⭐المصادر⭐

https://binbaz.org.sa/fatwas/6864/صفة-حج-النبي-عليه-الصلاة-والسلام

https://binbaz.org.sa/fatwas/26419/اكمال-الحديث-عن-حجة-النبي-صلى-الله-عليه-وسلم

https://www.ahlalhdeeth.com/vb/showthread.php?t=295285

https://binbaz.org.sa/fatwas/7874/نوع-حج-الرسول-عليه-الصلاة-والسلام

https://dorar.net/feqhia/2943/المبحث-الثالث:-القران-في-الحج

https://www.dorar.net/hadith/sharh/139706

https://dorar.net/hadith/sharh/8863

http://hadithportal.com/index.php?show=hadith&h_id=1496&sharh=31717&book=33

https://binbaz.org.sa/fatwas/7206/ما-تفعله-المراة-اذا-اصابها-الحيض-او-النفاس-في-الحج

https://www.alukah.net/sharia/0/45801/#_ftn4

https://dorar.net/feqhia/2995/الفصل-الثاني:-وقت-طواف-القدوم،-ومتى-يسقط؟

Watch "شرح صفة حج النبي ﷺ (1) | الشيخ عبدالعزيز الطريفي" on YouTube
https://youtu.be/RZJod6VPAuE

Watch "شرح صفة حج النبي ﷺ (2) | الشيخ عبدالعزيز الطريفي" on YouTube
https://youtu.be/G-SkQyNpBPM
https://dorar.net/feqhia/516/المطلب-الثاني:-الطواف

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائتين_وخمسة_وعشرين
#أحداث_السنة_العاشرة_من_الهجرة
#حجة_الوداع_الجزء_الثالث
#يوم_عرفة

قبل ما نبتدي جزء النهاردة عايزة أوضح نقطة عشان اتكرر السؤال عنها،
بالنسبة لحج المتمع فهو عليه هدي،
لكن أنا مأجلة الكلام عن الهدي لحد ما ييجي وقته،
هتبقى زي حلقة كاملة كده عن ذبح الهدي،
ومين إللي عليه الهدي ومكان ذبح الهدي فين بالضبط،
ولو تفتكروا أنا قايلة في الجزء الأول من الرحلة إن المتمتع يجب عليه هدي،
بس أنا مذكرتش التفصيل بتاعه، عشان زي ما قلت هتبقى حلقة كاملة عن الهدي إن شاء الله 😊

ندخل بقى في جزء النهاردة😁
قلنا المرة إللي فاتت إن رسول الله ﷺ قعد في مكة أربع أيام لحد اليوم الثامن من ذي الحجة،
واليود ده اسمه يوم 《التَّروِيَة》
وهو اليوم إللي بيُحرِم فيه الحجاج للحج، وبيخرجوا وقت الضحى وبيتجهوا لمِنَى عشان يبيّتوا فيها،
واتسمى بالاسم ده لأن أهل مكة كانوا يرتوون من الماء فيه لما بعد مِنَى،
يعني بياخدوا معاهم مية تكفيهم للمبيت بمنى ومن بعدها الوقوف بعرفة عشان المية كانت قليلة في مِنَى،
وقيل إن سبب التسمية إن إبراهيم عليه السلام رأى رؤيا ذبح ابنه إسماعيل في ليلة اليوم الثامن من ذي الحجة،
فلما أصبح بقى يَروِي في نفسه أهو حلم؟ أم من الله؟ فسُمّيَ يوم التروية👌

يبقى في يوم التروية في وقت الضحى خرج رسول الله ﷺ باللي معاه من المسلمين في اتجاه مِنى،
الصحابة إللي كانوا تحللوا من العمرة هيُحرِموا من مساكنهم إللي هم قاعدين فيها وكانوا نزلوا مكان اسمه الأبْطُح،
فقال لهم رسول الله ﷺ إنهم يحرموا من الأبطح،
فأحرموا منها وعملوا نفس إللي عملوه عند الميقات من اغتسال وتطيب ولبس الاحرام و...و....إللي اتكلمنا عنه في الجزء الأول من بداية الرحلة،
ويدخل معاهم برده إللي عايز يحج من أهل مكة هيعمل زيهم بالضبط،
أما بقى الحاج المُفرِد والمُقرِن فهو باقي على إحرامه الأول فهيخرج مباشرة لمِنى،
وهو ده إللي عمله رسول الله ﷺ، خرج على طول إلى منى في وقت الضحى،
مِنَى ده وادي يحيط بيه الجبال، موجود على الطريق بين مكة وجبل عرفة،
ووادي منى بعيد عن المسجد الحرام بحوالي ستة كيلو متر،
واتسمت مِنى بالاسم ده بسبب كثرة الدماء التي تُراق فيها، والمقصود هنا دماء الهَدْي؛ لأن الهدي بيُذبح في منى،
وده قول جمهور أهل اللغة،
وفي أقوال تانية زي: إن ربنا يَمُنّ على عباده بالمغفرة في منى، وغيرها من الأقوال💁‍♂️

وصل رسول الله ﷺ منى وقعد فيها طول اليوم، وصلّى فيها بالمسلمين إماما الظهر والعصر والمغرب والعشاء،
صلاهم قصر في وقتهم، يعني صلى الظهر ركعتين في قت الظهر،
وصلى العصر ركعتين في وقت العصر،
المغرب مفهوش قصر فصلاه ثلاث ركعات في وقتها،
العشاء صلاها ركعتين في وقتها، فهو مجمعش بين الصلوات👌
وطبعا المسلمين كلهم صلوا وراه قصر حتى أهل مكة، فلو كان مثلا يجب عليهم التمام كان طلب منهم إنهم يتموا الصلاة، لكن ده محصلش،
فكده يبقى الصلاة في منى في يوم التروية تكون قصر سواء للحجاج من خارج مكة أو من أهل مكة نفسهم، وده قول الإمام مالك،
في قول تاني بيقول إن أهل مكة يتموا الصلاة عادي أربع ركعات؛ لأنهم مش على سفر،
والطبيعي إن الأمور تبقى على الأصل مادام مفيش دليل يقول عكس كده👌

خلال اليوم كله كان رسول الله ﷺ يُكثر من التلبية:
"لبيك اللهم لبيك....لبيك لا شريك لك لبيك...إن الحمد والنعمة لك والملك، لا شريك لك"

