ارقد ياعذيذ شليتها لا حضني طرحت راسها فوق كتفي وكنت اتحملها بالقوة وامشي وبندور مكان اجلس فيه ومشتيش اجلس في اي حارة لان اصحابها عيسألونا من احنا واين بيتنا فقلت ضروري اجلس في شارع عام ،لقيت مكان تحت شجره فوق الرصيف طرحت اختي وهي راقدة واحنا حافيين والدنيا برد وسرت ادور كرتون نجلس عليه وجلست مع اختي وانا بنبكي على امي وفجأه ابسر اختي بترتجف من كثر البرد خلست الفنيله اللي فوقي ولبستها وطرحت ارجلها فوق حضني وكنت انفخهن على شان ادفيهن ومفتجع من كل شخص بيمشي من الرصيف واي شخص بيبسرنا ومن الكلاب اللي ملان الشارع وتحت السيارات وجنبنا به مجنون راقد وكل شوية ابسر لاعنده مفتجع اذا عيقوم يفعل بنا اي شي ،ومن كثر البرد وانا بنبكي وبنفكر ما عدبش معانا احد امي ماتت لو ارجع للبيت اكيد عيحبسوني العسكر لاننا قتلت زوج امي وفي نفس الوقت بنحاول ابكي بدون صوت مشتيش اختي تصحي وتبسرني بنبكي ... غلبني النوم رقدت وانا جالس وحاضن لرجل اختي ما صحيت الا على صوت واحد بيهز راسي وبيقل يا ولد ..ولد ...

يتبع...

#أبن_الشارع
#منيرالنقيب

#ابن_الشارع

-البارت الثاني ...

ياولد ..قوم اول ما فتحت عيوني ابسرت المجنون وهو بيصحيني افتجعت وقمت على طول وبنقله وانا مفتجع ماتشتي ؟ ما تشتي مننا ؟ قلي هاه امسك ادفي انت واللي جنبك وطرح لي البطانيه حقة ورجع يرقد فوق الكرتون بدون بطانية وثيابة مشططه ، جلست وتغطيت انا واختي بالبطانيه كانت البطانيه مشططه ووسخه وريحتها شوعه قوي بس كنت فارح قوي لقينا شي ندفي به واختي راقده وانا جالس ما جاليش النوم مفتجع لا عاد يقوم المجنون لا عندنا سمعت أذان الفجر وانا جالس بنكلم نفسي الحمد لله باقي شوية ويطلع الضوء كان الوقت بطيئ قوي وكانت الليله تيه طويلة قوي الشارع مخيف قوي وكل خطوة اسمعها احس بخطر عليا وعلى اختي والجو برد وغبار واصوات السيارات وهي مسرعة لان الخط فاضي كانت تصحيني من نومي كل شوية و بنحاول اجلس صاحي مفتجع ارقد كانت اول ليله احس بهذا الشعور مفتجع تغمض عيوني لا عاد يحصل شي لي انا واختي صح كنت احس بالشعور هذا كل يوم في بيت زوج امي وكنت اخاف منه ، بس الاحساس وانت في الشارع مختلف قوي مابش جدران تحتويك كل شي في الشارع ممكن يهجم عليك في اي لحظه ومن كثر التفكير كنت حتى اتخيل اشكال الشجر اللي بالرصيف كأنها وحوش وبتشوف لا عندنا ومنتظره متى نرقد ،وقد جمعت جنبي شوية حجار وماسك حجار في يداتي على شان الكلاب شعور شوعه قوي ترقد واذا حسيت بجوع او تشتي تدخل حمام وما تلاقيش امك جنبك تبسرك وتقول مافي نفسك يا ابني جاوع؟ تشتي شي؟ ، قد الجوع اكل بطني اكل ومفتجع تقوم اختي وهي جاوعة من وين اديلها اكل وجالس ابكي طول الليله تيه غلبني النوم وانا منتظر لشمس تطلع ، وحلمت زوج امي وهو بيقتل امي باكثر من طريقة ويجلس يضحك ، افتجعت وصحيت من الكابوس فتحت عيوني وقد الضوء طلع حسيت بفرح كبير قوي بطلوع الضوع هذا ، ورجع الشارع طبيعي ماعادهوش مخيف ساع الليل مسحت دموعي وقلت يا عزيز انت ذلحين الرجال ضروري تخبي دموعك وضعفك وتبين لختك اننت قوي ما دريت الا لما قامت اختي من النوم وهي بتصيح مفجوعه اكيد ابسرت كوابيس بسبب اللي شافته في بيت زوج امي ،حضنتها وبنقلها سعليش يا فرح سعليش انا جنبش وهي بتبكي وقالت اشتي ماما يا عذيذ (طبعا اختي ثرماء بعد ما اقتلعين اسنانها الاثنين اللي قدام والثرمه حقها بتعجبني قوي ) قلت لها ماما سارت المستشفى تتعالج وقالت نراعي لها هنيه لما ترجع قالت اين ثار بيتنا يا عذيذ ليث راقدين في الثارع ؟ قلت لها بيتنا هذاك قدهو خارب وشوعة وانا ششتري بيت كبير وحالي فيه حديقه وملان العاب ونلعب انا وانتي ونمليه كله جعاله قالت ثدق يا عذيذ ايوه ونفعل بينه بفك وطرذان ملان لثقف ، قلت لها ايوه نملي ابوه بفك ، نبعت تحضني وباستني في خدي وقالت انا جاوعه قوي يا عذيذ هيا نثير عند امي تفعل لنا ثبوح ،قلت لها هيا قومي خلستها الفنيله حقي ولبستها وقلت لها راعي شليت البطانية وكنت اقرب دلا دلا من المجنون وهو راقد وحاضن لركبه من كثر البرد قربت لا جنبه ورجمت البطانية لا فوقه وهربت مسكت يد اختي وكنت اجري وانا بنتلفت لا ورايا اذا عيقوم بعدنا ، بس ولا تحرك كان راقد بقعته ، جلسنا نمشي من شارع لا شارع ومشنا داري اين عنسير وكان يخطو من جنبنا ناس ونسوان ويبسرونا وحنا حافيين مجعوثين بلبسنا الخفيف في البرد ويطنشو ولا كأن احنا موجودين والبعض كان يبسرنا بنضرة اشمئزاز ومشنا داري ليش والشمس بدأت تلامس الارض وتدفيها وانا واختي جرينا لمكان فيه اشعة الشمس وواقفين على شان ندفي ارجلنا ،قالت لي يا عذيذ اشتي افعل بي بي ، مسكتها ودخلنا مكان ساع الارضية وقلت لها افعلي هنيه قالت عييييب يا عذيذ عيبثروني قلت انا شا اغطيش سعليش وجلست وانا بنتلفت يمين وشمال لقيت صحة ماء مرجومه فيها لانصها ماء سرت اديتها ووضيتها خرجنا وشميت ريحة خمير لما تللت من كثر الجوع دخلت يداتي في جيوبي ولقيت خمس مية ريال والكرت شليت الخمس المية وصلت لا عند صاحب البوفيه وقلت له صباح الخير ادي لنا خمير وقلص شاهي ابسرني بنص عين وهو بيصلح الخمير ومحمش المعوز لاعند خصرة وقلي ( اصبح يا مصبوح وقول ياالله رضارك قبل ما افقش ابوك بالبيلم اللي بيدي وامشي من اونه ما قد تفتحانش ) قلت له ما جيتش اطلب منك هذه الفلوس ادي لي صبوح لو تسمح بزلطي شلها وقال والله تطورنا وقد بتحاسبو على اكلكم ، قلت له الله لا قال اننا اكل بفضل احد ما بناكل الا من تعبي ورزقي ولا مشتيش ، قال هيا تمام اجلس برصيف ، يا ليييد باشر لوووو ، جلست انا واختي في الرصيف ومستغرب ليش بيعاملنا كذيه وماخلاناش نجلس فوق الكراسي مع اننا بنشتري جيزي من جيز الناس وادو لنا خمير وقلص شاهي وجلسنا ناكل انا واختي قمت لا عنده ادي لي الباقي يا اخي قال عادك تشتي باقي هيا امسك ما معك الا المياتين هذه ، قلت له ليش ؟!! دهفني وقلي اقولك روحلك يابن أيري ، مسكت يد اختي ومشيت وقد القهر اكل فؤادي ليش الناس متوحشه كذيه وما بنطلبش من احد ما دريت الا ببنت لابسه بالطو مشيت من جنبنا وهي بتقل لو انت رجال اننت

في المدرسة انت وختك بدل المفراغة في الشوارع يلا علم اختك كيف تشحت يا قليل الحيا ومشيت من جنبي وانا بنبسرها سكته ، مستغرب معقوله تيه بالبس هذا والشنطه وملزمه في يدها وبكل هذا الدلع بس تفكيرها كذيه ليش و المجنون اللي رقدنا جنبه كان احن وارقى من اسلوبها ،وطريقة كلامها كانت مشابه لطريقة كلام زوج امي ، طيب ايش سوينا لناس هولا لما بيهاجمونا كذيه وكل هذه القرارات والاتهامات علينا بسبب شكل لبسنا ولان احنا حافيين ؟!!!!!! فقررت انا اسير للجولة اللي بنشتغل فيها واشل كرتون ماء من صاحب البقاله وابيع وارجع اقضيه على شان ادخل صرفتي انا واختي وفعلا سرت وشليت نص كرتون وعادنا بنجهز نفسي ما دريت الا وبه ثلاثه عسكر بيلوو في الجوله وبيسألو اللي بيشتغلو عند الجوله مسكت يد اختي ورجعت الكرتون لصاحب البقاله وعادنا اشتي اهرب ما سمعت الا صوت ياااولد وقف ..وقف ...

يتبع...

#ابن_الشارع
#منيرالنقيب

#ابن_الشارع

-البارت الثالث...

