ថៃ - ជំនួបរវាងលោកស្រីអនុរដ្ឋមន្ត្រីការបរទេសអាមេរិក ជាមួយនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ នៅថ្ងៃទី២ ខែមិថុនា ឆ្នាំ២០២១នេះ បាននិយាយអំពីរឿងវ៉ាក់សាំងកូវីដ១៩។ លោកស្រីបានបញ្ជាក់ថា អាមេរិកមានបំណងផ្តល់វ៉ាក់សាំងកូវីដ១៩ ដល់បណ្តាប្រទេសនានា ដើម្បីឆ្លងផុតពីការរាលដាលជំងឺកូវីដ១៩ ដូច្នេះ គឺត្រៀមរួចជាស្រេចផ្តល់ឲ្យប្រទេសថៃទទួលបានវ៉ាក់សាំងកូវីដ១៩។

វៀតណាម - រដ្ឋមន្ត្រីសុខាភិបាលវៀតណាមបានបញ្ជាក់នៅថ្ងៃពុធ ទី២ ខែមិថុនា ឆ្នាំ២០២១ នេះថា ប្រទេសរុស្ស៊ីយល់ព្រមលក់វ៉ាក់សាំងកូវីដ១៩ Sputnik V ឲ្យវៀតណាមចំនួន ២០លានដូសនៅក្នុងឆ្នាំ២០២១នេះ។ គួរបញ្ជាក់ថា វៀតណាមមានប្រជាជនសរុបប្រមាណ ៩៨លាននាក់។

ថៃ - វ៉ាក់សាំងស៊ីណូវ៉ាក់ និងអាស្ត្រាហ្សេណេកា ចំនួន ១,១លានដូសត្រូវបានចែកចាយចាក់នៅទូទាំងប្រទេស ដែលក្នុងនោះ ភូកេត ចាក់បាន ៣០ម៉ឺនដូសរួចហើយ។ ដោយឡែក ក៏មានវ៉ាក់សាំង ១លានដូសផ្សេងទៀតសម្រាប់ចាក់តែនៅទីក្រុងបាងកកនៅក្នុងខែមិថុនា ឆ្នាំ២០២១។ នេះតាមការបញ្ជាក់ពីក្រសួងសុខាភិបាលសាធារណៈថៃ។

កូរ៉េខាងជើង - បក្សពលករកូរ៉េដែលដឹកនាំប្រទេសកូរ៉េខាងជើងកាលពីខែមករាកន្លងទៅនេះ បានបន្ថែមមុខតំណែងថ្មីគឺលេខាទី 1 ដែលជាតំណែងបន្ទាប់ពីមេដឹកនាំគីម។ តាមអ្នកវិភាគ តំណែងនេះអាចត្រូវបានបង្កើតឡើងសម្រាប់ប្អូនស្រីលោក គីម ជុងអ៊ុន គឺអ្នកនាង គីម យូចុង ដើម្បីរក្សាលំនឹងនៅក្នុងស្ថានការណ៍ចៃដន្យណាមួយរបស់មេដឹកនាំគីម ដូចជាបញ្ហាសុខភាពជាដើម។

វៀតណាម - ក្រសួងព័ត៌មានវៀតណាមបានបញ្ជាក់ថាទិន្នន័យរបស់ពលរដ្ឋដែលបានប្រមូលទាក់ទងទៅនឹងវិធានការប្រឆាំងនឹងកូវីដ19 នៅក្នុងប្រទេសវៀតណាមនឹងត្រូវបានលុបចេញវិញនៅក្នុងរយៈពេលមួយខែ។ គួរបញ្ជាក់ថាខេត្តBac Giang និងខេត្ត Bac Ninh ដែលជាតំបន់មានរោងចក្របរទេសច្រើននោះគឺមានអត្រាអ្នកឆ្លងមេរោគកូវីដ១៩ ខ្ពស់ជាងគេ។

