អាមេរិក - ហ៊្វេសប៊ុក នឹងបិទគណនីរបស់អតីតប្រធានាធិបតីអាមេរិកត្រាំរហូតដល់ឆ្នាំ២០២៣។ ការបិទនេះធ្វើឡើងបន្ទាប់ពីព្រឹត្តិការណ៍លុកលុយវិមានរដ្ឋសភារបស់អ្នកគាំទ្រលោកកាលពីខែមករា ឆ្នាំ២០២១ កន្លងទៅនេះ ដោយចោទលោកត្រាំថាបានញុះញុងឲ្យមានអំពើហឹង្សាតាមហ្វ៊េសប៊ុក ។

នីហ្សេរីយ៉ា - កាលពីថ្ងៃសុក្រកន្លងទៅនេះ រដ្ឋាភិបាលនីហ្សេរីយ៉ាបានប្រកាសថា ខ្លួននឹងបិទបណ្តាញ Twitter នៅក្នុងប្រទេសរបស់ខ្លួន។ ការប្រកាសនេះធ្វើឡើងពីរថ្ងៃបន្ទាប់ពី Twitter បានលុបការផុស tweet របស់ប្រធានាធិបតីនីហ្សេរីយ៉ាចេញពីបណ្តាញខ្លួន។

នីហ្សេរីយ៉ា - អគ្គមេធាវីនីហ្សេរីយ៉ាបានបញ្ជាឲ្យចាប់កាត់ទោសភ្លាមៗចំពោះអ្នកដែលល្មើសបញ្ជារដ្ឋាភិបាលមិនឲ្យប្រើបណ្តាញសង្គម ធ្វីតទើ។ ក្រុមហ៊ុនបណ្តាញទូរស័ព្ទទាំងអស់នៅក្នុងប្រទេសត្រូវបានបញ្ជាឲ្យផ្តាច់បណ្តាញសង្គមធ្វីតទើចេញ។

អាហ្កានីស្ថាន - រថយន្តបំផ្ទុះគ្រាប់បែកមួយបានសម្លាប់មនុស្ស១១នាក់នៅដងផ្លូវមួយនៃប្រទេសអាហ្កាស្ថាន។ ក្រុមមន្រ្តីបានចោទលើក្រុមតាលីបង់។ ក្នុងរយៈពេលបីខែដើមឆ្នាំនេះ មានជនស៊ីវិលអាហ្កានីស្ថាន ១.៨០០នាក់បានស្លាប់ និងរងរបួសនៅក្នុងការប្រយុទ្ធគ្នារវាងអាហ្កានីស្ថាន និងតាលីបង់។

អូហ្គង់ដា - កីឡាការិនី ខាតធឺរីន ណានស៊ីរី នឹងក្លាយជាកីឡាការិនីប្រដាល់ស្ត្រីគេបង្អស់តំណាងឲ្យប្រទេសអូហ្គង់ដាក្នុងកីឡាអូឡាំពិកនៅតូក្យូ។

ចិន - ហ្វូងដំរីព្រៃចំនួន១៥ក្បាលត្រូវបានប៉ូលិសសម្របសម្រួលផ្លូវឲ្យឆ្លងកាត់ទីក្រុងធំៗ។ ហ្វូងដំរីបានធ្វើដំណើរកាត់ជាយក្រុងគុនមិញ។ អាជ្ញាធរបានប្រើប្រាស់ដ្រូន១៤ រថយន្ត១១០គ្រឿង និងកម្លាំង៥១០នាក់ ដើម្បីបិទផ្លូវ និងនាំផ្លូវដំរីឆ្ពោះទៅព្រៃភាគនិរតី។ ហ្វូងដំរីនេះចេញពីព្រៃក្នុងតំបន់ស្វ័យត Xishuangbanna Dai មកដល់ទីក្រុងគុនមិញដោយធ្វើដំណើរបានជាង ៥០០គីឡូម៉ែត្រ ក្នុងល្បឿន១២គីឡូម៉ែត្រក្នុង១ថ្ងៃ។

