..اي اتصلنا بيهم واخوانج راحوله وباجر اني اروح هم
فوتي ماما ارتاحي وجهج احمر ضاوي ووينج ووين الولادة

..شنو ارتاح عندي ولادة شبيج يمه امشينا

..ولج شنو امشينا منو مقشمرج هاي الولادة

سكتت شبا مصبره روحها ولزمت يدة الباب حيل حنت ظهرها

امي انخبصت تركض تبدل واحنا هم

حاجيتها اني

..عزززة شبا صدك عندج

..قابل اشاقيجن شبيجن لو الا تردني اشهرجن بالصياح

فات مؤمل من بره راد يغثها حشش عليها شاف عيونها مغوركه ماتضحك واحنا نركض منا ومنا اني مابدلت بس لبست جواريب وحجاب وعبايه ع ثوبي ومن وصلت هناك اكتشفته كله عجين كباب لأن كمية هواي عجنتها وساعتها فشلانه الملم بروحي منو يصدك شبا هيج تفوتلنا اني جنت محسبه ادخلنا اسبوع انذار هي حملها كل داخلين انذار وياها

خطيه هو من شافها وعرف حالتها اخذنا هو وعمي باسم واتصلو بعابد

رحنا الطبيبتها الي متابعه حالتها حولتنا على المستشفى الي اداوم بيها جنا خايفين ميصيرلها ولادة طبيعية بسبب ظهرها والبراغي الي بداخله بس كالت مالها علاقة كلش عادي وسألنا حسن هم اتصلنا نتأكد كال ماعليها شي اتوكلو ع الله وخلوها ع طبيبتها

عابد والوالي كالو مسافة الطريق واحنا يمكم

بيدي الجنطة ومنتظرين رحمة الله امي فاتت وياها سمحتلها الطبيبة بس اني لا
المخليني متعجبه شبا مو عادتها ذبتها ع الصامت بس هي بالصالة وماينسمعلها صوت

متت خوف وقلق مدري شلون مرت عليه الساعات خاص من وصلوني ابو تمار وعابد قلقوني اكثر

مؤمل احسن منهم يعرف الاجراءات كلها وكمل كلشي يردوه وهم تصرفاتهم واحد يكل للثاني اني اقلقكم اكثر وعمي باسم ناصب عليهم

انوب اجو اخوان عابد لحكوه وعمتي اسيل هم اجتنا

رحت منهم اني وياها بعيد قريب الباب الصالة بعد ساعات سمعتهن هنه يشجعنها ويصيحن يا الله مابقى شي سباعية
وصوت امي تدعي بصوت عالي برجفه طلعت ملابس الطفلة واحتياجاتها وعمتي اسيل وكفت يم الباب منتظرة اول صرخة للطفلة بس سمعتها ر٠٠احت تبشرهم

بيدي ملابسها
فدوه يجنن سيت وردي كامل مجهزته ومكتوب عليه اميرة ماما

طلعو يردون الملابس اخذتهن شويه وطلعن يردن بشارة الوالي بجهه وعابد بجهه وعمتي بجهة مانعرف شنسوي من فرحتنا عابد اتوضى وراح متوضيواكو مصلى راح يصلي بي

انصدمنا من گالو ولد

يمكن لو وياها وحده نكول اشتبهو سبحان الله ع اساس ابنيه ورايده تسميها غلا

كل السونارات جانو يكولون بنية حتى تجهيزها كله مال بنات طلوها الغرفة خاصة بوستها واتحمدتلها بالسلامة جانت فرحانه ومرتاحه فتت وياها للحمام غسلت الها وبدلت وخليناها ترتاح الطبيبة كالت ساعتين اكثر يلا اطلعون

الدنيا صارت ليل فاتو الوالي وعمي سلمو عليها باركولها وبوسوها براسها وطلعو يجيبون عشه ماقبلنا خاص هي تكول نفسي تلعب بالبيت يلا اكل
بقوو بره
اخر واحد اجه عابد كمل صلاة يلا فات

باسها براسها وايدها فرحان حيل ويسأل كدرت تمشي عادي خو مامتأذي ظهرها

كتله يأذيها اكيد بس زينه طبيعي تمشي ترتاح وتتجسن ليظل بالك

شويه وراد يشوف ابنه ضحكت وكتله

..شوف ابنك من هو ابطن امه مقشمركم بحال الجهاز جهاز بنات

صفن عليه

..شني ؟

..ماتدري ابنك طلع ولد

ابتسم وعينه عليها ورجع حاجاني

..لااا مو بنيه صدك تحجين ؟يلا الحمدلله اهم شي تمام الصحة وسلامته وسلامة امه

..مبين جنت هاوي بنيه اكثر

..اي والله بس ماكو فرق ان شاءالله اخذه باسه وصاح الوالي وعمي

يكعدون يمنا الظاهر طلعو حتى ياخذ راحته

سدينا الباب وكعدنا عبالك كاعدين بغرفة جدة مو مستشفى لأن خاصة بينا وماخذين راحتنا حيل

عابد حاجه ابو تمار

..سيد سميه واذن باذنه

..لا يابه انت ابوه انه شنو

..انه اريد اتبارك بيك شبيك لاتبخل بالأسم وماشاء الله اهلنا ماخلين اسم مامسميه اريده اسم خاص بينا

ضحكت عابد وشبا شلون اثنين حتى بالاسماء يدققون اتذكرت زهراء من تكول يسموه عابد خصوصية ضحكت الظاهر صدك هو هيج حتى الاسم مايريده مشترك

اخذه الوالي اذن بأذنه وسماه

..حيدره

عجبني الاسم بالعادة اسمع حيدر بس حيدره نادر
شويه وطلعنا وماشاء الله وجه الخير حيدره مله بيتنا فرحه بعد فرحه خلاها عابد يمنا وثاني يوم دكت رجل هي الا تروح البيتها والي يريدها يلحكها مانه علينا شبا تعرف غلاها عدنا

راحت ومتعاونين عليها هي وابنها شفتات اهل عابد اجو من ثاني يوم ابوه وامه واخوانه وذبحو خروفين
ويوم السابع طهروه وسووله عشا هم

بعدها سمعنا المكافحة لازمين شبكة تهريب ومنهم زوج اخت مهجة وولده بس هي هاربه خارج البلد زوجها يمكن هو مهربها ومسلم نفسه
احتاريت اعرف هو يحبها لو زواجه منها مصلحة لو شنو ماجاي افهم بس الي مثله ويضحي بنفسه بسيل تهريبها مو خالي اكيد
هو كل ظنه ان الدولة مطلوب الها ولزموه مايعرف شي عن التفاصيل الي انطوها ولدنا والحمدلله موضوعهم انغلق

وبعد فتره من هالاحداث ونهاية السنة الدراسية السنة ٢٠٢٢ اتخرج مؤمل

منتظرين تخرجه ع نار وطلب يسوي حفلة التخرج والخطوبة وحده امي جانت ناذرة عجل الوجه الله ومكلفة عابد هو اليشتريه ومشتريه من فتره ومخليه عند ولد وحده من عماته الوالي گله كل خطوبتك ومصاريفها عليه من كلاص المي للذهب الي تلبسه
وعمي باسم گله حفلة ومصاريف الكلية علية وقاط الخطوبة وقاط التخرج

احنا مانعرف شنسوي محتارات حضرنا كلشي وكل هذا عمي احمد وزوجته محد مفاتحهم بالموضوع بس قبل بيوم الوالي دز ع ابراهيم الي الحمدلله رجع وضعة بعد سنة وتسع اشهر طبيعي وقرر يرجع الدوامه هم بس خلوه اداري
قبل لايلتحق حاجاهم الوالي وردة فعلهم تجنن

گالوله

..مؤمل زينة الشباب بس العقله بي خلل يرفضه
تردون احنا نحاجي عمي تردون تجون انتم واحنا نخطب وياكم منه
امي كالت

.. لا عمه فشله انتو تكولون نروح حسب الاصول اني وعماته وجدته واخوه وعمه وبعدها يودي ع عمامه من العماره يطون وياهم يخطبون وصدك ثاني يوم راحن اجن فرحانات حيل يكولن عمي احمد شايلهم بالصلوات كايلهم ماعندي مانع بيدي ازفها بدون مشيه وناس مؤمل عمه انه مو غريب عليه ابن اخوي والكم عدنا اثنين يسوون عشيرة نبخل عليكم ابتنا ونخليكم تنتظرون

تم كلشي عشرين يوم وبأول يوم التخرج احنا اتحضرنا نعقد

لأول مره بعد سنين من الصبح وع صوت جية اهلنا من العمارة وهوسات عماتي ذهب وبنات عماتي البقيه طلعنا وبدت حفلتنا لبسن عماتي وامي وجدة الابيض قماش تول خيطنه ع فصال الهاشمي فرحه بتخرجه وخطوبته
فرحه وهوسات وفرحة
واحنا وبقية عماتي لحكنا ركض حضرنا نفسنا وجنا عرس وفرحة الكل رحنا
صالونات وفساتين وفرحة تضاعف كل فرحة مرت علينا
فرحانين وندعي ربي يديمها

الولد ابيت عابد ذبحو العجل طبخو منه غدا الخطارنا ووزعو منا للشارع كله

السووه عمي والوالي بهاليوم المؤمل اكبر عرس مايلحگه والله

الوالي وعمي باسم وجوهم تضحك ومعزبين للكل حتى عمي حازم ماكدر يخفي فرحته هو يحب عماته حيل كابلهن وكعد يهوسن يمه ويغنيلهن

من البنات عرفت
عمار وياهم ماتركهم مثله مثل يحيى وعابد وابراهيم وحسن وحتى ازواج عماتي كلهم حضرو

بيومها وفينا نذرنا

عمتي سهام تفصل وتخيط رايات بيض وكل وحدة منا لزمت بيرغها وحنته احنا وعماتي ع العدد حتى السطح ماكفاهن خلينا هاشم يصعد حتى ع البيتونه يشد

وبعد الظهر وبهوساتنا لبسنا واحتشمنا واتلگينا مؤمل بالچكليت من الباب عمار ماخذه البيته محلق وسابح ومبدل ومرتب وجاي

وبعد الهلاهل والفرحه وسلامه العماتي وجداتي والنا طلعنا كلما للخطبة سيارات كومه سيارتي مااخذتها مو مال اسوق امكيجه ومغشيه وجهي من الاساس

صعدت وياهم بالبداية عمامنا ومعارفنا ومعارف الولد وبعدهم احنا بالشارع ماطلع منا صوت بس السيارات كلها اناشيد حتى علي واحمد خابصين الجو وعمتي سهام وياهم ماخذها الواهس تصفك للصغار اولاد علي واحمد واخوانهم

