٤- الرقائق الشعاعية ونتائج الفحوصات تنذكر بالتقرير، تم ارساله الى الرقائق الشعاعية وكانت تخلو من وجود اجسام غريبة او كسور، او وكان يوجد كسر في العظم الكذا، لانه تقرير طبي ، قبل لا يكون تقرير عدلي، فلازم تكتب مشاهداتك الطبية

٥- كراس المقيم الدوري مال ٢٠١٥ و ٢٠١٨ واكو احدث منهم، بيه اغلاط، بخصوص نقل ادعاءات المريض، راح يتم انشاء كراس خاص بالتقارير الطبية العدلية الاولية.. الصحيح ان ما تذكر اي ادعاء، اذا المريض يدعي وجود الام بذراعه، راح تفحصه وتشوف اكو
Tenderness
Limitation of movement
اذا ماكو متكتب شيء، واذا اكو تكتب وجود الم بالمكان الفلاني وتقيد بالحركة ( هنا انت دتكتب signs ما تكتب symptoms )
لذلك الادعاءات ما تنكتب لانها اعراض
تريد تكتبها ؟
اكتبها داخل الكارت بالهستري.. الهستري من حقك تكتب بيه اي شيء يكوله المريض
والقضاة هم من خلال اطباء الطب العدلي راح يسحبون الكارت والتقرير حتى يقروه

٦- يمنع منعا باتا تسوي تقرير طبي عدلي اولي ب اي مستشفى برايفت.. ممنوع ممنوع حتى لو ينضغط عليك من مدير المستشفى حتى لو الاهل يجيبون الورقة فارغة بس تمليها حتى لو انت مستقبله بالطوارىء ، والحل شنو؟ اذا الاهل يروحون للحكومي مراح يحررولهم لان عبر مثلا ٢٤ ساعة
الحل انه توثق المشاهدات داخل الكارت او الفايل مال المريض، والاهل بدون ان يحصلون على تقرير طبي عدلي اولي يذكرون للقاضي انه مشاهداتهم موثقة بفايل المريض فراح يطلبون الفايل كله
وبهيج حقهم ما يكون ضاع
بنفس الوقت انت حميت نفسك
لان تحرير تقرير طبي عدلي اولي بمستشفى غير حكومي يعتبر مخالف للقانون

٧- الي يسوي التقرير الطبي العدلي الاولي هو المقيم الاقدم، واذا ما موجود وبمركز صحي، فيحق لطبيب التدرج يسويه
اما المقيم الدوري فلا من قريب ولا من بعيد مسؤول عنه
انت مقيم دوري ومسوي تقرير وانسحبت للقضاء
القاضي اذا يريد يساعدك يستدعي الاقدم الي وياك خفر بذاك اليوم ويحاسبه ليش ممسوي التقرير وشامره براسك
واذا يريد يشد وياك، يكولك ميحقلك تسوي تقرير ليش مسويه !

٨- اكو نقاط بين الواقع والقانون مختلفة جدا.. مشكلة القانون ما يحاسبك وفق الواقع مالك انما يحاسبك وفق القانون، فماعندك اي مبرر امام القضاء
ماتكدر تكوله مجبور ، المقيم الاقدم ميقبل يسويه، ماكو غيري.. تتحمل مسؤولية ختمك

٩- يطالب الاهل بورقة شرطة، زين اذا الاهل هم المجرمين، تتوقع يجيبون ورقة شرطة؟ القانون يكول انه الطبيب مكلف بتبليغ مركز الشرطة مو الاهل يبلغون المركز
اذا شكيت انه الموضوع اغتصاب او جريمة ف انت تبلغ اي موظف من وزارة الداخلية بمستشفاك وهو يبلغ مركز الشرطة، واذا ماكو تبلغ المعاون الإداري بضرورة تبليغ المركز
واي مركز مو الا حسب الرقعة الجغرافية
بعض المستشفيات نظامهم حلو، كيسات الحوادث والاعتداءات والتسمم وغيرها كارتهم يكون احمر، ومباشرة يجي شرطي من المركز القريب يكولك دكتور فتحتوا كارت احمر لهالمريض بشنو شاكين!
هاي الفكرة قابلة للتطبيق وتخلي مسؤولية ابو الاحصاء لمن تطلب منه كارت احمر يبلغ المركز مباشرة.

