Pediatrics Mastering

هواية كيسات تجي ( ابننا ما ياكل ) ، فصلت الكم القضية بمنشور بالعربي مزيج بين العلم والاقناع تستخلص منها كليشة تستخدمها وية اهل المريض حتى يعرفون ليش مياكل ، لحد هسة اغلب الاهالي جابت وياهم نتيجة واشوفهم يهزون براسهم انه فعلا صحيح ( هذا الي ديصير بالبيت )
—-

رب العالمين من خلقنا ، خلق دفاعات داخل الجسم، من ضمن هاي الدفاعات الاحساس بالجوع عند هبوط السكر، والاحساس بالجوع يجي وياه الصداع والنرفزة

الطفل الي مياكل نهائيا وحدة من اثنين
١- مريض مرض مزمن مأثر على شهيته ، هنا غصبا عنه مراح يشتهي و هذا المرض ينكشف بالفحص السريري والتاريخ المرضي و قياس الطول والوزن ووضعها على جارتات النمو.
٢- طفل سليم جسديا لكن بنظر اهله ما ياكل.

الي هو سليم جسديا وبنظر اهله ما ياكل بيها وحدة من اثنين

لو الام تبالغ على اعتبار الام تريد ابنها ياكل اكل يشفي غليلها بحيث تلكي الطفل سمين وضمن الطبيعي بس هي تشوفه ضعيف ومياكل مثل البقية، لو الطفل فعلا مياكل كميات مناسبة لعمره

الي مياكل كميات مناسبة هالشيء بسبب عدة عوامل

- الصبح يتريك الطفل شيء بسيط ويكوم، بعد ساعة ساعتين يجوع، هذا ايعاز الجوع الي هو وجوده واجب و اجباري و كل طفل مخلوق بيه، يجي يسده بشيء معين ( سواء حلويات او فاكهة او اكل صحي بس كمية قليلة )
بعد ساعة ساعتين من سد الجوع يجوع مرة ثانية، لان ما اكل كمية زينة، ويبقى يجرب نفس السلوك بحيث يصير عدنا طفل ياكل كميات صغيرة مستمرة او متقطعة يستخدمها لسد جوعه وهذا مو صحيح السلوك

- العامل الثاني الطفل ياكل حلويات والحلويات تنطيه طاقة عالية تسد شهيته عالاكل وايعاز الجوع فما ياكل شيء غير الحلويات وباكيتات الحليب او الجبس

- العامل الثالث ، العامل النفسي
الطفل يريد يسمع اهله يحجون بيه ( مياكل ) يريد يبقى حديث الساعة بالبيت يريد يبقى يشوف اهله يصيحوه عالاكل ويعانون ويحاولون يقنعوه ويدللوه حتى بس ياكل يريد يبقى هو البارز بين اخوانه واخواته ويسمع صيته دائما بالبيت ( يلفت انتباهكم)
او الطفل كاره الاكل من كد ما اهله يلحون عليه، ابني تعال اكل تعال اكل وووالخ، لو عنده قوة يكوم يضرب الاكل براس اهله لان محد يحب الملحة فيكره الاكل بسبب الملحة الزايدة عليه
او الطفل يرفض الاكل حتى يحصل البدائل الي تعجبه سواء حليب او حلويات او اكل غير صحي

نجي للحل
١- ينسد موضوع الاكل نهائيا بالبيت محد يحجي بيه ولا يجيب طاريه .. راح يستغرب الطفل، اشو محد بحالي؟
٢- ينحط الغدا او العشا، نصيح الطفل مرة، ما اجى، عوفه، محد يموت من الجوع، اكو حماية رب العالمين حاطها، راح يكوم يبجي حتى ياكل، من يحس بالجوع.
٣- من يجوع بعد الوجبة الرئيسية، ماكو اكل ممنوع لا تخلوه يشتري ولا يفتح الثلاجة بنفسه، مو كان الغدا نازل ليش ما اكلت زين؟ انتظر يجي العشا.. راح يبجي، ورة ما يحس بلوعة الجوع انطيه اكل واكوله اذا تعيدها بعد ماكو اكل، اكررها مرة مرتين وازيد وقت العقوبة لحد ما يتعلم انه اذا ما يتغدا زين مراح يحصل اكل يسد بيه جوعه وراح ينجبر ينتظر للوجبة التالية. السناكات ننطيها للاعمار الصغيرة ونحاول تكون سناكات غذائية مو حلويات
٤- الحلويات ممنوع مليون بالمية، النستلة بيها سعرات تعادل ماعون تمن
٥- ممنوع استخدام الاجهزة اللوحية قبل الاكل، اني بالغ اذا اباوع شيء او مشغول بالموبايل ما اكوم عالوجبة ما بالك بطفل مندمج بلعبة او فيديوهات
٦- لا تلحون عليه حتى ياكل، لا تكافئوه اذا اكل، احيانا حتى لا تصيحوه عالغدا اذا شافكم كعدتوا عالسفرة، راح يستغرب، شبيهم اهلي محد بحالي ؟ راح يجي يكعد بصفكم بهدوء ( ينكسر عناده) و راح يطلب اريد كذا وكذا، انطوه الي يطلبه بس لا تخلون هالفعل بارز حتى ما يعاند، راح يحس انه الاكل مفيد له وانه اذا ما اكل محد بحاله هو الوحيد المتضرر راح ينجبر ياكل ويطلب اكل ويبكي اذا تأخر وقت الوجبة.

بهالتعليمات راح نحول الطفل من طفل مدلل يتبطر عالاكل الى طفل مماثل للي عايش بعائلة محد بحال احد وينجبر يكافح حتى ياكل اكثر من غيره لان يدري محد بحاله اذا مياكل هو الخسران.

ونحول العائلة من عائلة شديدة الاهتمام بالطفل لدرجة انزعج من كثر الاهتمام الى عائلة متوازنة خد وعين، تعاقب وتكافىء، تخلي الطفل ينمو بشكل صحيح متوازن بدون الميول الى الاذية ولا الدلال المفرط.

❤45👍6🥰1

2.25K views18:30