POLARIS DAWN МҮШЕЛЕРІ АШЫҚ ҒАРЫШҚА ОЙДАҒЫДАЙ ШЫҚТЫ

Сонымен, 2024 жылғы 12 қыркүйекте Polaris Dawn миссиясына қатысушылар ашық ғарышқа шықты. Алдымен Crew Dragon Resilience кемесінің ішіндегі қысым біртіндеп төмендетіліп, ақыры нөлге дейін түсті. Сөйтіп экипаждың төрт мүшесі де салмақсыздықта әрі вакуумда, яғни ашық ғарыш жағдайында болды. Бұл де өзінше тарихи оқиға 🏆 Кезінде Спейс Шаттлдың үш бірдей ғарышкері ашық ғарышқа шығып, жерсерікті ұстап алуға тырысқан еді. Ал ХҒС-тан сыртқа бір мезгілде екі адамнан шығады.

Polaris Dawn астронавтарының скафандрындағы қысым қалыпты атмосфералық қысымның 32%-тейіндей болды. Бұл олардың тыныстауына зиян тигізбеді, өйткені скафандр ауамен емес, таза оттегімен толтырылғандықтан, жұтылатын оттегі мөлшері кемімеді.

Кеменің тұмсығындағы қақпақ орбитаға шығысымен-ақ ашылған еді. Ал командир Джаред Айзекман ішке қарай серпілетін ішкі люкті ашты. Біраздан соң ол басқыш арқылы белуардан кеме сыртына шықты. Оны қақпаққа орнатылған шам жарықтандырып, камералар түсіріп тұрды. Джаред сыртқа шыққанда, кеме 737 км биіктікте болатын. Apollo астронавтарының Ай бетіндегі саяхаты мен қайтар жолда ашық ғарышқа шыққандарын санамағанда, адам баласы ешқашан мұндай биік жермаңы орбитада ашық ғарышқа шықпаған! 🏆

Командир ішке енгеннен кейін, екінші болып Сара Гиллис жартылай тысқа шықты. Бұл кезде кеме Жердің түнгі жағына өтіп, планетамыз көрінбей қалды. Тынық мұхит үстінде кемемен байланыс болмай, Сараның қайта кіруі мен люктің жабылғанын да көрмедік.

Бірінші рет ашық ғарышқа шығу әрекетін кәсіби емес ғарышкерлер жекеменшік ғарыш кемесінен және жеке компания жасаған скафандр көмегімен жүзеге асырды. Бүгінге дейін мұндай жауапты істі тек мемлекеттік ғарыш агенттіктері өткізетін. Дегенмен бүгінгі сынақ SpaceX компаниясы өз скафандрын әлі көп жетілдіруі керегін көрсетті.
#ғарыштарихы

Джаред Айзекман ашық ғарышта

Джаред Айзекманның шлемінен қарағанда

POLARIS DAWN: ҮШІНШІ КҮННІҢ ҚОРЫТЫНДЫСЫ

Күннің басты оқиғасы 106 минутқа созылған ашық ғарышқа шығу операциясы болды. Экипаж скафандрларын киіп, тексерген соң, оларды герметизациялау, азотпен үрлеу мен таза оттегімен толтыру басталды. Кеменің кабинасы, керісінше, бейгерметизацияланып, ондағы қысым ғарыштық вакууммен теңесті. 732 км биіктіктегі кеме қызметтік бөлімін Күнге, ал тұмсығын Жерге қарай бағдарлады. Командир люкте ашқанда, экипаждың 4 мүшесі де ғарыш вакуумының әсеріне ұшырады.

Джаред Айзекман мен Сара Гиллис кезекпен кемеден шығып, скафандрдың икемділігін тексерді. Кид Потит пен Анна Менон скафандрдың шлангкабельдерін басқарып, телеметрияны қадағалап отырды. Люк жабылғаннан кейін кеме ішіндегі қысым қалпына келтірілді. Ауа шығып жатпағаны тексерілісімен Crew Dragon кемесінен алғашқы ғарышқа шығу әрекеті ресми тәмамдалды.

Жауапты жұмысты жақсы атқарған экипаж біраз демалып, түскі асын ішті. Олар Жерге Starlink байланысы арқылы хабар жіберіп, отбасыларымен сөйлескен соң, ұйқыға кетті.

12:35-ТЕ POLARIS DAWN МИССИЯСЫНЫҢ КЕМЕСІ ҚОНАДЫ

Polaris Dawn мисиясының экипажы отырған Crew Dragon Resilience ғарыш кемесі қонуға беттеді. Кеме капсуласы қызметтік бөлімнен ажырап, Аустралия үстінде Жерге қарай төмендеп келеді. Қону Алматы уақытымен 12:35 шамасына жоспарланған. Трансляцияларға сілтеме — төменде.

POLARIS DAWN МИССИЯСЫ СӘТТІ АЯҚТАЛДЫ

2024 жылғы 15 қыркүйекте бес күнге созылған Polaris Dawn миссиясы тәмамдалды. Crew Dragon Resilience ғарыш кемесі атмосфераның тығыз қабатына енісімен, екі тежеуіш парашют ашылды. Кейін негізгі төрт парашют жайылды. Алматы уақытымен 12:37-де Crew Dragon Resilience ғарыш кемесі Мексика шығанағы айдынына ойдағыдай қонды

Ұшқышты капсула Shannon теңіз кемесінің бортына көтеріліп қойылды. Біраздан соң люк ашылып, Анна Менон, Сара Гиллис, Кид Потит және ең соңғы болып командир Джаред Айзекман капсуладан шықты. Трансляция кадрларына қарағанда, ғарышкерлердің денсаулығы мен көңіл-күйі жақсы сияқты.