الكيمياء العضوية ١ - ساعتين

مادة تتكلم عن المجموعات الوظيفية للمركبات الكيميائية.

منسق المادة د.منهاج ويدرس العيال وهو اللي يكتب الاختبار للعيال والبنات ، و البنات تدرسهم د. ريديفي ، المادة ما راح اقول سهلة لانها مو سهلة كيمياء طبيعي يعني 😭 ، لكن يبي لها جد واجتهاد ومذاكرة اول بأول وتعرفون كل شيء فيها ، بخصوص د.منهاج فـ ان شرحه حلو لكن مو مره لكن د.ريديفي ما يمدحون شرحها البنات وكلهم يشوفون محاضرات د.منهاج ، اختبارات المادة كانت سهلة للي مذاكر ١٠٠٪؜ وصعبة للي ما ذاكر لأن المادة صدق يبي لها شغل وفهم وحفظ وكل شيء وكل شيء يخص المادة موجود باليوتيوب ، وبخصوص الخصوصيين ، فيه خصوصي للمادة اسمه السيّد ابو معالي، شرحه جميل جدًا ومفصل ويعرف طريقة الدكتور وكل شيء بس يعيبه التأخر بالشرح مرات، بالترم الاول راح ندرس مقدمة بالكيمياء العضوية بعدين بنبدأ ندرس كل مجموعة وظيفية لحالها، والمادة مهمة مرة لانها مرتبطة بمادة الترم الثاني وتعتبر اساس لها👍🏻.

#الكيمياء_العضوية_1

سلم ١ - ساعتين

السلم مادة الكترونية ، لكن اختبارها حضوري وموحد لكل شعبتكم ، المهم المادة سهلة صراحة وكل اسبوع عليها اختبار بالموقع موجودة حلوله بقناتنا ، لازم تحلون كل اختبار ب اسبوعه ، وكل ثلاث اسابيع فيه واجب الكتروني و نشاط الكتروني ، وبخصوص المحاضرات الدكتور او الدكتوره يحددون معكم محاضرة كل ثلاث اربع اسابيع،والمادة بديهية يعني لكن لازم تذاكرونها والمنهج كثير فنصيحة ذاكروها اول بأول احسن لكم👍🏻.

#المدخل_إلى_الثقافة_الإسلامية

عرب ١ - ساعتين

العرب مادة سهلة تعتمد على تأسيسك باللغة العربية والاعراب والاشياء ذي وصراحة المادة سهلة وشروحتها موجودة باليوتيوب بشكل كثيييير و اختبارها سهل للي مذاكره وفاهمها صح .

#المهارات_اللغوية

بتكلم عن المستوى الرابع قريب 🤩

المواد نفسها بس غيروا ترتيبها على الاترام، بشرح لكم كل مادة للسنة الاولى بالتخصص بالتفصيل 👍🏻

#الترم_الثاني - #المستوى_الرابع
#الخطة_القديمة

كيمياء عضوية (٢) - 4 ساعات
تكملة للمجموعات الوظيفية اللي بالترم الاول، وبالنسبة لي كانت اسهل من الترم الاول لأننا تأسسنا كويس بعد الترم الاول 👍🏻.

الدكاتره مثل الترم الاول للعيال د.منهاج وللبنات د.ريديفي، بس الفرق عن الترم الاول ان فيه كلاس لاب بالاسبوع وعليه اختبار عملي بعد تطبقون عليه باللاب ، وفيه ميد واحد وكويز واحد واختبار عملي و اختبار فاينل، لكن الترم الاول ميدين وكويز وفاينل بس، بالنسبة للعيال د.منهاج ما قصر معنا شرح لنا بالتفصيل واختباراته كانت حلوة وبالعملي ساعدنا كثير بعد 👍🏻 ، هذا بالنسبة للعيال ، بالنسبة للبنات د. رديفي بالنسبه للنظري فهي ما كانت تشرح فقط تقرأ السلايد ، انصحكم بأنكم تشوفون شرح منهاج للعيال او تتوجهون للخصوصيين بيساعدونكم كثير بفهم الماده ، بالنسبه للكويز حق البنات هي اللي كتبته بس كان سهل للي شاد حيله من البداية لانها تركز على التسميه ورسم الstructures

