Falcon 9 B1071.6 1-сатысы LZ-4 қону алаңына қонды. Бір ай ішінде осымен үшінші саты құрлыққа қондырылып отыр

SWOT жерсерігінің 2-сатыдан ажырауы

2022 жылғы 58-ші, компания тарихындағы 200-ші ұшырылым
17 желтоқсан 04:48. Канаверал, SLC-40. SES O3b mPOWER 1 & 2 миссиясы — SES компаниясының екі дана O3b mPOWER байланыс жерсерігін орта жермаңы орбитаға шығару

Falcon 9 B1067.8 1-сатысы ASOG платформасына қонды

«КӨК МӘРМӘР-2022»

2022 жылы 7 желтоқсанда DSCOVR жерсерігіндегі EPIC камерасы «Көк мәрмәр» тарихи фотосының 50 жылдығы құрметіне оны қайта түсірді.

АҚШ Мұхит пен атмосфераны зерттеу ұлттық басқармасының (NOAA) DSCOVR аппараты Күн—Жер жүйесінің L1 Лагранж нүктесінде. Күн мен Жердің арасында, планетамыздан 1,5 млн километрде орналасқан DSCOVR күн желін үздіксіз бақылап тұр. Күн тәжінен атылған зарядталған бөлшектер ағыны оған бір сағат бұрын жететіндіктен, DSCOVR Жерге магнит дауылы жайлы алдын-ала ескерту береді.

Ал оның бортындағы НАСА-ның EPIC камерасы Жердің күнгей бетін әр екі сағат сайын суретке түсіріп тұрады. Солардың кейбірін келесі роликтен көре аласыздар.
#фотокөрме

АРИЗОНА ҮСТІНДЕГІ ГЕМИНИДАЛАР

Аризона штаты үстіндегі Геминидалар метеор ағыны, 14 желтоқсан 2022 жыл. 35 кадрдан жасалған құрама кескін.
Фото авторы: Джон Эшли

Союз МС-22 ғарыш кемесіндегі салқындату жүйесі құбырын дәл осы ағынның бір қиыршығы тескен деген болжам бар. Жер Геминидаларды туғызатын 3200 Фаэтон денесінен қалған қалдықтар жолағын желтоқсанның ортасында басып өткен еді. Кеменің аспаптық-агрегаттық бөлімі, экипаж капсуласындай емес, метеориттен қорғайтын қабатпен қапталмайды.

2022 жылғы 59-шы ұшырылым (36 сағат ішіндегі 3-ші!)
18 желтоқсан 00:32. КҒО, LC-39A. Starlink 4.37 миссиясы — 54 дана Starlink v1.5 интернет-жерсерігін төмен жермаңы орбитаға шығару
B1058 нөмірлі 1-саты 15-ші рет қолданылып отыр — жаңа рекорд 🏆

Falcon 9 B1058.15 1-сатысы JRTI платформасына қонды

LUSAIL STADIUM ҒАРЫШТАН

Футболдан 2022 жылғы FIFA Әлем Кубогының шешуші ойыны өтетін Қатардағы Lusail стадионы SpaceWill компаниясының SuperView-1 жерсерігінің көзімен. Финал 18 желтоқсанда, Алматы уақытымен 21:00-де басталады.

SuperView-1 — жер бетін 50 см ажыратыммен түсіретін төрт жерсеріктен тұратын топтама. Ал компанияның SuperView NEO-1 қос жерсерігі 30/50 см ажыратымдағы кескіндер алады.

Фото: SpaceWill

МЕТАН ЗЫМЫРАНЫНЫҢ АЛҒАШҚЫ ОРБИТАЛЫҚ ҰШЫРЫЛЫМЫ СӘТСІЗ БОЛДЫ

Метан жағатын зымыранды тарихта алғаш рет орбитаға шығару әрекеті сәтсіз аяқталды. Метан керосинге балама зымыран отыны ретінде көптен бері қарастырылып келеді (тотықтырғыш рөлін оттегі атқарады). Ол ұшырылым құнын арзандатып, қозғағыштарды көп мәрте қолдануды оңайлатады. Сондай-ақ метанды Марста да өндіруге болады — бұл, әрине, алыс болашақтың ісі.

Сол себепті SpaceX, ULA, Rocket Lab, Роскосмос сияқты зымыран өндірушілер метанмен ұшатын тасығыштарын жасап жатыр. Дегенмен осы уақытқа дейін метан зымыранының көтерілген ең жоғары биіктігі 10 километр еді (Raptor қозғағышы орнатылған Space Starship SN15 прототипі).

Қытайлық Landspace компаниясы да өзінің ZhuQue-2 зымыранын метан бәйгесіне қосты. Ұзындығы 49,5 м, диаметрі 3,5 м екі сатылы зымыран 200 км төмен жермаңы орбитаға 6 т, 500 км гелиосинхрон орбитаға 4 т шығара алады. Ол марштық TQ-12 және маневрлік TQ-11 метан-оттегі қозғағыштарымен жарақтанған.

ZhuQue-2 2022 жылы 14 желтоқсанда Гоби шөліндегі Цзюцюань ғарыш айлағынан алғаш ұшырылды. Бірінші саты өз міндетін орындады, алайда ұшудың 300-ші секундында екінші сатының маневрлік қозғағыштарының қосылмай қалуы сәтсіздікке ұрындырды. Зымыран жоспарлы орбитаға шыға алмады. Екі сатыдағы марштық қозғағыштар мінсіз жұмыс істегенін айтқан жөн.
#ҚытайҒарышта

Фото: Landspace

УЭББ ТЕЛЕСКОПЫ ЖҰМЫСЫНЫҢ БАСТАЛУЫ — 2022 ЖЫЛДЫҢ БАСТЫ ҒЫЛЫМИ ТАБЫСЫ

Әр желтоқсанның ортасында, Science журналы аяқталатын жылдың бір басты және тоғыз маңызды ғылыми жетістігін атайды. 2022 жылдың басты ғылыми табысы болып Джеймс Уэбб ғарыштық телескопының (JWST) іске қосылуы танылды. Жасалуына ширек ғасыр уақыт пен 10 миллиард доллар кеткен обсерватория 2021-дің 25 желтоқсанында, яғни былтырғы тізім жарияланғаннан кейін ұшырылды.

Уэбб биыл қаңтарда жұмыс орнына — Күн—Жер жүйесінің екінші Лагранж нүктесіне — жетті. Алты айға созылған сынақ және баптау жұмыстарынан соң, телескоп 11 шілдеде ресми түрде ғылыми жұмысқа кірісті. Уэббтың ұшырылғаннан бастап, қазіргі қызметіне дейінгі ауқымды жылнамасы біздің арна мен парақшада жарияланып тұрды.

#2022жыл

Арнамыздағы Уэбб телескопына жалпы шолу жасайтын бейнероликтер арнайы ойнату тізіміне топтастырылған. Соның ішінде телескоптың оптикалық жүйесі, яғни айналары жайлы әңгімелейтін роликті көруге кеңес беремін, небәрі 80 рет қаралған екен. Күнделікті жарияланған жаңалықтар лентаның тереңінде сұраусыз, іздеусіз қалып кететіндіктен, солардың маңызды дегендерін жеке ролик түрінде шығару жоспарда бар. Ондай үрдістің мысалын арнамыздағы Хаббл телескопы, басқа да аппараттар жайлы плейлистерден табасыз.

https://youtube.com/playlist?list=PLZ7VcZmjdxtyFeCfAASyMVJJWegr7od4q