فهمهم لآيات القرآن وتطبقيها كان إزاي وإقرار رسول الله ﷺ لأفعالهم أو اعتراضه عليها، مليش دعوة بأي أقوال مخالفة لكلام رسول الله ﷺ أو فعل الصحابيات،
لأن قول رسول الله ﷺ وتطبيق الصحابة لكلامه واقراره وموافقته ﷺ على فهمهم وتطبقيهم هو الأصل👌

◇طيب احنا اتكلمنا عن لبس الصحابيات وهم خارجين من بيوتهن، طيب إيه موضوع وقرن في بيوتكن🤔

آية وقرن في بيوتكن هي في الأصل مُوجهة لزوجات رسول الله ﷺ، وبالتالي موجهة لنساء المسلمين بصفة عامة لأن مفيش دليل بيقول عكس كده، زي ما شرحنا في البداية 😁

فالأصل إن المرأة تقعد في البيت وتحرص إنها متخرجش من البيت إلا لضرورة حسب حاجتها وكل واحد أدرى بحاله وإيه الضروري بالنسبة له👌
ولما تخرج من البيت خروجها يكون بضوابط معينة،
زي مثلا إنها متختلطش بالرجال،
ورسول الله ﷺ نفسه كان حريص إنه يباعد بين الرجال والنساء حتى في المسجد وفي الطريق👌
يعني كان الرجال لما يصلوا يكونوا هم في مقدمة المسجد والنساء في آخره،
وكان ﷺ بعد ما يسلم من الصلاة يستنى شوية والرجال معاه عشان النساء تمشي الأول وميحصلش اختلاط بين الرجال والنساء بعد الصلاة وهم ماشيين،
حتى يوم العيد كانت النساء بتصلي في ناحية والرجال في ناحية،
وبعد الصلاة كان رسول الله ﷺ يخطب في الرجال خطبة العيد لوحدهم، وبعدين يروح للنساء يخطب عندهم خطبة تانية لهم،
وقال رسول الله ﷺ للنساء لما اختلطوا بالرجال في الطريق:
"اسْتَأْخِرْنَ ، فَإِنَّهُ لَيْسَ لَكُنَّ أَنْ تَحْقُقْنَ الطَّرِيقَ ، عَلَيْكُنَّ بِحَافَّاتِ الطَّرِيقِ،
فَكَانَتْ الْمَرْأَةُ تَلْتَصِقُ بِالْجِدَارِ حَتَّى إِنَّ ثَوْبَهَا لَيَتَعَلَّقُ بِالْجِدَارِ مِنْ لُصُوقِهَا بِهِ"
وقال: " ليس للنساء وسَط الطريق"
يعني المرأة لما تكون ماشية في الشارع 《متتعمدش》 تمشي في وسط الطريق، لكن تمشي في جنب بعيد عن الزحمة، لأن وسط الطريق هو الغالب على الرجل إنه بيمشي فيه،
فلو المرأة مشيت في وسط الطريق وخصوصا لو في زحمة هتخبط في الرايح والجاي، وده لا يجوز🤷‍♂️
وطبعا متعملش أي حركة مُتعمدة ولا تضرب برجلها الأرض عشان تبين الزينة المخفية تحت ملابسها،
لأن المرأة في الجاهلية كان لها طريقة حياة مختلفة عن المرأة في الإسلام،
المرأة في الجاهلية كانت بتمشي وسط الرجال حاطة على شعرها حاجة زي الخمار صغير ومرجعاه للوراء ،انتم أكيد شوفتم ما يُسمى بحجاب الراهبات، وإزاي إنه راجع لوراء الكتف كده صح🤔
أهه ده قريب من لبس النساء أيام الجاهلية، وكانت النساء ساعات تظهر ضفائر شعرها والحلَق بتاعها من القماشة دي،
وطبعا رقبتها ظاهرة وصدرها باين، وتمشي كده وسط الرجال،
فجاء القرآن وأمر النساء بوضع جلابيبهن بصورة يغطين بها أجسادهن كاملة زي ما قلنا من شوية،
والمرأة في الجاهلية كانت لما تمشي وفي رجلها خلخال صامت فتقوم تضرب الأرض برجلها عشان يعمل صوت وتلفت الرجال إليها لما يسمعوا صوت رنة الخلخال،
فنهى الله النساء المؤمنات إنهم يعملوا زي النساء في الجاهلية،
ويدخل في النهي ده لو المرأة عملت أي حركة مُتعمدة عشان تبين الزينة إللي مش ظاهرة،
يعني لابسة سلسلة لابسة خاتم لابسة عباية مطرزة من فوق والخمار مغطي كل ده،
فتقوم عاملة أي حركة وهي متعمدة عشان تظهر الزينة دي للرجال فده لا يجوز وحكمها زي حكم إللي بتضرب برجلها في الأرض كده👌
رسول الله ﷺ كان حريص جدا إنه يفصل الرجال عن النساء ويبعدهم عنهم وكان دائما يحذرهم من النساء،
قال :
"إِيَّاكُمْ وَالدُّخُولَ عَلَى النِّسَاءِ"
والدخول هنا معناه إن الرجل يقعد مع المرأة من غير محارمه بغير حجاب شرعي أو يبقى فيه خُلوة بينهم، يعني يقعدوا مع بعض لوحدهم،
ولو المرأة بحجاب شرعي مينفعش الرجل يقعد معاها لوحدهم لو هو مش من محارمها،
"لا يخلون رجل بامرأة ، فإن الشيطان ثالثهما"
ولو المرأة بحجاب شرعي ومش لوحدها مينفعش الرجل يقعد معاها لو هتحصل فتنة بينهم،
ولو المرأة بحجاب شرعي مينفعش تبقى لوحدها مع مجموعة من الرجال من غير ما يكون معاها محرم،
ولو المرأة بحجاب شرعي مينفعش تقعد مع رجل لوحدها إلا لو معاها محرم،
"لاَ يَخْلونَّ رَجُلٌ بِامْرَأةٍ إِلاَّ وَمَعَها ذُو مَحْرَم"

☆طب لو مفيش مَحرم للمرأة، تعمل إيه لو 《اضطرت》 لموقف هتكون فيه مع رجل لوحدها 🤔
تشوف امرأة تثق فيها تكون معاها وبكده مش هيبقى في خلوة، لكن الرجل إللي هيكونوا معاه ده يكون مأمون الجانب ميتخفش منه إنه يغلب المرأتين على أنفسهما👌

☆طيب وأقارب الزوج🤔
لما رسول الله ﷺ قال إياكم والدخول على النساء، واحد من الصحابة قال له :أرأيت الحَمْو؟
قال له رسول الله ﷺ: الحَمْوُ الموت👌
يعني رسول الله ﷺ بيقول أكثر ناس تخاف منهم هم أقارب الزوج، وتتوقع الفتنة والشر من ناحيتهم أكثر لأنه يقدر يوصل للمرأة أكثر من الرجل الأجنبي من غير ما حد ينكر عليه،
يعني مش بتسمعوا إللي بيقول عادي إقلعي النقاب قصاد أخو زوجك ده زي أخوكِ،
حتى الزوج نفسه ساعات بيتخانق ويرفض إن زوجته تلبس نقاب عشان اخواته، أو يشتر

ط عليها إنها لو لبسته تقلعه قصاد اخواته الرجال أو أقاربه،
فعادة الناس إنهم بيتساهلوا في موضوع أقارب الزوج وتلاقوا الرجل يقعد مع زوجة أخوه لوحدهم عادي ومحدش ينكر عليهم، بعكس لو واحد من الشارع جه ودخل مش هيسمحوا بكده🤷‍♂️
فرسول الله ﷺ جعل أقارب الزوج من غير المحارم زي الموت كده، الواحد يحترس منهم لأن الشر والفتنة منهم أقرب👌
وطبعا احنا بنسمع وبنشوف بلاوي بسبب تهاون الرجال والنساء في الإلتزام بأوامر ربنا😓

◇طيب مين هم بالضبط🤔
أي حد من أقارب الزوج من غير المحارم بالنسبة للمرأة يبقى مينفعش تقعد معاهم وتهزر وتكشف حجابها، ويكون بينهم خلوة👌
قعادها معاهم يكون وسط الاهل وبحجاب شرعي كامل وميكنش قعدتهم على سماع أغاني ولا معاصي ولا القعدة نفسها تكون فيها فتنة لأي أحد من الموجودين،
محارم الزوج بالنسبة للمرأة بقى هم :
أبو الزوج وجده لأمه أو أبيه سواء من النسب أو الرضاع، وأبناء الزوج لو له أبناء من زوجة تانية سواء من النسب أو من الرضاع غير كده يبقوا مش من محارم الزوجة 👌

☆طيب هو ليه التضييق على النساء كده، يعني هم سبب البلاوي إللي بتحصل دي مثلا😞

هنعرف إجابة السؤال ده المرة الجاية إن شاء الله 😊



#Eman_Shalapy

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

#قصص_الأنبياء(٢)
#السيرة_النبوية
#الحلقة_التاسعة_والتسعون
#أحداث_السنة_الخامسة_من_الهجرة
#لماذا_النساء

اتكلمنا المرة إللي فاتت عن الحجاب في الإسلام وعن وضع المرأة لمّا تخرج من البيت تبقى لابسة إيه وتمشي إزاي،
وشوفنا تحذير رسول الله ﷺ من الدخول على النساء،
وفي أحاديث تانية لرسول الله ﷺ وهو بيحذر الصحابة وبيحذر الرجال من بعدهم من النساء،
قال :
" المرأةُ عورةٌ ، وإنها إذا خرجت من بيتِها استشرفها الشيطانُ ، و إنها لا تكون أقربَ إلى اللهِ منها في قَعْرِ بيتِها"

يعني يجب تغطية المرأة زي ما بنغطي العورة كده، ومحدش يشوفها من غير المحارم، فهي يجب أن تُحفظ وتُصان،
ومش معنى الكلام إن المراة دي حاجة وحشة ونستعر منها زي ما الناس فاهمة،
أو زي ما كارهي الإسلام بيقولوا🙄

