#قصص_الأنبياء(٢)
#السيرة_النبوية
#الحلقة_مائتين_وسبعة_عشر
#أحداث_السنة_العاشرة_من_الهجرة
#مسيلمة_الكذاب

شوفنا في أحداث السنة التاسعة من الهجرة النتائج العظيمة لغزوة تبوك وشوفنا الوفود إللي جاءت لرسول الله ﷺ لتعلن إسلامها،
وشوفنا وصول الدولة الإسلامية لأقصى مراحل القوة والتمكين في عهد رسول الله ﷺ،
لكن لكل شيء نهاية، ولكل أجل كتاب، ولكل قصة خاتمة،
والسنة العاشرة من الهجرة هي بداية النهاية وبداية الخاتمة في حياة رسول الله ﷺ 😞
ومن رحمة ربنا بالصحابة إنه مهّد للنهاية دي بأحداث ومواقف وبعبارات كثيرة؛ عشان يهوّن على المسلمين مصيبتهم في موت رسول الله ﷺ،
يعني فتح مكة وإسلام هوازن وثقيف وقدوم الوفود الكثيرة إلى المدينة كل ده علامة من علامات اقتراب الأجل، وإن مهمة رسول الله ﷺ قرّبت تنتهي👌
وحتى كثير من أحداث السنة العاشرة من الهجرة فيها إشارات إن خلاص أَجَل رسول الله ﷺ قرّب ينتهي،
وكمان حواره ﷺ مع معاذ بن جبل رضي الله عنه قبل ما يسافر لليمن كان إشارة واضحة على كده زي ما حكينا.

هنبدأ نعرف بقى أهم الأحداث إللي حصلت في السنة العاشرة من الهجرة،
لكن قبل ما نتكلم عن الأحداث في أخت سألت سؤال عن صحة قصة الضّب، وأنا كنت ناوية أنبه عليها لأن في دعاة بيذكروا القصة دي بس نسيت🙈
فسؤالها فكرني جزاها الله خيرا،
قصة الضب إللي شهد لرسول الله ﷺ بالرسالة قصة منكرة غير ثابتة عن رسول الله ﷺ ولا تصح سندًا🙅‍♂️❌
القصة بتقول إن رجل أعرابي اصطاد ضَب، وعدّى على رسول الله ﷺ وهو قاعد مع مجموعة من أصحابه،
فسأل عن مين إللي قاعد ده والناس مجتمعين عليه،
فقيل له إنه رسول الله ﷺ،
فتوجه لرسول الله ﷺ وعدّى من وسط الناس ووقف قصاد رسول الله ﷺ وقال له إنه مشفش حد أكذب من رسول الله ﷺ ولولا إنه خايف أحسن قومه يتهموه بإنه عَجُول من الاستعجال يعني وإنه مش حليم لقتل رسول الله ﷺ،
فهنا عمر رضي الله عنه قال لرسول الله ﷺ خليني أقتله يا رسول الله، فرسول الله ﷺ هدّاه وقال له إنه يصبر،
فالرجل الأعرابي قال لرسول الله ﷺ وَاللَّاتِ وَالْعُزَّى لَا آمَنْتُ بِكَ، أَوْ يُؤْمِنَ بِكَ هَذَا الضَّبُّ؟
وراح مطلع الضب إللي معاه، فرسول الله ﷺ قال له لو الضب آمن بي، انت هتؤمن؟ فالأعرابي قال نعم، فرسول الله ﷺ كلم الضب وقال له: يَا ضَبُّ!!
فَتَكَلَّمَ الضَّبُّ بِكَلَامٍ عَرَبِيٍّ مُبِينٍ، يَفْهَمُهُ الْقَوْمُ جَمِيعًا: لَبَّيْكَ وَسَعْدَيْكَ، يَا رَسُولَ رَبِّ الْعَالَمِينَ.
فسأله رسول الله ﷺ انت بتعبد مين فالضب رد عليه إنه بيعبد الله، فسأله رسول الله ﷺ عن نفسه من هو فالضب رد عليه وقال له:
أَنْتَ رَسُولُ رَبِّ الْعَالَمِينَ، وَخَاتَمُ النَّبِيِّينَ، قَدْ أَفْلَحَ مَنْ صَدَّقَكَ، وَقَدْ خَابَ مَنْ كَذَّبَكَ.
فهنا الأعرابي قال:
" أَشْهَدُ أَنَّ لَا إِلَهَ إِلَّا اللَّهُ، وَأَنَّكَ رَسُولُ اللَّهِ حَقًّا"
القصة جميلة ومؤثرة لكنها غير صحيحة عن رسول الله ﷺ😅
وطبعا مينفعش نستشهد بيها؛ لأن ده من الكذب على رسول الله ﷺ، ورسول الله ﷺ قال:
" إنَّ كَذِبًا عليَّ ليس ككَذِبٍ على أحَدٍ، مَن كذَبَ عليَّ متعَمِّدًا فلْيَتبَّوأْ مَقعَدَه مِن النارِ"
والوعيد ده لأن رسول الله ﷺ هو القُدوة للمسلمين في أقواله وأفعاله فالكذب عليه بيدخل في دين الله تعالى ما ليس منه، عشان كده الوعيد شديد للي بيكذب على رسول الله ﷺ👌

نرجع بقى لأحداث السنة العاشرة من الهجرة 😁
في بدايات السنة العاشرة من الهجرة رسول الله ﷺ أرسل خالد بن الوليد في سَرِية ومعاه أربعمائة واحد من الصحابة إلى بني الحارث بن كعب في نجران وأمره إنه يدعوهم إلى الإسلام لمدة ثلاثة أيام قبل ما يقاتلهم،
فلو استجابوا لخالد وأسلموا خلاص يقبل منهم الإسلام ويقعد يعلمهم كتاب الله وسنّة نبيّه ومعالم الإسلام،
لكن لو مستجابوش له فساعتها يقاتلهم،
فخرج خالد رضي الله عنه بالسرية وتوجه لبني الحارث،
فلما وصل أرسل مجموعة من إللي معاه يدعون للإسلام في كل أجزاء المنطقة ويقولوا للناس:
أسلِمُوا تسلمُوا.
فأسلم الناس ودخلوا في إللي دعاهم إليه، فأقام خالد فيهم يعلمهم الإسلام وكتاب الله وسنّة نبيّه،
وبعدين كتب خالد رسالة إلى رسول الله ﷺ يحكي له إللي عمله ويبشّره إن الناس دخلت في الإسلام.
وبعدين بقى جاء وفد بني الحارث بن كعب عشان يبايعوا رسول الله ﷺ على الإسلام،
لكنهم هيرتدوا لما يخرج الأسود العَنْسِيُّ مُدّعي النبوة قبل موت رسول الله ﷺ بأربعة أشهر تقريبا، وهنعرف الأحداث إن شاء الله لما ييجي وقتها👌

في السنة العاشرة من الهجرة حصل حادث مهم جدا هيكون له أثر كبير بعد موت رسول الله ﷺ، وهيُقتل بسببه عدد كبير من الصحابة ومن حفظة القرآن😢

إيه إللي حصل😬
فاكرين في الجزء المائة واثنان وثلاثون لما كنا بنتكلم عن الرسائل إللي أرسلها رسول الله ﷺ للملوك بعد صُلح الحديبية، وقلنا إن رسول الله ﷺ أرسل رسالة لملك اليَمامة وكان اسمه هَوْذَة بن علي،
ولما قرأ الرسالة عرف إن رسول الله ﷺ هيظهر على العرب وكان

عايز يبقى خليفة من بعد رسول الله ﷺ لكن رسول الله ﷺ رفض وقال باد وباد ملكه ومات هَوذة بعدها بسنتين🤔

