اخذتها وركضت بيها للمستشفى طلعت حامله للصفه مالتي ومالت امها تدرن و السكر امأثر عليها ماتت البنيه بين اديه شكلها چنها طير الشعر اسود وطويل ولا عبالك مال عمرها شهرين و العيون سود واكبار والوجه مدور واحمر لهسه اتخييل شكلها واشلون حلوه رغم السنين المرت عليه

متت من جديد حسيت روحي مو بلدنيا خسرت كل شي عدي ضليت عايش بليه شعور گمت اشتغل سايق من البصره للحله لو لبغداد لو لكربلا بس علمود الهي روحي وانسى هاي شغلتي من زمان وذبيت روحي بيها بهاي الفتره حتى ابات بلگراجات

بيتي هملته واهلي مااروح الهم يخابروني ماارد عليهم رغم حجيهم و دائماً يسألون علي ويطمنون علي امي و اخواني عايش بليه روح افتر بين المحافظات الى إن اتعب بدون مااحس على نفسي وانام بلسياره

شعور صعب والاصعب الذكريات الي عشتها وي احب شي لگلبي واگعد اذكره عشگ حياتي وحب گلبي واصغيرونه واخذتها عناد بااهلي واهلها لان احبها واريدها عشت وياها ارو؏ قصة حب لا يمكن تتكرر أبد



نحن في زمن مريب و متشتت
لا احد يفهم و لا احد يعذر فـ نلجأ للبڪاء دائماً
بڪاءاً حقيقياً يصل إلى إن ينفطر القلب و تحترق العيون لأننا في زمن لا نستطيع إن نطرق باب من ابواب احبابنا لنلجأ لهم و نخبرهم ما بنا من مكنون لا احد يتحمل عمق احساسنا و صعوبته
لا احد يشفي صدورنا حين نخبره بما يجول
بـ قلوبنا او نشكو له لـ ينفث ما في ارواحنا من ضيا؏
لـ يعلم الله أنني حاولت و حاولت بشتى الطرق إن تكون مشاهد حياتي خاليه من العذابات خاليه من الارهاق
و اصررت على نفسي و اقدامي ان لا تبتعد عن خطاك و لڪن اسفي على نفسي بعد كل هذا الود و الحب في النهايه ڪانت كل خساراتي منک
من المؤلم ان يعاهدک احدهم بـ البقاء و يكون اول الراحيلين هو يتغيير عليک ڪثيراً
لـ يجبرک على الرحيل فڪيف يعزي المرء نفسه اذا ڪانت هي روحه التي رحلت عنه
و ڪيف يڪون للأنسان مليئ بـ الاحلام و الامنيات و الأمآل ثم بعد كل ذلك يموت كل شي فجأة ليصبح قلبه مدينه مظلمه
ڪ مقبره أين ذهب كل هذا
هجرتني وتركت لي وجعاً يكفيني خمسين عام أي كرم هذا ڪان منک
ثم ....
‏أصبحت أتجاوز كل شيء بصمت مريب
لا يشبهني أبداً و لا أعرف من إڪون أنا
لا أحد يعلم ما معنى إن تقام حروب بداخلك و انت في قمة الثبات


يتبع

١٥____١٦

#بارت١٥





سلام لأولئك اللذين يزرعون فينا شيئا من اللطف
لأولئك اللذين يزرعون فينا الحب والسعاده لأولئك اللذين يغيرون حالنا لاحسن حال بوجودهم انار الله دروبهم بكل حين
سلام ڪبير لا ينتهي للذين إذا مروو في حياتک مرو بـ خفه و إن غادروا فـ ليس حباً في الرحيل

سلام لمن تعثر و أستقام إنحنۍ و أعتدل
إنهار و أستقوى خذل و تحمل ثم أصبح يدرک حدوده مع الآخرين والحياة متى يواجه و متي ينسحب و متى لا يلتفت لأحد أبداً
سلاماً مخصوص والف سلام لـ طيبي النفوس ورائـعي الڪـلام
دمتم بــخير الى ما بعد الأبد
••┈•

❖═══❖◎◎❖═══❖

آماني :: صباح الخير
كفايه :: صباح النور
آماني :: رايحه اني للدوام

كفايه :: ما تاكلين شي
آماني :: لا ما أريد ما اشتهي
كفايه :: آماني اليوم لو ما ترحين للمدرسه

آماني :: خير يارب ليش مااروح عندي امتحان عربي شهري و ايروح عليه اذا ما اروح

كفايه :: اليوم مطر قوي والشوراع فايضه ديري بالج
آماني :: ان شاء الله
رحت للمدرسه بلشلاع الگلب وصلت مدرستي بعيده و اروح مشي و اجي مشي لگيت البنات رايحات ما منتظراتني وصلت سلامات الحمدلله فرصه هاي گضيت اغلب وقتي جوه المطر اني من عشاق المطر

امتحنت و خلصت طلعنه بلفرصه اني و البنات بره للساحه و جوى المطر اوقات حلوه ما تنسي خلص الدوام رجعت للبيت الشوراع كلها فايضه و الفاصل بين شارعنه و شارع المدرسه هواي ماي بي و ماكو عبره اكو شباب لمو طابوگ و خلو حتى يعبرون همه عبرو و بعدهم البنات صارت هوسه كلهن يردن يعبرن

اجيت اني وصلت خايفه ابين الاعبر وبين لا المهم اتوكلت و عبرت وصلت للنص و اتحركت الطابوگه و التفت رجلي و انگلبت بلماي اتنگعت اتنگع من فوگ ليجوه و الشباب و البنات كلهم اگبالي يا فشلة الفشله 😂😭

متت ابدمي دخلت بيت صديقتي انطتني ملابس منها لبستهن و رحت اكمل طريقي وصلت للبيت اتلگتني امي

آماني :: السلام عليكم

كفايه :: و عليكم السلام شني هاي الملابس مالاتمن منين
آماني :: من دموع خذتهن غير طحت بلماي اتنگعت ملابسي انتي من الصبح اتلگيتيني لا ترحين

كفايه :: يااا و اشلون طحتي
آماني :: اشلون طحت يعني جاي اعبر و طحت

كفايه :: دروحي غسلي و بدلي
آماني :: اي رايحه
رحت گبل للحمام وماي حار سبحت سبع سبحات على الماي الوصخ الي دخلت بي 😁
🤦🏻‍♀️

اشويه اجه ابوي من الدوام تعبنان و راسه يوجعه صبينه غدا خلصنه غدا راح نام غسلت الماعين و رحت اريد احضر واجباتي واسمع اصياح محمد و رضا و حميد يتعاركون
محمد و رضا ارويسيه وكحين و هجماتهم سوى متفقين و دايرين على حميد واحد يركض ورى الثاني يدخلون من باب الهول ويطلون من باب المطبخ اصيح اريد ماكو

هذا الحجي البيبان مالتنه حديد اسوايت عمو عادل و يرگعون بيهن و الصوت مال الرگع وصوت اصياحهم و معاركهم واصل وين گاملهم ابوي رگع راس ابراس هذا الحجي ركض وراهم ما لحگهم گوة لزمهم ذولي الزوج
وشلع البيبان فلتهن من النرمايد و شمرهن 😂

اشويه صار هدوء رجع ابوي نام گعدنه متنا من الضحك على ابوي اشلون شال البيبان
گعدت امي بعد ما خلصت المعركه

كفايه :: هاي شكووو ليش الباب مشيول شمسويين ولكم

آماني :: اگول يمه لو اترجعين اتنامين مو احسن احترگت الدنيا من ورى جهالج و انتي توج جايه

كفايه :: هسه غير تحجي شكو ابدال مااخذتيني حاصل فاصل

آماني :: اگلج يمه انتي نايمه لو گاعده

حميد :: خاب شنيه
يمه هذول محمد و رضا تعاركو وياي واجه ابوي شال الباب و شمره وهاي هيه هسه آماني سوتها قصه

آماني :: يمه اشعده الفهيم اذا انتم هيج ليش ما گعدتو و سكتو

كفايه :: دسكتو يله سكتوو
آماني :: هو ساكتين و الله هاديهم وجاي يباوعون على التلفزيون بس بعديش ما ادگليلي بيش متنسيه بيهم ذولي الزوج

رحت سويت كيك و نومي بصره عصير و گعد ابوي رجع سوى الباب 😁
هسه انت شلعته المن جاي اسويي الحمدلله والشكر ربي لا وانوب يگول الباب محد يعرف يسوي بربك هو ينشال ينحگل غير انت صرت هرقل وشلته مدري اشلون 😂

صلينه المغرب و اتعشينه اشويه و اجو سلام و امه يبوي لا هله ولا حلة بركه المن جايين ما ادگلولي خربتوا الگعده الحلوه والله

رحت اركض ادخل جوى مااريد اشوفهم اسوي حجتي اريد ادرس صاحوو أماني يبوووي اشلون ورطه هاي اشلون اطلع هسه امري لله لبست حجاب و طلعت
آماني :: السلام عليكم شلونج عهود

عهود :: و عليكم السلام هلا بيج شلونج زينه
سلام :: شلونج آماني
آماني :: الحمدلله بخير
كفايه :: يمه جيبي عصير و كيك سلام مريض وما ماكل و يريد يضرب ابره و هاي الابره قويه ما يصير يضربها وما ماكل شي

آماني :: صار
رحت حضرت و عدلتهن وحطيتهن اگبالهم و طفرت
رحت للمطبخ اشو هذا اجه وراي
خير شكو شتريد
سلام :: اريد ماي
آماني :: مو اكو ماي يمكم
سلام :: ما شفته
آماني :: اشبيك اعمه و ما شفته اشگد غثيث دخيل ربك

سلام :: احجي وياي عدل و لا تغلطين شمسويلج وهاگد اضوجين مني غير افتهم

آماني :: هسه انت اجيت تريد تشرب ماي لو تريد تفتهم بله مالي خلگك كف مني اروح اكمل ادروسي احسن الي
طلعت من المطبخ و عفته فكه شني هالزگه هذا رحت للغرفه ادرس اشويه وراحو همه

مرت الأيام عاديه بيوم چنت راجعه من المدرسه لگيت محمد و رضا يلعبون طوبه بلشارع ما گدرت اصيح عليهم و ادخلهم الشارع متروس شباب دخلت للبيت وگلت لامي

اگلج يمه محمد و رضا يلعبون بلشارع وي ولد ام جعفر كفينه و دخليهم لا يتعاركون و نبتلي وي ام جعفر تجي اتلعلع علينه اني ما گدرت اصيح عليهم الولد تارسه الشارع

ابين ما جاي احجي وي أمي دخل محمد يركض هااا ولك خير اشبيك اشويه واجه ابن ام جعفر وجه كله دم يمه اسم الله هاي اشبيك اجتلنه ام جعفر اتعد و اصف

محمد طاگ ابنها وشاگ راسه دخلنا وغسلنا وضمدنه جرحه خيطو اربع اخياطات ولزمو محمد كتلو محمد عصبي حيييل احنا انسمي ابو غضب رغم وكاحته بس ما ايأذي احد اذا محد امأذي اثاري ابن ام جعفر طاگه بخشمه بلطوبه وهذا ما مقصر ويا

محمد دائماً يتعارك وي ذكريات
ذكريات ما تسكت منهم اتلاشيهم و تغلط عليهم اضافيرها اطوال اتحب اطولهن ومن تتعارك وياهم ازلغهم بضافيرها

محمد :: اتقرضين اضافيرج لو اكسر ادييج
ذكريات :: يا فدوه اشحدك اتكسرهن انجب و وخر مني يله لا اگل لابوي ايموتك

محمد :: شوفي ايدي اشلون زلغتيها اذا ما اقرض اضافيرج ما اطلع أنا محمد شوفي

ذكريات :: انشوف بله انا لو انت

آماني :: نمنا بليل على حب الله گعدنا على اصريخ ذكريات بسم الله الرحمن الرحيم هااا شكوو

ذكريات :: شوفي اضافيري شلون امكسرات و امقرضات وج شوفي شكلهن اشلون صاير منو امسوي بيهن هيج

آماني :: عبالي مدري اشبيج اتكهربتي مدري شني عابت هذا كله على اضافيرج الحمدلله والشكر وين ادري منوو امسوي بيهن هيج اني چنت نايمه حالي حالج

اباو؏ لأضافيرها شي شكل سبعه شي نص اضفر شي طاير كله متت من الضحك على شكلهن وهنه اطوال و بيض و نضيفات معتنيه بيهن صاير شكلهن يخرب ضحك اني گلت ماكو غير محمد بس سكتت ما گتلها و هي نست اصلا و هو غلس ولا عبالك امسوي شي أبد 🤐😂