مثال عملي عشان نقرب المعنى👌
الدواء، مش بيبقى مكتوب عليه يُحفظ بعيدا عن أيدي الأطفال، هو الدواء ده حاجة وحشة عشان نخليه بعيد عن الأطفال🤨
لأ مش حاجة وحشة، لكن لو الأطفال شافوا الدواء وفتحوه وشربوه هيضرهم،
وكذلك السكّينة، بنبعدها خااالص عن الأطفال عشان لو شافوها وقدروا يوصلوا لها هتضرهم وتؤذيهم،
فالسكينة نفسها مش وحشة ومنقدرش نستغنى عنها ،لكن وجودها مع الشخص الغلط هو إللي مُضر😊
كذلك المرأة، المرأة مش حاجة سيئة عشان كده لازم نخبيها، المرأة بنبعدها وبنخفيها عن الأشخاص الغلط إللي هيسيؤوا لها أو يُسيؤوا استخدامها،
ومن الأشخاص دول الشيطان، قاعد لها بالمرصاد مستنيها تخرج، وأول ما تخرج من بيتها بيزينها في نظر الرجال فيوقعهم هم الاتنين في الفتنة،
ويا سلام بقى لو مكنتش لابسة الحجاب الشرعي وماشية كاسية عارية ومتزينة بكامل زينتها، تخيلوا كمية المصائب إللي ممكن تحصل😶
والمرأة أقرب ما تكون إلى الله وهي في قعر بيتها، شايفين الوصف، بيقول قعر البيت...يعني جوة أوي في العمق،
وبكده هتاخد أعظم أجر وثواب، والحديث ده بيشجع المرأة إنها متخرجش إلا لضرورة 👌

☆وطبعا ده يشمل تنزيل المرأة صورها على مواقع التواصل، زي الفيس وغيره🙂
ماهو إزاي في قعر بيتها وهي منزلة صورها الرايح والجاي يشوفها، دي سيئات جارية مش طاعة أبدا ،والكلام ده حتى لو لابسة نقاب يا جماعة لأن الأصل في النساء الستر👌
ثم المرأة مش هتنزل صورتها غير لو شايفة إن شكلها حلو، ودي مصيبة تانية وسيئات جارية أكيد،
وإلا الطبيعي لما الواحد بيتصور صورة وحشة فهو بيخفيها أصلا مش بيبقى عايز حد يشوفها🤷‍♂️
الموضوع ده خطير جدا والله لأن الواحدة ممكن تموت في أي لحظة ويفضل عداد السيئات شغال😓
فيا أي حد بيقرأ كلامي سواء رجل أو امرأة راجعوا حساباتكم وشوفوا لو عندكم أي سيئات جارية في أي مكان امسحوها وتوبوا قبل فوات الأوان، محدش يعرف ميعاد موته امتى👌

◇ وبمناسبة إن محدش يعرف ميعاد موته هحكي لكم قصة حصلت معايا ،كان في بنت جارتنا كانت بريئة جدا وكنت بحبها من وهي صغيرة بسبب برائتها دي، وكنت بشوفها بتروح تحفظ قرآن في المسجد،
انتقلوا للسكن في مكان تاني، وشوفتها بعد كده مرة واحدة قدرًا كده بعد كم سنة لما كبرت شوية، ومشفهتهاش تاني من بعدها وعدت سنين،
في يوم كنت راجعة من مشوار بعد المغرب فلقيت عربية متزينة واقفة تحت عمارة فيها كوافير فعرفت إن في عروسة، وأنا معدية من جنب العربية لقيت العروسة جوة العربية وكانت بكامل زينتها، فستان فرح مبين جسمها وكانت فاتحة الشباك عشان الحر وماسكة مروحة بتهوي بيها على نفسها، فكانوا ساعتها بيستعدوا للزفة،
شوفت العروسة وطلعت البنت جارتنا إللي مشفتهاش بقالي سنين،
فحزنت جدا لأن من الطبيعي إن الإنسان يحزن لما يشوف حد بيحبه واقع في معاصي، فدعيت لها وأنا ماشية وكنت خايفة عليها بصراحة لتموت لا قدّر الله قبل ما تتوب،
العروسة دي هي وزوجها ماتوا بعد الموقف ده بحوالي ثلاثة أو أربع ساعات بعد ما رجعوا بيتهم بعد الفرح بسبب سخان الغاز😞
الموضوع كان صدمة لكل المنطقة وصدمة لي أنا شخصيا، لأني كنت لسه شايفاها قبلها على طول وكنت كمان خايفة عليها،
تعتقدوا لو كانت تعرف إنها على ميعاد مع ملك الموت بعد شوية كان ده بقى حالها، ولاّ كانت هتفضل تصلي وتستغفر وتفضل ساجدة لله عشان تموت على طاعة،
بدل ما كان يتكتب في آخر أعمالها كمية المعاصي والذنوب دي، على فكرة كان عمرها عشرين سنة فقط😞
ربنا يرحمها ويتجاوز عنها وعنّا ويرزقنا حسن الخاتمة،
وفي قصص وعبر تانية كتير بتحصل حوالينا بس احنا إللي مش بناخد بالنا،
السعيد من وُعظ بغيره يا جماعة👌

نرجع لحديث تاني لرسول الله ﷺ بيحذر فيها من فتنة النساء قوله:
" إنّ الدنيا حُلْوة خَضِرة، وإن الله مستخلِفَكم فيها فينظر كيف تعملون،
فاتقوا الدنيا واتقوا النساء، فإن أول فتنة بني إسرائيل كانت في النساء"
يعني رسول الله ﷺ بيقول عن الدنيا إنها حلوة بسبب إللي فيها من الملذات،
والنفس البشرية بيجذبها ويستهويها الطعم الحلو، وكمان النفس بتحب اللون الأخضر،
مش احنا بنكون مبسوطين لما بنقعد في مكان فيه زرع وأشجار لونهم أخضر،
فتخيلوا ل

ما نقعد في مكان مُبهج كده وكمان ناكل أكل طعمه حلو، فهي دي الدنيا حُلوة خَضرة👌
ربنا جعلنا في الدنيا دي عشان نشوف هنعمل إيه، هل هتبقى هي أكبر همنا ويغلب علينا الطمع ويقتل بعضنا بعض من أجلها، ونصرف أوقاتنا كلها على الدنيا،
ولا هنتقي الله ونأخذ منها ما يعيننا على طاعة الله، وهو ده إللي يقصده رسول الله ﷺ لما قال اتقوا الدنيا،
يعني خافوا من الدنيا وإنها تشغلكم عن عبادة الله، خذوا منها إللي يكفيكم بدون إفراط ولا تفريط، ومن الدنيا دي أكتر حاجة تخافوا منها وتبعدوا عنها النساء👌
"زُيِّنَ لِلنَّاسِ حُبُّ الشَّهَوَاتِ مِنَ النِّسَاءِ "
وقال رسول الله ﷺ:
"مَا تَرَكْتُ بَعْدِي فِتْنَةً أَضَرَّ عَلَى الرِّجَالِ مِنْ النِّسَاءِ"
وبداية الفساد في بني اسرائيل كان في النساء، كان الأغنياء بينفقوا أموالهم على المظاهر، ملابس وحُلي والأكل، وأموال كثيرة جدا بتتصرف على الزواج،
فامرأة الفقير لما كانت تشوف امرأة الغني بتصرف وتجيب، قالت اشمعنى أنا، وراحت لزوجها الفقير وبقت تكلفه يصرف عليها ويشتري لها الملابس والأكل والحُلي زي ما الغني بيعمل مع زوجته بالضبط،
《ركزوا كده في واقعنا وانتم هتشوفوا إن ده إللي بيحصل بالضبط👌》
فلما زوجة الفقير قعدت تضغط على زوجها إنه يوفر لها التكاليف الباهظة دي، بقى يشتغل ليل نهار عشان يوفر التكاليف دي، ومن هنا بدأت المأساة😑
عايز فلوس وشغله مش مكفي يقوم يستدين بالربا فالدين بتاعه يزيد وميقدرش يسدده أو يبيع أرضه أو بيته😕
فانشغل بنو إسرائيل في ملاهي الدنيا بسبب المظاهر إللي بتكلف أموال كثيرة وضاع بينهم الدين،
ومن المظاهر إللي النساء في بني اسرائيل اهتموا بها إن امرأة من بني اسرائيل كانت قصيرة ،ومكنش عاجبها حالها، وكانت بتضايق لما كانت تمشي بين امرأتين طويلتين،
فبدل ما ترضى بقضاء الله وميكونش همها الدنيا والمظاهر الخادعة، راحت دورت على طريقة تطول بيها نفسها فاتخذت رجلين من الخشب،
حاجة كده زي الجزمة أم كعب عالي، وعملت لنفسها خاتم مُجوّف، فاضي من جوة وحطت جواه مِسك، فكانت لما تمشي مع المرأتين محدش يعرفها ولما كانت تعدي على الرجال تفتح الخاتم وتنفضه فيطلع منه ريحة تلفت نظر الرجال إليهن، وكانت تتعمد جذب نظر الرجال إليه،
لدرجة إن مرة أرسلوا وراءها رجل عشان يعرف هي مين فمعرفش يوصل لها،
وطبعا واضح إن ملامحها مكنتش باينة لأنها كانت مغطية وشها، لأن الحجاب كان موجود في الشرائع السابقة أصلا👌

◇كل الكلام ده هياخدنا للسؤال إللي قلناه في آخر الجزء إللي فات: ليه التضييق على النساء كده؟ وهل هم سبب كل البلاوي إللي بتحصل دي مثلا😓