សិង្ហបុរី - ការហាត់កីឡានៅក្នុងអាគារបិទជិតក្នុងមណ្ឌលកីឡាសាធារណៈនៅប្រទេសសិង្ហបុរីតម្រូវឲ្យពាក់ម៉ាក់។

ថៃ - ប៉ូលិសថៃបានចាប់ផ្តើមស៊ើបអង្កេតការស្លាប់របស់ប្តីប្រពន្ធមហាសេដ្ឋីថៃ ដែលអាជ្ញាធរឃើញស្លាប់ដោយសារលង់ទឹកនៅក្នុងអាងហែលទឹកនៅមណីយដ្ឋានកោះតាវ។ ជនរងគ្រោះគឺជាម្ចាស់សណ្ឋាគារណូវូតែលនៅភូកេត អាផាមិនបឹងកាពិកមេសុន នៅសុខុមវីដ។

សិង្ហបុរី - ចាប់ពីឆ្នាំ 2023 ទៅ ប្រាក់ខែរបស់បុគ្គលិកអនាម័យនៅប្រទេសសិង្ហបុរីនឹងត្រូវបានដំឡើងរៀងរាល់ឆ្នាំក្នុងរយៈពេល 6 ឆ្នាំខាងមុខ។ បុគ្គលិកអនាម័យដែលជាជនជាតិសិង្ហបុរី និងជាអ្នកទទួលសិទ្ធិស្នាក់នៅអចិន្ត្រៃយ៍ នឹងទទួលបានការដំឡើងប្រាក់ខែក្នុងឆ្នាំ 2023 ចន្លោះពី 1570ដុល្លារសិង្ហបុរី ទៅ 2210 ដុល្លារសិង្ហបុរី។ ប្រាក់ខែនេះនឹងត្រូវបានដំឡើងយ៉ាងហោចណាស់ 170 ដុល្លារសិង្ហបុរីក្នុងមួយឆ្នាំរៀងរាល់ឆ្នាំរហូតដល់ឆ្នាំ 2028។

ម៉ាឡេស៊ី - អត្រាអ្នកឆ្លងជំងឺកូវីដ១៩ នៅប្រទេសម៉ាឡេស៊ីបានធ្លាក់ចុះក្នុងរយៈពេល 4 ថ្ងៃជាប់គ្នាហើយនៅថ្ងៃចន្ទនេះអត្រាឆ្លងបានធ្លាក់ចុះក្រោម 6 ពាន់នាក់ក្នុងមួយថ្ងៃ។ សូមបញ្ជាក់ថាប្រទេសម៉ាឡេស៊ីបានបិទប្រទេសទាំងមូលចាប់ពីថ្ងៃទី 1 ខែមិថុនា ឆ្នាំ 2021 ដើម្បីប្រយុទ្ធនឹងកូវីដ១៩។

កម្ពុជា - វ៉ាក់សាំងការពារវីរុសកូវីដ-១៩ ចំនួន ១លានដូស (ស៊ីណូវ៉ាក់ ៥០ម៉ឺនដូស និង ស៊ីណូហ្វាម ៥០ម៉ឺនដូស) បានមកដល់កម្ពុជាយើងហើយ នៅព្រឹកថ្ងៃទី០៨ ខែមិថុនា ឆ្នាំ២០២១នេះ។

ថៃ - អភិបាលខេត្តស៊ូរ៉ាតថានី បានចេញលិខិតមួយកាលពីថ្ងៃទី៧ ខែមិថុនា ថា អ្នកដែលមានលទ្ធផលអវិជ្ជមានក្នុងការធ្វើតេស្ត CPR រកមេរោគកូវីដ១៩ ក្នុងរយៈពេល ៧២ម៉ោងចុងក្រោយ ឬអ្នកដែលចាក់វ៉ាក់សាំងកូវីដ១៩ ចំនួនពីរដូសរួចរាល់ អាចមកលេងកោះសាម៉ុយ ដោយមិនចាំបាច់ធ្វើចត្តាឡីស័ក១៤ថ្ងៃទេ។

