الحياة دي مليانة وجع دماغ كتير بس الشاطر اللي يوجع الدماغ مش اللي تتوجع دماغه! .

بسنت سيد .

هي بندانة واحدة تقعد معانا العمر كله لو اتغيرت الوش والملامح وكل حاجة بتتغير معاها .

بسنت سيد .

الواحد محتاج يجدد الخوازيق في حياته شوية يعني مش كل مرة الصدمة تطلع من نفس الأشخاص وكل مرة نتفاجئ، لازم ننوع علشان نجرب شكل الصدمات التانية لأن كدا مفيش ساسبينس في حياتنا خالص .

بسنت سيد .

وأنا بواسي الكل نسيت أواسي نفسي علشان كدا وقعت .

بسنت سيد .

محتاج أروح لعالم تاني ميبقاش فيه غيري أنا؛ أنا وبس .

بسنت سيد .

لـِستي...
اللي عمري ما روحتلها مكسورة وردتني
وعلى طول قاعدة معاها وانا مجبورة
جت زي انهاردة مشيت وسابتني مكسورة

حبيبة عرفة

متفضحش حد .
- خليك أمين وحافظ للسر مهما كان حجمه أوعا تفضح حد أو تقول سر حد علشان تنجي نفسك من موقف حتى لو كانت الفضيحة دي هي الوحيدة اللي هتنجيك .
- لو السكينة على رقبتك أحتفظ وموت جواك كل حاجة ممكن تكسر بني آدم متنجيش نفسك على حساب غيرك .
- لو موت وأنت ساتر عبد أحسن ما تموت وأنت عايش عمرك كله على فضيحة عملتها لإنسان كل ذنبه إنه استأمنك على سره .
- اكتموا جواكم مشاكل وأسرار غيركم وافتكروا إن كما تدين تدان وزي ما هتفضح هتتفضح وزي بتعمل هيتعمل فيك .

بسنت سيد .

الناس مبقاش فارق معاها أنت بتمر بإيه أد ما بيفرق معاها أنت معاملتك لينا إيه .
يعني مش مهم أنت بتموت ومهلوك نفسيا وجسديا ومعنويا ومحطوط عليك بس المهم تعاملني كويس وتتحرق أنت ومشاكلك وهمومك وقرفك .
الحياة دي بقت صعبة أوي ومبتجيش غير على الإنسان الصامت اللي هيموت من قهرته على كل حاجة بشعة بتحصله وبيمر بيها .
- حتما النهاية تقترب .

بسنت سيد .

حتى الحبيب بقى ضمن الحكاية .
كنت فاكرة إن محدش غيره صادق معايا طلع هو أكبر كدبة .

بسنت سيد .

ويابخت اللي بيرمى حموله على الله مبتتردلوش دعوة! .

بسنت سيد .

أمي أولا وثانيا وأخيرا والباقي تعوضه الأيام .

بسنت سيد .

ولما القريب ييجي عليا هيسيبوا إيه للغريب يعمله؟!

بسنت سيد .

تعلم كيف تكون قويًا فالحب لا ينصُر الضعفاء .

بسنت سيد .

مفيش أسوأ من إنك تبقى قاعد وسط زحمة أصوات ومش سامع غير صوت الصراعات اللي بتحصل جواك بس .

بسنت سيد .

بعد إذن الظروف السيئة تديني هدنة أدي لكل موقف حقه في العياط بدل ما أنا مش ملاحقة أعيط على إيه ولا إيه ولا إيه .

بسنت سيد .

بمناسبة الامتحانات 😂!

فترة الPMS .
- كل البنات بتمر بالفترة المملة دي وبيتعمل عليها كوميكسات بايخة جدا والحقيقة إنها مش مضحكة خالص .
- الفترة دي المفروض نراعي فيها هرمونات البنت اللي بتتحول ٣٦٠ درجة، ونفسيتها اللي بتتغير، وصحتها اللي بتدهور .
«في ناس مريضة طبعا هتضايق من البوست وهتقولي معندكيش حياء ونينينينيننيي ملناش دعوة بيهم، الهدف من البوست التوعية والتقدير» .
- يعني المفروض الزوج يراعي زوجته ويستحمل تقلباتها والخاطب وحتى الأهل والصحاب بين بعضهم، أغلب المشاكل اللي بتحصل فجأة واللغبطة والاكتئاب اللي بيحصل لأي بنت بدون أي حوادث بنسبة كبيرة جدا سببها الهرمونات المتغيرة اللي بتيجي في الفترة دي .
- يعني حضراتكم المفروض تحتووا الموقف وتقدروا الفترة السيئة اللي بتمر بيها البنت مش تزودوا الهم وتستهينوا بالوضع وتبقوا سبب في إنه يزيد أكتر .
«نفس الناس المريضة هتقولي أنت بتحرضي البنات على البجاحة ويقولوا اللي عندهم ونينيننينيني، لو حضرتك خاطب هتبقى ملاحظ تغيرات حبيبتك فجأة وتقدرها من غير ما تتكلم» .
- الفترة دي إحنا كبنات مخلوقين بيها فطرة من عند ربنا ليها أسبابها كل اللي محتاجين فيها التقدير والاحتواء والتغلب على أي تصرف ممكن يؤدي إلى مشاكل أو خراب بسبب خلل هرموني وتعب أعصاب مؤقت .

بسنت سيد .

طول ما البنت عايشة في خراب ببيت أهلها عمرها ما هتفكر تبني بيت ليها .

بسنت سيد .

الحياة حلوة علشان حياتنا فيها ناس محلينها لو راحوا كل حاجة حلوة هتروح معاهم .

بسنت سيد .

خلينا متفقين إن أكتر حاجة الست بتحتاجها من الراجل اللي معاها التقدير .
- علشان تبقى راجل بجد لازم تقدر اللي معاك؛ كل مجهود الست بتعمله لازم تديله قيمته حتى لو كان المجهود دا أنها تشيل إزازة ماية .
- طول ما الست شايفاك بتقدرها هتديك كل حاجة عندها وبزيادة .
- الراجل الصح هو اللي يعرف يكسب الست اللي معاه بكلمة واحدة، بتصرف واحد، بنظرة!
- الست مش نكدية؛ الست عايزة راجل يفهمها ويقدرها قبل ما يحبها .

بسنت سيد .