خلينا قبل ما نجاوب نشوف مثال بسيط من الحياة،
لو واحد راح يشتري آيفون بعشرة ولا خمسة عشر ألف جنيه، وفتح العلبة ولقى كُتيبات إرشادية، كتالوج يعني بيقول له افعل ولا تفعل،
خد بالك من كذا وحافظ على كذا، أنا ممكن أروح للشركة وأقول لهم ليه كل التعقيدات دي😑
ولاّ هيقول هم إللي مصنعينه وهم أدرى بصناعتهم وهلتزم بالتعليمات دي وخلاص عشان يحافظ على التليفون إللي دفع فيه دم قلبه🙃
طيب تخيلوا كده واحد جه قال له، سيبك من الكتالوج ده واعمل إللي هقول لك عليه، وقعد يقنعه بكلامه وإن كلامه هو الصح، مع إني ممكن أكون عارفة إنه مبيفهمش حاجة خالص 😅
لو سمع كلامه ومستعملش الكتالوج والتليفون باظ مين إللي يتحمل الغلط؟
هو ولاّ الشركة ولاّ الشخص إللي جه عرض مساعدته🤔

طبعا هو👌
الشركة أعطته كتالوج وقالت إنه لازم يتبع التعليمات بالضبط وحذرته إنه لو معملش كده التليفون هيبوظ،
وهو إللي مسمعش كلام الشركة،
والشخص إللي جه عرض عليه مساعدته ده مضربوش على إيده وقال له اسمع كلامي غصب عنك، هو إللي وافق بكامل إرادته إنه يسمع كلامه عشان هو عايز كده،
سواء بقى عشان يريح دماغه وميتعبش في اتباع التعليمات،
أو عشان لو حصل حاجة يحمل التاني المسؤولية أو...أو...

ولله المثل الأعلى في السماوات والأرض، هو مين إللي خلقنا، مش ربنا، هو حط لنا منهج معين نمشي عليه لأن هو أعلم إيه المناسب للخلق إللي خلقه:
"أَلَا يَعْلَمُ مَنْ خَلَقَ وَهُوَ اللَّطِيفُ الْخَبِيرُ"
وحذرنا إن إللي هيعمل عكس المنهج ده حياته هتبوظ وهتبقى ضنك، فييجي بقى شياطين الإنس والجن يقولوا لا لا المنهج ده غلط وإيه التعقيدات والتشدد ده😤
وانتم عايزين تدفنوا النساء بالحياة، وإيه عورة دي هي المرأة حاجة بتستعروا منها عشان تغطوها،
وانتم بتسلبوا حريتها في إنها تقرر شؤون حياتها متخلوها تسافر وتقعد مع رجالة لوحدها دي بمائة راجل،
ولا انتم مش واثقين فيها، أيوة بقى قولوا إنكم مش واثقين فيها يا أعداء التحضر والمدنية...إلى آخره من الكلام إللي يوجع البطن😑
"وَيُرِيدُ الَّذِينَ يَتَّبِعُونَ الشَّهَوَاتِ أَنْ تَمِيلُوا مَيْلا عَظِيمً"

احنا بقى كبشر عشان المنهج بتاع ربنا مش عاجبنا ومش على هوانا فبنسيبه ونمشي وراء كلام شياطين الإنس والجن، والنتيجة إيه 🙂
الحياة باظت زي ما ربنا حذرنا👌
انتشر جدا الحب والعشق المحرم وال

اغتصاب والزنا والانتحار والقتل ده غير الأطفال المولودين من الزنا، ومعاصي ملهاش أول من آخر،
والمنظومة كلها باظت، حطينا البنزين جنب النار فحصل الانفجار🙃
ربنا خلق الرجل يميل للمرأة ومجرد ما يشوف المرأة دماغه تلف، وخلق المرأة تميل للرجل ومجرد ما يقول لها كلمتين حلوين خلاص بقت تحت رحمته،
وربنا جعل بينهم الميل ده عشان الحياة البشرية تستمر على الأرض عن طريق الزواج الشرعي،
ولأن ربنا إللي خلقنا يعلم ضعف الرجال والنساء لما بيكونوا قريبين من بعض عمل لنا حدود معينة منعديهاش عشان ميحصلناش ضرر،
زي ما قلنا مثال السكّينة من شوية، منقدرش نستغنى عنها فلازم إللي يستخدمها يستخدمها صح وإلا هتضره🤷‍♂️
كذلك الرجل ضعيف أمام النساء، هو خلقته كده، فلازم نبعد النساء عن الرجال حتى رسول الله ﷺ نفسه قال:
"مَا رَأَيْتُ مِنْ نَاقِصَاتِ عَقْلٍ وَدِينٍ أَذْهَبَ لِلُبِّ الرَّجُلِ الحَازِمِ مِنْكُن"
يعني مش أي رجل ، ده الرجل الحازم إللي الناس تعمل له ألف حساب، المرأة تاكل بعقله حلاوة من شدة تأثيرها عليه😅
يبقى حاجة خطيرة للدرجة دي ينفع نسيبها كده ومناخدش احتياطاتنا😕
طبعا لأ، عشانا كده ربنا وضع قوانين محددة للنساء عشان متفتنش الرجال وفي نفس الوقت متعرضش نفسها للخطر،
لأن في رجال معندهمش دين ولا أخلاق لو حس بس إن المرأة إديته مجال ولو بكلمة حتى من غير ما تقصد هيؤذيها وممكن يفتنها هي كمان👌

وللأسف مهما ينصح الناصحون محدش بيسمع، بيرجعوا ويندموا ويقولوا كان معاكم حق بعد ما الكارثة تحصل،
وانتم شايفين الواقع عامل إزاي،
والمصايب إللي كل يوم بنسمعها ونشوفها، وما خفِيَ كان أعظم ومحدش بيتعظ،
لأن من أهم عيوب التفكير الإنساني إنه مستعد يسيب الأرقام والإحصائيات والأدلة العقلية والطبية والدينية عشان مجموعة قصص محدودة لا تقارن بملايين القصص المخالفة لها، وكل واحد بيجري وراء أمل كذاب ويقول أنا غير😤

☆هل ده معناه بقى إن المرأة هي سبب كل البلاوي😑

شوفوا، المرأة بتكون سبب البلاوي لما تتعدى الحدود إللي ربنا وضعها لها،
والرجل بيكون سبب البلاوي لما بيتعدى الحدود إللي ربنا وضعها له 😊
لا المرأة بتتحاسب ولا بتشيل الغلط عشان هي امرأة ولا الرجل يتحاسب ولا هيشيل الغلط عشان هو رجل،
ربنا بيحاسب على الفعل نفسه يا جماعة مش على مين عمل الفعل👌
لو كانت هي السبب في فتنة رجل سواء بقول أو فعل أو ملابس، أو أي شيء فهي هتتحمل ذنب فتنته،
غير كده مش فهي ملهاش أي ذنب في حاجة🤷‍♂️

☆وبما إننا بنتكلم عن النساء، ففي سؤال محير نساء كتير وهو:
اشمعنى النساء إللي دايما بيتقال عنهم إنهن الفساق وأكثر أهل النار،
وإنهن لا يصبرن ولا يشكرن ، مع إن في رجال فيهم الصفات دي، والرجال بيعملوا ذنوب أكبر من كده زي القتل والظلم وإثارة الحروب😓

براحة كده وواحدة واحدة😁
قال رسول الله ﷺ: " إِنَّ الْفُسَّاقَ هُمْ أَهْلُ النَّارِ "
قِيلَ: يَا رَسُولَ اللهِ، وَمَنِ الْفُسَّاقُ؟
قَالَ: 《النِّسَاءُ 》
قَالَ رَجُلٌ : يَا رَسُولَ اللهِ، أَوَلَسْنَ أُمَّهَاتِنَا، وَأَخَوَاتِنَا، وَأَزْوَاجَنَا؟ قَالَ: "بَلَى، وَلَكِنَّهُنّ إِذَا أُعْطِينَ لَمْ يَشْكُرْنَ، وَإِذَا ابْتُلِينَ لَمْ يَصْبِرْنَ "
مش المقصود من الحديث ذم عموم النساء، لكن المقصود التحذير من الفعل ده ومعرفة جزاء إللي هيعمل كده يوم القيامة عشان العاقل ياخد باله وميقعش في الغلط ده👌
لكن لو مثلا إذا أُعطي رجل ولم يشكر، وإذا حصل له بلاء ولم يصبر، مش هيبقى حكمه زي النساء؟!
هيبقى نفس الحكم طبعا ، لأن زي ما قلنا من شوية ربنا مش بيحاسب على مين عمل الفعل لكن بيحاسب على الفعل نفسه👌
لكن تخصيص النساء بالكلام لأن الأخلاق دي غالبة عليهن، والأخلاق دي أقل في الرجال، فرسول الله ﷺ لما اتكلم عن الوعيد كان بيتكلم عن الأغلبية،
حتى في حديث تاني بيوضح المعنى ده رسول الله ﷺ بيقول فيه: "إِنَّ التُّجَّارَ هُمُ الْفُجَّارُ"
فقَالَ رَجُلٌ: يَا نَبِيَّ اللهِ أَلَمْ يُحِلَّ اللهُ الْبَيْعَ؟
قَالَ: "إِنَّهُمْ يَقُولُونَ فَيَكْذِبُونَ، وَيَحْلِفُونَ وَيَأْثَمُونَ "
فالذم هنا مش لعموم التجار والصحابة نفسهم كان فيهم تجار، لكن هو بيقول إن الغالب على جنس التجار الفجور والكذب، فبيحذر التجار من الفعل ده عشان يحرصوا على البر في البيع والشراء،
والنساء أكثر أهل النار زي ما رسول الله ﷺ قال:
"يَا مَعْشَرَ النِّسَاءِ، تَصَدَّقْنَ وَأَكْثِرْنَ الِاسْتِغْفَارَ، فَإِنِّي رَأَيْتُكُنَّ أَكْثَرَ أَهْلِ النَّارِ "
فَقَالَتِ امْرَأَةٌ مِنْهُنَّ : وَمَا لَنَا يَا رَسُولَ اللهِ أَكْثَرُ أَهْلِ النَّارِ؟
قَالَ: "تُكْثِرْنَ اللَّعْنَ، وَتَكْفُرْنَ الْعَشِيرَ "

