللي كان أحب للصحابة من أنفسهم ومن آبائهم وأبنائهم وكل شيء في حياتهم،
فهل من الممكن إن الصحابة يدفنوا رسول الله ﷺ بعد وفاته مباشرة كده؟!
أكيد لأ طبعا👌
ده حتى السيدة فاطمة هتقول لأنس بعد ما هيدفنوا رسول الله ﷺ:
أطابَت أنفسكم أن تَحثُوا على رسول الله ﷺ التراب؟!
يعني انتم رضيتم إنكم تضعوا التراب على رسول الله ﷺ وتغطوه بيه وتسيبوه وتمشوا؟!
فالأمر كان أشد عليهم مما نتخيل والله😞
فإزاي بقى نقول إن الصحابة تأخروا في دفن رسول الله ﷺ 👌

◇ثانيا:
إختلافهم في طريقة تغسيله زي ما قلنا، وكمان اختلافهم في المكان إللي هيدفن فيه.

◇ثالثا:
اهتمام الصحابة بجمع شمل الأمة وحمايتها من التفرّق إللي يعتبر سبب رئيسي في زوالها،
ففي يوم الإثنين إللي مات فيه رسول الله ﷺ تم اختيار أبا بكر للخلافة وتمت له البيعة وأصبح هو خليفة المسلمين واستقرت الأوضاع في المدينة،
وبكده تمت حماية المدينة من فتنة شديدة كانت ممكن تحصل ويضيع كل تعب رسول الله ﷺ في السنين إللي فاتت دي كلها😢

◇رابعا:
صلاة الصحابة على رسول الله ﷺ رجالاً ونساء وصبياناً منفردين بدون إمام يؤمهم،
فبعد ما انتهى الصحابة من تغسيل وتكفين رسول الله ﷺ وضعوه على فراشه في حجرته، وبدأ الناس يدخلون على رسول الله ﷺ للصلاة عليه في مجموعات،
يعني كان بيدخل مجموعة يصلوا عليه صلاة الجنازة ويخرجوا،
ثم يدخل مجموعة أخرى يصلوا عليه ويخرجوا وهكذا، وكانوا يصلون مُنفردين، كل واحد لوحده بدون إمام،
فصلى عليه أولاً أهل بيته ﷺ وعشيرته،
ثم المهاجرون، ثم الأنصار، ثم بقية الرجال في المدينة، ثم دخلت النساء فصلت عليه، ثم بعد ذلك الصبيان، حتى صلى عليه كل المؤمنين إللي كانوا في المدينة.
فكل الأسباب دي مجتمعة كانت سبب في تأخر دفن رسول الله ﷺ.

☆طب سؤال،
ليه الصحابة مصلوش صلاة الجنازة جماعة، وكل واحد صلى لوحده ومكنش في إمام لصلاة الجنازة على رسول الله ﷺ 🤔

هو الموضوع على خلاف بين العلماء، وذكروا أسباب منها
◇أولا:
تنافُس الصحابة في تحصيل البركة من الصلاة عليه على وجه الانفراد والخصوصية من غير ما يكون حد فيهم تابع لإمام، يعني محدش فيهم كان يَقبل أن يتوسط بينه وبين رسول الله ﷺ أحد في الصلاة؛ عشان ينال الأجر والبركة.

◇ثانيا:
تعظيم النبي ﷺ في نفوسهم واحترامه، فكانوا يهابوا أن يتقدم أحد بين يديه يؤم الناس في الصلاة عليه،
فقد كان عليه الصلاة والسلام إمام الناس وقائدهم وهاديهم،
فلم يجرؤ أحد أن يَقف موقفه وأن يُنصّب نفسه مكانه بعد وفاته وبغير إذنه ﷺ،
يعني هم كرهوا أن يتخذوا إماماً بين يدي رسول الله ﷺ.