أهه بني حنيفة دلوقتي جايين في وفد لرسول الله ﷺ مكوّن من أربعة عشر رجلا من وُجهائهم وأكابرهم عشان يعملوا زي مفاوضات كده مع رسول الله ﷺ وبعدين يعلنوا إسلامهم👌
وكان في الوفد ده واحد اسمه مُسيْلِمة بن حبيب أو مُسيْلمة بن ثُمامة وواحد تاني اسمه الرجَّال أو الرحَّال بن عُنفُوَة، مسيلمة بن حبيب ده كان على قدرٍ من قوَّة البيان والشخصيَّة وكان بيعمل كتير من أعمال الدّجل والسحر،
وكان له تأثير واضح في أوساط بني حنيفة والقبائل المجاورة، وكان اتسمى: رحمان اليمامة،
وكان عمره لما جاء للمدينة مع الوفد أكثر من مائة وعشرين سنة😮
لما جاء مسيلمة للمدينة مع قومه كان بيقول:
إنْ جَعَلَ لي مُحَمَّدٌ الأمْرَ مِن بَعْدِهِ تَبِعْتُهُ😌
يعني لو محمد ﷺ أوصى لي بالخلافة بعد ما يموت أنا هدخل في الإسلام وأبقى من اتباعه،
وطبعا انتم عارفين رأي رسول الله ﷺ في الموضوع ده بالذات💁‍♂️
وعارفين إنه قال:
"إنا والله لا نُوَلّي هذا العمل أحداً سأله ولا أحداً حرص عليه"
المهم،
رسول الله ﷺ جاء لمسيلمة وهو قاعد مع أصحابه إللي جاء معهم، وكان مع رسول الله ﷺ ساعتها ثابت بن قيس بن شماس خطيب رسول الله ﷺ، فقال مسيلمة لرسول الله ﷺ:
"إنْ شِئْتَ خَلَّيْتَ بيْنَنَا وبيْنَ الأمْرِ، ثُمَّ جَعَلْتَهُ لَنَا بَعْدَكَ"
يعني بيساوم رسول الله ﷺ إنه يجعله هو الخليفة من بعده في مقابل إنه يدخل في الإسلام،
وهو بيتكلم بقلب جامد كده لأن بني حنيفة من أضخم القبائل العربية وأوفرهم حظ من ناحية المَنعة والجَاه،
فهو تخيّل بقى إن رسول الله ﷺ هيوافق عشان يكسب بني حنيفة في صفه🙄
رسول الله ﷺ كان في إيده ساعتها قِطْعَةُ جَرِيدٍ، يعني غصن من غصون النخل، فقال له رسول الله ﷺ:
"لو سَأَلْتَنِي هذِه القِطْعَةَ ما أعْطَيْتُكَهَا، ولَنْ تَعْدُوَ أمْرَ اللَّهِ فِيكَ، ولَئِنْ أدْبَرْتَ ليَعْقِرَنَّكَ اللَّهُ، وإنِّي لَأَرَاكَ الذي أُرِيتُ فِيكَ ما رَأَيْتُ"
يعني كأن رسول الله ﷺ بيقوله ده انت لو طلبت مني أديك غصن النخل إللي في إيدي ده مش هدهولك، تقوم تقولي أديك الخلافة من بعدي😏
وبيقوله إنه مش هيتجاوز الحد إللي ربنا قدّره فيه وهو إنه مش هياخد إللي هو عايزه،
وإنه لو امتنع عن اتباع رسول الله ﷺ ربنا هيُهلكه ويقتله، وإن نهايته وآخرته هتكون زي إللي رسول الله ﷺ شافه في الرؤيا👌

☆إيه الرؤيا إللي رسول الله ﷺ شافها 🤨
قال رسول الله ﷺ:
"بيْنَما أنَا نَائِمٌ، رَأَيْتُ في يَدَيَّ سِوَارَيْنِ مِن ذَهَبٍ،
فأهَمَّنِي شَأْنُهُمَا، فَأُوحِيَ إلَيَّ في المَنَامِ:
أنِ انْفُخْهُمَا، فَنَفَخْتُهُما فَطَارَا، فأوَّلْتُهُما كَذَّابَيْنِ، يَخْرُجَانِ بَعْدِي"
يعني رسول الله ﷺ بيقول وهو نايم شاف إنه لابس في إيده إسورتين من الذهب، فزعل واتضايق إنه لابس الذهب ده؛ لأن الذهب مُحرم على الرجال،
فأخبره الوحي وهو نائم إنه ينفخ في الإسورتين دول، فنخفهم فسقطوا من إيده،
ففسر رسول الله ﷺ الإسورتين دول بإنهم رجلين كذابين هيخرجوا ويدّعوا النبوة وهتكون لهم قوة وشوكة بعد زمن رسول الله ﷺ، فكان الرجلين دول هما مسيلمة بن حبيب والأسود العَنْسِيُّ👌

أسلم وفد بني حنيفة وأكرمهم رسول الله ﷺ وأعطاهم المكافآت، ورجعوا لقومهم ورجع معاهم مسيلمة بن حبيب.

☆هل مسيلمة نفسه أسلم أو أظهر الإسلام وبعدين ارتد ولّا استمر على كفره لحد ما رجع لليمامة؛ الله أعلم🤷‍♂️
في علماء قالوا إنه أظهر الإسلام وبعدين ارتد لما رجع لقومه زي شيخ الإسلام ابن تيمية،
وفي علماء قالوا لأ مفيش أي دليل على إسلامه، وحتى طريقة كلام رسول الله ﷺ معاه بتدل على إنه لم يسلم؛
لأن مش من عادة رسول الله ﷺ إنه يتكلم بالطريقة دي مع حد أسلم أو حتى مُظهر للإسلام وهو منافق،
واحنا شوفنا طريقة تعامله ﷺ مع ابن سلول كانت عاملة إزي،
فقالوا إن مسيلمة استمر على الكفر ولم يُظهر حتى الإسلام،
فالموضوع على خلاف بين العلماء وكل واحد له أدلته،
لكن احنا إللي يهمنا في الموضوع ده كله إن مسيلمة كافر وادّعى النبوة وخلاص😅
في الفترة إللي قعدها بنو حنيفة في المدينة الرجَّال أو الرحَّال بن عُنفُوَة إللي كان موجود مع الوفد انتهز الفرصة وقعد يتعلم القرآن ويتفقّه في الدين وكان رجل عنده ذكاء وبصيرة، فخلاه رسول الله ﷺ هو إللي يعلم أهل اليمامة الإسلام.
لما رجع مسيلمة لليمامة ادّعى النبوة، وبنو حنيفة إللي كانوا أسلموا ارتدوا واتبعوه.

☆ملحوظة هنا عشان الموضوع منتشر وابن كثير ذكره في البداية والنهاية،
في حديث عن رسول الله ﷺ بيقول إن في مرة رسول الله ﷺ عدّى على مجموعة قاعدين مع بعض كان فيهم أبو هريرة والرجَّال بن عُنفُوَة، فقال لهم رسول الله ﷺ:
"إِنَّ فِيكُمْ لَرَجُلاً ضَرْسُهُ فِي النَّارِ أَعْظَمُ مِنْ أُحُدٍ"
فكان أبو هريرة خايف على نفسه وخصوصا إن كل إللي كان قاعدين معاه ماتوا في سبيل الله ماعدا هو والرجَّال بن عُنفُوَة،
فالقصة بتقو

ل إن الرجَّال ده لما رجع لليمامة مسيلمة أغراه بالمُلك والمال وطلب منه إنه يقول للناس إن محمد ﷺ قال عن مسيلمة إنه رسول هو كمان،
فوافق الرجَّال وارتد هو كمان وفتن الناس وأخبرهم إن رسول الله ﷺ قال إن مسيلمة رسول وأمر الناس باتباعه، وبكده بقى المقصود من الحديث إللي قاله رسول الله ﷺ هو الرجَّال بن عُنفُوَة،
لكن يا جماعة الحديث ده أصلا غير صحيح ولا يثبت عن رسول الله ﷺ 🙅‍♂️❌
وقصة ارتداد الرجَّال بن عُنفُوَة عن الإسلام لم تأتِ بطريق صحيح، يعني كل الروايات إللي جاءت فيها قصة ارتداد الرجَّال بن عُنفُوَة هي روايات غير صحيحة، فمينفعش الاستشهاد بيها 👌
وهتلاقوا في التعليقات روابط لتفصيل المسألة للمهتمين بعلم الحديث👇
طبعا الحديث إللي قلناه من شوية ده غير الحديث الصحيح إللي قاله أبو هريرة رضي الله عنه عن وصف الكافر في النار👌
الحديث الصحيح بيقول:
"إن الرجل من أهل النار ليعظُم للنار، حتى يكون الضّرس من أضراسه كأحد"
يعني الكفار لما يدخلوا النار مش هيبقوا زي ما هم كده في حجمهم الطبيعي، لأ، ده هيبقى حجم جسمهم كبير جدا لدرجة إن حجم ضرس الواحد فيهم مثل جبل أحد كده والعياذ بالله😶