جيت التفت ابسر من بيصيح لي طلع رجال ماسك صحة ماء وبيقلي نكعت عليك الصحه شليتها ومكنت صاحب البقاله ومسكت اختي وهربنا وصاحب البقالة بيصيح ويقول مالك يا عزيز ايش حصل ؟ طنشته وجلست اهرب وصلت لا راس الشارع وتخبيت انا واختي خلف سيارة وبنتشاقر متى عيمشو العسكر ،واختي بتقل مالك يا عذيذ قلت لها سعليش احنا بنلعب غمايه قلت تخبي ياعذيذ عيبثرونا وانا جالس اراقب لما مشيو ما دريت الا ووصل صاحب السيارة اللي احنا متخبيين قفاها وبيقل اقلعو من هنيه يا عيال الشوارع ومرته جنبه بتقل اقلعو يا قرفين الله يقلعكم وسختو السيارة ايش القرف هذا وقرب الرجال يمسح الصدام الخلفي حق السيارة مسكت اختي وبعدت من السيارة وجالس ابسر للجوله ولقيت صاحبي مصطفى كان يبيع ماء معي عمره 14 سنه صفرت له كان يبسرني وانا بنأشر له ، طرح الماء من يداته عند اخوه وجرى لا عندي ، وقال يا عزيز ليش جو يدوروك العسكر ما فعلت؟!!.. قلت له ما قالو يا مصطفى قال سألونا متى اخر مره ابسرناك وقالو اذا لقيناك نمسكك ونبلغهم وطرحو رقمهم مع اخي الكبير وبعض الناس في الجوله ،امانه ..امانه مافعلت يا عزيز ؟ قلت له ما فعلت شي خلاص انا شا ارحلي انا واختي من البلاد هذه ،مصطفى ضحك وقال ايوه سيرو المانيا المهم خاطرك اسير اشتغل قبل ما يصيح فوقي اخي ورحله ، مسكت يد اختي ورحت لي من الشارع ذيك وجالس الوي انا واختي من شارع لا شارع واكثر الوقت اتحملها فوقي والشمس قد اكلتنا اكل وقد عنموت عطش لقيت سبيل نبعت اشتي اشرب منه وكان السبيل وسخ قوي والمغرف مربط عرض السبيل ما يوصلش لا عند اختي على شان تشرب رفعتها فوقي وشربت ، وصلت امام مطعم خلست الفنيلة حقي ومنتظر تجنب اي سيارة على شان امسحها وصل واحد قلت له امسح لك السيارة يا عم بكما تشتي، ابسرني وضحك وقال امسحها يا بطل قلت لفرح تجلس جنبي وبدأت امسح السيارة ما دريت الا واثنين رجال جو لا عندي وبيصيحو فوقي ويدلهفوني ويقولو منين جيت وايش دخلك تمسح في البقعه حقنا..!! يلا رحلك من هنيه قلت لهم ليش ارحلي ؟ صاحب السيارة قلي امسح سيارته خلوني اشتغل لو تسمحو ،قالو بنقلك يلا من هنيه خيرة الله عليك وبيصيحو ويداهفوني ابسرت اختي بدأت تبكي وافتجعت مسكت اختي ورحت لي من عندهم مشينا من جنب بقاله كبيرة والعمال كان يتغدو جنبها وواحد منهم قال يا جهال جو كلو الباقي هذا ، قلت له تسلم ما نشتيش ودخلت لا عند صاحب البقاله وقلت له يا عمو لو تسمح ممكن انظف لك القراطيس والقمامه اللي جنب البقاله وتحاسبني ابسرني وقلي رحلك من هنيه وجاب لي مية ريال طرحت المية فوق الماسة وقلت له تسلم يا عمو انا ما بنشحتش انا بندور عمل وبناكل من تعبي ومسكت اختي وقد بخرج لحقني لشارع وقال يلا يا ابني نظف قبال البقالة ولما تكمل ادخل لا عندي ، كملت انظف ودخلت لا عنده وجاب لي الف ريال وقلي بدل ما تتبهذل انت واختك يا ابني روحو البيت
وادرسو احسن لكم ما تفعلو بالفوس وانتو جهال صغار !! قلت له طيب شكراً يا عمو خرجت وانا بنمسح دموعي ليش بيتعاملو كذيه ويحسبو اننا خرجت بمزاجي او على شان الفلوس واختي بتقلي يا عذيذ هيا انا جاوعة سرت للمطعم اشتريت نص نفر رز وواحد زبادي وجلسنا في الرصيف ناكل كانت اختي جاوعة قوي وانا لاول مره اكل دلا..دلا خايف يكمل الاكل واختي ما قد شبعت بقي شوية رز في الكيس خبيتهن ودخلتهن جيبي ورجعنا نكمل الطريق بس ركزت ان به شخص بيراقبنا من الضهر وكل ما التفت اشوفه يرجع يدعمم فقلت ضروري ابين له ان معانا بيت على شان يبطل يلاحقنا ، ورجعت لا حارتنا اللي فيها بيت زوج امي ، ولقيت صاحبي في الحاره "زياد" اول ما ابسرني قال يا عزيز اين سرت؟ قالو وقع قتل في بيتكم وامك قتلت ابوك؟!! ، قلت له كذابين لا تصدقهمش هو اللي قتل امي قال امك في المستشفى ماقتلهاش ..حسيت ان روحي رجعت لي ومن الفرح مسكته من اكتافه وقلت له اسالك بالله امي بخيره ما ماتتش؟!! قال ايوه قلت له ايش المستشفى قال مدري ، ورجع يكمل لعب مع عيال الحارة رجعت انا واختي خرجنا من الحاره وجلسنا نلوي انا واختي وسرنا لنفس الشارع اللي رقدنا فيه اول ليله كان باقي معي اربع مية اشتريت بها ماء وجلست ابيع للي بيمشو في الشارع ومن كان يبسرني كان يرجم لي كلمه انا واختي، بدأ المغرب يدخل والظلام بيغطي الشوارع جالس فوق الكرتون واختي جنبي راقدة ، نبعت للبقاله اشتريت زبادي وروتي وخرجت الرز ومنتظر متى اختي تقوم من نومها على شان نتعشي ، قامت وبدأنا ناكل واحنا بناكل فجأه ابسرت الشخص اللي بيراقبنا جالس في الرصيف اللي مقابل لنا وبيتبسر لا عندنا انا افتجعت قوي وكنت بنفكر اقوم انا واختي نهرب بس عيلحقنا ، ما دريت الا والمجنون جى فرش مكانه وجالس يخزن ويشقر ، قمت لا عنده اديت له باقي الزبادي والروتي شلهن وطرحهن جنبه ورجعت عند اختي حضنتها لما رقدت وانا جالس بنتبسر لا عند الرجال وقد فكرت بالف فكرة والحجار جنبي اول ما بدأت حركة الشوارع تخف وقلو الناس في الشارع حسيت

باحساس شوعة قوي وكم كنت اتمنى اروح لابيت نفس الناس هولا ما دريت الا والرجال قام ومشي لا عندي وصل وجلس وانا مفتجع ومبهرر لا عنده كان شكله يفجع فيه جروح ملان وجهه ومعة قعشه وملخاخ في فمه والشقارة في يده قلت له من انت ما تشتي ، قلي سعليك قلي انت من انت ؟وما بتفعل هنيه ؟وتيه البنت ما تقع لك ؟ حضنت اختي بقوة وقلت ما تشتي من اختي رحلك مننا ما تدخلش ، مسكني من كتفي وقلي لا ترفعش صوتك قلي اين بيتكم واين ابوك واهلك ليش ما روحتوش ، قلت له مابش معانا بيت وانت ما دخلك مننا لو تسمح رحلك ، قال خلاص قوم جو عندي روحو في بيتي وشدي لكم بطانيات وملابس ، وزلط وبيسحبني من كتفي ،بعدت يده وقلت له اسلم ما نشتيش رجائاً خلي لنا حالنا ، ما دريت الا لما مسك اختي وسحبها من حضني بقوة وسنب ....

يتبع...

#ابن_الشارع
#منيرالنقيب

#ابن_الشارع

-البارت الرابع....

قمت على طول ومسكت لرجال وبنصيح فلت اختي فلت اختي ،دهفني للارض ويشتي يهرب وهو حاضن لختي شليت حجار ووقفت اشتي اراجمه وفرح كانت تبكي وهو حاضن لها ما دريت الا والمجنون واقف خلف الرجال وفي يده صميل وضرب الرجال في راسه الرجال فلت للبنت ومسك على راسه وكان يصيح يا راسي ..يا راسي ، المجنون مسك اختي لاحضنه وقال لرجال تشتي تشل بنتي قبال عيني..! اقلع قبل ما اطاير دمك والرجال قام وقد الدم بيخرج من راسة وهرب ،قرب لا عندي المجنون ومكني فرح وقال انتبه لختك وخليك جنبي وسار ادى لنا البطانيه حقه ودفانا وقال لا تقلقش ارقد وانا شحرسكم ،معي قات شا اخزن لصبح ورجع جلس مكانه ، وفرح جالسة تبكي وهي حاضنه لي بقوة وبنحاول اسكتها بس ما رضيت تسكت قلت لها ما تشتي يا فرح ، قالت اشتي امي ما دريت ما افعلها او ماقول قمت وانا حاضن لها وسرت للبقالة اشتريت لها بفك وعصير ورجعنا بقعتنا وجلست حاضن لها لما رقدت وهي حاضنه للبفك والعصير في حضنها ، وبدأ خوف الليلة الثانيه، بس كنت حاسس بأمان شوية لان المجنون جالس جنبنا ،امس كان هو اكبر خوفي واليوم بنشوفه مصدر امان لي ما توقعتش تجي لي مساعده من اكثر شخص كنت خايف منه وماتوقعتش اغلبية الناس تعاملني انا واختي بتيه الطريقة بسبب لبسنا الوسخ والمشطط وشكلنا المبهذل ، وقتها عرفت ان نظافة الشخص تكون من داخله مش من شكلة الخارجي وهذا كان اول درس لي وانا في الشارع ، وجالس طول الليل افكر ، اشتي حل ما ينفعش اجلس انا واختي في الشارع ، واول قرار طلع براسي اننا الصباح اسير المستشفيات الحكومية ادور على امي يمكن احصلها بما انها بخير زي ما قلي صاحبي اللي بالحارة، وكنت كل ما ابسر المجنون كان يأشر لي ارقد ، وكنت اسمع المجنون يكلم نفسة ورجعت اخاف منه ، وبعد نص ساعه ما دريت الا بتكس وقفت امامنا ونزل الرجال اللي ضربة المجنون براسه ومعه ثلاثه رجال يشتو يضربو المجنون انا وقفت على طول ومسكت اختي والمجنون جالس مكانه قلي اجلس لا تخاف ، ما دريت الا بطقم وقف قبالهم ونزلو العسكر شلو الرجال بسيارتهم ومشيو بسرعه بدون ما يلفتو نضر، انا جلست وانا مستغرب من كل اللي حصل ما دريت الا والمجنون بيصيح لي اجي لا عنده ، قربت وانا خايف قلي يا ابني لا تخاف انا مش مجنون انا موظف مع الدولة قلت له الا مجنون كنت تكلم نفسك ، خرج لي جهاز غريب من تحت الثوب عند صدره وقال انا كنت اتكلم مع العمليات بالجهاز على شان يقبضو على العصابه اللي جت الان ، كنا بنراقب هم لفتره وجابهم الله لا عندي ، وقلي انت ايش اسمك وليش ما تروح بيتكم ، قلت له انا عزيز ، وكلمته بالقصة بس ما قلتلش ان انا قتلت زوج امي قلت له طعن امي وخرجنا من البيت وهربت انا واختي وخايف ارجع قلي خلاص تمام ايش اسم امك ، جبت له اسم امي وقال خلاص ارجع بقعتك وارقد يا ابني لا تقلقش ورجعت جنب اختي حضنتها بقوة وتمددت جنبها وجالس بنفكر لما غلبني النوم ما دريت بنفسي الا والمجنون بيهزني من كتفي ويصحيني اول ما فتحت عيوني قال عزيز ..عزيز فتحت عيوني وانا مفتجع والدنيا قدهي صبح ، طرح لنا بسكوت وحليب قال اصتبحو وسير لامستشفى كذا امك هنيك ، ولا عاد ترجعش الشارع هذا انت واختك انا شا ارحلي من هنيه قلت له لحظه خرجت له مياتين وخمسين ومكنته قلي حق ايش قلت له حق الصبوح شلها وهو مبتسم ، وفلتنا ورحله ، قيمت فرح واصتبحنا وسرنا للمستشفى ،العسكر اللي بيحرسو باب المستشفى يايه ..يايه يا ولد اين عتسيرو يلا من هنيه طلبو في بقعة ثانيه قلت له يا عمو ما بنطلبش اشتي ادخل لا عند امي ابسرها قال امك من هذه الساع بنقلك رحلك انت والبنت تيه لا تشغلناش ، قلت له الله يحفظك يا عمو امي مريضه عندكم خليني ادخل بسرعة ابسرها واذا مشنت مصدق ادخل معي وابسر بنفسك ، واختي جالسه بتبكي ، ابسرني وقلي اسمع تدخلو وتخرجو سريع معك خمس دقايق ولا شدخل بعدك واقلع اذانك ، قلت له حاضر .. تسلم يا عم ومشيت انا واختي في الحوش حق المستشفى والناس ملان المستشفى وانا بنتلفت يمين ويسار مشنا داري لين اسير او من اسال وسمعت صياح جنب المبنى حق الطورئ شخص لابس بدله وخلفه اثنين عسكر بيصيح فوق الدكاتره والممرضات وبيقول التكاليف با يتم سحبها من رواتبكم ومشتيش ارجع وابسرها هنيه محناش فاتحين جمعية خيريه بتسمعو وخرج، وواحده من الممرضات بتقل بصوت دلا حسبي الله ونعم الوكيل ما عدبش فينا رحمه والدكتور قلها يا دكتوره ايمان سمعتي المدير ما قال...! خرجوها وسكهونا من الشغله قالت حاضر ومشيت وانا مشيت بعدها وصلت لمكان فيه اكثر من سرير وفيهن مرضى وجرحا اللي بيتوجع واللي بيصيح واللي فوقه دكتور بيعالجه ولقيت واحده ممده على الارض مابش تحتها الا بطانيه والدكتوره سارت لا عندها قربت اشوف وطلعت امي انا تجمت مكاني ما قدرت اصدق ان هذه امي او اننا شقدر ابسرها مره ثانيه واختي فلتت يدي وجريت لا فوق امي تحضنها اول ما ابسرتها امي صاحت بصعوبه يا جهاااالي لك الحمد ياربي حيااااا جو حيااااا،