١٠- الوعي تام، الوعي مشوش؟ ليش مشوش على شنو اعتمدت؟ لازم تكتب الوعي مشوش حيث كان مقياس غلاسكو للاغماء ١٠، او حيث ان المصاب لا يعرف الزمان والمكان والاشخاص

١١- الفعاليات غير مستقرة، تذكر شنو الي ما مستقر بيها، ضغطه ، نبضه، تنفسه؟

١٢ - المستلم الي بنهاية الورقة، هو المكلف من مركز الشرطة، مو الاهل، لازم تسلم التقرير للشرطي ميصير تنطيه بيد الاهل. هذا القانون هيج يكول وهم يحميك من انه ( ليش ما كتبتلنا كذا وكذا ) الشرطي اذا يريد ينطيهم التقرير بعد هو يتحمل مسؤولية تصرفه

١٣ - ارى ان سبب هذه الاضرار ، والمريض يحتاج الى مدة كذا ، هاي كلها تنكتب مو يتشخبط عليها، والمريض بعد ما يستلم الشرطي التقرير خصوصا المخمورين اذا يحتاج يبقى بالطوارئ مراقبة تبقيه، واذا طلعته توثق عالكارت ليش طلعته وشون كان وضعه، من القصص الحقيقية، مخمور مسويله تقرير بالطوارئ ومطلعيه ، مطعون بعدها بدرنفيس بصدره وصار الاتهام عالطبيب انه كان مطعون اصلا وما كاتبها بالتقرير، لو بس ذاكر بكارت الخروج انه خرج المصاب بعهدة مثلا المركز الفلاني او السلطات وهو بحالة جيدة. كان انقذ نفسه

١٤- الوصف جدا مهم، تنوصف من الاعلى الى الاسفل، من اليمين الى اليسار، من الاخطر الى الابسط
يعني تبدي بجروح الرأس، ثم الجزء السفلي من الجسم، تبدأ باليمين قبل اليسار، تبدا بالخطيرة قبل البسيطة
الاثار توصفها بدقة وتكتب ( يغلب على وصفها اثار اسنان متطابقة) لان بعد كم يوم ميبقى اثر يدل على انه الطفل معضوض مثلا
السكين تكتب يا حافة حادة وياهي لا، هذا يدل على سكين، اذا الحواف بشكل Z ممكن مطعون بمقص
اذا الجرح بشكل دائري منتظم، وتحيط بيه حلقة ثانية هذا يدل على سلاح قريب ( انتحار مثلا) اما اذا اثار بارود، فهذا قريب بس مو ملاصق، معليك بمدخل الطلق ومخرجه ابد، توصف بس الجروح واشكالها وما تقيس العمق تكتب مجهول العمق
الحرق تكتب حرق ومساحته ويا درجة
وتكتب لا توجد اثار شدة في المناطق غير المتأثرة بالحرق ( لانه المناطق المحترقة ممكن اثار شدة بيها و متغطية بالحرق متنشاف بعد)

١٥- الملابس كلش مهمة، لا تمزقها، اذا انرفعت عن المريض توضع بكيس ورقي مو نايلون لان ياثر عليها النايلون وتتسلم لمركز الشرطة وتكتب بالكارت او التقرير انه سلمتها للمركز
١٦- ما تاخذ مسحات ابد بحالات الاغتصاب او اي شيء ثاني، المسحات بيها تقنية خاصة يسووها، انت راح تاخذها غلط، الي تسويه انه توعي الاهل ب اهمية توجههم للطبابة العدلي لاخذت مسحات
١٧- الفيميل المغتصبة اذا بس انت ماكو غيرك يسوي التقرير لازم تشوف اكو نزف خارجي لو لا، مو شغلك تشوف غشاء البكارة بس شغلك تشوف الجروح الخارجية بحضور فيميل من المستشفى واذا موجودة طبيبة بعد احسن، بس لا تسوي الي سويناه كلنا وهي نكتب الي شافته الممرضة بدون ما نشوف بعيوننا، اذا الاهل يرفضون او المصابة ترفض تكتب على ورقة الفحص والمعالجة رفضوا انك تفحصهم وما تنطي تقرير