المهم بقى مسيلمة عاش الدور إنه نبي وبقى يؤلف كلام قال يعني زي القرآن كده😏
وأرسل مسيلمة لرسول الله ﷺ رسالة بيقوله فيها:
"من مسيلمة رسول الله إلى محمَّدٍ رسول الله،
سلام عليك فإنِّي قد أُشركت في الأمر معك، وإنَّ لنا نصف الأرض ولقريش نصف الأرض، ولكنَّ قريشًا يعتدون"
يعني مسيلمة بيقول لرسول الله ﷺ إنه رسول زيه زي النبي ﷺ، وربنا أعطى له نص الأرض يحكمها هو وبني حنيفة،
وأعطى لرسول الله ﷺ ولقريش النص التاني،
بس عشان قريش قوم معتدين وانت من قريش فانت هتعترض ومش هتوافق على التقسيمة،
رسالة مسيلمة جاء بها رجلان من بني حنيفة لرسول الله ﷺ، بعد ما رسول الله ﷺ سمع الكلام إللي في الرسالة قال للرجلين:
ما تقولانِ أنتما؟
يعني إيه هي عقيدتكم في مسيلمة وهل بتؤمنوا باللي بيقوله في ادِّعائهِ النُّبوَّةَ؟
قالا: نقولُ كما قال.
يعني احنا مؤمنين بيه ومصدقينه في كلامه، فقال لهما رسول الله ﷺ:
أمَا واللهِ لولا أنَّ الرُّسلَ لا تُقتَلُ لضربتُ أعناقَكُما👌
يعني لولا إن الرسل لا تُقتل لكان رسول الله ﷺ قتلهم؛ لأنهم إما كفار أو مرتدين عن الإسلام واحنا اتكلمنا عن آية السيف قبل كده،
فهنا رسول الله ﷺ أمر بكتابة رسالة لمسيلمة وقال فيها:
" بسم الله الرحمن الرحيم،
مِنْ مُحَمَّدٍ رَسُولُ اللهِ إِلَى مُسَيْلِمَةَ الْكَذَّابِ.
سَلامٌ عَلَى مَنِ اتَّبَعَ الْهُدَى، أَمَّا بَعْدُ، فإِنَّ الْأَرْضَ لِلَّهِ يُورِثُهَا مَنْ يَشَاءُ مِنْ عِبادِهِ وَالْعاقِبَةُ لِلْمُتَّقِينَ"
يعتي انت كذاب وانت ولا انت رسول ولا حاجة، والأرض دي بتاعة ربنا يعطيها لمن يشاء من عباده، وهو وعدها لعباده المتقين مش الكذابين إللي زيك👌
ومن هنا بقى اتعرف مسيلمة باسم مسيلمة الكذاب،
كان إيه رد فعل مسيلمة بعد ما وصلته رسالة رسول الله ﷺ؟
ده إللي هنعرفه الجزء الجاي إن شاء الله 😁

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_shalapy

⭐المصادر⭐
https://www.alukah.net/sharia/0/123891/

https://www.google.com/amp/s/islamqa.info/amp/ar/answers/285643

https://www.dorar.net/hadith/sharh/26578

https://www.islamstory.com/ar/artical/3408067/مسيلمة-الكذاب-مدعي-النبوة

https://www.islamweb.net/ar/fatwa/56840/نبذة-عن-مسيلمة-الكذاب

https://majles.alukah.net/t157128

https://www.ahlalhdeeth.com/vb/showthread.php?t=289956

https://youtu.be/BPeyW6xJPFU

http://consuhadeth.com/questions/2830

https://www.dorar.net/aqa

https://majles.alukah.net/t174803/

https://dorar.net/hadith/sharh/86548

https://www.ahlalhdeeth.com/vb/showthread.php?t=168656

Watch "القصة الكاملة لظهورمسليمة الكذاب ومقتله في معركة اليمامة التاريخية ـ الشيخ سعيد الكملي" on YouTube
https://youtu.be/US87aidUTtA

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائتين_وثمانية_عشر
#أحداث_السنة_العاشرة_من_الهجرة
#بداية_ظهور_الخوارج

اتكلمنا المرة إللي فاتت عن ظهور مسيلمة الكذاب وشوفنا الرسالة إللي رسول الله ﷺ أرسلها له،
لكن مسيلمة الكذاب ولا اهتم برسالة رسول الله ﷺ واستمر في كذبه وتضليله للناس،
وكان عايز يُظهر كرامات تشبه معجزات رسول الله ﷺ، فأظهر الله كذبه🤭
من الأمثلة إللي حصلت ما ذكره ابن كثير في البداية والنهاية، بيقول إن مسيلمة بصَق في بئر فغاضَ ماؤها، يعني البئر كان فيها مية قليلة فبصَق فيها قال يعني عشان تزيد راحت المية غابت في الأرض واختفت تماما😅
وسقى بوضوئه نخلا فيبسَت، يعني هو اتوضى والمية إللي سقطت منه وهو بيتوضى سقى بيها نخل، النخل مات وبقى يابس ولا يُنتفع به، ودعا لرجل أصابه وجع في عينيه فمسحهما فعمِي،
يعني جاءه رجل بيشتكي وجع في عينه فدعا له ومسح على عينه فبدل ما عينه تخف الراجل اتعمى🤭
وبدأ مسيلمة الكذاب يؤلف للناس كلام يضاهي به القرآن زي ما قلنا المرة إللي فاتت، زي مثلا:
" الفيل. الْفِيلُ وَمَا أَدْرَاكَ مَا الْفِيلُ، لَهُ زَلُّومٌ طَوِيلٌ، إِنَّ ذَلِكَ مِنْ خَلْقِ رَبِّنَا الْجَلِيلِ"
قال يعني بيقلد القرآن في:
"الْقَارِعَةُ ۩ مَا الْقَارِعَةُ ۩ وَمَا أَدْرَاكَ مَا الْقَارِعَةُ ۩ يَوْمَ يَكُونُ النَّاسُ كَالْفَرَاشِ الْمَبْثُوثِ ۩ وَتَكُونُ الْجِبَالُ كَالْعِهْنِ الْمَنْفُوشِ"

لكن طبعا انتم شايفين الكذب الواضح في كلامه والفرق الكبير جدا بين كلامه وبين القرآن كلام الله👌
وعلى فكرة إللي كان بيشوفه وبيسمع كلامه كان بيبقى عارف إنه كذاب، لكن عصبيتهم خلتهم يمشوا وراه ويصدقوه ويؤمنوا به،
وكان الواحد منهم يقول له:
" أشهد أنَّك لكذَّاب وأنَّ محمَّدًا صادق؛ ولكنَّ كذَّاب ربيعة أحبُّ إلينا من صادق مُضَر"
يعني أنا عارف ومتأكد إنك كذاب وإن محمد صادق، لكن عشان انت من فرع ربيعة يعني من أهلنا فاحنا هنسمع كلامك ونمشي وراك، أحسن من محمد ﷺ إللي من فرع مُضر،
ولو تفتكروا احنا قلنا قبل كده واحنا بنتكلم عن هوازن إن العرب بينقسموا بصفة عامة إلى قسمين رئيسيين: عدنانيين وقحطانيين،
والعدنانيون دول بينقسموا إلى فرعين: رَبِيعة، و مُضَر،
وفرع مُضَر ينقسم إلى: إِليَاس و عَيْلاَن،
وقبيلة قريش جاية من فرع إلياس، فطبعا بعيدة جدا عن فرع ربيعة، وكل ما الأنساب بعدت عن بعض زادت الحزازيات بين القبائل، فالعصبية بتاعتهم خلتهم يتبعوا واحد كذاب وهمّ عارفين إنه كذاب عشان بس هو منهم😬
موضوع مسيلمة الكذاب ده استمر لحد خلافة أبي بكر الصديق رضي الله عنه وأرسل جيش لحربه، لحد ما قتله وحشِي بن حرب، زي ما هنشوف إن شاء الله واحنا بنتكلم عن الخلفاء إذا كان في العمر بقية😅

