កម្ពុជា - កាមេរ៉ាចាប់ល្បឿន១៤ទីតាំង នឹងដាក់នៅលើដងផ្លូវជាតិលេខ៣ ដើម្បីក្រើនរំលឹកអ្នកបើកបរឱ្យគោរពច្បាប់ចរាចរណ៍។

គម្រោងពង្រីក និងលើកកម្រិតផ្លូវជាតិលេខ៣ ពីភ្នំពេញទៅក្រុងកំពត ដែលមានប្រវែងសរុប ១៣៤.៧គីឡូម៉ែត្រនេះ គិតមកដល់ចុងខែឧសភា ឆ្នាំ២០២១នេះ បានសម្រេចការសាងសង់ ៩៨.០៤%ហើយ។គម្រោងនេះ ត្រូវបានចែកជាពីរដំណាក់កាល៖ ដំណាក់កាលទី១ ពីចោមចៅ (ភ្នំពេញ) ទៅបែកគុស (ខេត្តតាកែវ) ប្រវែង៧០គីឡូម៉ែត្រ ពង្រីកទទឹងតួផ្លូវរហូតដល់ ២៤.៥ម៉ែត្រ ជាប្រភេទផ្លូវបេតុងកៅស៊ូ (AC) កម្រាស់៩សង់ទីម៉ែត្រ ចែកចេញជា៤គន្លង (២គន្លងទៅ២គន្លងមក)។ ដំណាក់កាលទី២ ពីបែកគុសទៅក្រុងកំពត ប្រវែង ៦៤.៨គីឡូម៉ែត្រ ជាប្រភេទផ្លូវAC កម្រាស់ ៧សង់ទីម៉ែត្រ ពង្រីកទទឹងតួផ្លូវ រហូតដល់១២ ម៉ែត្រ ចែកជា២គន្លង។

គម្រោងនេះចំណាយថវិកា សរុបប្រមាណ ២១៩,៩១១,០០០ដុល្លារអាមេរិក ជាហិរញ្ញប្បទានសម្បទានពីសាធារណរដ្ឋ ប្រជាមានិតចិន រួមជាមួយនឹងថវិកាបដិភាគ របស់រាជរដ្ឋាភិបាលកម្ពុជា សាងសង់ដោយក្រុមហ៊ុន សាជីវកម្មស្ពាន និងថ្នល់ចិន, ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន ប្រើប្រាស់រយៈពេលសាងសង់៤៨ខែ៕

ថៃ - វ៉ាក់សាំងកូវីដ១៩ របស់ប្រទេសថៃ ជូឡាកូវ១៩ (ChulaCov19) បានឈានដល់ដំណាក់កាលធ្វើតេស្តលើមនុស្សនៅខែនេះ បន្ទាប់ពីទទួលបានជោគជ័យនៅមន្ទីរពិសោធន៍។ វ៉ាក់សាំងនេះត្រូវបានស្រាវជ្រាវដោយលោកវេជ្ជបណ្ឌិត Kiat Raxrungtham នៅសាកលវិទ្យាល័យជូឡាឡុងកន។

កូរ៉េ - តារាយូធូបដ៏ល្បី ឈ្មោះ Dawn Lee ដែលមានឈ្មោះពិតថា Lee Jung-joo បានស្លាប់បាត់បង់ជីវិតកាលពីថ្ងៃអាទិត្យកន្លងទៅនេះ ដោយសារជំងឺមហារីកគ្រាប់ឈាម ក្នុងវ័យ ៣០ឆ្នាំ។

អន្តរជាតិ - ដើម្បីជៀសវាងការប្រើឈ្មោះប្រទេស ទីកន្លែង ឬប្រជាជនដាក់ឈ្មោះប្រភេទមេរោគកូវីដ-១៩ បំប្លែងថ្មីនោះ អង្គការសុខភាពពិភពលោកបានកំណត់ប្រព័ន្ធដាក់ឈ្មោះដោយយកលំនាំតាមព្យញ្ជនៈក្រិក។ មេរោគកូវីដ-១៩ បំប្លែងថ្មីនៅអង់គ្លេសដែលអ្នកវិទ្យាសាស្ត្រហៅ B.1.1.7 ត្រូវបានកំណត់ឈ្មោះថ្មីថា អាល់ហ្វា (Alpha) ។ មេរោគកូវីដ-១៩ បំប្លែងថ្មីនៅអាហ្វ្រិកខាងត្បូង ដែលអ្នកវិទ្យាសាស្ត្រហៅ B.1.351 ត្រូវបានកំណត់ឈ្មោះថ្មីថា ប៊ែលតា (Belta)។ មេរោគកូវីដ-១៩ បំប្លែងថ្មីនៅឥណ្ឌាដែលអ្នកវិទ្យាសាស្ត្រហៅថា B1.617.2 ត្រូវបានកំណត់ឈ្មោះថ្មីថា ឌែលតា (Delta)។