☆وهنا عايزين نوضح حاجتين:
¤أولا:
الحديث إللي رسول الله ﷺ وصّى فيه الناس إنهم يصلوا عليه فُرادى بدون إمام لما يموت؛ حديث باطل غير صحيح🙅‍♂️❌

¤ثانيا:
الحديث إللي بيقول إن رسول الله ﷺ طلب من الصحابة إنهم ينتظروا بعد تجهيزه ساعة محدش يدخل عليه حتى يصلي عليه ربه عز وجل ويصلي عليه الملائكة؛
حديث غير صحيح🙅‍♂️❌
وبالعقل حتى، لا يمكن أن يكون صحيحا، فصلاة الله على رسوله ﷺ هي ثناؤه عليه في الملأ الأعلى، وقد أثنى الله عليه في حياته ﷺ👌

◇أنا نب

هت على النقطتين دول بالذات؛ لأن في خطباء بيقولوهم، وأنا سمعت الكلام ده بنفسي، ولما بحثت لقيت إن الكلام ده غير صحيح، والمصادر هتلاقوها في التعليقات👇

طبعا بسبب إن أهل المدينة كلهم صلوا على رسول الله ﷺ فالموضوع أخد وقت،
وبقينا في ليلة الأربعاء الرابع عشر من شهر ربيع الأول للسنة الحادية عشرة للهجرة،
دلوقتي جاء وقت دفن رسول الله ﷺ،
اختلف الصحابة في مكان دفن رسول الله ﷺ، هل يدفنوه في البقيع مع باقي المسلمين، أم يدفنوه في المسجد؟
فأخبرهم أبو بكر رضي الله عنه أن رسول الله ﷺ قال:
"ما قبَضَ اللهُ نَبيًّا إلَّا في المَوضِعِ الذي يُحِبُّ أنْ يُدفَنَ فيه. ادفِنوه في مَوضِعِ فِراشِه"
يعني من خصائص الأنبياء إن المكان إللي بيموتوا فيه هو ده مكان دفنهم،
ورسول الله ﷺ كان مات على فراشه، فرفع الصحابة الفراش وبدأوا يحفروا لقبر رسول الله ﷺ.

لكن اختلفوا هل يُشَق لرسول الله ﷺ في قبره أم يُلَحّد؟
فقد كان رجلان في المدينة واحد منهم يَلحَدُ والثاني يَشُقُّ،
فقالوا:
نستخيرُ ربَّنا، ونبعثُ إليْهما، فأيُّهما سبقَ ترَكناه، فأُرسلَ إليْهما، فسبقَ صاحبُ اللَّحدِ فلحدوا للنَّبيِّ ﷺ.
يعني هم استخاروا في الشق أو اللحد، فقالوا احنا نبعت لهم وإللي ييجي الأول هو إللي هنستعمل طريقته، فجاء الرجل إللي بيَلحَد، فلحَد لرسول الله ﷺ.

☆إيه موضوع اللحد والشق ده🤔

◇صفة الشَّق:
هو أن يُحفَر في وسَط القبر حفرة على قَدْر الميت، ويُبنى جانباها بالطوب اللَّبِن حتى لا تنضم على الميت،
ويُوضع فيها الميت على جنبه الأيمن مُستقبلاً القبلة،
يعني يا جماعة بيتحفر حفرة كبيرة عادي، وفي نص الحفرة تحت بيتحفر حفرة تانية على أد الميت،
وبعدين يتبنى بالطوب على الجانبين،
فكده الجانبين هيكونوا مرفوعين والميت في النص، وبعد كده يتعمل زي سقف للحفرة دي بأحجار أو غيرها، بحيث إنها تبقى مرفوعة عن الميت ولا تمسه،
وبعدين يوضع التراب فوقها.

◇صفة اللَّحْد:
بيتحفر برده حفرة كبيرة، وفي جدار الحفرة الأقرب إلى القبلة بيتم حفر فيه مكان على أد الميت، ويُوضع فيه الميت على جنبه الأيمن مستقبل القبلة،
يعني وجهه يكون للداخل، ثم تُسد هذه الحفرة بالطوب اللِّبن خلف ظهر الميت، ثم يوضع عليه التراب ويتم ردم القبر.

هتلاقوا صورتين في التعليقات بتوضح الفرق بين اللحد والشق👇 أو ممكن تبحثوا عنها على النت وهتعرفوا الفرق.