بعد ما صلّى رسول الله ﷺ مع المسلمين العشاء باتوا كلهم في منى،
وصلوا الفجر وانتظروا لحد ما الشمس طلعت وبعدين توجهوا لجبل عرفات👌
أمر رسول الله ﷺ إنه يتعمل له قُبّة في منطقة نَمِرَة،
والقبة حاجة كده زي خيمة، ونمرة هي قرية صغيرة قريبة من عرفات،
وفيها دلوقتي مسجد كبير جدا اسمه مسجد نمرة، إللي بتشوفوه في التليفزيون والحجاج بيصلوا فيه قبل ما يروحوا يقفوا على جبل عرفات😅
المهم دلوقتي إن رسول الله ﷺ توجه لمنطقة نَمِرَة، وكانت قريش في الجاهلية وإللي تبعهم لا يقفوا على جبل عرفات،
لكن بيقفوا على المُزْدَلِفة،
وباقي العرب بيقفوا على جبل عرفات، والمُزْدَلِفة مكان بين منى وعرفات، ويُسمى المَشْعَر الحرام،
فقريش لما شافت رسول الله ﷺ جاي كانوا متأكدين إنه هيقف في مزدلفة زي ما كانوا بيعملوا في الجاهلية،
لكن رسول الله ﷺ تجاوز المشعر الحرام أو المزدلفة وتوجه ناحية جبل عرفات،
وصل رسول الله ﷺ للخيمة إللي كانت اتعملت له في قرية نمرة، فقعد هناك لحد ما دخل وقت صلاة الظهر،
وبعدين أمر الصحابة إنهم يأتوا بناقته القَصْوَاء وركب عليها واتجه نحو بطن وادي عَرنة قريب من جبل عرفات،
ووقف هناك وخطب في الناس خطبة عرفة، وهي خطبة الوداع😢
وكان عدد الحجاج أكثر من مائة ألف حاج،
وده عدد كبير جدا،
من حوالي سنة واحدة تقريبا كان عدد المسلمين في غزوة تبوك ثلاثين ألف،
دلوقتي وصلوا في بعض الروايات إلى مائة وأربعين ألف مسلم👌
رسول الله ﷺ خطب الناس ثلاث خطب:
◇الأولى: يوم عرفة.
◇والثانية: يوم ا

لنَّحر بمِنى.
◇والثالثة: أوسط أيام التشريق بمنى.

بدأ رسول الله ﷺ خطبته في يوم عرفة بالحمد والثناء على الله عز وجل، وبعدها قال:
" أَمَّا بعد، أيّهَا النّاس، اسْمَعُوا منّي أُبّينْ لَكُمْ،
فَإنّيَ لاَ أَدْرِي، لعَليّ لاَ أَلْقَاكُمْ بَعْدَ عَامي هَذَا، في مَوْقِفي هذا..."
يعني بيقولهم يسمعوا ويشوفوا إللي بيعمله عشان يطبّقوه لأن ممكن تكون دي آخر مرة رسول الله ﷺ يجتمع معاهم،
ودي إشارة منه لاقتراب أجله ﷺ،
وكان رسول الله ﷺ في مناسك الحج بيُكثر من قوله:
"لِتَأْخُذُوا مَنَاسِكَكُمْ فَإِنِّي لَا أَدْرِي لَعَلِّي لَا أَحُجُّ بَعْدَ حَجَّتِي هَذِهِ"

أكمل رسول الله ﷺ خطبته وقال:
"أَيُهَا النَّاس،
إنّ دِمَاءَكُمْ وَأمْوَالَكُمْ وَأَعْرَاضَكُمْ عَليكُمْ حَرَامٌ إلى أنْ تَلْقَوْا رَبَّكُمْ، كَحُرمَةِ يَوْمِكُمْ هَذَا في شَهْرِ كُمْ هَذَا في بَلَدِكُم هَذَا..."
يعني محدش يعتدي على أخوه المسلم ولا يأخذ أمواله ولا يعتدي على عرضه،
وجعل رسول الله ﷺ حرمة الدماء والأعراض والأموال زي حُرمة الشهر الحرام، والبلد الحرام، ويوم عرفة👌

وقال:
"وإنكم ستلقون ربكم فيسألكم عن أعمالكم وقد بلّغت،
فَمَنْ كَانَتْ عِنْدَهُ أَمَانةٌ فليؤُدِّها إلى مَنْ ائْتمَنَهُ عَلَيها...."
يعني بيؤكد على إن في يوم قيامة، وإن كل إللي الناس بيعملوه هيتسألوا عنه يوم القيامة وإنه عمل إللي عليه وبلغهم 🤷‍♂️
فأي حد عنده أمانة يرجعها لصحابها؛ لأنه لو مرجعهاش في الدنيا هيقابل ربنا وساعتها هيحاسبه وياخد من حسناته ويعطيها للي مرجعلوش الأمانة بتاعته 👌

أكمل رسول الله ﷺ وقال:
"وإن كل رِبا موضوع، ولكن لكم رءوس أموالكم لا تَظلِمون ولا تُظلَمُون، و قضى الله أنه لا ربا،
وإن ربا عمي العباس بن عبد المطلب موضوع كله،
وأن كل دم كان في الجاهلية موضوع وإن أول دمائكم أضع دم عامر بن ربيعة بن الحارث بن عبد المطلب، فهو أول ما أبدأ به من دماء الجاهلية...."
يعني رسول الله ﷺ أبطل الربا، وقال إن الواحد له رأس ماله فقط أما الزيادة فلا تحل له،
وعشان الناس يتقبلوا الأمر وينفّذوه جعل نفسه قدوة للناس بإنه أنهى ربا عمه العباس،
وأبطل الثارات إللي كانت بين القبائل في جاهليتهم،
يعني مفيش قبيلة تهجم على قبيلة عشان كان في ثأر من أيام الجاهلية،
وبرده رسول الله ﷺ بدأ بالثأر إللي في قبيلته عشان يبقى الموضوع مقنع وسهل التنفيذ على الناس👌

وقال:
"وإن مآثر الجاهلية موضوعة غير السِّدَانة والسقاية،
والعَمْد قَوَدٌ ، وشِبه العَمد ما قتل بالعصا والحجر وفيه مائة بعير فمن ازداد فهو من الجاهلية..."
يعني أعمال الجاهلية كلها المخالفة لشرع الله باطلة لا تصح، ومن أعمال الجاهلية الغير موضوعة السِّدانة والسقاية،
والسدانة معناها:
العناية بالكعبة والقيام بشؤونها من فتحها وإغلاقها وتنظيفها وغسلها وكِسوتها وإصلاح هذه الكسوة إذا تمزقت واستقبال زوّارها وكل ما يتعلق بذلك.
أما السقاية معناها توفير الماء للحجيج،
ويقول رسول الله ﷺ إن العَمْد قَوَدٌ، يعني إللي بيقتل مسلم متعمد جزاؤه القتل قصاصا،
أما القتل الغير العمد زي لو واحد ضرب واخد بعصا أو بحجارة، فالقاتل يدفع دِيَة لأهل المقتول،
وهي مائة ناقة أو ما يساويها، ومفيش زيادة، وإللي يزوّد يبقى كده من أهل الجاهلية👌