ថៃ - ជំនួបរវាងលោកស្រីអនុរដ្ឋមន្ត្រីការបរទេសអាមេរិក ជាមួយនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ នៅថ្ងៃទី២ ខែមិថុនា ឆ្នាំ២០២១នេះ បាននិយាយអំពីរឿងវ៉ាក់សាំងកូវីដ១៩។ លោកស្រីបានបញ្ជាក់ថា អាមេរិកមានបំណងផ្តល់វ៉ាក់សាំងកូវីដ១៩ ដល់បណ្តាប្រទេសនានា ដើម្បីឆ្លងផុតពីការរាលដាលជំងឺកូវីដ១៩ ដូច្នេះ គឺត្រៀមរួចជាស្រេចផ្តល់ឲ្យប្រទេសថៃទទួលបានវ៉ាក់សាំងកូវីដ១៩។

វៀតណាម - រដ្ឋមន្ត្រីសុខាភិបាលវៀតណាមបានបញ្ជាក់នៅថ្ងៃពុធ ទី២ ខែមិថុនា ឆ្នាំ២០២១ នេះថា ប្រទេសរុស្ស៊ីយល់ព្រមលក់វ៉ាក់សាំងកូវីដ១៩ Sputnik V ឲ្យវៀតណាមចំនួន ២០លានដូសនៅក្នុងឆ្នាំ២០២១នេះ។ គួរបញ្ជាក់ថា វៀតណាមមានប្រជាជនសរុបប្រមាណ ៩៨លាននាក់។

ថៃ - វ៉ាក់សាំងស៊ីណូវ៉ាក់ និងអាស្ត្រាហ្សេណេកា ចំនួន ១,១លានដូសត្រូវបានចែកចាយចាក់នៅទូទាំងប្រទេស ដែលក្នុងនោះ ភូកេត ចាក់បាន ៣០ម៉ឺនដូសរួចហើយ។ ដោយឡែក ក៏មានវ៉ាក់សាំង ១លានដូសផ្សេងទៀតសម្រាប់ចាក់តែនៅទីក្រុងបាងកកនៅក្នុងខែមិថុនា ឆ្នាំ២០២១។ នេះតាមការបញ្ជាក់ពីក្រសួងសុខាភិបាលសាធារណៈថៃ។

កូរ៉េខាងជើង - បក្សពលករកូរ៉េដែលដឹកនាំប្រទេសកូរ៉េខាងជើងកាលពីខែមករាកន្លងទៅនេះ បានបន្ថែមមុខតំណែងថ្មីគឺលេខាទី 1 ដែលជាតំណែងបន្ទាប់ពីមេដឹកនាំគីម។ តាមអ្នកវិភាគ តំណែងនេះអាចត្រូវបានបង្កើតឡើងសម្រាប់ប្អូនស្រីលោក គីម ជុងអ៊ុន គឺអ្នកនាង គីម យូចុង ដើម្បីរក្សាលំនឹងនៅក្នុងស្ថានការណ៍ចៃដន្យណាមួយរបស់មេដឹកនាំគីម ដូចជាបញ្ហាសុខភាពជាដើម។

វៀតណាម - ក្រសួងព័ត៌មានវៀតណាមបានបញ្ជាក់ថាទិន្នន័យរបស់ពលរដ្ឋដែលបានប្រមូលទាក់ទងទៅនឹងវិធានការប្រឆាំងនឹងកូវីដ19 នៅក្នុងប្រទេសវៀតណាមនឹងត្រូវបានលុបចេញវិញនៅក្នុងរយៈពេលមួយខែ។ គួរបញ្ជាក់ថាខេត្តBac Giang និងខេត្ត Bac Ninh ដែលជាតំបន់មានរោងចក្របរទេសច្រើននោះគឺមានអត្រាអ្នកឆ្លងមេរោគកូវីដ១៩ ខ្ពស់ជាងគេ។