ហ្វីលីពីន - នាយកប្រតិបត្តិក្រុមប្រឹក្សាផ្សព្វផ្សាយទេសចរណ៍ហ្វីលីពីន បាននិយាយប្រជាជនរស់នៅតំបន់ NCR Plus រួមានទីក្រុង Metro Manila, Bulacan, Cavite និង Rizal ទោះបានចាក់វ៉ាក់សាំង ឬមិនបានចាក់ គឺតម្រូវឲ្យធ្វតេស្តរកកូវីដ១៩ សិន មុនធ្វើដំណើរទេសចរណ៍ទៅលេងតំបន់ផ្សេងស្របតាមគោលការណ៍ចត្តាឡីស័កសហគមន៍ថ្ងៃទី១ ដល់១៥ ខែមិថុនា ឆ្នាំ២០២១។

កោះតៃវ៉ាន់ - ទីបញ្ជាការគ្រប់គ្រងជំងឺរាតត្បាតកោះតៃវ៉ាន់ បានឲ្យដឹងថា វ៉ាក់សាំង AstraZeneca និង Moderna ចំនួន ២លានដូសនឹងមកដល់កោះតៃវ៉ាន់មុនដំណាច់ខែមិថុនានេះ។ កន្លងមក កោះតៃវ៉ាន់បានទទួលវ៉ាក់សាំង AstraZeneca ចំនួន ៧២៦.៦០០ ដូសរួចមកហើយ។

ចិន - ប្រទេសចិនបានអនុវត្តគោលនយោបាយ និងវិធានគាំទ្រដល់គូស្វាមីភរិយាឲ្យយកកូនបាន៣នាក់។ ការគាំទ្រឲ្យយកកូនទី៣ នេះ ដោយសារក្នុងឆ្នាំ២០២០ ចិនមានប្រជាជនអាយុ៦០ឆ្នាំឡើងចំនួន ១៨,៧% កើនឡើង៥,៤៤% ធៀបឆ្នាំ២០១០។ គួរបញ្ជាក់ថា ប្រទេសចិនធ្លាប់បានអនុវត្តគោលនយោបាយកូនមួយរាប់ទសវត្សរ៍មកហើយ រហូតដល់ឆ្នាំ២០១៦ ទើបអនុញ្ញាតឲ្យមានកូនពីរនាក់ និងឈានដល់៣នាក់ក្នុងឆ្នាំ២០២១នេះ។

អាមេរិក - ប្រធានាធិបតី ចូបៃដិន បានដាក់ចេញ ខែនៃយុទ្ធនាការ ដោយផ្តល់ស្រាបៀរជារង្វាន់លើកទឹកចិត្តដល់អ្នកចាក់វ៉ាក់សាំង។ បៃដិន មានគម្រោងចាក់វ៉ាក់សាំងដល់មនុស្សពេញវ័យឲ្យបាន ៧០% មុនថ្ងៃបុណ្យឯករាជ្យនៅដើមខែក្រោយ។ បច្ចុប្បន្ននេះ មនុស្សពេញវ័យបានចាក់វ៉ាក់សាំងយ៉ាងតិចមួយដូសមានចំនួន ៦២,៨%។

កម្ពុជា - សម្តេចពិជ័យសេនា ទៀ បាញ់ បានបញ្ជាក់ថា កម្ពុជាអនុញ្ញាតតាមសំណើឱ្យអនុព័ន្ធយោធាអាមេរិក ចុះពិនិត្យមើលកំពង់ផែរាម ដើម្បីឱ្យអស់មន្ទិល។

សំណើចុះពិនិត្យតំបន់រាមនេះ បានធ្វើឡើងបន្ទាប់ពី សារព័ត៌មានមួយចំនួនរបស់សហអាមេរិក នៅតែបន្តវាយប្រហារជាបន្តបន្ទាប់ថា កម្ពុជាបានអនុញ្ញាតឱ្យចិន ដាក់មូលដ្ឋានទ័ពនៅក្នុងប្រទេស នៅតំបន់រាម ខណៈដែលកម្ពុជាបានបំភ្លឺម្តងហើយម្តងទៀតថា ខ្លួនមិនអនុវត្តផ្ទុយពីរដ្ឋធម្មនុញ្ញជាច្បាប់កំពូលរបស់ប្រទេសនោះឡើយ ហើយក៏មិនមានមូលដ្ឋានទ័ពបរទេសនៅក្នុងប្រទេសកម្ពុជាដូចការផ្សព្វផ្សាយបំភ្លៃនោះដែរ។