وقال رسول الله ﷺ في الخطبة:
"اتقوا الله في النساء فإنكم أخذتموهن بأمان الله واسْتحلَلْتم فروجهن بكلمة الله،
ولكم عليهن أن لا يُوطِئنَ فُرشَكُم أحداً تكرهونه فإن فعلن ذلك فاضربوهن ضرباً غير مبرح، ولهن عليكم رزقهن وكسوتهن بالمعروف..."
ومعنى الكلام إن رسول الله ﷺ بيقول للناس خافوا مِن اللهِ وأدُّوا حقَّ النِّساءِ الزَّوجاتِ؛ بإنصافِهنَّ ومُراعاةِ حقِّهنَّ،
فأنتم أخذتموهن بعهد الله واستحللتم فروجهن بالعقدِ الَّذي نشَأَ مِن كلمتَيْ إيجابٍ وقَبولٍ بين الوليِّ والزَّوجِ،
ومن حق الزوجة على زوجها إنه يأكلها ويجيب لها ملابس تلبسها،
وبعد ما وصى رسول الله ﷺ الرجال على النساء، بيّن حق الزوج على الزوجة إنها لا يجوز إنها تُدخل بيت زوجها حد هو بيكرهه،
ولو المرأة عملت كده من حق زوجها يضربها ضرب بسيط غير مبرّح👌

☆وقبل ما حد يعترض هنا ويقول ويضربها ليه أصلا والكلام ده😬
هنقول هي متدخلش البيت حد بيكرهه وخلاص ومش هيبقى في ضرب ولا حاجة ولا في أي مشكلة أصلا وخلصنا🤷‍♂️
ماهو مينفعش يعني يبقى في قانون إن إللي يركن مثلا العربية بتاعته في المكان الفلاني عربيته هتتشال وهيدفع غرامة؛
فاحنا بقى نروح نركن في المكان ده ونتخانق ليه القانون الفلاني معمول🙃
متركنش وخلاص في المكان ده ويبقى مفيش مشكلة من الأساس💁‍♂️
فالمرأة متدخلش بيت زوجها أي حد زوجها ميحبش إنه يدخل وخلاص ومن غير وجع دماغ🤷‍♂️

أكمل رسول الله ﷺ وقال:
" وَقَدْ تَرَكْتُ فِيكُمْ مَا لَنْ تَضِلُّوا بَعْدَهُ إِنِ اعْتَصَمْتُمْ بِهِ، كِتَابُ اللهِ، وَأَنْتُمْ تُسْأَلُونَ عَنِّي، فَمَا أَنْتُمْ قَائِلُونَ؟
قَالُوا:
نَشْهَدُ أَنَّكَ قَدْ بَلَّغْتَ وَأ

َدَّيْتَ وَنَصَحْتَ،
فَقَالَ: بِإِصْبَعِهِ السَّبَّابَةِ، يَرْفَعُهَا إِلَى السَّمَاءِ وَيَنْكُتُهَا إِلَى النَّاسِ: اللهُمَّ اشْهَدْ، اللهُمَّ اشْهَد" ثَلَاثَ مَرَّاتٍ
يعني رسول الله ﷺ بيوصينا وبيقولنا إن احنا لو تمسكنا بكتاب الله وطبقنا كل إللي فيه عمرنا ما هنضل أبدا👌

☆ممكن حد ظريف لطيف يطلع يقولنا:
أهه النبي نفسه قال تمسكوا بكتاب الله مجبش سيرة السنة🤷‍♂️
فاحنا خلاص بقى نعمل بالقرآن ومنعملش بالسنة☺

وطبعا الكلام ده باطل، لأن القرآن ربنا قال فيه:
"وَأَطِيعُوا اللَّهَ وَأَطِيعُوا الرَّسُولَ"
وقال:
"وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا"
فانت يا أذكى اخواتك لازم تتبع ما جاء به رسول الله ﷺ من أقوال أو أفعال أو تقرير لأن ربنا أمرنا بكده في القرآن إللي انت بتقول عايز تتمسك بيه هو بس🙄

المهم بقى رسول الله ﷺ بيقول لهم إن ربنا هيسألهم عن رسول الله ﷺ يوم القيامة هل وصّل الرسالة كاملة لهم، فانتم ساعتها هتقولوا إيه؟
قالوا نشهد إنك نصحتنا ووصلت لنا الرسالة كاملة، فقال اللهم اشهد☝️ ثلاث مرات.

بعد ما أنهى رسول الله ﷺ الخطبة أمر بلال فأذن وبعدين أقام الصلاة،
وصلى رسول الله ﷺ الظهر ركعتين وبعدها أقام بلال الصلاة مرة تانية وصلى رسول الله ﷺ العصر ركعتين،
فالسنة للحجاج إنهم يصلوا الظهر والعصر جمع تقديم ويقصروا الصلاة،
وبعد كده توجه رسول الله ﷺ ومعاه الصحابة لجبل عرفات ووقفوا عليه،
وجعل رسول الله ﷺ وجهه إلى القبلة، وقال:
"وقفتُ هاهنا وعرفة كلها موقف"
وقعد يدعو ﷺ ويتضرع إلى الله وهو رافع يديه لحد ما غابت الشمس،
ويجوز للحاج إنه يأكل ويشرب، بل السنة إن يكون مُفطر وليس صائم عشان يقدر يتقوّى على العبادة والذكر والدعاء،
والدليل على كده إن أم الفضل زوجة العباس أرسلت زي كوباية كده فيها لبن لرسول الله ﷺ فشربه وهو على ناقته فعرف الناس إنه مش صائم،
وقال رسول الله ﷺ عن الوقوف بعرفة:
" الحج عرفة"
يعني الركن الأعظم في الحج هو الوقوف بعرفة، لو واحد عمل كل مناسك الحج ولم يقف بعرفة فكده ملوش حج👌

ويستمر الوقوف بعرفة لحد فجر يوم النّحْر.

إيه هو يوم النّحر ده وبيحصل فيه إيه؟
ده إللي هنعرفه 《بكرة》 إن شاء الله 😁

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

⭐المصادر ⭐

https://www.islamweb.net/ar/fatwa/61684/سبب-تسمية-يوم-التروية

https://mawdoo3.com/لماذا_سميت_منى_بهذا_الإسم

https://islamstory.com/ar/artical/1708/يوم-التروية-الثامن-من-ذي-الحجة

https://dorar.net/hadith/sharh/91552

https://ar.islamway.net/article/18029/خطب-النبي-صلي-الله-عليه-وسلم-في-حجة-الوداع

https://www.google.com/amp/s/islamqa.info/amp/ar/answers/209483

https://binbaz.org.sa/audios/373/06-من-قوله-اليوم-اكملت-لكم-دينكم-واتممت-عليكم-نعمتي-ورضيت-لكم-الاسلام-دينا

https://binbaz.org.sa/fatwas/26419/اكمال-الحديث-عن-حجة-النبي-صلى-الله-عليه-وسلم

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائتين_وستة_وعشرين
#أحداث_السنة_العاشرة_من_الهجرة
#حجة_الوداع_الجزء_الرابع
#جمرة_العقبة