ហ្វីលីពីន - លោកប្រធានាធិបតីហ្វីលីពីនបានលើកឡើងពីការតែងតាំងលោក ប៊ដាដូ ជាមេបញ្ជាការកងទ័ពជើងទឹកថ្មីជំនួសលោក ខាឡូបាកូដូ ដែលត្រូវចូលនិវត្តន៍។

ថៃ - ប្រជាជនថៃជាច្រើនបានខកខានចាក់វ៉ាក់សាំងកូវីដ-១៩ តាមកាលវិភាគណាត់ជួប បន្ទាប់ពីមានការផ្អាកដោយសារចំនួនវ៉ាក់សាំងមិនគ្រប់គ្រាន់កាលពីថ្ងៃអង្គារម្សិលមិញ។ លោកនាយករដ្ឋមន្ត្រីថៃបានចេញមុខសុំទោស និងបានបញ្ជាក់ថាវ៉ាក់សាំងកំពុងទិញមកបន្ថែមទៀត។

នីហ្សេរីយ៉ា - មន្ត្រីនីហ្សេរីយ៉ា និងមន្ត្រីទូតអាមេរិកបានជួបគ្នាកាលពីថ្ងៃចន្ទនេះ ដើម្បីពិភាក្សាអំពីបម្រាបបិទបណ្តាញសង្គម Twitter ។

សៃព្រើស - ក្នុងកម្មវិធីវិនិយោគដើម្បីសញ្ជាតិ របស់ប្រទេសសៃព្រើស មានលិខិតឆ្លងដែន ៦.៧០០ ត្រូវបានចេញជូនអ្នកវិនិយោគ ប៉ុន្តែពាក់កណ្តាលមិនបានចេញឲ្យ វិនិយោគិនផ្ទាល់ទេ ដោយចេញឲ្យសមាជិកគ្រួសារ និងប្រធានក្រុមហ៊ុនវិញ។

កម្ពុជា - នៅព្រឹកថ្ងៃទី៩ ខែមិថុនា ឆ្នាំ២០២១ នេះ កម្ពុជាបានតម្កល់តំណក់ប្រេងដំបូងរបស់ខ្លួននៅវិមានឈ្នះឈ្នះ។

អត្ថន័យកែវដំណក់ប្រេងដំបូងរបស់កម្ពុជា៖

* ទី១៖ កែវដំណក់ប្រេងមានរាងក្រពុំឈូក ឬស្លឹកពោធិ៍តំណាងភាពរុងរឿង បរិសុទ្ធ ការចម្រើនលូតលាស់។ មានកម្ពស់ ២៩ស.ម តំណាងឲ្យថ្ងៃទី២៩ ដែលទទួលបានដំណក់ប្រេងដំបូងរបស់កម្ពុជា។

* ទី២៖ ជើងពានត្របកឈូក តំណាងការខិតខំប្រឹងប្រែងថ្នាក់ដឹកនាំរហូតទទួលបានលទ្ធផលផ្លែផ្កា គឺធនធានប្រេងកាត សម្រាប់អភិវឌ្ឍជាតិ មាតុភូមិកម្ពុជា។ មានកម្ពស់ ១២ស.ម តំណាងឲ្យខែ១២ ឬខែធ្នូ ដែលទទួលបានដំណក់ប្រេងដំបូងរបស់កម្ពុជា។