نبعت فرح لا حضنها حضنتها امي وهي بتتوجع وتبوس فرح
وتشمها وتبكي والدكتوره اللي جنبها كانت تبكي والكل من الموقف وامي حاضنه لفرح بيد ومدت يدها الثانيه بتأشر لي اجي احضنها وبتقل جي يا عزيز جي قربت دلا.. دلا وصلت اطرحت في حضنها وقرحت بكاء اول ما اطرحت في حضنها حسيت بأمان مع انها تاعبه قوي كنا نبكي بقوة لما ابسرونا اللي بالطورئ كلهم وتأثرو من الموقف معانا وبعد ما هدأنا شوية وامي تمالكت نفسها ابسرتها بتتوجع قوي لان فرح فوق حضنها مسكت فرح وبنقلها بعدي من فوق مامه، امي قالت ماشي يا عزيز خليها في حضني وانت خليك في حضني انا فدالكم اكيد انتو جاوعين وتبكي ، والدكتوره قالت يا اختي المدير صيح وقد خصم من رواتبنا حق ما خيطنا الجرح وعالجناش قال يا اما توفري قيمة علاجش ولا تخرجي، الصدق انا اسفه مقدرش افعل شي ، امي كان وجهها مشحب وشكلها تاعبه قوي بسبب قلة الخدمة الطبية او عدم الاهتمام بها لان مابش معاها فلوس ،قلت لدكتوره مش حرام تخلو امي ترقد في الارض ، قالت يا ابني حتى ما قدرناش نجارح لها والمدير قال تخرجو ، والدكتور جى وصيح لدكتوره قامت سريع وهي بتقل رجائاً شلي عيالش واخرجو من المستشفى قبل ما تسببو لنا مشاكل اكثر قد فعلت معش جهدي لا تتسببي بقطع رزقي قالت امي حاضر ولا تقلقي، قامت امي وهي ماسكه المغذية بيدها وانا ماسك فرح بيدي وماسك امي باليد الثانيه وكانت تمشي بصعوبه وهي بتتكي على الجدار لما خرجنا من امام الطورئ وقدحنا في الحوش امي تعبت قوي وجلسنا فوق الرصيف بنقلها يامه ايش بتحسي قوى لا تخرجيش من المستشفى خليهم يعالجوش هذا مشفى حكومي ، قالت ضروري نخرج يا ابني ، قلت لها والكلب اين هو مات ..مات يمه؟!! ، قالت مدري انا عادنا فقت قبل شوية يا ابني وبما ان اهله مش موجودين فيعني شكله بخير ، ما دريت الا لما جو العسكر لا عندنا جلسو وبيسالو امي عن الحادثة وكيف اصيبت ، واسم زوجها ، قلها زوجش في العناية وما قد فقش فحنا عنحتجزش لما يفوق ونكمل التحقيق ، ما دريت الا لما امي دوخت ....

يتبع...

#ابن_الشارع
#منيرالنقيب

#ابن_الشارع

-البارت الخامس والاخير ...

اول ما امي فقدت الوعي نبعت بنهزها وبنصيح وانا بنبكي يماااه ..يمااه وفرح جنبي بتبكي، العسكر قامو وهم بيتجابرو هيا ما نفعل للحنبة تيه كيف نحبسها تيه وهي بالحالة تيه لا عاد تموت ويدخلونا في هدار قله العسكري الثاني المدير قد قال يخرجوها من المستشفى مكتفي بشهادة الجيران ان الزوج كان يشتي يقتلها وهي دافعت عن نفسها ، يعني كان كل همهم يا اما تحتبس امي او يخرجوها من المشفى ولا واحد كان في حسه ان امي تاعبه وقدهي في الموت ، على طول وقفت وبنقل للعسكري لو تسمح ادي لي تلفونك اتصل ، ابسرني بنص عين وقلي وازيد اديلك حق القات قده بختي ومشي هو والعسكري الثاني واحد من الناس سمعني وانا بنكلم العسكري وجى لا عندي وقلي لمن تشتي تتصل قلت له يا عمو لو تسمح اتصل بهذا الرقم وخرجت الكرت ، ضرب الرقم وادالي التلفون
-الوووو كيف حالك يا عمو
- الحمد لله من معي .. من انت يا ابني ؟
- يا عمو انا عزيز
-عزيز من ؟
-انا اللي بعت لك ماء في الجولة قبل يومين او ثلاثه ايام
-هااااه حيا ..حيا بالبطل عزيز كيف حالك يا ابني ؟ ومالك بتبكي ما وقع بك ؟!!...
- يا عمو امي عتموت انا في مستشفى كذا
- كيف عتموت يا ابني ما وقع ؟؟
- تعال ياعمو للمستشفى ما رضو يعالجو امي مابش معانا فلوس
- خلاص طيب ..طيب انتظرني لما اوصل

وقفل الخط ورجعت التلفون حق الرجال وسرت اشتري صحه ماء بنحاول افوق امي بس بدون فايدة كانت تفتح عيونها وترجع تغمض وبعد ما يقارب 15 دقيقه ابسرت الرجال دخل المستشفى وهو بيتلفت يمين ويسار ويسال اي شخص يقابله نبعت جريت لا عنده وحضنته وانا بنبكي طرح يده على راسي وقلي مالك يا ابني مالك يا عزيز لا تفتجعش انا موجود كلمني ايش حصل ، قلت له خرجو امي من المشفى مابش معانا قيمة العلاج ، قلي اين امك الان ؟ اول ما ابسرها وهي ممدده في الرصيف حق الحوش نبع جري وبيصيح عند الطوارئ على طول خرجو سرير وشلو امي ودخلوها وهو ماسك ليدي وانا ماسك لفرح ، ودخل عند الدكتور وقال كم عليهم وحاسب وقال ابسرو اللازم وسووه سريع ولا عننقلها من المشفى هذا وقررو لمي عمليه هذك الساع بعد ما ابسرو الزلط كان فوقها اكثر من دكتور وممرضه والاهتمام فوقها اكثر من اي مريض في المشفى وجلس بيسالني وكلمته بالقصه كلها وكان يمسح دموعي وهو بيدمع من كل اللي سمعه شوية وجو العسكر لا عنده وبيسألوه ايش يقرب للمريضه وكملو اساله وجاب لهم زلط وكان يحترموه لكثر فلوسه ، وشلني انا واختي فوق سيارته اشترى لنا ملابس ودخلنا مطعم ناكل وقلي يا عزيز انت وفرح عيالي من اليوم ، وقف لي جنب بقاله قال انزل اشتري لك عصير وجعاله لفرح وجاب لي الف ، نزلت وصلت لا عند صاحب البقاله ياعمو جيب لي عصير وجعاله صاحب البقاله شاف لبسي والسيارة اللي نزلت منها ونبع سريع سريع يجيب لي الجعاله والعصير بكل احترام وتقدير وقلي امسك يا بطل الباقي وانتبه من السيارات وخرج معي للباب حق البقاله وبيسلم على الرجال وبعد اربعه ايام وانا وفرح بنام عند الرجال في بيتهم وزوجته ، قلي كان معه ولد في نفس سني ومات عليهم ومن وقتها ما خلفوش وهو قرر يتبناني انا واختي ونكون جهاله خرجت امي من المستشفى وسرنا بيت الرجال وقام الرجال يكمل القضية زوج امي ما متش بس حصلة شلل من الاصابه وتم الحكم بالخلع وحبسة ست سنوات بسبب الحادثه وانا وفرح وامي عشنا عند الرجال وزوجته بس بعد سنه امي توفت وبقيت انا وفرح وحدنا من جديد لكن الرجال وزوجته كانو لنا ساع الام والاب ودرسنا وتعلمنا في احسن المدارس كان الرجال الوحيد اللي شليت منه بدون ما احس انه عيب او مش من حقي اشل منه كبرت انا وفرح مسكت التجاره ومعظم اعمال ابي واختي كملت تعليمها خارج ورجعت وهي دكتوره قررت تصبح دكتوره على شان اذا لقت اي محتاج ما ترجعه ، وانا حاليا كل يوم بنخرج ادور على عزيز جديد بنحاول ادور على مجنون جديد بنكلمكم قصتي وانا فوق سيارتي رافع للفريم وبنشوف الاطفال وهم بينتشرو ملان الجوله اللي بيشحت واللي يبيع ، بس بالنسبه لي اشكالهم افضل بكثير من اشكال الناس اللي فوق السيارات وافضل من نظراتهم ، فكيف ما كان رأيك عن من يسألك شي اذكر بس كلام الله ....
(وأما السائل فلا تنهر)...

#انتهى

اتمنى ان القصة نالت اعجابكم ...

#ابن_الشارع
#منيرالنقيب

#بنت_الجيران

-البارت الأول...