اتكلمنا المرة إللي فاتت عن رسول الله ﷺ لما راح وقف على عرفة وقلنا إن زمن الوقوف بعرفة من وقت صلاة ظهر يوم عرفة لحد فجر تاني يوم إللي هو يوم النَّحر،
فأي حاج وقف على عرفة خلال الفترة الزمنية دي ولو فترة بسيطة يتحسب له الحج، زي ما رسول الله ﷺ قال إن الحج عرفة👌
لكن إللي يأتي عرفة في النهار يجب عليه الوقوف لحد غروب الشمس مينفعشي يمشي قبل كده زي ما رسول الله ﷺ عمل💁‍♂️
رسول الله ﷺ استمر واقف بعرفة من بعد زوال الشمس،
يعني من بعد ما صلى الظهر والعصر جمعا وقصرا؛ لحااااد غروب شمس يوم عرفة،
أما لو مشي قبل مغرب الشمس فساعتها هيكون عليه فِديَة، يعني عليه ذبح شاة ويفرقها على الفقراء،
لكن لو مشي قبل المغرب ورجع تاني بالليل ووقف على عرفات هنا يبقى ليس عليه شيء🙅‍♂️
ولو جاء الحاج للوقوف بعرفة في الليل ممكن يقف فترة زمنية بسيطة وبعدين يمشي ومش هيبقى عليه فدية،
يبقى باختصار كده الوقوف على عرفة أربع أمور:
◇الصحيح وإللي عمله رسول الله ﷺ هو:
الوقوف من بعد الظهر لحد غروب الشمس.

◇في الليل:
الوقوف أي فترة زمنية مهما كانت بسيطة تكون صحيحة.

◇لو وقف في النهار ومشي قبل مغيب الشمس ومجاش تاني وقف بالليل يبقى عليه دم، يعني عليه فِديَة يعني ذبح شاة، وحجه صحيح.

◇لو وِقف في النهار ومشي قبل مغيب الشمس وجاء مرة تانية في الليل ووقف ولو فترة زمنية بسيطة يبقى كده ليس عليه فِدية وحجه صحيح.
يارب تكون النقطة دي واضحة🙈

بعد ما غربت الشمس توجه رسول الله ﷺ لمُزدَلفة إللي هي المشعر الحرام عشان يبيت فيها،
فالمشروع للحجاج إنهم يفضلوا واقفين في عرفة من بعد صلاة الظهر لحد المغرب،
وخلال الفترة دي يدعوا ويستغفروا ويلبوا ويذكروا الله،
ومفيش دعاء معين بيوم عرفة، لكن الواحد يدعي باللي هو عايزه،
أما بالنسبة للذكر، قال رسول الله ﷺ:
" خير الدعاء دعاء يوم عرفة،
وخير ما قلت أنا والنبيون من قبلي:
لا إله إلا الله وحده لا شريك له له الملك وله الحمد وهو على كل شيء قدير"
يعني أفضل الدعاء هو الدعاء في يوم عرفة،
وأفضل ذكر يُقال في يوم عرفة وقاله رسول الله ﷺ وقالوا الأنبياء من قبله هو لا إله إلا الله وحده لا شريك له......👌

فاحنا لازم نكثر من الاستغفار والذكر والدعاء في اليوم ده، قال رسول الله ﷺ:
" ما من يوم أكثر عتيقًا من النار من يوم عرفة، وإنه سبحانه ليدنو فيباهي بهم الملائكة"
يعني مفيش يوم ربنا ممكن يعتق فيه عدد كبير من النار زي يوم عرفة،
حتى إنه سبحانه يقترب من عباده اقتراب يليق بجلاله وكماله فيُباهي الله بهم الملائكة،
الملائكة إللي كانوا قالوا قبل كده لما ربنا قالهم إنه هيخلق خليفة في الارض:
"أتجعل فيها من يفسد فيها ويسفك الدماء"
فهو هنا سبحانه يتفاخر بعباده المؤمنين أمام الملائكة، إن البشر إللي فيهم سفكوا الدماء كذلك فيهم من يعبدني ويسبح بحمدي زيكم بالضبط👌

بعد ما غربت الشمس رجع رسول الله ﷺ لمزدلفة أو المَشْعر الحرام وهي بين عرفة ومِنى ورجع معاه الصحابة،
وهو ماشي سمع صوت شديد من وراه وزَجْر للإبل بالإسراع،
يعني عمالين يستعجلوا الإبل بالسّوط عشان يمشوا بسرعة،
فأمرهم رسول الله ﷺ بالسَّكِينة يعني الهدوء وعدم الإسراع في المشي، قال:
"يا أَيُّها الناسُ!
عليكم بالسكينةِ و الوَقارِ ، فإنَّ البِرَّ ليس في إِيضاعِ الإبلِ"
يعني امشوا براحة وبهدوء وخففوا السرعة ومحدش يزاحم حد، فطاعة الله ليست في سرعة السَّير.

طول الطريق إلى مزدلفة كان رسول الله ﷺ يلبي:
"لبيك اللهم لبيك....لبيك لا شريك لك لبيك....إن الحمد والنعمة لك والملك..... لا شريك لك"

لما وصل رسول الله ﷺ إلى مزدلفة أمر بالأذان، فأُذّن لصلاة المغرب وأُقيمت الصلاة،
فصلى المغرب ثلاث ركعات، وبعدين أُقيمت الصلاة مرة تانية فصلى العشاء ركعتين،
فهو هنا عمل زي ما عمل في صلاة الظهر والعصر في نَمِرَة، جمع صلاة المغرب وصلاة العشاء وصلاهم قصر💁‍♂️
ربنا بيقول:
"فَإِذَا أَفَضْتُمْ مِنْ عَرَفَاتٍ فَاذْكُرُوا اللَّهَ عِنْدَ الْمَشْعَرِ الْحَرَامِ"
يعني بعد ما تمشوا من عرفات؛ تروحوا مزدلفة وتصلّوا هناك المغرب والعشاء، زي ما رسول الله ﷺ عمل.