واللحد والشق جائزان بإجماع العلماء، لكن اللحد أفضل؛ لأنه هو الذي فُعل بقبر رسول الله ﷺ.

بعد ما حفروا القبر على هيئة اللحد وضعوا فيه رسول الله ﷺ وأهالوا عليه التراب😢
وبكده تم غلق أهم صفحة من صفحات تاريخ البشرية😞

يقول أنس بن مالك رضي الله عنه:
"وما نفَضنا عنِ النَّبيِّ ﷺ الأيديَ حتَّى أنْكَرْنا قلوبَنا"
يعني إزاي هيقدروا يعيشوا في الحياة بدون رسول الله ﷺ،
وإزاي هم هيمشوا على الأرض ورسول الله ﷺ يرقد تحت الأرض،
مش لاقيين الصَّفاءِ والرِّقَّةِ والأُلفَةِ إللي كانت في قلوبهم لما كان رسول الله ﷺ بينهم،
القلوب وكأنها ليست القلوب، كان رسول الله ﷺ يمدها بنور وهدى وأمان وراحة واطمئنان،
أما الآن فقلوبنا ليست هي القلوب التي كانت يوم كان رسول الله ﷺ حياً بين أَظُهرِنا،
السيدة فاطمة بعد دفن رسول الله ﷺ قالت لأنس:
"أطابت أنفسكم أن تحثوا على رسول الله ﷺ التراب؟!"
هان عليكم تحطوا تراب على رسول الله ﷺ!!
أكيد لأ طبعا، لكن هيعملوا إيه😞
ده قدر كتبه الله عز وجل على كل عباده، ولا راد لقضائه،
ولعل الشيء الوحيد إللي كان بيصبّر الصحابة على فراق رسول الله ﷺ ويصبرنا احنا كمان إنهم على موعد معه يوم القيامة عند الحوض،
فقد كان رسول الله ﷺ يقول لهم:
"موعدَكم الحوضُ"
وهو موعدنا مع رسول الله ﷺ يوم القيامة، ولعل الله أن يجمعنا به في الجنة مع صحابته الكرام رضي الله عنهم أجمعين بحبنا لهم؛
فقد قال رسول الله ﷺ لرجل سأله عن الساعة:
وماذا أعددت لها؟
فقال الرجل لرسول الله ﷺ:
لا شيء إلا أني أحب الله ورسوله، فقال ﷺ:
《أنت مع من أحببت》
فنحن نحب رسول الله ﷺ ونحب أبا بكر وعمر وعثمان وعلي وحمزة ومصعب وياسر وعمار وسمية وأنس بن النضر وسعد بن معاذ،
وسلمة بن الأكوع ومحمد بن مسلمة وعبد الله بن أُنيس وأسيد بن حضير وسعد بن عبادة وأبو هريرة و......
نحن نحب المهاجرين والأنصار ونحب كل الصحابة ونرجوا أن نكون معهم بحبنا لهم وإن لم نعمل بمثل أعمالهم.

نسأل الله عز وجل كما آمنا برسولنا ﷺ ولم نره أن يحيينا على سنته ويُميتَنا عليها ويحشرنا معه ويجعلنا من رفقائه في الجنة🤲


مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي.


#Eman_Shalapy

⭐المصادر ⭐
https://audio.islamweb.net/audio/index.php?page=FullContent&audioid=208318

https://dorar.net/hadith/sharh/7681

https://dorar.net/aqadia/3801/<br/>ثانيا:-النصوص-المشيرة-إلى-خلافته

https://www.dorar.net/hadith/sharh/71135

https://www.islamweb.net/ar/fatwa/145791/وفاة-رسول-الله-صلى-الله-عليه-وسلم

https://www.google.com/amp/s/islamqa.info/amp/ar/answers/132135

https://www.google.com/amp/s/islamqa.info/amp/ar/answers/143425

https://www.islamweb.net/ar/fatwa/79727/هل-الأرض-لا-تأكل-أجساد-غير-الأنبياء

https://www.islamweb.net/ar/fatwa/111678/ما-صحة-حديث-خمسة-أجساد-حرمها-الله-على-الأرض-أن-تأكلها-الأنبياء-والشهداء

