...

...حصيلة

...

مراجعة ختامية نووي

اهم الاسئلة النظرية

نصائح ميكانيك

..

إن اصبت فمن الله وإن اخطأت فمن نفسي و الشيطان

هذا ماوفقني الله اياه هذا العام

بالتوفيق والسداد في امتحانكم

ركزو في كل سؤال واعلمو انا سبب فساد أيا شيء هو التسرع و القلق

فاحذور فالخلط بين الموضوعين 🔪 خاصة الفيزياء

رب يرزقكم الصواب فالجواب ، اكثرو من هذا الوعاء " رب ادخلنا ندخل صدق واخرجنا مخرج صدق واجعل لنا من لدنك سلطانا نصيرا "

ركزو فالاشاررات

شوفو المعلم و الشعاع كيفاش راهم جايين ماشي قذيفة برك ثاني فالسقوط اذا قالك نرمي للاعلى ...الخ

السلام عليكم

كل واحد لحق لهاذ النهار، قرا عام كامل رغم الصعاب و المعرقلات والغلطات لي يديرهم ويتعلم منهم،
وفوت الأسبوع تع الاختبارات كامل وفي كل ليلة يعاود ينوض ويراجع مادة الغد وينسا لي فات على صعوبة نسيانه
_ ولحق وين كمل الفلسفة عشية حتى الستة وهو يكتب ويستذكر فيما حفظ ..

كل واحد لحق لهنا راك ناجح نجح في التحدي لي كان مقابلو و مهمته تمت مئة بالمئة ما تستناوش نهار النتيجة باش تفرحو برأيي ماهوش ال site لي يقلك يلا نجحت ولا مانجحتش،

اليوم أنتم ناجحين وأنا فخور فيكمم جميعا

السلام عليكم ورحمة الله وبركاته

الحمد لله الذي وفقني لفتح هذه القنوات وعلى مساعدتكم طوال هذه السنة الجميلة ولو بمعلومات بسيطة او بنصائح صغيرة

كنت اسعى دوما ان تكون هذه القنوات شاملة وغنية عن اي مصدر آخر والحمد لله اني اجتهدت فيها كل الاجتهاد لكي اساعدكم وهذا من فضل الله

في عام الباك كنت نتمنى واحد هكذا يجي يعاوني كما كنت نعاون فيكم
يجي يقلي هذا التمرين فيه فكرة صحو
هذي مقالة فيها حجج مليحة احفظها
هذي الموضوع شامل راجع بيه
فمنذ ذلك الوقت قررت ان اكون ذلك الشخص لبعض طلاب البكالوريا والحمد لله حققت حلمي وساعدتكم بكل مالدي وكنت اجتهد لجمع مصادر المتفوقين ونصائحهم وكل ماينفعكم وكان ذلك أحيانا يكلفني ان اضحي براحتي بدراستي لعدة اشياء ولم اندم على ذلك يوما والله الحمد لله

كاين العديد من لي نعرفهم قالولي راك فتحت هذو القنوات غير مضيعة الوقت ومكانش لي يستفاد لكن الحمد لله يكفيني اجر نيتي ويوجد العديد منكم كانت قنواتي اول مصدر له فالدراسة والحمد لله

الحمد لله اني تعرفت على افضل الناس من خلال هذه القنوات وهذا مازادني اجتهادا فيهم
فيوجد منكم العديد من يعرفني بالاسم او من يعرفني هكذا فقط ومنكم من لا يعرفنني لكن الحمد لله الشيء المعروف هو انو حابلكم الخير كامل وحابكم تنجحو وهذا يكفي ، رب يقدرني كشما نعاونكم مستقبلا

تجربة هذه السنة كان فيها نوع من الفرح خاصة عندما تصلني تلك الادعية والرسائل الجميلة
ونوع من الحزن خاصة انو البعض ممكن لم تكن تجربتي معهم جيدة وذلك لطبيعتهم المغايرة لأنو مش جميع الناس يحبو ناس يعاونهم ومش الناس كامل تقدّر الخير فهناك من شتمني ومن حظرني ومن اساء لي وظلمني فاكتفيت بان اتوكل على الله وامضي ولم أقل كلمة عتاب ولله الحمد

الحمد لله فات عام كامل برمشة العين والعاقبة لفرحة النتائج يارب

الصلة بينكم وبين الباك هو الدعاء فلا تبخلو على أنفسكم وادعوه اناء الليل واطراف النهار (رب يقدركم )

واوصيكم بطاعة الله +++ لأن النفس امارة بالسوء فإن لم تشغلها بالطاعة شغلتك بالمعصية وحاولو استغلال وقتكم بما يفيدكم فالدنيا والاخرة خاصة في حفظ القرآن ، التفقه فالدين ...الخ

واعتذر عن اي تقصير بدر مني وعن اي تأخر لأنو ربي سبحانو برك عارف ظروفي فقط ومثال ذلك البارحة فقط توفت عمتي رب يرحمها برحمته الواسعة وبالرغم من ذلك لم اتوقف عن المساعدة للحظة ولله الحمد (ادعولي وادعولها من فضلكم )

مع السلامة 👍

السلام عليكم ورحمة الله وبركاته

السلام عليكم ورحمة الله وبركاته

ان شاء الله راكم بخير واخباركم مليحة

جيت حبيت نبهكم على شيء جد مهم وهو الافراط في القلق على الباك ، والله راني حاس بيكم وعارف مقدار الحيرة والالم الذي يعتريكم (انا وراني حاير معاكم ) ، خاصة هذوك لي قراو +++ وماخدموش كما حابين ولا هذوك لي دارو اخطاء تافهة وغلطو في اسئلة كانو يعرفوهم ...الخ (قدر الله وماشاء فعل و الخير فيما اختاره الله )

هي مانيش طالب منكم ماتحيروش ولا ماتتقلقوش لا حاشى ، لأنو علبالي هذا شيء فوق قدرتكم
مي راه كاين فيكم هذا القلق ادى بيه انو يخاصم والديه ولا اخوته ولا صحابو سبب راه متألم على الباك

الله غالب كون جا في القلق تاعك فائدة وبيه راح تدي لباك ، ارواح ليا نتقلقو كيف كيف مي والله حاجة ما راح تتغير وزيد راكم حايرين على حاجة غيبية لأنو كاين الاف الناس ماخدموش وفالتالي جابو مليح
لانو التصحيح جد متساهل ومتعاون وقادر المصحح يتغاضى عن اخطاءك وهكذا ...الخ
يعني في وقت القلقة هذي من الاحسن تدعوا ربي وتتقربو منو

انا الشيء لي غايضني أكثر هو كي راكم بعاد على عائلتكم ونقولو رانا متقلقين مش حابين نحكو مع حتى واحد ...الخ

أيا تخيل كون غدوة تصبح على وفاة الاب تاعك لي كان حاب يحكي معاك كلمة وانت كنت عابس في الوجه تاعه ؟؟ ولا على وفاة صاحبك ولا أي واحد تحبو ،
والله تزيد تغيضك اكثر وتقعدلك حرقة

بالمختصر ماتعطووش لحاجة غيبية اكثر من حقها
وكل دقيقة راكم تضيعو راه رايحة من العمر تاعكم برك ونتما لي راكم خاسرين
حاولو تتهلاو في والديكم وخاوتكم ولي يحبولكم الخير لأنو كما شايفين كثرت موت الغفلة والله المستعان

ورب يكون في عونكم ويجبر بخاطركم ويعطيكم من الخير ماتتمنون 🤲🤲