سمح رسول الله ﷺ للضعفاء من النساء والشيوخ بإنهم يمشوا من مزدلفة في النصف الأخير من الليل ويتوجهوا لمِنَى، عشان محدش فيهم يتأذى بسبب تزاحم الناس على بعض،
أما هو وإللي معاه من الأقوياء هيفضلوا في مزدلفة لحد الفجر،
فهو بعد ما صلى استراح ونام في مزدلفة لحد ما جاء وقت الفجر،
فقام رسول الله ﷺ وصلى الفجر أبكَر من عادته، يعني هو كان من عادته إنه بيأخر صلاة الفجر شوية،
لكن المرة دي صلاها بدري عشان يلحقوا يقفوا في المشعر الحرام زي ما وقفوا في عرفة كده،
يبقى الصحيح إن الحجاج بعد ما يصلوا المغرب والعشاء في مزدلفة إنهم يباتوا فيها ويصلوا فيها الفجر ويقفوا فيها كل واحد في مكانه،
فهي كلها مو

قف زي ما عرفة كلها موقف، قال رسول الله ﷺ لما وقف بمزدلفة أو المشعر الحرام:
"وقفتُ هاهنا وجَمْع كلها موقف"
وجَمْع المقصود بيها المزدلفة،
فهم هيقفوا ويذكروا الله كثيرا ويدعوا لحد ما النهار يطلع، لكن قبل شروق الشمس،
فهم لازم يمشوا قبل شروق الشمس ويتوجهوا لمنى؛ لأن العرب في الجاهلية كانوا بيتوجهوا لمنى بعد شروق الشمس،
فخالفهم رسول الله ﷺ وتوجه لمنى بعد طلوع الفجر وقبل شروق الشمس،
فالأصل إن الحجاج يعملوا زي رسول الله ﷺ كده،
إلا الضعفاء من النساء والعجائز الشيوخ والصبيان ومن معهم من محارمهم أو القائمين على شؤونهم،
دول مفيش مشكلة إنهم يتوجهوا لمنى في النصف الثاني من الليل،
ولو حد مشي من الحجاج الأقوياء قبل طلوع الفجر جائز لكن فاته الأجر العظيم وفاته اتباع سنة رسول الله ﷺ👌

☆ملحوظة:
مزدلفة اتسمت بالاسم ده لأسباب منها: إن الحجاج يقتربون فيها من مِنى،
فالإزلاف معناه الاقتراب، ربنا بيقول:
" وَأُزْلِفَتِ الْجَنَّةُ لِلْمُتَّقِينَ"
يعني قُرّبت الجنة للمتقين، والمزدلفة هي المكان إللي بيجمع منه الحجاج الحَصَى لرمي الجَمَرات👌

كده احنا بقينا في النَّحر،
ويوم النّحر هو يوم الحج الأكبر، وهو اليوم العاشر من شهر ذي الحجة، أول أيام عيد الأضحى،
واتسمى يوم الحج الأكبر لأن فيه معظم أعمال الحج زي رمي الجمرات ونَحْر الهَدْي والحَلْق أو التقصير والطواف والسعي لمن كان عليه سعي.

خرج رسول الله ﷺ وإللي معاه من الصحابة من مزدلفة ومع كل واحد سبع حصيات وتوجهوا لمنى عشان يرموا الجمرات💁‍♂️

☆إيه بقى موضوع رمي الجمرات ده🤔
شوفوا،
كلمة رَمْي الجمرات في اللُّغة معناها دَفْع الحصى الصغيرة أو قَذفها،
يعني إن واحد يمسك طوبة أو حجرة صغيرة ويقوم حادفها،
تمام كده👌
أما بقى معناها عندنا في الشرع إن الحاج ياخد عدد معين من الحجارة الصغيرة ويرميها أو يقذفها في مكان اسمه حَوْض الجمرة،
وهو مكان معروف في مِنى بيُرمى فيه الحصى إللي بنقول عليه ده،
وعشان بقى يكون الرمي صحيح لازم الحصى يقع داخل الحوض وتحت العمود الظاهر في وسطها؛
لأن هو ده إللي عمله رسول الله ﷺ👌

☆خلال الأيام الجاية تابعوا من التليفزيون بث مباشر لكل الشعائر دي وهتبقى سهل تفهموها لما تشوفوها إن شاء الله 😅

◇طيب إيه الحكمة أصلا من موضوع رمي الجمرات ده🤔
الأصل في تشريع العبادات الانقياد التامّ لربنا عز وجل،
يعني ننفذ من غير ما نسأل ليه وعشان إيه؛
لأن مش كل حاجة احنا عارفين إيه الحكمة من وراها، ممكن تظهر الحكمة وممكن تَخفى،
بس إللي احنا لازم نكون عارفينه أكيد إن ربنا لا يأمر بشيء إلا وله حكمة فيه ولا يأمر بشيء عبثًا أبدا👌
قال مجموعة من أهل العلم إن الحكمة من رمي الجمرات إهانة الشيطان وإذلاله وإرغامه وإظهار مُخالفته؛
لأنه عرض لإبراهيم عليه والسلام لما ربنا أراه ذبح ابنه إسماعيل في المنام،
لكن الكلام ده ليس عليه أي دليل من القرآن أو السنة🙅‍♂️
هو اجتهادات واستنتاجات لأهل العلم🤷‍♂️
والحكمة لازم يكون لها دليل واضح،
ومسألة رمي الجمرات مفيش عليها دليل واضح صريح يوضح لنا الحكمة منها،
فاحنا بنسمع ونطيع ونعمل زي ما رسول الله ﷺ عمل👌

☆طيب، رسول الله ﷺ عمل إيه بقى😁
توجه رسول الله ﷺ إلى مِنَى وهو يلبي، لحد ما جاء مكان رمي الجمرة، وكانت الشمس طلعت ودخل وقت الضحى،
فلما وصل بدأ يرمي الجمرات في الحوض زي ما قلنا،
وكانوا سبع حصيات في إيده،
كل واحدة بيرميها يكبر معاها، يعني يرمي واحدة ويقول:
الله أكبر،
ويرمي التانية ويكبر وهكذا لحد ما السبع حصيات خلصوا،
وأول ما خلص مشي على طول من مكان رمي الجمرات وموقفش عندها،
ومفيش هنا صلاة عيد للحجاج، رمي الجمرات للحجاج تقوم تقام صلاة العيد، يعني تقدروا تقولوا إنها بدالها💁‍♂️
ودي كده اسمها 《جمرة العَقَبة》
وبيرميها الحُجاج وهم بملابس الإحرام، وقبل التحلل،
وزمن رمي جمرة العقبة هو من بعد شروق الشمس لحد وقت الظهر وهو الأفضل،
لكن يجوز الرمي لحد مغيب شمس يوم النّحر💁‍♂️
وفي رمي للجمرات في الثلاث أيام إللي بعد كده وإللي هم أيام التشريق ولهم تفصيل هنعرفه بعدين إن شاء الله 👌

فاكرين بقى النساء والعجائز إللي كانوا توجهوا لمنى بعد منتصف الليل قبل رسول الله ﷺ 😅
أهم دول لهم إنهم يرموا جمرة العقبة أول ما يوصلوا،
أو يبيتوا لحد آخر الليل وبعدين يرموا الجمرات،
ولو أخّروا الرمي لبعد طلوع الشمس برده جائز،
لكن الأرفق بهم إنهم يرموها في آخر الليل إذا وصلوا مِنى،
وبعد ما يرموها يرجعوا لمنازلهم في منى للإقامة بها لذبح الهدي ورمي الجِمار في الأيام القادمة ويكملوا مناسك الحج💁‍♂️