ហ្វីលីពីន - នាយកប្រតិបត្តិក្រុមប្រឹក្សាផ្សព្វផ្សាយទេសចរណ៍ហ្វីលីពីន បាននិយាយប្រជាជនរស់នៅតំបន់ NCR Plus រួមានទីក្រុង Metro Manila, Bulacan, Cavite និង Rizal ទោះបានចាក់វ៉ាក់សាំង ឬមិនបានចាក់ គឺតម្រូវឲ្យធ្វតេស្តរកកូវីដ១៩ សិន មុនធ្វើដំណើរទេសចរណ៍ទៅលេងតំបន់ផ្សេងស្របតាមគោលការណ៍ចត្តាឡីស័កសហគមន៍ថ្ងៃទី១ ដល់១៥ ខែមិថុនា ឆ្នាំ២០២១។

កោះតៃវ៉ាន់ - ទីបញ្ជាការគ្រប់គ្រងជំងឺរាតត្បាតកោះតៃវ៉ាន់ បានឲ្យដឹងថា វ៉ាក់សាំង AstraZeneca និង Moderna ចំនួន ២លានដូសនឹងមកដល់កោះតៃវ៉ាន់មុនដំណាច់ខែមិថុនានេះ។ កន្លងមក កោះតៃវ៉ាន់បានទទួលវ៉ាក់សាំង AstraZeneca ចំនួន ៧២៦.៦០០ ដូសរួចមកហើយ។

ចិន - ប្រទេសចិនបានអនុវត្តគោលនយោបាយ និងវិធានគាំទ្រដល់គូស្វាមីភរិយាឲ្យយកកូនបាន៣នាក់។ ការគាំទ្រឲ្យយកកូនទី៣ នេះ ដោយសារក្នុងឆ្នាំ២០២០ ចិនមានប្រជាជនអាយុ៦០ឆ្នាំឡើងចំនួន ១៨,៧% កើនឡើង៥,៤៤% ធៀបឆ្នាំ២០១០។ គួរបញ្ជាក់ថា ប្រទេសចិនធ្លាប់បានអនុវត្តគោលនយោបាយកូនមួយរាប់ទសវត្សរ៍មកហើយ រហូតដល់ឆ្នាំ២០១៦ ទើបអនុញ្ញាតឲ្យមានកូនពីរនាក់ និងឈានដល់៣នាក់ក្នុងឆ្នាំ២០២១នេះ។

អាមេរិក - ប្រធានាធិបតី ចូបៃដិន បានដាក់ចេញ ខែនៃយុទ្ធនាការ ដោយផ្តល់ស្រាបៀរជារង្វាន់លើកទឹកចិត្តដល់អ្នកចាក់វ៉ាក់សាំង។ បៃដិន មានគម្រោងចាក់វ៉ាក់សាំងដល់មនុស្សពេញវ័យឲ្យបាន ៧០% មុនថ្ងៃបុណ្យឯករាជ្យនៅដើមខែក្រោយ។ បច្ចុប្បន្ននេះ មនុស្សពេញវ័យបានចាក់វ៉ាក់សាំងយ៉ាងតិចមួយដូសមានចំនួន ៦២,៨%។

កម្ពុជា - សម្តេចពិជ័យសេនា ទៀ បាញ់ បានបញ្ជាក់ថា កម្ពុជាអនុញ្ញាតតាមសំណើឱ្យអនុព័ន្ធយោធាអាមេរិក ចុះពិនិត្យមើលកំពង់ផែរាម ដើម្បីឱ្យអស់មន្ទិល។

សំណើចុះពិនិត្យតំបន់រាមនេះ បានធ្វើឡើងបន្ទាប់ពី សារព័ត៌មានមួយចំនួនរបស់សហអាមេរិក នៅតែបន្តវាយប្រហារជាបន្តបន្ទាប់ថា កម្ពុជាបានអនុញ្ញាតឱ្យចិន ដាក់មូលដ្ឋានទ័ពនៅក្នុងប្រទេស នៅតំបន់រាម ខណៈដែលកម្ពុជាបានបំភ្លឺម្តងហើយម្តងទៀតថា ខ្លួនមិនអនុវត្តផ្ទុយពីរដ្ឋធម្មនុញ្ញជាច្បាប់កំពូលរបស់ប្រទេសនោះឡើយ ហើយក៏មិនមានមូលដ្ឋានទ័ពបរទេសនៅក្នុងប្រទេសកម្ពុជាដូចការផ្សព្វផ្សាយបំភ្លៃនោះដែរ។