អ៊ីស្រាអែល - មេបក្សប្រឆាំងលោក យ៊ែរ ឡាពិត បានជម្រាបលោកប្រធានាធិបតីប្រទេសអ៊ីស្រាអែលថាខ្លួនគេអាចមានសម្ព័ន្ធភាពក្នុងបង្កើតរដ្ឋាភិបាលចម្រុះថ្មីបាន ដែលនឹងបញ្ចប់ការកាន់តំណែងរបស់នាយករដ្ឋមន្ត្រី ប៊េនយ៉ាមីន ណេតាន់យ៉ាហ៊ូក្នុងរយៈពេល 12 ឆ្នាំកន្លងនេះ។

លោក យ៊ែរ ឡាពីត បានចងសម្ព័ន្ធភាពជាមួយលោក ប៊េននេត ដែលមកពីគណបក្សមួយទៀត ដើម្បីឈានទៅបង្កើតរដ្ឋាភិបាលថ្មីដោយអោយលោកប៊េននេត ធ្វើជានាយករដ្ឋមន្ត្រីរយៈពេលពីរឆ្នាំដំបូង និងលោកយ៊ែរ ឡាពីត ខ្លួនឯងធ្វើជានាយករដ្ឋមន្ត្រីក្នុងរយៈពេល 2 ឆ្នាំចុងក្រោយនៃអាណត្តិ។

ការបោះឆ្នោតកាលពីខែមីនាកន្លងទៅនេះ គណបក្សរបស់លោក ណេតាន់យ៉ាហ៊ូ បានឈ្នះឆ្នោតប៉ុន្តែលោកមិនមានសំឡេងគ្រប់គ្រាន់នៅក្នុងការបង្កើតរដ្ឋាភិបាលចម្រុះបាន។

ទោះយ៉ាងណាក៏ដោយ សំណើរដ្ឋាភិបាលចម្រុះថ្មីរបស់លោក យ៊ែរ ឡាពីត នឹងត្រូវឆ្លងកាត់សភាដើម្បីរកសំឡេងគាំទ្រភាគច្រើនក្នុងរយៈពេល ៧ ទៅ១២ថ្ងៃទៀត។

អូស្ត្រាលី - ករណីឆ្លងមេរោគកូវីដ-១៩ ប្រភេទ ឌែលតា ដំបូង ត្រូវបានរកឃើញនៅក្នុងរដ្ឋមែលប៊ន ក្នុងរដ្ឋវិចតូរៀ ប្រទេសអូស្តា្រលី។ នេះបើតាមការបញ្ជាក់ពីអាជ្ញាធររដ្ឋវិចតូរៀ។
មេរោគ កូវីដ១៩ ប្រភេទ ឌែលតា នេះមានប្រភពដើមនៅឥណ្ឌា។

បន្ទាប់ពីស្ងប់ស្ងាត់រយៈពេលបីខែមក ការផ្ទុះរាលដាលបានកើតឡើងម្តងទៀតក្នុងរដ្ឋវិចតូរៀ ដែលមានរហូតដល់ ៦៤ករណី ចាប់ពីថ្ងៃទី២៤ ខែឧសភា ឆ្នាំ២០២១ មក។

ម៉ាឡេស៊ី - រដ្ឋមន្ត្រីសុខាភិបាលម៉ាឡេស៊ី បានឲ្យដឹងថា គិតត្រឹមថ្ងៃទី៤ ខែមិថុនា ប្រជាជនម៉ាឡេស៊ី ១.១២២.៤២០នាក់ បានចាក់វ៉ាក់សាំងកូវីដ១៩ ចំនួនពីរដូសរួចរាល់។ ដោយឡែក អ្នកដែលបានចាក់ដូសទី១ រួច ហើយរង់ចាំចាក់ដូសទី២ មានចំនួន ២,២០៨,០១៦នាក់។