بعد ما رسول الله ﷺ رمى جمرة العقبة وقف في منى للناس عشان إللي عايز يسأله،
فبدأ الناس يسألوه:
واحد يقوله:
يا رسول الله! طُفت بالبيت قبل أن أرمي الجمرات، أعمل إيه؟
وواحد تاني يقول:
حلقت قبل أن أذبح؟
وواحد تالت يقول:
نَحَرْت قبل أن أرمي؟
فكل دول كان رسول الله ﷺ يقول لهم:
"لا حرج، لا حرج"
فده يدل على إن أفعال الحج يوم العيد في

ها توسعة،
وإن الرمي والطواف والسعي والحلق أو التقصير والنحر كلها فيها سِعة من ناحية الترتيب،
لكن السنة إللي رسول الله ﷺ عمله، وهي إن أول حاجة بدأ بيها هي رمي الجمرات 👌
وبعد كده يأتي نَحْر الهدي يعني ذبحه وبعدين الحلق أو التقصير وبعدين الطواف والسعي إن كان عليه سعي،
هو ده الترتيب الصحيح إللي رسول الله ﷺ عمله،
يبقى بعد رمي الجمرات رسول الله ﷺ راح عشان يذبح الهدي بتاعه 💁‍♂️

لكن قبل ما يروح يذبح الهدي خطب رسول الله ﷺ في الناس خطبته الثانية بمنى👌

يا ترى رسول الله ﷺ قال إيه في الخطبة الثانية؟
ده إللي هنعرفه كمان شوية إن شاء الله😁
رابط الجزء إللي بعده في التعليقات👇

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy

⭐المصادر ⭐
https://www.islamweb.net/ar/fatwa/94564/

http://midad.com/article/207055/حتى-يباهي-الله-عز-وجل-بنا-الملائكة

https://dorar.net/hadith/sharh/83098

https://ar.islamway.net/article/64400/-5-احذر-الدفع-من-عرفة-قبل-تحقق-الغروب

https://binbaz.org.sa/fatwas/6972/ذكر-صفة-حج-النبي-صلى-الله-عليه-وسلم-من-عرفات-وحتى-مزدلفة

https://dorar.net/feqhia/3035/الفصل-الأول:-أسماء-مزدلفة

https://islamweb.net/ar/library/index.php?page=bookcontents&idfrom=5299&idto=5336&bk_no=79&ID=129

https://binbaz.org.sa/fatwas/6998/كيفية-رمي-الجمار-والحكمة-من-ذلك

https://mawdoo3.com/لماذا_يتم_رمي_الجمرات

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائتين_وسبعة_وعشرين
#أحداث_السنة_العاشرة_من_الهجرة
#حجة_الوداع_الجزء_الخامس
#خطبة_منى_وأحكام_الهَدي

اتكلمنا الجزء إللي فات عن رسول الله ﷺ لما رمى الجمرات، ووقفنا عنده لما بدأ يخطب في الناس خطبته الثانية في الحج، وهي خطبته يوم النحر بمنى،
قال رسول الله ﷺ في الخطبة:
"إن الزَّمانُ قَدِ اسْتَدارَ كَهَيْئَةِ يَومَ خَلَقَ السَّمَواتِ والأرْضَ، السَّنَةُ اثْنا عَشَرَ شَهْرًا مِنْها أرْبَعَةٌ حُرُمٌ:
ثَلاثَةٌ مُتَوالِياتٌ: ذُو القَعْدَةِ، وذُو الحِجَّةِ، والمُحَرَّمُ، ورَجَبُ مُضَرَ، الذي بيْنَ جُمادَى وشَعْبانَ...."

☆يعني إيه الكلام ده بقى🤔
فاكريييين في الحلقة الثالثة من السيرة لما اتكلمنا عن أهل النّسِيء😅
وقلنا إن أهل النسيء دول كانوا بيعظّموا الكعبة جدا
وكلمة النسيء معناها التأخير،
وهم كانت وظيفتهم إنهم يأخروا الأشهر الحرم عن ميعادها، يعني يؤخّروا محرم لصفر مثلا،
فيبدلوا شهر صفر مع شهر محرم، فيكون ذو القعدة حرام وذو الحجة حرام وبعدين ميجيش شهر محرم،
لأ، يجي شهر صفر،
والأشهر الحرم معناها إن مينفعش يكون فيها حرب والعرب أصلا عيشتهم كانت قائمة على الحرب بينهم،
ففي ثلاثة شهور ورا بعض حُرم:
《ذو القعدة و ذو الحجة ومحرم》
فكده الموضوع عامل لهم أزمة، فأهل النسيء حلّوا لهم المشكلة بالتلاعب في مواقيت الشهور،
وده تفسير قول ربنا في سورة التوبة:
"إِنَّمَا النَّسِيءُ زِيَادَةٌ فِي الْكُفْرِ ۖ يُضَلُّ بِهِ الَّذِينَ كَفَرُوا يُحِلُّونَهُ عَامًا وَيُحَرِّمُونَهُ عَامًا لِّيُوَاطِئُوا عِدَّةَ مَا حَرَّمَ اللَّهُ فَيُحِلُّوا مَا حَرَّمَ اللَّهُ"
فرسول الله ﷺ بيقول للناس إن الزمان استدار ورجع لأصله بعد التلاعب إللي كان بيحصل فيه ده،
فبقى محرم هو محرم، وذو الحجة هو ذو الحجة،
وأقرّ رسول الله ﷺ الأشهر الحُرُم الأربعة:
محرم، ورجب وذو القِعدة وذو الحِجة👌

أكمل رسول الله ﷺ الخطبة وقال:
"أيُّ شَهْرٍ هذا، قُلْنا: اللَّهُ ورَسولُهُ أعْلَمُ، فَسَكَتَ حتَّى ظَنَنَّا أنَّه سَيُسَمِّيهِ بغيرِ اسْمِهِ،
قالَ: أليسَ ذُو الحِجَّةِ؟
قُلْنا: بَلَى، قالَ: فأيُّ بَلَدٍ هذا. قُلْنا: اللَّهُ ورَسولُهُ أعْلَمُ،
فَسَكَتَ حتَّى ظَنَنَّا أنَّه سَيُسَمِّيهِ بغيرِ اسْمِهِ،
قالَ: أليسَ البَلْدَةَ.
قُلْنا: بَلَى، قالَ: فأيُّ يَومٍ هذا؟
قُلْنا: اللَّهُ ورَسولُهُ أعْلَمُ، فَسَكَتَ حتَّى ظَنَنَّا أنَّه سَيُسَمِّيهِ بغيرِ اسْمِهِ،
قالَ: أليسَ يَومَ النَّحْرِ؟ قُلْنا: بَلَى.
قالَ:
فإنَّ دِماءَكُمْ وأَمْوالَكُمْ، وأَعْراضَكُمْ علَيْكُم حَرامٌ، كَحُرْمَةِ يَومِكُمْ هذا في بَلَدِكُمْ هذا، في شَهْرِكُمْ هذا،
وسَتَلْقَوْنَ رَبَّكُمْ، فَسَيَسْأَلُكُمْ عن أعْمالِكُمْ..."