١٨- اكو تقرير اسمه دوري ، كل اسبوع يطلبوه يتابعون بيه حالة المريض سواء راقد او طالع، يسويه الاختصاصي ، واكو تقرير نهائي ايضا يسويه الاختصاصي، من اخطاء التقرير النهائي الشائعة انه يكتبون لم يتم اكتساب الشفاء التام و يحال المريض الى دائرة العجز والعطل مادري شسمها، المهم الصحيح انه ما يتحول لهاي الدائرة الا يكتسب الشفاء التام

١٩- لا تبت بقضية ابد، لا تكتب مدخل طلق ناري، شعليك طلقة لو مو طلقة، اكتب بس وصف الجرح ولتكتب مدخل، احتمال درنفيس مو طلقة، الا اذا شفت طلقة بالجرح او الاشعة او بالعمليات طلعتوها
تكتب بالتقرير الاولي اذا بالاشعة جسم غريب توصفه وتكول يغلب على وصفه شكل الاطلاقة النارية، واذا طلعتها تكول طلق ناري طلعنا من الجرح
من القصص الكارثية الي بيها تحديد مدخل ومخرج
جنود يركضون ورة مجرم، وفتحتين بجسم المصاب وحدة من الامام والاخرى من الخلف
ياهو المدخل؟ اذا تكول الامام، معناها المجرم ضربه، اذا تكول الخلف هو المدخل معناها جماعته ضربوه
التقرير انكتب على انه المدخل هو الي بالصدر وطلع الفيديو يكول المدخل هو الي بالظهر.

٢٠- ال Discharge note كلش مهمة بهاي الحالات، تكتب عالكارت انت طلعته لو هم اخذوه ، واذا موقوف لازم تتاكد انه استلموه منك والا يفلت او يسوي شيء بهالطلعة سواء ب اتفاق او بدون اتفاق، انت الي عليك تكمل شغلك وياه وتسلمه وبعدها يحيرون بيه.
اذا يطلع على مسؤوليته تكتب هالشي

٢١- الي ماعنده تقرير طبي عدلي اولي، ماعنده اي حق عند الدولة، يعني جرحى الحروب بدون التقارير الاولية ما يحصلون اي تعويضات عالاصابة وبهيج تكون ظلمته بعدم كتابتك للمشاهدات الاولية لمن اجاك للطوارىء بوقتها

لحد هنا خلصت المعلومات الي تذكرتها من الدورة، اذا احد بباله سؤال من المقيمين الي يسوون تقارير واكدر اجاوبه حاضر ان شاءالله
كلش مهم تعرف الصح من الغلط وتتعلم القوانين حتى لا توكع ب اخطاء ورة سنين عدة تنسحب للمحاكم بسببها وتنحكم مع وقف التنفيذ وانت كل غلطك انك كنت تجهل القانون بوقتها او محد شرحلك

بالرغم من انه تنزيل الحرارة ب الكمادات ( وية ال antipyretic) اسرع باستخدام الماء البارد لكن استخدام الكمادات بمي بارد اكثر ازعاجا للطفل من الصخونة نفسها
لذلك يفضل عملها بماء فاتر بحدود ٣٠ درجة حرارته ويفضل مسح الوجه واليدين والساقين افضل من وضع الطفل بطشت او بمسبح لأن التبخر من الجلد يساعد بتنزيل الحرارة
اهم شي انه تنطي antipyretic قبلها بنص ساعة لأن وحدها أثناء ال fever تزيد الطين بلة