អ៊ីស្រាអែល - មេបក្សប្រឆាំងលោក យ៊ែរ ឡាពិត បានជម្រាបលោកប្រធានាធិបតីប្រទេសអ៊ីស្រាអែលថាខ្លួនគេអាចមានសម្ព័ន្ធភាពក្នុងបង្កើតរដ្ឋាភិបាលចម្រុះថ្មីបាន ដែលនឹងបញ្ចប់ការកាន់តំណែងរបស់នាយករដ្ឋមន្ត្រី ប៊េនយ៉ាមីន ណេតាន់យ៉ាហ៊ូក្នុងរយៈពេល 12 ឆ្នាំកន្លងនេះ។

លោក យ៊ែរ ឡាពីត បានចងសម្ព័ន្ធភាពជាមួយលោក ប៊េននេត ដែលមកពីគណបក្សមួយទៀត ដើម្បីឈានទៅបង្កើតរដ្ឋាភិបាលថ្មីដោយអោយលោកប៊េននេត ធ្វើជានាយករដ្ឋមន្ត្រីរយៈពេលពីរឆ្នាំដំបូង និងលោកយ៊ែរ ឡាពីត ខ្លួនឯងធ្វើជានាយករដ្ឋមន្ត្រីក្នុងរយៈពេល 2 ឆ្នាំចុងក្រោយនៃអាណត្តិ។

ការបោះឆ្នោតកាលពីខែមីនាកន្លងទៅនេះ គណបក្សរបស់លោក ណេតាន់យ៉ាហ៊ូ បានឈ្នះឆ្នោតប៉ុន្តែលោកមិនមានសំឡេងគ្រប់គ្រាន់នៅក្នុងការបង្កើតរដ្ឋាភិបាលចម្រុះបាន។

ទោះយ៉ាងណាក៏ដោយ សំណើរដ្ឋាភិបាលចម្រុះថ្មីរបស់លោក យ៊ែរ ឡាពីត នឹងត្រូវឆ្លងកាត់សភាដើម្បីរកសំឡេងគាំទ្រភាគច្រើនក្នុងរយៈពេល ៧ ទៅ១២ថ្ងៃទៀត។

អូស្ត្រាលី - ករណីឆ្លងមេរោគកូវីដ-១៩ ប្រភេទ ឌែលតា ដំបូង ត្រូវបានរកឃើញនៅក្នុងរដ្ឋមែលប៊ន ក្នុងរដ្ឋវិចតូរៀ ប្រទេសអូស្តា្រលី។ នេះបើតាមការបញ្ជាក់ពីអាជ្ញាធររដ្ឋវិចតូរៀ។
មេរោគ កូវីដ១៩ ប្រភេទ ឌែលតា នេះមានប្រភពដើមនៅឥណ្ឌា។

បន្ទាប់ពីស្ងប់ស្ងាត់រយៈពេលបីខែមក ការផ្ទុះរាលដាលបានកើតឡើងម្តងទៀតក្នុងរដ្ឋវិចតូរៀ ដែលមានរហូតដល់ ៦៤ករណី ចាប់ពីថ្ងៃទី២៤ ខែឧសភា ឆ្នាំ២០២១ មក។

ម៉ាឡេស៊ី - រដ្ឋមន្ត្រីសុខាភិបាលម៉ាឡេស៊ី បានឲ្យដឹងថា គិតត្រឹមថ្ងៃទី៤ ខែមិថុនា ប្រជាជនម៉ាឡេស៊ី ១.១២២.៤២០នាក់ បានចាក់វ៉ាក់សាំងកូវីដ១៩ ចំនួនពីរដូសរួចរាល់។ ដោយឡែក អ្នកដែលបានចាក់ដូសទី១ រួច ហើយរង់ចាំចាក់ដូសទី២ មានចំនួន ២,២០៨,០១៦នាក់។

បារាំង - បារាំងបានផ្អាកការរួមសហការផ្នែកយោធាជាមួយកងទ័ពម៉ាលី បន្ទាប់ពីមានរដ្ឋប្រហារ ដោយរំពឹងថានឹងមានការផ្ទេរអំណាចទៅឲ្យផ្នែកស៊ីវិលវិញ។