لما انتشر أمر مسيلمة الكذاب بين الناس، وقعدوا يتكلموا عنه وده كان قبل ما مسيلمة يرسل الرسالة لرسول الله ﷺ وقبل ما رسول الله ﷺ يرد على رسالته، قام رسول الله ﷺ يخطب في الناس وقال لهم:
" أما بعد، ففي شأن هذا الرجل الذي قد أكثرتم فيه، وإنه كذاب من ثلاثين كذابا ، يخرجون بين يدي الساعة"
يعني مسيلمة كذاب وهيخرج غيره ثلاثون كذابا قبل قيام الساعة يدعوا النبوة،
واحنا اتكلمنا عن الموضوع ده واحنا بنشرح علامات الساعة👌
في قصة بيحكيها ابن كثير وبيرويها كثير من المفسرين وهي قصة حبيب بن زيد،
بيقولوا إن رسول الله ﷺ في آخر حياته أرسل رسالة مع حبيب بن زيد لمسيلمة الكذاب عشان يخوّفه بالله يمكن يبطل إللي بيعمله ده،
وحبيب بن زيد ده يبقى ابن أم عمارة 《نُسَيْبة بنت كعب》
إللي كانت في غزوة أحد تُطبب الجرحى وتسقيهم الماء،
وإللي قعدت تحارب وتدافع عن رسول الله ﷺ لما سقط في الحفرة وكان عمّال بينزف لو تفتكروا🤔
وكان حبيب بن زيد من الناس إللي حضرت بيعة العقبة الثانية وحضر غزوة أحد والخندق وغير من الغزوات،
فاختاره رسول الله ﷺ ليحمل رسالته إلى مسيلمة الكذاب،
لما وقف حبيب بن زيد عند مسيلمة وأعطاه رسالة رسول الله ﷺ قال له مسيلمة:
أَتَشْهَدُ أَنَّ مُحَمَّدًا رَسُولُ اللهِ؟
فقال حبيب: نعم.
فقال له مسيلمة:
أَتَشْهَدُ أَنَّى رَسُولُ اللهِ؟
فقال حبيب: لا أسمع.
فقال له مسيلمة: أتسمع هذا، ولا تسمع ذاك؟
يعني انت بتسمع إللي على مزاجك، سمعت الأولى ومسمعتش التانية، فقال له حبيب: نعم.
فقعد مسيلمة لعنه الله يقطع في أعضاء جسد حبيب بن زيد رضي الله عنه عضو عضو لحد ما قتله😑
شوفتوا الفرق بين تعامل رسول الله ﷺ مع الرسل وتعامل غيره👌
والرواية التانية بتقول إن مسيلمة الكذاب أسر حبيب بن زيد بعد موت رسول الله ﷺ لما كان حبيب راجع من اليمن وحصل بينهم الحوار إللي قلنا عليه، لكن الرواية الأولى هي الأصح،
لكن في الحالتين إللي قتل حبيب بن زيد رضي الله عنه هو مسيلمة الكذاب وقتله بالطريقة البشعة دي، لعنه الله😞

هنسيب مسيلمة الكذاب وإللي بيعمله ونرجع لرسول الله ﷺ ونشوف باقي الأحداث إللي حصلت في السنة العاشرة من الهجرة،
أرسل رسول الله ﷺ خالد بن الوليد لقبيلة همدَان ف

ي اليمن يدعوهم إلى الإسلام فلم يستجيبوا له،
فأرسل رسول الله ﷺ علي بن أبي طالب رضي الله عنه بدل خالد وقال له يقول لخالد يرجع للمدينة وأي حد من الجنود إللي موجودين مع خالد عايز يكمل مع علي رضي الله عنه يخليه معاه،
وإللي عايز يرجع مع خالد للمدينة يرجع،
فرجع خالد للمدينة مع مجموعة من الصحابة ومجموعة تانية قعدت مع علي رضي الله عنه في اليمن،
بدأ علي رضي الله عنه الدعوة في قبيلة همدَان لحد ما أسلموا كلهم،
وأرسل علي رضي الله عنه لرسول الله ﷺ في المدينة قطعة من الذهب لم تُحَصَّل من تُرَابِها، يعني لسه بترابها ومليانة شوائب ومش ذهب خالص يعني،
أرسلها مع واحد من الصحابة،
فلما وصلت له قطعة الذهب كان عنده مجموعة من سادات العرب، منهم الأقرع بن حابس وواحد تاني اسمه:
《زيد الخَيْل》
وزيد الخيل ده اسمه الحقيقي زيد بن مُهَلهَل، واتسمى زيد الخيل عشان كان عنده خيل كثيرة جدا وكان شاعر مشهور من قبيلة طَيء،
فجاء للمدينة مع مجموعة من قومه عشان يتكلموا مع رسول الله ﷺ ويعرفوا عن الإسلام،
فسمع زيد الخيل عن الإسلام من رسول الله ﷺ فأسلم، وسأله رسول الله ﷺ عن اسمه قال له إن اسمه زيد الخيل، فسمّاه رسول الله ﷺ:《زيد الخير》.

ودايما لما حد بيذكر قصة زيد الخير بيقول معاه قول رسول الله ﷺ عنه:
" ما ذُكر لي رجلٌ من العَربِ إلَّا رأيتُه دونَ ما ذُكر لي ؛ إلَّا ما كان مِن زيدٍ ؛ فإنَّه لم يبلغ كلَّ ما فيهِ"
معنى الكلام إن لما حد من العرب يتوصف لرسول الله ﷺ وبعد كده يقابله كان بيبقى أقل من الوصف، يعني الناس بيكونوا مبالغين فيه، إلا زيد الخيل، طلع يستحق أكثر من الكلام إللي اتقال عنه،
لكن الحديث ده طلع موضوع ولا يصح عن رسول الله ﷺ 🙅‍♂️❌
فاللي نعرفه وصحيح إن رسول الله ﷺ غيّر اسم زيد الخيل إلى زيد الخير، أما المقولة إللي قالها عنه دي فهي غير صحيحة👌

المهم بقى، لما كان زيد الخير موجود عند رسول الله ﷺ جاءت قطة الذهب إللي أرسلها علي بن أبي طالب رضي الله عنه من اليمن، فقسمها رسول الله ﷺ على أربعة رجال، منهم زيد الخير والأقرع بن حابس،
وكان هدف رسول الله ﷺ من القسمة دي إن إللي أسلم فيهم يثبّت قلبه على الإسلام، أما إللي لسه بيشاور نفسه فيكون ده تشجيع له على الدخول في الإسلام،
لكن واحد من المسلمين قال:
"كُنَّا نَحْنُ أحَقَّ بهذا مِن هَؤُلَاءِ"
يعني احنا إللي من حقنا ناخد الذهب ده مش الناس إللي لسه داخلة في الإسلام دي بعد ما خلاص أمر الإسلام استقر،
وقطة الذهب دي كانت من الخُمس إللي يجوز لرسول الله ﷺ يتصرف فيه زي ماهو شايفه مناسب، واحنا اتكلمنا عن الموضوع ده بالتفصيل في توزيع غنائم حنين👌