◦ خلاصة البحث بموضوع الكمادات وطريقة استخدامها، ما مذكورة افضل طريقة للاستخدام بحالة الـ Fever ، مذكورة فقط بحالة الـ Hyperthermia، بالهايبرثيرميا تستخدم تحت الابط و بين الرجلين و عالرقبة لكون المكان غني بألاوعية الدموية وهالشيء راح يساعد بتبريد الجسم بأسرع وقت ممكن، لأنه علاج الهايبرثيرميا هو الكمادات حصراً ، ما يشتغل عدهم خافض الحرارة. مذكورة هالمعلومة بأكثر من بحث ومن ضمنهم الـ Uptodate
◦ اما بخصوص الـ fever لأنه الكمادات اذا تستخدمها قبل استخدام خافض الحرارة راح تضر المريض من خلال اجباره على زيادة الـ Heat production و زيادة الـ Shivering وتزعجه ، ولأنه استخدامها محصور فقط بعد اعطاء خافض الحرارة بنصف ساعة يعني لمن يتحول المريض من مرحلة الـ Heat production الى Heat loss لأنه الـ Thermoregulatory setpoint رجعت للرقم القديم، ولأنها تستخدم فقط لتسريع فقدان الحرارة، ولأنه دواعي علاج ارتفاع الحرارة بالاطفال السليمين من الـ Cardiopulmonary compromise هو تقليل الـ Discomfort فالصحيح هو ان تستخدمها بالطريقة الي ما تزعج بيها الطفل
◦ يعني طفل ما عنده مشكلة بقلبه ولا داخل عناية مركزة، وارتفعت حرارته، اذا حرارته ٣٨ والطفل نشيط ويلعب اصلا ميحتاج خافض حرارة، بالعكس نبقيها مرتفعة هيج حتى نستفاد من كونها Protective mechanism
◦ واذا حرارته ارتفعت لرقم خلته يكون ما مرتاح ومنزعج، فالحل ان ننطيه خافض حرارة اولاً حتى نغير الـ Thermoregulatory set point ، بعد ما تتغير راح يبدي الجسم بفقدان الحرارة من خلال التعرق. وبهاللحظة الطفل راح يشعر انه الجو حار
◦ تريد تساعده ؟ استخدمله كمادات، متريد تساعده؟ هي راح تنزل لوحدها، يعني ماكو ضرورة ملحة لأستخدام الكمادات واذا اصريت على استخدامها
◦ فتستخدمها بهاللحظة بماء حرارته طبيعية مو ماء بارد، وتخليها بالمكان الي ما يزعج المريض، سواء جبهته او رجليه او ايديه او بين رجليه او رقبته او تحت الابط، اهم شيء ما تنصح الاهل انه يسووها بطريقة مزعجة للطفل.
◦ ومذكور ايضاً انه المسح المستمر، تمسح المكان وتخليه ينشف بالتبخر، افضل من وضع الكمادات وتعوفها بمكانها. وافضل من السبح بالحمام.
◦ بالنهاية شكراً للزميل الي خلاني ابحث عن الموضوع
◦ الكمادات هي شيء بسيط، لكن هواية شائع، وهواية نشوف a doctor who advice mothers aggressively علمود الكمادات ويخلوهم يشعرون بتأنيب الضمير على انه شغلهم سيء بيها لدرجة يحسون بالتقصير تجاه طفلهم رغم الموضوع لا يسمن ولا يغني من جوع