بهذا اليوم الفرحة الفرحناها ماتنوصف الف الحمدلله تم كلشي باصوله وعلى اجمل مايكون عقدو وبعقدهم شفت دموع عماتي وامي وجدة وكلنا نزلت دموعنا وياهم ورغم كلنا محاوطينه عينه ع مهجة وشبا يريدهن يساعدنه بتلبيس الذهب اثنينهن جهالهن وحده ابنها يبجي ومهجة مهدي مجلب برجليها اتقدمت اني ساعدته

فرحان بيها لبسها وباسها كعد شويه واشرلي يريد يطلع كلها عيونها عليه وهو استحه حيل فتحتله مجال
گال

..الله يهديج ع المكرود واباركلج واباركله واردلكم وكفة اليوم

ضحكت اول مره مؤمل يدخل هو هم بشكل صريح كملنا الحفلة ورجعنا البيتنا للثنتين بالليل وعمتي ذهب وحبايبها مابطلن هوسات وهاي اول مره تصير عدنا
وي الفرحه فره وتعب تنظيف وعشه وتعزيل هلكنا

بعد الصلاة اتمددنا واهل العمارة قررو يرجعون
شكد حاولنا نعطلهم مابقو

توني اريد اغفى

اجتني رسالة منه

..ادري ماتحنين انتِ ماتغير نظرتچ فرحة اشتياق حجر عندچ من شنو مخلوق گلبچ بس فهميني

رغم والله من شفته وياهم بالصور جماله وكشخته وضحكته اتمنيت ماصاير كل هذا وباقي الي
رديت

..شنوو تريد تتعارك وجه الصبح

دزلي علامة استفهام وتعجب

اتجاهلته بس گلبي صار نار وقررت اسرد كلشي مرعليه
ارد اشوف الحق وياي لو لا شو كلها محملتني الذنب ليش ووين الخلل
وبيوم الي وصلت الاحداث واتعمقت بسردها وحجيت احساسي بالتفصيل حسيت كلشي انعاد عليه بچيت بچي يمكن بداية المشكلة مابچيته
فرحني وريحني الدعاء والكلام والمواساة الوصلتني بشكل خاص وعام
ومن كد مافكرت بالصار وعدته بيوم الكل نايمين ومؤمل بره يخابر خطيبته بالحديقة

اتصلت بيه رد عليه مصدوم وخايف ع البنات انفجرت بيه ابچي وعبراتي متكسرة

..انت الوصلتنا لهنا انت كله منك ماخليتلي ذرة من الثقة كسرتني كسرة بعمري ماراح اتخطاها استغبيتني واستغليت طيبتي مثل مااهلك استغلوك اوصيك بأمك تروحلها وتبر بيها وهي كاسرتني ماجنت تگلي حيري بنفسج ومعليج محد يستاهل تفكيرج لا جنت فرحان بغبائي ومطمن ع الآخر بس مافات عليه شي حسيت بيك ولمحت وبعدها بشكل صريح حاجيتك وطلبت الصراحة بس وبقيت مستمر ادوس عليه الى ان وصلتنا لهنا تاليها انصدم واني اقرا الورقة بين اوراقك مخليها وبكل ثقة بكنتوري وابيتي

منهاره واشهگ وابچي وع صوت بچيي حست امي واجتني مرعوبة من سمعت احجي بالقديم

اشرتلي اهدأ اخواني لايسمعون

..لا اني اريد الكل يسمع هو وهم وانتن وكل واحد محملني ذنب عنادي ورفضي للرجعة والنسيان

كل هذا وهو ساكت من سمعني حاجيت امي هيج گال

..اهدي ميس اخذي نفس الله يلوم الي يلومچ حاس بيچ والله وعاذرچ وصابر
اهدي ياروحي ع كيفج شبيج منو محاچيج اليوم

سكتت وصوت شهگاتي مااكدر اكتمهن

المشكلة اليوم بالذات محد معبرني ومحاجيني حتى اكول فلان حاجاني ولا هو موسط احد بهالفترة

..كافي حبيبي اهدي كافي

عبالك كال ابچي بعد تريد الشهگة العبرو تخلص ماكو سدت الباب امي واجت يمي تسكتني اشرتلها تعوفني

طلعت وماعاجبها الموضوع وهو اتخبل يريدني بس اسكت

..شوفي اني منتظر عتابج هذا صار سنين احس ماترتاحين الا تعتبين وماتسامحين الا من تفرغين گلبج وتحچين كل الكاتمته
بس كافي گلبج راح يوگف وانه مو هين عليه اسمع كل هذا اني الف مره كتلج كلي غلط من ساسي الراسي يابنت الناس رب العباد الماكو اعظم منه يسامح ويغفر انطيني فرصة اثبتلج اني مو خاين ولا سويت السويته النزوة لو رغبة ظرف ماعرفت اتصرف بيه وغلطت
بحقج وحق نفسي وبناتي اني الهم البيه مايعرف بي بس الله سبحانه صفيت وحيد تعرفين شنو شاب مثلي عايش وحيد لا ام لا اب لا اخ لا اخت حتى الصحة هم مرات تخوني كل املي بيج وبالبنات اكل واشرب واطلع واكافح وهنه گبال عيني وامنيتي الوحيدة اجمعكم ونعيش باقي ايمنا بخير وسعادة
انتِ الله يحفظ احبابج واهلج زين منج وفضل تذكريني هذا الفرق بيني وبينج

سكت صوته مخنوگ اتنفس حيل وزفر الهوا هوايه بعد حجي ارد احجي بس اكتفيت بالوصله من احساسي وكلامي مااريد اذيه اكثر مايهون عليه ردت اكله انت ماتهون عليه ماگدرت بس ابجي

..كافي ميوس كافي ياعمري

سكت بعدها گال

..مضايقج بشي اذا مضايقج ومسببلج مشاكل وي اهلج وضاغطين عليج الخاطري اهج وين ما بارض الله گاع ماشوفج خلقتي بس ارتاحي هو عمر وخلص لوعات غير يخلص وارتاح انتِ شذكرج بهالليل بس فهميني

..فوگاها تريد تهج بعد مامكفيك السويته

..مو هو لو اهج لو ارضيج وترضين رسيني على بر ترى كرهت روحي بالله الكريم

..معليك مني مخبله اني ادعي الله يهديني

..آمين

..لا والله اني العاقلة والمخبل السمع من هذا وذاك وفلش بيته وگعد

ضحك بصوت عالي مدري شبينا اثنينا انخبلنا

..شوفي الله ماانتبهت ع كلمة مخبله اني كلت امين ع الهداية وبس انتِ وين اكو بعقلج

..هذا هو ماصار شي

..شلونچ هسه

..زينه شبيه قابل

..مابيج بس تحبين تشعلين الواحد وتخليه يحرگ اهل اهله بهالليل هذا
ميس بربج نامي ولاتقهرين نفسج ولا عبالج مرتاح وتردين تحسسيني بعذاب انواع العذاب شفته والله اكو امور مااريد احجيها خاف ابالج استجدي الرحمة منج والعطف بس والله حالي بغيابج انتِ والبنات ابد مو زين وشمااسويلهن احس مقصر لأن ماعرفت احافظ عليكم شتتكم والي جانو سبب بهذا عايشين حياتهم واكثر

..لاتهتم الكلامي شوف رغم كلشي حجيته اني صح ومابي غلط مني لو تجاوز بس والنبي انت ماتهون عليه ابد

اختنكت بعبرتي

..انت هم مو شخص عادي بالنسبة الي والهذا السبب اظل احملك مسؤولية الصار لأن گلبي واجعني ومامتخطية

..والحل شنو؟

..مااعرف

..ارتاحي هسه وان شاءالله خير

ثاني يوم ماداومت لأن للصبح مابطلت بچي عبالي من احاجيه احجي كلشي وارتاح بس صار العكس هو هم وضعه اثر بيه

گعدت الضحى راسي اموتني وجع
امي بالها يمي

..شبيج ماما ذكري الله خوفتيني عليج والله كل شويه اجي اشوفج تونين ليش البارحه شجاج اتخبلتي ع الولد وليش مخابرج بهالليل هو
لو ترجعين وتنجبين لو ماكو اتصالات نص الليالي شيسمونها هاي حلال حرام

كملتها من كلت

..مو هو اتصل اني

رزلتني رزالة محترمة سكتت مارديت وهي بسرعة لانت شافت وضعي ابد مو مال ملامه واصلا عبالك ماجاي اسمع صافنه

..ذكري الله ولمي بناتج وخلي يثبتلج حبه يمه لو مايحبج جان اتزوج من زمان شبيج انتِ نسوان مامقصرات وشاعلات العشرة شمع ولا اهلهم سبب ولا عدهم ظرف وحاجه يتزوجون ومن يخيرنهم مايهتمون حتى الجهالهم وين عايشين احنا هذا مجتمعنا المثل عمار نادر بهالوكت

..يمه اني احبه بس اخاف اني وياه ماراح نرتاح

..التطير حرام ياامي ليش متشائمة ذكري الله ميس التزمي بذكر الله يوخرلج هالوسواس

..ونعم بالله

بيومها امي وعماتي خطيه شكد حاجني وجدة

العصر اجونا ابراهيم وعابد وهالمره دخل وياهم ع الخط عمي وابو تمار

كالوله دزنا بشكل رسمي وحتى طلاك من هذا الاسبوع يطلك ام علي اليوم محاجي علي والولد متفهم ومحاجي امه هم

حاجاني ابراهيم

..علويه الدنيا شعبالج شكد اطول ترى سنين تركض لو اكو سبب بي قوي اني ماارضالج العيشة اقل من استحقاقج وهالمره اني ضامنه وعليه اذا دگله دگه وياج اكسرلج ظهره شتردين بعد

عابد ضحك گال

..راح بيها عمار ..عمي شيسويلها هو مايصدك الله يهديها
اني هواي حاجي وياج انتِ خايفه من اهله ترى اهله شيردون يسوون يجوز يخبثون بحجي بتصرف بس مالهم سلطة عليكم واحنا كلنا وياكم انتِ لو سباعية صدگ ماتنطين مجال الهم

ورجع ابراهيم گال

..وروح السيد الشهيد ووحق الحسين حتى اهله لو مرو بعرضتج هم خليهم عليه بس والله اخليهم لو سمعو باسمج بس تصيبهم رجفة ترى يبستي ريگي كافي