انتقلنا انا والعائله قبل ثلاث سنوات في عمارة سكنيه سته طوابق وشقتنا في الدور الرابع ، انا علي سنه ثالثه في الجامعه ، وطول الثلاث السنوات ما نعرفش احد من الجيران اللي في العماره بس كل شخص القيه في الدرج السلام عليكم وعليكم السلام وحتى بعض الجيران معرفش ايش اسمائهم ، لحد يستغرب الوضع قد اصبح موحش مع الناس كلهم واغلبيتنا كذيه المهم في يوم وانا راجع من الجامعه لقيت بنت في الدرج والمعتاد حقي اننا اذا لقيت عوائل في الدرج حق العمارة اوطي راسي وامشي بدون ما ابسر ، بس هذه المره مدري ليش رفعت راسي وابسرت بنت في نفس سني مبرقعة وكان به سحر في عيونها وحلى ما قد شفته عمري اول ما جت عيوني على عيونها ما قدرتش ابعد نظري منها، حاجه فوق ارادتي ، الحلى اللي في عيونها كأنه حلى نكع من الجنه واستلقفته عيونها ، وهي بتبسرني وواقفه سكته وانا مقعي فمي وبنبسر لا عندها ما دريت الا لما قالت لو تسمح ابعد من الطريق كان الصوت ساع الوتر واول معزوفه له في وسط قلبي ،قلت لها هاااه..حاضر انا اسف اتفضلو ، ورجعت للجدر فسحت لها وهي مشيت من جنبي ، وريحتها اختلطت مع فؤادي حسيت ان الرئتين حقي ازهرت ورود ،وبنبسرها لما نزلت وراحت لها وانا واقف في الدرج مطنن ، ماهي القمر تيه .!!! ايش من قمر ماهي الملاك تيه قصدي ماهي الخياليه تيه ، مع اننا عايش في صنعاء طول عمري ودرست مع بنات وابسرت بنات بعدد شعر راسي بس هذه ثانيه قوي هذه جمال عيونها وحلاوة صوتها ومشيتها ثانيه من عالم مختلف كيف هزرت روحي في لحظات وكيف خلتني ساع الاخبل ما قدرتش حتى اخبي دهشتي في حلاها ، ما دريت الا وواحد من الجيران بيقلي السلام عليكم وهو نازل من الدرج ، رجع حسي وقلت وعليكم السلام وطلعت للبيت تغديت وجلست وبنحاول اذاكر بس البنت جالسه في حسي وشكل عيونها منحوت في وجداني ما قدرتش ابعدها من حسي حتى للحظات وقلبي بيدق بقوة كان احساس غريب مع اننا قد مريت بحالات كثيره في الحب وتعرفت على بنات كثير ، لكن هذا اللي بنحس به مختلف ، وبنسأل نفسي معقوله البنت هذه ساكنه معانا في العمارة ومعقوله محد قد شافها طيب بنت من هي وفي اي شقة ساكنين ضروري اعرف واخلي امي وخواتي يسيرو عندهم ويبسروهم ويطرحو خبر هذا اذا هي عزبه، اكيد الحلى هذا محد عيفلتها للان ، وجالس افكر في كل التفاصيل حق الموقف ذيه واسير وارجع بالف فكرة وخطة لما طلع الصبح قمت لبست وسرت الجامعه وحتى مابش فيني ارهاق اننا ساهر كانت النفسيه حقي حاليه قوي ومرت عليا ثلاثه ايام بدون ما احصلها كنت اطلع العماره وانزل كل ساعه يمكن احصلها ولا شي ، واجلس على الرصيف امام العمارة يمكن اشوفها في الشارع بس بدون فايدة ، وارجع اجابر نفسي مالك يا علي بتتخيبل غيرت برنامجك اليومي وقد اكثر وقتك في الشارع واللي عيبسرك عيقل مدري ما قد معك اعقل وقع رجال معقوله تنسحر كذيه بسبب نظرة واحدة هيا قع رجال وقوم اطلع البيت ، وطلعت وبنحاول انسيها بس ما قدرتش سرت عند اصحابي حق حارتنا السابقة اخزن ونضحك بس ما قدرتش ابعدها من حسي حتى للحظة وطول وقتي وانا شارد لاحظو عليا الخبره وقالو هيا مالك طول التخزينه وانت مطنن لا ماسك تلفون ولا بتذاكر مامعك به عليك مشاكل او شي ..؟!! ياااايه يااااعلي بتسمعنا او ماشي ؟ هااااه .. ايوه بنسمعكم مالكم ما تشتو ، ما دريت الا وهم بيضحكو وبيقولو اين حسك اذكر الله ، قلت ولا في مكان مصلى على رسول الله ومخزن معاكم ، حتى اهلي ابي امي اخي الكبير لاحظو عليا اننا شارد طول الوقت حاول اخي الكبير يبسر مالي ويستفسر مني وقلي ياعلي به عليك مشاكل في الجامعة تشتي زلط به شي حاكيني انا اخوك الكبير ، واقله لا لا مابش شي ولا فيني شي واحاول اغير الموضوع ، ابي وامي حاولو معي وانا كل ما يسألني احد اغير الموضوع طوالي ، حتى في الجامعة زملائي بيبسروني قدنا ساكت اكثر وقتي وما عدبش فيني المزاح والكلام مع هذا وهذا ،الدكاتره ركزو عليا ما عاد بنستوعبش المحاضرات مع اننا كنت الدحيح حق الدفعة ، ايوة الكل ركز عليا لان اللي انا ابسرته مش طبيعي ومهما حاولت اوصف الجمال في العيون والصوت والقوام ذيك شا اكون مقصر قوي والحروف عترجع أمية وجاهله امام وصفها ، وبعد تسعة ايام وانا في الحاله تيه ووضعي الصحي قد بيدهور من كثر الارق ما عاد بنقدرش ارقد الا سويعات وطول وقتي وانا شارد وحتى رجعت انطوائي كنت اتهرب من الناس حولي لحد يركز عليا ويسألني مالك واكثر وقتي جالس في غرفتي وكل ما تغمض عيوني ابسرها قبالي ، وصلت لمرحلة اننا تعبت وقد بنفكر اتعالج ، ايوه ما بنبالغش اصبح ذكرها بيزعجني ويضرني كنت اتمنى تبتعد من حسي حتى للحظه ،لكن في اليوم التاسع فتحت باب الشقة حقنا شا اسير الجامعة ما دريت الا وباب الشقة اللي امامنا افتتح وخرجت الخياليه امامي وعيوني جت على عيونها طوالي حسيت بخوف شديد وما قدرتش اتمالك نفسي وبنبسرها وانا مقعي ، نكعت الملزمه والتلفون من يدي بدون ما استوعب وانا بنبسرها ، كملت تلمحني

ومشيت من امامي وانا متسمر مكاني ، وفي لحظه رجع حسي وشليت الملزمة والتلفون من الارض وجريت بعدها ، قلت اقل شي شسألها ايش اسمها ، وجريت بكل قوتي من الدرج بس ما لقيتهاش..!!! نزلت من الدور اللي بعده واللي بعده لما وصلت للباب ومابش لها وجود اختفت ، تبخرت ، مش معقوله بتيه السرعة عادهي مشيت الان من امامي المفروض انها حتى ما وصلتش لدور اللي تحتنا ، خرجت لشارع بنتلفت يمين ويسار وما لقيتهاش رجعت للعماره طلعت ونزلت ومابش احد ، رجعت اجابر نفسي يمكن من كثر ما بنفكر فيها قد عقلي بدأ يخليني اتخيلها ، لانه مش معقول تختفي بتيه السرعه ، رجعت سرت الجامعة وقد شجنن كيف فلت الفرصة تيه من يدي خرجت من الجامعة وسرنا نتغدي انا والخبرة ورجعنا نخزن ونذاكر ، الساعة واحدة الليل قمت روحت ، وصلت لا باب شقتنا ، وبنسمع صياح قوي ومضرابة في الشقة اللي امامنا اللي خرجت منها الخياليه ، قربت شوية اشتي اسمع ما به اذا قد الوضع حامي قوي شا ادقدق وادخل اغير عليهم بس الغريب اننا اول ما قربت افتتح الباب لا وجهي وابسرت رجال عملاق قبالي ، وشكله يفجع قوي قلي ما تشتي؟!!.. ، الغريب انه اول ما فتح الباب الصياح كله وقف فجأه ، قلت له هااااه .. ولا اشتي شي انا جاركم ساكن امام شقتكم ، ابسرني سكته وقفل الباب بقوة لا وجهي ...

يتبع...

#بنت_الجيران
#منيرالنقيب

#بنت_الجيران

-البارت الثاني ...

استغربت من تصرف الرجال واستغربت من شكله اكثر خرجت المفتاح وبنحاول افتح دلا دلا عل شان لا يسمعنيش ابي ويصيح ليش روحت متاخر ، اول ما دخلت لقيت امي واقفة في الصاله ، وقالت لي لا ذلحين سمرات وتخازين يا فارغ وبتروح اخر الليل سكته ساع السرق ، قلت يمه انا لي منعش لا ترفعيش صوتش ابي عيقوم من نومه ويمردغني ،قالت خليه يقوم يضبطك يا سرسري ، هيا الحقني للمطبخ ادفي لك عشاء ، جالس مراعي لمي وهي بتدفي العشاء ومستغرب ان ابه احد في الشقة اللي امامنا قدلي ثلاث سنين ولا ابسرت احد يخرج منها او يدخل ولا سمعت فيها صوت ، قلت يمه انتي تعرفي المستأجرين اللي في الشقه اللي امامنا ، قالت اين شقه ؟! قلت يمه تيه اللي قبال شقتنا ، قالت قدنت مخدر او مه ؟!! مابش احد في الشقة تيه يا مسوم هو عمل السمرات ، لما سنبين شعر راسي وقلت كيف يمه مابش احد يعني ما سمعتيش الصياح ورزعت الباب ؟!! طرحت العشاء قبالي وقالت تعشي وقوم ارقد هو بختي ، اخر الليل تأتيك الدواهي ، وراحت لها وانا جالس مطنن قبال العشاء في المطبخ ، كيف ما بش احد ومن هو اللي فتح الباب وصرعه في وجهي ..!!!ماهو الخبر ذيه طيب وكيف ابسرت البنت خرجت من الشقة الصبح؟!!!! ، يمكن امي مشي داريه ان قد به مستأجرين قبالنا ، واحلى مستأجرين ،كملت اتعشي ودخلت غرفتي وانا بنفكر في اللي حصل لما رقدت وحلمت ان البنت مقيدة في الشقة وبتتعذب وبتصيح لي انقذها ، بس كانت ملثمه ما قدرت ابسر الا عيونها واسمع صوتها بس ، حتى خيالي ما قدرش يكمل ملامحها في الحلم ، قمت من النوم وانا بنحس جسمي مكسر وبالقوة غيرت ملابسي واتجهزت وخرجت من باب الشقة وقربت لشقة اللي قبالنا طرحت اذني في الباب وبنتسمع بس مابش ولا صوت ،سمعت احد بينزل من الدرج ،دعممت ونزلت قبل ما يبسرني وسرت الجامعة روحت بعد الضهر وانا تاعب اشتي ادخل البيت ارقد لقيت حارس العماره عند الباب هو اعجم كلامه ثقيل ونص كلامه اشاره قلت له ياعم هشام ، من اللي ساكنين قبال الشقة حقنا ؟!! اول ما سألته تغيرت ملامحه وبدأ يتوتر وقلي مابش احد قبال الشقة حقكم ،قلت له كيف مابش احد انا امس ابسرت بنت ورجال في الشقه ؟!!! قلي انت مجنون مابش احد هذه الشقة كانت حق صاحب العماره وقد عمرنا بلك من قفى الباب وفلتني ورحلة ، كنت اصيح له وهو بيمشي ويأشرلي بيده انه مشغول بعدا نكمل مجبرنا ، استغربت قوي والخوف دخل راسي قلت ما قدناش مجنون كيف سدو الباب ببلك وانا ابسرت البنت بتخرج من الشقة وابسرت الرجال اللي صرع الباب لوجهي وجالس اجابر نفسي وانا بنطلع الدرج اول ما وصلت لدور الرابع ابسرت ورقة ارتجمت من تحت باب الشقة اللي قبالنا لما نكعت بطوني للارض من الفجيعه مديت يدي اشل الورقة وانا بنرتجف من الخوف وساع اللذي كنت احس مدري ما عيهجم عليا في اي لحظه اول ما شليت الورقة دخلتها جيبي ودخلت شقتنا سريع ، وابسرت مره جالسه عند امي في الصالة بيتجابرين دخلت شقتي وشربت ماء ومتسمر بقعتي لا قدرت اخرج الورقة من جيبي ولا قادر استوعب الموضوع قلت شدخل الحمام اغسل يمكن اجمع حسي اول ما فتحت باب غرفتي سمعت امي بتقل للمره ابني امس بيقل انهو ابسر احد في الشقه وسمع صياح..! ، والمره قالت اعوذبالله من الشيطان ، اصلا لو تلاحظي انتو جيتو الشقه والعمارة ملان سكان ماعدا الدور الرابع بسبب القصص اللي بنسمعهن عن العمارة تيه خصوصا الشقه اللي قبالكم ومحد سطى يسكن قبالها الا انتو ، قالت لها ليش ماوقع جابريني ، قالت قبل ست سنوات وهم بيشطبو العمارة مات واحد من المرنجين وهم بيرنجو ، ناس تقول انه نكع من السقاله وناس تقول انه انتحر بسبب انه كان يبسر بنت في العمارة ... وانا بنسمع المره بتجابر امي حسيت حمى في جسمي وحسيت عروقي بتحرق من كثر ما حمي الدم حقي من الخوف ورجلي كانت ترتجف بقوة اللي فيها الجبيب اللي خبيت الورقة فيها وسمعت المره وعادهي بتكمل مجبرها مع امي وقالت حتى المقاول حق الرنج هو ساكن في الحارة اللي قبال حارتنا قالو ان قد حالته النفسيه تاعبه وقده مجنون من يوم الحادثه ومحد داري ليش هل هو زاعل على صاحبه حين مات ولا وقع به شي في العماره هو والكل!!!! ... وانا بنسمعها والرجفه في رجلي بتزيد بقوة لما نكعت للارض امي ابسرتي وقالت بسم الله على ولدي وجريت لاعندي وهي مفجوعه بتقلي مالك يا علي ما وقع بك ، قلت لها ولا شي يمه مابلا تشعكلت وانا خارجي من الغرفة، وانا ماسك لرجلي قالت ما وجعت قلي مالها رجلك قلت ولا شي يمه سعليش وبنحاول اقوم بس ما قدرتش امي ابسرت رجلي بترجف بقوة وافتجعت وصيحت لاخي الكبير يجي يبسر ما فيني وصل اخي وبيقل خير مابه ؟!! قلت له ولا شي ما بلا ادربت ساعدني ادخل غرفتي ودخلني للغرفه وامي جالسه عندي وهي مفجوعة والمره صيحت لمي قالت سلامات؟ امي قالت مابلا الولد ادرب ووجع رجله قالت الله يلاطفه هيا خاطركم وراحت لها ، وامي رجعت دخلت لا عندي وقالت رجلك بتوجعك قوي يبني اخلي اخوك يسعفك ؟؟ قلت لها ماشي يمه قالت خلاص لا

