12P/PONS-BROOKS КОМЕТАСЫ КӨРІНЕ БАСТАДЫ

70 жылда айналып келіп отыратын 12P/Pons-Brooks кометасы 2024 жылғы 20 көкектегі кезекті перигелиіне жақындап қалды. Ол қазір Күннен 137 млн км, ал Жерден 242 млн км қашықтықта. Соңғы бақылау дерегі бойынша, құйрықты жұлдыздың жарықтығы +5 жұлдыздық шамаға жеткен. Демек оны, теория бойынша, жай көзбен көруге болады.

Әрине кометаны қаладан да, жасанды жарығы мол ауылдан да көре алмаймыз. Бірақ дүрбілі бақылаушы Понс-Брукс кометасын байқауы әбден мүмкін. Немесе тас қараңғы далалық жерге шығып, жай көзбен де көруге әрекет жасауға болады.

12P қазір Үшбұрыш шоқжұлдызынан шығып, Тоқтыға қарай жылжып келеді. Оны көру үшін, қараңғы түсісімен батыс көкжиек үстіне қарау керек. Комета жарқыраған Юпитердің оң жағында, Үшбұрыштың сүйір бұрышынан сәл төменірек орналасады. Қараңғы түспей тұрып, сол маңнан Меркурийді де бақылауды ұмытпаңыз.
#астрокүнтізбе

СОЮЗ МС-25 ҒАРЫШ КЕМЕСІ ХҒС-ПЕН ТҮЙІСТІ

Жоспарланғандай, 25 наурыз, 20:10-да «Союз МС-25» ғарыш кемесі ХҒС-тың ресейлік сегментінің «Причал» модуліне түйісті. Біраздан соң люктер ашылып, Олег Новицкий (Роскосмос), Трейси Дайсон (НАСА) мен Марина Василевская (Беларусь) стансаға енді.

Дәстүр бойынша, жаңа келген ғарышкерлердің ХҒС-тағы жетілікпен көрісу видеосын жариялаймыз. Өкінішке қарай, бұрынғы «Белавиа» стюардессасы Марина камераны тасалап, көрініс онша болмай қалды 😁
#хғс

STARBASE ЖАҢАЛЫҚТАРЫ

25 наурызда Starship S29 прототипінің барлық алты Raptor қозғағышы толық уақытқа іске қосылды. Бүгін екінші тұтандыру сынағы өткізіледі. Көлденең қиындық тумаса, IFT-4 миссиясы мамырда ұшады деп болжанып отыр.

12P/ПОНС-БРУКС КОМЕТАСЫ M33 ГАЛАКТИКАСЫ ФОНЫНДА

Үшбұрыш шоқжұлдызында орналасқан М33 — аспанымыздағы жарықтығы бойынша екінші галактика. Ол Жерден 2,7 миллион жарық жылы қашықтықта.

Фото авторы: Scott Tucker, Аризона, 21 наурыз 2024
объектив Canon 200 мм, f/2L, камера ZWO ASI2600MC
#фотокөрме

28 НАУРЫЗДА СОҢҒЫ DELTA IV HEAVY ҰШЫРЫЛАДЫ

2024 жылғы 28 наурызда, Алматы уақытымен 22:40-та ULA бірлескен ұшыру операторы 16-шы әрі соңғы Delta IV Heavy ауыр зымыранын ұшырады. Канаверал базасының SLC-37B ұшыру алаңынан көтерілген тасығыш NROL-70 миссиясы аясында АҚШ Ұлттық әскери-ғарыштық барлау басқармасының жерсерігін орбитаға шығаруы тиіс.

Delta IV Heavy 2004–2018 жылдар аралығында, яғни Falcon Heavy қатарға қосылғанша, дүниедегі ең ауыр жүк көтеретін зымыран саналып келді. Ол төмен жермаңы орбитаға 28 790 кг, геоөтпелі орбитаға 14 220 кг, геостационарға 6750 кг пайдалы жүктеме шығара алады. Бірінші саты мен қапталдағы қос үдеткіш CBC әмбебап зымыран модульдері болып табылады. Бұлардағы үш RS-68A қозғағышы, DCSS екінші сатысындағы RL-10-B-2 агрегаты сияқты, сұйық сутегі мен сұйық оттегін жағады. Демек, Дельта 4 Хэви — барлық сатысы мен үдеткіштері сутегімен істейтін теңдессіз машина. Зымыранның массасы 733 т, биіктігі 72 м, диаметрі 5 м, үдеткіштермен қоса алғандағы ені 15 м.

Өте сирек, шамамен жылына бір самғайтын ауыр машинаны Boeing корпорациясы жасаса, ғарышқа ULA кәсіпорны ұшырады. 2004 ж. 21 желтоқсандағы алғашқы ұшырылым ішінара сәтсіз болғанымен, кейінгі 13-і сәтті өтті. Delta IV Heavy негізінен АҚШ Ұлттық әскери-ғарыштық барлау басқармасының (NRO) жерсеріктерін ұшыруға қолданылады. Тек екі миссия азаматтық болды: 2014 ж. 5 желтоқсандағы Орион ғарыш кемесінің сынағы және 2018 ж. 12 тамызда Паркер күн зондын сары жұлдыз маңына аттандыру. Зымыран Ғарыш күштерінің Канаверал базасындағы SLC-37B және Ванденберг базасындағы SLC-6 ұшыру алаңдарынан көтерілетін. Бір ұшырылым құны 440 миллион доллар шамасында.

Сонымен, ертең соңғы, 16-шы Delta IV Heavy, соңғы, 45-ші Delta IV, соңғы, 377-ші Delta, ақыры, 66 жылдық тарихы бар Thor-Delta әулетіне жататын соңғы, 602-ші зымыран ұшырылады. Тарихи оқиғаның тікелей эфирі — сілтемеде.

#ғарыштарихы

ПОНС-БРУКС КОМЕТАСЫН ДҮРБІМЕН КӨРУГЕ БОЛАДЫ

12P/Pons-Brooks кометасының жарықтығы пәлендей арта қоймады, ол 4,9 ж.ш. деп бағаланып отыр. Демек, оны кешке дүрбімен ғана көруге болады. Комета қазір Үшбұрыш пен Тоқтының тура ортасында.
#астрокүнтізбе

STARSHIP S29: ЕКІНШІ ТҰТАНДЫРУ СЫНАҒЫ

2024 жылғы 27 наурызда Starship S29 прототипінің бір Raptor қозғағышы қонуға арналған кіші бактардан отын ала отырып тұтандырылды. Бұл сынақ мотордың ғарышта қайта қосылуын пысықтады.
#жұлдызкеме

Delta IV Heavy бүгін ұшпайтын болды