اليأس تغلغل في داخلي وانا اتابع صعود الاوكسجين الذي لا يزداد لامتلاء الرئة بالدماء

وكنا في سباق مع الوقت لدرجة ان اردنا اشعة لها لا وقت لدينا لانتظار المصور الاشعاعي للصعود الى وحدة الخدج واخذ اشعة لها، كنا نجلب الجهاز المتنقل ب انفسنا وناخذ لها الاشعة وسط عدم اكتراثنا لمخاطر الاشعاع وعدم اخذنا للاحتياطات اللازمة فالوقت كان العامل الحرج الذي علينا ان نستغله بشدة حتى لا نخسر المعركة
كان همنا الوحيد هو انقاذ هذه الطفلة
وكانت هذه خفارتي الاخيرة في الخدج، في صباح اليوم التالي تم تسليمها الى زميلي الذي استمر معها لآخر ثلاثة ايام متتالية من عمله في هذه الوحدة، بشرني بعد ثلاثة ايام
( تم انقاذ الطفلة بنجاح وحالتها الصحية افضل بكثير و هي حاليا على جهاز السيباب )
الشكر لله اولا ثم لكل ابطال هذه القصة من استاذتنا الدكتورة المبدعة د منال في وحدة الخدج مستشفى حماية الاطفال و اطباء دراسة التخصص الدقيق جميعهم و اطباء المرحلة الثالثة د افانين و د احمد و اطباء المرحلة الاولى د علي و د حسن و د حسنين و الكوادر التمريضية والمختبرية و المصور الاشعاعي و مهندسي الاجهزة الطبية و وحدة الاستعلامات لحرصهم على الوحدة و المعينين الذين لهم الدور في الحفاظ على نظافة المكان لسلامة الاطفال و هم من ساعدنا في انزالها للخدج و لجدة الطفلة واختها واهلها الذين كانوا يسهرون حتى الصباح وهم يتابعون نسبة اوكسجين الطفلة ويخبرونا بكل جديد
شكرا لهم جميعا
نشرت القصة واحنا فرحانين بيها عالسيباب
امها هسة دزتلي صورة للطفلة بضحكة مليانة فرح وهي تحتفل بعيد ميلادها
هالشيء نتمنى يكون رسالة لانفسنا وللاخرين انه الله ميضيع تعبك، و الساعة الي تقضيها لخاطر طفل تزرع فرحة عمر كاملة ببيوت الناس

اليوم حضرنا دورة تقارير طب عدلي اولي ، راح احاول اشرح الي تعلمناه عن الموضوع حتى يفيد المقيمين الي بتماس مباشر مع هالموضوع
١- اسمه تقرير طبي عدلي اولي
طبي : يعني تكتب الاشياء الطبية الي تشوفها Signs
عدلي : يعني تكتب الاستنتاجات بصيغة غير مؤكدة، مثلا ( انبعاث رائحة شبيهة برائحة النفط ، وجود سحجات ختمية … يغلب على وصفها انها اثار تطابق اسنان، يغلب على وصفها انها اثار شدة خارجية انبوبة أسطوانية، يغلب على وصفها انها اثار اظافر ، يغلب على وصفها انها اثار حرق بالسكائر)
اولي : يعني خلال ٢٤ ساعة من وقت الحادث فقط

٢- ممكن يجيك الشخص، يكولك الحادث صارله ٨ ساعات، وانت تدري بيه كذاب والحادث شكله مال يومين، وجايبلك ورقة فحص ومعالجة من مركز الشرطة، انت من واجبك هنا تسويله تقرير طبي عدلي اولي لكن بالمشاهدات تكتب ما يدل على كذب المدعي، تكتب مثلا وجود جرح مع اثار شفاء مثلا، يعني كلمات تدل على انه الجروح قديمة من خلال وصف الجروح او ذكر السكار الي صاير عليها، حتى القاضي يفهم انه الحادث قديم بس اكو ادعاء انه حديث