تتحركش شا سير ادفي لك الغداء وخرجت واخي جالس عندي بيقلي مابش بينك شي اومه ؟ قلت ايوه لا تقلقش ،قلي اذا حسيت بوجع او شي صيحت لي ..تمام ،قلت له حاضر وخرج من عندي وانا ممدد فوق السرير وقد عقلي عيطير من مكانه من كثر الخوف والتوتر اللي فيني فقلت شا اخرج الورقة وابسر ما فيها ، اول ما فتحت الورقة حسيت بدوخه ووجع قوي في راسي كأن ضغطي ارتفع فجأه وعينفجر الدم من عروق راسي ومكتوب فيها في راس الورقة في النص "امواج" وتحتها شعر بطريقة غريبة قوي
"أمواج"
لوم.. حبيبي. .. وهذا ..محال
حبيبي.. احبه. .. كلام .. يقال
وهذا. كلام. ..بليغ. .. الجمال
محال ..يقال.. الجمال .. خيال
تحذير يفضل قراءة الشعر نظرياً بدون تحريك الشفايف ...

يتبع...

#بنت_الجيران
#منيرالنقيب

#بنت_الجيران

-البارت الثالث ...

وخلف الورقة مكتوب ( انا امواج يا علي ،لا تستغربش كيف اعرف اسمك اعرف كل شخص ساكن في العمارة حق بابا ، انا عايشه في البيت انا واخي فيه توحد وهو كبير البنية ، ابي تزوج بعد ما ماتت امي وكان معاها ولد عمرة الان 30 سنه قتل امه وقتل ابي وحابس لي انا واخي في الشقة من سنين وبيعذبنا كل يوم وبيمنعنا ندخل ونخرج ومحاصر لنا قوي، مريض نفسي لدرجة انه ما بيخرجش من البيت ، انا اول ما شفتك حسيت اتجاهك احساس غريب وقلت هذا اكيد اللي عيخرجنا من الجحيم هذا وينقذنا من ابن زوجة ابي قبل ما يقتلنا انا خاطرت بما تبقى لي من امل وفعلت لك تيه الرسالة واتمنى ان محد يعرف لانه اذا عرف يمكن يقتلني ويقتل اخي كتبت لك شي مختصر عن ظلمة وقسوته، في انتظارك.....)
طرحت الورقة جنبي وجالس افكر في الكلام اللي في الرسالة طيب اذا ما بيخرجوش من وين بيجيبو الاكل واللبس؟ طيب كيف عرفت اننا جنب شقتهم ورجمت لي الورقة من تحت الباب ؟طيب من هو هذا ابن زوجة ابوها ؟وليش محد قد ابسرة ؟!!وجالس افكر بس بدون فايدة كل شي مبهم ، وفجأه دخلت عليا امي وقالت هاه يا ابني كيف قدنت؟! وفي يدها الغداء حقي قلت لها بخير يمه الله يحفظش ، قالت هيا تغداء وارقد لك ساعه وقوم ذاكر ، قلت حاضر يمه من عيني بس ايش الموضوع اللي كلمتش عليه المره ؟ قالت يا ابني لا تصدقش الخرافات هذه كل واحد يطلع قصة من راسه قدلنا ثلاث سنين ولا ابسرنا شي وما وقع فينا شي .. قلت لها صح يمه المهم تسملي فديت قلبش ، كملت تغديت وتمددت وجالس افكر لما غفيت ورقدت ، حلمت اننا ابسرت باب شقت امواج مفتوح ودخلت وبنمشي في الصالة وانا بنتلفت وابسرت في الغرفة اللي يميني امواج وهي مخلسه ملان دم موجهه للجدار واخوها العملاق واقف ومفتلخ عليها وابن زوجة ابوهم بيذبح ضهر اخوها بأمواس ويحمم امواج بدم اخوها افتجعت ورجعت لا ورى وابن زوجة ابوهم ابسرني بنضرة لما تجمدت بقعتي وصحيت من النوم وقد جسمي كله بيعرق وملبب من كثر الخوف شربت ماء وجيت ابسر التلفون وقد الساعة 8:00 الليل شليت الورقة من جنبي قلت اقراها مره ثانيه بس الغريب ان الورقة فاضية مابش فيها ولا حرف ما بلا اسم امواج وبس ،وكان شم الورقة ساع الروث حق الغنم افتجعت ورجمت الورقة من يدي وانا بنتعوذب من الشيطان ، قمت خرجت من غرفتي ولقيت امي عند الباب قالت اخيراً قمت ،عادنا قلت اجي اصحيك تتعشي ، كملت اتعشي وقلت شدخل الغرفة اذاكر وجالس مطنن بنفكر وقلت ضروري اننا انقذ امواج واخوها من المدبر اللي عندهم وافضحه بقتل ابو امواج وامه ،واكيد قد شكلها نصيبي واتزوجها بما انها هزرت روحي من اول نظرة ، وقلت ضروري اجمع الخيوط المبهمه كلها وشبدأ من عند الحارس واي شخص له علاقة في الموضوع ذيه ، قد الساعة 11:30 الليل قمت خرجت من الغرفة وخرجت من البيت ونزلت لا غرفة حارس العمارة معه غرفة وحمام في الحوش حق العمارة دقدقت اول ما فتح لي دهفته لا داخل غرفته وقفلت الباب ونبعت فوقة بنقله حرام لو ما تجابرني وترد على كل سؤال لا اقتلك وماسك له عند صدرة وبنهزه وقلت له بتسمعني او ماشي ، الغريب ان الرجال افتجع قوي وكان متوتر وقال تمام ..تمام فلت لي وشا اجابرك بكل شي ،قمت من فوقة وجلست جنبه وقلت له هيا جابرني سريع ، الرجال جلس وقلي انت ما دخلك ماهو اللي تشتي تعرفة تقرص العافية وخليك بعد حالك ، قربت لا عنده وانا بنصيح قلت كيف ما دخلي تشتو تجننوني لا عاد نومي نوم ولا بناكل كل حسي في الشقة تيه وما داخلها ، الرجال ابسرني بنصيح وقد شكلي يا قاتل يا مقتول قال خلاص اهداء وشا اجابرك ، رجعت اجلس وقال قبل ست سنوات صاحب البيت عمر العمارة تيه وصاحبها انسان كتوم محد يعرف عنه شي حتى انا مشنا داري ايش بيشتغل ، وقلي صاحب العمارة الشقة اللي في الدور الرابع اهتمو في تشطيبها لانها عتكون حق زوجتي الثانيه .... ، قلت له ايوه كمل ، قال وبعد ما قد العمارة جاهزة جى صاحب البيت اخر الليل فوق سيارة وكان معه عوائل قلي سير انفعني سريع وافتح لي الباب وادي لي مفتاح الشقة ، قلت له حاضر وسرت انفعه رجعت ولقيت واحد في نفس طولك ولابس نظارة اسمه "بحر" قلت له من انت؟ قال انا ابن صاحب البيت وشل مني الحاجات وطلع ، وبعدا اتصلي صاحب البيت وقلي رحلك من العمارة ما ترجع الا بعد ثلاثه ايام ، قلت له ليش ؟ قال كذية وتعاملك كله يكون مع ابني "بحر" هو وكيلي في كل شي ، قلت له حاضر ، رجعت بعد ثلاثه ايام وصاحب البيت مابش له وجود مابلا ابنه "بحر" ومن يومها تعاملي كله مع "بحر" والايجارات وكل شي لا يد ابنه بحر ، قلت له وصاحب البيت اين سار ؟!! قال مشنا داري من يومها وتلفونه مغلق وكل ما اسأل بحر يقلي ابي مسافر ، وبيني وبينك الادمي هذا زبل اعوذ بالله محد يقدر يجابره من الكراهه اللي في تعامله وما بنبسره يخرج من الشقه الا وقت استلام الايجارات وبس ومنعني اننا ادي اي مستأجر لدور الرابع ، وقبل ثلاث سنوات قلي ادي مأجر في الشقة اللي انتو فيها واستأجرتو انتو ...

قلت له طيب ومن داخل الشقة غير بحر ؟؟ قال مشنا داري ولا انا داري كم هم اللي فيها او ما فيها من اثاث ، قلت له طيب وليش كذبت وقلت ان ما بش احد في الشقة ومحد داري من المستأجرين انهم في الشقة ، قال قلت لك بحر هذا اعوذبالله من دمة منعني اننا اكلم احد او ان احد يعرف بوجودهم في العمارة وانا خايف على رزقي فاضطريت افعل ما امرني ، قلت له طيب وما قصة المرنج اللي مات ؟!! الرجال افتجع وبدأ يتوتر قلي هااه ايش من مرنج وحاول يراوغ ، قمت مسكته من صدرة وقلت له بنقلك ما قصة المرنج ؟؟ قال ايش قصته نكع من السقاله وهو بيشتغل ومات وقد تمت القصة هذه زمان قلت له طيب والمقاول اللي ساكن جنب الحارة حقنا ما قصته؟!! قال قده مجنون ما دراني .. خفعته في راسه وقلت قلدني الله لو ادرى انك بتكذب عليا بحرف لا ابلغ بك انت وبحر ذيه انكم قتلتو المرنج ويعلم الله ما بتفعلو في الشقة تيه بنقلك ما قصة المقاول ؟ قام يبوس يدي ويقل ماشي الله يحفظك اسمه فلان هو ابن عاقل الحاره اللي جنبنا بس قده مجنون ما تشتي منه ؟ قلت له مشو عليك وخرجت ...

يتبع...

#بنت_الجيران
#منيرالنقيب

#بنت_الجيران

-البارت الرابع....

