پەندی پێشینیان

⭕️ پەندەکانی پیرەمێرد

بۆ فەیز و ڕەحمەت شەرت ئیستیعدادە
قابیلیەتیش بەهرەی خوادادە

گەزۆ بە پەلکی بییەوە تاڵە
لەسەر دارمازوو هەنگوینی قاڵە

بارانی نیسان لە دەریا باری
لە ناو سەدەفدا بوو بە مرواری۳

کەچی لە دەشتا گوژاڵک ئەڕوێ
لافاو پیاو ئەبا لە پردی کەڵوێ

بەم ڕەنگە هەرچی سرووشتی بەدە
بۆ زیانکاری سەدی نەوەدە

تەجرەبەی زۆری تاقی کردەوە
بەدخوو دەستی بوو کەوتە کردەوە

"إِنَّ الْإِنسَانَ لَيَطْغَى" وایە
ئەووەڵ سوورەیە فەرموودەی خوایە

ئێمە بۆ بێگار بە ئیستیعدادین
چونکە پەروەردەی جەور و بێدادین

فیرعەونێکی واین مووسامان بۆ هات
نەیتوانی بەند بێ سووکێ بۆی هەڵات٨

هەروەک "پاپاغان" قورئان ئەخوێنین
لە پێستی گورگا وەک مەڕ ئەنوێنین

یارییەک داهاتوە بۆ دەستەی سەرکار
پێ لە جەواڵا ڕاکەن بۆ سەر شار

✍ پەندەکانی پیرەمێرد، ژین ژمارە ۸٥۹، لاپەڕە ٤٦۹، چاپی ساڵحی، لاپەڕە ٥۰۰.
ــــــــــــــــــــــــــــــــــ
۱. فەیز: به‌خته‌وه‌ری کامڕه‌وایی. بەخشین، کەرەم. لێ‌بوردن.
۲. ئیستیعداد (قابیلیەت): به‌هره‌؛ ئاماده‌یی‌، لێهاتوویی‌، توانایی‌، ژێهاتی، مرخ، له ‌بارا بوون، له‌ باران‌دا بوون‌.
۳. سعدی:
مثال قطرهٔ باران ابر آذاری
که کرد هر صدفی را به لؤلؤی حامل
٤. گووژاڵک: ژووزالک؛ زرکەتاڵ؛ زڕکەتان؛ هەنزەل؛ کوزارک؛ تەحلەسێف؛ تەحلەسێڤ؛ گوهێ‌شەیتانک؛ شووتیەمارە؛ شوومی شەیتوونی؛ تاڵگەگووژاڵک؛ تاڵگەشمتی؛ تاڵەشووتی؛ میوەیەکی خڕی زەردڕەنگە بە قەرای پرتەقاڵ، کە زۆر تاڵە و پێستی ناسک و ڕەقە و بۆ دەرمان دەشێ.
٥. چۆمی کەڵوێ: زێی بچووک یان زێی کەڵوێ ڕووبارێکی کوردستانه کە لە ڕۆژھەڵاتی کوردستانەوە سەرچاوە دەگرێت و باشووری کوردستان تێپەڕ دەکات و دەڕێژێتە سەر ڕووباری دیجلە. درێژایییەکەی ٤٠٠ کیلۆمەترە.
٦. "كَلَّا إِنَّ الْإِنسَانَ لَيَطْغَىٰ٦ أَن رَّآهُ اسْتَغْنَىٰ" سورة العلق. [وەرگێڕاوی؛ مامۆستا هەژار]: نەخێر، دیارە مرۆ سەربزێوی دەکا؛ (٧) کاتێ دیتی لە خەڵکی دی بێ نیازە.
۷. جەور: سته‌م؛ زۆر؛ له‌تم؛ ناهه‌قی‌.
۸. مەبەست لە مووسا شاکر یا مووسا کازم پاشایە کە موتەسەریفی سلێمانی بووە و دوای مانگێک بەجێی هێشتووە.
۹. پاپاغان: تووتی، بەبەغا.
👇
@pandakanipiramerd

878 viewsکەماڵ ڕەحمانی, edited 06:22