عمي باسم وابو تمار كالوله مالها حجة الرفضة بس خوفها احنا حجينا وياها كبل وهسه هم بس مانريد نجبرها ترجع تدل بقناعتها

رد هو

..انه هم رايد بقناعتها وقناعتها مقتنعة بي بس خايفه وهي الوراها مثلكم الها حق تخاف
شو باوعيلي

..تخافين منين ننعلج ابهاتهم نسوان وزلم وترى عمار صار عمارنا راح نجيبه ويانا للتمايمه

ابتسمت ع ضحكهم وسوالفهم صدك يردوه يروح وياهم يكلوله اهلك مابيهم فايدة الك

عابد كال هسه هو كلفني احجي كلشي يم الوالي وعمج
ويمج

مستعد اذا تكولين اخاف من قربهم يسافر الكربلا ياخذله بيت لو شقه هناك ويبقى المختبر شغال والبيت يتأجر

ابراهيم كال

..اني ماتعجبني هالفكرة تخاف شنو غير بينا هنا منو يوصلها شبيكم والوالي وعمي ايدوه

حاجيته

..وهم شيسوون قابل يهدون عليه بس اقصد يطلعون الف فلم

..علوية هاي گبل الهم خاطر يمه ودخلوله من باب ثاني بعد ماشافهم مامهتميله وهواي مواقف ثبتلله هم مو بحاله ع الاقل جان حاولو يجمعوكم من شافوه فاقد راحته بعد مادام خسروه يخسرون كل مفتاح يدخلهم الكم اخذيها مني

سكتت وهم عافوني افكر وراحو ثاني يوم اجني البنات ماقصرن راسي احسه انفخ وبديت اهدأ الزم تليفوني يوصلني رسائل نفس المضمون حتى من بعض المتابعات

شبا كل شويه تجيني

..شوفي شنو ينشرون شوفي الكلام

اكو كلش متأثرات عليكم ويدعلكم
شبيط انتِ ماعندج گلب يلام من يگلج گلبج حجر

اسكت مااحجي بس حسو عليه بديت الين حاجوني عمي باسم ومؤمل والوالي وكلامهم مثل ابراهيم
احنا يمج ارضي ولا تبهذلين الولد ويروح يننقل من وراج انتو مو صغار كبار وتعرفون تأمنون نفسكم وعلاقتكم

ظليت فتره اخذ واستخير وبعد هواي صراع اتوكلت ع الله ودست ع خوفي ووافقت

انطيت الموافقة بالليل العابد هم مو اله مافك عني الا اخذها
متوقعة راح يراسلني لو يتصل
للبصح فوني بيدي وماكو ماداومت قلقة اخذت اجازة اتصلت بالبنات يتعذرلي بأي عذر

الصبح اتصل بيه جاوبته وگلبي دگاته تزيد

اجاني صوته بلهفة ورجفة

..بروح ابوچ ميس صدگ السمعته لو ناصبين عليه
صدگ وافقتي

..اي صدگ

..جاي اني جهزي نفسج العصر نعقد

..لا مو هيج اوگف ماالحك والله

..اششش تلحگين تلحگين وداعتج مارايد غير عقد وترجعين حلالي لاتكسرين فرحتي انه مو وحدي هم عابد وياي هسه اجاني للدوام بلغني

استحيت اتناقش اكثر من سمعت ضحكة عابد وهو يگول

..شگتلج انه ماارتاح الا اجمعكم سويتها لو لا

كاله لا والله سويتها وماقصرتوو

نهى الاتصال واحتاريت شلون اكل الامي

والله خجلانه مدري ليش اكثر من اول مره عقدنا واتزوجنا من مااعرف شنو من احساس جاي اعيش
سيطرت عليه رجفة وكل شويه احس من الفرحة ارد ابچي واضحك

الوالي اتصل بامي وبلغها گبل لا احجي وياها
عماتي سون انتشار

اخذتني من ايدي مرت عمي باسم

..بدلي بين مااتصل بعمج ابلغه واخذج واروح

..وين نروح اوكفي كلشي مامسويه بعد

..معليج انتِ هنا شتردين تسوين شغلج كله مو هنا

اول مااخذتني ع محل هي تندله فساتين وبلات اختارتلي فستان ابيض جماله بقماشه وگصته ضيق من الصدر والخصر وكلوش من جوه وردنه نص بف
اخذت وياه اكسسورات
واخذتني المركز التجميل البنيه تعرفنا ومعاميلها احنا وصت الكادر بينا بدتها بتنظيف جسم ووجه وتسريحة بسيطة ومكياج ابسط بس العيون طوخت مكياجهن وبرزتهن اكثر

اني كلش عجبتني النتيجة بس بالي يم بناتي والبيت لحكو لا

وحتى تليفوني اخذته مني ام قسور خاف يشغلني وكاكو وكت ركضن بيه ركض هنه علما كملن

رجعت لگيت الحبايب كلهن ملتمات والحفلة صح بسيطة بس عبالك متحضرلها صار هوايه

وصار يومنا هذا مم احلى واجمل الأيام

٢٠٢٣/١٠/١٨ بداية حياة جديدة النا انكتبت النا يمكن دعواتكم سبب بيها اتمنى تكون ايامنا القادمة احلى واجمل

مااكدر اوصف شعوري ولا شعورة بعد ماتم عقدنا وفات
فات وبدينه ليال وليان متمسكات بيهن حيل فساتين وطواگه عبالك عرايس صغار

ورغم ضحكته ودموعي وضحكتي من باسني بجبيني وغمضن عيونه نزلن دموعه ندا حسيتهن ع جبني وجفن عيني

خليته براحته واگف باركلي ورديت اباركله اني هم طولت واكفه احاجيه حتى يمسح عيونه بس ماجان مهتم

..ترى ذني دموع الفرح خلي يشوفوها عادي اني اليوم والله يشهد انكتبلي عمر جديد واتحققت اغلى الاماني
انتِ وبناتي يمي شريد اكثر

حضن البنات يبوسن واجن شمرن نفسهن عليه

..ماما نروح وي بابا بعد مانبقى هنا مو

اشرتلهن براسي واني امسح دموعي من اطراف عيني واضحك

گام هو باس راس امي وجدتي وهي تباركله

..الله يبارك بعمرج يمه الله يخليج الي

امي تستاهل يقدرها والله مو بس لأن امي لأن مايوم حقدت عليه وتركته وزعلت وي زعلي السنين هذه كلها تحسب حسابه حتى بالأكله الزينه وتراعي مرضه هم

بهذا اليوم جان جايب مشية من مشية عابد وابراهيم مامقصرين وياه جماعتهم وعمامهم وهي شكليات هاي الوالي وعمي مايهتمولها بس هو جان رايد يحس بهالشي يحس عنده احد

حاجاني وهو منصي عليه

..اليوم بالليل ازفج

..شنو شبيك عمار مو هيج اصبر انطي مجال

..بعد تردين اصبر اني حتى الصبر ملني ياصبر تحجين عنه

ميخالف انطيني مجال للأثنين بس

..هذا هو للأثنين للأثنين ادللي

باسني وطلع مانطاني مجال بس عبر عتبة بابنا اتصل

ثاني يوم هو والولد مبدلين اثاث البيت الغرفة والتخم وفعلا الاثنين بلمة خواتي واهلي وفستان بسيط وجهاز ابسط لحكت اشتريه ماجانت كل التحضيرات اكدر اوفرها بس المهمات واني هم مو ناقصني شي والسوگ ع كولت امي ماطاير ورغم كلشي سريع بس فرحتنا توازي حتى فرحة زواجنا الأول هالمرة بديناها بصلاة ودعاء بطلب مني
البنات رادت امي اخليهم يمهن لا هو قبل ولا اني هنه حبيباتي منتظرات اليوم اليجمعنا شلون نخليهن
عبرت ساعة ثنتين ومن فرحتهن مانايمات
نعست اني وهو وهنه لا
ضحك واخذهن الحضنه حجالهن قصة واخذهن الغرفتهن

جهزت نفسي بين مانيمهن

رجع بعد فتره فتح اديه من الباب اتقدمت اضحك والهسه مامصدگة وشعور الخوف قليل كل مااحس بي اذكر الله مثل ماوصت امي

..اوعدني ماتتركني وتخذلني

..ماراح اوعد هالمره راح اثبتلج كنز مثلج مايتفرط بيه

عشنا احلى ليلة اتخطينا بيها العتب وحجينا الاشتياق ورسمنا ابالنا خطط وناقشناها واحنا متوكلين ع الله ونتمنى السعادة

ثاني يوم العصر يلا كدرت افتح تليفوني واتصل بأهلي اطمنهم اتصلت وهنه هم الظاهر مايردن مني اتثال نمت هوايه ع گلوبهم حسيتهم خلصوو

خطيه كل همهم سعادتنا بالليل اجونا الوالي ومهجة وامي باركو وراحو

وقبل لا انام اجتني رسالة ع الفيس
من حساب وهمي

..ترى مو لأن انتِ غالية عليه وعبالج صابر ورجعج لا ترى هو مريض سكر ومابيه فايدة ولا وحدة ترضا بيه

انتبهلي مركزة وعاقدة حواجبي وگف يمي قراها

ترك الرد وراح للتجاهل والحذف
بدون مايحجي

بعدها گال

..حذفي وانطي بلوك اي شخص غريب لتوافقين ع صداقته ولو تغيرين حسابج هذا افضل الج او سوي خاص احسن

..ترى زينة الشباب انت

ضحك

وهو يأشرلي بعضلاته ويغمز

..ادري وواثق

من هاليوم غلقنا كل باب يجيبلنا الريح

ولهنا چانت نهايتنا رغم المفروض جانت تنتهي بظروف تختلف بس الله سبحانه كاتبلنا لقاء ولم شمل
بقى عدنا
مؤمل ان شاءالله بشهر الواحد يتم زواجه ونعيد الفرحة وياه

...

النهاية

قصه جديده
#حرروا ايامي المقيده

.. الكاتبة عيون المها









أمآني بنت من البصره عمري مايقارب ٣٢ سنه
عائلتي متكونه من امي وابوي واخواني ٤ و خواتي ٢ واني بعد الچبير عندي اخ اكبر مني طبعاً مستقلين لوحدنا والحمدلله بس لقصتنا ولحياتنا يترأسها چبير على اساس
الآ وهو جدو راح احجيلكم حياتنا بوجوده
مختصر الكلام إنسان ظالم وعنده نوع من الطغاة و مأثر على كل شخص موجود بلعايله راح انطيكم نبذه عنه وعن الي سوا بكل واحد من ولده طبعاً احنه احفاده وما سلمنه منه ومن كبريائه بس عمامي حبوا يضيفون شي وياي والي وهم هواي أشخاص شاركوني قصتي وكلها شي مرتبطه بشي فراح اسويها الكم بلتداريج وابديها بجدي.