فهو ده الغالب عليهن، كفران العشير واتباع الهوى والميل إلى عاجل زينة الحياة الدنيا، فتضعف المرأة عن عمل الآخرة والاستعداد لها،
واستجابة المرأة للي بيدعوها للآخرة وأعمالها بتبقى صعبة، بعكس لو حد دعاها إلى زينة الدنيا بتنخدع بسهولة وتستجيب بسرعة😓
وخدوا با

لكم إن لو الرجل برده كفَر العشير وأكثر اللعن زي النساء برده هيبقى نفس مصيرهن بالضبط😀
بس الحديث هنا زي ما قلنا بيتكلم عن الأغلبية، وقلنا برده من شوية إن ربنا بيحاسب على الفعل، مش مين عمل الفعل👌
أما موضوع إن الرجال بيعملوا أكثر من كده من إشعال حروب وقتل وظلم، فاللي يعمل كده ربنا هيعاقبه بالعقاب إللي يستحقه وذكره في القرآن أو السنة👌
لكن ده ملوش علاقة بالأحاديث بتاعة النساء،
والجرائم والمعاصي إللي الرجل بيعملها دي جزاؤها مش أقل من جزاء النساء،
لكن الأحاديث بتتكلم عن 《الأكثرية》 مش 《الشّديّة》،
يعني كفران العشير واللعن وعدم الصبر وعدم الشكر ينتشر في النساء 《أكثر》 من الرجال👌
وبقول تاني ربنا مش بيحاسب النساء عشان هم نساء ولا الرجال عشان هم رجال، ربنا بيحاسب على أفعال الرجال وأفعال النساء،
أي واحد فيهم هيتعدى حدوده فالجزاء واحد👌

عارفين كمان من الأسباب إللي ممكن تخلي النساء أكثر أهل النار إيه😅
إن مثلا لو الرجل ظلم زوجته أو آذاها أو...أو...هو عمل حاجة واحدة، المرأة بقى تروح تحكي لصاحبتها، وتحكي لأختها وتحكي لأمها وتحكي لفلانة وعلانة، شوفوا كام مرة اغتابت فيها زوجها،
وكم مرة الناس تعاطفوا معاها وراحوا شاتمينه وعملوا معاه الواجب، وكل ده عداد السيئات شغال للمرأة😶
تخيلوا إن يوم القيامة ممكن الرجل يبجي قصاد ربنا وميتحاسبش وممكن كمان ياخد من حسنات زوجته🙂
لأن زوجته المظلومة ضيعت حقها بسبب الغيبة دي لوحدها، شوفوا بقى لو كمان حاولت تاخد حقها في الدنيا على أساس إنها مظلومة وكده ممكن تعمل إيه،
فتيجي يوم القيامة وهي مفكرة نفسها مظلومة وفجأة تلاقي زوجها ده بياخد من حسناتها🙃
خدوا بالكم إن الميزان يوم القيامة بمثاقيل الذر 👌
"وَنَضَعُ الْمَوَازِينَ الْقِسْطَ لِيَوْمِ الْقِيَامَةِ فَلَا تُظْلَمُ نَفْسٌ شَيْئًا ۖ وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا ۗ وَكَفَىٰ بِنَا حَاسِبِينَ"

فكل واحد يمسك لسانه وميحكيش لحد إلا لو على سبيل حل مشكلة، بلاش الفضفضة الله يكرمكم، احنا مش حمل سيئات حد😓



#Eman_Shalapy

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

#قصص_الأنبياء(٢)
#السيرة_النبوية
#الحلقة_المائة
#أحداث_السنة_السادسة_من_الهجرة
#إسلام_ثُمامة_بن_أُثال

بعد غزوة بني قريظة، رسول الله ﷺ وزّع سبي النساء على الصحابة، احنا كنا قلنا إن حكم الله فيهم هو قتل الرجال وسبي النساء والأطفال،
كان وسط السّبْي امرأة اسمها ريْحانة بنت زيد، وكانت امرأة جميلة لها مكانة حاصة وسط قومها وكانت معروفة بكمال عقلها وحسن تدبيرها للأمور،
وكانت متزوجة من رجل من قومها وكان يحبها ويكرمها، فلما قُتل مع بني قريظة وأصبحت من السّبْي كانت هي من نصيب رسول الله ﷺ،
فعرض رسول الله ﷺ عليها الإسلام فلم تقبله وأصرت إنها تكون على اليهودية، فزعل رسول الله ﷺ إنها مش عايزة تدخل الإسلام،
وفي يوم من الأيام في آواخر السنة الهجرية وبعد نزول آية الحجاب، كان رسول الله ﷺ قاعد مع مجموعة من أصحابه فسمع صوت نعلين، يعني صوت أقدام واحد بيقرب عليهم ،فقال لأصحابه :
هذا ثعلبة بن سعية جاي يبشرني بإسلام ريحانة👌
فدخل عليه ثعلبة وبشره فعلا بإسلام ريحانة، فذهب إليها رسول الله ﷺ وعرض عليها إنه يعتقها ويتزوجها ويضرب عليها الحجاب،
لكنها قالت: بلاش تتزوجني يا رسول الله واجعلني في ملكك فكده أخف عليّ وعليك.
فكانت هي أول ملك يمين لرسول الله ﷺ، وظلت في ملكه ﷺ حتى ماتت بعد حجة الوداع، واحنا كنا قلنا إن الأمة وملك اليمين الحجاب مش فرض عليهن زي الحُرة،
وزوجات رسول الله ﷺ هن فقط أمهات المؤمنين، أما ملك يمينه ﷺ فليسوا بأمهات للمؤمنين 👌

☆سريعا كده، ملك اليمين أو السّبي يعني النساء إللي المسلمين أخذوهن أسرى في الحروب،
والرجل ممكن يكون عنده عدد غير محدود من ملك اليمين، ومش مُلزم إنه يعدل بين ما ملكت يمينه، هو ملزم فقط بالعدل بين زوجاته لو كان له أكثر من زوجة ويتحاسب لو قصّر في العدل بينهن،
ولو كانت المرأة متزوجة ووقعت في السبي، وأخذها رجل من المسلمين لا يحل له وطْأها يعني جماعها إلا إذا حاضت حيضة، ولو كانت حامل لا يطأها إلا لما تضع حملها،
والكلام ده عن السّبي من أهل الكتاب، أما السبي من الكفار عبدة الأوثان فلا يجوز للرجل وطأها حتى تُسلم👌

◇السؤال بقى، ليه الإسلام ممنعش الرق أصلا🤔
كل طريق للرق والاستعباد استطاع الإسلام إنه يقفله، إلا طريق واحد وهو طريق الحرب،
الإسلام لما جاء كان موضوع الرق ده موجود ومتعارف عليه في كل المجتمعات من زمن بعيد جدا، يعني هو أصلا كان حاجة طبيعية جدا في المجتمعات دي،
فبدأ يصحح الأوضاع ويرفع الظلم إللي كان واقع على العبيد والأسرى بقوانين معينة،
وكان المتعارف عليه إن في الحروب لو حد وقع أسير إما يُقتل أو يُسترق يعني يبقى عبد أو أمة يُباع ويُشترى،
وكانت الأمَة الواحدة متاع لسيدها وأبنائه وأصحابه وكل من يريد أن يستمتع بها،
فجاء الإسلام ومنع الكلام ده، وأصبحت الأمة ملك لسيدها فقط👌
فحصل بين المسلمين وأعداء الإسلام حروب، فكان من يقع أسير في أيدي الأعداء من المسلمين يُسترق وتُسلب حريته ويُعامل بالظلم،
فكان الطبيعي المعاملة بالمثل، وهو إن إللي يقع أسير في أيدي المسلمين يسترق هو كمان، لكن الفرق إن الإسلام بيحفظ له حقوقه كعبد أو أمة👌
فمش من الحكمة أبدا ولا من السياسة إن الإنسان يشجع عدوّه عليه🤷‍♂️
يعني هو يأسر المسلمين ويسترقهم ويذيقهم ألوان الظلم ولو وقع في أيدي المسلمين أسرى يطلقوا سراحهم كده عادي ويزودوا أعداد أعدائهم ويجمعوا نفسهم تاني لقتل المسلمين وأعداد المسلمين تفضل تقل وهكذا🤨
أي منطق يقول بالكلام ده 🙄
فمكنش ينفع إن الإسلام يأتي ويلغي السبي عن طريق الحرب، لأن كده هيبقى في ظلم، والإسلام دين العدل👌

دي كانت بعض الأحداث المهمة من الناحية الاجتماعية، هنرجع دلوقتي للسرايا إللي رسول الله ﷺ كان بيرسلها لتأديب القبائل إللي شاركت في غزوة الخندق،

☆لكن قبل ما نتكلم عن السرايا في واقعة يُقال إنها حصلت في السنة الخامسة للهجرة ومنتشرة بين الناس والخطباء على المنابر بيقولوها لكنها لم تثبت إنها حصلت وهي إن المدينة زُلزلت في عهده ﷺ فقال للناس : إن الله يستعتبكم فأعتبوه،
كل الأحاديث إللي ورد فيها الحادثة دي غير صحيحة ولم تثبت الحادثة دي🙅‍♂️❌
لكن حصل زلزلال في خلافة عمر بن الخطاب رضي الله عنه وقال للناس لو حصل زلزال تاني مش هخرج من بينكم ومش هقعد معاكم،
لأن عمر بن الخطاب رضي الله عنه عارف إن الزلزال ماهو إلا عقوبة من الله على ما يفعله العباد من المنكرات وترك أوامره والمجاهرة بمعصيته، وربنا قال:
"قُلْ هُوَ الْقَادِرُ عَلَىٰ أَن يَبْعَثَ عَلَيْكُمْ عَذَابًا مِّن فَوْقِكُمْ أَوْ مِن تَحْتِ أَرْجُلِكُمْ أَوْ يَلْبِسَكُمْ شِيَعًا وَيُذِيقَ بَعْضَكُم بَأْسَ بَعْضٍ
انظُرْ كَيْفَ نُصَرِّفُ الْآيَاتِ لَعَلَّهُمْ يَفْقَهُونَ"
فعمر رضي الله عنه خايف من عذاب ربنا فعشان كده قال إن لو حصل زلزال تاني هخرج من المدينة،
《ركزوا كده في قوله تعالى: وَيُذِيقَ بَعْضَكُم بَأْسَ بَعْضٍ وشوفوا الواقع بتاعنا وإزاي ربنا فعلا بيسلط الناس على بعض 👌》

