اناتومي - 4 ساعات

مادة تتكلم عن تشريح جسم الانسان، يعني نعرف كل عضو بالجسم ومكانه وبعض الدكاتره كانوا يحطون وظائف بعد ، والمادة فيها عملي سهل مره مره ، كان الدكتور يعطينا الصور يقول احفظوها وتجي نفس الصورة بالعملي ونكتب الاسم فقط👍🏻

المنسق حقها د. عبدالله لكن فيها ٥ دكاترة يدرسونها ، المادة ما تحتاج خصوصي ابد وماده سهلة مره والدكاتره اغلبهم حلوين والمادة مباشرة مره والمرجع السلايدات برضو :

١- دكتور نسيت اسمه جانا اول محاضرة وعطانا مقدمة بس ، شرحه كان مره رهيب والمحاضرة كانت سهلة اصلًا لكنها مهمة تفهمينها لان الباقي مرتبط فيها.

٢- د.خالد :
هذا دكتور باكستاني رهيب شرحه ومتعاون مع الطلاب مره واسئلته بالاختبار جدًا جدًا مباشرة وسهلة بس يعيبه شيء واحد ان سلايداته مره كثيرة لكن اغلبها صور وسهلة ، ويجاوب عليكم بالايميل والواتس للي عنده اسئلة.

٣- دكتور احمد الزيني :
هذا دكتور عسل عسل عسل وشرحه جدًا رهيب وسلايداته قليلة واسلوبه عسل ويضحّك😭 ، واسئلته بالاختبار كانت سهلة ، عطانا محاضرتين ( العضلات والجهاز التناسلي الذكري ) وكلها سهلة وقصيرة.

٤- دكتور رمضان :
هذا هو رئيس المادة ، سلايداته سهله مره وقليلة واسئلته بالاختبار جدًا واضحة ومتعاون مع الطلاب ويرد واتس بس اللي يعيبه سلايداته كانت مو مرتبه.

٥- د.طارق عيسى :
هذا بالنسبة لي اسوأ دكتور بالمادة وسلايداته كانت جدًا صعبة ومليانه اتجاهات تلخبط وجابها بالاختبار النهائي بشكل كثير ، واسئلته بالفاينل كانت تلخبط وصعبه شوي.

#تشريح_الإنسان_وعلم_الأنسجة

هيستولوجي - 4 ساعات

مادة تتكلم عن دراسة انسجة و اعضاء الانسان تحت المجهر ، وفيها عملي نفسه نفس عملي الاناتومي بنفس الوقت نختبره👍🏻

نفس الشيء الدكتور عبدالله هو المنسق حقها لكن ما يدرسها وهي مرتبطة بالاناتومي نفس المادة ، المادة سهلة بس كثيرة والمرجع حقها السلايدات والاسئلة تجي نسخ لصق زيها زي الاناتومي .

١- الدكتور عصام:
هذا منسق المادة الدكتور سلايداته جدًا قليلة وشرحه مو حلو لكن ما يهم لانه ما يطلع من السلايدات واسئلته واضحة ومباشرة بالاختبار تجي نسخ لصق بس مره حط تريك بسؤال مقالي ، ومتعاون لو تسألونه عالايميل او بالمحاضرة ، لكن لا تشيلون همه محاضراته مره سهلة الدكتور .

٢- د.سحر :
هذي اتوقع مسببه رعب لاغلب الدفعة حقتنا لأن سلايداتها كثيرة وشرحها تحسينه حق لفل عالي واسئلتها حلوة بالاختبارات صراحة وما تطلع من السلايدات ، لكن زي ما قلت يعيبها سلايداتها الكثيرة وشرحها.

٣- د.منال :
هذي الدكتورة شرحت لنا محاضرتين من جزئية الفاينل ، ومحاضرتين سهلة واسئلتها بالاختبار كانت اسهل اسئلة صراحة ، وشرحها عادي يعني مو حلو ولا هو سيء ولا تطلع من السلايدات .

#تشريح_الإنسان_وعلم_الأنسجة

- الاناتومي والهيستولوجي مادتين مختلفات لكن داخله مع بعض بالمعدل و بمسمى واحد ( تشريح الانسان و علم الانسجة ) 👍🏻

فيسيولوجي 1 - 3 ساعات

مادة تتكلم عن وظائف اعضاء الانسان داخل الجسم .

منسق المادة الدكتور عبدالله غريب لكن ما يشرحها هو ، وبخصوص مصدر المذاكرة كان السلايدات بس، المادة لها ٣ دكاتره درسونا بالترم الاول، المادة سهل فيها الـ A+ اذا ذاكرتوها اول بأول 👍🏻