هنا رسول الله ﷺ بيسأل الصحابة مش لأنه مش عارف، هو بيسألهم عشان يلفت انتباههم لكلامه،
والصحابة لما قالوا في كل مرة الله ورسوله أعلم فده كان من أدبهم رضي الله عنهم إنهم ميندفعوش في الإجابة وخصوصا إنهم مكنوش فاهمين الغرض والهدف من السؤال،
فلما سكت رسول الله ﷺ في كل مرة كانوا مفكرين إنه هيغير أسماء الحاجات إللي سألهم عنها دي،
لكن هو أقر اسم كل حاجة زي ما هي معروفة، وقال عنِ الشَّهرِ: إنَّه ذو الحِجَّةِ، والبلدُ مَكَّةُ، واليومُ يومُ النَّحْرِ.
فلما عرّفهم باليوم والمكان والزمن أكّد على معنى كان قاله لهم في خطبة عرفة وهو:
حرمة الدماء والأموال والأعراض👌
فلا يقتل مؤمن مؤمنا بغير حق، ولا يأخذ من ماله بغير رضا منه،
ولا يعتدي على عرض أخيه سواء بزنا أو لواط أو قذف عرضه أو غيره.
فكل الأمور دي محرمة أشد التحريم، حرام على المسلم أن ينتهكها🙅‍♂️
وبيقول انتم هترجعوا لربكم يوم القيامة وهيسألكم عن أعمالكم فاحذروا إنكم تقعوا في شيء من المحرمات إللي قلت لكم عنها دي👌

وقال ﷺ:
"ألا فلا تَرْجِعُوا بَعْدِي ضُلَّالًا، يَضْرِبُ بَعْضُكُمْ رِقابَ بَعْضٍ..."
يعني بيقولهم اوعوا تضلوا بعدي وتُعرِضوا عن إللي تَركتُكم عليه مِنَ التَّمَسُّكِ بِكتابِ ربِّكم وسُنَّةِ نَبيِّكم؛
فلو تركتم كتاب الله وسنة نبيكم هتضلوا الطريق وهتقعوا في إللي حذرتكم وهتقتلوا بعض وهو ده الضلال بعينه😶

ومن الأمور إللي حذر منها رسول الله ﷺ قال:
"أَلَا لا يجني جانٍ إلَّا على نفسِهِ ، ولا يجني والدٌ على ولدِهِ ، ولا مَولودٌ على والدِهِ..."
يعني محدش يشيل ذنب حد، الشخص المذنب هو بس إللي يتعاقب،
لأن كان من عادة أهل الجاهلية إنهم يأخذون أقارب الشخص بجنايته،
يعني لو واحد أخطأ مش بس يعاقبوه هو فقط،
ده يعاقبوه هو وعيلته، وطبعا ده ظلم يؤدي لظلم تاني👌
وهنا اختص بذكر الآباء والأبناء إن محدش فيهم يتعاقب بذنب التاني، عشان يعرفهم إن غيرهم أولى بالتحذير،
يعني الأب مش هيتعاقب بذنب ابنه، ولا الابن هيتعاقب بذنب أبوه ودول أقرب الناس لبعض،
فمن باب أولى إن محدش تاني من الأقارب يتعاقب بسبب ذنب المخطئ💁‍♂️

وقال ﷺ:
"ألا وإنَّ الشَّيطانَ قد أيِسَ

أن يُعبَدَ في بلادِكم هذَه أبدًا ولَكن ستكونُ لهُ طاعةٌ فيما تحتقِرونَ من أعمالِكم فسيَرضى بِه.."
المقصود هنا من الشيطان هو إبليس،
والمعنى إن إبليس يأس من أن يتبدل دين الإسلام،
ويظهر الإشراك بالله ويستمر، ويرجع الأمر زي ما كان من قبل الإسلام،
لكن هيبقى في طاعة للشيطان في الأمور إللي الناس بتحتقرها من الذنوب والمعاصي وهي أقل من الكفر،
زي القتل والنهب وغيرها من الكبائر، وتحقير الصغائر،
زي ما بيحصل دلوقتي من انتشار الزنا واللواط والسرقة والفجور وسماع الأغاني وغيرها وغيرها من المعاصي والناس شايفة إن دي حرية شخصية😬
فرسول الله ﷺ بيقول إن الشيطان هيرضى بالمحتقَر من الذنوب والمعاصي عند الناس،
لأنه مش هيقدر يحقق الذنب الأكبر وهو إيقاعهم في الكفر الصريح👌

قال رسول الله ﷺ في نهاية كلامه:
"ألا لِيُبَلِّغِ الشَّاهِدُ الغائِبَ، فَلَعَلَّ بَعْضَ مَن يُبَلَّغُهُ أنْ يَكونَ أوْعَى له مِن بَعْضِ مَن سَمِعَهُ، ثُمَّ قالَ:
ألا هلْ بَلَّغْتُ؟
ألا هلْ بَلَّغْتُ ؟"
يعني بيقول الحاضر فيكم يوصل كلامي للغائب إللي مسمعش كلامي، فلعل إللي هيبلغه كلامي هيكون أكثر وعي وفهم من إللي سمعه مني مباشرة.

☆والكلام ده مش للصحابة بس يا جماعة، كل واحد فينا بيوصلَه كلام رسول الله ﷺ لازم يبلغه للي حواليه،
انتم بتقرأوا الكلام بسيط وسهل أهه خدوه وانشروه وبلغوه لكل إللي تقدروا عليه،
ربنا مش هيسألنا عن النتيجة، هل فلان عمل باللي انت نصحته بيه ولّا لأ،
لكن هيسألنا انتم بلغتم إللي نبيكم قال لكم عليه ولّا لأ،
خليكم فاكرين وصية رسول الله ﷺ:
"ألا لِيُبَلِّغِ الشَّاهِدُ الغائِبَ... ألا لِيُبَلِّغِ الشَّاهِدُ الغائِب"
ومتنسوش إن الوصية دي اتقالت في خطبة الوداع😢
يعني دي آخر وصايا رسول الله ﷺ لنا في الموقف المهيب ده وهو ماشي وسط الناس وكل ما يعمل حاجة من مناسك الحج يقول:
"خُذُوا مَنَاسِكَكُمْ فَإِنِّي لَا أَدْرِي لَعَلِّي لَا أَحُجُّ بَعْدَ حَجَّتِي هَذِهِ"

وفي نهاية الخطبة سألهم هل بلغتكم إللي اتفرض عليّ تبليغه من الرسالة، وهو يقصد من السؤال إن أنا بلغتكم إللي ربنا أمرني بتبليغه لكم فملكوش عذر،
فلما سألهم مرتين، الناس ردوا عليه وقالوا نعم...نعم.