٣- ممكن يجيك المصاب، وتسويله كارت، وتكتب مشاهدات بالكارت، بس ميجيب ورقة فحص ومعالجة، يجيبها ورة اسبوع، هنا عادي نفس المشاهدات تنقلها وتنقل تاريخها و وقتها ، يعني التاخير مو بالمشاهدات صار انما بطلب التقرير وهذا وارد.. ماكو مشكلة انت تسويلهم التقرير بالمشاهدات القديمة
اما اذا ماعنده مشاهدات قديمة وعبر على الحادث ٢٤ ساعة، فهذا تحوله الى الاستشارية لاخذ تقرير نهائي بدل تقرير اولي

٤- الرقائق الشعاعية ونتائج الفحوصات تنذكر بالتقرير، تم ارساله الى الرقائق الشعاعية وكانت تخلو من وجود اجسام غريبة او كسور، او وكان يوجد كسر في العظم الكذا، لانه تقرير طبي ، قبل لا يكون تقرير عدلي، فلازم تكتب مشاهداتك الطبية

٥- كراس المقيم الدوري مال ٢٠١٥ و ٢٠١٨ واكو احدث منهم، بيه اغلاط، بخصوص نقل ادعاءات المريض، راح يتم انشاء كراس خاص بالتقارير الطبية العدلية الاولية.. الصحيح ان ما تذكر اي ادعاء، اذا المريض يدعي وجود الام بذراعه، راح تفحصه وتشوف اكو
Tenderness
Limitation of movement
اذا ماكو متكتب شيء، واذا اكو تكتب وجود الم بالمكان الفلاني وتقيد بالحركة ( هنا انت دتكتب signs ما تكتب symptoms )
لذلك الادعاءات ما تنكتب لانها اعراض
تريد تكتبها ؟
اكتبها داخل الكارت بالهستري.. الهستري من حقك تكتب بيه اي شيء يكوله المريض
والقضاة هم من خلال اطباء الطب العدلي راح يسحبون الكارت والتقرير حتى يقروه

٦- يمنع منعا باتا تسوي تقرير طبي عدلي اولي ب اي مستشفى برايفت.. ممنوع ممنوع حتى لو ينضغط عليك من مدير المستشفى حتى لو الاهل يجيبون الورقة فارغة بس تمليها حتى لو انت مستقبله بالطوارىء ، والحل شنو؟ اذا الاهل يروحون للحكومي مراح يحررولهم لان عبر مثلا ٢٤ ساعة
الحل انه توثق المشاهدات داخل الكارت او الفايل مال المريض، والاهل بدون ان يحصلون على تقرير طبي عدلي اولي يذكرون للقاضي انه مشاهداتهم موثقة بفايل المريض فراح يطلبون الفايل كله
وبهيج حقهم ما يكون ضاع
بنفس الوقت انت حميت نفسك
لان تحرير تقرير طبي عدلي اولي بمستشفى غير حكومي يعتبر مخالف للقانون

٧- الي يسوي التقرير الطبي العدلي الاولي هو المقيم الاقدم، واذا ما موجود وبمركز صحي، فيحق لطبيب التدرج يسويه
اما المقيم الدوري فلا من قريب ولا من بعيد مسؤول عنه
انت مقيم دوري ومسوي تقرير وانسحبت للقضاء
القاضي اذا يريد يساعدك يستدعي الاقدم الي وياك خفر بذاك اليوم ويحاسبه ليش ممسوي التقرير وشامره براسك
واذا يريد يشد وياك، يكولك ميحقلك تسوي تقرير ليش مسويه !