بيوم ردت اطلع من مود الدراسه گلت لابوي رايحه لبيت جدي صار هواي مرايحه قبل رحت بدلت واخذني علاء ومشينا اول ما فتت للبيت صار اگبالي حيدر ابن عمي أمجد هذا ابنه الچبير ويا عمتي وسناء و مرت عمي ميثم

حيدر :: هلا ابخطيبتي

اني ضليت اتلفت وراي اريد اشوف منو خطيبته ما شفت أحد
آماني :: هاي منوو خطيبتك
حيدر :: أنتي ليش اكو واحد وراج

آماني :: لا ماكو احد بس اني بس منو گالك خطيبتك اني ومنو گالك اقبل بيك واريدك

حيدر :: ليش ولج اشبيه وما اتقبلين بيه

آماني :: هسه انت خذتني افلاحه املاچه من الباب حتى نسيتني السلام
سلمت على عمتي ومرت عمي وانوب استلمني بلاسئله

آماني :: أگلك ما توخر مني والله بطران انت شوفلك غيري لا تلح وياي ما افيدك اني
حيدر :: وليش يابه ما اتفيديني بس لا حاطه عينج على واحد

آماني :: عمه اتحاجينه وتردينه لو احجي اني ويا محترمته لأن انتم يمه ولان اكبر مني ما ايصير اجاوز علي

حيدر :: يمه حجت الدكتوره خفت ترى
اني عفته ومشيت عنه جوى لگيت سلام اهووو ربحت المن اجيت اني هسه اشلون اثنين واشلون عكره دخيل ربكم
جنا ابوكتها جاي نتفق اروح للزياره بسيارة ابوي و خالتي الي هيه مرت عمي قصي ياخذها ويانه حتى اشوف اهلها و عمه وسناء همين اتروح ويانه

گعدت اني مستمعه للاحاديث مالتهم بدون كلام مني استلمني جدوو اضن هاي الساعات ما تخلص ☹️😒

صاحب :: هاا بويه اشلونج
آماني :: الحمدلله زينه جدو
صاحب :: شلونج بلمدرسه استلمتي الشهاده
آماني :: ايي الحمدلله ناجحه
صاحب :: اي عفيه ابنيتي شاطره

گتلهم اني راح اروح كلها استغربت ليش وتوج اجيتي خليت سلمت وطلعت دخلت لبيتنه ابوي وامي هم استغربوا توني رحت مصارلي هواي ليش رجعتي گتلهم ماكو شي

بدينه انحضر اروح لڪربلاء سيارة ابوي چبيره وراحت ويانه عمه وسناء و خاله وعود
بنص الطريق عطلت السياره حمت وكفت المكينه بلعماره الدنيا حاره وشمس قويه يبوي وصار التصنيف والضحك افلس هذا ايگول كله منك وذاك ايگول انت السبب

ضل ابوي يفتر على المصلحين حتى يسوون السياره لگاله واحد سواها واحنا خلانه ابيته دخلنه لليل ياله وصلنه كربلاء دخلنه لبيت جدي اهل امي هلكانين ضلينه ايام انزور و نفتر جانت اجواء حلوه بحضرت الايمه مريحه تطمئن لها الگلوب

#بارت١٦

❖═══❖◎◎❖═══❖

لا يأتيک أحد بــ؏ـد سنوات لـ يشكرک على تنازلاتک عن شيء أو لأهمال حق من حقوقک لأجله
تنازلاتک بعد قضاء وقت و فترة من الزمن سيتم احتسابها على أنها سوء إختيارک الشخصي
ثـــ۾.....

خلافاتنا ليس مع من يكرهنا كل حروبنا نخوضها مع الأحباب
البعض لا يحبک ولا حتى يكرهک هو يحب نفسة فيک فقط يغذي روحه ونقص اهتماماته الكامنة من خلالک
يحب ما تمنحة له من اهتمام و من سعادة وشعور بالقيمة لا يجرؤ على أن يرافقک بحقيقته يظع قناعاً يخفي بشاعته خلفه
وقد تجد أنک لم تعد تعرف تماماً ما تريده
ربما لانک لم تقتنع بالنهايات التقليدية او أنک صرت مشبع برغبات مڪسوره من قبلهم او مللوک و رأوا أنک لا تناسب متطلباتهم لأنهم ارادوک لوقت معين لا للعمر بأكمله
و ڪانت الخسـارات فادحة و ڪان الربح تجربة فاشله مقوية للشخصيه مرة أخرى







كفايه :: اگلك سجاد هاي أم جبار اجت على آماني لأبنها أحمد و گتلها خلي اشوف ابو علاء و اردلج خبر

سجاد :: گليلها ماكو عدنه مره وما ننطي للغريب
كفايه :: أنا گتلها اصغيره بعدهي وينها وين الزواج و هو ابنها چبير اشعجب اجو على آماني

سجاد :: چا انا اشدراني اسأليني چا سألتيها
كفايه :: ياا استحيت اسألها بس گالت لأن خوش ناس انتم و نعرفكم

سجاد :: سدي السيره يمعوده توهي داومت ثالث هاي آماني ما ازوجها ولو ازوجت اخليها ويانه بنفس البيت

آماني :: چانت بداية دوام ثالث متوسط و الدروس حييل صعبه و بدأ مستواي يتراجع مو مثل كل سنه و مالي واهس للدراسه وصارت مشاكل اثرت عليه و صديقاتي و سوالفهم الهن تأثير انجح كفيان شر و درجاتي ناصيه و هاي السنه بكلوريا و لازم انخلص الكتب كلها

بهاي الفتره بيت عمي عادل گعدو ويانه فلشو بيتهم كله وضلو يبنون بي ضلن بناتهم يتقربن الي و يحاولن يصادقني و گعداتهن وياي كله حجيهن على سلام سلام هيج و سلام هيج يسونه الأمير وليام مدري ياهوو و إني اساسا اضوج منه چان بوكتها سلام ايبات ابيتهم علمود العمال يطلعون الصبح من وكت يشتغل وياهم

إني دائماً العصر اصعد فوگ انظفه وارشه ماي و افرش فراش واگعد افرش كتبي و ادرس اطفر من الهوسه
مره گاعده وما اشوف اله سلام فوگاي

آماني :: يا ستار هاي شكو اجابك هنا

سلام :: شني شفتي وحش

آماني :: لا وانت الصادق

سلام :: انجبي و سكتي و اسمعيني عدل

آماني :: أول شي لا تغلط و ثاني شي انزل جوه لا اصيح لأبوي عليك

سلام :: اجيت احجي وياج اسمعيني زين و ابوج ما موجود

آماني :: احجي اشرايد وكفني شرك
سلام :: شوفي أنتي الي و مااصيرين لغيري على جثتي لو اطوج اهلج لهذا الجاي عليج او لأي واحد اگتلج قبل لا اصيرين لثاني و هذا اذا وافقتي علي اندمج و العباس

آماني :: هوووب هوب منو هذا الجاي عليه و ياهو الي اوافق علي او ارفضه وبعدين هذا كلامك ما اتمشي عليه خاف امشي على خواتك و بيتكم شني جايلي و صايرلي عنتر أبن شداد

سلام :: جيرانكم جايين عليج يخطبونج معقوله ما تدرين بيهم المهم
يا بت الناس افهميني والله احبنچ و ما اگدر ابلياچ ليش اتكرهيني هاگد اريد اعرف شمسويلج انا شو ولا يوم اجاوزت عليج محترمج و احبچ ليش ما جاي اشوفين هلشي انتي شنو اسويلج حتى اتعرفين احبچ اكتل روحي

آماني :: يا أخي ما ابلعك هي گوة واسوي فضل لو تكتل روحك و تخلصني منك و بعدين هذا الحجي ماادري بي منو همه الجايين عليه ومنين سمعت أنت

سلام :: هيج صار الحجي يعني شوف أنا شنو اگلج وانتي شنو تردين عليه وبعدين انا سمعت امج گالت لامي و يحجون
امونه و علي أموت عليج وشنو تردين اسويلچ بس انطي فرصه و فهميني

آماني :: خوش فهمت بس وخر مني هسه و روح اريد ادرس عندي امتحان

أچذب اذا اگول ما اهتميت لكلامه وخاصه بعمري طيش و مراهقه تخيلته فارس الأحلام المهم كملت دراستي ونزلت ادور على أمي

يمه هذول منو الجايين عليه شو ما حجيتي سمعت من هذا اصخام

كفايه :: بسم الله الرحمن الرحيم اشبيج جايه هداده يا صخام هذا منو بعد
آماني :: سلام سلام هسه گليلي منو هذا الجاي عليه

كفايه :: يااا وج سكتي ام السان لا اسمعج امه عييب
ام جبار اجت عليج تريدج لـ أحمد وابوج گال گليللهم صغيره وما ننطيها للغريب

آماني :: ايبااااه والمن تردوني ليا قريب هذا لا يكون لـ اصخيم لو احويدر المدگدگ

كفايه :: اگلج تعاي صدگ و سلام منين دره واجه گلج

آماني :: غير حضرتج اسولفين كلشي لـ أمه اذا انتن سرجن و مسرورجن سوه أكيد عرف منها وهيج وهيج گلي يسوي لو قبلت و سوه روحه عنتر أبن شداد ابراسي

كفايه :: اشبيج وي الولد ليش دائماً تتناكرين ويا وانتي مو هذا طبعج الولد ما امسويلج شي شو خوش ولد وشاغول

آماني :: ما امسويلي شي بس مااطيقه ولا ابلعه
كفايه :: دروحي روحي الله يطيج كملي دراستج عود

آماني :: ورى ايام اجتلي مرت عمي أسعد

حبيبه :: أكلج امونه هذا سلام اجالي و حاجاني عليج يگلي بلكت اتقنعيها أنا شاريها و احبها وكت ما جانو اهلها بأيران واتمناها اصير الي هاي حلم الطفوله

وج يعني حب الطفوله ما راح ايعيفج ولا ينساج صدگي ايموت عليج اسالفه كلها بيج جابلج هاي وگلي تنطيها الها و اذا اتحبيني لا ترديني انا عمتج مثل أمج

آماني :: خذت العلاگه منها جانت بيها علبه مغلفه و شال و قطعه بيضه بيها حرفي و حرفه وعطر فرنسي و رساله بخطه المزنجر گوة فهمته چانت كتابته بـ الانگليزي مدري كردي كل شي ما افهم منها و نقص احرف الكلمات اغنيه لـ صلاح البحر و بلاخير كاتب احبج و اموت عليج

گام يجينيه بين يوم ويوم مرات اطلع و مرات اغلس هو استغل فترة اهله موجودين عدنا هو ما يصلي گام كلما يجي اعلمه علىالصلاة گتله صلي و حاولت اعلمه على الصلاة و فعلاً گام ايصلي و هذا الشي فرحني

اجه رمضان وهمه عدنا بعدهم ننجمع كلنا على الفطور هو ويانه موجود و صايم بديت اتقرب اله اشويه اشويه الى إن اتعودت عليي و على وجوده ويانه كلما يجي ايجيبلي شي ويا بلعيد جاب الي ملابس ابوي وامي استغربوا

سجاد :: شكو هاي المن الملابس و ليش اجيبلها وياك

سلام :: عمو اشتريت للبنات و هي صارت اگبالي جبتلها شكو بيها مابيها شي

سجاد :: اشمعنا بس آماني ليش ما حبت لـ ذكريات هم

سلام :: هااا نسيتهاا
ذكريات :: أي صدگتي سلام افندي علينه هاي نستيها
سلام :: وج ام حلك سكتي انا غير مره اجيبلج

خلصن شهرين و خلصو بناء بعد رمضان و العيد بدوا ينقلون بغراضهم شالوا منه و استقروا ابيتهم ضل يتردد علينه كل يوم حجه شكل حتى مرات يجي يضرب أبره وهو مابي شي ابوي يضوج منه ما يرتاحله و كلما يجي النه ايضل يحجي ويصير وجهه ثگيل لأن حس اكو شي

حبيته وتعلقت بي و حبيت اهتمامه بيه طبعاً دراستي ومستواي اتراجع حييل و حتى رسبت بأربع مواد بنص السنه استلمت النتيجه من خوفي و مستحاي ما راويتها لامي وابوي وادري بيهم يحجون عليه بس غصب عني لازم اگللهم اشلون اخذها واني ما موقعتها لازم توقيع ولي الأمر اضطريت قبل لا اروح المدرسه الصبج گتلهم