https://www.islamweb.net/ar/fatwa/13989/

https://www.islamweb.net/ar/fatwa/375952/هل-صلي-على-النبي-صلى-الله-عليه-وسلم-بعد-موته-في-المسجد-أو-في-حجرته

https://www.google.com/amp/s/islamqa.info/amp/ar/answers/100100

https://al-maktaba.org/book/31621/5235

https://www.google.com/amp/s/islamqa.info/amp/ar/answers/154278

https://www.google.com/amp/s/islamqa.info/amp/ar/answers/177349

https://dorar.net/hadith/sharh/70177

https://dorar.net/hadith/sharh/86106

https://islamqa.info/amp/ar/answers/103880

https://www.dorar.net/hadith/sharh/35964

https://audio.islamweb.net/audio/index.php?page=FullContent&audioid=208264

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

قناة الفقة الميسر للشيخ /سامح حبيب

https://t.me/fiqhmoyasr

《خاتمة السيرة النبوية 》

♡كده يا جماعة احنا خلصنا قصص الأنبياء من أول خلق آدم عليه السلام وحتى خير الخلق محمد ﷺ،
فالحمد والفضل والمِنّة لله وحده😊

وبكده نكون خلصنا الكلام بالتفصيل عن رُكنين من أركان الإيمان وهما:
الإيمان برُسل الله وبالكتب التي أنزلها الله على رسله،
فجزاكم الله خيرا على صبركم معي مدة سنتين إلا ثلاثة أشهر😅
من بداية قصص الأنبياء في ديسمبر ٢٠١٨
وحتى سبتمبر ٢٠٢٠

وجزاكم الله خيرا على دعمكم وتشجيعكم وإعطائي الفرصة إني أتكلم عن رسول الله ﷺ والصحابة😊
وهقول لكم على حاجة ممكن تستغربوها جدا👌
وهو السبب إللي خلاني أكتب عن رسول الله ﷺ وأحاول أوصل حياته للناس😅
لما كنت صغيرة مكنتش بحب رسول الله ﷺ ولا بحب الصحابة، وكنت بتضايق وبتعصب لما حد يتكلم عنهم سواء في درس أو في كتب المدرسة تخيلوا🙈
يمكن بسبب الصورة المُشوّهة إللي كانت واصلة لي عنهم وإنهم كانوا أشخاص مُخادعين زي ما كانوا بيعلمونا في كتب المدرسة للأسف،
ده غير كمان مغالاة الناس في رسول الله ﷺ إللي هو نفسه نهى عنها، فكل ده ترك أثر سلبي عندي،
واستمر الحال لحد ما سمعت مجموعة أحاديث متتالية:
قَالَ عمر لرسول الله ﷺ:
وَاللَّهِ يَا رَسُولَ اللَّهِ لأَنْتَ أَحَبُّ إِلَيَّ مِنْ كُلِّ شَيْءٍ إِلا نَفْسِي، فَقَالَ رَسُولُ اللَّهِ ﷺ:
لا، وَالَّذِي نَفْسِي بِيَدِهِ، حَتَّى أَكُونَ أَحَبَّ إِلَيْكَ مِنْ نَفْسِكِ،
قَالَ عُمَرُ:
فَأَنْتَ الآنَ، وَاللَّهِ، أَحَبُّ إِلَيَّ مِنْ نَفْسِي، فَقَالَ رَسُولُ اللَّهِ ﷺ: الآنَ يَا عُمَرُ"
وحديث:
ثلاث من كُن فيه وجد حلاوة الإيمان:
أن يكون الله ورسوله أحبَّ إليه مما سواهما، وأن يحبَّ المرء لا يحبه إلا لله، وأن يكرهَ أن يعود إلى الكفر كما يكره أن يُقذفَ في النار"
وحديث:
"لا يؤمن أحدكم حتى أكون أحب إليه من والده وولده والناس أجمعين"
فالموضوع بالنسبة لي كان صدمة، إزاي يعني الدين بيطلب مني أحب حد أنا أصلا مش قادرة أحبه، ونفسيا مش قادرة أتقبله،
ده غير محاضرة علموا أولادكم حب الصحابة للشيخ أبو إسحاق الحويني إللي لما سمعتها كانت بالنسبة لي صدمة زيادة😶
فهنا كانت نقطة التحول، أنا لازم أعرف مين هو محمد رسول الله ﷺ ده، ومين هم الصحابة دول،
ماهو لو كان من مطلوب مني أحب حد مستحيل أحبه كده من غير ما أعرف عنه حاجة،
ويشاء ربنا إن دكتور طارق السويدان في الوقت ده كان عاملة سلسلة السيرة النبوية وكانت لسه نازلة شرائط كاسيت،
حسيت إن ربنا أرسلها لي،
《طبعا مع التحفظ على الأحاديث الضعيفة الكثيرة إللي هو قالها في المجموعة دي》
المهم أنا عَكفْت على محاضرات السيرة لحد ما خلصتهم في يومين ونص،
وبعدها قلبي تغير تماما من ناحية رسول الله ﷺ والصحابة وعرفت مين هو رسول الله ﷺ،
وعرفت الأذى إللي اتعرض له في سبيل تبليغ الدين لنا،
وعرفت كمية الابتلاءات إللي تعرض لها،
وعرفت معنى إن أي حد يُصاب بمصيبة فليتذكر مصابه برسول الله ﷺ فالمصيبة فيه هي أعظم المصائب،
وعرفت ليه لازم نتعلم حب الصحابة ونعرف مكانتهم ومنسمحش أبدا لأي حد إنه يتطاول عليهم،
وإن الدين بتاعنا ده وصّلوه لنا بالدم في حين إننا مضيعينه ومش متمسكين بيه وهو أول حاجة بنفرط فيها ومش بنبذل أقصى طاقتنا عشان نوصله لكل البشر،