بالنسبه للاب مع د.رديفي ، راح تعطيكم مذكره فيها طريقة التجربه و النتائج اللي مفترض تطلع لكم ، وهي معتمده على هذي المذكرة ودايمًا تقول اقرؤها قبل اللاب ولما نجي عندها فقط تطلع لنا المواد وتتركنا نسوي اللي نسويه ، نصيحة اعتمدوا على انفسكم بفهم اللاب وتسجيل الملاحظات وتصوير التجارب ونتائجها من البداية عشان يفيدكم بالفاينل .
المادة مو سهلة ابد وتميل للصعوبة لكن اذا شديتوا حيلكم اول بأول بيمديكم عليها ويمديكم على الـ A+ ان شاء الله 🤍.

-شكرًا لـ @Ghx_90 تكلمت عن عملي البنات 🫶🏻

#كيمياء_عضوية٢

كيمياء تحليلية - 3 ساعات

المادة تتكلم عن المواد والاحماض والقواعد وطرق الفصل و اشياء كثييير، المادة تعتبر سهلة لكل الجامعات الاخرى، لكن للاسف مع د.رياض عندنا صعبها علينا مره مره مره وكرهنا بالترم كامل، طبعًا يدرس عيال وبنات بالنظري فقط، شرحه سيء و اسلوبه اسوأ وسلايداته سيئة و اختباراته سيئة، كل شيء بهالمادة سيء، من بداية الترم وهو مستقعد لنا وكان ينبسط مره وهو يقهرنا😭😭، كان يعطينا ٣-٥ ملفات باليوم الواحد لدرجة دخلنا الفاينل وحنا اخذين اكثر من ٣٠ ملف تقريبًا، بخصوص اختبارات المادة ( ميد واحد فقط ، كويز او اساينمنت، عملي ، فاينل )، طبعًا كل شيء كان صعب اختباراته وكويزاته وبحوثه كل شيء بهالمادة كان صعب، وما اعتقد احد جاب A+ بالمادة، لكن فيه عدد جابوا A، هذا بالنسبة للنظري؛ بالنسبة للعملي للعيال كان عندنا د.منهاج مثل الكيمياء العضوية، وكان طيب معنا ويشرح لنا بذمة وضمير وبالاختبار العملي ما يدقق كثير 👍🏻 ، بالنسبه لـ لاب التحليلية للبنات د. إلهام كانت مسؤولة عنه، كانت قبل كل لاب تشرح بالتفصيل طريقة التجربه وشرحها ممتاز جدًا وعادي تعيد لين توصل المعلومة اللي هي تشرحها ، واللاب ممممتع جدًا معها، وكانت متعاونه جدًا ، ونصيحة حاولوا تسجلون شرحها وملاحظاتكم وقت اللاب بتفيدكم جدًا وقت دراستكم ،وبالنسبه لفاينل العملي هي اللي كتبت الاسئلة وكانت واضحة، والتجربه جابت اسهل شي اخذناه خلال الترم .