آماني :: بابا وقعلي هاي الشهاده
سجاد :: توج ياله تحجين ليش ما حجيتي من امس من رجعتي

آماني :: هااا مو شسمه
سجاد و كفايه :: راسبه مووو چم ماده

آماني :: أي أربع مواد
كفايه :: صدگ تحجين لو تشاقيين بله اشوفها واشلون هسه ادخلين وزاري

حصلتلي رزاله و ضجت حييل منها قررت اترك كل شي وراي و اشد حيلي واعدل المواد الراسبه بيهن ضليت كل همي أعدل المواد و انجح حتى ادخل بكلوريا

گام سلام يجي ومااطلع اشوفه هو مل اختي ذكريات اتروح للسوگ مرات وي أمي بيتهم ابطريق السوگ يسألها عني لو يدزلي رساله كتابيه بيدها لو شي هديه ويوصل سلامه الي من خلال اختي لو خواته يجن النه

قسمت وقتي ضليت اگعد الفجر ادرس و اراجع لحد ما اروح للمدرسه چان اخبالي و لا الفيزياء و لا الكيمياء والانگليزي أموت منهن و ادرس على أعصابي المهم عدلتهم و نجحت بكل المواد و درجاتي زينه بس الأهم إذا اتقسمن و طلع عندي السعي هذا الي خوفني و ضوجني

انطونه عطله قبل الإمتحانات و گالوا انكمل النتايج ونعلن عنها والدخول همين
بهذا الوكت أمي اتمرضت و مانعرف شنو سالفتها اتأزمت حالتها راجعت گلولها بيج تيفوو حييل اتأذت بعدين اكتشفت حامل هنا صارت المسؤوليه كلها عليه

البيت وشغله عجن و خبز طبخ و غسل و الدراسه لعبت روحي من كل شي ما الحگ على وكتي الليل كله ادرس رحت اشوف النتايج علنو عنها والدخول الوزراي خايفه على قلقل على ضايجه كلها ماخذه مني مأخذ استلمت النتيجه واجيت للبيت لگيت أمي واكفه بلباب اتباو؏ علي من بعيد

آماني :: يمه خيرر المن واگفه بلباب اصاير اكو شي
كفايه :: امتانيتج بشري شنوو

آماني : شبشرر

يتبع

١٧__١٨




إحببتک كأنک الأمان والسلام
سلاماً لي حين ملڪت قلبي وعقلي وروحي .. و سلاماً لک و لقلبك الذي علمني الحب
سلاماً لمن أحببته حد الألم فعلمني الحياة
تطير ڪ الحمامه في فڪري إذا فڪرت بک

قراءة ممتعه اتمناها لڪم معي

كفايه :: شني شتبشرين النتيجه شنو ناجحه لو لا و داخله وزاري لا انا منتظرتج و انتي بطرانه

آماني :: أي داخله و ناجحه هاج هاي الشهاده
انطيتها الها و دخلت اذا هي استلمتني من الباب

كفايه :: ياا صلوات درجاتج عاليه و ناجحه چا اشبيچ ضاربه البوز شبرين
آماني :: يمه راسي يوجعني حيل احسه راح ينفجر

كفايه :: يا يمه اسم الله عليج اشبيج خاف من القلق لو ما نايمه عدل
آماني :: ما ادري يمه ما ادري مالي خلگ

ضليت اصرخ من راسي و الوجع البي ما اگدر اتحمل بعد الوجع گومتني گوة غسلتلي وانطتني حبوب رأس ابوي طالع للصيدليه فتحها هو وصديقه يجي من المستشفى يرتاح ساعتين و يروح للصيدليه يفتحها

المهم اني شربت حبوب رأس وعصير ليمون ونمت ضليت أنام هواي و وجع براسي أبد ما يتركني رجعت قسمت وقتي بين البيت و شغله و الدراسه انطونه شهر ونص عطله قسمتهم على الكتب و كل كتاب اخليله كم يوم حتى اخلص كل الكتاب وكل المواد

بهاي الفتره صار الكتل بلشوارع و على الإسماء و الي مالابسه عبايه صارت اوضاع المنطقه زفت و اتخوف رعب الخطف بصفحه و الكتل بصفحه مره گلي ابوي امشى وياي لبيت جدج انا گمت ابدل حتى اروح ويا واطلع اشويه من الجو و الدراسه والتعب

سجاد :: بابا آماني لبسي عبايه
آماني :: ليش اشبيهم ملابسي اطوال و اعراض و عبايه ماالبس لو شيصير
سجاد :: چاا ما اطلعين وياي

آماني :: اي عادي ما اطلع هلرايحه ابدل و اگعد على أساس اني وين رايحه هو كله كله لبيت جدي و وياك قابل راح ياكلوني

سجاد :: ديله يله امشي بس لا تبچين
آماني :: ما بچيت على شنو ابچي

ابوي حييل يخاف و يغار عليه يعني لو أريد أطلع ايشوف لبسي و اذا ما مقتنع بي يگلي بدلي و لبسي غيره و هاي السالفه ابد ما بطلها وياي چم مره يخليني اغير لبسي و يضوجني من الطلعه كلها المهم طلعنا و رحنا لبيت جدي ابو أمجد سلمنا و گعدنه و بدأت التحقيقات و السؤالات الما تخلص و لا تتبطل

صاحب :: هاا آماني شني بويه هيجي طالعه انتي لا عبايه لا شي و انتي چبيره و حلوه و هذا الدرب اشطوله و ترحين مشي و تجين مشي عيب و هم ايخوف

آماني :: حجيت بگلبي يا سالفه الما تفض جدو ما عليه شي لا تخاف ما يصير بيه شي گلت بگلبي بس كفني شرك انوب حول على ابوي

صاحب :: چاا أنت شني بويه ما تگدرلها هاي النويعمه ما تلبسها عبايه ما اشوفها اشطولها و إن شاء الله ناوي تعوفها تدرس و تكمل بويه هاي اشيخ عليك لو كملت

اني خليت و گمت انقهرت حييل و ضجت احترگ گلبي من حجيه وما اگدر ارد ادري بأبوي ما يقبل و هم ما ياخذ بحجيه ويسوي بيه مثل ما گال طلعت بره گعدت اشويه و دخل عمو عادل و سلام شافوني ضايجه و گاعده لوحدي على صفحه

عادل :: هاا أمونه شلونج خيرج بويه ليش گاعده لوحدج هناا اشبيج منو وياج

آماني :: هلا عموو شلونك لا مابيه شي سلامتك
سلام :: شلونج امونتي اشبيج منو وياج صاير شي
آماني :: الحمدلله زينه لا محد وياي ما بيه شي
عافوني و دخلوو اشويه و رحت دخلت يم عمتي و نسوان عمامي گعدت دخل سلام و بدأ التصنيف و السوالف و الضحك إني وياهم بس امبين عليه امخنچره و وضع رأسي و الوجع الما يعيفني يأثر عليه بسرعه گمت من يمهم بره احسن روحي مخنوگه أريد اتنفس اشويه و اجه وراي سلام حس عليه بيه شي

سلام :: أمونه حبيبتي اشبيج ليش مو على بعضج صاير شي گليلي عفيه عود اليوم أنا اجيت فرحان بس ما ادري بيج هناا خوش مفاجأة هاي

آماني :: اني مابيه شي عفيه لا تلح مالي خلگ شكوو شنوو الي امفرحك
سلام :: أي ليش مالچ خلگ غير ادگليلي اشبيج و اصاير ليش اتخوفيني

انا و ابوي اجينه انحاجي جدو يقنع ابوج على موضوع الخطبه الصراحه هاي ثالث مره نحاجي ابوج و ابوج يغلس لو بعدين لو مو هسه أريد اعرف اشوكت مو طلعت روحي أنا

آماني :: شنو هذا الحجي جديد و انت اشدعوه عليك مستعجل ما متفقين هيج احنا و الدراسه اشلون و هسه امتحانات راح تبدي ما فكرت بهاي أنت اهم شي روحك و راحتك

سلام :: و ليش انأخر إذا أنتي رايدتني و أنا رايدج و مشتريج و مشلو؏ گلبي صار اسنين أنتي طلعتي اضبط من ابوج يا برودج

آماني :: يا برود جاي اگلك عندي امتحانات و أمي مريضه و البيت فوگاي شصير اني يعني

سلام :: هاا يعني عاجبج لجاي ايصير اضاهر اجي اشوفج ما اطلعين اشوفج و احجي وياج بلصدف لقاءاتنا معدوده والله مليت من هاي الوضعيه و الصراحه خايف

آماني :: من شنو خايف
سلام :: الصراحه ما مطمئن لوضعج و لا لأبوج و حاس على يا ساعه اتعوفين الاول و التالي و اضل انا و انا جاي اسمع كل يوم واحد جاي عليج اموت ولج آماني اموت من الحرگه و القهر خاف ابوج يوافق على واحد منهم ويروح كل تعبي

آماني :: يا تعب تقصد
سلام :: خاب دروحي روحي الفاهيه عفتي الحجي كله چلبتي بهاي

آماني :: دروح هو مو صوچك صوچي واكفه احجي وياك هسه يجي عموو ميثم و يشوفنه و نبتلي
سلام :: هسه انا خذت منج حگ باطل كلشي ماكو وعيونج كل شي ما افتهمت منج اشحده خلي يسوي شي و شوفي شسوي

آماني :: هجم بيت جاكي شان ادخل عيني ادخل احسلك

صدگ واحد يحب الثاني وگلوب مراهقه ونتراسل و اشعار و خابصين اروحنا بس ولا سوينه شي حرام لو غير اخلاقي ابد
جان عدنا شرايط تسجيل اغاني قديمه ابوي محتفظ بيهم من ظمنهن واحد بس موسيقى اسم الموسيقى ليلة القبض على فاطمه هذا حييل حبيته جنت دائماً اشغله واگعد اسمع

اما الشرايط اذكرت عموو عادل من چان بلاردن اشلون يدز النه حجي بلشرايط حبيت الفكره گلت خلي اجرب اسجل صوت وادزه لـ سلام خلصت شغلي چانت امي بلسوگ واخواني دوامات واني معطله گعدت اسجل واجرب اشلون يسوون الصوت بي والله صار ضليت اسولف ويا كأنه يمي
هسه اتگولون شنو هالفكره المجنونه هاي

المهم وصلت اله الشريط هو عباله اغنيه شي واني هم ما گتله شنو هذا بس انطيته اله هو سامعه وميت ضحك عليه ايگلي صدگ مخبله عاد هو صار اضبط مني سوه نفس الفكره بس ضاف الها شعر چانت كلمات الشعر كلش حلوه اني من عشاق الشعر احبه حييل

دزاه الي بيد عمتي حبيبه مرت عمي أسعد
حبيبه :: اگلج هذا كاسيت انطانيا سلام گلي وصلي لأماني بس عليج الله من اسمعينه گليلي شنو بي
آماني :: ان شاء الله
خليت الشريط بلمسجل وگعدت اسمع عبالك مسافرين وهو بوكتها جان اكو تليفونات موجوده بس الفكره عجبتنه حلوه انو الواحد يجرب شغلات من ضمنها الغريبه

عاد مره ثانيه هم دز هو بيد عمتي حبيبه گالت اگلج شنو السالفه هاي الشرايط شنو بيها فهميني گعدت سولفتلها خربت ضحك علينا

حبيبه :: تدرين چم سنه حبيت عمج وهو هم بس هاي الفكره ابد مااجت على بالنه جان ايدزلي شرايط بس أغاني وانا هم ادزله أغاني راح احاجي أسعد اگله ليش ما سويت هيج چا بس اسليم و امونه يسون هيج

آماني :: عمه صدگ جذب وكتكم راح هسه هذا وكتنه خلينه انعيشه اگلج صدگ سولفيلي على حبكم
حبيبه :: يووو سكتي يمعوده شسولف اشما أسولفلج ما اخلص هواي بطولات

آماني :: اتعلميني بيكم غير چنت اني المرسال بينكم ما تذكرين اگلج صدگ اريد اشوف الرسايل اذا محتفضه بيهن اريد اقراهم

حبيبه :: اي وعلي اشلون انسى هواي أشياء ما تنسي رغم السنين تعدي و اتمر بس اضل محفوره بلذاكره هسه انتم هم نفس الشي هذا حبكم راح اذكرونه و ما راح تنسون ابد لان طفولي

گعدت طلعتلي الاشعار والدفاتر والرسائل الي جان يدزهم الها اويلي يابه عشق لا ينتهي تدرين عمه اتمنى ايصير حبنه مثلكم رغم السنوات الطويله ما اتغيرتوا ولا خرب حبكم ودام بينكم هالشي

