2-3 йил аввал Қашқадарё вилояти, Чироқчи туманидаги бир ҳамшира опа эшакда ишга бориб келаётгани акс этган видео тарқалганди.
Кейин опа элнинг назарига тушди, опани йўқламаган раҳбар ва берилмаган рағбатни ўзи қолмади.

Ҳатто Чироқчининг собиқ ҳокими Файзулла ака вилоят ҳокими топшириғига асосан электроскутергача берганди.
Опа меҳнат қилди, меҳнатига яраша давлат ҳам ҳурмат ва иззатни унутмади албатта.

Аммо шу опани яна эшакда юрган видеоси тармоқда айланиб бошлади, энг қизиғи унинг транспорти ҳамон ўзгармаганлигига алоҳида урғу берилган, шунда ҳоким берган скутер қани?
Янги транспорт берилсаю ҳамшира ундан фойдаланмай эски эшагини минишда давом этса бу унга эътибор қаратилмаганидан далолат эмаску?

Бир туркиялик инвестор айтганди: Мен ўзбек ишчиларимга янги иш кийими берсам ҳам улар барибир эски кийимини, кийиб келади. Сабабини сўрасам чангли ишларга янги кийимни киймайлик дейишади, аслида у иш кийимику, мен улар тоза бўлиб ишлаши учун бу кийимни берганман, лекин булар кир бўлмасин деб берилган кийимни кийиш ўрнига барибир эски кийимда келишади бу қандай урф-одат тушунмайман" деганди.

Опамиз ҳам балки янги скутерни минишни истамагандир (лой бўлмасин деб) балки минишни билмагани учун ҳамон эшакда юргандир, буниси энди ҳамшира опани ўзига аён, аммо берилган эътиборни берилмади, ўзгариш бўлмади қилиб кўрсатишдан ким манфаатдорлиги қизиқ.

Касби ва бурчига садоқат ҳар доим ҳам эътироф этилавермайди, аммо кўрсатилган эътирофни айтмаслик ҳам нохолислик бўлса керак...

Ахир ҳудуди жуда катта қишлоқларда пиёда қишлоқ оралаб юрган ҳали бирор марта бирор раҳбар эътиборига тушмаган ҳамширалар камми?

Ҳамшира опага 2022- йилда "Соғлиқни сақлаш аълочиси" кўкрак нишони
2023-йилда эса II даражали «Саломатлик» ордени.
2023-йилнинг декабрида эса қишлоқ аҳолисига бирламчи тиббий хизматни сифатли кўрсатиши учун унинг вилоят ҳокими М.Азимовга топшириғига кўра, электр скутер туман ҳокими томонидан совға қилинди.

2025-йилнинг ноябрида “Инсон фахри” миллий мукофотининг “Умр иши” номинацияси соҳибаси бўлган.

Мен кимнингдир натижаларини санаб, чўнтагига қўл cолиш ниятим йўқ, шунчаки шунча эътибор ва кўмакдан кейин ҳам "Транспорти ҳали ҳам ўзгармади" деб оммани чалғитишдан мақсад нима, шуни тушунмадим...

🇺🇿@Otabek