صاحب ولا صاحب له رجال چبير ربما طاغي امور ولده كلها بيده هو الأمر الناهي شتت
ولده بدل ما يلم شملهم كلامه وحجيه وتصرفاته هي حق وان چانت باطل
وكلام الناس باطل وان چانت على حق
رجال متسلط ذو هيبه عنده ولد وبنات خير من الله ولده ٧ وبناته ٤
مااعرف منيش
ياخفون منه ياترى لأن ابوهم وبر الوالدين
حق اما غير الله اعلم المهم شوفو حياة
اولاده الي تأذوا منه وحبوا يذكرون بعض تفاصيل عنه وعنهم وانتم حكمو


أمجد أنا من مواليد ٦٥ مزوج وعندي خير من الله ولد وبنات واذا اگلكم اشگد راح اضحكون عليه فريق مالت طوبه وانا وامهم الحكم


المهم ما درست مااحب الدراسه بالابتدائيه و عفت الدراسه وضليت اشتغل اي شي و چنت كلما اشتغل يتلگاني ابوي من الباب ياخذ افلوسي وتعبي كلهمن ومايخليلي شي


عندي خال اسمه رضا اكبر مني بسنتين هذا صديقي واخوي مو مثل الخوال علاقتي بي كلش
قويه چان عايش ويانه وقريب على بيتنا گام ياخذنا انا وسجاد اخوي اصغر بسنتين
نشتغل ويا يشوف ابوي ياخذ فلوسنا من
عدنا قبل لا ندخل البيت
رضا امجد سجاد تعالوا خلي نشتري ونشبع وبعدين اخذكم للبيت وضموا افلوسكم قسم منها



امجد وسجاد احنا ضلينه واحد يباوع للثاني وفرحنا هم خلصنا شغل ورحنا وي خالي اشترينا لفات ولبلبي حار وصمون وضلينه ناكل



رضا اطوني افلوسكم نص منها
امجد انا انطيته قسم بسيط منها وسجاد هم
انشوف خالي گعد بلگاع يحفر
هاا خالي اجاي اسوي انته
رضا ماعليكم باوعو وسكتو
امرنا لله سكتنا ونباوع علي شيسوي بلگاع
شو هذا خله افلوسنا وذب عليها التراب
امجد خالي اسويت صدگ جذب وين ضميت الفلوس
رضا تمشون لو اضلون واكفين تباوعون على الگاع
امجد چا هاي سوايه اضم افلوسنا بلگاع بله راحن الفلوس
رضا انتم امشو وما عليكم بلفلوس انسو ضمينه افلوس هنا بس امشو وفكوني خل نرجع للبيت اتأخرنا وهسه ابوكم واگف النه بلشارع يتاني




امجد و سجاد يله امشي لا نحصل كتله لو رزاله هسه مشينا وصلنه للبيت شفنا ابوي واخذ منا الفلوس يباوع عليهن ومستغرب


صاحب هاي شني ولكم شو نقص بلفلوس مو مثل كل يوم
رضا اليوم الولد تعبانين وما اشتغلو عدل وابو الشغل ما انطاهم فلوس كامله گص من يوميتهم
صاحب هيج منكم اشبيكم چنكم حـ..... اشبيكم تعبانين
امجد انا اباوع على خالي واباوع على ابوي


و حاصرتني الضحكه على سالفة خالي مدري منين طلع النه تعبانين وحصلنا رزاله يله المهم شبعنا وضمينه افلوس امكيفين ماخذاهن ابوي كلهن
و على هالسالفه ضلينه كل يوم خالي مطلع سالفه يا انباگو يا ضاعن احنه ناكل رزايل ونسكت شنسوي
چان خالي كل جمعه ياخذنا يونسنه لو يشتريلنه لو ياخذنا للسينما لو يشتري النه ملابس وكله من افلوسنا الي نضمهن ومن عده يطينه


الى ان استشهد خالي بحرب بوش انا ويا تصوبت بعيني ورجلي اتأثرت عيني اندارت وخالي استشهد تاذينه حيل علي فقدنا ابو واخو النه عدنا خال غيره بس مو مثله

ابد ولا يمه اصلا
انا حبيت بت عمتي بس ابوي ماوافق
وعارض وازوجت بنيه غريبه دائماً مشاكل ومعارك وابوي يكتلها وتروح زعلانه لاهلها وارجع اجيبها لو امي تروح اجيبها الصراحه هي السان وجسره وتكره اهلي هسه وبعد اضوج لمن اروح الهم تگلي يقرون براسك عليه انا هم عصبي ومن اصير عصبي افلش كلشي اگبالي صح عصبي بس طيب واسبورتي عندي كلشي مباح عكس اخواني علاقاتي وي اخواني واولادهم کأنو اخوهم الصغير مااحب اتعامل وياهم بكبرياء لو غير شي لا عادي وطبيعي كلش انا ازيد الامرار امشيلهم امورهم مثل اوراق بلمحكمه تحويل سياره او تحويل بيت حتى سياراتهم من تعطل انا اخذه وارح اصلحهن الهم انا مااملك سياره بسبب سرعتي يا سياره اركبها ادعمها 😁


راح اسولفلكم موقف صار وياي من زمان انا خلصت جيش وكعدت بدون شغل اخوي سجاد هم بلجيش بس نايب ضابط وهم يداوم بلمستشفى المهم حسب شغله سلمو سياره اني اخذها اشتغل بيها لان هو كله بلدوام وشهر يضل هناك فاخذت السياره من سرعتي دعمت السياره وانگلبت ڰامت السياره تمشي على القماره بدل التايرات 😂

اسكربت السياره وانا اتأذيت سجاد اتخبل من سمع هيج المهم بعد صراعات طويله الله هده ابوي وصلح السياره منه واخذها سجاد راد يبيعها ويشتري بيت ويطلع من اهلي وانگلبت الدنيا علي اشلون تشتري بيت وتطلع وانا اريد افلوس التصليح انا صلحت بكذا مبلغ وصارتلك مشكله اشكبرها بوكتها


طبعاً ابوي رغم هو ابوي بس الشغله اذا بيها افلوس ابد ما يتحاجه مستعد يخرب كلشي


مره من المرات لان تعوقت ومخلص جيش سلمتني الحكومه قطعة أرض وانطوني شغل القطعه طبعاً استلمها السيد الوالد وباعهه وما قبضت منها شي والشغل هو ومرتي خربو عليه وما استلمته لو بذاك الوكت مستلمه چا هسه انا حالي غير هذا الحال گاعد بلتجاوز ومن تمطر يفيض البيت علينه لو و لو و لو
واگول الحمدلله على كل حال
هذا شي بسيط من الي عشته من معاناة ابوي الي



سجاد انا من مواليد ٦٧ الأبن الثاني
مزوج وعندي ٤ اولاد ٣ بنات
أرجع اشويه وياكم للماضي
انا ازوجت بت خالتي احبه بس هي ماتعرف من ازوجنا ياله كتلها واصريت اخذها سواء يقبلون او يرفضون الاهل
الحمدلله عايشين على المره قبل الحلوه والمره معدله الله فوگ الراس تدرس وصارت معلمه بس ماخليتها اداوم حتى طبقت شهرين بلبصره وهي اهلها بلحله اهل خير احسن من عدنا بقاطات يملكون مو نفسنا احنه ابوي چان موضف بلبترو والصراحه معيشنه معاناة خاصه انا شفت منهم الويل من كلهم مو بس ابوي المهم
ماخليت كفايه اداوم گتلها لو انا لو الدوام الصراحه حب تملك عندي مو طبيعي وبنفس الوكت صار عدنا طفل من بعد زواجنا بسنه ونص والولد طلع معوق اريدها تهتم بي لان يوم الي تروح للدوام يضل عد امي وانا دوامي شهر بـ عشر ايام اجي للبيت


دوامي نائب ضابط وهم مساعد تخدير بلمستشفى چانت المستشفى عسكري بلشمال اداوم
اهلي شفت منهم دمار بكل حالاته طبيعتي مااحب الهوسه والقال والقلت واحنا عايله چبيره وبيت واحد گمت الم افلوس شغلي حتى اشتري بيت واسكن بي لوحدي
گمت اشتري غراض على فرغتي وجيتي واضمهم فوگ محد يدري المن وشنو ذني حتى مرتي ماتدري مشت السنين وصار عمر ابني ٤ سنوات صارت عدي ابنيه والحمدلله مابيها شي چنا متخوفين خاف يصير عدنا نفس ابني هو اشوفه مابي شي بس السانه ثگيل بحيث ٣ سنوات ياله گال بابا وعقله اشوي بي خلل بحيث هذا الشي أثر علي من كبر مصار عنده اطفال وهالشي هو السبب المهم البنيه ايه من الجمال وكلها متعجبه بيها وتحبها عماتها وعمامها وخوالها وخالاتها هاي البنيه محبوبه وشكلها يجنن صارت مدلله البيت رغم اخواني عدهم اولاد وبنات بس هاي غير وبعد هاي البنت صار عندي ولد ومنا بدأت معاناتي ازيد وصار لازم اطلع البيت مکتض بلجهال والبنات والنسوان والولد يبوو خبصه خبصه ماتتخيلون الهوسه العايشينهه

ڪفايه : إني كفايه من مواليد ٦٩ زوجي سجاد عانيت هواي بهاي العايله رغم همه بيت خالتي اني دراسه وتعب دخلت معهد معلمات من ازوجت اني ثالث متوسط وكملت الى ان دخلت للمعهد وكملته وطبقت شهرين بمدرسه قريبه على بيتنا هاي المده كلها اروح واجي مشي ودوامي بعيد عن البيت حيل رغم زوجي عنده سياره بس عد خالي ابو امجد لو امجد يشتغل بيها المهم بعد عناء طويل خلصت من الدراسه والتعب بشغل البيت چنت قبل لا اروح للدوام لازم اطبخ واكمل ياله اروح ابني الچبير عرفتو وضعه عنده خلل بلدماغ وثگيل اللسان وعذبني بصغره
فرينه كل الدكاتره بلبصره ابغداد وبلحله وماخلينه دكتور يعتب علينه محد سوه حل ولا طاحوا على علته خليناها على الله بعد وتخوفنا نسوي طفل ثاني خاف يطلع نفسه وبعد ٤ سنوات ياله صار عدنا طفل طلعت بنت والحمدلله مابيها شي