كلام الرجل وصل لرسول الله ﷺ، فقال:
" ألَا تَأْمَنُونِي وأَنَا أمِينُ مَن في السَّمَاءِ، يَأْتِينِي خَبَرُ السَّمَاءِ صَبَاحًا ومَسَاءً"
يعني ربنا مستأمنّي على الرسالة إللي أرسلني بها إلى الأرض وانت أيها المعترض وإللي على نفس رأيك مش قادرين تستأمنوني على حُطام الدنيا أن أضعه حيث يجب أن يُوضع كما يريد الله👌
فقام رجلٌ غائِرُ العَيْنَيْنِ، مُشْرفُ الوَجْنَتين، ناشِزُ الجَبْهة، كَثُّ اللِّحيَة، مَحْلُوقُ الرَّأس، مُشَمَّر الإزار، فقال:
" يا رسولَ الله اتَّق الله"
يعني وهمّ عالحال ده قام رجل مِن بَني تَمِيمٍ يُقال له: ذو الْخُويصِرة واسمُه حُرْقُوص بن زُهَيْر، عينيه داخلة لجوة وعظم خده بارز،
وجبهته كبيرة وطالعة لبرة، حالق شعره تماما وعنده لحية كثيرة الشعر وهو ضخم الجسم، ثوبه مرتفع أعلى من الكعبين، راح قايم وقايل لرسول الله ﷺ خاف ربنا يا رسول الله، انت إزاي تقسم التقسيمة دي، مش خايف أحسن ربنا يحاسبك بسبب معصيتك دي😒
طبعا هنا رسول الله ﷺ رد عليه وقال له:
"وَيْلَك، أَوَلَسْتُ أحقَّ أهل الأرض أن يتقيَ الله"
يعني رسول الله ﷺ بيقول إن هو أَوْلى الناس وأحقهم بتقوى الله، يعني مين إللي هيتقي الله إذا رسول الله ﷺ لم يتقِّ الله😳
فمن الضلال المبين إن الإنسان يتصور الطاعة بقت معصية،
فالرجل المعترض ده تصور طاعة رسول الله ﷺ معصية، فعمل نفسه حاكم بقى على رسول الله ﷺ يأمره بالتقوى😶
مع إن إللي رسول الله ﷺ بيعمله هو عين التقوى وعين الطاعة لله👌
عشان كده خالد بن الوليد رضي الله عنه قال في ساعتها لرسول الله ﷺ:
"يا رَسولَ اللَّهِ، ألَا أضْرِبُ عُنُقَهُ؟"
يعني أقتله يا رسول الله ونخلص منه وخلاص؟
فقال له رسول الله ﷺ:
"لا، لَعَلَّه أنْ يكون يُصَلِّي"
يعني رسول الله ﷺ رفض قتل ذو الْخُويصِرة لأن ظاهره إنه مسلم، ومينفعش قتل حد ظاهره الإسلام، ده غير كده هتنتشر إشاعة إن محمد ﷺ يقتل أصحابه😕
فقال له خالد رضي الله عنه:
"وكَم مِن مُصَلٍّ يقول بلسانِه ما ليس في قلبِه"
يعني خالد بيقول إن في ناس كتير أوي ظاهرهم إنهم بيصلوا لكن قلوبهم مليانة كفر ونفاق وخديعة😑
فقال له رسول الله ﷺ قاعدة مهمة جدا👌
"إني لم أومَرْ أنْ أُنَقِّبَ عن قلوب الناس ولا أَشُقَّ بطونَهم"

يعني رسول الله ﷺ بيقول إن ربنا أمره بإنه يعامل الناس على حسب ظاه

رهم، أما بواطنهم وإللي مخبيينه فدي ملوش دعوة بيها، دي حاجة ربنا هو إللي يحاسب عليها👌

☆وطبعا هنا لازم نقف وقفة مهمة😁
كلام رسول الله ﷺ قاعدة عامة يا جماعة، يعني احنا ملناش غير الظاهر،
فلو واحد ظاهره الكفر وعايش على الكفر لحد آخر لحظة في حياته فده ظاهره عندنا إنه كافر،
يعني لا هنصلي عليه ولا ندفنه في مقابر المسلمين ولا نترحم عليه ولا ندعي له بالمغفرة، ومصيره إلى النار👌
طب نفرض إنه مات على الإسلام واحنا منعرفش أو إنه تاب في آخر لحظة في حياته🤨
خلاص يبقى دي مش بتاعتنا، ربنا هو إللي هيحاسبه ساعتها على إللي في قلبه زي ما رسول الله ﷺ قال،
ربنا لم يأمرنا إننا نفتش في قلوب الناس عشان نعرف جواهم إيه👌
وكذلك برده لو واحد عايش على الإسلام وظاهره إنه مسلم لحد آخر لحظة في حياته،
يبقى ده نصلي عليه وندعي له بالرحمة ويُدفن في مقابر المسلمين، طيب نفرض يعني إنه كَفر في آخر لحظة من حياته، أو هو كان منافق ومحدش يعرف😕
برده ملناش دعوة مادام احنا منعرفش والرجل ظاهره الإسلام، إللي في القلوب ربنا هيحاسب عليه يوم القيامة👌
فعشان بس مش كل شوية لما واحد كافر يموت الناس تقعد تترحم عليه وتقول مش يمكن أسلم في آخر لحظة🙄
أيوة يمكن بس احنا في الإسلام مش بنحط قواعد على الاحتمالية، لازم يكون عندنا يقين عشان نعرف هنتصرف إزاي؛
لأن كل حاجة في حياتنا لها أحكام، فلو واحد مات على الإسلام له أحكام💁‍♂️
ولو مات على الكفر له أحكام تانية خالص،
فتخيلوا كده لما نقعد شاكين يا ترى هو مات على الكفر زي ما هو ظاهر لنا، ولّا هو أسلم في سره🤔
فهنعمل إيه بقى هنا، هل نترحم عليه يمكن أسلم، وفي نفس الوقت ندفنه في مقابر الكفار ومحدش يصلي عليه،
ولّا هنعمل إيه بالضبط في اللخبطة دي😵
أهه ربنا عز وجل رحمنا من كل ده ووضع لما شريعة مُحكمة وقواعد معينة من غير أي لخبطة،
أي حد يموت وهو ظاهره الكفر يبقى ده كافر قولا واحدا تجري عليه أحكام الكفار وخلِصنا🙄
ولو هو غير الظاهر ده ربنا هيرحمه ويدخله الجنة،
ماهو يا جماعة ربنا مش مستني دعاءنا عشان يدخّله الجنة يعني🙆‍♂️
وهو لو كافر وكل الخلق إنس وجن وملائكة وحيوانات و...و...دعوا له إن ربنا يرحمه والله ما هيرحمه خلاص انتهى الموضوع طول ما هو مات على الكفر👌
يعني متفكروش كده إننا ممكن نتحايل على ربنا شوية فلما يلاقي إلحاحنا فهيقول خلاص هرحمه عشان خاطر دعاءكم مثلا😅
ده ربنا ياجماعة، مش واحد من البشر ممكن تتحايل عليه فيغير رأيه، وإلا كده الموضوع هيبقى فوضى😬
ربنا قال:
"مَا يُبَدَّلُ الْقَوْلُ لَدَيَّ وَمَا أَنَا بِظَلَّامٍ لِّلْعَبِيدِ"
فاحنا ملناش غير الظاهر نتعامل بيه، ظاهره الكفر يبقى نعامله في الدنيا معاملة الكفار،
ظاهره الإسلام يبقى نعامله في الدنيا معاملة أهل الإسلام،
بس خدوا بالكم🙆‍♂️
مش معنى إن فلان ظاهره إنه مات على الكفر أو ظاهره إنه مات على الإسلام يبقى كده نقول إنه أكيد هيدخل النار أو أكيد إنه هيدخل الجنة😅
دي مش بتاعتنا بقى،
احنا لينا الأحكام بس في الدنيا، لكن أحكام الآخرة ونقعد ندخّل ده الجنة وده النار فده كده إللي مينفعش بقى، دي إللي يحكم فيها ربنا فقط👌
إلا طبعا لو حد احنا عارفين على وجه اليقين إن فلان في النار أو في الجنة عن طريق الوحي،
زي مثلا إبليس، وزي أبو لهب وأبو طالب وعمرو بن لُحي وغيرهم من إللي رسول الله ﷺ أخبر عنهم إنهم في النار، أو في الجنة زي أبو بكر الصديق وعمر بن الخطاب وعثمان وعلي وغيرهم من الصحابة👌
أما بقى غير كده فاحنا منقولش على فلان الفلاني إنه هيدخل النار أو هيدخل الجنة حتى لو كان ظاهره إنه مات على الكفر، يارب تكون النقطة دي واضحة لأنها مهمة جدا في عقيدتنا كمسلمين😅
وعمر بن الخطاب رضي الله عنه لخص لنا الموضوع ده في كلمتين بعد موت رسول الله ﷺ،
قال عمر رضي الله عنه:
"إِنَّ أُنَاسًا كَانُوا يُؤْخَذُونَ بِالْوَحْيِ فِي عَهْدِ رَسُولِ الله ﷺ،
وَإِنَّ الْوَحْيَ قَدْ انْقَطَعَ، وَإِنَّمَا نَأْخُذُكُمْ الآنَ بِمَا ظَهَرَ لَنَا مِنْ أَعْمَالِكُمْ ،
فَمَنْ أَظْهَرَ لَنَا خَيْرًا أَمِنَّاهُ وَقَرَّبْنَاهُ، وَلَيْسَ إِلَيْنَا مِنْ سَرِيرَتِهِ شَيْءٌ ، اللَّهُ يُحَاسِبُهُ فِي سَرِيرَتِهِ ،
وَمَنْ أَظْهَرَ لَنَا سُوءًا لَمْ نَأْمَنْهُ وَلَمْ نُصَدِّقْهُ ، وَإِنْ قَالَ إِنَّ سَرِيرَتَهُ حَسَنَة"
يعني الوحي إللي كان بيخبرنا بالسرائر خلاص انقطع، ودلوقتي ملناش غير الظاهر فاللي هيظهر لنا الخير هنقربه، وإللي هيظهر لنا الشر مش هنقربه ولا هنصدقه حتى لو قال أنا قلبي زي البَفْتة البيضا😀
حلو الكلام😁

