لا تدري لعل القادم أروع

في ظل المنافسة الشرسة التي يمر بها السوق المحلي والعالمي ربما تسائل بعضنا سؤالاً هاماً وهو : لماذا ينجح البعض ويفشل البعض الآخر رغم أن أغلب المنتجات والخدمات متشابهة إلى حد كبير لدى الجميع ؟!
لماذا نجح البعض في الإنتشار بقوة وتكوين قاعدة علاقات كبيرة من العملاء بينما حصص الآخرين متوسطة أو صغيرة وبعضهم لديه علاقات محدودة للغاية وبعضهم يفشل تماماً ويخرج من حلبة المنافسة ؟!
والإجابة بكل بساطة تتلخص في تعريف التسويق من وجهة نظر كوتلر ، ويطلق عليه رسول التسويق .
التسويق : هو فن خلق قيمة مضافة.
أي ببساطة : إذا كان عميلك ينتظر منك أن تقدم له أفضل منتج من حيث الجودة والسعر فما هي القيمة الجديدة التي ستضيفها لعميلك !
أنت تبيع منتج موجود لدى أغلب منافسيك ويسهل عليك أن تبيع بنفس أسعارهم وربما أقل فهل هذا يكفي ؟!
بالطبع هذا لن يكفي فالمنافسة في الأسعار منافسة خاسرة على المدى البعيد ومدرسة قديمة لا ترقى لمتطلبات السوق العصري الحديث.
لذا يجب عليك أن تسأل نفسك جيداً ما هي القيمة الجديدة الذي سأقدمها لعملائي وكلما كانت القيمة المضافة مميزة ومتجددة بإستمرار فاعلم بأنك على الطريق الصحيح فهذا سر من أسرار نجاح أغلب أصحاب الأعمال في العالم ، يمكنك أن تسأل عملائك عما يتوقعونه منك ، كن قريباً منهم على الدوام حتى تستطيع أن تتوقع وتتنبأ بما يسعدهم ويجعلهم فخورين بالتعامل معك ، لا تيأس وحاول باستمرار فلا تدري لعل القادم أروع

تامر الشاعر

ما هو #قانون_تناقص_المنفعة_الحدية
وأثره على قرار المستهلك

خلونا في البداية نتفق إن التاجر الذكي هو اللي بيقدر يدخل جوه دماغ زبونه ويعرف ازاي بيفكر

سواء كنت بائع جملة أو بائع تجزئة فالمنتج بتاعك أو الخدمة اللي بتقدمها في النهاية بتوصل للمستهلك النهائي والمستهلك النهائي هو ده اللي لازم تفهم هو بيفكر ازاي عشان تواكب أمواج السوق المتقلبة لأن متطلبات المستهلك متغيرة بإستمرار مش ثابتة !

يالا بينا نبدأ نشرح القانون

يعني ايه كلمة منفعة ؟
يعني مصلحة
يعني المستهلك وهو بيشتري بيفكر ازاي يحقق أكبر استفادة ممكنة من الفلوس المتاحة معاه.

وهنا بيحكم المستهلك حاجتين :-
١- دخل الفرد.
٢- أسعار السوق.

ايه هو القانون ده

القانون بيقول :- تناقص المنفعة الحدية

الحدية يعني العددية

يالا بينا ع المثال بسرعة

سمير في جيبه ٢٠٠ جنيه قرر ينزل يشتري بطاطس 🥔 وتفاح 🍏

لو افترضنا إن أول تفاحة هيشتريها سمير هتحقق له منفعة قيمتها ١٠ واحدات تاني واحده هتحقق له منفعة قيمتها ٨ وحدات تالت واحدة هتحقق له منفعة قيمتها ٦ وحدات رابع واحدة هتحقق له منفعة قيمتها ٤ وحدات خامس واحدة هتحقق له منفعة قيمتها وحدتين سادس واحدة هتحقق له منفعة صفر

لو جمعنا ١٠+٨+٦+٤+٢= ٣٠

رقم (٣٠) اسمه المنفعة الكلية وهنا لاحظنا إن المنفعة الكلية بتزيد كلما زادت عدد الوحدات لحد ما نوصل لرقم معين المنفعة عنده بتبقى صفر واللي جاي بعد كده خسارة.