البيت چان بي هواي مشاكل وهوسه ومعارك عايله چبيره وحموييني اثنين مزوجين وكل واحد عده خير من الله يعني هوسه بمعنى الكلمه اني يحبوني ويحترموني الولد والبنات لاني مااجادلهم ولا اعارك ومحترمه نفسي ومحترمتهم فمحد اله يدنالي بشي مو زين
سجاد اصر يعزل منهم چان يجيب غراض بس ماندري شنو هاي لو المن الى ان گللهم اريد اشتري بيت واسكن بي لوحدي هو گال هيج لو انگلبت الدنيا علينه خالتي راحت فلشت كل الغراض الجايبهن وضامهن سجاد شمرت الطباخ من فوگ وكسرت كل الغراض وخالي ابو أمجد عصه بلسياره مايرضى ينطيها وتعارك سجاد وياهم

ابو امجد ما دامك تريد تبيع السياره انطيني افلوس التصليح انا صلحتها

سجاد ليش قابل انا الي اشتغلت بيها لو انا الي دعمتها شو عايفهه عدكم وحتى مرتي ماتخذونها لدوامها بيها والطريق شطوله عليها وتروح مشي بعز البرد والمطر لو بعز الحر والشمس وهيه صايمه لانكم ماتخافون الله ماحطيتو شي بعيونكم هذا شغلي وگدي ماغزر بعيونكم شسوي بعد گلولي فلشتو
كل غراضي دمرتوني وانا ساكت اخذها وغصب عليكم واشتري بيت واطلع منكم وراتاح شني هيه ذله خوما ذله

ابو أمجد ها هيج صارت مان علينه بفلوسك وشغلك ومو هاي انا هم اشتغل وفلوسي بيد امك وتصرف عليكم

كفايه بعد معاناة طويله ومشاكل دامت اشهر اخذ السياره باعها وانطاهم افلوس التصليح مالتها واشترى غير غراض واشترالنا بيت لوحدنه بنفس المنطقه بس قريب عليهم بينه شارع فاصل والحمدلله استقرينه وصارت عدنا بيت ثانيه صاروا عندي اثنين بنات واثنين ولد الجوارين زينين مثل الاهل والمنطقه شعبيه حلوه ماتحس بغربه لو شي وسجاد يروح للدوام ويجي ومشت السنوات وانقل سجاد للبصره دوامه وضل يومي يروح ويجي احسن من الشهر والاسابيع
داوم صادف بسنة ٩٧ بدايتها صار عندي
ولد كلش حلو من حلاته طلع على وجهه غشاء أبيض جميل بشكل احنا اسماء
اولادنا نفتح القرآن ونشوف يااسم يطلع نسمي هذا طلع محمد وبعد مرور الأشهر
سجاد بيوم من الأيام گالوله اكو سجين لازم انته تاخذه وتودي للمستشفى العام وضل حارس علي وشنو يصير علي انته مسوؤل اخذه وارح ومن طلعوا من المستشفى لازم يرجعه للسجن وهو بلطريق شرد منه وهنا ادهورت امورنا ورجعنا للصفر

سجاد سيدي السجين شرد مني من انا رحت اخذله العلاج
الضابط سجاد هذا اشلون حجي شنو شرد منك غير انته مسوؤل عنه گنالك ديربالك
سجاد بعد صارت انا مااعرف شنو السالفه

الضابط سجاد خلال اسبوع اذا مايجي هذا السجين انته تروح ابداله ويودوك ورى الشمس ترى هاي اني اگلك
سجاد صار سيدي راح اسوي الي اگدر علي اترخص اروح انا
الضابط مرخوص تفضل

سجاد السلام عليكم
كفايه وعليكم السلام هلا الله يساعدك
سجاد هلا بيج ويساعدج الله
كفايه اشبيك حبيبي اصاير وياك اشو ضايج
سجاد سكتي يمعوده هيج صار وياي .....
كفايه يااا اصخام وانوب هسه اشراح اسوي

سجاد وين ادري شسوي وين اروح ادور هسه انا
كفايه خلال هذا السبوع ادمرنا وحالنه حال الخوف والرعب اخذ من عدنا مأخذ

سجاد كفايه ماكو غير حل انسوي والله كريم

كفايه وشنو الحل ؟
سجاد انبيع غراضنا كلهن ونعرض البيت للبيع واروح لأيران لگرايبنه هناك

كفايه ياا صدگ تحجي عود شيودينه لأيران ونعيف كلشي ورانا هنا واروح
سجاد ماعندي غير حل يمعوده اذا خست بلسجن شيطلعني هذا صدام وحكومته ما تدرين انتي واعدام عليه يصير لان هذا محكوم علي بلاعدام وانا راح اصير ابداله

كفايه ماادري والله ابراحتك شنو تريد انسوي امرنه لله
بهاي الفتره بعنا اكثر غراضنا وافراشنه وضل البيت واحنه نخاف الوضع ما يطمن على ياساعه يدخلون ياخذون سجاد عفنه البيت وافلوسنه تكفينه انروح بيهن البيت كنالهم خلي عادل يكعد بي

يتبع

2

سجاد يله بابا امشي راح اروح
أماني وين اروح
سجاد اروح لبيت جدج انشوفهم ما تالمقيحين عمو اسعد يريد يشوفج يگول
مشتاقلها واشتريلها واخذها وياي بس تجي
أماني يله خوش اروح الهم
رحنا لبيت جدو البيت هوسه وكلها ملتمه
وضايجين وامي وابوي هم گامو يبجون
واني اباوع عليهم ماادري شنو السالفه

سجاد يله أسعد مو تريد تاخذ أماني وحميد
تشتريلهم
أسعد يي يي يله حبايبي امشو وياي حتى اشتريلكم ونجي

أماني عمو شنو راح تشتري النه
حميد وانا عمو شنو راح اجيبلي
أسعد هسه امشو وشنو تردون اشتريلكم

أسعد خذتهم حتى الهيهم واهلهم يروحون احنا كلنا ضايجين على وضع سجاد وما يگدر ياخذ جهاله كلهم ويا
أماني وحميد عافهم عدنا لأن أماني بلمدرسه صف اول وحميد السنه الجايه يسجل
أخذ ويا بس علاء وذكريات ومحمد
وهمه اصلا ما يعرفون اذا يرجعون او لا
أماني عمو أريد شعر بنات لونه وردي
أسعد صار تدللين وانت حميد شنو تريد
حميد اريد حلاوه شعريه
أسعد خوش يله تعالو نشتري
اشتريت الهم و فريتهم بين ما يرحون اهلهم
رجعتهم للبيت و اول ما دخلوا سألوا على امهم و ابوهم
گلنالهم هسه يجون راحوا للسوگ
اجه الليل وضلو يبجون علينه واحتارينه بيهم اشلون نسكتهم وشنو نگول الهم
هاي اول مره يفارگون اهلهم وينامون عدنا وبعيد عنهم
و على هالسالفه كل يوم و كل ليله واحنا اساسا ما نعرف مصيرهم ولا نعرف شنو صار وياهم وصلو لو بعدهم

انا أسعد من مواليد ٧٤ مزوج و عندي ٢ ولد
و ٣ بنات
اشتغل حداد ودراسه صف سادس وتركت
مواصفاتي حلو طويل ضارب رقم القياسي بلطول
جنت اطول واحد بـ العايله هسه الحمدلله
ولدي و ولد اخواني يضاهون طولي
طيب مسالم ما احب المشاكل
ازوجت على حب بعد معاناة طويله ياله ازوجت عندي اصدقاء هواي من ضمنهم صديق تعرفت علي جان توه جاي للبصره من اهل الناصريه وشفت اخته
وانعجبت بيها حبيتها رغم هي اكبر مني بلعمر
ضليت اتردد عليهم تعلقت بيها حيل
وهي بادلتني المشاعر
صارحت اخوها عليها وكتلها اخطبها منكم
رحب بيه و وكف وياي ساندني و ساعدني هواي جان ماكو تليفونات ضلت بينه رسايل كتابيه
اطورت علاقتنه وحبنا وتالي بعد معاناة
٣ سنوات ازوجنه
جنت اخذ أماني وياي تنطيها الرسايل
لو اخذ حميد هم اضيع وقتهم وانسيهم كثرة السؤالات على اهلهم
انا واختي الاصغر مني وسناء دائماً ندرسهم ونگللهم لو نجحتوا ناخذكم لامكم وابوكم
وهي خطيه تدرس وتكتب وتحفظ رغم هي صف اول بس شاطره وتستوعب بسرعه درجاته بلشهاده كله ١٠ درجات كامله بكل المواد المعلمات يحبنهه
تجي من المدرسه ملهوفه شوفوا
درجاتي وشوفو المعلمه شنو گالتلي
واني ناجحه راح تاخذوني لامي وابوي
مشتاقتلهم اخذوني ومشتاقه لـ علاء و
ذكريات و محمد
اوهمناهم سافروا لـ تكريت لأن نخاف
نحجي ونگول لايران چان الي يسافر لأيران
ينسجن وعلي عقوبه
وهمه اصلا تهريب راحو من التنومه وشط العرب هربوهم سجاد دفع افلوس حتى
يطلع من العراق وما يصير مصيره السجن
والاعدام بدل الي شرد منه
بعد شهر تقريباً وصل النه خبر انو واصلين لقرايبنه هناك بس ما نعرف شنو وضعهم مرتاحين لولا وشنو عيشتهم وصلو وبس

سجاد :~ طبعاً سفري لأيران اسميها طفره ورحلة عذاب وخساره الوراي والگدامي
رحت وگتلهم البيت ما ينباع يگعد بي
اخوي عادل هم مزوج وهم بوكتها عنده ٤ جهال
سفري تهريب نظام متشدد يعني نمشي والخوف والرعب ويانه ولو ينسمع صوت منا اروح بيها طريق طويل عبرونا شط العرب بعبارات وبعدها بساتين ومشي عجزنا من المشي والخوف والرعب الي ساكنه
محمد چان طفل صغير وگوه سادين حلكه حتى مايبجي وننكشف وصلنا لگرايبنه هناك بعد مرور ايام احنا نمشي وازيد الامرار نمشي بليل
وطلعان روح استقبلونه الله خير
ماقصرو ويانا
بعد ايام انطونه بيت صغير تعبان
بس المهم يلمنا مكانه بمزرعه هاي المزرعه
بيها احواض مال سمچ شغلوني بيها اكون مسؤول على الاحواض و اراعي السمچ البيها
مساحتها ٢٠ دونم وكل حوض بيها نص دونم لو دونم انا مهمتي انطي للسمچ اكلهم
من حشيش و سماد ومواد كيماويه
حتى تكبر الخ.......
المهم نار الفرگه تلسع مهما يكون ذولي اهلي واخواني وخواتي والاهم تاركلي طفلين مااعرف شنو جاي يصير وياهم واذا هم بخير لولا
كفايه تحن و تون النهار كله عليهم گلب والده ما الومها وما تحمل افراگ وهاي اول مره تبتعد هيج عنهم حالها يبجي الصخر
الصراحه حالي اتعس و اكثر منها
بس اتقوه لاجلها و لأجل امشي عيشتي واشوف تاليها وين تصفى