أرسل رسول ا

لله ﷺ السرايا لتأديب القبائل، ودخلنا في السنة السادسة من الهجرة وهنا هتبدأ مرحلة جديدة للدولة الإسلامية وهي مرحلة الانتشار والفتح والتمكين للدين،
بعد ما المسلمين خلاص عدّوا أخطر مرحلة في حياة الدولة الإسلامية بعد الأحزاب وفشل الأحزاب بعد ما جمعوا كل الأعداد دي للقضاء على المسلمين جاء دور المسلمين زي ما رسول الله ﷺ قال:
اليوم نغزوهم ولا يغزونا👌
فبدأ رسول الله ﷺ يرسل السرايا فكانت أول سرية بعد غزوة الخندق هي سَرِية عبد الله بن عتيك وإللي قتل فيها أبو رافع اليهودي وحكينا قصته،
السرية التانية إللي خرجت بعده كانت سرية محمد بن مَسلمة، أرسله رسول الله ﷺ مع مجموعة من أصحابه لتأديب بني بكر بن كلاب من قبائل نجد إللي اشتركوا في الأحزاب ،
وكان مكانها يبعد عن المدينة بحوالي ثلاثمائة كيلو متر، عدد السرية دي كان ثلاثين صحابي يعني عدد بسيط جدا بالنسبة لقبيلة كاملة،
ومع ذلك هرب معظمهم خوفا من سرية محمد بن مسلمة وألقى الله في قلوبهم الرعب، واستطاع محمد بن مسلمة إنه يقتل عشرة منهم وتفرقوا في الصحراء واستطاع إنه يَغنم عدد كبير جدا من الإبل والأغنام،
فكان من آثار السرية دي إن هيبة المسلمين ارتفعت وسط الأعراب والناس خافوا منهم، ومعنويات المسلمين ارتفعت والوضع إلاقتصادي للمسلمين اتحسن بعد ما كانوا في حالة فقر شديد جدا👌
بعد ما السرية خلصت مهمتها وخلاص راجعين للمدينة قابلوا رجل من أهل نجد فأسروه على أساس إنه كان من الجيش إللي هرب،
أخذوا الرجل ورجعوا للمدينة، فلما رآه رسول الله ﷺ قال لهم : انتم عارفين مين الرجل إللي أسرتوه ده؟!!
فالصحابة قالوا له : لأ😐
فقال لهم رسول الله ﷺ: ده ثُمامة بن أُثَال سيد بني حنيفة👌

☆ثمامة بن أُثال كان أمير منطقة اسمها اليمامة في البحرين وهو من أعظم سادات العرب في الوقت ده، يعني زي ما تقولوا رئيس دولة من الدول الكبيرة في عصرنا دلوقتي😅

فالمسلمين أسروه من غير ما يعرفوا مكانته ولا هو كان مين،
فقال لهم رسول الله ﷺ أحسنوا إليه، فكانوا يأتوه بالطعام ويحسنوا معاملته، وربطوه في عمود من عواميد المسجد عشان يشوف صلاة المسلمين ويسمع القرآن ويشوف أخلاق المسلمين يمكن يتأثر ويُسلم،
وكان رسول الله ﷺ كل يوم يمر عليه ويسأله:
ماذا عندك يا ثُمامة؟
فقال له ثُمامة:
عندي خير، إن تَقتُل تقتُل ذا دم، وإن تُنعم تُنعِم على شاكر، وإن أردت المال فسلْ تعطَ منه ما تشاء😤
يعني رسول الله ﷺ بيسأله عن حاله وإيه الاختيارات إللي عنده عشان يفدي نفسه،
فثمامة قال له لو قتلتني قومي مش هيسبوك وهييجوا يثأروا منك، ولو عفوت عني مش هنسى لك الجميل ده،
ولو كنت عايز مال مقابل انك تسيبني فاطلب إللي انت عايزه،

☆ثمامة كان من أغنى أغنياء العرب، فده يعتبر عرض مغري جدا لرسول الله ﷺ لأن المدينة في حالة اقتصادية صعبة جدا، لكن رسول الله ﷺ كان همه أكبر من كده بكثير،
رسول الله ﷺ شاف إن ثمامة رجل عاقل وسيد وشريف وزعيم قومه، فلو أسلم هيسلم من وراه ناس كثيرة، فمكنش بيرد عليه، كان بيحسن إليه ويتكلم معاه،
كان يسمع العروض بتاعته دي ويسيبه ويمشي، ويجيله تاني يوم ويسأل نفس السؤال، ماذا عندك يا ثُمامة، وثمامة يرد بنفس الإجابة عندي خير إن تقتل تقتل ذا دم.....
بعد ما عدّى كم يوم وثمامة شاف تعامل الصحابة وأخلاقهم وسمع القرآن وشاف صلاة المسلمين جاء رسول الله ﷺ وسأله السؤال المعتاد وجاوبه ثمامة بنفس الجواب،
ولاحظ رسول الله ﷺ انبهار ثمامة بن أثال بالمسلمين وبطبيعة الدين الإسلامي، ولاحظ انبهاره به ﷺ،
ففكر رسول الله ﷺ إنه لو أطلق ثمامة بدون ما يدفع فدية ممكن ده يكون حافز له على الدخول في الإسلام،
وكان إسلام نفس واحدة وإنقاذها من النار أحب إلى رسول الله ﷺ من كل أموال الدنيا، فاختار رسول الله ﷺ إنه يطلق سراح ثمامة وقال للصحابة : أطلقوا ثمامة👌
فأطلقوه، وخرج ثمامة من المسجد وراح ناحية نخل قريب من المسجد وعنده بئر فاغتسل، والظاهر إنه كان سأل حد من الصحابة عن كيفية الدخول في الإسلام لما كان مربوط،
بعد ما اغتسل دخل المسجد وقال أمام رسول الله ﷺ وأمام الصحابة:
"أشهد ألا إله إلا الله وأن محمدا رسول الله "

☆ثمامة مرضاش يُسلم وهو في المسجد مأسور عشان محدش يتهمه بالنفاق وإنه أسلم عشان يطلع من المشكلة إللي هو فيها،
انتظر لحد ما بقى حر ورجع تاني بكامل إرادته يعلن إسلامه،

قال ثمامة لرسول الله ﷺ بعد قول الشهادة:
والله يا محمد ما كانت أكره على وجه الأرض رجل زي ما بكرهك، ودلوقتي بقى وجهك أحب الوجوه إليّ،
ووالله ما كان في دين أكرهه زي ما بكره دينك، فبقى دينك أحب إليّ من أي دين،
ومكنش في بلد بكرهها زي ما بكره بلدك فبقت بلدك أحب البلدان إليّ👌
وأنا كنت في طريقي للعمرة فأسرني أصحابك، فأنا أعمل إيه دلوقتي😕
فقال له رسول الله ﷺ:
روح كمّل عمرتك👌
فدخل مكة وهو يقول تلبية الإسلام، فكان هو أول مسلم يدخل مكة معتمرا ويلبي بتلبية الإسلام وقال:
لبيك اللهم لبيك، لبيك لا شريك لك لبيك، إن الحمد والنعمة لك والملك

لا شريك لك،
فسمعه كفار مكة وكان مقرب منهم وعارفينه كويس فتجمعوا عليه وقالوا له:
إنت صبأت😳
يعني تركت دين العرب،فقال لهم ثمامة:
لا، ولكني أسلمت مع محمد ﷺ، يعني إللي كنت عليه من عبادة الأصنام هو الباطل وأنا دلوقتي آمنت فعلا مش صبأت👌
وأخذ قرار في منتهى الجرأة🙊
قال لسادات مكة: والله لا يأتيكم حبة قمح حتى يأذن بها رسول الله ﷺ 👌
قرر إنه يعمل عليهم حصار اقتصادي، والحصار ده سببه إن مكة بتعادي المسلمين،
والقرار ده جريء لأنه هيقف ويواجه مكة بكل قوتها وعلاقتها الخارجية، ده غير الخسائر المالية إللي هيعرض نفسه وقبيلته لها،
اليمامة هي المصدر الرئيسي لشعير وخبز مكة، لدرجة إن كان بيُقال على اليمامة إنها ريف مكة، فتخيلوا بيشتروا بكميات أد إيه، فكده اليمامة هتخسر أموال كثيرة جدا، ومع ذلك مهموش، هو همه رفع راية الإسلام وعزته👌
وصل الخبر لرسول الله ﷺ ولم يعترض على فعل ثمامة، فالمقاطعة نوع من أنواع الحرب،
ارتفعت الأسعار في مكة بسبب المقاطعة وبدأت تحصل فيهم مجاعة، حاولوا إقناع ثمامة بإنه يفك الحصار ويرسل لهم القمح، لكن ثمامة مصمم إنهم لن يأخذوا القمح إلا بعد موافقة رسول الله ﷺ،
اجتمع سادة مكة عشان يشوفوا حل للموضوع، مفيش غير حل واحد وهو إنهم يرسلوا وفد لرسول الله ﷺ في المدينة يستعطفوه ويقنعوه إنه يقول لثمامة إنه يفك الحصار عن مكة ويرسل لهم القمح، شايفين المُعز المُذل👌
لسه بس من كم شهر قريش كانت محاصرة المدينة وبتهدد المسلمين، دلوقتي هم إللي جايين في كل ذل وانكسار بيستعطفوا رسول الله ﷺ ويستحلفوه بالرحم إللي بينه وبينهم إنه يأذن لثمامة بإرسال القمح لهم مرة ثانية😏
وعلى الرغم من إللي قريش عملوه مع رسول الله ﷺ السنين إللي فاتت دي إلا إنه ﷺ كان رقيق القلب،
فوافق على عودة التجارة مرة أخرى بين مكة واليمامة وأنهى الحصار إللي كان مفروض على مكة،
وطبعا الموقف ده كان في مصلحة الدولة الإسلامية ورفع رأس المسلمين وسط العرب، فبعد ما كان المسلمين مطاردين من أهل مكة وكانوا دولة ضعيفة،
بقت دولة الإسلام دولة قوية تفرض سيطرتها هنا وهناك لدرجة إنها بقت تتحكم في طعام أهل مكة ولا يأتيهم القمح إلا بإذن زعيم الدولة الإسلامية رسول الله ﷺ 👌
وكل ده كان بسبب سرية محمد بن مسلمة إللي كانت مكونة من ثلاثين فارس فقط😊