បារាំង - បារាំងបានផ្អាកការរួមសហការផ្នែកយោធាជាមួយកងទ័ពម៉ាលី បន្ទាប់ពីមានរដ្ឋប្រហារ ដោយរំពឹងថានឹងមានការផ្ទេរអំណាចទៅឲ្យផ្នែកស៊ីវិលវិញ។

ឥណ្ឌូណេស៊ី - លោកប្រធានាធិបតីឥណ្ឌូនេស៊ីបានឲ្យដឹងថានឹងមានការបើកព្រំដែនទទួលភ្ញៀវទេសចរនៅតំបន់ខ្លះក្នុងខែកក្កដាខាងមុខនេះដូចជាកោះបាលី បាតាម និង បីនតាន។ រដ្ឋាភិបាលនឹងអនុវត្តកម្មវិធីចាក់វ៉ាក់សាំងដល់ក្រុមមនុស្សគោលដៅជាពិសេសអ្នកបម្រើការក្នុងវិស័យទេសចរណ៍។ ក្រៅពីនេះរដ្ឋាភិបាលក៏មានការផ្តួចផ្តើមនូវកម្មវិធីអនាម័យស្អាត សុខភាព សុវត្ថិភាព និងបរិស្ថានល្អសម្រាប់វិស័យទេសចរណ៍នៅទូទាំងប្រទេស។

អាមេរិក - ហ៊្វេសប៊ុក នឹងបិទគណនីរបស់អតីតប្រធានាធិបតីអាមេរិកត្រាំរហូតដល់ឆ្នាំ២០២៣។ ការបិទនេះធ្វើឡើងបន្ទាប់ពីព្រឹត្តិការណ៍លុកលុយវិមានរដ្ឋសភារបស់អ្នកគាំទ្រលោកកាលពីខែមករា ឆ្នាំ២០២១ កន្លងទៅនេះ ដោយចោទលោកត្រាំថាបានញុះញុងឲ្យមានអំពើហឹង្សាតាមហ្វ៊េសប៊ុក ។

នីហ្សេរីយ៉ា - កាលពីថ្ងៃសុក្រកន្លងទៅនេះ រដ្ឋាភិបាលនីហ្សេរីយ៉ាបានប្រកាសថា ខ្លួននឹងបិទបណ្តាញ Twitter នៅក្នុងប្រទេសរបស់ខ្លួន។ ការប្រកាសនេះធ្វើឡើងពីរថ្ងៃបន្ទាប់ពី Twitter បានលុបការផុស tweet របស់ប្រធានាធិបតីនីហ្សេរីយ៉ាចេញពីបណ្តាញខ្លួន។

នីហ្សេរីយ៉ា - អគ្គមេធាវីនីហ្សេរីយ៉ាបានបញ្ជាឲ្យចាប់កាត់ទោសភ្លាមៗចំពោះអ្នកដែលល្មើសបញ្ជារដ្ឋាភិបាលមិនឲ្យប្រើបណ្តាញសង្គម ធ្វីតទើ។ ក្រុមហ៊ុនបណ្តាញទូរស័ព្ទទាំងអស់នៅក្នុងប្រទេសត្រូវបានបញ្ជាឲ្យផ្តាច់បណ្តាញសង្គមធ្វីតទើចេញ។

អាហ្កានីស្ថាន - រថយន្តបំផ្ទុះគ្រាប់បែកមួយបានសម្លាប់មនុស្ស១១នាក់នៅដងផ្លូវមួយនៃប្រទេសអាហ្កាស្ថាន។ ក្រុមមន្រ្តីបានចោទលើក្រុមតាលីបង់។ ក្នុងរយៈពេលបីខែដើមឆ្នាំនេះ មានជនស៊ីវិលអាហ្កានីស្ថាន ១.៨០០នាក់បានស្លាប់ និងរងរបួសនៅក្នុងការប្រយុទ្ធគ្នារវាងអាហ្កានីស្ថាន និងតាលីបង់។