شوكت ننطي دم بالاطفال ؟
اعطاء الدم بالاطفال ما يعتمد بس على نسبة الهيموغلوبين، يعتمد على الحالة السريرية للطفل نفسه وسبب فقر الدم
يعني ممكن مريض مستقر ودمه ٤، متنطيه دم، وممكن مريض دمه ٩ وتنطيه دم
السبب انه متنطي دم مو لانه انت شجاع متخاف، لا، انما علميتك تخليك تدرك مخاطر اعطاء الدم للاطفال، يعني ابو ال ٤ ، ممكن الدم يوديه بداهية، يسويله heart failure وممكن تنحل قضيته بالادوية، وممكن لازم تنطيه دم بس بحذر، مو تحددله بال tongue depressor و تعوفه
بحديثي الولادة، ننطي الدم للاطفال الي عدهم تكسر او عدهم تسمم دم جرثومي ودمهم دينزل او الي عدهم فقر دم anemia of prematurity او الي يصير فقر من كثر السحب، ننطيهم حسب سبب الفقر اذا وصل للنسبة المذكورة بالجارت ادناه.
الاطفال الي اكبر من هالعمر ماكو ارقام ثابتة، ونقسمهم قسمين
غير المستقرين .. واقصد بيهم الي عدهم cardiopulmonary compramise ، الي عنده shock ننطيهم حسب الحالة الي تستوجب ننطيها
وعادة ماكو واحد ال Hb فوك ال ١٠ وياخذ دم
اما الي حالتهم مستقرة نعتبر ال ٧ هي الحد الفاصل واكو استثناءات من هاي ال ٧
مو دستور يعني.
القرار يعتمد على هل الموضوع acute لو chronic
وهل المريض مستقر ام لا ، وهل معرض للخطر اذا تركته بلا دم لو ما معرض، وهل دمه راح يصعد لو ما يصعد وهل عنده اعراض لو ماعنده
ابو الثلاسيميا مثلا، شون يصعد دمه؟ فننطيه دم لمن يجيك وهو ميكدر يمشيله كم خطوة من التعب ( عنده اعراض) ميكدر يمارس حياته الطبيعية مثل قبل، او مثلا فقر دم الحديد، لانه دمه يصعد بالعلاج، اذا مستقر وضعه واموره زينة وماعنده اعراض تستوجب اعطاء الدم ممكن يكون دمه ٥ او اقل وتنطيه علاجات وتطلعه للبيت. وممكن دمه ٨ بس اعراضه شديدة او عنده عملية مستعجلة او عنده اعراض impending heart failure وتنطيه دم
المرضى الي عدهم نزف، طفل طك خشمه دم، نسبته كانت البارحة ١٣ اليوم ٩، وبعده ينزف.. تنطيه دم لان راح ينزل اكثر بعد، مريض اخر دمه كان ١٠ و نزل ٧ بعد النزف، بس توقف النزف وحالته السريرية مستقرة، وماعنده اعراض، تكدر متنطيه دم لانه راح يرجع يصعد لوحده
مريض G6PD ودمه ديتكسر بشكل مستمر ولون ادراره بعده طوخ، تنطيه دم لانه هو ديتكسر يعني تنطي منا يتكسر منا فهذا ما تنتظره ينزل جوا ال ٧
المرضى الي عدهم عمليات اذا مو طارئة نعدل سبب فقر الدم سواء نقص حديد او غيره و بعدين من يرجع طبيعي يجي يسوي عمليته، اما اذا طارئة، بشكل عام جوا ال ٨ ننطيهم دم، اما اذا ٨ فما فوق فهذا يعتمد على نوع العملية و شكد دم راح يفقد بيها وشكد فقد دم اساسا قبل العملية، هاي يحددها الجراح والمخدر ايضا من ناحية التخدير، لاي نسبة لازم يصعدون الدم قبل العملية او داخل العملية.
يعني لكل مريض indication
هذا ال indication تعرفه من خلال
١- تسأل نفسك، لو ابنك تنطيه دم ؟
٢- شكد دقات قلبه ومعدل تنفسه، عادة ال ١٦٠ دقة بالدقيقة وال tachypnea كلها علامات خطر
٣- عنده اعراض شديدة تعيق حياته اليومية؟
٤- اذا طلعته بدون دم، ما عليه خطوة واهله يكدرون يتابعون لو مهملين؟
٥- حيصعد دمه لو ميصعد، حينزل بعد لو بالعلاج اوقف النزول واخليه يصعد شوية شوية

هاي الاسئلة كلها راح تحدد مريضك مستحق دم لو ما مستحق وعلى ضوءها تعرف القرار الصح.
المصدر uptodate
لكن مو بالحرف الواحد انما شروحات من مصادر مختلفة