رسول الله ﷺ استمر في إرسال السريا لتأديب القبائل،
وخرج هو بنفسه على رأس جيش لقتال قبيلتي عضل والقارة إللي غدروا بالصحابة في حادثتي ماء الرجيع وبئر معونة إللي اتكلمنا عنهم قبل كده،
المرة الجاية إن شاء الله هنتكلم عن السرايا كلها إللي حصلت في النصف الأول من السنة السادسة للهجرة، ونشوف الغزوة إللي رسول الله ﷺ خرج فيها كانت إيه نتائجها😁


#Eman_Shalapy

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

#قصص_الأنبياء(٢)
#السيرة_النبوية
#الحلقة_مائة_وواحد
#أحداث_السنة_السادسة_من_الهجرة
#السرايا_المتتالية_لتأديب_الأحزاب
#غزوة_الغابة_أو_ذي_قَرَد

قلنا المرة إللي فاتت إن رسول الله ﷺ أرسل سرايا متتالية لقتال القبائل والأشخاص إللي شاركوا في حصار المدينة،
واتكلمنا عن غزوة عبد الله بن عتيك ومحمد بن مسلمة،
بعد سرية محمد بن مسلمة ما رجعت أرسل رسول الله ﷺ سرية تانية وهي سرية عكاشة بن محصن الأسدي،
أرسله مع أربعين رجل من الصحابة لمكان اسمه الغَمْر، فيه يتجمع قبيلة لبني أسد،
لما عرف بنو أسد إن في سرية جاية تهجم عليهم أخفوا الأنعام بتاعتهم في مكان بعيد وهربوا كلهم،
فلما وصل عكاشة رضي الله عنه ملقاش حد في القرية خالص🤨
لكنه شاف أثار الأنعام يعني بواقي أكلها وفضلاتها، فلقى رجل نائم فسأله عن أهل القرية قال لهم هربوا،
وسألوه عن الأنعام فقال لهم ميعرفش، فعرفوا إنه بيخدعهم فهددوه فأخبرهم عن مكان الأنعام وراحوا وأخذوا الأنعام ورجعوا بها للمدينة،
أرسل رسول الله ﷺ محمد بن مسلمة في سرية تانية ومعاه عشرة من الصحابة لبني ثعلبة في مكان قريب من المدينة مكان اسمه ذي القَصّة،
وصل محمد بن مسلمة للمكان بالليل وكان بني ثعلبة وصل لهم خبر السرية فعملوا كمين مكون من مائة رجل واختبأوا للصحابة العشرة وقعدوا يراقبوهم،
فلما نام الصحابة تسلل المائة رجل من بني ثعلبة ودخلوا وسطهم فانتبه محمد بن مسلمة وصرخ في أصحابه: السلااااح 😲
فكلهم قاموا وقعدوا يقاتلوا المائة رجل، فرموهم بالرماح فقتلوا العشرة من الصحابة وسقط محمد بن مسلمة جريحا،
ضربوا قدمه لم يتحرك ففكروا إنه مات فخلعوا ملابسه ومشيوا وتركوه،
واحد من المسلمين كان معدي على المكان قدرا كده فشاف القتلى من الصحابة فاسترجع وقال: إنا لله وإنا إليه راجعون😥
فسمعه محمد بن مسلمة فنادى عليه وعرف إنه لسه عايش فأخذه ورجع به للمدينة،
وصل الخبر لرسول الله ﷺ فجهز سرية تانية بسرعة بقيادة أبو عبيدة عامر بن الجراح ومعاه أربعين رجل يروحوا للمكان إللي قُتل فيه الصحابة عشان يقتلوا من قتلهم،
وصلت سرية أبو عبيدة للمكان وملقوش حد هناك، لكن لقوا أغنام وبعير فأخذوها ورجعوا بها للمدينة،

☆وأبو عبيدة كان من أوائل الصحابة إللي أسلموا على يد أبي بكر رضي الله عنه، وسماه رسول الله ﷺ أمين هذه الأمة، قال رسول الله ﷺ :
"لِكُلِّ أُمَّةٍ أَمِيْنٌ، وَأَمِيْنُ هَذِهِ الأُمَّةِ: أَبُو عُبَيْدَةَ بنُ الجَرَّاحِ"
يعني في كل أمة من الأمم بيكون فيها رجل يتميز بالثقة وشدة الأمانة،
وأمين أمه الإسلام هو أبو عبيدة عامر بن الجراح، لكن مش معنى كده إن باقي الصحابة مفيهمش صفة الأمانة😅
هم كلهم أمناء لكن الصفة دي زايدة جدا عند أبو عبيدة، زي ما رسول الله ﷺ وصف بعض الصحابة ببعض الأوصاف:
"أرحم أمتي بأمتي أبو بكر، وأشدهم في أمر الله عمر، وأصدقهم حياء عثمان،
وأعلمهم بالحلال والحرام معاذ بن جبل، وأفرضهم زيد بن ثابت، وأقرؤهم أبيّ،
ولكل أمة أمين وأمين هذه الأمة أبو عبيدة بن الجراح"
كل الصحابة فيهم الصفات دي لكن كل واحد بيغلب عليه صفة أكثر من التانية بيتميز بها👌

في شهر ربيع الآخر أرسل رسول الله ﷺ سرية بقيادة زيد بن حارثة رضي الله عنه لقتال بني سُلَيم،
وصل لمنطقة اسمها الجَمُوم ووجد هناك امرأة فسألها فأخبرتهم عن مكان فيه أغنام ومرعى لبني سليم،
فذهب زيد وإللي كانوا معاه للمكان فأخذوا الأغنام وأسروا من كان في المكان ومن بينهم زوج المرأة،
فلما رجعوا لرسول الله ﷺ ومعهم المرأة وزوجها أطلقها رسول الله ﷺ ووهب لها زوجها،

في شهر جمادى الأولى أرسل رسول الله ﷺ زيد بن حارثة في سرية تانية لمكان اسمه العيص ومعاه مائة وسبعين رجل من الصحابة، وكان سبب السرية دي إن رسول الله ﷺ سمع إن في قافلة لقريش جاية من الشام فأراد إنه يعترضها،
ففعلا اعترضها وأخذ القافلة ورجع بها للمدينة،
وكان في القافلة دي أبو العاص بن الربيع زوج زينب بنت رسول الله ﷺ وكان لسه على الكفر، واحنا حكينا قصته في الجزء الثالث والستين وإنه أسلم بعد ما رجع لمكة،
فممكن تبقوا ترجعوا للقصة تاني لو حابين تفتكروها 😁

في نفس الشهر خرج رسول الله ﷺ بنفسه لقتال قبائل عضل والقارة فاكرينهم، إللي غدروا بالصحابة في حادثتي ماء الرجيع وبئر معونة،
رسول الله ﷺ لم ينسَ غدر القبيلتين وأول ما وجد الفرصة للانتقام لمقتل أصحابه جهز جيش للخروج لقتالهم،
وعضل والقارة من قبيلة كبيرة جدا اسمها بنو لَحْيان،
لكن الموضوع مش سهل 😶
لأن قبائل بني لحيان قبائل قوية مقاتلة، ومشهورة بالغدر وقطع الطرق ومكانها بعيد عن المدينة بحوالي أربعمائة كيلو متر،
فتخيلوا كمية الكمائن إللي هتكون على الطريق، ده غير إن القبائل دي قريبة جدا من مكة، فمش بعيد أهل مكة يسمعوا الخبر فيجهزوا جيش ويخرجوا يقاتلوا مع بني لحيان،
فكانت الغزوة دي تعتبر خطيرة على رسول الله ﷺ وجيش المسلمين،
لكن رسول الله ﷺ كان عنده خطة، جهز مائتين فارس وأوهم الناس إنه متجه ناحية الشمال في بادية الشام، وبع