السيرة من بعدها بقت جزء من حياتي، أنا مش فاكرة عدد المرات إللي سمعت فيها السيرة،
كل إللي فاكراه إني كنت عايشة مع رسول الله ﷺ من خلال أحداث السيرة،
بقيت أدور على أي محاضرات بتتكلم عن رسول الله ﷺ وعن الصحابة، بقوا فعلا كل حياتي، وسبحان مغير القلوب،
بقى همي إني أوصل للناس وأعرفهم مين هو رسول الله ﷺ ومين هم الصحابة وأحاول إني أزرع حبهم في القلوب من باب إني أكفّر عن الوقت إللي مكنتش بحبهم فيه،
ويمكن يكون في ناس كانت زيي، واصل لها فكرة غلط أو فكرة سيئة عن رسول الله ﷺ وعن الصحابة،
فلما يقرأوا السيرة الصحيحة عن رسول الله ﷺ ويعرفوا الرد على الشبهات زي ما شرحت من خلال الحلقات؛
ساعتها هيغيروا وجهة نظرهم ويحبوا رسول الله ﷺ فعلا ليذوقوا طعم الإيمان ولما يقابلوه على الحوض يشربوا من حوضه ولا يُقال لهم:
سُحقا لمن بدّل بعدي وغيّر👌

♡أتمنى إني أكون زرعت ولو بذرة حب بسيطة لرسول الله ﷺ وللصحابة في قلب كل قارئ،
وإني أكون عرّفتكم ببعض تفاصيل حياته ﷺ، وإلا فالسيرة طويلة ومليانة بالأحداث وعجائبها لا تنتهي،
وأتمنى طبعا إنكم زي ما عرفتم عن رسول الله ﷺ والصحابة إنكم تعرّفوا غيركم،
وإنكم تتبعوهم وتدافعوا عنهم ضد الناس إللي بتهاجمهم ومش عارفة قدرهم.

