#xalqaro_hamkorlik
#Xitoy_safari

🤩 Avval xabar berilganidek, Ixtisoslashtirilgan ta’lim muassasalari agentligi rahbariyati va masʼul xodimlaridan iborat delegatsiya Xitoy Xalq Respublikasining Pekin shahrida qator yetakchi ta’lim muassasalari bilan hamkorlik aloqalarini yoʻlga qoʻyish, tajriba almashish kabi masalalari yuzasidan muzokaralar olib bormoqda.

Tashrif doirasida Agentlik delegatsiyasi “Beijing Guangqumen” oʻrta maktabida bo‘lib, zamonaviy infratuzilma, ilg‘or o‘quv dasturlari va sun’iy intellektni o‘quv jarayoniga integratsiya qilish bo‘yicha olib borilayotgan ishlar bilan tanishdi. Ushbu maktab 2025-yildan boshlab ta’lim jarayonini sun’iy intellektga moslashtirishni boshlagan ilk taʼlim muassasalaridan sanaladi. Hozirgi kunda maktabda 5700 nafar o‘quvchi tahsil olmoqda.

Shuningdek, Agentlik vakillari Pekin shahridagi nufuzli “Fangcaodi” xalqaro boshlang‘ich maktabiga ham tashrif buyurdi. Xitoy tilini xorijiy til sifatida oʻqitishida koʻp yillik tajribaga ega mazkur xalqaro maktabda 60 ta davlatdan 400 dan ortiq xorijiy o‘quvchilar va 1200 nafar mahalliy o‘quvchilar tahsil olmoqda. Tashrif davomida delegatsiya maktabda Misr madaniyatiga bag‘ishlab o‘tkazilayotgan haftalik tadbirlarda ishtirok etdi hamda xorijiy o‘quvchilarga mo‘ljallangan xitoy tili darslarini kuzatdi.

Agentlik direktori Alisher Ubbiyev va “Fangcaodi” xalqaro boshlang‘ich maktabi rahbariyati o‘rtasida boʻlib o‘tgan uchrashuvda boshlang‘ich sinflarda xitoy tilini xorijiy til sifatida o‘qitish tajribasi almashinuvi, qisqa muddatli o‘quvchi va o‘qituvchilar almashinuvi dasturlarini joriy etish hamda hamkorlikda xitoy tilini o‘qitish bo‘yicha dastur ishlab chiqish kabi masalalar muhokama qilindi.

Agentlik delegatsiyasining Xitoyga safari davom etmoqda.

Telegram | Facebook | Instagram | YouTube