كفايه عبرنا هاي الحدود العراقيه الايرانيه
بعد معاناة وصعوبات وبهذله بس الله اليعلم بيها هسه كلما اذكرها مااعرف شنو يصير بيه واتمناها تنمحي من الذاكره
عشنا هناك ٨ أشهر هاي الاشهر كلشي صار بيها حزن الم رعب خوف غربه
غربة الأهل تكتل وفراگ الاولاد يذبح

اوووف يمه 😔💔 لعد شگول لگلبي

بحث آخر من العذابات تفكيري كله بيهم
ناموا شربوا ها بچو ها رادوني يمهم
تعورو خاف احد حاجاهم خاف احد كتلهم خاف صار عليهم شي اعرف همه يحبونهم ويمكن ما يأذونهم بس بعد گلبي هيج يمهم بحيث الناس گامت تبجي على بجيتي
هناك الناس طيبه من اهل الله يحبون الواحد من گلبهم يبجون على بجيتنه ويضحكون على ضحكتنه
همه هم شردو من العراق بحرب ايران وسكنوا الاهواز وهي اساسا الاهواز منطقه ومحافظه من العراق وبلحرب خذوها ايران
المهم يسكنون بلعرب والگيعان الزراعيه
اشتغل سجاد بلاحواض وينطونه بذاك الوكت نص ورقه هاي بوكتها خير من الله منو يملك هيج جانت بفلوسنا ٢٠ الف وهاي الفلوس بلعراق تشتري بيهن بيت
احنا نصرف منهن ونڪتر الزايد
تكفلوا بينه بكلشي الحمدلله هواي سوو معروف النه كلما اذكر معروفهم
ادعيلهم بلخير وازور بلنيابه عنهم

أماني بعد امي و ابوي عني تعبني وقهرني رغم عمامي وعماتي ما قصرو وياي بشي بس ابقى طفله احتاج امي وياي وابوي يمي وخاصه اني مدللتهم وين رحتوا وعفتوني
هاي معاناتي كل ليله من اريد انام
ابجي واحجي وياهم لوحدي اليوم هيج صار وياي وينكم تعالوا الي
نجحت اني وصرت صف ثاني وانتم ماكو
ومحد ياخذني الكم گلولي ناخذج لامج وابوج وما اخذوني
عمو عادل مو گلت تاخذني لامي وابوي ليش ماتاخذني عفيه اخذني
عادل ها عمو اي اخذج ليش تبجين هسه انتي تعاي يابعد عمج وگلبه لا تبجين شنو تردين اجيبلج بس لا تبجين
عمو مااريد شي بس اروح لامي وابوي عمو أسعد مااخذني وهو گالي اخذج من تنجحين هاي اني نجحت حبوبي اخذني انته

عادل بويه وين اخذج انتي ما تدرين شنو جاي يصير وياهم وشنو حالهم هنا احسلج والله
ليش عمو همه اشبيهم وليش ماخذوني ليش اخذو ذكريات وعلاء ومحمد وياهم واني وحميد لا همه ما يحبوني صح لو يحبوني چا خذوني وياهم ماخلوني هنا

عادل ليش هيج تحجين بويه منو مضوجج گليلي علي وهسه اروح اموته الج

لا عمو محد ضوجني ولا احد سوالي شي بس اريد امي وانتم تگلولي ناخذج وبيبي گالت اخذج واروح وياج وکلکم ما خذتوني بس تحجون

عادل بچت وبچتني وياها هاي البنيه اعزها واعز من روحي عندي
يمه گليلي شسوي وشأصرف ترى هيج عذاب

ام أمجد يمه چا اندري شنسوي مااشوف الوضع اشلونه ولا نعرف شنو وضعهم
وبعدين انته حجي اماني غثك وتريد حل هو احنا لاگين حل لارواحنا حتى اماني هسه ماعليك منها اصغيره بعدهي وتحجي باجر عگبه تنسه اصلا
عادل يمه صدگ جذب اشتنسه اكو واحد ينسه امه وابوه جان نسينه احنه
هاا يمه تريد تنسانه انسانه بقت عليك مو هالراح ولا يذكرنه بشي سجاد بعد هيه ضاله عليك روح وانسانه

عادل اهووو هسه انا شحجي وانتي
شتحجين يمعوده البنيه كسرت گلبي

يتبع

٣_____٤

#بارت٣


_



في يوماً خابت الضنون
وانكسرت الأمنيات
وضاعت الأحلام
و تشتت الأيام
وتوقفت عقارب الزمن
ايها الراحلين
لا توهموها بالوعود
فلربما كتبَ الرحيل شتاته الأخير
بالله رفقـاً بقلوبِ انهكها التعب
فإنها
تبني على تلك الوعود حياة
وبعد كل هذا
أستطيع ان أقوي نفسي وإشعرها بالسعادة متى ما أردت وأجيد الضحك في عز البعثرة





عادل مواليد ٧٠ خامس ابتدائي وبطلت مااحب الدراسه ضليت اشتغل
بـ الحديد بـ الصناعيه
من انا واصغير خير من الله بس ما
احصل منهم شي كله ياخذونه امي وابوي
بعد تفكير عميق قررت اضم افلوسي
حتى ازوج لان اذا اضل وراهم مااحصل
شي أبد
ضليت اشتغل و اضم الفلوس عد كفايه
مرت اخوي
كفايه علاقتي بيها اخويه وقويه ازيد من خواتي
بنيه طيبه فقيره و واعيه المهم
كل مااجي من الشغل انطي مصرف للبيت واكتر الباقي قبل لا ادخل وأگلهم
هذا شغلي وبعدين اشيل الفلوس
الكترتهن انطيهن لكفايه
واجمعهن عدها لو اضل علي ابد
ما اجمع هسه وبعد
گتلها ما تحجين لاحد انا اجمع عندج
ولا جاي اضم عندج شي لو مهما يصير
وصدگ ولا واحد دره بيهن الى ان اخذتهن منها
انا حبيت بت عمتي متت عليها حيل حلوه
معانيها تذبح العيون سود وكبار ومجروره
والوجه ابيض وشامه بخدها جمالها
مو طبيعي جان حبنا طاهر بس لا امها
ولا ابوي وافقوا على زواجنا عارضو
بوكتها جان ابوي متعارك وي امها
وما يحجي وياها واحنا صرنا الضحيه
اشگد حاولنا وياهم يغيرون رايهم
واشگد انتظرت الله يهديهم ويقبلون
ابد اثنينهم عنوديه
واحد اضبط من الثاني بعدين امها زوجتها واحد غصباً عليها
امها مره قادره ومتسلطه ازيد من ابوي وكلمتها مااصير اثنين يعني مستعده
تكتل احد اذا ما خذه حجايتها بناتها و
ولدها
عانوا منها هواي اذب عليهم تهم وتشهر
بيهم لو عارضوها بشي ابوهم رجال فقير
لا حوله ولا قوة ولا اله كلمه عليهم
هيه الكل بلكل
بلمعنى جدتي امخلفه خلفه
كلها متسلطه
من ابوي واخواته والصراحه
على امهم طالعين امهم هيج بلضبط
المهم بعد ماازوجت وايأست منها
وسافرت على غير دوله
وعاشت هناك ولهسه مانعرف
اي خبر عنها ابد حتى اخوانها
وخواتها مايعرفون شنو وضعها
من سافرت هجرت كل العالم
وكل الأقارب بحيث حتى وفاة امها
وابوها ماحضرت ولا اجت
ولا شافتهم ابد
قرر السيد الوالد والوالده يزوجوني
بت خالي
وهاي لا احبها ولا هيه تحبني وصغيره
وكلشي ما تفتهم صارت حياتي
جحيم ازيد من قبل
حياتنا مناگر ومعارك اربعه وعشرين ساعه
ومن غير عرك وي الأهل
اذكر مره ضلت تغلط وتصيح فقدت
اعصابي كلش جانت اكو صوبه مشتغله
علاء الدين لو تذكرونها
شلت الصوبه ورگعتها بيها وهي مشتغله

رادت تحترگ لو ما تلاحگتها امي واختي الجبيره
على هاي المعارك دائماً مستمرين
الحمدلله لهسه وبعد من ورى السانها
اشگد تنگتل وما تمل ازيد ما تنقص
رغم كثرة السنين وكثرة الخلفه منها
لا زالت مشاكلنه مستمره ولا رعايه
ولا اهتمام
حياتي وياها بس مشاكل وحتى
اولادي وبناتي ولا واحد على گلبي
كلهم اذيه الي ولا بيهم الي سندني
وساعدني
كلهم على مصلحتهم يرگضون ويجون
الي لو رادوا شي
ارجع اشويه وياكم للماضي الي لهسه
اعاني منه وبسببه


صاحب : عادل و أسعد امشوا وياي لبيت سجاد
عادل خير بويه شبي بيت سجاد المن اروح
اله شكوو
صاحب جايني مشتريه على البيت

أسعد و عادل شنو شرايه شني
سجاد طلع وگال لا تبيعون البيت وانا الي
اگعد بي مو هيجي لولا و اتفق وياي و
وياكم لحد ما يجون اضل بي انا

صاحب همه راحوا منو يگول يجون بعد والبيت المن ضال فارغ خو انبيعه أحسن امشو بله امشو بلا لغوه زايده منكم

عادل رحنا ويا وامرنا لله دخلنا للبيت
وانكسر گلبي بيت اخوي وفارغ
اذكرت سجاد وكفايه ومواقفهم وياي
حلوه ماانساها اباوع مكانهم خالي
الجهال وضحكهم وسوالفهم
انعصر گلبي
اشوف ابوي لزم چاكوچ ويريد يفلش
هاا بويه خيرك اشراح اسوي
صاحب راح افلش هاي الديوانيه واخذ الشيلمان وابيعه لوحده اهواي يجيب افلوس