نرجع بقى لرسول الله ﷺ بعد ما قال لخالد:
"إني لم أومَرْ أنْ أُنَقِّبَ عن قلوب الناس ولا أَشُقَّ بطونَهم"
لما الراجل مشي خلاص رسول الله ﷺ نظر ناحيته وقال لخالد بن الوليد رضي الله عنه:
"إنه يخرج من ضِئضِئ هذا قومٌ يتلونَ كتابَ اللهِ رَطْبًا،
لا يجاوز حناجرَهم، يَمْرُقون من الدين كما يَمْرُق السَّهْمُ مِن الرَّمِيَّة، لئن أدركتُهم لأق

تلنَّهم قَتْلَ ثمودَ"
يعني شايف الراجل إللي اعترض علي ده وقال لي اتقي الله، أهه هيخرج ناس من نوعية الراجل ده وهيمشوا على نفس منهجه، ومن صفات الناس دي إنهم بيقرأوا القرآن بكل سهولة لكثرة قراءتهم وحفظهم له،
ولكن القرآن لا يصل إلى قلوبهم ولا بيأثر فيهم؛ لأنهم مش بيفهموه ولا بيطبقوه زي ما ربنا أراده،
وعشان كده بيخرجوا من الدين بسرعة وبسهولة كأنهم مدخلوش فيه أصلا وده لأن الإيمان لم يستقر في قلوبهم،
وبسبب سوء فهمهم للدين هيقتلوا أهل الإسلام ويتركوا الكفار إللي بيعبدوا الأصنام😑
فرسول الله ﷺ قال لخالد إنه لو عاش لحد ما يخرجوا هيقتلهم قتل شديد لحد ما يخلص عليهم كلهم وميتبقاش منهم حد زي ما ربنا أفنى قوم عاد👌
وكان أول بداية ظهور للفرقة إللي وصفها رسول الله ﷺ في آخر خلافة عثمان بن عفان رضي الله عنه،
وفي خلافة علي رضي الله عنه ظهروا بقوة وعملوا مشاكل كتير وبقى اسمهم الخَوَارِج،
وطبعا ده كان من معجزات رسول الله ﷺ إنه أخبر عن حاجة هتحصل بعد موته بسنين 👌

إن شاء الله المرة الجاية هنكمل باقي الأحداث إللي حصلت في السنة العاشرة من الهجرة 😊

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

⭐المصادر⭐
https://www.ahlalhdeeth.com/vb/showthread.php?t=168656

http://www.sahaba.rasoolona.com/Sahaby/18025/تفصيل-ما-ذكر-عنه-في-الكتب-الأربعة/حبيب-بن-زيد-بن-عاصم-بن-عمرو-الأنصاري-المازني

http://islamport.com/w/tkh/Web/2300/3514.htm

https://www.islamweb.net/ar/fatwa/56840/نبذة-عن-مسيلمة-الكذاب

http://www.al-eman.com/الكتب/الكامل في التاريخ /ذكر إرسال علي إلى اليمن وإسلام همدان /i46&d48681&c&p1

https://www.alukah.net/publications_competitions/0/6276/

https://www.islamweb.net/ar/fatwa/56840/نبذة-عن-مسيلمة-الكذاب

https://dorar.net/hadith/search?q=اللَّهُمَّ اغْفِرْ لِي وَلَهُ وَأَعْقِبْ%25D&m%5B0%5D=1420&s[]=556&page=8
http://www.sahaba.rasoolona.com/Sahaby/19377/تفصيل-ما-ذكر-عنه-في-الكتب-الأربعة/زيد-الخيل-بن-مهلهل-بن-زيد-بن-منهب-بن-عبد-رضا-بن-أفصى-بن-المختلس-بن-ثوب-بن-كنانة-بن-مالك-بن-نابل-بن-عمرو-بن-الغوث-بن-طيء-الطائي

https://www.alukah.net/literature_language/0/25308/

https://islamic-content.com/hadeeth/1486

https://www.google.com/amp/s/islamqa.info/amp/ar/answers/65620

https://alabasirah.com/node/535

http://www.al-eman.com/الكتب/الكامل في التاريخ /ذكر إرسال علي إلى اليمن وإسلام همدان /i46&d48681&c&p1

https://dorar.net/hadith/sharh/984

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائتين_وتسعة_عشر
#أحداث_السنة_العاشرة_من_الهجرة
#موت_إبراهيم_وكسوف_الشمس

هنكمل إن شاء الله النهاردة أحداث السنة العاشرة من الهجرة😁
من الأحداث إللي حصلت هي إسلام الصحابي جَرِير بن عبد الله البَجَلِيُّ،
الأول كده، في خلاف كبير بين العلماء على زمن إسلامه😅
في إللي قال إنه أسلم سنة تسع للهجرة، وفي إللي قال إنه أسلم في رمضان سنة عشر للهجرة، وفي إللي قال إنه أسلم قبل كده بكتييير
فاحنا إللي يهمنا إنه أسلم ويهمنا إللي رسول الله ﷺ أمره به، تمام كده😁
بيحكي جرير وبيقول إنه لما جاء المدينة عشان يُسلم ومعاه خمسين رجل من قومه؛ دخل المسجد وكان رسول الله ﷺ بيخطب في الناس، فأول ما دخل المسجد كل الناس بصوا عليه فجأة،
فعرف إن رسول الله ﷺ قال لهم حاجة عليه، فسأل الرجل إللي قاعد جنبه:
هل ذكر رسول الله ﷺمن أمري شيئاً؟
يعني هل رسول الله ﷺ قال لكم عني حاجة، فقال له الرجل: نعم، ذَكَرَكَ بِأَحْسَنِ الذِّكْرِ قال:
"إِنَّهُ سَيَدْخُلُ عَلَيْكُمْ مِنْ هَذَا الفَجِّ مِنْ خَيْرِ ذِي يَمَنٍ، أَلاَ وَإِنَّ عَلَى وَجْهِهِ مِسْحَةَ مَلَكٍ"
يعني هيدخل عليكم من الناحية دي رجل من خير أهل اليمن وعليه جمال ظاهر،
وكان من جمال جرير بن عبد الله البَجَلِيُّ إن عمر رضي الله عنه كان بيقول عنه إنه يوسف هذه الأمة😅
فلما سمع جرير الكلام حمد الله على النعمة إللي وهبها له،
وقال جرير:
"ما حَجَبَنِي النبيُّ ﷺ مُنْذُ أسْلَمْتُ، ولَا رَآنِي إلَّا تَبَسَّمَ في وجْهِي"
يعني بيقول إن مفيش مرة رسول الله ﷺ رفض إنه يقابل فيها جرير بن عبد الله لما كان يروح له البيت،
كل مرة يستأذن عليه جرير كان رسول الله ﷺ يأذن له، ومفيش مرة رسول الله ﷺ يشوف فيها جرير إلا تبسم في وجه جرير،
وبالمناسبة يا جماعة جرير هو راوي الحديث بتاع حكم نَظر الفَجأة😁
يعني هو في مرة سأل رسول الله ﷺ عن نظرة الفجأة، يعني يبقى ماشي وفجأة يشوف حاجة مُحرمة، أو يشوف امرأة بدون قصد،
فسأل رسول الله ﷺ يعمل إيه في موقف زي ده، فقال له رسول الله ﷺ:
اصرف بصرك، يعني لو وقعت عينك على شيء محرم متكملش نظر، على طول اصرف بصرك وبكده مش هيبقى عليك ذنب👌