خرجت من عند الحارس وقفلت باب غرفته وبنلوي في الحوش حق العماره بس من خلفها معمور جدر بلك وبه باب مقفل يعني محد يقدر يمشي لا خلف العمارة خرجت من الحوش وبنلوي حول العماره من خارج وصلت لا خلف العمارة وبه قبالي بيت مغطي عليا يعني مقدرش ابسر العماره الا من الدور الخماس ، رجت طلعت فوق جباء حق سيارة على شان اقدر ابسر وابسرت باب ودرج حديد من الشقة حقهم يعني طريق ثانيه ينزلو منها ساع الدرج حق الطوارئ وابسرت "بحر" وهو واقف في راس الدرج وبيبسر لاعندي لما نكعت بطوني للارض ما دريت الا وبه كلب بينبح تحت السيارة ، نبعت من فوق السيارة وجلست الاحق الكلب ملان الحارة اشتي اقتل ابوه بحق ما فجعني ، رجعت دخلت العمارة وبنطلع من الدرج وقدنا في الدور الثالث سمعت باب شقة بيفتتح وبنسمع احد بيجري وابسرت بحر قبالي وهو بينزل من الدرج جري وابسرت في ايديه دم وهو ماسك لنظارة في وجهه لا تنكع ، اول ما ابسرته تسمرت مكاني ولا قدرت اتحرك وهو نزل من جنبي سريع ولا كأننا موجود ، مدري مالي افتجعت قوي وجلست مطنن ، وبعدا قلت ابن الكلب شكله قتل امواج واخوها وهرب ، طلعت جري لدور الرابع وابسرت باب شقتهم مفتوح قربت دلا دلا ، وبندقدق الباب باصابيعي ومحد بيرد عليا دهفت الباب ودخلت وحسيت بضيق شوعة قوي وريحة روث غنم كأننا دخلت حر بس الغريب ان الشقة تفصيلها وفراشها نفس اللي شفته في الحلم ، دخلت وبنمشي في الصالة دلا.. دلا اشتي اوصل للغرفه اللي ابسرتها في الحلم ما دريت الا واخو امواج العملاق اللي فيه توحد واقف قبالي وملابسه وسخه كأنه طرش فوق نفسه وبيبسر لا عندي بنفس النظره ، انا ما عاد دريت مفعل كنت ارجع لا ورى وبنقله صلي على النبي وهو بيقرب دلا دلا مني لما خرجت من باب شقتهم طرح يده في صدري ودهفني لما نكعت على ضهري ودقيت راسي بباب شقتنا وقفل الباب في وجهي قمت سريع ، خرجت المفتاح وبنفتح باب شقتنا وابسرت امي قبالي ، قالت علي...؟!!! ايحين خرجت يا ابني؟ وما معك بترزوع الباب ؟ قلت لها نزلت للبقاله اشتريت لي عصير وطلعت قالت بقالة هذه الساع، هيا تحمد الله ان ابوك ما قد روحش ولا كان عيقع لك يوم احوس هيا ادخل ارقد قبل ما اتصله يجي يتصرف معك ، قلت لها حاضر حاضر يمه ، دخلت الغرفة وقدنا مصفر من الفجيعه وراسي بيوجعني قوي بسبب الضربه ، شربت ماء وتمددت بقعتي وقد حالتي حاله من كثر الفجايع اللي وقع لي من بحر والكلب واخو امواج ، وبنفكر اتصل وابلغ لا قد قتلها الجني ذيه وارجع اقل ماشي لا قد تستعجلش يا علي ، غدوة سير لاعند المقاول ابن عاقل الحارة اللي جنبنا واستفسر منه يمكن توصل لشي ، لاننا مشنا مقتنع بكلام الحارس كله وحاسس انه مخبي شي ، رقدت وطول الليل وانا من كابوس لا كابوس ثاني واكثر كابوس استفزني اننا حلمت الكلب وهو بيبسرني ويضحك عليا حين فجعني ، المهم قمت الصبح وسرت الجامعة وعلى رجعتي دخلت الحارة اللي جنبنا وبنسأل اين بيت العاقل ، وصلت للبيت ودقدقت فتح لي ابن العاقل عمرة 15 سنه وقلت له اين ابوك صيح لا ابوه وجابرته بالموضوع قلي ابني تاعب وحالته النفسيه مشي متزنه الله لا بارك في تيك الساعه ،قلت له يا عم انا قد بنحس نفسي تاعب والكل فضروري اتكلم مع ابنك ، قال ابني عيجابرك شوية وتبسره عاقل ما فيه شي وفجأه يفصل ويرجع يقول كلام مش موزون ويسب ، قلت له سهل المهم اشتي ابسره قال خلاص جي للبيت في العصر نخزن جمعه وجابره قلت تمام ، روحت البيت والغريب اننا ما لقيتش حارس العماره عند الباب ، لأول مره ما يكونش موجود طلعت البيت والعصر سرت عند الرجال وصيح لبنه وخزن معانا ، وعادنا بنفكر في طريقة كيف افتح معه الموضوع ما درينا الا وهو بيقل صيح لي صاحب العمارة ارنج له عمارته وبعد ما اتفقنا دعيت ثلاثه اصحابي عمال يرنجو معي وبدأنا من الدور السادس واشتغلنا لا بعد اذان العشاء وقلت لواحد من اصحابي ينزل يدي لنا عشاء ، نزل ولما رجع كان شكله غريب ومصفر ساع المفجوع قلت له مالك ؟ قال ولا شي ، المهم كملنا نتعشي ورجعنا نخزن ونكمل عملنا والساعه 11:40 الليل واحنا بنغني ونتجابر ونتصافط ما درينا الا وطلع لا عندنا رجال في الخمسينات من عمره وقال لو تسمحو اشتغلو بدون ازعاج احنا ساكنين في الدور الرابع ما يسبرش اللي بتفعلوه ، انا استغربت قوي كيف به مستأجرين والعماره عادهي بدون تشطيب وفاضيه حتى ما قدبش فيها ابوب قلت له حاضر يا عم احنا اسفين محناش داريين ان به سكان في العمارة ابتسم ورحلة ، ورجعت اسال اصحابي ماهو هذا كيف به مستأجرين وحنا قد لوينا في العماره كلها وهي فاضيه منينه خرج لنا الشيبه هذا؟!! ، وصاحبنا اللي سار يدي العشاء قال ايوه يا خبره على طلعتي وفي يدي العشاء ابسرت في الدور الرابع بنت جالسه في الشقة وبتصيح لي ادخل وانا افتجعت وطلعت ما سطيت اجابركم لا عاد تضحكو عليا وتقولو ان قدنا مخدر او أثر عليا التينار حق الرنج ، المهم رجعنا نكمل العمل ونزلنا كلنا الساعة ست الفجر ، قلنا نروح نرقد ونرجع

نكمل عملنا ، نزلنا ولقينا الحارس حق العمارة وقلنا له به مستأجرين في العمارة ؟!! قال مستأجرين ايش.. !!!وعاد العماره عظم قلت له ومن اللي طلع لا عندنا اخر الليل وقال ساكن في الدور الرابع وذلحين على نزلتنا ابسرنا الدور الرابع ومابش فيه احد حتى ابواب مابش بتفعل لنا مقلب وتشتي تفجعنا او ما قصتك ، قال التينار اثر عليكم ، وضحكنا وروحنا وانا بنفكر في الموضوع ..... وسكت قلت له ايوه وما عاد وقع كمل لنا القصة يا اخي ، ابسر لا عندي وقال يلعن ابوك انت وامواج يا ابن .... وبدأ يسبني ، ابوه صيح فوقه وقله اصه خزن سكته ، ورجع العاقل قلي انا اسف يا ابني بس قد قلت لك انه عيسبك في اي لحظه ، قلت له طيب اشتي اعرف كيف مات صاحبه ، قال محناش داريين انتهت القضيه على اساس ان الولد نكع وهو بيشتغل وتم التعويض ودفع الديه من ابن صاحب العمارة لاهل الميت قلت له خير .. خير يا عاقل ، واعذروني قد شغلتكم قوي وقمت روحت وقت اذان المغرب وانا بنفكر في كلام ابن عاقل الحارة ومستغرب ايش عرفة بأسم امواج ....

يتبع...

#بنت_الجيران
#منيرالنقيب

#بنت_الجيران

-البارت الخامس .....

روحت البيت اول ما دخلت من الحوش ركزت على الباب اللي يوصل لا خلف العمارة وكان مفتوح ،استغربت قوي لأول مره ابسر الباب ذيه يفتتح قربت منه وهو مردود وبنتشاقر مابه خلفة ، كان به خلفة كراتين فاضيات ومغذيات علاجيه فاضيه ودبات اوكسجين وشوية معدات طبية مثل الابر والفراشات ،وبحر ما سك يسره(حزام) وبيضرب الحارس في ضهره والحارس جالس وقاحص على الشال على شان محد يسمعه وهو بيتوجع ، لما سنبين شعر راسي وافتجعت قوي كنت ابسر بحر وهو بيضربه والشر ملان ملامحه ، ومدري مالي كل ما ابسر الرجال ذيه افتجع رجعت لا ورى سكته وكملت طريقي للبيت اول ما وصلت باب الشقة حقنا وبنسمع صياح في الشقة حق اموج استغربت قوي قلت ليش الصياح هذا كله وبحر نازل بيضرب الحارس قربت من الباب بنسمع وواحد من الجيران نزل قلت له جي يا اخي اسمع بتسمع الصياح والغواير هذه ، قرب وهو مستغرب قال مابش لا صياح ولا شي وقلي وهو مستغرب مالك يا اخي تشتي تجننا مافيش احد بالشقة ونزل من الدرج ، انا استغربت وتعوذت من الشيطان ورجعت للباب حق شقتنا وعادنا بنخرج المفتاح من جيبي ما دريت الا وباب الشقة حق امواج يفتتح وابسرت اخوها الجثه وهو واقف قبالي وبيبسرني بنفس النظرة كأنه مغتاض مني ويشتي يقتلني انا ارتزحت لا عرض بابنا وبنقله مالك ما تشتي ؟! وهو كان يقرب دلا دلا وانا قدنا متجمد مكاني من الخوف وابسرت من جنبه امواج وهي بتمشي في الصالة بس كانت ملثمه ولابسه روب وابسرت كأن احد ارجلها مش رجل بشرية كأنها رجل معزة ما قدرتش ابسر سوى لان اخوها واقف امامي صيحت وقلت يا امواج ..اموواج وما دريت الا لما قرب اخوها لا عندي ورجم لا عيوني ساع الرماد حق الفحم ، لما اعماني غطيت على عيوني وكنت احس ان عيوني بيحرقين بقوة وبدأت اصيح بكل صوتي من الوجع لما دوخت ، اول ما فتحت عيوني ابسر مغذية معلقة والفراشة في يدي وابي وامي واخي الكبير واقفين جنبي وانا في المستشفى وبيقولو الحمد لله على السلامة ، انا على طول دخلت في حاله هستيريه وكنت اصيح بكل صوتي فلتوني يشتي يقتل امواج فلتوني واتشنجت واخي وابي ماسكين لي وامي بتبكي انا واعي ان اللي بنفعله غلط بس ما كنتش متحكم بنفسي وجلست اصيح لما وصل الدكتور وضرب لي ابر في كتفي لما حسيت جسمي كله بيثقل كانت عيوني تغمض واحاول افتحهن بقوة مشتيش تغمض عيوني وابسر امواج في حلمي او ابسر ملامح بحر الخبيثه ، وفتحت عيوني الساعه 2 بعد منتصف الليل وابسر نفسي في غرفة مشفى خاصة واخي مفرش له في الارض وراقد صيحت له اول ما سمعني قام وهو مفجوع وقلي مالك يا اخي تشتي شي ..بأيش بتحس ؟؟ قلت له ولا شي يا اخي قلي كم لنا في المستشفى ؟ قال قدلنا خمسه ايام .. قلت له كيف خمسه ايام.!! قال كل ما تقوم تجلس تصيح امواج ،بحر ،وقتل ومدري ماهو وحارس العمارة وما تهدأ الا لما يفعلو لك مخدر ومهدأت فعلنا فحوصات وكل شي بس بيطلعين طبيعي وما فيك شي وقد قرر ابي يجهز لك اوراقك ويشلوك مصر يبسرو ما بينك .. قلت له مصر ايش يا اخي انا بخير ما فيني شي كل اللي فيني بسبب الشقة اللي قبالنا والحارس وامواج وبحر واخو امواج اللي ساع الجدر هو اللي رش في عيوني مدري ايش لما فقدت الوعي يا اخي ، اخي كان يسمعني وبيبسرني بنظرة شفقة كأن انا مجنون وقد بندي اي كلام غير منطقي ركزت عليه وقلت له مالك يا اخي بتبسرني كذيه مشنت مصدق لي او قصدك ان قدنا مجنون ؟!!!! مسكني من اكتافي وقال يا اخي انت حالتك النفسيه تاعبه شوية وبتحصل مع اغلبية الناس بسبب الضغوطات والظروف وهم الدراسه وبترهق نفسك بالسمرات والتخازين وما بتاكلش فطبيعي يقع بك كذيه ، انت داري اننا سرت لاعند الحارس حق العمارة وقلت له ما بينك وبين اخي؟ اخي مريض وبيذكرك واصل واسماء غريبه ؟!!!! قلي ولا بيني وبينه شي الفتره الاخيره كان يروح ويرزوع بابي ويدخل يتهجم عليا ويضارب وانا كنت ابسره مشو بوعيه زي المحشش او السكران وانا كنت اسكت مشتيش افعل بينه وبين ابوك مشاكل وقد حلفت له لو يكررها مره ثانيه بشتكي لاعند ابوك ... ذلحين قلي هو صدق يا اخي انت بتحشش او بتتعاطى شي انا داري كله عمل الخبره عيال السوق اللي بتسايرهم ، انا ضبحت وقلت ايش من عيال سوق وايش الكلام هذا يا اخي بتتهمني عيب عليك وبتصدق ابن الكلب هذا الحارس اذا ما اقتل ابوه ووقفت من مكاني وبنبعد الفراشة من يدي واشتي اخرج ما دريت الا واخي مسكني بقوة وبيصيح للمرضة وصلت الممرضة ومعاها ممرض جنبها ثبتوني فوق السرير بقوه وضربو لي الابرة ، اول ما فتحت عيوني كانت الدنيا صبح وابسرت امي بتصلي في الغرفه واخي راقد وابي واقف وبيتكلم في التلفون مع اخوه ،عمي ، وبيقله ايوه خلاص قد جهزت كل شي وان شاء الله بعد ثلاثه ايام عنسافر نعالج الولد ومعذر من خير ، رجعت غمضت عيوني وجالس افكر وقلت ضروري اننا اهدأ واجابرهم طبيعي ومذكرش الشقة ولا امواج ولا الحارس وابين لهم اننا بخير وما فيني شي ، لاننا بخير وكل ما حاولت اوضح او اشرح بيزيد الوضع سوء ، وانا