عادل بويه صدگ جذب اتراجع على هاي السالفه و خليني اگعد بي انا لحد مايجي سجاد وعايلته وهم شايل حمل عنكم
وهوسه الجهال وهم يصير عدكم
مجال ويفرغ البيت من چم نفر

صاحب گتلك انسى هاي السالفه الناس
جايه تاخذ الشيلمان ويله حركو روحكم
وياي بدل ماافلش وحدي

أسعد انا اباوع على ابوي وسوالفه التقهر
ومقهور على بيت سجاد هسه شنو وضعه
وشنو جاي يصير ويا ابوي بطران
شنو يريد يسوي ابيته وهو اشتراه بتعبه

عادل أمآني هاي اجابج هنا
أمآني سألت عليك گالو راح لبيتكم ليش ماخذتني وياك اشوف بيتنا
أسعد عمو حبيبتي رجعي للبيت لا تتعورين

صاحب شكو ولج المن جايه هنا اشعدج
عادل روحي رجعي وانا اشويه واجي
أمآني عمو ليش جدو جاي يفلش ابيتنا
عادل بويه روحي وبعدين اجي واحجيلج
لا تتعورين ويطيح عليج طابوگ لو تراب يدخل بعيونج
أمآني خوش رايحه انا
عادل روحي وديري بالج من الشارع
سألتني وحجت هيج لو گومت شكو
اجروح بيه بوكتها تعاركت وي ابوي
ورجعت للبيت وهو نزل الشيلمان وباعه
واخذ
افلوسهن وثاني يوم باع البيت انا
تعاركت ويا وطردني من البيت رحت
لبيت عمتي وهم هوسه وعالگه للضالين متعاركه وي ولدها ومطفرتهم كلمن بصفحه عفتهم وطلعت رحت لصديقي بتت يمه ضليت ٣ ايام وانا ماادري شنو صاير
بلبيت ولا همه الي سألو عليه وين ماوين
رحت للبيت اشوفهم جاي يفلشون بساحة البيت
هاا شكوو شو جاي تفلشون
أسعد أسكت يمعود غير يريد يسوي محل بلبيت
عادل وهاي من افلوس سجاد هاا
أسعد ليش عندك شك طبعاً
عادل چا امجد وين ما حجه ويا شي
أسعد أسكت غير تعارك وياهم وطره
من البيت گله لم غراضك و ولي
شوفلك مكان يلفيك

عادل هيج صارت چا ماخله البيت وخلانه نگعد بي هم يرتاح من عدنا وهم احنه نرتاح من المأساة هاي
من افلوس سجاد رمم البيت وسوه ديوانيه
بنو محل وجابو غراض كامله للمحل حلويات ومواد غذائيه
عندي اخوي الوحيد الي كمل دخل كليه الشرطه وصار ضابط بفضل سجاد وافلوسه واخوي الصغير بوكتها افراري من الجيش انسجن طلعو من السجن وصرفوا علي من افلوس سجاد
وانا من قهري ومعاركي وي مرتي
وقهر ابوي وتصرفات امي اللي مساندة ابوي على الغلط واخذوا افلوس البيت واصرفوا بيهن كأنما افلوسهم
طفرت روحي وگلت مااضل هنا قررت اروح ورى سجاد لأيران و أمآني وحميد
الكاسرين گلبي وبجيهم على امهم وابوهم گلت اخذهم وياي
لأن همه ازيد شي عليه و على أسعد و سناء ونورس احنه متكفلين بيهم ومن واحد لواحد ومانخلي احد يسويلهم شي لو يدنالهم
انا اكتل جهالي علمودهم
بعد هذا كله ثبت قراري على سفري رغم چانو امعارضيني وما قابلين اروح بس اصريت ورحت للخلاص والهروب من كثر المشاكل والقهر الي جاي يصير وبعد الله اعلم شنو
راح يصير
حاولت اخذ وياي أمآني وحميد ماصارت وهم خفت عليهم يصير بيهم شي كلشي يصير هذا طريق و مو أمآن عاد انا اذا صار عليه شي اولي ذولي الجهال شنو ذنبهم
اخذتهم اشتريت الهم ملابس واخذتلهم صور بلاستوديو حتى اخذ صورهم لامهم وابوهم ونستهم ورجعتهم للبيت
انطلقت لطريق وحدود العراق وايران تهريب تركت كلشي وراي ومشيت مرتي وجهالي واهلي من القهر والضيم و تسلط ابوي علينه وما يخلينه انشوف دربنا وحياتنا وكل شغلنا وگدنا الهم وياريت لو قابلين
وخاصه انا شغلي هلاك وتعب بـ الصناعيه
والحديد وكل شغلي الهم يادوب زوجت روحي منهن حتى ماصرفو عليه شي منهم كل زواجي مني وكل گدي الهم
المهم رحت لأيران وصلت بعد معاناة وهلاك ورعب وخوف الطريق
سجاد أكثر واحد أعزه ومتعلق بي من بين أخواني
شفت أخوي وعزيز گلبي سجاد وحاله الي يبچي الصخر وتساؤلاتهم على أمآني وحميد و على أهلي عصرت گلبي عصر لو على بيتهم واسوينا بي ومنو گعد بي
ما سيطرت على روحي اشگد ما شفت قسوة من ابوي وتصرفاته وضغط الشغل وتعبه وهلاكي ومشاكلي الزوجيه
ذبيتهه يمهم وكأنه همه الي راح يساعدوني ويخلصوني من هذا كله ويطلعوني من المأزق الي انا بي سولفتلهم على الي سوو اهلي
و على سوا ابوي بلبيت وانقهروا حييل وضاجو
مافكرت انا زيدت عليهم جحيمهم
ومن كتها قررو يرجعون العراق
اما انا طلعت من ايران گبل على الأردن عشت هناك واشتغلت بكلشي ذبيت روحي بلشغل حتى احصل افلوس واجمعهم و اكون گدرت الملي فلس اشتري بيت الي واستقر بيعد عن معاناة ابوي
وياي ابن عمتي وابن خالي هم طلعو من ضيم اهلهم
اشتغلنا بغسل الصحون بلمطاعم
اشتغلنا بغسل الملابس وماكو شغله ما جربناها واخير شي استقرينه على الصناعيه والحديد صرنا حدادين نسوي بيبان وشبابيك
والي احصله اكتره وادز لاهلي ولمرتي وجهالي مصرف
اهلك روحي بلشغل وادز كل شهر نص ورقه لاهلي وادزلهم تسجيل صوتي بـ الشرايط لأن گبل اهلي ماعدهم تليفون جان اكو تليفونات ارضيه بس ابوي ماجايب
المهم ادز لجهالي ملابس واحذيه والعاب
و طبعاً حصت أمآني وحميد من ضمنهم بل من احسنهم شنو الشغله الزينه أكول هاي لاماني لو لحميد يعني اخصصهن الهم
وهمه نفس الشي يدزولي تسجيل حتى اسمع اصواتهم
چانو جوارينه عدهم تليفونات ارضيه
مرات اتصل عليهم واگوللهم يدزون
على احد احجي ويا من اهلي وهكذا
مرت الايام والاشهر
فد يوم اتصلت مرتي وگالت دزلي
مصرف انا مريضه و بتك الصغيره مريضه ولازم تنام مستشفى وعلاجات واني
ماعندي افلوس واهلك اگللهم ما يطوني يگولون ماعدنا

انا من هذا الكلام انصدمت مهما يكون
هاي مسؤله مني وجهالي مسؤليتي
ما اراويهم مثل ما يسون اهلي وياهم
والي صدمني ما ينطونها اي شي من
الي ادزه الهم يعني اي فلس ما يوصل
الها وللجهال كله يروح الهم امي وابوي
عاد بوكتها قررت ادز افلوس اله بلخفيه
وكتلها صيري معدله وجمعي هاي الفلوس واتصرفي بيهن عدل ضليت ادز كل
شهر هم علاجاتهم وهم مصرفهم
وعيشتهم



. •🌼❀ ••┈••┈• ❖═══❖◎◎❖═══❖ .










#بارت٤



سأخبرڪم بأمراً لربما شديد القسوه
بكائڪم فى الطريق دون أن تشعروا
لمن يمرون من حولڪم
هذا الاحساس لن تستطيعوا
أن تعرفوا مدى قسوته إلا اذا
تعرضتوا لـ مثله
تشعروا وقتها أنه لا يهمڪم
اشڪالڪم ڪيف تڪون أمام الناس
ولا تفڪروا فى ما سيقولونه
عنڪم وقت يرونڪم بهذا الشڪل
كل ما تفكرون به حينها أن تخرجوا شحنة الحزن و الألم الذي ينتابڪم لتستطيعوا
أن تصلوا إلى السرير و الوساده
لتختموا نهاية يومڪم
ثم لتقنعوا غيرڪم انكم لا تبالوا بشي أبداً

وبعد
‏
‏أنا أنثى لا أڪون جزء ولا أتجزأ
ولا اقبل النصف ولا أفهم كيف شكل
الأنصاف
أنا امرأة تحضر بكامل توهججها
وأندفاعها و أڪوטּ او لا أڪوטּ
أو أغيب إلى الأبد



أمآني أگلج يمه من اجيتوا من ايران شنو صار وياكم بلطريق

كفايه هاا يمه شكوو شو جاي ادورين دفاتر قديمه شلج بهاي السالفه واتهيضين الذكريات

أمآني يمه احجي هسه اني أسألتج

كفايه والمن اسألين مو تدرين بكل السوالف بعد شكوو

أمآني يمه عفيه سولفي اكو اشياء ناسيتها واريد تفاصيل حبابه

كفايه سمعي
الجماعه عبالهم احنا مستقرين ومرتاحين وگاعدين گعده زينه ما يدرون بوضعنا ومشلوعه گلوبنا صفح ولا شايفين الاستقرار ولا مرتاحين

دزوا ورانا أمجد حتى يستقر يمنه وخالي ابو أمجد گايله روح يم اخوك

امجد اجه چم يوم ومل ويگول زهگت روحي ويريد يرجع عاد احنه بوكتها قررنا نرجع

چان طريق الجيه اكثر خطوره من الروحه ركبونا گرايبنا من الاهواز لـ محمره سياره
ومن المحمره للحدود مشي نمشي

لزمونه امن الحدود الايرانية و ودونه رأسا للمحكمه و المحكمه حكمت علينه وسوينه تعهد نرجع وما نضل بأيران

طلعونه من المحكمه گبل للحدود ومن الحدود الايرانية والعراقيه ضلينه نمشي بليل حتى ما ننشاف من امن الحدود العراقيه