قال له رسول الله ﷺ في مرة:
ألَا تُرِيحُنِي مِن ذِي الخَلَصَةِ؟
و ذِي الخَلَصَةِ ده بيت في اليمن كان بيُشرَك فيه بالله وكان له اسم تاني هو الكعبة اليمانية،
وإللي كان بيعبدوه قبيلة خَثْعَمَ وبَجِيلَةَ قبيلة جرير، وكان فيه نُصُبٌ، يعني كان فيه حجارة يذبحون عليها لغير الله،
فرسول الله ﷺ كان مهموم إن لسه في مكان يُشرك فيه بالله، فكان عايز يرتاح من الهم ده،
ومكنش في شيء أتعب لقلب رسول الله ﷺ من إن يبقى في شيء يُعبد من دون الله تعالى👌
فطلب من جرير بالذات إنه يخلصه من الصنم ده لأنه كان في بلاد قومه وهو كان من أشرافهم وقبيلته كانت بتعبده مع قبيلة خَثعم،
فاستجاب جرير لطلب رسول الله ﷺ على طول وقال: بَلَى.
لكن جرير كان عنده مشكلة وهي إنه مش بيثبت على فرس،
يعني لأنه كان خفيف فكان بيرتفع عن السّرج إللي بيكون على الحصان كل ما ارتفع الحصان ويهبط بهبوط الحصان،
وطبعا ده فيه خطر عليه لأنه ممكن يقع،
فجرير بيقول إنه اشتكى الله لرسول الله ﷺ إنه لا يثبت على فرس، فضرب رسول الله ﷺ بيَدِهِ في صَدْرِ جرير، وقالَ: اللَّهُمَّ ثَبِّتْهُ واجْعَلْهُ هَادِيًا مَهْدِيًّا.
يعني رسول الله ﷺ خبط على صدر جرير كده خبطة خفيفة ودعا له بالهداية والثبات على الفرس،
فقال جرير إن من بعد دعاء رسول الله ﷺ له موقعش من على فرس تاني أبدا👌

توجه جرير مع مائة وخمسين رجل من قبيلة أحْمَسَ إلى ذِي الخَلَصَةِ عشان يهدموه، فلما وصل جرير لذِي الخَلَصَةِ هدم المبنى وحرق الخشب بتاعه،
فأرسل جرير رجل لرسول الله ﷺ في المدينة يبشره بزوال ذِي الخَلَصَةِ، فلما وصل الرجل وبشّر رسول الله ﷺ؛ دعا رسول الله ﷺ بالبركة لخيل ورجال قبيلة أحْمَسَ خمس مرات.

من الأحداث إللي حصلت في السنة العاشرة للهجرة وتحديدا في شهر ربيع الأول: موت إبراهيم بن رسول الله ﷺ😢
وكان ساعتها عمره ثمانيةَ عَشَرَ شهرا،
يعني يا جماعة لحد آخر سنة في حياة رسول الله ﷺ والابتلاء الشديد مُلازم له👌
رسول الله ﷺ مات أبناؤه كلهم في حياته ما عدا فاطمة رضي الله عنها،
وكان آخر أبنائه موتا هو إبراهيم، وكان ساعتها رسول الله ﷺ قريب من الثلاثة وستين عام،
فكان الموضوع شديد جدا على رسول الله ﷺ ولكن مع ذلك استقبل رسول الله ﷺ الابتلاء ده باليقين والصبر والرضا بقضاء الله عز وجل،
يقول أنس بن مالك رضي الله عنه إنه دخل مع رسول الله ﷺ على إبراهيم لما كان بيموت، يعني في النزع الأخير فلما شافه رسول الله ﷺ بكى،
وكان معاهم عبد الرحمن بن عوف رضي الله عنه، فقال لرسول الله ﷺ:
" وأَنْتَ يا رَسولَ اللَّهِ؟"
يعني بيقول له إن الناس لا يصبِرون عند المصائب، وأنت يا رسولَ الله بتعمل زيهم وتبكي مع إنك دايما تكلمنا عن الصبرِ وتشجعنا عليه وتنهانا عن الجزعِ؟
فقال له رسول

الله ﷺ:
"يا ابْنَ عَوْفٍ إنَّهَا رَحْمَةٌ"
يعني دي رقَّةٌ في القلبِ، بتحصل في النَّفس عند فِراقِ الأحبَّة، فتؤدي إلى حُزنِ القلبِ، وبكاءِ العين، وهي غريزةٌ في البشر لا يُلامُ عليها، وهي مش مِن الجزعِ،
فالبكاءُ على المصيبةِ غريزةٌ إنسانيَّةٌ لا يأثَمُ عليها الإنسان مادام مفيش سَخَطٌ أو نُواح أو عدمُ رضًا بقضاءِ الله وقدَرِه👌
واستمرت الدموع تنزل من عين رسول الله ﷺ، وقال:
إنَّ العَيْنَ تَدْمَعُ، والقَلْبَ يَحْزَنُ، ولَا نَقُولُ إلَّا ما يَرْضَى رَبُّنَا، وإنَّا بفِرَاقِكَ يا إبْرَاهِيمُ لَمَحْزُونُونَ.
يعني بسبب الغريزة إللي ربنا فطر الناس عليها فالعين بتدمع والقلب بيحزن،
لكن في نفس الوقت لا نقولُ إلَّا ما يُرضي ربَّنا مِن الحمدِ والاسترجاعِ، وسؤالِ الخلَفِ الصَّالح،
وإنَّا بفِراقِك يا إبراهيمُ لَمحزونونَ يعني:
الحزن ده مش بإيدينا لكنه شيء ربنا جعله فينا وأوقَعه في قلوبنا، فلا نُلامُ عليه إلَّا إذا قُلْنا أو فعَلْنا ما لا يُرضي ربَّنا.

☆وطبعا رسول الله ﷺ هنا في الموقف ده بيعلمنا إنَّ المؤمنَ عند المصيبةِ لا يقولُ ولا يفعَلُ إلَّا ما يُرضي اللهَ عزَّ وجلَّ👌

إبراهيم بن رسول الله ﷺ مات قبل تمام فترة الرضاع عشان كده هو له مرضعة تكمل رضاعه في الجنة زي ما قال رسول الله ﷺ:
"إنَّ له مُرْضِعًا في الجَنَّةِ"

☆طيب إيه الحكمة من موت أولاد رسول الله ﷺ الذكور من صغرهم كده🤔

لو تفتكروا في قصص الأنبياء هتلاقوا إن إبراهيم عليه السلام اتولد له ولدين هما إسماعيل وإسحاق،
وهم الاتنين ورثوا النبوة عن إبراهيم عليه السلام، وكمان يعقوب ورث النبوة عن إسحاق وورثها يوسف عن يعقوب،
وتوالت وراثة النبوة في بني إسرائيل، فورث سليمان داود وورث يحيى أبيه زكريا،
وكان عيسى عليه السلام آخر أنبياء بني إسرائيل وبكده انتهت النبوة في فرع إسحاق عليه السلام،
وانتقلت لفرع إسماعيل بدعوة إبراهيم عليه السلام لما قال:
"رَبَّنَا وَابْعَثْ فِيهِمْ رَسُولًا مِّنْهُمْ يَتْلُو عَلَيْهِمْ آيَاتِكَ وَيُعَلِّمُهُمُ الْكِتَابَ وَالْحِكْمَةَ وَيُزَكِّيهِمْ "
فرسول الله ﷺ هو دعوة إبراهيم عليه السلام زي ما قال في الحديث:
"أَنَا دَعْوَة أَبِي إبْرَاهِيم"
فبقت العادة في الغالب أن يَرث أبناء الأنبياء النبوّة من آبائهم،
فلو كان لرسول الله ﷺ ولد من بعده كان هيبقى فتنة للناس لأنهم هيفكروا إن النبوة هيرثها أحد أبناء رسول الله ﷺ،
ورسول الله ﷺ هو خاتم الأنبياء والمرسلين ومفيش أي نبي بعده،
وفعلا ظهرت الحكمة من ده بعد موت رسول الله ﷺ،
لما انتقل الصحابة لنظام الخلافة بدل ما يكون في توريث النبوة زي الأمم السابقة زي ما قلنا👌

