28 НАУРЫЗДА СОҢҒЫ DELTA IV HEAVY ҰШЫРЫЛАДЫ

2024 жылғы 28 наурызда, Алматы уақытымен 22:40-та ULA бірлескен ұшыру операторы 16-шы әрі соңғы Delta IV Heavy ауыр зымыранын ұшырады. Канаверал базасының SLC-37B ұшыру алаңынан көтерілген тасығыш NROL-70 миссиясы аясында АҚШ Ұлттық әскери-ғарыштық барлау басқармасының жерсерігін орбитаға шығаруы тиіс.

Delta IV Heavy 2004–2018 жылдар аралығында, яғни Falcon Heavy қатарға қосылғанша, дүниедегі ең ауыр жүк көтеретін зымыран саналып келді. Ол төмен жермаңы орбитаға 28 790 кг, геоөтпелі орбитаға 14 220 кг, геостационарға 6750 кг пайдалы жүктеме шығара алады. Бірінші саты мен қапталдағы қос үдеткіш CBC әмбебап зымыран модульдері болып табылады. Бұлардағы үш RS-68A қозғағышы, DCSS екінші сатысындағы RL-10-B-2 агрегаты сияқты, сұйық сутегі мен сұйық оттегін жағады. Демек, Дельта 4 Хэви — барлық сатысы мен үдеткіштері сутегімен істейтін теңдессіз машина. Зымыранның массасы 733 т, биіктігі 72 м, диаметрі 5 м, үдеткіштермен қоса алғандағы ені 15 м.

Өте сирек, шамамен жылына бір самғайтын ауыр машинаны Boeing корпорациясы жасаса, ғарышқа ULA кәсіпорны ұшырады. 2004 ж. 21 желтоқсандағы алғашқы ұшырылым ішінара сәтсіз болғанымен, кейінгі 13-і сәтті өтті. Delta IV Heavy негізінен АҚШ Ұлттық әскери-ғарыштық барлау басқармасының (NRO) жерсеріктерін ұшыруға қолданылады. Тек екі миссия азаматтық болды: 2014 ж. 5 желтоқсандағы Орион ғарыш кемесінің сынағы және 2018 ж. 12 тамызда Паркер күн зондын сары жұлдыз маңына аттандыру. Зымыран Ғарыш күштерінің Канаверал базасындағы SLC-37B және Ванденберг базасындағы SLC-6 ұшыру алаңдарынан көтерілетін. Бір ұшырылым құны 440 миллион доллар шамасында.

Сонымен, ертең соңғы, 16-шы Delta IV Heavy, соңғы, 45-ші Delta IV, соңғы, 377-ші Delta, ақыры, 66 жылдық тарихы бар Thor-Delta әулетіне жататын соңғы, 602-ші зымыран ұшырылады. Тарихи оқиғаның тікелей эфирі — сілтемеде.

#ғарыштарихы

ПОНС-БРУКС КОМЕТАСЫН ДҮРБІМЕН КӨРУГЕ БОЛАДЫ

12P/Pons-Brooks кометасының жарықтығы пәлендей арта қоймады, ол 4,9 ж.ш. деп бағаланып отыр. Демек, оны кешке дүрбімен ғана көруге болады. Комета қазір Үшбұрыш пен Тоқтының тура ортасында.
#астрокүнтізбе

STARSHIP S29: ЕКІНШІ ТҰТАНДЫРУ СЫНАҒЫ

2024 жылғы 27 наурызда Starship S29 прототипінің бір Raptor қозғағышы қонуға арналған кіші бактардан отын ала отырып тұтандырылды. Бұл сынақ мотордың ғарышта қайта қосылуын пысықтады.
#жұлдызкеме

Delta IV Heavy бүгін ұшпайтын болды

ПОНС-БРУКС КОМЕТАСЫ ҚОЗЫДА

12P/Pons-Brooks кометасы Тоқты шоқжұлдызының аумағына енді, бүгін ол мұндағы ең жарық жұлдыздар Хамал мен Шератанның арасынан көрінеді. Өкініштісі, кометаның жарқырауы 5,3 жұлдыздық шама маңында, жарқылдаған сәтте ол 4,8-ге дейін артқан. 31 наурызда құйрықты жұлдыз Тоқтының альфасы Хамалмен түйіседі.

Арабтар латынша Aries аталатын шоқжұлдыздың өзін де оның ең жарық жұлдызының атымен Хамал дейді. Күн хижрасы мен қазақтың жұлдыз есебінің 21 наурызда басталған бірінші айы Hamal / Амал, өз кезегінде, шоқжұлдыздың атын алған. Шоқжұлдыздың көне түркіше аты, қазір айтып жүргеніміздей Тоқты емес, Қозы. Сонымен, Амал жұлдызын іздеушілер үшін ақпарат: ол, біріншіден, Қозы (Тоқты, Aries, Овен) шоқжұлдызының арабша атауы, екіншіден, сондағы ең жарық жұлдыздың аты.

Сызба: Star Walk

89. «B33 АТБАСЫ ТҰМАНДЫҒЫ»

«Жұлдыздар мен тұмандықтар» номинациясының қысқа тізіміне енген — Джош Джонс. Үшарқар-Таразыдағы күңгірт тұмандық жайлы толығырақ.

B33 Horsehead Nebula by Josh Jones
Astronomy Photographer of the Year 2023
Pendleton, Oregon, USA, 7–8 and 10–12 October 2022
#астрофото2023