-شكرًا لـ @Ghx_90 تكلمت عن عملي البنات 🫶🏻

#كيمياء_تحليلية

الأحياء الدقيقة - ٣ ساعات
المادة تتكلم عن الكائنات الدقيقة زي البكتيريا والفطريات والفيروسات وطرق تكاثرها وتركيبها وفيه محاضرتين من المادة عن المضادات الحيوية وطرق عملها داخل الجسم، دكتور المادة هو د.أحمد الجربوع للعيال وللبنات بالنظري، شرحه مو مره صراحه لكن سلايداته مره سهلة والمادة تعتبر سهلة وبالنسبة لي اشوفها مادة A+، وممتعة للمذاكرة واختبارات الدكتور سهلة بإستثناء اختباره العملي حق العيال كان صعب، المادة فيها ميد اول وميد ثاني واختبار عملي وبرزنتيشن وفاينل، البرزنتيشن على مجموعات يكون وسهل وعطانا كلنا فل عليه، واختباراته كانت مره سهله وكان يكرر من الدفعات اللي قبل بشكل كبييير والاسئلة مره واضحه، اختبار الفاينل كان كله اختيارات وسهل جدًا، فيه محاضرتين بتعطينا اياها د.فداء الغنيم اللي هي محاضرتين عن المضادات الحيوية وطرق عملها بالجسم وآليتها وانواعها وكذا، هي تعتبر اصعب محاضرتين بالمنهج لان فيها مضادات حيوية كثير لازم نحفظها، شرح الدكتورة مره حلو بس سلايداتها سيئة وصعبة، بالنسبة للعملي للعيال، كنا نروح للمعمل ونتعلم اشياء بالاخير انسحب عليها واختبرنا على محاضرات اخذناها عن بعد لكنها عملية، وكان اختباره العملي صعب جدًا صراحة ونقصوا فيه كثير، كان فيه مذكرة ( مانول ) لازم نحلها كاملة بناء على التجارب اللي ناخذها بالمعمل ونعطيه الدكتور اخر الترم يصححه، هذا بالنسبة للعيال، بالنسبه لـ لاب المايكرو للبنات كانت مسؤولة عنه د. أمل عطتنا محاضرتين فقط ثم طلعت اجازة وكملت معنا د.داليا و د.أحمد (د. أحمد للمحاضرات المشتركه بين قسم الطلاب والطالبات) ، العملي كان بالنسبه لدفعتنا نظري بحت التجارب ناخذها كـ سلايدات وما دخلنا اللاب الإ مره وحده فقط ، والفاينل ايضًا كان نظري كتبته لنا د.أمل وكان جدًا سييء الاختبار وفيه اشياء كثيره ما كانت مفهومه بحكم انها ما كنت معنا خلال الترم ,اعتقد الاترام الجايه بيكون العملي اكثر متعه واختباره افضل بما انه ماراح يكون فيه تشتت بالدكاتره اللي بيمسكونكم.

-شكرًا لـ @Ghx_90 تكلمت عن عملي البنات 🫶🏻

#احياء_دقيقة

علم وظائف الاعضاء(٢)- ساعتين
المادة نفس مادة الترم اللي قبله تتكلم عن وظائف الاعضاء داخل الجسم وكذا، لكن بدون عملي 👍🏻 ، اخذنا الجهاز التنفسي والهضمي والكلية و العصبي ، كل جهاز ثلاث محاضرات، درسنا للمادة دكتور واحد د.عبدالمنعم افضل دكتور درسني بحياتي، الشرح كان عالبلاك بورد كل الترم للعيال والبنات والاختبارات حضورية ،شرحه جدًا جدًا جدًا جميل وسلايداته سهلة ومرتبة وحلوة واختباراته سهلة للي مذاكر ، الدكتور مره متعاون مع الطلاب وكان معطينا رقمه للي عنده سؤال وكنا نداوم برمضان فـ كان يقولنا بناخذ المحاضرة عالبلاك بورد بالليل اريح لنا يعني 🤍، المادة لها ميد اول وميد ثاني و فاينل فقط، اختيارات ومقالي كلها، لكن الفاينل قال عشان يساعدنا بيخلي الاختبار اغلبه مقالي عشان اللي كاتب كم كلمة صح يقدر يمشيه😭، المهم بإختصار المادة مادة A+ للي بيشد حيلة وهي احلى مادة بالترم بالنسبة لي 🤍.

#علم_وظائف_الاعضاء٢