في نفس اليوم بقى إللي مات فيه إبراهيم بن رسول الله ﷺ حصل كسوف للشمس، فالناس ربطت بين موت إبراهيم وبين كسوف الشمس، فصلى رسول الله ﷺ صلاة الكسوف وبعد الصلاة وضّح لهم وقال:
" إِنَّ الشَّمْسَ وَالْقَمَرَ مِنْ آيَاتِ اللهِ،
وَإِنَّهُمَا لَا يَنْخَسِفَانِ لِمَوْتِ أَحَدٍ، وَلَا لِحَيَاتِهِ، فَإِذَا رَأَيْتُمُوهُمَا فَكَبِّرُوا، وَادْعُوا اللهَ وَصَلُّوا وَتَصَدَّقُوا"

كان أهل الجاهلية يعتقدون بتأثير الشمس والقمر والنجوم، في الحوادث الأرضية، وأنها تنكسف إذا وُلد عظيم، أو مات عظيم، فهو هنا بيقول لهم إن الشمس والقمر من خَلق الله،
مش بيتأثروا غير بأوامر ربنا،
فلما يحصل لهم كسوف أو خسوف فده بيكون بأمر من الله مش عشان خاطر حد،
وعلّمهم إنهم لو شافوا كسوف أو خسوف يصلوا ويتصدقوا ويدعوا ربنا ويستغفروا،
وصلاة الكسوف مختلفة عن الصلاة العادية إللي بنصليها👌

☆إزاي مختلفة🤔
شوفوا،
الإمام يكبر تكبيرة الإحرام، وبعدين يقول دعاء الاستفتاح وبعدين يقول الاستعاذة، وبعدها يقرأ الفاتحة،
وبعد الفاتحة يقرأ قراءة طويلة من القرآن،
ممكن يقرأ سورة البقرة، أو البقرة وآل عمران، المهم القراءة تكون طويلة،
وبعدها يركع ركوع طويل برده، وبعد ما يرفع من الركوع يقول سمع الله لمن حمده ، ربنا ولك الحمد،
هنا بقى مش هينزل يسجد، لأ ده هيقول الفاتحة تاني ويقرأ قراءة طويلة تاني لكن تكون أقل من القراءة الأولى،
يعني مثلا لو قرأ في المرة الأولى بالبقرة، يقرأ في المرة الثانية بآل عمران،
لو قرأ في الأولى بثلاثة أجزاء يقرأ في القراءة الثانية بجزئين وهكذا،
وبعد ما يخلص القراءة هيركع برده ركوع طويل لكن الركوع ده هيكون أقل في الطول من الركوع الأول،
وبعد ما يرفع من الركوع الثاني ده هيقول سمع الله لمن حمده، ربنا ولك الحمد، وبعدين يسجد سجود طويل ويقوم يقعد بين السجدتين وبعدين يسجد تاني سجود طويل،
وبعدها يقوم للركعة الثانية وهيعمل فيها نفس إللي عمله في الركعة الأولى لكن أقل في التطويل لحد ما يوصل للتشهد فيتشهد ويسلم👌
وطبعا الكلام ينطبق على صلاة الخسوف😁

☆طيب لو حد صلى صلاة الكسوف أو الخسوف زي صلاة التطوع العادية، ده ينفع ولّا لأ🤔
لو صلى الإنسان صلاة الكسوف أوالخسوف ركعتين كصلاة التطوع صلاته صحيحة وتُجزِئ، لكن السنة زي ما ش

رحنا كده والدليل على الكيفية دي في صلاة الكسوف هو حديث السيدة عائشة في البخاري ومسلم هتلاقوه في الروابط في التعليقات👇

☆سؤال كمان:
امتى وقت صلاة الكسوف🤔
صلاة الكسوف وقتها من بداية الكسوف لحد نهايته، ولو الناس خلصت صلاة قبل ما الكسوف يخلص فيكملوا الوقت ده بالتكبير والاستغفار والصدقة،
ومفيش دعاء معين رسول الله ﷺ أمر إننا ندعيه في الوقت ده، لكن استغفار ودعاء عادي، وهي صلاة جهرية،
ولو كان الكسوف جاء في وقت فيه نهي عن الصلاة زي بعد العصر مثلا يجوز نصليها عادي لأنها صلاة ذات سبب.

◇إيه بقى الحكمة أصلا من صلاة الكسوف🤔
الحكمة هي تحقيق عبودية الخوف من الله تعالى،
لأن رسول الله ﷺ قال:
"إن الشمس والقمر آيتان من آيات الله يخوّف الله بهما عباده"
معنى الكلام إن الظاهرة دي المفروض تقذف الخوف في قلب المسلم فيفزع إلى الله بالصلاة والدعاء والتضرّع واللجوء إليه،
وفي هنا إشارة وتنبيه للناس على قدرة الله وإنه قادر ينزل عليهم العذاب ويَسلُب منهم النّعم ويغير أحوالهم في لحظة زي ما غير الشمس والقمر لحالة همّ مش متعودين عليها،
وكمان فيها تذكير بيوم القيامة وإللي هيحصل فيه من أمور غير طبيعية،
ربنا بيقول:
《إِذَا الشَّمْسُ كُوِّرَتْ》
ويقول:
《فَإِذَا بَرِقَ الْبَصَرُ * وَخَسَفَ الْقَمَرُ * وَجُمِعَ الشَّمْسُ وَالْقَمَرُ》

☆ملحوظة:
صلاة الخسوف سنة مؤكدة عن رسول الله ﷺ مش فرض يعني، ولو فات وقتها لا تُقضى👌

دي كده كانت أهم المعلومات عن صلاة الكسوف، إن شاء الله تكون واضحة، ولو في حاجة مش واضحة ممكن تسألوا في التعليقات👇 وهجاوب عليها في بداية الجزء الجاي إن شاء الله 😊

مصادر جزء النهاردة في التعليقات👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

⭐المصادر⭐
https://islamweb.net/ar/library/index.php?page=bookcontents&idfrom=7852&idto=7857&bk_no=52&ID=2250

https://www.dorar.net/hadith/sharh/76367

Watch "الحلقة 21 - مـناقب عظيمة للصحابي الجليل جرير بن عبدالله البجلي مع الرسول ﷺ ـ الشيخ سعيد الكملي" on YouTube
https://youtu.be/XcWnm5J-bGU

https://www.islamweb.net/ar/fatwa/46227/يوسف-هذه-الأمة

https://www.islamweb.net/ar/fatwa/152703/

https://hadithportal.com/index.php?show=hadith&h_id=4649&uid=0&sharh=10000&book=31&bab_id=1098

https://islamstory.com/ar/artical/34016/جرير_بن_عبد_الله_البجلي

https://www.alukah.net/sharia/0/121792/

https://dorar.net/hadith/sharh/9620

https://www.alukah.net/sharia/0/80247/

https://www.dorar.net/hadith/sharh/5380

https://almunajjid.com/speeches/lessons/558

https://www.islamweb.net/ar/fatwa/138/صفة-صلاة-الكسوف

https://mawdoo3.com/كيفية_صلاة_خسوف_القمر

https://binbaz.org.sa/audios/2920/45-من-حديث-خسفت-الشمس-في-عهد-رسول-الله-صلى-الله-عليه-وسلم-فقام-رسول-الله-صلى-الله-عليه-وسلم-يصلي

https://mawdoo3.com/ما_الحكمة_من_موت_أبناء_الرسول_الذكور

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman