لو فضلت تركز على الحواجز اللي بينك وبين أحلامك عمرك ما هتحقق حاجة .
خليك إيجابي وحفز نفسك، أنت تقدر تكسر كل الحواجز دي بالعزيمة والإصرار والإرادة اللي هيوصلوك للمكان اللي أنت عايزه .

بسنت سيد .

مش مهم تخسر، المهم إنك متنسحبش .
مهما كانت عوائق الطريق كمل، أوعا تقف، ولا ترجع .
مجرد محاولتك للاستمرار أكبر دليل على أنك شخص ناجح .
- أوعا تحط الفشل في قاموس حياتك وتضعف وتنسحب .
الحياة عايزة مواجهة والأهداف عايزة محارب قوي ميوقفش مقاتلة غير لما ينتصر .

بسنت سيد .

أنا كنت فاكرة إن الوعد دا حاجة كبيرة أوي زي الحلفان بالله ملزم علينا منخلفوش ونصدق فيه منكدبش .
لكن مع الوقت أكتشفت إن أصلا الناس بتحلف كدب عادي فإزاي هيصونوا الوعود!

بسنت سيد .

أنا كنت فاكرة بمجرد ما الإنسان يتم ال 20 سنة فهو كدا بدأ حياة الكبار بالتالي بقى شخص عاقل وواعي ومسؤول وناضج كفاية مش مراهق ودماغه أد السمسمة وكدا!

بسنت سيد .

الحمدلله الواحد عاش 21 سنة مفهومش غير السنة الأولى من حياته هي اللي حلوة بس .

بسنت سيد .

أنا بحب الحرية والاستقرار وتحمل المسؤولية والحياة الهادية والناس الطموحة والشخصيات القوية .
أنا بحب أي حاجة مثالية وبسعى علشان تفضل دايما كلها مثالية .
فتفتكروا ممكن أتنازل عن أي حاجة فيهم علشان الحُب!!

بسنت سيد .

أنا كنت فاكر لما أبقى في حالي الناس هتبقى في حالها وأنا أعيش في سلام!
لكن فجأة لقيت كل الناس في حالي أكتر مني!

بسنت سيد .

كل الناس قلوبها بتعشق كل جميل إلا قلبي مبيعشقش غير الحنينين حتى لو مش حلوين .

بسنت سيد .

كل ما مودي يتغير بدخل القناة علشان أشوف الريأكت على أي بوست وحقيقي الريأكت بيفرحني جدا جدا🤍
شكرًا في محاولتلكم لانبساطي من غير ما نعرف بعض🤍🤍🫶🏻

أنا مش حزين أنا وحيد!
الزعل بيروح مع الوقت لكن الوحدة محدش بيسد مكانها .

بسنت سيد .

سيكون الفرج قريبًا، وإن تأخر فلعله قادم بِبشرىٰ ستطيب جُرحى قلبك وكأنه لم يُخدش بعد .

بسنت سيد .

كل الدول حاضرها أفضل من ماضيها إلا مصر سواء شعبًا أو دولة!

بسنت سيد .

أنا بقرأ كتير بوستات عبارة عن (دي غيرانة مني، دي هتولع مني، دي مش عارف أي، ودا منفسن، ودي حسداني، إلخ ..)
كون إن أنت إنسان مراقب مين مولع منك ومين بيحسدك يبقى أنت إنسان ناقص وفاضي ومعندكش ثقة في نفسك وبنسبة كبيرة جدا أنت اللي غيران منه .
الشخص اللي واثق من نفسه بيشق طريقه علشان يوصل لحاجة معينة مش بيبقى عارف مين ماشي جمبه، مش هيفضل يبص يمين وشمال هيمشي طريقه بثقة .
- جو التلقيحات والكلمات نفسها رجعية جدا ومش حلوة في حق نفسك لأن دا بيعكس انطباع الناس ليك .
- حتى لو في حياتك شخص من دول ف أنت اللي بأيدك الحل تتخلص منه بكل هدوء واحترام ولو مش هتقدر يبقى تتعامل معاه بطريقة خاصة مش تفضل تنزل عن نفسك إن أنت محور الكون أنتو أساسا معفين كدا كدا .
وآخرًا: لا حد بيغير منكم ولا بيحسدكم ولا أصلا شايفكم بلاش فضا واشغلوا بالكم بحاجة مفيدة بدل ما أنتوا مركزين على حاجات ملهاش أي ستين لأزمة .

بسنت سيد .

كل حاجة كويسة عملتها وملقتش مقابلها أو العوض بتاعها متزعلش .
ربنا عمره ما نسي حد وعارف كل واحد بيعمل إيه وعمل إيه ونواياه إيه .
يمكن أنت مخلوق في الدنيا علشان تمتحن وبس وكل اختبار أقوى من اللي قبله وملكش نتيجة على الأرض!
بس خليك واثق إن نتيجتك محفوظة في الآخرة ومستنياك .
اصبر، وكمل طريقك، واسعى في الخير ومتستناش أي مقابل ولا عوض ربنا مدبرلك حياتك وبيساعدك علشان تعدي كل صعب فيها بس أنت مش حاسس .

بسنت سيد .

كل أد تجاربك الفاشلة على أد ما هتفضل تتعلم دروس أقوى وأكبر من اللي قبلها .
مهما كانت محاولاتك لتكون إنسان مثالي لازم هيحصل غلط أما بقصد أو بغير قصد، بس المهم حجم الغلط إيه! هل هتفضل ندمان عليه طول عمرك؟ ولا تقدر تصلحه وكأنه محصلش!
- كل الناس الغلط اللي دخلت حياتي هما اللي ليهم الفضل في الإنسان اللي أنا عليه دلوقتي، لو مكنتش غلط مكنتش هفهم الحياة ولا هبص لقدام ولا هفكر في نفسي وأعيد حساباتي .
- التجربة كانت غلط لكن النتيجة كانت صح وهي إني كسبت نفسي .

بسنت سيد .

أنا نجحت في حاجات كتير بس فشلت فإني مخليش الحزن يسيطر عليا وعلى مستقبلي .
- في 2021 أتعمل معايا حوار في جريدة ما وأتسألت سؤال؛ هل أنا الظروف والبيئة بتأثر على الكاتب ولا لأ؟ كانت إجابتي لأ وقولت إن اللي عايز يعمل حاجة بيعملها وعمرها ما كانت عامل تأثير .
- أنا في 2023 بقول إن الظروف عامل مهم جدا لو مكنش السبب الرئيسي!
- أنا بقالي سنتين مش عارفة أكمل الرواية اللي كنت متحمسة ومحمساكم معايا بيها .
- أنا متقدمتش خطوة علشان أنا مش عارفة أعيش حياتي بالشكل اللي أنا محتجاه وفشلت في كل محاولاتي، بس اللي أنا متأكدة منه إني هفضل أحاول حتى لو قعدت سنة كمان أو اتنين أو عشرة!

لولا الماضي ما كان ليا حاضر .
كل ما تكبر يوم كل ما هتتعلم لسنة .
التغيير عمره ما هيقف ولا حياتك هتفضل ثابتة، المهم ميبقاش الحاضر هو بقايا الماضي!

بسنت سيد .

تقريبا أنا الوحيدة اللي بكره كلمة (اها) .
عمري ما حبيتها ولا حبيت اللي بيقولوها!
ما تقولوا آه عادي يا جماعة! هو انتوا بتقولوا في الحقيقة اها!
مش عارفة ليه بتمشوا ورا التغيرات حتى وهي مش لايقة عليكم!
- خليكم بطبيعتكم وحريتكم بلاش تصنع علشان تبانوا روشين .

بسنت سيد .

أنا مش عايزة واحد بيشجع كورة لأ أنا عايزة واحد يشجعني أنا بس .

بسنت سيد .

مفيش شخص صح هيبقى ليه فرصة تانية .
الفرص التانية دي للناس الغلط اللي بتدخل حياتنا وبعدين يدعوا بالتغيير فيطلبوها للاصلاح .
الشخص الصح مبيسيبش الفرصة الأولي تضيع منه وبيفضل محافظ عليها وحاططها جوا قلبه علشان ميخسرهاش .
- الفرصة التانية دي ليك أنت علشان تختار بيها الشخص الصح اللي يمحي الفرص من قاموس حياتك .

بسنت سيد .

أنا مش متوحدة ولا كئيبة ولا حويطة .
أنا بحب الحياة الخاصة؛ الحياة اللي مفيهاش غيري أنا واللي يخصني!
عندي أسرار آه بس محد ليه الحق يعرفها غير لو أنا حبيت أقولها ويوم ما أفكر أقولها هختار ناس بثق فيهم أكتر من نفسي حتى لو كانت تافهة .
المنتشر إن الناس بقت حياتها كلها عالملأ لدرجة أننا عارفين هما أكلوا كام مرة فاليوم!
لكن الطبيعي إن حياة الإنسان تخصه لوحده بكل تفاصيلها ومش من حق أي حد يسأله عليها .
- حافظوا على لسانكم وبيوتكم وحياتكم وأسراركم وافتكروا كويس ⬇️
- مفاتيح البيت لو بقت في إيد حد غير مُلاكه هيخرب .

بسنت سيد .