Ko’kda hilpirar mag’rur , O’zbekiston bayrog’i

Dillarga solar g’urur, O’zbekiston bayrog’I

“O’z bayrog’im ” deb xalqim, Dilda qilar iftixor

Undagi har bir rangning, O’z ramzi, ma’nosi bor.

Bayrog'imiz har doim samolarda hilpirab tursin! Bayrog'imiz qabul qilingan kun muborak bo'lsin!

@pmtests

Tanqidiy fikrlash asosi qayerda va u qanday kelib chiqdi...

Bugun tanqidiy fikrlash tarixi va uning rivojlanish bosqichlari haqida ma’lumot qidirdim. Manbalarda bu fan 20-asrga (1910) tegishli ekanligi va fan sifatida vujudga kelganiga (1980) hali yarim asr ham bo’lmagani yozilgan edi.

Ammo bizning bobolarimiz bu fanning ustasi bo’lgani, tanqidiy fikrlashda Imom Buxoriy va ibn-Sinolar peshqadam bo’lganligini bilganim bois bu ma’lumot meni qoniqtirmadi. Keyinroq yana bir ajoyib ingliz tilidagi maqolaga duch keldim. Unda tanqidiy fikrlash asoslarini muqaddas kitobimiz Qur’oni Karim belgilab berganligi yozilgan ekan. Eng yomon odam fikr yuritmaydigan odam ekanligi va fikr yuritgan odamlargina najotga erishishi bizning Kitobimizda yozilgan ekan. Bu fan asosi bizga tegishli va shuning uchun bobolarimiz aql yuritish borasida boshqalardan ustun bo’lishgan ekan. Hozir maqola havolasini tashlayman. Keyinroq qisqacha mazmunini yozishga harakat qilamiz!

https://lampofislam.wordpress.com/2017/10/30/the-quran-calls-for-critical-thinking-and-reasoning/

#dolzarb: Insonning vaqti oltindan qimmat va uni kuttirishga hech kimning haqqi yo'q!

Kecha bir nechta postlarni o'qib menda bir qancha mulohazalar paydo bo'ldi. (t.me/xushnudbek/12146). Biz vaqtimizni qiymatini shu qadar past baholaymizki, natijada ko'p narsalardan mahrum bo'lamiz. Har bir bekor o'tgan soniyalar agar foydali ishlarga, ilmga sarflansa mamlakat gullab yashnaydi. Ammo ilmga va vaqtning qadriga e'tibor berilmasa natija juda yomon bo'ladi. Hozir ikki mamlakat haqida so'z yuritamiz.

Bolam, biz agar aqlimizni ishga solmasak, vaqtdan unumli foydalanib o’qimasak, och qolib o’lamiz!! (Yaponiya)

Yaponiya deyarli hech qanday neft yoki tabiiy gazga ega bo'lmagan orol-mamlakat. Uning yerlari ham unumdor hisoblanmaydi. Unda faqat guruch yetishtirish mumkin. Ammo qishloq xo’jaligi mahsulotlari aholisining 30 %ining ham iste’moliga yetmaydi.

Yapon xalqi yosh avlodga yurti haqida shunday deydi: “Bolalarim biz bir kambag’al o’lkada yashaymiz. Bizda tabiiy boyliklar juda kam. Agar sizlar o’qib boshqalardan bilimliroq bo’lmasangiz, biz eng kambag’al xalqqa aylanamiz. Xatto och qolamiz. Sizlar boshqa xalqlardan orqada qolmasligimiz uchun harakat qilinglar!” Shuning uchun yapon bolalarining ta’limga munosabati o’zgacha. Yaponiyada hatto oziq-ovqat do'konlarida jurnallar va kitoblar sotiladi.

Bugungi kunda yaponiyada deyarli kambag’al aholi yo’q. Farovonlik darajasi bo’yicha dunyoda eng yuqori o’rinlarda. Gaz, svet, internet va iste’moldagi boshqa xizmatlarda kunlik kechikish yoki uzulishlar yo’q hisobida. Atiga bir necha soniyalarga to’g’ri keladi. Temir konlariga ega bo’lmasa ham eng ko’p mashina va robototexnikalar yaponiyada ishlab chiqariladi. Eng arzon va sifatli mashinalar birinchi navbatda yapon xalqi uchun ishlab chiqariladi. Yaponiyada jamoat transporti va poyezdlar 1 daqiqadan ko’p kechikmaydi. Insonning vaqti oltindan qimmatligi, uni kuttirishga hech kimning haqqi yo’qligi asosiy tamoyil hisoblanadi.
____________________________

Bolam, biz juda ham ko’p yerosti va yerusti boyliklarga ega betakror, jannatmakon yurtda yashaymiz! (O'zbekiston)

O‘zbekiston tabiiy boyliklari ko’p va xilma-xil bo’lgan mamlakat. Gaz qazib olish bo’yicha dunyoda 13-o’rinda, Oltin qazib olish bo’yicha dastlabki 10 talikda. Yerlari hosildor va mamlakat aholisini to’liq oziq-ovqat bilan ta’minlashi mumkin.

Bu boyliklar haqida maktabga o’quvchilarga ham ma’lumot beriladi. O’quvchilarga bizning hamma narsamiz borligi: gazimiz, neftimiz, hosildor yerlarimiz, mashina ishlab chiqaradigan zavodimiz borligi aytiladi. Ammo o'quvchilarga boshqa xalqlardan ustun bo’lishimiz uchun bu boyliklar yetmasligi haqida kam gapiriladi.

Bugungi kunda O’zbekiston aholi jon boshiga daromad bo’yicha dunyoda 173-o’rinda bo’lib, dunyoning eng kambag’al 50 ta davlatidan biri hisoblanadi. Dunyoda o’rtacha daromad kishi boshiga yillik $11 000 bo’lsa, O’zbekistonda atigi $1 750. O’zbekiston gaz ishlab chiqarish bo’yicha dunyoda yetakchi mamlakatlardan biri bo’lishiga qaramay aholi qish kunlarida gaz yetishmasligidan qiynaladi. Elektrdagi uzulishlar sabab qishloq hududlarida ishlab chiqarish rivojlanmagan va aholi chet elda arzon ishchi sifatida ishlashga majbur bo’lmoqda. Yurtimizda ishlab chiqariladigan mashinalar narxi nisbatan qimmat. Viloyatlarda mashinaga gaz quyish ham vaqt oladi. Gaz yetishmovchiligi sabab gaz zapravkalariga cheklovlar qo’yilgan. Natijada mashina gazini to’ldirish uchun 1 soatdan 4 soatgacha navbat kutish holatlari kuzatiladi. INSONNING VAQTI OLTINDAN QIMMAT VA UNI KUTTIRISHGA HECH KIMNING HAQQI YO’Q TAMOYILI borligini bilishimizga shubham bor.

Yoshlar shuni bilishi kerak-ki, agar biz yaxshi o’qimasak dunyodagi eng qoloq xalqlardan biri bo’lib qolaveramiz. Bobolarimiz egallagan cho’qqiga chiqishimiz kerak. O’qib ilm olmasak, o’zimizning gazdan ham foydalana olmaymiz. Boshqa xalqlarga arzon narxlarda xizmat qilib, qul bo'lib yuraveramiz. Ammo agar yaxshi o’qisak, ilm olishda musobaqa qilsak, dunyodagi haqiqatan ham eng betakror va jannatmakon yurtga aylanishimiz mumkin. Zero, ilmdan boshqa najot yo’q va bo’lmagay!!!

@PMTESTS jamoasi