* ទី៣៖ ពានជើងសឹង្ហ និងឋានជើងបាត តំណាងឲ្យការជ្រោមជ្រែងរបស់ប្រជាជនកម្ពុជា និងមន្ត្រីរាជការដែលជាសេនាធិការរបស់រាជរដ្ឋាភិបាល ក្នុងការខិតខំ ប្រឹងប្រែងធ្វើការងារទាញយកភោគផលនៃធនធានធម្មជាតិដើម្បីយកមកអភិវឌ្ឍសង្គមជាតិ។ មានកម្ពស់ ២០ស.ម តំណាងឲ្យឆ្នាំ២០២០ ដែលទទួលបានដំណក់ប្រេងដំបូងរបស់កម្ពុជា។

* ទី៤៖ ក្បាច់កញ្ចាំងភ្លឺភ្លើងលម្អដោយនាគក្បាលបី តំណាងឲ្យតេជះ ភាពចម្រុងចម្រើន សម្បូរសប្បាយ និងតំណាងឲ្យឆ្នាំសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាសម័យកាលដែលទទួលបានដំណក់ប្រេងដំបូងរបស់កម្ពុជា។

* ទី៥៖ និមិត្តរូបរួមនៃដំណក់ប្រេងដំបូងរបស់កម្ពុជា ត្រូវបានប្រសិទ្ធនាមថា បឋមតេលពិន្ទុកម្ពុជា ប្រែថា «ដំណក់ប្រេងដំបូងរបស់កម្ពុជា»។

អង់គ្លេស - តំបន់ Oxfordshire នៃប្រទេសអង់គ្លេស នឹងក្លាយជាតំបន់ហាមជក់បារីនៅឆ្នាំ ២០២៥។ គម្រោងហាមជក់បារីនៅខាងក្រៅភោជនីយដ្ឋាន និងនៅការិយាល័យនឹងត្រូវដាក់ឲ្យអនុវត្ត។ ក្រុមប្រឹក្សាតំបន់មានបំណងកាត់បន្ថយអត្រាជក់បារីក្នុងចំណោមយុវវ័យឲ្យនៅក្រោម ៥%ក្នុងឆ្នាំ ២០២៥ ក៏ដូចជាកាត់បន្ថយអត្រាជក់បារីក្នុងចំណោមអ្នកធ្វើការឲ្យនៅក្រោម ១០% និង ក្រោម ៤% សម្រាប់ស្ត្រីមានផ្ទៃពោះជក់បារី។

ថៃ - អាជ្ញាធរទេសចរណ៍ថៃបានឲ្យដឹងពីបំណងក្នុងការទាក់ទាញភ្ញៀវទេសចរណ៍អន្តរជាតិឲ្យបាន ៣លាននាក់ក្នុងឆ្នាំ២០២១នេះ។ សូមបញ្ជាក់ថាភូកេតនឹងចាប់ផ្តើមទទួលភ្ញៀវនៅថ្ងៃទី១ ខែកក្កដា នេះ ខណៈដែលកោះសាម៉ុយបានបើកទទួលភ្ញៀវរួចហើយសម្រាប់ភ្ញៀវដែលមានលទ្ធផលតេស្តអវិជ្ជមានក្នុងរយៈ៧២ម៉ោង ឬបានចាក់វ៉ាក់សាំងរួច។

សិង្ហបុរី - នាយករដ្ឋមន្ត្រីអូស្ត្រាលីធ្វើទស្សនកិច្ចនៅប្រទេសសិង្ហបុរីនៅថ្ងៃទី១០ ខែមិថុនា ឆ្នាំ២០២១ នេះ ដើម្បីចូលរួមកិច្ចប្រជុំមេដឹកនាំប្រទេសទាំងពីរ។ លោកនាយរដ្ឋមន្ត្រីអូស្ត្រាលីនឹងជួបប្រជុំជាមួយលោកនាយករដ្ឋមន្ត្រីសិង្ហបុរីបន្ទាប់មកនឹងធ្វើសន្និសីទកាសែតរួមគ្នា។ នេះគឺជាកិច្ចប្រជុំលើកទី៦ហើយ។