1-الدكتور لطفي :
درسنا اول محاضرة Homeostasis و محاضرتين الدم وهو يعتبر رئيس المادة ، المهم الدكتور اسئلته بالميد الاول كانت سهلة مره لكن بالاختبار العملي والفاينل جاب اسئلة صعبة شوي ولازم مذاكرة جديّة للمادة ومحاضراته تعتبر من اسهل المحاضرات بالمنهج
2- الدكتور معتز:
الدكتور معتز عطانا ٣ محاضرات بس شرحه جدًا جدًا رهيب لكن محاضراته صعبة واسئلته تعتمد على الفهم لكن بالميد الثاني صدمنا وجاب لنا اسئلة مباشرة ، ونصيحة لحد يطلب منه شيء لانه بيرفض نظامه يجي يشرح ويمشي بس.
3- الدكتور الحجاج :
هذا بيشرح الجهاز العصبي من جزئية الميد الاول وبيشرح ٤ محاضرات من الفاينل وصراحة سلايداته مره كثيرة وصعبة وطويلة وشرحه مو ذاك الزود لكن اسئلته جدًا سهلة والدكتور مره متعاون بشكل ما تتخيلونه لدرجة قبل الاختبار كان يفتح محاضرة بالويكند علشان يراجع معنا وكنا نطلب منه يحذف ويحذف.

#علم_وظائف_الاعضاء١

الرياضيات للصيدلة - 3 ساعات

الماث : د. لطفي

اسوأ دكتور درسني بحياتي كلها 😭 ، غير متعاون ابدًا وشرحه ما ينفهم نصيحة دوروا خصوصي من الحين ، ٧ طلاب حملوا المادة عنده ، و بخصوص اختباراته؛ كان يعطينا نموذج يقول بيجيب نفسه لكن بالاختبار يغير كل شيء بالسؤال حرفيًا 😭 ، سؤال واحد بالفاينل جابه نفسه الباقي يختلف بس نفس الدرس 🙏🏻 ، و توزيع الاسئلة مره سيء يعني بالفاينل فيه سؤال واحد عليه ٢٢ درجة وسؤال ١٤ مره ، والفاينل غيّر كل النموذج وحط اسئلة صعبة ما عدا سؤال جابه نفسه ، اي صح و اهم شيء ، لازم بالاختبار تحلون بنفس طريقته لو يحط فاصله تحطون زيه والاسهم تحطون زيه ، واذا كنتم كاتبين الجواب صح لكن بطريقة غير طريقته يعطيك 0، هذا اللي كان مع دفعتنا ، لكن طلاب دفعة الترم الثاني يقولون انه تغير وساعدهم كثير😭

#الرياضيات_للصيدلة

الكيمياء العضوية ١ - ساعتين

مادة تتكلم عن المجموعات الوظيفية للمركبات الكيميائية.

منسق المادة د.منهاج ويدرس العيال وهو اللي يكتب الاختبار للعيال والبنات ، و البنات تدرسهم د. ريديفي ، المادة ما راح اقول سهلة لانها مو سهلة كيمياء طبيعي يعني 😭 ، لكن يبي لها جد واجتهاد ومذاكرة اول بأول وتعرفون كل شيء فيها ، بخصوص د.منهاج فـ ان شرحه حلو لكن مو مره لكن د.ريديفي ما يمدحون شرحها البنات وكلهم يشوفون محاضرات د.منهاج ، اختبارات المادة كانت سهلة للي مذاكر ١٠٠٪؜ وصعبة للي ما ذاكر لأن المادة صدق يبي لها شغل وفهم وحفظ وكل شيء وكل شيء يخص المادة موجود باليوتيوب ، وبخصوص الخصوصيين ، فيه خصوصي للمادة اسمه السيّد ابو معالي، شرحه جميل جدًا ومفصل ويعرف طريقة الدكتور وكل شيء بس يعيبه التأخر بالشرح مرات، بالترم الاول راح ندرس مقدمة بالكيمياء العضوية بعدين بنبدأ ندرس كل مجموعة وظيفية لحالها، والمادة مهمة مرة لانها مرتبطة بمادة الترم الثاني وتعتبر اساس لها👍🏻.

#الكيمياء_العضوية_1

سلم ١ - ساعتين

السلم مادة الكترونية ، لكن اختبارها حضوري وموحد لكل شعبتكم ، المهم المادة سهلة صراحة وكل اسبوع عليها اختبار بالموقع موجودة حلوله بقناتنا ، لازم تحلون كل اختبار ب اسبوعه ، وكل ثلاث اسابيع فيه واجب الكتروني و نشاط الكتروني ، وبخصوص المحاضرات الدكتور او الدكتوره يحددون معكم محاضرة كل ثلاث اربع اسابيع،والمادة بديهية يعني لكن لازم تذاكرونها والمنهج كثير فنصيحة ذاكروها اول بأول احسن لكم👍🏻.

#المدخل_إلى_الثقافة_الإسلامية

عرب ١ - ساعتين

العرب مادة سهلة تعتمد على تأسيسك باللغة العربية والاعراب والاشياء ذي وصراحة المادة سهلة وشروحتها موجودة باليوتيوب بشكل كثيييير و اختبارها سهل للي مذاكره وفاهمها صح .

#المهارات_اللغوية

بتكلم عن المستوى الرابع قريب 🤩

المواد نفسها بس غيروا ترتيبها على الاترام، بشرح لكم كل مادة للسنة الاولى بالتخصص بالتفصيل 👍🏻

#الترم_الثاني - #المستوى_الرابع
#الخطة_القديمة