صار الفجر علينه ومحمد ضل يبجي خفنه خاف ننلزم خلصنه الصحراء گوة مال التنومه

شفنه بيت بابه مفتوح رأسا دخلنه بي چنه جايبين غراض هواي ويانه بس من التعب والمشي والهلاك گمنه نمشي ونذب بلغراض اغلب غراضنه ذبيناها بلشارع والطريق شي ورى شي

المهم دخلنا عبالنا البيت مامسكون لان باب الشارع مفتوح سمعنا صوت داخل البيت دگينا عليهم الباب

طلعت النه مره چبيره وياها شاب شخصيه
المره تفضلو امرو

سجاد ما يامر عليكم ضالم بس رايدين نرتاح يمكم چم ساعه تعبانين من المشي وهذا ابنه يبجي

چان نظرات الشاب النه بشك وترقب وخايف منا
المره ياهله بيكم يمه تفضلو
الشاب وين وين يتفضلون
شنو وضعكم منين جايين انتم

المره يمه هسه وكت تحقيق وي الوادم بلباب غير يدخلون واحجي وياهم
دخلو يمه دخلو

سجاد خويه احنه جايين من ايران وهاي وهاي
اشو هذا تخبل من سولفتله

الشاب صدگ تحجي جذب كومو هسه اطلعون من البيت

أمجد خير خويه شني السالفه بس ساعه نرتاح من الطريق

الشاب بويه انا ضابط وهسه لو بلغت عنكم ترحون بيها ولو أسكت ويكشفوني متستر عليكم وانتم توكم جايين من ايران اروح بيها انا
فأتكفو الشر وطلعو مااريد مشاكل ولا انا اسوي الكم مشاكل وعد بس طلعو لا تبلوني وتروح وضيفتي واتبهذل بلمراكز وتعرفون النظام و وضعه

سجاد خويه هسه نطلع ولا يهمك احنه ما دخلنا الكم حتى نسويلكم مشاكل وانما بس نرتاح ونسكت الولد هم راح يبلينه

الأم يمه دخلي انريگهم مااشوفهم تعبانين هم مشي وهم ليل وحر خوف

الشاب يله حضرو الريوگ انا هم وراي دوام وراح ادز على حازم يجي ياخذهم على اقرب مكان يردونه

كفايه گولي بطلاع الروح قنعو وبقينه ساعتين
للـ ٧ الصبح اخذونا من بيتهم بعد ما شكرناهم على وكفتهم ويانه و على وجبة الريوگ

نزلنه الولد الي وصا الضابط بلعشار جان اقرب مكان النه بيت عمي نزلنه عدهم طبعاً رحبو بينه بين احضان واشتياق واللهفه والسؤالات عدت الساعات

وصلنه خبر لبيت خالي صاحب وصلنا وصار عدهم علم بينه اجينه

أسعد يوسف سجاد وكفايه اجوو ماتاخذنه نروح نشوفهم وناخذ أمآني وحميد ويانه

يوسف صدگ تحجي اشوكت اجوو
أسعد اليوم الصبح ويمكن وما يگدرون يجون اليوم لهنا

يوسف چا امشي يله وصيح للجهال خل يمشون ويانه

أسعد أمآني يله امشي وياي انتي وحميد وينه

أمآني حميد بره يلعب بس وين اروح
أسعد مو تردين امج وابوج
أمآني اي
أسعد چا يله امشي اروح الهم واشوفينهم
أمآني اجذب عليه انته كل مره دگلي وما تاخذني

أسعد ولج ام السان مو راح اجيج منو هذا الي يجذب
أمآني چا انه امجذبه غير انته كلما ابجي عليهم ادگلي وما تاخذني تذكر لمن احترگت ايدي وضليت ابجي عليهم قشمرتني وخذتني وياك لـ رافد صاحبك وانا امصدگتك عبالي راح تاخذني لامي وابوي صدگ

أسعد وين اگدر على السانج انا غير انتي الليل كله ماخليتيني انام وبس تبجين سكتج برافد

اكو وحده تفتهم تلزم مشواية السمج وهيه حاره واشيلها صرتي عنتر ابن شداد وتردين اشيلين السمج

أمآني چا غير كله من ورى هذا ابو الفرن ضل يلح علينه

أسعد هسه تمشين لولا راح اروح انا
أمآني ادري بيك اجذب عليه بس هم اروح يله راح اروح اصيح لـ حميد يمشي ويانه

أسعد روحي بدلي ام السان وخلي حميد يغسل وييدل ويله اتأخرنه

أمآني اني رحت بس ما امصدگه راح اشوف امي وابوي عمو أسعد دائماً يقشمرني هالمره ماصدگت

حميد عمو صدگ رايحين لامي وابوي

يوسف اي عمو صدگ هسه نوصل وانشوفهم

أماني زين هسه همه وين وليش مااجو للبيت

أسعد يابويه من أسألتج انتي المفروض يسمونج استفهام مو أمآني

أمآني اي غير اريد اعرف وافتهم

يوسف بويه هسه نوصل وافتهمي احنه هم ما ندري ليش مااجو همه گالو جيبو أمآني وحميد نريد انشوفهم

أمآني خوش اشوكت نوصل
يوسف هسه اشويه ونوصل

أمآني چان المكان الي رايحين اله قريب مجرد ربع ساعه ونوصل بس احسه صار طويل والى ابعد نقطه جانت لحظات الانتظار صعبه وعقولنه الصغيره ماگادره تتحمل وتستوعب الصدمه واثارة اللقاء ولهفته ايام الفقد والفراگ ترهق رغم صغر السن

ها قد وصلنا الى مكان يحتضن امي وابوي نزلنه اني وحميد نركض بلهفه بعبره ملت صدورنا وبدموع جاريه رغم اني ما مصدگه لهسه راح التقي باامي وابوي واخواني

احسهم جاي يجذبون علي لأن من بدت العطله لهسه همه كل يوم يگلولنه باجر ناخذكم حتى عمو عادل چم مره يگلي اخذج وانوب راح وعافني اشگد اتأذيت بسفره ومن يسلم عليه ويدزلي وهدايه اشگد ابجي واتمناه يمي

چان بيت عم امي بابهم مفتوح دخلنا واحنه اندور بلوجوه ويصير ابوي اگبالي الله الله

ملكت الكون كله مو حضن ابوي بلهفه بشوگ وادموع تصب وصوت البواجي رج المكان بحيث كل الي گاعدين بجو

أمي وبجيهه لو احنه ودموعنه الي تتجاره
يايمه ليش عفتيني يمه ماگلتي منو يدرسها منو يبدللها
يمه ماختفي عليه خاف اتعور لو احترگ يمه احترگت واني الليل كله ابجي واگلهم ودوني لمي
يمه من نجحت تمنيتج اشوفين شهادتي وتحضنيني
بابا هنت عليك وعفتني مشتاقتلك

لو اشما احجي مااگدر اوصف ذاك اللقاء ولهفته وكلماته لقاء يجمع بين الخيمه والحنان والجنه والحب

سجاد
جيتي للعراق ورجوعي لاهلي مثل الي توه منولد وصفر ماعنده شي ولا حوله ولا قوة

بعد كل الي صار ماانكر شوگي ولهفتي الهم ولقائي وياهم بس كل الاسى والالم يوم الي اريد انام وماكو مكان ولا فراش يأويني وبأسمي

وانا الي كونت نفسي بنفسي وتعبي كلشي طار صفر اليدين خالي الوفاض كسرتي گلبي على بيتي وشگى عمري ابد ما تنسي

شنو الي ينسيليا شنو اسوي بعد من گالي ابوي ماعندي شي الك وهو با؏ بيت ووطن لامني ولام عايلتي

يگلي ماعندك شي عندي وافلوس البيت كلها عدهم وعايشين بخيره الله يجزيهم
رجعتي لاهلي سكنت غرفه يا دوب افراش انام علي واهدومنه القليله الي تسترنه

المحكمه صادره علي حكم غيابي ٥ سنوات ولاني توه جاي من ايران الله اعلم اشگد حكم اخذ عليها

وكتها صارت الانتفاظه الشعبانيه ويعتبرونه متعاونين وي ايران يعني بوكتها علي علامة إكس

بهاي الفتره ضليت من مكان لمكان اروح اخاف اضل يم اهلي خاف يجون علي

جنت اروح بأجازه لڪربلاء يم بيت
خالتى اهل كفايه

لو اروح بغداد يم اختها انضل أيام هناك ونرجع ارجوع

شغلي بأيران لميت افلوسي وضميتهن بذاك الوكت صارت ثلاث اوراق وعادل اخوي دزلي منه اربع اوراق گالي اشتري الي بيت

اتفقت ويا احط افلوسي على افلوسه ونشترينه بيت واثنينه بي

بوكتها قررت اشتري بيت بكربلاء ورحت دورت ولگيت والحمدلله اتفقت وي
ابو البيت وانطيته عربون ورجعت
للبصره حتى اجيب بقية الفلوس

سجاد بويه انا حصلت بيت ودفعت عربون وراح نحول هناك انا وعايلتي واخذ عايلة عادل وياي

صاحب اشلون اشلون شني بويه ابكيفك تتصرف وعفت الاماكن كلها تريد تروح لـ كربلاء يم اهل مرتك واضل تحت رحمتهم واشأگول للناس انا

ابني راح اشتره بيت بعيد عنا ويسكن يم اهل مريته غير اكسركم اتكسر وبعدين انته منين جبت افلوس تشتري بيت انته وعادل

سجاد هسه ما صار شي ما تريدنه اروح اهناك روح انته جيب العربون وتعال انا مااتفاشل وي الناس بعد ما اتفقت وياهم

صاحب خوش انا باجر من الصبح اروح اجيب الفلوس واجي

سجاد راح ابوي من الصبح لـ كربلاء جاب العربون واجه وغلسه علي ولا انطاني منه ربع
انا الباقي العندي رحت ادور بيت على گد العندي

لگيت بيت صغير على گد الحال بس تعبان اشتريته مجرد مااخلص من المعاناة

طبعاً انطيت خبر لـ عادل بهاي السالفه كلها گلي اشتري بلي عندك والك والله كريم الباقي المهم انت ترتاح وتشتريلك بيت وتستقر

حولت بلبيت وگعدت بي رتبته بلي اگدر علي مشكله بعيد عن اهلي هذا البيت بغير مكان يعني

المهم گعدت بي ضليت عشرة ايام
سوو عليه اخباريه بأني توني راجع من أيران وانسجنت 😔💔

يتبع