هنا سمير المفروض يشتري كام تفاحة ؟

المفروض يشتري أي عدد بحد أقصى ٥ تفاحات لأنه لو اشترى أكتر من كده مش هيستفيد حاجة بل لو زود عن كده هيبدأ يخسر

طاب فين هنا تناقص المنفعة ؟
تناقص المنفعة هنا لما لقينا ان كل ما سمير زود في العدد كل ما المنفعة بتقل تدريجياً ... أول تفاحة بتحقق أكبر منفعة والتفاحة رقم ٥ بتحقق أقل منفعة.

أنا لو مكان سمير كنت هشتري تفاحتين بس وكفاية كده لكن سمير طفس وعايز يشتري ٥ 😄 هنقوله تمام بس خلي بالك لو اشتريت أكتر من كده هتخسر

طاب لو افترضنا إن سعر التفاحة الواحدة في السوق ١٠ جنيه يبقى سمير لو اشترى ٥ قطع هيتبقى معاه ١٥٠ جنيه هيجيب بـ ٣٠ جنيه بطاطس وهيتبقى معاه ١٢٠ جنيه

طاب لو في مكان تاني بيبيع نفس الجودة بسعر أقل سمير كان هيوفر رقم أكبر

قانون تناقص المنفعة الحدية إحدى أشهر قوانين علم الإقتصاد واللي هيفرق كتير جداً لفهم تقلبات السوق المتغيرة

هضرب مثال تاني سهل :- معرض سيارات عامل عرض لو اشتريت سيارة هتاخدها بسعر ١٩٠ ألف ولو اشتريت اتنين هتاخدها بسعر ١٨٠ ألف !!
هنا المنفعة الحدية للعميل بتحقق من سيارة واحدة يبقى مكنش ينفع المعرض يعمل عرض يقول فيه لو اشتريت سيارتين ويعمل تخفيض ويكشف سعر للسوق بدون داعي !!

المنفعة الحدية بكل بساطة هي آخر قطعة بتحقق منفعة مستفادة للمستهلك ولو زود عن كده مش هيستفاد حاجة وبعد كده هيخسر

آخر مثال هضربه لتوضيح القانون :- ع الفطار أول رغيف بيبقى طعمه جميل جداً التاني بتبدأ بطني تتملا وبحس إني مش مستمتع زي أول رغيف لكن برضو في فايدة لكنها مش زي فايدة أول رغيف ، لو دخلت بقى ع التالت تبقى طفاسة ملهاش لازمة خالص أما بقى الرغيف الرابع بعدها هيحصل انتفاخات ومغص واحتمال أروح ع المستشفى !
هنا المنفعة الحدية تحققت عند تاني رغيف بعد التاني مفيش منفعة وفي خسارة !

طاب أنا كتاجر أستفاد ازاي من القصة دي ؟
١- لازم تبقى فاهم المستهلك في جيبه كام قبل ما تعرض عليه منتجك وده ممكن يتم عن طريق سؤاله حضرتك بتدور على منتج متوقع سعره كام.
٢- تبقى فاهم إنك لو عرضت على المستهلك سعر غير مناسب تبقى فشلت في البيعة.
٣- تبقى فاهم إن المستهلك له حد معين مش هيقدر يشتري أكتر منه يعني لو هو بيشتري منتج لنفسه كفرد غير لما يشتري منتج لفردين غير لما يشتري منتج لأسرة كبيرة وهكذا.
٤- تبقى فاهم إن متوسط دخل الفرد في شريحتك المستهدفة بيؤثر على قراره الشرائي فإما تختار منتجات مناسبة لشريحتك المستهدفة أو تختار شريحة مناسبة لمنتجاتك.
٥- تبقى فاهم إن أسعار المنافسين حواليك بتؤثر على القرار الشرائي للعميل.
٦- فكر ازاي تحقق أكبر منفعة للمستهلك متفكرش ازاي تكسب انت بدون ما تفكر في مصلحة عميلك.

طاب أنا كتاجر جملة مش بتعامل مع المستهلك أستفاد ايه من كل الكلام ده ؟

لازم تبقى فاهم كويس جداً إن منتجك في النهاية بيتم تقييمه من قبل المستهلك وإن المستهلك هو اللي بيؤثر على قرار التاجر اللي بيشتري منك

ايه كمان ؟

لازم يكون عندك تقييم بشكل مستمر وتهتم بجمع آراء المستهلك من خلال حلقة الوصل (تاجر التجزئة) وتعرف منه المستهلك بيقول ايه عن منتجاتك.

