تجربة شخصية كدا .
النهاردة كنت رايحة الامتحان متوترة بحكم إني هكمل غصب عني وخايفة بقى وكدا .
المهم ركبت العريبة وقربت أوصل الجامعة لقيت السواق وقف يفول العربية ونزل وساب أغنية لمصطفى كامل بتقول وأنا هشرب المر لوحدي ليه أشربه معايا .
مكنتش دي المشكلة معايا خالص، المشكلة إن الشاب اللي كان قاعد جمبي قعد يعيط بإفراط .
وأنا أهديه واللي قدامي يهديه والأغنية شغالة وأنا خايفة والسواق مش موجود والناس اللي قاعدة قدام في ماية المخلل والشاب يعيط وأنا تكة وكنت هعيط لعياطه .
المهم خلاص ونزلت وخدت نفس عميق علشان أعدي الطريق بتركيز فالطريق لقيته واقف فبعدي بين العربيات لقيت الشاب اللي ورايا بيقول لبنت في التليفون «لو مدلعتش عليكي هتدلع على مين يعني» .
وحقيقي كان هاين عليا أرمي نفسي قدام أي عربية وأخلص خصوصا بعد ما أنتبهت إن اليوم كان تلات ودا من أكتر الأيام التقيلة على قلبي 🥲
أد إيه الواحد بيعاني من العالم الخارجي بجد أرحمونا بقى😂

عندي تفاصيل كتير أوي في حياتي طفولية وبسيطة وصغيرة هي سبب لسعادتي زي إني أرسم وردة، أسقي زرعة، ألون شجرة!
بس للأسف السعادة دي مش بتدوم علشان أنا معنديش اللي أشاركه أصغر تفاصيلي اللي بتبسطني فبفقد شغفي وبسكت .

بسنت سيد .

يا حبيبُ عمري السابق والقادم والحالي .
يا حبيبُ كل الأوقات .
أُحبُك .

بسنت سيد .

أنا قلبي مدابش في هواك بس .
- أنا قلبي داب في هواك وفي ضحكتك وفي حنيتك وفي عيونك!

بسنت سيد .

خلينا متفقين أن أي علاقة بيدخل فيها طرف تالت بتبوظ حتى لو كان الطرف دا متدخل للتصالح .
- العلاقات مبتستمرش غير لما بيكون بابها مقفول على أطرافها الأساسيين فقط، وأسهل وسيلة لهدمها وجود الطرف التالت في حياة حد فيهم أو في حياتهم هما الاتنين .

بسنت سيد .

معقول الرجالة قيمتها في المجتمع قليلة لدرجة إن كل اللي بيتخطفوا ستات!!
ولا يمكن المجتمع بيعاني من خلل فبيعملوا توازين بأنهم يقضوا على الستات!!

بسنت سيد .

المشاعر الدافية هي اللي بتولد الحب .
لأن مفيش حب بمشاعر حادة .

بسنت سيد .

أنا لو رجع بيا الزمن هختار أتعرف على نفس الأشخاص وأعيش نفس الظروف علشان الماضي هو السبب في تكوين الشخصية اللي أنا عليها دلوقتي ولولاه مكنتش هعرف أعيش .

بسنت سيد .

فككوا من الشويتين الحلوين بتوع البدايات دول اللي بيحب مبيقساش، مبينساش، مبيبيعش!
- اللي بيحب بيبيع الدنيا كلها ومبيشتريش غير حبيبه .

بسنت سيد .

بلاش كبرياء يا جماعة لازم تاخدوا وقتكم في كل حاجة بتتخطوها أو مش عارفين تتخطوها .
بلاش كبرياءكم يغلب عليكم وتبقوا سبب في ظلم نفسكم .
بلاش المظاهر الكدابة دي مفيش إنسان معندوش قلب وإحساس، إنما الناس اللي قلوبها جشعة دي ميليقش بيها غير الوحدة ربنا لا يقابلكم بيهم ولا يقابلهم بيكم .
Take your time until be fine .

بسنت سيد .

أنا مبتكلمش في الكورة علشان أنا مبفهمش فيها ودا باستثناء النادي الأهلي علشان هو كدا كدا غني عن الفهم والتعريف .

بسنت سيد .

الحب مش كفاية لاستمرار أي علاقة، ولا هو الأولوية .
الحب هيفضل عامل من عوامل نجاحها .
في حاجات كتير أوي أهم من إنك تكتفي بحب شخص ليك؛ في حنية، في قلب لين، في تفاهم، في رحمة ومودة، في تقدير واحترام، في إلتماس للعذر مرة واتنين وألف، في خوف وأمان، في إحتواء وتواضع، في هدوء بالنفس .
ويأتي بعد كل ذلك الحب .

بسنت سيد .

بفضل أهتم بشعري وأطوله في الشتاء علشان يبقى شكلي حلو وييجي في الآخر فصل نتن يخليني أشيله من كتر الحر والزهق .

بسنت سيد .

كيفَ
لِقلبي
أنْ
يتَحملْ
كلَّ
ذلِك
بِمفرده؟! .

بسنت سيد .

إن شاءالله ربنا مش هيساوي اللي بيهوي لنفسه في الحر دا باللي بيلاقي حد يهويله .

بسنت سيد .

أنت مش أبأس من واحد الناس اللي بتروح عندنه بتحسده علشان عنده تكيف وهو أصلا مش شغال .

بسنت سيد .

أتمنى أن أقع في حب شخص كلما رآني حزينة ضمني إليه بقوة دون أن يجعلني أتحدث حتى تهدأ نفسي من الندوبات .

بسنت سيد .

1/25
- ساعات بخاف تبقى ذكرى
وتسيب في عيني كل الدموع .
- ساعات بخاف ييجي بكرة
وأفضل مشتاقلك وأنا مهموم .

6/9
- وبقيت الذكرى اللي هعيش باقي حياتي عليها
ودموعي خلاص مبقاش يكفيها مناديل الدنيا علشان تمحيها .
- ورجعنا أغراب من تاني بعد ما كنا أجمل حبيبين
وأهو ضاع الحب وأيامه وبقينا يا حبيبي اتنين تانيين .

بسنت سيد .