٨- اكو نقاط بين الواقع والقانون مختلفة جدا.. مشكلة القانون ما يحاسبك وفق الواقع مالك انما يحاسبك وفق القانون، فماعندك اي مبرر امام القضاء
ماتكدر تكوله مجبور ، المقيم الاقدم ميقبل يسويه، ماكو غيري.. تتحمل مسؤولية ختمك

٩- يطالب الاهل بورقة شرطة، زين اذا الاهل هم المجرمين، تتوقع يجيبون ورقة شرطة؟ القانون يكول انه الطبيب مكلف بتبليغ مركز الشرطة مو الاهل يبلغون المركز
اذا شكيت انه الموضوع اغتصاب او جريمة ف انت تبلغ اي موظف من وزارة الداخلية بمستشفاك وهو يبلغ مركز الشرطة، واذا ماكو تبلغ المعاون الإداري بضرورة تبليغ المركز
واي مركز مو الا حسب الرقعة الجغرافية
بعض المستشفيات نظامهم حلو، كيسات الحوادث والاعتداءات والتسمم وغيرها كارتهم يكون احمر، ومباشرة يجي شرطي من المركز القريب يكولك دكتور فتحتوا كارت احمر لهالمريض بشنو شاكين!
هاي الفكرة قابلة للتطبيق وتخلي مسؤولية ابو الاحصاء لمن تطلب منه كارت احمر يبلغ المركز مباشرة.

١٠- الوعي تام، الوعي مشوش؟ ليش مشوش على شنو اعتمدت؟ لازم تكتب الوعي مشوش حيث كان مقياس غلاسكو للاغماء ١٠، او حيث ان المصاب لا يعرف الزمان والمكان والاشخاص

١١- الفعاليات غير مستقرة، تذكر شنو الي ما مستقر بيها، ضغطه ، نبضه، تنفسه؟

١٢ - المستلم الي بنهاية الورقة، هو المكلف من مركز الشرطة، مو الاهل، لازم تسلم التقرير للشرطي ميصير تنطيه بيد الاهل. هذا القانون هيج يكول وهم يحميك من انه ( ليش ما كتبتلنا كذا وكذا ) الشرطي اذا يريد ينطيهم التقرير بعد هو يتحمل مسؤولية تصرفه

١٣ - ارى ان سبب هذه الاضرار ، والمريض يحتاج الى مدة كذا ، هاي كلها تنكتب مو يتشخبط عليها، والمريض بعد ما يستلم الشرطي التقرير خصوصا المخمورين اذا يحتاج يبقى بالطوارئ مراقبة تبقيه، واذا طلعته توثق عالكارت ليش طلعته وشون كان وضعه، من القصص الحقيقية، مخمور مسويله تقرير بالطوارئ ومطلعيه ، مطعون بعدها بدرنفيس بصدره وصار الاتهام عالطبيب انه كان مطعون اصلا وما كاتبها بالتقرير، لو بس ذاكر بكارت الخروج انه خرج المصاب بعهدة مثلا المركز الفلاني او السلطات وهو بحالة جيدة. كان انقذ نفسه

١٤- الوصف جدا مهم، تنوصف من الاعلى الى الاسفل، من اليمين الى اليسار، من الاخطر الى الابسط
يعني تبدي بجروح الرأس، ثم الجزء السفلي من الجسم، تبدأ باليمين قبل اليسار، تبدا بالخطيرة قبل البسيطة
الاثار توصفها بدقة وتكتب ( يغلب على وصفها اثار اسنان متطابقة) لان بعد كم يوم ميبقى اثر يدل على انه الطفل معضوض مثلا
السكين تكتب يا حافة حادة وياهي لا، هذا يدل على سكين، اذا الحواف بشكل Z ممكن مطعون بمقص
اذا الجرح بشكل دائري منتظم، وتحيط بيه حلقة ثانية هذا يدل على سلاح قريب ( انتحار مثلا) اما اذا اثار بارود، فهذا قريب بس مو ملاصق، معليك بمدخل الطلق ومخرجه ابد، توصف بس الجروح واشكالها وما تقيس العمق تكتب مجهول العمق
الحرق تكتب حرق ومساحته ويا درجة
وتكتب لا توجد اثار شدة في المناطق غير المتأثرة بالحرق ( لانه المناطق المحترقة ممكن اثار شدة بيها و متغطية بالحرق متنشاف بعد)