كل اللي فات ده كله جاوبك على سؤال مهم جداً ألا وهو :- في ظل تقلب الأسواق المستمر لماذا ينجح البعض ولماذا يفشل الكثيرون ويشتكون من الركود ؟! لأنهم لم يواكبوا التغيرات التي تؤثر على قرار شراء المستهلك النهائي للمنتج أو الخدمة.

بقلم تامر الشاعر

لينك صفحتي على الفيسبوك

https://www.facebook.com/profile.php?id=100073677214261

في ٢٠١٦ أثناء أزمة تعويم الجنيه حضرت مع باشمهندس Mohamed El Baz منتدى لمناقشة كيفية التعامل مع الأزمة

وده الملخص اللي كتبته وقتها

👇

https://www.facebook.com/100073677214261/posts/104520938680480/?d=n

#استشارة من الخاص

ازاي أكون ثروة في ظل عدم توفر فرص العمل وانهيار اقتصاد الدولة ؟

من الإدخار
ادخر كل شهر ما لا يقل عن ١٠٪؜ من دخلك واستثمر ما تدخره
العائد الشهري بتاع ال ١٠٪؜ كل شهر هيكون رقمه أكبر من الشهر اللي قبله
Slow but sure
حتى لو كانت خطواتك بطيئة لكنها مؤكدة
طور بإستمرار من مهاراتك حتى لو تطوير مستمر صغير مع الوقت هتلاقي الفارق كبير

#تامر_الشاعر

#استشارة من الخاص

معنديش دخل أنا عاطل عن العمل
--

ابحث عن وظيفة حتى لو كان مرتبها ضعيفاً ولا تترك نفسك للبطالة بحجة أنك لم تجد وظيفة مناسبة
وحين تجد فرصة وظيفية أفضل بمرتب أعلى اترك الوظيفة ذو المرتب الأقل
كلما زادات مهاراتك كلما كانت فرصة حصولك على وظيفة أفضل بمرتب أعلى أكبر
أصحاب الأعمال يبحثون الآن عمن يحقق لهم فائدة فكلما زادت قيمتك وفائدتك كلما زاد سعرك في السوق.

#تامر_الشاعر

#استشارة من الخاص

لو عندنا مشروع ربحيته كويسه رغم المنافسة العالية ولكن راس المال ضعيف ايه أفضل الطرق للتمويل ؟
---

أفضل طريقتين للتمويل 👇

أولاً : إننا نكبر تدريجي من أربحانا بخطوات ثابتة slow but sure وأنا برجح في أغلب الأحيان الطريقة دي لأن تسرع النتائج وتكبير حجم التمويل المفاجئ قد يكون ليس في مصلحة المشروع (مش قاعدة طبعاً)
طالما إن المشروع مربح وبيكبر نفسه بنفسه يبقى الأفضل إننا نكبر نفسنا بنفسنا من أرباح المشروع.

الطريقة التانية :- نبحث عن ممولين في نطاق العلاقات الشخصية ولازم يكون مشروعك ينطبق عليه صفات المشروع الجاذب للإستثمار ولو الشركة غير مسجلة يبقى نعمل عقد عرفي فيه كل الشروط بدقة.

وأنا أميل إلى الطريقة الأولى

ابتعد تماماً عن القروض أو التمويل بالنظام الربوي ثابت الأرباح سواء من بنك أو غيره

اللي يدخل معاك ممول يدخل ع الربح والخسارة

#تامر_الشاعر

موظف خبرة مرتبه ٥٠٠٠ جنيه

موظف فريش واخد كورسات ومذاكر كويس مرتبه ٣٠٠٠ جنيه

موظف خبرة وبياخد كورسات باستمرار وبيطور من نفسه مرتبه ٢٠ ألف جنيه

الخبرة بدون علم = سقفك هيقف عند نقطة مش هتتخطاها حتى لو كانت خبرتك ١٠٠ سنة

العلم بدون خبرة = الخبرة بتكتسب مع الوقت واللي بيطور من نفسه بإستمرار سعره هيعلى مع الوقت كل ما يكتسب خبرة أكبر

الخبرة + العلم = هيعملوا طفرة في حياتك

#بالعلم_تنهض
#مضى_زمن_الفهلوة
#تامر_الشاعر