♡وأخيرا،
السيرة مينفعش نقرأها أو نسمعها مرة وخلاص، دي لازم تكون جزء من حياتنا زي الأكل والشرب كده،
بالطريقة دي هنقدر نحولها لمنهج حياة نعيشه كأننا كنا عايشين مع رسول الله ﷺ والصحابة،
وهنفهم آيات القرآن وهنعرف من خلالها الفقه والعقيدة والتربية وكل ده من غير ما نحس، فلو اتقنّا السيرة؛ اتقنا كل العلوم الشرعية تقريبا في إيدنا👌
يعلم الله إني كنت حريصة جدا إني أوصلكم المعلوم

ة الصحيحة فقط عن رسول الله ﷺ وإني كنت ببعد عن كل الأحاديث الضعيفة وبوضحها لكم،
وحتى لو المعلومة أنا عارفاها كنت ببحث عنها تاني وأكثر من مرة وفي مواقع مختلفة عشان أتأكد من صحتها قبل ما أنقلها،
لكن انتم عارفين إن احنا بشر، ممكن نقع في خطأ أو سهو أو نسيان، فلو كنت فعلا وقعت في حاجة منها فمني ومن الشيطان والله ورسوله منه بَراء،
وما كان من خير فمن فضل الله وكرمه،
وأعوذ أن أذكركم به وأنساه.

♡أختم بأبيات شعرية بسيطة وسهلة، الأبيات دي سمعتها أول مرة لما كان عمري ١١ سنة، لكن محستش بمعناها العميق في قلبي غير بعد ما خلصت السيرة،
تقدروا تقولوا إنها بتعبر عن حياة كل واحد من الصحابة، وإللي المفروض احنا كمان نكون عليها:

أنا المسلمُ دستورِي ومِنْهاجِي كتابُ الله

وقائدُ دَربيَ الهادِي محمدُنَا رسول الله

ودارِي موطنُ الإسلامِ ما دَوَّى نداءُ الله

وأهلِي أمةُ الإسلامِ همْ حِزْبي وحزبُ الله

وزَادِي بعدَ توحيدِي ونِعمَ الزَّاد تقوَى الله

أنا المسلمُ قلبِي خافقٌ دومًا بحبِّ الله

وأقْوَالِي وأعمَالِي أُعطِّرُها بذِكر الله

فبسمِ اللهِ أَبْدؤُها وأَختِمُها بحمدِ الله

وهمِّي في الحياةِ هدايةُ الدنيا لدينِ الله

فَعَيْشِي إنْ أَعِش لله وموتِي في سبيل الله

أنا المسلمُ لا أَرجو ولا أَخْشى سِوَى ربِي

عزيزُ النفس لا أَحْنى لغير الله من صُلْبِي

ّسليمُ القلبِ لا أحملُ للناسِ سِوَى الحُبِّ

ِغزيرُ الدّمْعِ في المِحرابِ لَيْثُ الغَابِ في الحَربِ

ِأنا درعٌ لأوطاني أنا حامِي حِمَى الشَّعبِ

ُأنا بالعدلِ والإحسانِ مأمُورٌ وأَمَّارُ

ُأنا نبعٌ لكلِّ الناسِ بالخيراتِ فَوَّارُ

ُرحيمُ القلبِ لكني على الطَّاغِينَ جَبَّارُ

ُأنا كالماءِ رقراقٌ أنا كالسيفِ بَتَّارُ

ُأنا نَجمٌ أنا رَجْمٌ أنا نُورٌ أنا نارُ

أنا المسلمُ دستورِي ومِنْهاجِي كتابُ الله

وقائدُ دَربيَ الهادِي محمدُنَا رسول الله

ودارِي موطنُ الإسلامِ ما دَوَّى نداءُ الله

وأهلِي أمةُ الإسلامِ همْ حِزْبي وحزبُ الله

وزَادِي بعدَ توحيدِي ونِعمَ الزَّاد تقوَى الله

نلتقي على خير إن شاء الله في السلسة القادمة سلسلة الخلفاء الراشدين😁

لكن اسمحولي محتاجة آخد وقت مُستقطع قبل ما أبدأ فيها عشان أرتب أموري وحالي وخصوصا إن الدراسة داخلة والعيال محتاجين متابعة في زمن الكورونا😅
أول ما أموري تتظبط إن شاء الله وأكتبها هعلن عنها وأنزلها لكم👌

♡دمتم سالمين مُعافين في الدين والدنيا😊
#Eman_Shalapy