ЕКІ РЕТ ҚОЛДАНЫЛҒАН NEW GLENN 1-САТЫСЫ ПОРТТА

Екінші рет ұшып келген Never Tell Me The Odds 1-сатысының Jacklyn баржасымен Канаверал портына жеткізілуі, 22 көкек 2026 жыл. Үдеткіштің тазалығы көзге түседі, өйткені Blue Origin New Glenn зымыранының бірінші сатысы керосин емес, метан жағады.

BLUE ORIGIN ДЕ ЖҮКТЕМЕ ҚАҚПАҚТАРЫН ҚАЙТА ҚОЛДАНБАҚ

New Glenn зымыранының 1-сатысын екі рет сәтті қондыра алған Blue Origin компаниясы енді жүктеме қақпақтарын да қайта қолданбақ. NG-3 миссиясына қатысқан қақпақтарға бағдарды бақылау қозғағыштары орнатылған екен. Солардың көмегімен қақпақтың атмосфераға енуі бақыланады. Компания жиналған ақпаратты пайдаланып, қақпақтарды парашютпен суға жұмсақ қондырып үйренуді жоспарлап отыр. Ал мына қақпақтардың сынықтары судан ауланып, кемемен Канаверал портына жеткізілді.

ЖАҢА NEW GLENN 1-САТЫСЫ ҰШУҒА ДАЙЫНДАЛУДА

New Glenn зымыранының "No, It's Necessary" атты жаңа 1-сатысы Blue Origin зауытынан Флоридадағы LC-36 ұшыру алаңының ангарына әкелінді 🚜🚀

New Glenn зымыранының әзірге үш 1-сатысы жасалды:
GS1-7E01 So You're Telling Me There's a Chance — NG-1 миссиясы, баржаға қона алмай қирап қалды
GS1-7E02 Never Tell Me The Odds — NG-2, NG-3 миссиялары, екі рет сәтті қонды
GS1-7E03 No, It's Necessary

160 ЖЫЛ БҰРЫН СОЛТҮСТІК ТӘЖДЕГІ ҚАЙТАЛАМА ЖАҢА ЖАНДЫ

Осыдан 160 жыл бұрын, 1866 жылғы 12 мамырда көптеген астрономдар Солтүстік Тәж шоқжұлдызынан жарық жаңа жұлдызды байқады. Жарқырауы 2-ші жұлдыздық шамаға жеткен шырақ осы шоқжұлдыздың альфасы — Геммадан (басқа аты Альфекка, 2,25m) асып түсті! Жұлдызға Солтүстік Тәждің Жаңасы деген ат қойылып, ол T әрпімен белгіленді.

1946 жылғы 9 ақпанда Амур теміржолының жол қараушысы Алексей Каменчук Солтүстік Тәж Т жұлдызының келесі жарқылын көріп, Пулково обсерваториясына хабарлады. T CrB сондай-ақ 1787 жылы жарқырады деген қуатталмаған дерек бар.

Солтүстік Тәждегі T қайталама жаңа жұлдыздар класына жататындықтан, шамамен 80 жыл сайын күрт жарқырап тұрады деп болжанады. Сол себепті, астрономдар оның кезекті жарқылын биыл күтіп отыр. Солтүстік Тәждегі T-ның қалыпты жарқырауы 10 ж.ш., сондықтан жай көзбен көрінбейді. Ал ол жарқыраған кезде Солтүстік Тәж шоқжұлдызында бірнеше күн көрінетін жаңа жұлдыз пайда болады.
#жаңажұлдыз

STARSHIP V3 ҰШУҒА ДАЙЫН

Техастағы Starbase ғарыш айлағында Starship V3 аса ауыр зымыран жүйесінің старталды репетициясы өткізілді. Оның аясында Мехазилла қолдарын старт жағдайына келтіру, кеменің қанаттарын сынау, SH B19 үдеткіші мен Starship S39 кемесіне толық отын құю мен стартқа дейінгі кері санақ пысықталды. WDR-тесттің жылдамдығын атап өткен жөн: 5000 тоннадан астам отын мен тотықтырғышты бактарға құюға небәрі жарты сағат кетті.

Осымен Старшиптің 12-ші ұшу сынағына дайындық аяқталды. SpaceX компаниясы стартты 19 мамыр, 17:30-ға (Қазақстанда 20 мамыр, 3:30) белгілеуі мүмкін. Жалпы ұшу терезелері 20–23, 27–29 мамыр күндері біздің уақытпен 3:30-да ашылады.
#жұлдызкеме