دين راح مغير الاتجاه وتحرك ناحية الجنوب في اتجاه ديار بني لحيان عشان ميوصلهمش الخبر،
لكن بني لحيان حاطين كمائن كثيرة جدا فعرفوا بقدوم رسول الله ﷺ فرجعوا لقومهم وأخبروهم بمجيء رسول الله ﷺ فهربوا كلهم منه ﷺ 😁
مع إن العدد إللي كان مع رسول الله ﷺ كان عدد قليل لكنهم اترعبوا من رسول الله ﷺ وهربوا وتركوا بيوتهم فاضية،
رسول الله ﷺ مكنش عايزهم يهربوا هو كان عايز يقاتلهم عشان ينتقم لأصحابه الذين قُتلوا غدرا،
لكن هروب بني لحيان كان له أثر كبير جدا لصالح المسلمين في المنطقة، لأن العرب مكنش من أخلاقهم الهروب، والجُبْن صفة مذمومة جدا عندهم وخصوصا لو قبيلة قوية زي بني لحيان،
فلما العرب تسمع إن بني لحيان القبيلة القوية إللي لها تاريخ في القتال هربت من المسلمين من غير حتى ما يواجهوهم كده الناس هتفكر ألف مرة قبل ما يقاتلوا المسلمين،
ومش بس كده ده رسول الله ﷺ قعد في ديارهم يومين وبقى هو إللي يدور عليهم عشان يقاتلهم مش لاقيهم،
فكده أثبت للجميع إنه مش خايف من بني لحيان وهم إللي خايفين منه👌
فكل ده كان في صالح المسلمين والدولة الإسلامية، رسول الله ﷺ بقاله أسبوعين غائب عن المدينة، فبعد ما رجع رسول الله ﷺ من الغزوة ، واحد اسمه عُيينة بن حصن سيد قبائل غطفان وكان من المشاركين في الأحزاب أغار على أطراف المدينة،
عيَيْنة بن حصن ده كان لقبه وسط الناس الأحمق المُطاع 😅
جمع مجموعة من الفرسان من قومه وهجم على أطراف المدينة على منطقة اسمها الغابة بترعى فيها إبل المسلمين،
كان في المكان ده زوجة أبي ذر الغفاري وابنه وراعي للإبل، فقتلوا ابن أبي ذر واخذوا زوجته أسيرة وأخذوا الإبل،
والكلام ده كان قبل أذان الفجر على طول، شاف الموقف غلام لعبد الرحمن بن عوف،
جري على طول للمدينة عشان يخبر رسول الله ﷺ باللي حصل، قابله واحد من الصحابة اسمه سَلَمة بن الأَكْوَع وأخبره باللي حصل، راح طالع سلمة بن الأكوع على جبل باتجاه المدينة ونادى بأعلى صوته :
يا صباحاه....يا صباحاه....يا صباحاه!
أهل المدينة كلهم سمعوه فعرفوا إن في مشكلة، وسمع رسول الله ﷺ صرخة سلمة وجاء لرسول الله ﷺ ثمانية من فرسان الصحابة منهم المقداد بن عمرو وأبو قتادة وغيرهم من الصحابة عشان يكونوا تحت أمر رسول الله ﷺ،
فأمّر عليهم سعد بن زيد، يعني خلاه هو أمير الثمانية وقال لهم يلحقوا بسَلمة على ما رسول الله ﷺ يجمع الناس ويلحق بهم،
في الوقت ده كان سلمة بن الأكوع أخذ سيفه والنبل بتاعه وطلع يجري وراء العدو، لوحده بطوله كده، وهم كانوا بالمئات وكان سلمة أسرع العرب محدش يقدر يلحقه كان حتى أسرع من الخيل😮
ورسول الله ﷺ كان يقول عنه خير رجالاتنا سلمة بن الأكوع، يعني أحسن واحد بيعرف يجري ويقاتل على رجله سلمة بن الأكوع رضي الله عنه،
لحقهم سلمة وكان بيضع علامات في الطريق عشان يرشد رسول الله ﷺ لمكانه، وقعد يرميهم بالسهام، وهم يجروا قصاده خايفين منه، ولما كانوا يحاولوا يرجعوا له يقوم هو يهرب في الاتجاه التاني ومحدش يقدر يلحقه،
فلما يسيبوه ويمشوا يقوم راجع لهم تاني، وكان لما ييجي مكان ضيق يعدوا منه كان يطلع على الجبل ويرميهم بالحجارة من فوق الجبل،
واترعبوا من سلمة لدرجة إنهم بقوا يرموا الأحمال إللي معاهم ويتخففوا منها،
رموا الرماح وتركوا الإبل إللي كانوا سرقوها وهربت منهم زوجة أبي ذر ورجعت للمدينة،
تعبوا من كتر الجري والقتال فقعدوا يستريحوا شوية وكان الكلام ده وقت الضحى ومفكرين إن سلمة خلاص رجع، لقوه من فوق الجبل بيرمي عليهم حجارة تاني😅
فاترعبوا منه وقال لهم عيينة لولا إن الرجل ده وراءه جيش مكنش هيقاتل بالشجاعة دي، وقال لأربعة منهم معاه يقوموا يحاوطوه ويأسروه،
فقاموا إلى سلمة فقال لهم :
"أتعرفونني أنا ابن الأكوع والذي كرّم وجه محمد لا يطلبني رجل منكم فيُدركني ولا أطلبه فيفوتني"
يعني بيقول لهم عارفين انا مين ؟ أنا ابن الأكوع والله محدش هيجري ورايا منكم ويقدر يمسكني، ومفيش واحد فيكم هجري وراه إلا وهمسكه 👌
فخافوا منه ورجعوا،
نظر سلمة لقى غبار فرسان رسول الله ﷺ جاية من ناحية المدينة، فكان أول واحد يصل لسلمة هو واحد اسمه الأَخْرم الأسدي ومن ورائه أبو قتادة فمسك سلمة بزمام فرس الأخرم والزمام يعني الحبل إللي بيمسك الفرس عشان ميجريش وقال للأخرم:
"يا أخرم احذر القوم فإني أخاف أن يَقْطَطِعوك فائّتِد"
يعني بيقول له استنى وخد بالك أنا خايف عليك أحسن يقتلوك، فقال له الأخرم:
يا سلمة لو كنت تؤمن بالله واليوم الآخر وتعلم أن الجنة حق والنار حق، فمتقفش بيني وبين الشهادة👌
فترك سلمة فرس الأخرم فقابله حبيب بن عيينة بن حصن فقتله وتحققت رؤياه ومات شهيدا😊

☆الأخرم كان شاف رؤيا قبل الموقف ده بكم يوم إن السماء اتفتحت حتى السماء السابعة وقيل له : هذه منزلتك!
فراح الأخرم لأبي بكر وأخبره بالرؤيا وكان أكثر واحد بيعرف يفسر الرؤَى، فقال له أبكر الصديق:
يا أخرم الرؤيا معناها إنك هتموت شهيد👌
عشان كده لما سلمة وقّفه قال له الكلام إللي قاله،
شاف الموقف

أبو قتادة فانطلق وراء حبيب بن عيينة فقتله وجاء باقي الفرسان وانطلقوا خلف المشركين،
فقتل عكاشة رجل وابنه برمح واحد وهم راكبين على نفس البعير،
أما أبو قتادة فانطلق في مقدمة الناس فقابل رجل اسمه مِسعدة الفزاري،
ومسعدة ده له قصة مع أبو قتادة، لما كان أبو قتادة رضي الله عنه بيشتري الفرس إللي هو راكبه ده من السوق قابله مسعدة الفَزَاري فقال له مسعدة وهو مشرك :
إيه الفرس ده😒
فقال له أبو قتادة :
دي فرس هقاتل عليها مع رسول الله ﷺ😊
فقال مسعدة :
ما أهوَن قَتلكم وأشد جرأتكم😏
يعني انتم ضعفاء أصلا وهنقدر نقتلكم بسهولة على الرغم من جرأتكم،
فقال له أبو قتادة :
أسأل الله أن أقابلك عليها وأقتلك😤
فقال له مسعدة باستهزاء: آمين😏
فاستجاب الله دعاء أبي قتادة والتقى بمسعدة الفزاري على الفرس إللي اشتراها وقاتل مسعدة وهو عليه وقتله أبو قتادة رضي الله عنه،
وكان إللي يقتل واحد من المشركين يأخذ سَلْبه يعني ياخد الأغراض بتاعته،
فوضع أبو قتادة بُردته، رداءه يعني على مسعدة عشان الناس تعرف إن أبو قتادة هو إللي قتله فمحدش يأخذ سلْبه،
وانطلق وراء المشركين يطاردهم، في الوقت ده كان وصل رسول الله ﷺ ومعاه جيش من المسلمين،
فلما رأى الناس بُردة أبي قتادة استرجعوا وحزنوا، فكروا إن إللي مقتول ده هو أبو قتادة،
فقال لهم رسول الله ﷺ:
ليس بأبي قتادة، ولكنه قتيل لأبي قتادة وضع عليه بردته عشان تعرفوا إنه قتيله👌
اجتمع الناس مع رسول الله ﷺ ونزلوا في مكان اسمه ذي قَرَد وقعدوا هناك يوم وليلة وهرب عيينة بن حصن وإللي كانوا معاه، واتسمت الغزوة دي باسم غزوة ذي قَرَد أو غزوة الغابة،
جاء سلمة بن الأكوع لرسول الله ﷺ يقول له:
خليني آخذ مائة رجل وأنا أروح وراهم وأقتلهم 😤
فقال له رسول الله ﷺ:
هتعمل كده فعلا؟! فقال له سلمة : نعم والذي بعثك بالحق😤
فضحك رسول الله ﷺ حتى ظهرت أسنانه ﷺ من جرأة وشجاعة سلمة بن الأكوع رضي الله عنه وقال له:
ده همّ خلاص وصلوا لديارهم وقاعدين بياكلوا👌
وقال رسول الله ﷺ عن سلمة بن الأكوع:
خير رجالاتنا سلمة بن الأكوع وخير فرساننا أبو قتادة.

وطبعا رسول الله ﷺ بياخد بالأسباب ومش بيدخل معركة إلا وهو مجهز نفسه، يعني هو فقط يقدر يخلص المرأة وينقذ الإبل وكل ده في حدود المدينة،
لكن ميقدر ياخد الجيش ويتوجه لقبائل غطفان القوية من غير ما يكون واخد احتياطاته ومجهز الجيش كويس،
أيوة هو لسه منتصر على بني لحيان القوية لكن غطفان أقوى منهم بكثير فمش هينفع يدخل بالمسلمين مغامرة غير مأمونة👌
رجع رسول الله ﷺ مع الصحابة إلى المدينة وركّب سلمة خلفه على ناقته ﷺ،
وهم في الطريق واحد كان عايز يسلي نفسه فقال :
ألَا من مُسابق للمدينة🙋‍♂️
يعني مفيش حد يتسابق معايا للمدينة، وقعد يكرر الكلام، وسلمة بن الأكوع ساكت😅
فلما زودها أوي وفضل يلح قال له سلمة:
ًألا تُكرم كريما ولا تهابُ شريفا😑
يعني هو مفيش حد مالي عينك وانت الوحيد في الدنيا إللي بتعرف تجري يعني،
فقال الرجل : نعم، إلا رسول الله ﷺ 😤
يعني مفيش حد في دماغي، ولا فارق معايا حد غير رسول الله ﷺ، فالكلام استفز سلمة رضي الله عنه😅
فقال سلمة لرسول الله ﷺ:
تأذن لي أسابقه يا رسول الله 😁
فقال له رسول الله ﷺ: لو انت عايز تسابقه روح سابقه!
فنزل من خلف رسول الله ﷺ وقال للرجل :
خلينا نبدأ السباق👌
وبدأوا السباق من هنا ومفيش دقائق وكان سلمة بن الأكوع سابقه بمرحلتين🤭
يعني الرجل التاني كان جاي بيجري وجايب أخره وسلمة رضي الله عنه واقف واخذ نفسه وأول ما الرجل وصل عند سلمة راح سلمة جاري وسابقه بمرحلتين تاني، وطبعا أكيد عرفنا مين إللي فاز بالسباق 😅

☆ملحوظة : في علماء قالوا إن غزوة ذي قَرَد كانت في أواخر السنة السادسة من الهجرة، لكن الراجح إنها كانت في أوائل السنة السادسة من الهجرة.

في شهر جمادى الآخرة أرسل رسول الله ﷺ سرية بقيادة زيد بن حارثة مرة ثالثة إلى بني ثعلبة ومعاه خمسة عشر رجلا لمكان اسمه الطّرف،
فلما وصل ملقاش حد، كلهم هربوا فكروا إن رسول الله ﷺ هو إللي جاي يقاتلهم،
فغنم زيد عشرين بعيرا وشاة، وتوجه للمدينة، فلما وصل لهم الخبر إن زيد هو إللي جاء خرجوا وراه وحاولوا يسترجعوا البعير إللي أخذه لكنهم معرفوش،
في نفس الشهر جمادى الآخرة بعد ما رجع زيد للمدينة أرسله رسول الله ﷺ مرة رابعة في سرية لمنطقة اسمها الحَسْمى في شمال الجزيرة العربية،
والسرية دي قصتها طويلة فهنخليها للمرة الجاية إن شاء الله، لكن هنلاحظ هنا إن رسول الله ﷺ بيُخرج زيد أكثر واحد في السرايا وبيجعله قائد لها ولسه كمان في سرايا تانية هيكون هو القائد فيها، فكأن رسول الله ﷺ بيدرب زيد رضي الله عنه لحاجة مهمة في المستقبل👌

إيه إللي حصل في سرية الحسمى وكان إيه سببها أصلا، ده إللي هنعرفه الجزء الجاي إن شاء الله 😊


#Eman_Shalapy

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

#قصص_الأنبياء(٢)
#السيرة_النبوية
#الحلقة_مائة_واثنين
#أحداث_السنة_السادسة_من_الهجرة
#غزوة_بني_المصطلق

كنا واقفين المرة إللي فاتت عند خروج زيد بن حارثة في سرية رابعة لمكان اسمه الحَسْمى،
ليه رسول الله ﷺ أرسله للمكان ده ومعاه خمسمائة مقاتل، يعني أول سرية تخرج بعدد كبير جدا كده🤔
هنرجع بالزمن للوراء شوية، صحابي اسمه دِحْيَة الكلبي، كان في زيارة لهِرَقل ملك الروم في الشام وكان هرقل أعطاه هدايا وملابس، وهو راجع للمدينة اعترض طريقه واحد من زعماء قبيلة جُذام،
والقبيلة دي تسكن في شمال الجزيرة العربية، والزعيم ده كان اسمه الهُنَيْد بن عُوص وكان معاه ابنه ومجموعة من الرجال، هجموا على دحية رضي الله عنه وأخذوا الهدايا إللي كانت معاه وحتى أخذوا ملابسه وتركوا له ثوب قديم مقطع،
سمع بالموضوع ده مجموعة من قبيلة بني الضّبِيب وكانوا مسلمين فاجتمعوا وراحوا ينقذوا دحية،
وفعلا استطاعوا إنهم يرجعوا لدحية كل الحاجات إللي أخذها الهنيد بن عوص وإللي كانوا معاه،
أخذ دحية الكلبي حاجاته ورجع للمدينة وأخبر رسول الله ﷺ إللي حصل معاه،
المعروف عند ناس كثير إن خلاص كده الموقف انتهى، حاجته اتسرقت ورجعناها وانتهى الموضوع ومفيش داعي للمشاكل🤷‍♂️
لكن رسول الله ﷺ كان له رأي تاني وموقف تاني👌
قرر رسول الله ﷺ إن الموقف ده ميعديش من غير ما ياخد موقف،
أيوة إللي أخذوه من دحية رجع تاني لكن لازم وقفة عشان مش أي واحد تسول له نفسه إنه يعتدي على المسلمين يفكر إنه هيعدي منها،
إللي يعتدي على واحد مسلم أو امرأة كأنه اعتدى على الدولة الإسلامية كلها، فالموضوع لازم له وقفة عشان يعرفوا إن دماء وأعراض وحرمة المسلمين غالية👌
وعلى فكرة الدولة إللي تحترم رعاياها وتدافع عنهم كده محدش يقدر يعتدي على رعاياها بعدين والناس تعمل لهم ألف حساب،
وهو ده إللي رسول الله ﷺ كان بيعمله بالضبط👌
أي حد يعتدي على المسلمين مش هيعدي منها بدون ما يتعاقب،
والمسلمين نفسهم لما يحسوا إنهم مهمين والقائد بتاعهم بيهتم بيهم وبيدافع عنهم هيحسوا بالأمان والانتماء لدولة الإسلام وإنهم مش مجرد أعداد ملهاش قيمة😞
فلأن رسول الله ﷺ فاهم المعنى ده كويس جهز سرية زيد بن حارثة وإللي كانت مكونة من خمسمائة صحابي عشان يروح يقاتل قبيلة جذام وخصوصا الهنيد وابنه ويعاقبهم على اعتدائهم على دحية رضي الله عنه👌
مع إن المسافة بعيدة جدا، يعني قبيلة جذام بعيدة عن المدينة بحوالي ثمانمائة كيلو،
يعني هيمشوا المسافة دي كلها في الصحراء وبعدين يقاتلوا قبيلة قوية عشان بس اعتدوا على رجل مسلم واحد👌
خرج زيد رضي الله عنه بأكبر سرية جهزها رسول الله ﷺ حتى الآن واتجه لقبيلة جذام،
وكان بيمشي بالسرية في الليل ويرتاح في النهار عشان محدش يعرف بخروج السرية وتبقى مفاجأة للقبيلة،
وفعلا وصل زيد للقبيلة وهجم عليهم فجأة وقتل منهم عدد كبير وكان من بين القتلى الهنيد وابنه، وغنمت السرية ألف وخمسمائة بعير وشاة، وأخذ مائة سبي من النساء والأطفال،
وكان انتصار السرية دي له أثر كبير جدا في كل الجزيرة العربية،
الكل دلوقتي عرف إن أي حد هينتقص من هيبة الدولة الإسلامية بالاعتداء على أي فرد منها هيكون عاقبته زي عاقبة قبيلة جذام👌
الغنائم إللي السرية دي أخذتها هتفرق جدا مع المسلمين في المدينة لأن حالتهم الاقتصادية صعبة،
رجعت السرية للمدينة ومعاها الغنائم، وبعدها على طول جاء لرسول الله ﷺ زيد بن رفاعة الجذامي وكان معاه كتاب بالأمان من رسول لأنه كان أسلم هو ومجموعة من قبيلة جذام،
مع إن قبيلة جذام هم إللي نقضوا العهد مع رسول الله ﷺ باعتدائهم على دحية، لكن رسول الله ﷺ آثر إنه يكسب قلوب القبيلة بإنه يرجع الأموال والنساء والأطفال للقبيلة👌
إللي يشوف الموقف يقول إن رسول الله ﷺ خسر غنائم كثيرة كانت هتفرق في اقتصاد الدولة الإسلامية،
لكن رسول الله ﷺ لا يقاتل من أجل المال ولا الغنائم، لكنه يقاتل لنشر دين الله بين الناس ولإدخال الناس في الإسلام،
موقف رسول الله ﷺ ثبّت المسلمين من قبيلة جذام وفي نفس الوقت كان سبب في إسلام من لم يسلم من القبيلة،
هو إيه إللي يجبر رسول الله ﷺ على التنازل عن الأموال والغنائم دي في ظل مجتمع عايش بس على الغارات إللي بيعملوها على بعض ويقتلوا وينهبوا الأموال🤷‍♂️
فواضح جدا في نظرهم إن رسول الله ﷺ مختلف وإن المال مش مهم بالنسبة له وإن هدفه مختلف عن باقي الناس،
وكمان السرية حققت الهدف الرئيسي من خروجها وهو إظهار هيبة الدولة الإسلامية وإظهار قوتها وإن محدش يقدر يعتدي على رعاياها في أي مكان،
وإنها مبقتش الدولة الضعيفة إللي كانت محاصرة من كم شهر، وحتى أفرادها مبقوش المجموعة المطاردة إللي قريش كانت بتعذبهم قبل الهجرة، دي رسالة واضحة جدا لكل العرب زي ما رسول الله ﷺ قال:
اليوم نغزوهم ولا يغزونا👌

سمع رسول الله ﷺ إن قبيلة بني المُصْطِلِق بتجمع الناس وبتجهز جيش لغزو المدينة،
فقبل ما يكملوا تجهيزاتهم كان رسول الله ﷺ مجهز جيش من سبعمائة مقاتل وأخذ الجيش وراح يقاتل بن