حبيبه :: ان شاء الله عمه الله يوفقكم ويفرح گلوبكم وتنجمعون على خير وتحت سقف واحد والله غير العب فلك بعرسكم لو صار اشعدي غير امونه و اسليم فدوه اروحلكم انا اشوف روحي بيكم لهيجي اساعدكم و انصحكم

طريقة تفكيري و عقلي ابد مو مال وحده عمرها ١٥ سنه چنت أحب بعمق بس بعقل رغم صغر السن والمراهقه والطيش بس بحذر وعفويه بنفس الوكت

بدأت الإمتحانات بس الخوف متملكني من الجاي گانه أريد امتحن حتى اخلص وبنفس الوكت مااريد اخلص حتى لا انصدم بلجاي جدو اذا حط شي براسه يسوي تعبت من التفكير حاولت انسى كل شي من ضمنهم التفكير و اتركها على الله و اخلي بالي و اركز بلدراسه وبس و فعلاً انطيت كل اهميتي و وكتي الأكبر للدروس

هاي كلها بصفحه و الكتل بلشوارع و الخطف بصفحه جاي نمشي اني و صديقاتي دموع و مريم وشفنه ابنيه ويانه بلمدرسه مكتوله بلشارع ضلينه امصفصفين لا ناخذ ولا ننطي طارت كل الدروس المحفوظه بلدماغ متنا خوف

مريم اتخاف من الدم هي شافت الدم وهي طاحت بلگا؏ فقدت يمعوده ام الغيره گعدي ماكو انوب التمو الناس واحنا نحاول انصحيها متنا من الرعب ذبينه عليها ماي اشويه صحصحت گومناها گوة ومشينه عفنا الناس ملتمه على جثت البنيه بعد ما نعرف شنو صار رحنه كملنه طريقنه للمدرسه وبدينه الإمتحان جانت بدايه مرعبه ومن كثر الخوف طار كل شي كوة جاوبنه اني عن نفسي ومااعتقد انجح بهاي الماده

رغم خوفي بس مضطره اسكت و مااحجي خاف اگلهم و يبطلوني بس ابو لعلوم امگابل الراديو وين يسكت اذا سمع سامع الخبر والمكان و هو اسودن علينه گال لأبوي يا صاحب وما ادراك ما صاحب شگول عليك اني سويت روحي ماادري ولا اعرف بس خلي اكمل الامتحانات والله كريم عود بعدين

المهم خلصت الامتحانات على خير شبعت نوم السهر دمرني اول اسبوع مشى و عده طبيعي
فد يوم خلصت شغلي صبينه غدا كلنا ملتمين عطلة تغدينه وخلصت كفيت المطبخ والماعين غسلتهن سويت چاي وصبيته الهم گعدت انفتح موضوع

سجاد :: بابا آماني جدج و عمج عادل فتحوا موضوع خطوبتج وانتي اكيد عدج علم بلموضوع الصراحه هاي مو اول مره بس چنت اسد السالفه واگلهم عدها دراسه وامتحانات لو اغلس يصير خير لو بعدين ومأخر السالفه فهسه گامو يلحون رايدينج لـ سلام الموضوع يخصج و يخص حياتج و سوآء قبلتي او رفضتي انتي حره و انا وياج بس الاهم تفكرين عدل و اشوفينه مناسب الج لو لا انا عن نفسي علاقتي بأخوي ما أريدها تخرب و عادل أقرب اخواني الي

كفايه :: الصراحه هو الولد خوش ولد ما يتعيب شاغول و ابو بيت بس أنا ما انصحج تقبلين و تاخذينه ما ترتاحين أبد شو همه كلهم أصغار و هوسه و ما عدهم نظام بحياتهم اتعبين وياهم و انتي مو من النوع الي تتحملين و حمل تعب و مغثه ابنيتي و اعرفج ما تتحملين وهذا زواج مو لعبه مو يوم و يومين و لا هو ثوب و اتبدلينه وكت ما تحبين

حميد :: انطيج رأيي ولو أنا أصغر منج بس ابقى اخوج وهم اخاف عليج سلام لا تاخذينه ما ايفيدج ما يصلح الج و مو من ثوبج رفضي أحسن الج و النه

إني هناا بس مستمعه لأرآئهم صحيح أحبه بس تايهه ما بين علقي الي رافضه و گلبي الي رايده وبين كلام أهلي عنه و النصايح و الارآء احسن اشتت تفكيري حييل و بعد ما اعرف شسوي ابوي شاف حيرتي و حس عليه وهمين يدري بيه هاويته

سجاد :: آماني الاختيار الاول و الاخير الج اخذي وقتج و فكري و بعدين الله كريم لا تستعجلين أنا گتلهم أخذ رأيها و ارجعلكم خبر

آماني :: الله كريم
من بعد كمية النصايح و الرأي المختلف و تفكير عميق قررت القرار الصائب كان لڪن للاسف ما دام بعد ثلاث أيام رحت لأبوي بليل قبل لا ينام

آماني :: بابا اني فكرت عدل و اخذت قراري و ما اريد سلام و أريد أكمل دراستي ما أريد أبطل

سجاد :: خوش بس هذا قرارج لوحد و دراستج لوحد
آماني :: اشلون يعني ما فهمت عليك
سجاد :: يعني دراسه ماكو بعد ومنو گالج اتڪملين مثلاً اصلا المدرسه تنسيها

آماني :: ليش هيج بابا عفيه ما أريد إترك الدراسه الله يخليك واني امفكره لو معدلي زين ادخل معهد معلمات لا تكسرني أنت عاد

سجاد :: آماني سدي الموضوع والسيره كلها والدراسه تنسينها ما اشوفين الوضع اشلونه والمدارس بعيده علينه و الكتل و الخطف افلس لا اتعاندين و روحي نامي

آماني :: منين يجي النوم بعد
ضليت طول الليل گاعده و ابچي مدري حضي وليص أبوي مدري ادعي على جدي الي گام يقرأ براسه و ايوزه عليه مدري اندب على أمي الي مالها كلمه و رأي و وگفت وياي شبعت قهر وبچي گمت اتوضيت و صليت و ضليت گاعده اقرأ قرآن و ابچي حتى ارتاح



يتبع










#بارت١٨
قال لي....
أنتي ‏امرأة يقع بها المرء
بكامل انتباهه
و أنا وقعت بحب تلك المرأة
و تلك العينان الجاحدتان
أنا ‏أنظر في عينيڪي
أتأكد بأن هناك متسع
من الحب والجمال و السعاده
وبأن المعجزات تتحقق
و البدايات تخلق لي من حيث لا ادري
وجودك معي يحمل لي سبع سعادات و طيف حب و باقات من الياسمين لصفاء و طهر قلبك









. •┈••┈••❀🌼 🌼❀ ••┈••┈• ❖═══❖◎◎❖═══❖ . ❖═══❖◎◎❖═══❖

آماني :: بعد رفض ابوي للدراسه ضليت لا أكل و لا شرب و نوم قليل و الوجع يوم عن يوم ايزيد ما ينقص عندي اتأذيت حييل و ابوي ما احجي ويا و لا اطلع اسلم علي و لا اشوفه أبد ضليت على هذا الحال ثلاث ايام صاحب ابو المصايب گام يخابر دائماً يريد يعرف الرد و گاله أبوي آماني رافضه ما تريد سلام

كفايه :: يا ستار هاي منو هيجي يدگ الباب گوم حميد افتح الباب

حميد :: گايم گايم
فتحت الباب و اشوف جدو هلو جدو شلونك اتفضل اتفضل

صاحب :: شني بويه طرشان ما اسمعون صارلي ساعه ادگ الباب الشمس حرگتني مرگ

كفايه :: هلا خالي شلونك عساك سالم خو مابيك شي

صاحب :: غير انكتلت من الحر و انتم ساعه ياله اتفتحون الباب

كفايه :: ما سمعنه الباب التلفزيون صوته عالي و المكيف هذا يربد كل شي ما نسمع منهم

صاحب :: دجيبيلي ماي خل اشرب فحطت

كفايه :: ليش وين جنت انت

صاحب :: رحت استلم راتب و اجييت عليكم وين اميينه شو مالها حس

كفايه :: لوحدك اجييت مو ما اشوف اشلون تطلع لوحدك آماني مريضه و مالها خلگ بلغرفه

صاحب :: اي لوحدي اجييت جابني رجليه ليش اشبيها صيحييلها بله

كفايه :: آماني آماني گعدي بله هذا جدج اجه النه و يريدج

آماني :: خير يارب شيريد هذا ما اطلع گليله ماتت
كفايه :: استحي و لا تحجين هيج على جدج گومي احسلج و سدي حلگج لا يسمع

آماني :: هو انتم هذا الفالحيين بي لا يسمع تخافون منه و كلشي عدكم عيب و حرام روحي گعدي يم خالج روحي

كفايه :: اشلون ورطه هاي ادگومين لولا
آماني :: گايمه گايمه بس روحي اني اجي وراج
گمت غيرت ملابسي و غسلت و رحت يمهم
شلونك جدو

صاحب :: هلا بيج يبعد جدج هلا بيج بويه تعاي تعاي گعدي يمي اشخيرج ايگولون مريضه

آماني :: يمه اشبي جدو خاف يريد يمووت
كفايه :: انجبي ولج و سكتي لا يسمعج
آماني :: عاد هو اشلونه اذاناته تسمع عن بعد مييت متر اگلك حميد اني نايمه لو صاحيه تسمع جدك شيحجي لو اني الوجع مال راسي امأثر عليه ويمكن جاي اتخييل

حميد :: لا جاي اسمع وياج اشبيج صاحيه بس خلي نسمع للاخر شنو نهاية حجيه بله لازم وراها شي هاي المقدمات

صاحب :: اشبيكم ولكم شتبسبسون سمعوني وياكم
آماني :: جدو يعني متأكد ما سمعت
صاحب :: اسمعت ما سمعت شي
آماني :: اهاا لا جدو ماكو شي بس گتلك شلونك شخبارك مشتاقين

صاحب :: هسه اريدج اسويلي نومي بصره يگولون اسوينه طيب
آماني :: لا جدو متوهمين الي گالولك ما اعرف اسوي
كفايه :: آماني
آماني :: شنووو
كفايه :: گومي سوي
آماني :: إن شاء الله

سويت من لا چاره و اني روحي طالعه منه انوب رأسا گعدت من الدوخه و الوجع مال راسي احسه يريد ينفجر بعد مابيه حتى اوگف و عيوني غوشن گوة اشوف ضليت گاعده بلگا؏ اجتلي ذكريات

ذكريات :: هاا خير اشبيج ليش گاعده بلگا؏ و اشبي وجهج انگلب احمر و عيونج امورمه جاي تبچين

آماني :: مابيه شي بس وخري مني
بيه مابيه ڪملت النومي و خليته يم امي هي اصب جاي اروح للغرفه صاح عليه

صاحب :: تعاي تعاي وين رايحه تعاي اهناا
آماني :: لا الوضعيه أبد ما اطمن
صاحب :: شنو گلتي
آماني :: لا جدو مو وياك شنو تريد خوماكو شي

صاحب :: أول شي الله بلخير
ردينه علي اني و امي الله بلخيرات

صاحب :: أنا سجاد گالي انتي ما موافقه على سلام و تردين اتكملين دراسه و سلام درى و ضاج و عمج عادل هم زعل شانت علي ليش ترفضين بدون سبب اشعدج بويه گولي ليش رفضتي امخليه أحد ابراسج شايفتلچ شوفه و دراستچ انسيها ابوج ما راح يخلييج اداوميين بعد هو هيجي گال ولو خلاج أنا امنعج و اكسر رجليج

آماني :: جدو شنو الحجي هذا اشتدرون بيه من هذا النو؏ إني لو سامعين عليه شي و اذا اموصليلك شي عني البي خير يجي يگلي مو يروح يشتكي عليه عد أحد بعدين رفضي لسلام بدون سبب و ماكو اي سبب لا اضلون اطلعون حجي من يمكم مو ايگولون الزواج قسمه و نصيب مو نصيب بعض احنا بعد على شنو هذا الكلام

صاحب :: شني بويه شو تحجين و انتي صاحبة الراهي بعدج ما صرتي دكتوره و گمتي تتفلسفين بروسنه شني مالچ رداد يردچ

آماني :: ادري اني اشحاجيه حتى اتفلسف غير انت اتگلي عدچ شي و شايفتلچ شوفه لو حاطه احد براسي ادري شنو قابل الي يدرسن عدهن احد ابروسهن لو كل العالم نفس تفكيركم چان محد وصل ولا واحد درس لا صارن النسوان دكاتره ولا مهندسات ولا معلمات وانت واحد من الناس مو چنت اداوم بلبترو و وياك نسوان شفتهن سون شي وياك لو وي غيرك

صاحب :: شوف أنا شحجي و هي اشتحجي وج السانج اشطوله أنتي

آماني :: ليش مالي رداد لو گلت شي غلط حاسبني انت او امي و ابوي موجودين وين الغلط گلي علي بله شوف جدو يمكن لو مو أنت جدي چان حجيت وياك غير شي بس اني احترم و رغم هذا كله اني ما مجاوزه عليك

صاحب :: يا بت الحلال الدراسه ما تفيدج و لا الوضع زين و يساعدج اداوميين ليش انا مو خليت امج اتكمل و صارت معلمه و ساندتها و خليتها توصل و احنا خذناها بصف ثالث متوسط كملت معهد و صارت معلمه و بعدين ابوج عارض دوامها

يعني بكل الاحوال ما استفادت شي هاي هي گاعده يمج و اسمعج خلفت و كونت عايله وانتم كلكم زينين و اثثت بيت و هسه مستقره بعد الدراسه شني و شغله ثانيه اذا ابالج أحد تنسين نهائي لو تموتين لو تنطين ما ترحين لغريب خلي هوشنه ابحوشنه

عابت هالمثل والي گاله و الي مثله

آماني :: هسه اشلزگتولي بااحد و عدج واحد و غريب و خبصتوني بيش احلفلك ما عندي شي بس الي اريد اعرفه اشمعنى اني ما اروح لغريب مو هاي بنات عموو أمجد ثلاثه منهن انطيتوهن لغريب چاا أنا وحد شني

صاحب :: اي أنتي وحد و تنسين هاي السالفه لا اتحلفين ادري بيج ما عدج شي بس اريدج اتوافقين على سلام و لا تكسرين ابخاطره تره يحبج و شاريج و مستعد كل شي يسوي علمودچ و شبي هو شو شاغول و ابو بيت و ما يتعيب شنو حجتج بعد

آماني :: هسه اني عيبت عليي لو گلت بي شي اني ما أريد ازوج و انتهى الموضوع ادري ما تحجين يا يمه شو ذابتها على الصامت لا اي ولا لا

كفايه :: يمه انى مالي كلمه و ان گلت شي محد يستمع لرأيي و الموضوع يخصج انتي بيدج الرفض و بيدج القبول

صاحب :: يعني انتي امأيدتها على الرفض موو

كفايه :: مو هيج خالي هسه اني حاجيه شي شو گاعده بس اسمعكم و اتريد الصراحه الحياة الزوجيه اتريد تفاهم و اتريد ناس كبار و عاقله و تتحمل و همه اثنينهم بعدهم اصغار وينهم و وين الزواج و بعدين بيت عادل كل نظام مابي ولا تفاهم همه مو لهسه عادل و مرته امناگر و امعارك اشلون بعد ايزوجون ابنهم و همه حياتهم امخربطه

صاحب :: اهااا هيجي الحجي صار چاا انتي مو اصغر منها بسنه و ازوجتي سجاد و هاي انتم متفاهمين و عايشين أحسن عيشه واحد يحب الثاني واحد يحترم الثاني

كفايه :: ايي اني ما گلت شي صح بس الي گلته عن تجربه و بعدين منو گال هي و سلام حياتهم راح اصير مثل حياتنه ايجوز اصير مثل حياة امه و ابوه

صاحب :: كل شي بيد الله لا اتقررين من يمج و انا اوگف وياهم و اسندهم و شنو ايصير انا المسؤول عنه و انا الي اتكفله و لو سوه شي الها اله ارمي طلقه و اخلصها منه و الله العظيم ما شفنا شي منه هذا هو جاي يجي كل يوم النه و جاي يشتغل وي ابوه بلمحل مال الحداده يعني لو بي شي ابوه يعرف بي و لو بذر من عده شي مو زين احنا عدنا علم بي

آماني :: لا اگلكم و لا اتگلولي قنعنا كلنا و المشكله ابوي خلاني بوجه المدفع و هو طلع منها چان طالع و ما حضر ولا شاهد هاي المحاضره كلها انطيت موافقتي و افتكيت من الجرجره مالت صاحب و سلام گتله هذا هو موافقه

طلع تليفونه و انطانياه گلي اتصلي على عمج عادل واحجي وياه و گليله تعال النه تغده عدنه اتصلت عليي و گتله و صدگ اجه ما طول لأن چان محله قريب علينه اشويه و گلي اتصلي على ابوج اتصلت عليي و هو حاجاه و ابوي هم ما طول اشويه و اجه

واني اصلا صارلي مده لا شايفه ابوي ولا حاجيه وياه شفته دخل خليت و گمت رحت للمطبخ احس روحي گمت افور اشلون الماي من يغلي على النار هيج داخلي ما أعرف شنو السبب

گعد يقص عليهم الكلام الي صار اشلون عنده طاقه للكلام و للاعاده ما اعرف لو ينطيني اشويه من طاقته خررب يومه عود هو رجال اشكبره و اني ابنيه اصغيره و ما عندي الطاقه الشايلها هو

صاحولي و عساي ما صاحولي گعدو يسألون بيه اذا موافقه لو لا و اذا جدو صدر منه ضغط عليه بكلامه لولا گتلهم لا ماكو و موافقه اني بكلمتي اصار اصرار و عناد وي ابوي انوب ضليت اباوع علي و گتلهم موافقه ڪأني ارآهنه على رفضه للدوام و الدراسه الي

عمو عادل احسه بين الفرحان و بين الضايج ما اعرف شنو السالفه و لا سألته على شي اني ابد اما اني خليت آمآلي على سلام بلكت احقق احلامي الي راحت وياا

اتفقوا على يوم الجمعه اتكون عزيمه عد بيت جدي و كلها تلتم و ايكون العقد القرآن هناك اخذوو قياس اصبعي حتى يشترون الي حلقه و راح عموو عادل و اخذ جدو ويا بعد ما اتغدوو و اسوالف جدو و بطولاته الي ما تنتهي

طلعوو و رجعت اني للغرفه سويت روحي نايمه گعدت ابچي اني ابنفسي ما أدرى ليش و على شنوو لحد ما ملييت ونمت ماادري بنفسي صحيت المغرب راسي اموتني من الألم ضليت اصرخ منه اجولي اهلي كلهم يتراكضون عليه

شالني ابوي اشيول ركض بيه للمستشفى الي يداوم بيها سوولي فحوصات و تحاليل و قاسو الضغط طلع الضغط نازل هواي اما الفحوصات و التحاليل كل شي مابيهن رجعوني للبيت طبعاً ابوي لهسه محاجيه ويا بس من شفت خوفه عليه احس روحي لو اموت افضل من ما احجي ويا

عدت الأيام اجه يوم الجمعه بين الوجع و الخوف و الارتباك گمت حضرت اموري بس ولا کأنو اني الي اليوم عقد قرآني رحت عادي حالي حال الكل معزومه على وجبة غدا دخلت لبيت جدي كلها موجوده و ملتمين عبالك عرس مو عقد قرآن

كلها جايه عمامي كلهم همه و عوائلهم
خوال سلام و خالاته جدتي اصير عمتهم وابوهم ايصير خال عمامي همين كلهم حاضرين
وكلها فرحانه ازيد مني شفت سلام وشفت فرحته الي ضاهره على وجه و لبسه و اناقته وشكله المزنجر متغيير

اجتلي خالة سلام الصغيره هاي صديقتي المقربه الي جرتني ابغرفت جدتي دخلتني اول شي خضنتني و بعدين ضلت تغلط و ترزل بيه لأن رفضت سلام بلبدايه واصل للكل الخبر و كلها گامت تحجي شيش بيش مشكل عليه عبالك مدري اسويت اشويه و دخل سلام عليه اثاري متفقه هي ويا يا ملعونه واني مااريد اواجهه

سلام :: هااا ليش ما تردين اتواجهيني منيش خايفه ست آماني و ليش بله ما ترديني چااا وين الحب بسرعه بعتيني اطاچ گلبج اتأذيني ما حسبتي شيصير بيه و أنا الي گتلج ما اگدر بلاچ أنتي وحده إنانيه و ما تهتمين لاحد ادورين مصلحتج و راحتج

آماني :: أگلك أنت عايش الدور و جاي اتمثل جاك و روز لأن مندمج اهواي بلفلم مدري روميوو و جوليت احسن موو

سلام :: طبعاً و لا عندج ذرة رومانسيه مو صوجج صوجي جاي اعتب عليج بس ايگولون ما يعتب عليك اله الي مشتريك اريد احضنج مشتاقلج بذات

آماني :: ابو رومانسيه وخر مناا احسلك لا يجينه احد و يشوفنه يريد يحضن هو دروح بابا روح

سلام :: اي خلي يجون و اذا اجوو غير راح اصيرين مرتي فنه الي يحجي ويانه بعد محد اله حق يفك حلگه ويانه و يحجي

آماني :: بعدني ما صايره مرتك هاي انت گلتها راح من اصير الله كريم

سلام :: ليش هيج مصره اضوجيني و أنا أسعد إنسان على وجه الأرض هسه امونه و راح اصير مرتي شريد بعد من ﷲ
صدگ آماني سولفيلي ليش گلتي ما أريد سلام اذا انتي اتحبيني ما تطلع هاي الكلمه منج و ماكو وحده تحب واحد و اتگول ما أريده

آماني :: سد هاي السيره مو وكتها إذا أنت فرحان ليش اضيع فرحتك هسه
اشويه و صاحولي كأنه كان الخلاص من سؤال صعب اجابتي عليي نقذوني ردت اروح لزمني من ايدي جريت ايدي و گتله مره ثانيه لا تلزمني خوش

سلام :: لا مو خوش أنتي مرتي والي كل الحق بلزمج و بعدين اشبيج رحتي اتركضين چنچ تردين اتخلصين مني هيجي ما طايقه وجودي يمچ

آماني :: لا اتحلل من يمك رحمه لاهلك مو هيج قصدي بس وكفتنه هنا غلط والي يدخل و يشوفنه ايفكر الف فكره لهيج متوتره عيفني خلي اطلع

سلام :: روحي شردي روحي اريد اشوف لشوكت راح اشردين مني

طلعت منه يم الجمهور الغفيير و الهوسه يبووي جهال اصغار و اكبار و حجي و اصياح الجو چان كلش حلو و اللمه و خاصه لو انت اتكون سيد الحضور هاي هنا رهيب الموقف اتكون محط انظار الجميع

المصادف/ ٢٠ ــ ٧ ــ ٢٠٠٧ / تاريخ لا يمكن نسيانه

حضروا الغدا كملو صبوا چاي كلها گامت اتلملم و اتحضر حتى يبدي الحفل الي همه امخططين اله
خال سلام چان عنده صديق شيخ جابو للبيت حتى يعقدلنه و بسبب الهوسه و الضجه الموجوده گالوو وكلي ابوج حتى يتم العقد وافقت وانطيتهم الموافقه بعدها تم العقد

صارت الهلال افلس الجدات من صفحه و العمات و الخالات و هوسات بنات عمي و خوال سلام يعني صار يوم كلش حلو رغم بساطته و مابي تعديلات كل الشغلات عفويه صارت

گالوا راح يدخل يلبسها الحلقه إني گمت ارجف احس اول مره راح اشوفه رغم صارلي سنه من بدأت علاقتنه و هواي اشاوفنه دخل سلام و ضلن يهوسن و يهلهلن الحبايب گعد يمي و گدام الكل يمه متتت من الخجل و هو اخذها فرصه گام يتغزل ويحجي وياي كلها گامت اصنف عليي و اتگله هااا اسليم علينه

لبسني الخاتم وساعه واني هم لبسته خاتم گاموا يهوسون و ياخذون صور بلكامره خالاته و عماتي ما يگعدن راحه كلهن گلله حبها و لا تخاف من امها هو ما صدگ رأستاً باسني بخدي وهنه كلهن گامن ايصرخن گلله ولك غير اتبوسها ابراسها شو انت ركضت لخدها

سلام :: اسكتن لو انوب اسوي اكبر منها هسه مو أنا گوة گاعد و متحمل الكيك الگاعد يمي

گامن كلهن وشحوتنه بره طلعنه وهو يتوسل بيهن ايضل گاعد و هنه طلعنه وقفلن الباب حتى ما يدخل مره ثانيه

يتبع

١٩_٢٠

#بارت١٩
طحنتنا السنين ڪ الطحين
نعبرها أم تعبرنا ؟
وجوهنا شاحبه متعبه
لڪن في النهايه نحن الخاسرون
تخدعنا بزيفها و ڪذبها
وفي النهايه راحلوون
عشريني يشيب مبكراً
سنيننا يڪسوها غبار التعب
بلا محطه بلا وصول
لاهثين ندور خلفها ڪ الفصول
ڪ هشيم ڪ نار ڪ دخان
تدور الحياة و عمرنا قصير
يأخذنا عراة في لحظة الممات

ثم
مع مرور الأيام ستتعلم التفاوض مع جراحاتک
ستتعلم أنّ تمرّ بجانب الألم ثم تمضي ساخراً و تعرف أن جراحک مفتوحة لڪنها لم تعد تؤلمک







آماني :: بعد ما خلصت الهوسه و كلها بدت تروح ضلينه احنا ابيت جدو للمغرب يله رحنا لبيتنه يوم متعب چان
بليل أخذت تليفون أمي اتصلت على سلام

آماني :: الووو سلام شلونك
سلام :: هلا بهصوت مشتاقلج
آماني :: بسم الله شنو لحگت تشتاق
سلام :: سكتي يمعوده احس روحي طاير من الفرح

آماني :: ديربالك لا اطيح و تتكسر
ارتاحييت هسه سويت الي ابراسك هي هاي هيه دگيت روحك عليها
جنت لازمه الحلقه و اني احجي ويا و رأسا عوجتها بيدي ضليت اباوع عليها

سلام :: اشبيج چنچ ضايجه و ما فرحانه ليش هيج تحجين وياي

آماني :: لا بلعكس فرحانه مثلك يله رايحه اني راح اروح مع السلامه و سديت الخط ما انتظرته يرد عليه
احساسي چان بين الضوجه والفرحه بين الإنكسار و الخوف ما أعرف شنوو المصير و لا الجاي شنو تحطمت من البدايه الدراسه و تركتها بعد شنو من تنازلات راح أقدم

هو من البدايه امحضر كل شي الغرفه و غراضها كامله ضاله على تحضيراتي و ما يريد الخطوبه اطول امفكر شهرين و نزوج حتى تفكير ابوي ما يريد جرجره و طبه و طلعه
ضل يتردد علينا كل جمعه يجي يشوفني و ينطيني مصرف و يجيبلي شي ويا

سلام :: امونه أريد اشتريلج تليفون حتى نحجي اتصال ابراحتنه انا ما جاي اخذ راحتي وياج من اجي اخوانج و ابوج يگابلونه و يگعدون حتى اتقيد بلكلام و ماأگدر احجي شي وياج

آماني :: ما ادري شوف ابوي خاف ما يقبل گله و إذا وافق جيب عود
سلام چان يخاف يحجي اي شي وي ابوي هم من باب الإحترام و هم من خوفه لا يفركش ابوي كلشي و يخسرني

بهذا الوكت احنا انتقلنه لغير منطقه اسمها نضران البصره القديمه قريب على سوگ الجمعه المعروف بلبصره و بعيد عن بيت جدي بيت عمو عادل همين انتقلو لغير منطقه بعيده عن بيت جدي

علنوا عن النتائج و لازم اروح استلمه خذاني ابوي وداني لبيت جدي ابات عدهم و الصبح اطلع للمدرسه استلم النتيجه گعد سلم عليهم للمغرب راح و خلاني اشو ورى العشا دخل سلام لبيت جدي استغربت دخوله الهم

سلام :: السلام عليكم
هااي منوو هناا خطيبتي الحلوه اجابج ولج

آماني :: و عليكم السلام هلا بلمزنجر شني هاي امدهن وامزنجر صاير اتخر؏ ما ادري بيك هيج چان ما وافقت عليك

سلام :: توافقين غصبا عليج مو ابكيفج شلونج اخبارج مشتاقلج

وسناء :: هوووب هووب نحن هناا ترى
سلام :: انتي خو حاشره روحج بكلشي دروحي و سويلنه مجال هوينه ما كافي عليه اخوج گوة اتنفس من ورا يگابلنه و يگعد حصره عليه احجي حجايه

آماني :: ضلوو اتعاركو اني رايحه
سلام :: تعاي وج تعاي ما عليج بيها هاي
وسناء :: انجب ولك منو هاي شو ما تحترم انت انا عمتك و أكبر منك

آماني :: يبووو عليكم اشگد اتحبون تتناگرون هسه انت اجابك بله لو اكو احد گالك هنا اني و اجيت

سلام :: ايي العصفوره گلتلي حبيبتك هناا و اجيت اركض شسوي گلبي صغير ما يتحمل اسمع كيكتي موجوده و ما اجي

وسناء :: ياا وج هو يشتغل هناا ويجي عدنا ما يروح لبيتهم بعيد معناها يگضي شغله كراوي و هو رجال جاي يلم روحه مستعجل يريد يزوج جاي ايلم الفلس على الفلس خطيه

آماني :: ليش تشتغل هناا مو چنت تشتغل وي ابوك ذيج الأيام شنو الي اتغيير شو ما حجيت ادري بيك تشتغل وي ابوك

سلام :: هو أنا شايفج شايفه دربي حتى اگلج و ابوج لايصها عليه و الله اخاف اذنى شي اروح بيها معناها

آماني :: دروح غسل روح الله يطيك و يطي ابوي وياك

سلام :: رايح رايح بس لا يزعل و يعصب الحلوو

راح للحمام يسبح شغله حداده تعب و هلاك و اني رحت يم نسوان عمامي و عمتي گاعدات يباوعن على التلفزيون و يسولفن و كلهم مجمعين عمامي طلع سلام و گعد يمنه ضحك و سوالف و راح جاب حلويات و حب وهاي الشغلات و گعدنه

الخبيث اتفق وي عمتي عليه عمتي ما مزوجه عمرها ٢٨ سنه اتأخر الوكت و كلها گامت على غرفها ضلينه اني و عمتي و سلام

وسناء :: اگلك ما تروح اتنام كل يوم هيج وكت نايم اليوم اشعدك گاعد مو وراك شغل روح نام انت تعبان

سلام :: أنا جوعان أريد اكل شو انفتحت شهيتي عود اليوم متعشي مرتين

وسناء :: ايي حقك والله الي يشوف كيك گباله غصبا علي ايجوع

سلام :: اي والله عمه شوفي اشلون كيك يشهي واحد ياكل حتى لو واحد مو جوعان هم ياكل

آماني :: اگلكم اشبيكم مخابيل انتم وين هو الكيك والله خبصتونه صار ساعه گاعده يمكم و متابعه وياكم ما شفت كيك لو بس انتم اشوفون

سلام :: خاب امده حضي اي والله الفاهيه روحي بابا روحي مو وياج احنا على هاي بلتلفزيون نحجي

آماني :: هو مو صوجك صوجي گاعده يمك رايحه انام احسن الي
رحت من يمهم فرشت فراش الي و نمت اشويه واجت عمتي هم اتمددت يمي ورى نص ساعه گام ايگحگح استاذ سلام

وسناء :: خايب لو مو اتگح ما اخليهاا تجيك و اذا گامت اله اكسر رجلها

سلام :: ههههه انتي قاسيه مو بيدج لان ما مزوجه اتغارين من عدنا نامي نامي احسلج

وسناء :: عابت حتى عابت اذا ما ازوج و احرگ گلبك

آماني :: اني سويت روحي نايمه ما اسمعهم ضليت اضحك على خبالهم بس ما جالي نوم لأن متغيير مكاني اني عكره اذا اغير مكاني ما انام و اذا مو افراشي المتعوده علي هم ما اگدر انام ابسهوله ضليت امدده على الفراش و حسبه اجيبني وحسبه توديني باجر النتايج وخايفه ومتوتره

اتأخر الوقت ماادري بيش الساعه المكان ضلمه و كلها نامت گمت اشرب ماي دخلت للمطبخ و اشوف بزونه سوده وعيونها تلمع ذهبي طفرت من مكاني على طفرتي اجه سلام للمطبخ

سلام :: اشبيج اجاي اسوين
آماني :: اجيت اشرب ماي عطشانه وشفت هاي البزونه واخترعت شكلها ايخوف

سلام :: وينها البزونه
آماني :: درت وجهي حتى اگله عليها ما شفت البزونه ضليت صافنه گتله والله چانت هناا حتى لگيتها فوگ الكاونتر

سلام :: شربتي ماي لولا
آماني :: لا هو جاي ادور وين امخلينه
راح جابلي واجه انطاني شربته ورجعت جاي ادخل للغرفه جرني من ايدي

سلام :: تعاي نامي يمي
آماني :: خو ماكو شي سالمين

سلام :: يابه لا اتنامين بس گعدي يمي ابين ما انام روحي رجعي لفراشج

آماني :: خوش بس اصير عاقل وما اسوي شي والله اصرخ واگعدهم كلهم عليك

سلام :: قابل عمي بس تعاي لا اتگعدين الوادم علينه
اگلج امونه احنا مو عقدنه يعني هسه انتي مرتي ليش ما اتنزعين الحجاب گدامي صار شهر على خطوبتنه وانا شعرج ما شايفه

آماني :: اهووو بدت رحمة الله تسكت لو اگوم ما انزع الحجاب اتريد ما اتريد ابكيفك هسه اگوم

سلام :: عمي ما لازم ما لازم بس خليج گاعده وياي
آماني :: اگلك صدگ انت اشعدك گاعد لهسه

سلام :: ما ادري كل يوم هيج وكت نايم ابسابع نومه اليوم الگمر ضاوي وما اجالي نوم
تدرين امونه اشگد تعبان و خاصتا اليوم شغل هواي و من الصبح لحد ما اجيت على فد وكفه يا دوب نزلت اتغديت ورجعت اشتغل بس من شفتج راح التعب كله هيج و اصيرين ابيتنه واحل من الشغل الگاج اگبالي و انسى تعبي ومعاناة اليوم كله الله يفرحتي

آماني :: ﷲ كريم ماكو شي بعيد على ربك لفته كن فتكون اصير واصير اسوالف انوب اتمل مني و اضل اضوج ترجع للبيت حتى ما اشوفني

سلام :: ليش هيج تحجين اكو واحد يمل لو يضوج من روحه تدرين انتي روحي والنفس الي اتنفسه احبج حب يمكن اهلج ما يحبوج هيج مثلي

آماني :: ابو حب حتى اني هم احبك بس نام و فضني نعست اني اريد انام باجر لازم اگعد من وكت حتى اروح للمدرسه وانت عندك شغل

سلام :: طيرتي ام الرومانسيه انتي تعاي خلي راسج هنا والله ما ادنالج ولا اسويلج شي بس تعاي لا ايگعدون ويسونلنه سالفه هذا صاحب ايشحوتنه ابنصاص الليالي

آماني :: صدگ ذكرتني هسه يطلع عموو ميثم من غرفته و ايشوفنه گاعدين سوه يلعب طوبه بينه

سلام :: خلي ايطير يلعب طوبه شمسوين غير مرتي و حلالي بايگين شني ليش دائماً اتحسسيني جاي اسوي حرام وانتي مرتي

آماني :: اگلك صدگ بيش الساعه هسه مالي خلگ مشاكل وحجي أريد اروح أنام نعست كلش
سلام :: ساعة بـ ثلاثه و نص
آماني :: حيييل يله تصبح على خير
سلام :: أجمعين

نمت گعدت الصبح لگيته رايح اتريگت وي نسوان عمامي و عمتي خلصت بدلت و رحت للمدرسه شفت صديقاتي وشافني لابسه الحلقه كلها اتباركتلي وما امصدگين عبالهم اشاقه لو هيج لابسه الحلقه ضلينه گاعدين انسولف ودرن بيه انتقلنه على غير منطقه ودرن بيه بعد ما اداوم حييل ضاجن

صاحوو بلاسامي وزعوا النتايج الحمد الله ناجحه درجاتي حلوه معدلي زين ايجيبلي معهد ملعمات اخ يلقهر بدل الواحد صارو اثنين لازم اقنعهم حتى اداوم رجعت لبيت جدي ميت حسبه ابراسي واشلون اقنعهم اداوم بلكي الله يهديهم و يقبلون دخلت للبيت شافو الشهاده ودرجاتي باركولي على النجاح

اجه ابوي علي العصر خذاني و طلع من غير طريق بيتنه

آماني :: شنوو بابا وين رايحين شو مو طريق بيتنه هذا
سجاد :: لا مو لبيتنه لبيت عمج عادل عازمينه على عشا

آماني :: اهاا خير ان شاء الله
اگلك بابا حبوبي خلي اداوم شوف معدلي زين ويقبلوني معهد ملعمات خلي ادخل معهد فدوه اقبل

سجاد :: آماني أنا گتلج انسي الموضوع الدراسه وانسي هاي السالفه من بالج كلش وبعدين انتي هسه ابحكم مزوجه و هم ما اعتقد يخلونجن اتكملين

آماني : ضلن ادموعي يصبن لا اراديا بدون رد مني على الكلام فشلت بعد ومالي طاقه احجي و اتوسل أكثر ضليت ساكته الطريق كله إلى إن وصلنه لبيت عموو دخلنت سلمت و گعدت يم امي موجوده ماخذهم ابوي قبلي

للمغرب دخل سلام ما اتوقعته يجي الي ادري بي ايضل عد بيت جدي اجابه هسه استغربت دخوله

سلام :: السلام عليكم
كلها صاحت و عليكم السلام
سلم علينه كلنا و گعد

سلام :: هاا امونه بشري استلمتي الشهاده
آماني :: اي استلمتها ناجحه
سلام :: اي الحمدلله الف مبروك چاا اشبيج ضايجه و چنچ باچيه

آماني :: الله يبارك بيك لا مابيه شي
سلام :: خلي اغسل و ابدل واجيج
آماني :: ماشي
گعدنه ابين التحضيرات والسؤالات والسوالف كملنه العشا و صبينه كلنه گعدنا نتعشى امحضرين هواي شغلات و اڪلات خلصنه اشرلي اجي ورا رحت ورا دخل للغرفه

آماني :: هاا شنو صحتلي على شنو
سلام :: ما تردين اشوفين غرفتج
آماني :: شفتها قبل لا تجي
سلام :: اي وشنو رأييج شنو تردين بعد بيها حتى اجيبه لو انشوف يوم ونطلع انا وياج انجيب النواقص
آماني :: الله كريم

سلام :: شني اشبيج شو مو على بعضج شنو صاير
آماني :: ما صاير شي بس حجيت ويه ابوي على المدرسه والدوام رفض وانت هم ما راح اتخليني أكيد ما تقبل غلط

سلام :: اي أكيد اذا هو ابوج ما خلاچ انا اخليچ انسي الدوام و المدرسه و ابدي حضري امورج الشهر الجاي نزوج ما دام امكملين كل شي جاي اشتغل شفتين نهار و ليل حتى اوفر افلوس العشا والصالون حتى نخلص و نزوج وانصير تحت سقف واحد بدل هذا الشلاع الگلب

آماني :: خوش
سلام :: شني خوش چنچ ما مقتنعه بلحجي
آماني :: لا عليمن ما مقتنعه هذا هو
يله جاي ايصيحون علي راح اروح

سلام :: هيج راح ترحين بدون شي
آماني :: ليش شنو تريد حضرتك بعد
سلام :: تعاي خلي احضنج وابوسج وروحي

آماني :: امشي ولي امشي يحضن هو
سلام :: عابتلج غير مرتي جاي اتحسسيني صاحبج
آماني :: خاب انت بطران اني وين وانت وين

سلام :: وين اثنينه بنفس الغرفه وين بعد
آماني :: رايحه اني انت واحد ما تستحي اتخوف وخرت منه وطلعت من الغرفه اجه وراي يركض يريد يلزمني ركضت وهو لزمني شبگني واجت ذكريات

سلام :: خرب ابليسج مو وكتج كلش
ذكريات :: دروح طلعو كلهم برا امتانين آماني وانت لازگلها
سلام :: ام حلگ روحو و خلوها هناا شلكم بيها
ذكريات :: اذا انت هيج روح احجي وي ابوي و گله اني شكوو تگلي

سلام :: ام حلگ ما ينگدرلج لا انتي ولا اختج روحن عمي روحن تردن اتورطني وي ابوچن انوب

آماني :: ما تگدرلنه اصلا و خوفك من ابوي يمنعك يله رايحين مع السلامه
سلام :: الله وياج ديري بالج على روحج تعاي تعاي نسيت انطيج حلاوته نجاحج

آماني :: كفني شرك مااريد شي منك
سلام :: لا والله مو شقى تاني اشوي بس
هاج هاي هم مصرف وهم لنجاحج خاف تردين تشترين شي
آماني :: بس هاي اهواي
سلام :: ميخالف ماكوو شي يكثر على كيكتي الحلوه يله روحي لا ايضلون يحجون عليج مع السلامه

رحنا للبيت عدة الايام طبيعيه بهاي الفتره ماكو شي صار شهر ثاني على خطوبتنه والي بهذا الشهر امقررين نزوج طبعاً افلوس احنا ما استملنا شي وهذا چان رأيي ابوي گلهم انتم اسوگو و شجيبون جيبوو حاچو ابوي علمود اروح وياهم للسوگ وانسوگ الشغلات الي اريدها ما قبل

گلهم انتم اشتروا آماني ما تدخل للسوگ وگضيت هذا العمر كله اني ما داخله للسوگ اشتروا همه الملابس والذهب وكملو كل شي حسب الاصول خابروا على ابوي گلوله اليوم نجي انجيب نيشان آماني گلهم هلا بيكم عبالك فصليه لا صالون ولا شي لا بلخطوبه ولا هسه

اني من سمعت حييل ضجت هم أريد حفله حالي حال البنات وياي واتعمدت ما اسوي شي مجرد نظفت البيت وسبحت لبست لبس عادي ولا حطيت مكياج ولبست حجاب وحضرت شغلات التقديم الچاي والعصير حتى كيك ما سويت عناد بلكل

امي هم ضاجت مثلي بس سكتت ما حجت اجوو بيت عمي كلهم و عمامي ونسوان عمامي صارت عاديه ابيناتنه واستغربوا وضعي كلشي ما امسويه حاولت مرت عمي ميثم اتغير شكلي بلمكياج واغير لبسي ما قبلت اني عاندت وضليت على وضعي هم ضاجت گالت مو عروس حالج حال البنات كتلها سكتي وغلسي

خلصت الهوسه وراحوا كلمن لبيته گعدت افتح الملابس واشوفهن ضليت ابچي جايبينهم كلهن اكبار علي مو قياسي اغلبهن امي هم ضلت تحجي

كفايه :: شنو هاي يردون ايضحكون عليج اتلبسينهن وايسوونج مضحكه صدگ جذب هو مو صوجهم صوج ابوج من البدايه گلهم انتم ابكيفكم

آماني :: اشترديني اگول يعني خليهن اني اصغر واسويهن عدل وهذا ارجعه عليهم ايبدلونه لو ياخذونه لوحده من بناتهم ويشترون غيره الي اني اگلهم طلعي منهه انتي لا اتكرهين روحج على الفاضي

صدگ ورى چم يوم حاجيت سلام

سلام :: هذا هو شنو تردين ايصير ولا يهمج انا اخذج للسوگ واشتري الي تردينه بس كون الله يهدي ابوج ويخليج اطلعين وياي هسه راح اروح للزياره الشعبانيه ومن ارجع لعيونچ شنو تردين اسوي هاج هذا مصرف هم خاف تحتاجين شي

آماني :: مااريد صار عندي هواي افلوس ابسببك جاي اجمعهم ما مشتريه شي لهسه

سلام :: ميخالف أنتي مسؤوله مني خو ما ترحين تگولين لابوج على مصرف چا انا شني غير خطيبج وابن عمج والمن جاي اشتغل غير علمودج واكمل كلشي حتى نزوج

آماني :: وراح تروح للزياره اشوكت ترجع
سلام :: ما ادري بيد الله راح اروح وي خالي نخدم هناك ولحد ما تخلص وتكف الزياره نرجع اتصل عليج واطمنج
آماني :: ماشي دير بالك على نفسك

راح و عدة الأيام الي ندري بيهم جاي يخدمون صارت انفجارات ابكربلاء يوم الشعبانيه و القناصات اشتغلت بين الاحزاب يخابرون كله مغلق الاجهزه وكلها ضال بالها لأن شبابنا اغلبها راحت إني ما عندي اتصال وي سلام اله بلصدف لو من أمي لو من ابوي انوب خابر عموو عادل

عادل :: الوو السلام عليكم شلونك سجاد
سجاد :: و عليكم السلام هلا بيك عادل الحمدلله وانت شلونك

عادل :: الحمدلله زين اگلك سلام هم اتصل عليكم شو اخباره مغلق خابرت كل خواله هم ماكو ولا واحد يرد وهاي الاحداث الصارت سمعت بيها

سجاد :: لا والله ماكو ما متصل علينه سمعت بيها و خابرت بيت خالتي ما يمهم شي والولد كلها هسه ما يعرفون اخبارهم بس قبل يوم رايحين الهم

سلام :: هذا گتله لا تروح شصخم رايح ما قبل اله اروح ركب راسه وراح وياهم وهسه ماكو خبر من اي واحد منهم وضل بالنه گلت بلكت متصل عليكم امحاجي آماني

سجاد :: لا ماكو بس هسه اتصل واشوف بلكت واحد منهم يجاوب وانطيك خبر
خابرت على الولد اريد احد يجاوب ماكو شي مغلق وشي ماترد اشويه رد عليه عبد اخو كفايه

سجاد :: هلا عبد الله يساعدك شنو اخباركم طمنونه عليكم شو ولا واحد يرد خوما صاير شي ضل بالنا يمعود

عبد :: شطمنك يمعود احنا ابنص الهوسه هسه وقناصات دگ على موكب عباس ابن خالي واحنا يمهم والشبكات ما جاي تتحصل گوة

سجاد :: دير بالكم يمعود ابعدو عن الرمي والقناصات لا تخلي احد يطلع واذا حصلتو شبكه طمنونه رجعو لبيوتكم خويه شلكم بهلسالفه ولم الولد واخذهم واياك

بهذا الحجي ما اسمع اله صوت الرمي والصريخ ومات منو مات ما اعرف وانگطع الخط













#بارت٢٠


❖═══❖◎◎❖═══❖

‏إنني خائفه
‏من ڪل الأشياء المجهوله
‏من الماضي الذي يطاردني دائماً
و ‏من الوجوه المألوفه ‏التي تحولت فجأةً
‏لوجوه غريبه
‏إخاف..
‏من إلإيدي ‏التي صافحتني
‏وتركت مخالبها ‏بيدي ‏و نزفت آثآرها
‏إخاف..
‏من التجارب الفاشله ‏و الأصدقاء اللذين تغيروا فجأةً
‏إخاف..
‏من الحلم الذي تمنيته ‏ثم وجدته كابوساً لا ينتهي.

إخاف
من السفر الى جهات مجهوله
قد تڪون بلا محطه
او حتى بلا وصول الى مڪان مقصود
إخاف
من خشونة الملابس التي تسبب لي الضيق
أخاف
إن اطوف حول نفسي من اليأس
ومن التڪرار الامحدود من المشهد
إخاف
من اصابعي التي تشير الى الأمل المستحيل
إخاف
من نفسي حين يغزوني التعب
ومن الخوف
أصبحت ڪطين هارب من المقابر
بسبب ضجره من وقع دفوف الموت عليه .





سلام :: الكتل والدمار الي بلشارع عشناه برعب والقناصات من كل الاتجاهات يشتغل علينا گوة بينا مابينا وصلنه لمكان آمن جوه الگا؏ مثل السرداب دخلنه الرمي مستمر بين الأطراف

حافظ :: ولك اسليم امشي خل نطلع وين دخلتنه أنت
سلام :: وين تطلع ما اشوف الرمي والعالم اتكتلت كلها خلي اشويه يهدأ الجو و اروح تاني اشويه

حافظ :: والله بطران هي الموته وحده على أساس هسه الموت لو يريد يجينه هذا مكانك العاوي راح ينقذنه دمشي امشي راح اطلع أنا وانت ضل هناا عود

سلام :: خرب غيرتك اذا عدك غيره وين امولي ولك تاني اشويه و بعدين نطلع سوه

حافظ :: صدگ اسليم لو متت انا ديربالك على جهالي و على خالتك وخليهم بعيونك لا تقصر منهم واذا أنت متت اطمن انا ازوج آماني

سلام :: امداك وامده تفكيرك الوسخ امشي ولي
ضجت من كلامه وحسيت لو نطلع انموت لزمت تليفوني حاولت اتصل على أهلي ماكو شبكه رجعت حاولت اتصل على بيت عمي واسمع صوت آماني خاف كلشي يصير همين ماكو شبكه ضليت ابقلق طلعت روحي اروح واجي

حافظ :: خايب ما تگعد والله موتتني اشبيك تروح وتجي حتى اعيوني راحن من وراك المن جاي اتخابر

سلام :: ولك جاي اخابر على أهلي و على بيت عمي سجاد ماكو شبكه

حافظ :: واشعدك اتخابر على بيت عمك هسه عمك اينگعلك اتنگع خاف ما متت من الرمي اتموت من حجيه عليك دگعد واسكت

سلام :: اول شي مشتاق لأماني صارلي هواي ما سامع صوتها وهم اطمن عليها واطمنها ادري بالها مشغول هسه وانت هذا كلامك خوفني حسستني صدگ راح انموت

حافظ :: خايب ما انموت ما انموت شايفلك عار يموت وين لاگيها هاي واشفايتلك نموت هنا وبين الحرمين بلكت ننحسب على الشهداء ولو ما انطولها احنا

سلام :: هاي اشبيك اشبينه عار شمسوين احنا قابل حتى عار شو ماتعرف تحجي

حافظ :: خايب اسليم علينه مو حتى ثلج گلينه اذا احنا مو عار اشخلينه للعارات ليش ما سوينه احنا حتى بين الحياة والموت ما راضي تعترف بأغلاطك خرب ابليسك

صدگ سلام نصيحه مني لأن اكبر منك اولا وثانيا شوف هسه الخوف والرعبه الي سكنه من الكتل والموت لو ضلينه عايشين انغير من حياتنه ونتغيير للاحسن ونترك كل المعاصي ونتوجه لله تدري أنا ما عندي ابو وعلمني وخاف عليه عشت معاناة الفگد من صغري ورباني الشارع انت عندك ابو وام يخافون عليك وقريب راح تزوج ابدي بدايه صحيحه واترك كلشي وراك ولو متنا بعد هاي تبقى يم الله اذا يتقبلنه ويغفر النه لولا

سلام :: خوش هذا هو اوعدك وعد منا وابدي صح بس اسكت هذا كلامك جاي يخوفني بلزايد وانا صارلي اشگد اهنا حتى ما خابرت لابوي وحجيت ويا يعني لو صار شي ما راح اسامح نفسي

حافظ :: اگلك اسليم خلي نطلع وگف الرمي ماكو صوت شي هسه خلي انروح للامام هم انزور وهم انضل اهناك لحد ما تهدأ الاوضاع انروح عمتي هسه گلبها يمنه بلكي انشوف عبد بطريقنه حتى انطمنهم علينه

سلام :: امشي امشي بعد انت مصر اليوم لو بلهدف لو بلنجف
طلعنه واحنا نشاهد واحد يباوع على الثاني وما امصدگين نوصل بسلامه شفنا عبد چنه يدور علينه والتليفون بيده رأساً صار رمي وحمى الجوو ما اشوف اله حافظ طاح بلڰا؏

بعد ماحسيت ابروحي ضليت اصرخ وادگ والطم صديق روحي هذا الما أگدر ابلايا واخوي الما جابته أمي اشوف دمه يجري اگبالي وسبح بلدم كلنه ضلينه نصارخ

ولك رحت وعفتني مو أنت اتگول زفتك عليه مو أنت اتگول انا اخذك وانا اجيبك شو عفتني رحت هذا وعدك اليه ما تعيفني ولك رحت وعفتني يااخوي وسندي ولك ماعندي اخو بس انت وهم رحت عاد چا خذتني وياك مو گلت انموت سوه خذاك الموت وما خذاني

احتارينه شنو نحجي شنو انگول ضلينه اروكض بي نتأمل ما ميت بعده وهو بساعيتها الطلقه گتلته ابمكانه الطرق امسدده والعالم امكتله بلشوارع الاف راحوو بوكتها اخذنا غسلنا وكفنا ودفنا ابمگبره بكربلاء ما گدرنه ناخذه للنجف اندفنه ابمكبرتهم الطرق امسدده و الحضر عام وماكو سيارات ينتقلن حتى ما وديناه لاهله ولبيتهم رأساً دفناه

امه واخوو اجوو لڪربلاء يحضرون الدفن عمامي وخوالي هم خلصنه گوه رجعنه للبصره نصبووا الفاتحه مالته واشوف ابنه وبناته اثتين صغار الصغيره توهي تمشي واذكرت وصيته الي متت من القهر والبچي ما گدرت اقاوم منظرهم اگبالي

دخلت اشوف خالتي وانطيها غراضه الضلت عندي تليفونه ومحفظته خالتي ما ينعرف حالها هي والفراش سوه وجهه من اللطم والدگ امزلغ واحمر حتلها ايبجي ضلت شابگتني ڪأنه اشهم آخر ما بقى من عطره بيه

خذت غراضه فتحت محفضته واتباوع الها حاط صوره الها وصور لجهاله بيه واتگلي ولك اسليم راح راح وعافني ليش خليته يطلع چان لزمته ومنعته من الطلعه مو انت ويا چا أنت مو اخوو موو صديقه مو ادگول هو روحي اشلون اتعيف روحك اشلون اتعيفه يموت

احتاريت شگلها و شسويلها واشلون اصبرها وهمه اثنينهم اعزاز عندي شگلها اگلها انسي حبچ لو انسي زوجچ ماعندي شي اگوله خذت الجهال منها وطلعت

حافظ محبوب واخو خيته سبع عسى ما أحد ينخاه يركض گدامه ما يهاب ولا يخاف من احد حافظ ايصير رجل خالتي وهم ابن عم أمي وابن خال ابوي و اخوي الماجابته امي سري و اسراري عنده محد چان يعرف بيه احب آماني بس هو يدري وامي

ابموته اتأذيت حييل ياريتني لو رحت ويا شوف القدر والعمر أنا يمه وابصفه الطلقه ما صارت بيه صارت بي ضليت عايش معاناة بعده

آماني :: من سمعنا صوت الصريخ والرمي والمات وما عرفنه منوو انشغل بالنه انخابرلهم محد يرد إني بوكتها چان كل توقعاتي سلام الي مات انخبطت خبط وضليت فكره اتوديني وفكره اجيبني لهناك خابرت بيبي ام أمي وگالتنه حافظ مات

حافظ ايصير أبن رضا الي بداية القصه ذكرناه خال أمجد وسجاد الي ياخذهم ويا للشغل ويضم افلوسهم استشهد بحرب ايران مدري بوش المهم

سوو الفاتحه وضلينه اروح الهم من الصبح لليل نرجع إني بوكتها مااعرف حافظ هاگد وماعندي اختلاط وياهم يعني اعرفه معرفه سطحيه مو أكثر ولا اعرف بعلاقت سلام هيج قويه بي إلا لمن شفت سلام و وضعه حييل متدهور وشكله متغير ١٨٠ درجه

وحال مرته اليكسر الخاطر لو امه لو جهاله ايكسرون الگلب توهم اصغار وما شبعوا من ابوهم شوف يعني ألواحد يتأذى على اذيتهم حتى لو ما شايف شي من المقابيل ضليت ابجي على بچيتهم و على السوالف گعدن وئام وليلو يسولفلي على علاقته وي سلام اخوهن اشلون چانت وي حافظ

اتأجل زواجنه الي مقررينه بهذا الشهر وسلام ضل ما يجينه و شهر كامل لا شايفته ولا امخابرلي اشتاقله واشتاق لاهتمامه وياي لسوالفه البايخه اجه رمضان وخلص رمضان وهو ماكو احنا من طبعنا اول يوم العيد كلنه نلتم ابيت جدي نتغدا عدهم وكل عمامي وعوايلهم يلتمون سوه

هذا العيد صح كلها ملتمه و موجوده بس انحسه كئيب اربعينية حافظ صادف وهم مرت عمي يوسف حييل مريضه وكلها متأثره ابمرضها وحسيناها قريب راح اتودع
عده كأنه يوم عادي

شفت سلام بس هذا مو سلام أبد ولا يمه شخص ثاني امكتر وماله غرض بااحد لا يسولف وي أحد حتى اني سلامه وياي ثگيل وما احسه فرحان لشوفتي عفته ما سألته ولا حجيت ويا خلص اليوم وكل واحد راح لبيته

رحنا للبيت ضايجه اخذت تليفون أمي واتصلت على سلام گعدت احجي ويا واسمعه يبچي استغربت عمري كله ما شايفته يبچي كله امسوي روحه جنتل مان لو عنتر ابن شداد هالمره يختلف اشبيك وهو انفجر ضل يحجيلي على حافظ واشلون چان ويا واشلون گاضيها وياه ضحكه اسوالفه مقالبه هو يحجي واني اسمع بدون كلام مني لحد ما خلص ونام وهو مايدري سديت الخط منه ورحت نمت صبحنا على خبر وفاة مرت عمي

طبعاً صايره منوشات بين اهلها وبيت جدي اهلها يردون الفاتحه عدهم وجدي يريدها عنده وصارتلك لخه بعدين كل واحد سوالها فاتحه وهذا الحجي عمي فاقد بلمستشفى وضعه يرثى له گعد لگاها ماخذيها اهلها دافنيها وما اشوفون حاله ايبجي الصخر صريخه وثغيبه عليها گلنه ما راح ايعيش بعد وراها

ايام الفاتحه كلنه ملتمين ابيت جدي نشتغل وانحضر وانجهز الثوابات صاحولي گلولي صعدي فوگ للمخزن جيبي اماعين وصواني حتى انخلي بيهن الحلاوه والتمر ويوزعون بره صعدت اجيب الغراض وانزل شي ورى شي آخر شي صعدت و طفرت من مكاني اله شويه چان صرخت

سلام :: بسم الله اشبيج
آماني :: أنت وين جنت منين طلعت
سلام :: جنت نايم ابغرفت عموو قصي وگعدت على الربد مال الماعين طلعت ما شفت أحد

آماني :: اشعندك نايم هنا والعالم ملتهيه شي اطگ بشي وانت ماخذلك زاويه

سلام :: غير ما نايم الليل كله وصار يومين اروكض منا ومنا غير هلكنه اشلون بله ما انام

آماني :: و اشعندك ما نايم بليل و هاي أنت من اشوكت نايم اني اليوم كله ماشفتك موجود جوه كل الولد اله انت ماكو

سلام :: اي بله حضرت جنابج شفتيمن من الولد وايطبون وايطلعون و أنتي اگبالهم هاا

آماني :: شفتهم كلهم وجاي ايدخلون واني اناوشهم بعد شتريد روح نام روح اشبع نوم بله گلي من اشوكت هنا ونايم

سلام :: احجي عدل اول شي واحجي منو شافج من الولد وثاني شي جوعان اريد اكل سويلي

آماني :: اهووو يا سالفه الما تخلص هو مو صوجك صوجي جاي احجي وياك دروح خلي اخلص شغل مو انت گاعد بطران خلي خواتك ايسون الك صيحلهن

سلام :: هيج صارت موو خوش عود راح اتنزلين ولا اجيبين اكل وشوفي شسوي

آماني :: والله ولا اسوي اي شي اتريد انزل اشويه وراح انصب عشا واكل ابراحتك استاذ سلام باي

سلام :: امينه نايم من الفجر وهسه الساعه بـ ثلاثه وما ماكل اي شي تردين اضل للعشا ابتلي بيج والعباس

آماني :: العباس لا شافك ولا اسوي ولا اصعد بعد اريد اشوفك شسوي بله
ركضت انزل اني والصواني زين ما طحت من الدرج وهو يباوع وراي ويضحك عليه

آماني :: فاطمه هاج هاي الفه وديها لسلام فوگ
فاطمه :: وديت اللفه وگلي صيحي لاماني خلي تجي
آماني :: گليله ما تقبل تجي وخلي ينزل ايصيحوله عمامي بره راح تحرگ فلمك اذا ضليت فوگ
اشويه ونزل وايشرلي إني الج صبريلي

آماني :: اگلج عمه سلام مدري اشلونه شو ما عاجبني تصرفاته احس اكو شي

حبيبه :: هو الصراحه انا هم جاي اگلج واسألج عنه اذا عندج علم بي شي او لا سمعت شي بس ما اعتقد صدگ

آماني :: يا ستار شكوو احجي شنو سمعتي ومن منوو حتى نطمن اذا صدگ لو چذب

حبيبه :: ولج سمعت ولد عمج أمجد يحجون على سلام يگولون يكبسل بس ما صدگت اله لمن اساله واشوف وامس الليل كله همه گاعدين بره بلچادر وطلعلهم عمج ميثم رزلهم ودخلهم كلهم هسه ادخلون وتخمدون لو ماكو روحو كلمن لاهله دخل سلام هنا نام ولد عمج أمجد راحو