بنفكر كنت اسمع ضحكة امواج في اذاني تعوذبت من الشيطان وفتحت عيوني وبنحاول اتمالك نفسي ارتفعت وجلست على السرير وقلت اسعد الله صباحكم وابي ابسرني وقال حيا حيا صبحك الله بالخير كيف قدنت يا ابني وكيف صحتك ، قلت الحمد لله وقلت يمه يا منعاه ادعي لي وانتي بتصلي ، كملت امي تصلي ونبعت تجلس جنبي وبتمسح راسي وبتقل الحمد لله على سلامتك يا ابني قلي ما فيك ما بتحس ؟ قلت الحمد لله قدنا بخير تقل ريااال ، واخي سمعنا واحنا بنتكلم قام من نومه وقال خير تشتو صبوح ولا شي ، ابي قله جي ابسر اخوك ، قام وهو بيمسح عيونه وقلي ما في نفسك من صبوح ، قلت نفسي اصتبح في بيتنا ، الحمد لله حاسس اننا بخير وبصحتي ، ورجعت روحي بعد المغذيات والعلاج قد كان جسمي هالك ، وابي قال يعني قدك بخير ما بتحس بشي ؟ قلت ايوه يا اباه بخير ما دام وانت ابي وتيه امي وهذا اخي جابروني كيف شمرض الله يحفظكم ويخليكم فوق راسي ، واسمعني يا اباه ما شكذبش عليك انا سمعتك وانت بتجابر عمي ان قدنت جهزت امور سفرنا على شان تعالجوني وقلت بعد ثلاثه ايام عنسافر اشتي منك خدمة يا اباه ، قال اامر لو تطلب عيوني لا اقلعهن لك قلت ياسين على عيونك ممكن نروح البيت واجلس الثلاثه الايام تيه في بيتنا لما يجي وقت السفر ، ولا تخاف ما عيقع بي شي واكيد عيقررو لي علاجات ومهدأت اذا ازدادت حالتي سوء ، ابي ابسرني بحيره وابسر لا عند امي وامي اشرت له يوافق وقال حاضر يا ابني من عيني اسير ادعي الدكتور وابسر ما عيقل ، كملنا وروحوني البيت نزلنا من فوق السيارة وابسرت الحارس بيبسرني واخي ماسك لي خايف اذا شا اقوم اضارب الرجال ولا شي ، بس وصلت لا جنب الحارس وهو بيقل الحمد لله على سلامتك يا علي ، قلت له الله يسلمك تسلم يا عم هشام ، واعذرني امانه اذا زعلتك ولا شي ، قال الله المستعان احنا جيران ، وطلعنا البيت دخلوني غرفتي تمددت فوق السرير حقي وحسيت ان روحي رجعت ، وامي قالت لو تدري كم فجعتني، قلت ايحين يمه؟!! ، قالت لما تعبت ما سمعت الا جسمك لما ارتجم جنب الباب فتحت الباب وكنت ابسرك تقلب عيونك وتهتز بقوة حضنتك وصيحت ملان العمارة ، قلت لها انا اسف يمه المهم قد ستر الله وقدنا بخير الحمد لله ، قالت هيا ارقد لك شوية يا ابني وانا شفعلك غداء من اللذي في نفسك ولا يهمك وخرجت من الغرفة ، وانا جالس افكر في وضعي ، ومشنا داري مفعل بيعاملوني على اساس اننا مريض وبيهتمو بي كذيه واذا قلت لهم اي كلام عيبسروني مجنون وكلامي غير منطقي فالافضل اننا اسايرهم وخلاص لما اتخارج من الحنبه تيه ، فتحت تلفوني وجالس اانتر ، وبعد نص ساعه امي فتحت الباب وقالت يا ابني به واحد من زملائك جى يزورك ويطمن عليك قلت لها من هو يمه ؟ قالت اسمه بحر ، واقتلبت امي طريق الصاله وقالت تعال يا ابني ادخل "علي" في الغرفه ، ما دريت الا وبحر دخل الغرفه وامي قالت انا شا اسير افعلكم عصير ، وبحر قال تسلمي يا خاله امي خرجت وبحر قفل باب غرفتي وابسر لاعندي ...

يتبع...

#بنت_الجيران
#منيرالنقيب

#بنت_الجيران

-البارت السادس ...والاخير

قفل باب غغرفتي وبيبسرني بنظرة غريبه وانا متجمد فوق السرير ما قدرت حتى اتكلم واقله ما تشتي ، وهو بيصلح النظارة فوق عيونه وبيبسرني ويبتسم وفجأة تتغير ملامحة كأنه بيبكي ورجع يبتسم ، وقلي (كيف شعورك وانت مش قادر تشكي وجعك وكل ما تأشر نحو الشر محد يصدقك ويبسروك مجنون كيف شعورك وانت فاقد الثقه في تصرفاتك واقرب الناس لك مش قادرة تفهم وجعك ؟؟ كل ما يميل قلبك اعرف ان الميلان عبارة عن خروج من الطريق المعتاد وتصبح طريقك ملفته للانظار ، لك حرية الاختيار امك او ابوك شرجع لك بعد يومين ...) وفتح الباب حق غرفتي على وصول امي وفي يدها العصير قالت اين عتسير يا ابني اجلس اشرب العصير اقل شي، قال لها تسلمي يا خاله انا مشغول قوي وخرج من البيت ، وامي بتبسره وهي مستغربه وقالت لي مال صاحبك ذيه يا علي .. علي بتسمعني مال صاحبك ؟ هااه .. ماله شي يمه مابلا معه عمل ضروري واتصله ابوه وخرج مستعجل ، طرحت لي العصير وسارت تكمل عملها ، وانا مطنن وبنفكر في مجبره ماقصده وكيف درى بأيش بنحس ، ايش النرجسيه تيه اللي فيه وبكل ثقه يدخل بيتنا ويهددني حرام ما راحت له ، بيهددني بابي وامي اكيد عيدهددني هو قاتل وقد الامر عنده طبيعي بس يا انا يا هو والليله ضروري افعل حل للهدار هذا كله ، وانتظرت طول اليوم وانا بنفكر كيف افعل به ، واخر حل وصلت له اننا اهجم على شقتهم واذا وصل الحل اننا اقتله شقتله لاننا مقدرش اجابر اهلي بشي محد عيصدقني بيبسروني مريض نفسي ،راعيت الساعه 1:20 بعد منتصف الليل قمت شليت الجنبيه حقي ودخلتها من تحت الفنيله حقي وخرجت من غرفتي سكته لحد يسمعني وبنحاول افتح باب شقتنا دلا دلا على شان ما يطلع صوت اول ما فتحت الباب ابسرت بحر فتح باب شقتهم وطلع جري طريق الجباء حق العمارة ، وانا طلعت بعده وصلت وباب الجباء مردود ، فتحته وابسرت بحر في طرف الجباء ويشتي ينبع وينتحر وجالس بيبسر لشارع قربت دلا دلا وانا ماسك للجنبية اول ما قربت منه سمعته وهو بيبكي وبيقل يارب سامحني وقده عينبع نبعت على طول حضنته من وراه وسحبته لما نكعنا على ضهورنا اقتلبت على طول لا فوقه وانا طارح للجنبية فوق رقبته وبنقله قتلت امواج واخوها يا كلب وذلحين تشتي تنتحر حرام لا اقتلك هنيه ساع الكلب ، وهو بيبسري بدون اي مقاومه وقلي اقتلني طيب قد كنت شنتحر ليش عادك انقذنتي هيا اقتلني اشتي اموت وارتاح، استغربت من كلامه قلت له كيف ترتاح وانت بتعذب خلق الله قتلت امك يا عقي والديك وزوجها وبتعذب جهالهم ليش ، وفوق هذا جيت لا بيتي تهددني بقتل ابي او امي ، الرجال كان مستغرب من نص كلامي وقلي من وين جبت الكلام هذا ومن قلك اننا قتلت امي الله يرحمها وكيف قتلت زوج امي ، ابي عايش مشو ميت..!! قلت له بطل كذب شذبحك هنيه انا داري ، قلي بكل برود تشتي تقتلني اقتلني ولا قمت من فوقي وخلينا نتجابر مابش معي وقت، استغربت من مجبره وقمت من فوقة وهو قام وجلس جنبي وقال اكيد امواج وصلتك لا تيه المرحله وكان باقي لك شوية وتنتحر ، بس للاسف انا وصلت لتيه المرحلة قبلك بس خليني شا اجابرك بالقصة من بدايتها ، صاحب العمارة هو ابي مشو زوج امي ، امي ماتت بعد ما ابي تزوج بالثانيه ، وقرر ان احنا نسكن في الشقة مع زوجته الجديده قلت له ايوه كمل قال ، اولا امواج هي زوجة ابي الجديده ، والشخص كبير البنيه هو ابنها ، وحارس العمارة هو اخو امواج ، هم عصابة وصيادين رجال الاعمال ، بالسحر والشعوثة وغيرها ، قلت له ما بتقل كيف امواج زوجة ابوك ؟والعملاق ابنها.؟!! وامواج شكلها في سني كيف معاها ابن اكبر منها؟!!! ، والحارس كيف اخوها وانا ابسرتك وانت بتضربه في الحوش ؟؟ طيب اذا ابوك عايش قلي اين هو وليش مخفي للامر ؟!!مالك تشتي تجنني ..!! ابسرني وابتسم وقال وهو هذا سر عملهم وضربة القاضية لهم ، كل اعمالهم الخبيثه بيرجموها فوقي وخلوني انا صاحب الشخصية الخبيثه وهم المظاليم وكل هدفها زوجة ابي انك تقتلني او انا اقتلك او انك تنتحر ، المهم اسمعني ، انا ابن ابي الوحيد ، ابي قرر يعمر العمارة وتعرف على الحارس والحارس دله على امواج واتزوجها ابي ، امواج انت لو تشوف شكلها يمكن تشخ تحت نفسك من الخوف ما عاد افتهمليش هي ساحره او معاها جن او هي جنيه في نفسها مشنا داري لليوم ، قلت له بطلك كذب انا ابسرت امواج وفوقها جمال ما قد ابسرته في احد ، قلي شفت ملامحها كلها ولا بس عيونها ؟؟ قلت له هااه .. الصدق عيونها بس !! قال وهكذا خدعو ابي لما تبعد اللثمه تبسر تجاعيد وجهها ويختلف شكلها قوي كأن عمرها فوق ال70 سنه ، المهم خليني اكمل لك بعد ما انتقلنا ابي اصبح طريح الفراش وما يقدرش يتحرك او يتكلم وطارحه له في غرفة ، وبتستخدم اسحارها وشغلها في الغرفة تيه ، وابي كل اسبوعين ادي له اكسجين وابر ، واعتقد انك ابسرتني وانا نازل من الدرج وفي يداتي دم ..! قلت له ايوه قال ابي زاد مرضه وكان يسعل دم فنزلت سريع ادي له العلاج ، امواج وابنها العملاق والحارس سيطرو عليا