١٥- الملابس كلش مهمة، لا تمزقها، اذا انرفعت عن المريض توضع بكيس ورقي مو نايلون لان ياثر عليها النايلون وتتسلم لمركز الشرطة وتكتب بالكارت او التقرير انه سلمتها للمركز
١٦- ما تاخذ مسحات ابد بحالات الاغتصاب او اي شيء ثاني، المسحات بيها تقنية خاصة يسووها، انت راح تاخذها غلط، الي تسويه انه توعي الاهل ب اهمية توجههم للطبابة العدلي لاخذت مسحات
١٧- الفيميل المغتصبة اذا بس انت ماكو غيرك يسوي التقرير لازم تشوف اكو نزف خارجي لو لا، مو شغلك تشوف غشاء البكارة بس شغلك تشوف الجروح الخارجية بحضور فيميل من المستشفى واذا موجودة طبيبة بعد احسن، بس لا تسوي الي سويناه كلنا وهي نكتب الي شافته الممرضة بدون ما نشوف بعيوننا، اذا الاهل يرفضون او المصابة ترفض تكتب على ورقة الفحص والمعالجة رفضوا انك تفحصهم وما تنطي تقرير

١٨- اكو تقرير اسمه دوري ، كل اسبوع يطلبوه يتابعون بيه حالة المريض سواء راقد او طالع، يسويه الاختصاصي ، واكو تقرير نهائي ايضا يسويه الاختصاصي، من اخطاء التقرير النهائي الشائعة انه يكتبون لم يتم اكتساب الشفاء التام و يحال المريض الى دائرة العجز والعطل مادري شسمها، المهم الصحيح انه ما يتحول لهاي الدائرة الا يكتسب الشفاء التام

١٩- لا تبت بقضية ابد، لا تكتب مدخل طلق ناري، شعليك طلقة لو مو طلقة، اكتب بس وصف الجرح ولتكتب مدخل، احتمال درنفيس مو طلقة، الا اذا شفت طلقة بالجرح او الاشعة او بالعمليات طلعتوها
تكتب بالتقرير الاولي اذا بالاشعة جسم غريب توصفه وتكول يغلب على وصفه شكل الاطلاقة النارية، واذا طلعتها تكول طلق ناري طلعنا من الجرح
من القصص الكارثية الي بيها تحديد مدخل ومخرج
جنود يركضون ورة مجرم، وفتحتين بجسم المصاب وحدة من الامام والاخرى من الخلف
ياهو المدخل؟ اذا تكول الامام، معناها المجرم ضربه، اذا تكول الخلف هو المدخل معناها جماعته ضربوه
التقرير انكتب على انه المدخل هو الي بالصدر وطلع الفيديو يكول المدخل هو الي بالظهر.

٢٠- ال Discharge note كلش مهمة بهاي الحالات، تكتب عالكارت انت طلعته لو هم اخذوه ، واذا موقوف لازم تتاكد انه استلموه منك والا يفلت او يسوي شيء بهالطلعة سواء ب اتفاق او بدون اتفاق، انت الي عليك تكمل شغلك وياه وتسلمه وبعدها يحيرون بيه.
اذا يطلع على مسؤوليته تكتب هالشي

٢١- الي ماعنده تقرير طبي عدلي اولي، ماعنده اي حق عند الدولة، يعني جرحى الحروب بدون التقارير الاولية ما يحصلون اي تعويضات عالاصابة وبهيج تكون ظلمته بعدم كتابتك للمشاهدات الاولية لمن اجاك للطوارىء بوقتها

لحد هنا خلصت المعلومات الي تذكرتها من الدورة، اذا احد بباله سؤال من المقيمين الي يسوون تقارير واكدر اجاوبه حاضر ان شاءالله
كلش مهم تعرف الصح من الغلط وتتعلم القوانين حتى لا توكع ب اخطاء ورة سنين عدة تنسحب للمحاكم بسببها وتنحكم مع وقف التنفيذ وانت كل غلطك انك كنت تجهل القانون بوقتها او محد شرحلك