بعد ما أنهى رسول الله ﷺ الخطبة توجّه لذبح الهدي👌
◇أولا معنى الهدي:
الهدي يا جماعة زي ما قلنا في الجزء الأول من الرحلة هو:
البهيمة من الأنعام سواء إبل أو بقر أو غنم زي الأضحية كده،
والحاج عليه هدي واحد فقط، ولو زوّد فله أجر أعلى💁‍♂️

◇ثانيا: حكم الهدي:
الهدي واجب على الحاج المُتَمَتّع والمُقرِن، يعني إللي بيعملوا حج وعمرة مع بعض، ولكن لو حصل وترك الهدي فحجه صحيح،
فالهدي واجب وليس ركن من أركان الحج، زي الوقوف بعرفة مثلا.
أما الحاج المُفرِد فلا يجب عليه هدي، ولكن مُستحَب.

◇ثالثا:
حكم إللي ملقاش هدي سواء بسبب عدم وجود الحيوان أو بسبب إن مفيش فلوس فهو عليه صيام عشر أيام،
يصوم ثلاثة في الحج يكون أخر يوم للصيام هو يوم عرفة،
ولما الحاج يرجع لبلده يصوم السبع أيام👌
" فَمَن لَّمْ يَجِدْ فَصِيَامُ ثَلَاثَةِ أَيَّامٍ فِي الْحَجِّ وَسَبْعَةٍ إِذَا رَجَعْتُمْ تِلْكَ عَشَرَةٌ كَامِلَةٌ"
الهدي ده خاص بكل حد من غير أهل مكة، يعني أهل مكة المستطونين مكة ليس عليهم هدي ولا صيام،
واحنا اتكلمنا عن النقطة دي بالتفصيل في الجزء الأول من رحلة الحج فمش هعيد بقى😅

◇رابعا: متى يُذبح الهدي🤔
الهدي بيُذبح يوم النّحر بعد رمي الجمرات ويستمر زمن النحر لحد نهاية أيام التشريق وهي:
اليوم الحادي عشر والثاني عشر والثالث عشر من ذي الحجة، يعني أربعة أيامٍ فقط،
سواء للحاج المتمتع أو الحاج المُقرِن أو الحاج المُفرِد،

طبعا احنا عارفين إن الحاج المتمتع كان عمل عمرة الأول وبعدين تحلل من العمرة وأحرم للحج يوم التروية زي ما قلنا في الجزء الأول💁‍♂️
أهه المتمتع ده عليه ذبح الهدي في يوم النحر،
لكن لو ذبح بعد التحلل من العمرة وقبل يوم النحر يبقى ده كله تطوع، ياخد عليه أجر لكن لا يسقط عنه الهدي الواجب إللي هيُذبح يوم النحر👌
فكل الصحابة دلوقتي سواء المُقرِن أو المتمتع هيذبحوا الهدي في يوم النحر👌

◇خامسا: مكان ذبح الهدي:
الهدي لازم يُذبح في الحرم، ومِنى كلها حرم زي ما رسول الله ﷺ قال:
"نحرت هاهنا ، ومنى كلها منحر ، فانحروا في رحالكم"
يعني رسول الله ﷺ بيقولهم مش لازم تيجوا تقفوا في نفس المكان إللي أنا واقف فيه ده عشان تنحروا الهدي،
مِنى كلها مَنحر، فكل واحد يذبح الهدي بتاعه في مكانه👌

فرسول الله ﷺ ذبح الهدي في منى، وهو الأفضل،
وإذا تم ذبح الهدي في مكة في الحرم يجوز؛
لأن رسول الله ﷺ قال:
"فِجَاج مكة طريق ومنحر"
لكن لا يجوز ذبح الهدي خارج الحرم🙅‍♂️

◇سادسا: الذبائح تتوزع على مين بقى🤔
الواجب في لحم الهدي إنه يُوَزّع منه على فقراء الحرم ومساكينه، ويجوز نقل شيء منه لخارج الحرم للأكل والإهداء.
وهدي المتعة والقِران ده اسمه هدي 《شُكْرَان 》
فلا يجب أن يُصرف كوووله لمساكين الحر

م،
لكن حكمه حكم الأُضحية،
يعني يأكل منها ويهدي منها ويتصدق على مساكين وفقراء الحرم، والتصدق على فقرء ومساكين الحرم ده واجب👌

◇في نوع تاني من الهدي وهو الهدي إللي بيُذبح بسبب ترك واجب من واجبات الحج،
فاكرين لما قلنا في الجزء إللي فات إن الحاج لو وقف على عرفة في النهار ومشي قبل مغيب الشمس ومجاش تاني وقف بالليل يبقى عليه فدية يعني عليه ذبح هدي🤔
أهه ده نوع الهدي إللي بنتكلم عنه،
فأي حد يترك واجب من واجبات الحج يبقى عليه ذبح هدي،
الهدي ده لازم يُذبح ويتوزع داخل الحرم، يعني مينفعش توزيعه خارج الحرم👌
ويدخل مع النوع ده من ناحية وجوب الذبح والتوزيع داخل الحرم؛ الحاج إللي بيقتل صَيد وهو على إحرامه👌

◇النوع الثالث والأخير من الهدي، هو الهدي إللي بيُذبح بسبب فعل حاجة من محظورات الإحرام،
يعني خلال الإحرام مينفعش واحد يقص ضوافره مثلا، فراح قاصصها،
هنا يبقى عليه ذبح هدي، لكن له الاختيار:
إما يذبح الهدي ده في المكان إللي عمل فيه المحظور ده، أو يذبحه في أي مكان، سواء برة الحرم أو داخله،
وله الاختيار برده إنه يوزع لحم الهدي ده سواء في الحرم أو خارج الحرم💁‍♂️

ده كده كان أحكام الهدي باختصااار، وإلا فالموضوع يطول شرحه، وفي التعليقات هتلاقوا روابط فيها تفاصيل التفاصيل😅👇

قلنا إن رسول الله ﷺ كان ساق ثلاثة وستين بعير، وجاء علي رضي الله عنه بسبعة وثلاثين بعير من اليمن، فكانوا كلهم مائة،
رسول الله ﷺ نَحَر بيده الثلاثة وستين بعير، وخلّى علي يذبح السبعة وثلاثين بعير إللي أتى بهم من اليمن،
قال ابن القيم رحمه الله عن عدد البعير إللي ذبحه رسول الله ﷺ إنه إشارة لعدد سنوات عمر رسول الله ﷺ،
فهو مات ﷺ وعمره ثلاث وستين سنة،
يعني بعد حجة الوداع بحوالي ثلاث أشهر ﷺ 😞

بعد ما رسول الله ﷺ نحر الهدي، حلق شعر رأسه، وبكده حصل التحلل الأول من الإحرام👌

عمل إيه تاني رسول الله ﷺ بعد ما تحلل التحلل الأول من الإحرام؟
ده إللي هنعرفه بكرة إن شاء الله، وهيبقى آخر جزء قبل أجازة عيد الأضحى كل سنة وانتم طيبين وبخير وعافية في الدين والدنيا 😁

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy