اول شي اقروا الكلام هذا كاملاً

بعد م خلصتوا من اول ثريد اقروا ذا

انت كطالب سنة اولى .. ثاني … ثالث .. في الحاسب مطلوب منك

١- ترفع معدلك قد م تقدر لان اخر سنتين م راح يرتفع لو وش م تسوي اللهم بلغت اللهم فاشهد


٢- حدد مجالك الدقيق عشان السنة الرابعة م راح تتعب وتحتار وش تسوي

٣- لمن تحدد مجالك الدقيق وسبق وكتبت ثريد عنه وكيف تختاره خذ شهادات احترافية فيه من وين من المنصات الي سبق نشرتها


٣ سنوات وقت كافي جداً انك تحدد مجالك الدقيق وتاخذ شهادات احترافية فيه



طيب انت الان رفعت معدلك وخذيت شهادات احترافية بمجال معين وتعلمت مجال معين بعدها وش تسوي ،

لاوصلت سنة ثالثة - رابعة

افتح حساب لينكدان وسو سيرة ذاتيه بنظام ATC واختبر ستيب عشان تجيب درجة انقليزي كويسة


طيب بعد م تتخرج وش مطلوب منك ؟

سو ايميل خاص بتقديم الوظايف يكون رسمي وبه صورتك الشخصية او اللوقو الخاص فيك


بعدها اختبر القدرة المعرفية
وخذ دورات بالمقابلات الشخصية وكيف تظهر نفسك للوظايف


بعدها سجل بجدارت وسجل بتمكين وسجل بطاقات



هذي كل خطة العمل تبعك من اول سنة لين رابع سنه وهذي الي انا سويتها

جدارت سويت ثريد عنه
تمكين سويت ثريد عنه
طاقات قريبا
كيف تحدد مجالك الدقيق سويت ثريد عنه
لينكدان سويت ثريد عنه
السيرة الذاتيه سويت ثريد عنها
اختبارات الانقليزي ستيب ايلتس توفل سويت ثريد عنها

كيف تسوي ايميل خاص بالوظائف سويت ثريد عنه


انت فقط عليك تمسك البحث تبع القناة وتكتب الي تبغاه صدقوني اني كتبت كل شي يخص تجربتي يشهد الله بالتفصيل الممل لكن يزعلني ان محد يشوف القناة والبحث ويجي يسئلني انا ماعندي مشكله اساعدك والله بس اتعب شوي وابحث تحصلني متكلمه عنه بالتفصيل

الدورات والشهادات الاحترافيه مالها وقت اي دوره انت تحس عاجبتك بالذات دورات اللغات سوا جافا او بايثون او SQL هي تزيدك درجة م تنقصك ومالها وقت محدد انت بس فضي نفسك وسو خطة عمل وصدقني بتنجح

وارجع واقول الحاسب بشكل عام اخوان
مهما دخلت تخصص حاسب ماعجبك وظيفتك تتوظف بالي تبيه
المهم تكون دارس المجال وتعرفه وعندك شهادات فيه م يهمهم تخصصك بقد خبرتك ممكن اذا مره مره هم يبون تخصص نظم عشان تحليل ويكون درس هذي المواد بشكل ممتاز يطلبون بالاسم نبي واحد متخصص نظم لكن بكل المجالات بكل الدورات بكل التدريب المنتهي بالتوظيف وكل الوظايف يكتبون تخصص تقني او مايعادله او انه يسطر لك كل تخصصات الحاسب ف لاتشيل هم ان تخصصك مو عاجبك




الحاسب هم مستقبل ٢٠٣٠ وكل تخصصات الحاسب ومجالاته هم اساس الرؤية

وبس والله اعتقد وضحت كل شي من اول سنة الى اخر سنة الى بعد التخرج وش تسوي اذا عندكم استفسارات حياكم الله بجاوب عليها والله يوفقكم يارب وفالكم الوظايف الزينة 🙏🏻

هذي المنصات الي اخذ منها شهاداتي الاحترافية وكلها معتمدة

وهذي بعض المواقع المعتمدة

انا وحده كيف اعرف نفسي اذا انجزت او لا اكتب سويت خطة عمل من اول سنة الى رابع سنة الى بعد التخرج والحمدلله قربت اخلصها واغلبها انجزتها انتم سو كذا اكتبوا كل شي تبونه وتبون تسونه



وللعلم انا ماسوي هذي الاشياء عشان الوظيفه

الوظيفه ان جت الحمدلله رزق من ربي وجاني انا اسويها لاني انا ابي اتعلم احب اني اكون مواكبه لسوق العمل واعرف وش الجديد بالحاسب اذا خبراتي ساعدتني اتوظف شي حلو انا مو خسرانه واذا م توظفت برضو انا مو خسرانه تعلمت وكسبت خبرات وماشيت سوق العمل


والوظيفة رح تجي بمشيئة الله

اكتبوا خطتكم من الان

اذا انت بالسنوات الاولى اكتب وش تبغى مجال وش تبي دورات احترافية تاخذ فيها شهادات وش تبي خبرات وهاكثونات


اذا انت بالسنوات الاخيرة سو سي ڤي مناسب وجهز حسابك لينكدان ورتب وضعك للوظيفة


والي يقول طيب انا حاب افتح لينكدان من الان واسوي سيرة من الان طيب حلو شي كويس كلامي هذا من وجهة نظري مو شي الزامي انت مجبور تسويه


انا اشوف ان بدايه السنين الثلاث الاولى كطالب حاسب كتبت لك المهام الي انا سويتها عجبتك سوها م عجبتك حتى لو انت طالب سنة اول تبي تفتح لينكدان وتبي تسوي سيرة ذاتيه انت حر هذا رايك قد يكون صحيح وقد يكون خطاء

الاهم ان م تتخرج الا وانت مسوي كل شي كتبته عشان وقتها لاتزعل اذا م جتك وظيفة انت سعيت وسويت كل شي مطلوب منك واغلب الشروط الي طلبوها بالوظايف انت سويتها


والتوفيق والرزق من رب العالمين متى م جاك رزقك فهو مكتوب ومقدر لك سوا بكلامي او بدونه


والله يوفقكم يارب ولاتنسوني من دعواتكم ❤️

وخلف الكثير من النجاح
‏الكثير من الفشل والرفض أيضًا

لاحظت ان كثير طلاب يحسبوني دائما انقبل تراني زيكم انرفض كثير 😂

لكن الحمدلله كل شي خيره ننرفض نكمل ننقبل نكمل لاتجلسون تتحطمون من اول مره الفشل عمره م كان محطم بالعكس خله دافع لك انك تتحدا نفسك وتكمل

ولامره شاركتكم كم مره انرفضت سوا ببرنامج او هاكثون او دورات لكن صدقوني ياكثرها

اقدر اوريكم الجانب اللي انا ابغاه محد كامل في ذا الدنيا كلنا نواجه صعوبات وتحديات وننرفض وننقبل

هذي هي الحياة يوم لك ويوم عليك ولو بوريكم كم مره انرفضت م راح تخلص اللستة 😂

لكن صدقوني رغم كل هذا متفائلة بربي ودائما اكرر دام مانقبلت فهو خير لي ❤️

وصلنا ٦٠٠ الحمدلله دائما وابدا هذا بتوفيق الله ثم دعمكم المتواصل

حبيت اعرفكم عن نفسي للجدد وان شاءالله نكبر اكثر واكثر ❤️🙏🏻

موضوع اليوم عن منصة طاقات 📍
جهزوا نفسكم للثريد 👀

البوابة الوطنية للعمل "طاقات"، إحدى مبادرات صندوق تنمية الموارد البشرية وبدعم من وزارة العمل والتنمية الاجتماعية ووزارة الخدمة المدنية، توفر منصة الكترونية شاملة لسوق العمل في المملكة العربية السعودية بالنظام العام والخاص ومزودي خدمات التوظيف، تجمع بين الباحثين عن العمل وأصحاب الأعمال وتتيح تقديم وتبادل خدمات التوظيف والتدريب بكفاءة وفعالية لزيادة استقرار وتطوير القوى العاملة في سوق العمل السعودي والمساهمة بعرض الفرص الوظيفية بشكل عادل للجميع

طاقات توفر الخدمات الإلكترونية بكل ما يخص التسجيل في البوابة.

•  تسجيل الباحثين عن عمل.
• تسجيل أصحاب العمل.
• تسجيل الجهات الحكومية
• التحقق من معلومات المسجلين الباحثين عن عمل مع مركز المعلومات الوطني
• التحقق من معلومات المسجلين كأصحاب عمل مع وزارة العمل والتنمية الاجتماعية.
•  الية التحقق برقم الجوال في الدخول على البوابة للباحث عن العمل وصاحب العمل.
• ارتباط مع أكثر من 60 جهة حكومية للتحقق من بيانات المسجلين.