انا وابي وامواج
بتهددني بقتل ابي وامرتنا نفعل هذا كله بنينا الدرج من خلف الشقة على شان هي بتنزل بشكل سري لا عند الحارس وتدير اعمالها واخفت كل شي حتى وجودنا ، حاولت اتكلم مع باقي اهلي بس ما قدرتش حاولت اهرب ابلغ بس ما قدرتش كل ما ابعد من العمارة افقد الوعي وما ادري بنفسي الا وانا في غرفة الحارس او في شقتنا ، قلت له طيب كيف مات المرنج وعاد امواج ما جت لشقة كيف العمال ابسرو امواج ويعرفو اسمها وحصل معاهم كل اللي حصل ، قال الاسحار موجوده في العمود حق العماره والحارس هو اللي فعلها وهو اللي دبر هذا كله وضحو بالرجال على شان تطلع اخبار على العمارة انها مسكونه ومحد يستأجر فيها لما يجهزو نفوسهم وهذا فعلا اللي حصل ، وما درينا انا وابي الا واحنا في الشقة ، ولما ابسرتني بنضرب الحارس لو كنت ركزت ورفعت عيونك كنت عتبسر امواج وهي في الدرج الخلفي هي اللي قالت انزل اضرب اخوها وافتح الباب لانك عتجي وتشوفني وانا بنضربه ويتاكد الموضوع عندك بكل الكلام اللي قالوه ، والسبب الثاني انه تكلم معك عن المقاول وجاب لك معلومات عنه، امواج زعلت وفعلت به كذيه ، والحارس ما كنش اعجم بس مدري ايش تكلم وامواج طرحت جمر في فمه والغريب ان اخوها ما يقدرش يكسر لها اي كلمة مسيطره علينا كلنا ، انا نفسي مشنا فاهم كيف قادر اجابرك بهذا كله بدون ما افقد الوعي او يحصل لنا اي شي ، ولاننا ضقت اول ما حسيت نفسي حر اقدر اتحرك بمزاجي قررت اطلع وارجم نفسي من الجباء واخلص نفسي من العذاب هذا ، قلت له لو كل الكلام اللي قلته صح كيف عتفلت ابوك في يدها وانت مضحي بكل هذه السنين لاجل ابوك كيف عتفلته ذلحين ، قال ما شقدرش اوضح لك انت كان باقي لك يومين وتوصل لمرحلة الجنون وتنتحر هذا اذا ما جننتش بسبب موت ابوك او امك ..قلت ايوه انت جيت تهددني بموتهم ..!! قال انا مأمور افعل كذيه من امواج ،ورفع الشميز يروري لي ضهره وضهر كله مشطط ومذبح بأمواس ، قال كل شوية تخلي اخوها يشطط ضهري ويعبي قلص دم ويديه لأمواج .. وهو بيتكلم ما درينا الا بصوت صاااايح ملان العمااارة لما سنبين شعر راسي لأول مره اسمع ساع ذيك الصوت بحر وقف وهو مفجوع ورجعت ملامحه ساع اول ابسرني ونزل سريع ، وانا ماسك اذاني من قوة الصوت ، اول ما وقف الصوت خبيت الجنبيه تحت الفنيلة ونزلت سريع وانا بننزل كنت ابسر المستأجرين بيخرجو من الشقق حقهم وبيسألو ماهو هذا الصوت ؟!! وصلت باب شقتنا وابي واخي عند الباب اول ما ابسروني قلي ابي ..علي اين كاننت يا ابني وما خرجك من البيت ؟ قلت له هاه انا سمعت صياح يا اباه وقلت اخرج ابسر مابه بس اول ما خرجت سمعت الصياح وافتجعت ورجعت قلي ادخل سريع ، دخلنا وكلنا مستغربين من الصايح منينه جى وانا فارح ان الكل سمع الصايح ذيك وجالسين نتجابر في الصالة ومستغربين من من الصايح ذيك ، فقلت يا علي تيه فرصتك اننت تتكلم بكل شي وكنت مصدق لكل كلام بحر لاننا كنت احس بضيق من يوم ما شفت امواج ومن تصرفاتها الغريبه وتصرفات اخوها العملاق ومن الورقة اللي رسلت لي وكل المشاكل اللي حصلت معي ، قلت اسمعني يا اباه لا تقلش اننا مجنون ولا شي ، يمه تذكري صاحبي اللي جى يزورني اليوم قالت ايوه قلت لها ايش اسمه قالت بحر ، صلو على رسول الله بحر هذا مشو زميلي هذا ابن صاحب العماره وساكنين في الشقة اللي قبالنا واكيد كلنا قد سمعنا قصص عن الجن والكلام هذا عن العماره او ماشي؟!! ، طيب يا اباه به ساحره تزوجت بابو بحر وجالسين في الغرفه وبيفعلو حاجات فوق ما يتصورها العقل ولو مش مصدق لي جي نهجم على الشقه يا اباه ، قال كيف نهجم على الشقة يا ابني باي حق وما عنقول لناس وبعدا الشقة فاضيه للجننان حقك هيا مه انت قلت نجي البيت وعتبطل مجنانه ، قلت له يا اباه انا ابنك طيب سايرني انت بنفسك قلت الشقة فاضيه من عيلومنا عنقول ان احنا سمعنا الصايح الكريه هذا من الشقة ودخلنا نتاكد ، واذا ما بش احد عنقول ان احنا غلطنا وحلينا الموضوع مع الحارس قال ما يسبرش يا ابني انت بتفهم ، واخي نبع وقال يا اباه ما فيها شي لو فعلنا على ما قلنا علي وبعدا هو صدق يا اباه ماهو الصوت اللي سمعنها اسألك بالله عاد جسمي مقشعر لا ذلحين ، ابي قال هيا تمام عيالي الاثنين جننو ، شخطي بعد مجبرك يا علي لكن لو مابش شي انا داري كيف اتصرف معك وخرجنا من الشقة انا وابي واخي وامي بتشاقرنا من قفى الباب ، عاد ابي بيقل يا جهالي خلونا ندقدق الباب اول واذا محد جاوب نكسره ، عاده ما كملش كلامه نبعت انا واخي زبطنا الباب لما كسرناه ودخلنا اول ما دخلنا شمينا ريحة شوعه قوي والشقة ملان دخان وبندور في الشقة لقينا في الصاله بحر وهو مقيد وهو مخلس وجسمه كله دم والعملاق في يده امواس من حق العمليات بيشطط ضهر بحر ، وقفنا كلنا مطننين ومستغربين قوي من هول المشهد اللي بنبسره نبع اخي على طول مسك يد العملاق وبيحاول يضاربه دهف اخي للارض وكان يصيح ساع الغول وابي نبع له، العملاق مسك ابي من رقبته ولزه لاعرض الجدر بيخنق ابي ، خرجت الجنبية من

تحت الفنيله حقي ونبعت طعنت الرجال في يده وقد بنسمع امي بتغور من باب شقتنا ، الرجال اول ما طعنته ابسرني بنظره حتى ما حركش يده ولا فعل اي ردة فعل للوجع ، وجالس خانق لابي ،اخي وقف وشل السلسله اللي فيها القيد ونبع من قفى العملاق بيخنقه بالسلسله العملاق بعد يده من رقبة ابي وقد كان وجهه ابي مزرق جلس ابي للارض وهو بيسعل وبيحاول يرجع نفسه ، مادرينا الا واموج خرجت من الغرفة اللي في يميننا وهي بتجري بيداتها وارجلها وبتصيح صياح غريب ساع الضبع ودخلت الغرفه الثانيه اللي في يسارنا وانا ماسك لرجل العملاق بنحاول ننكعه للارض انا واخي ، ما دريت الا لما دخلو اثنين من المستأجرين ونبعو يساعدونا وبالقوة قدرنا نطرح العملاق للارض ونثبته ، ونبعت انا وواحد ندخل الغرفه اللي دخلت فيها امواج ، اول ما فتحنا الباب ابسرنا امواج وهي واقفة ومخلسة بكلها وجسمها كله مجعد وشكلها يفجع الجن نفسهم ، وشم الغرفة جيفة اموات ، وبه ارجل معز مربطات بخيوط ومعلقات ملان سقف الغرفة والجدران فيها رسومات واشكال خبيثة ، وابو بحر ممدد في راس الغرفة كان يبسرنا وهو مبهرر ويشتي يصيح بس ما قدرش ، الرجال قرب وهو طارح يده في فمه وبيقل اعوذ بالله من الشيطان ، قامت امواج رجمت لا فوقه رماد لما نكع للارض وكان يهتز بقوة ، مسكت الرجال وسحبته لا خارج الغرفة وقفلت الباب وبنصيح لناس يجو ، وهي كانت تخبط الباب بقوة وتصيح ، وبه ناس قد فكو القيد من بحر وبيبسرو ما فيه وهو كان فاقد للوعي ، والحارس طلع وهو مفجوع بيصيح مابه مابه ، اول ما ابسرته قلت يا اباه هذا اخوهم امسكوه هو ابن الكلب السبب في كل شي ، اول ما سمعني هرب على طول ولاحقه ابي وواحد من المستأجرين ، وقد المستأجرين كلهم باب الشقة وناس داخل ، وقد به اثنين بيساعدوني واحنا ماسكين للباب الغرفه اللي فيها امواج محد ساطي يفتح ، وكنت اصيح بلغو القسم ، بلغو القسم واسعفو بحر والرجال اللي رشت الساحره فوقة رماد ، وقد لنا ما يقارب خمس دقايق واحنا في الشقة مثبتين للعملاق وماسكين للباب وبنبسر بحر والرجال وبنسمع صياح امواج واخوها ، وكل واحد بيسال مابه ماوقع ؟ وبيتكلمو ، واحد من الجيران دخل وفي يده سلاحه ، قال ابعدو مني افتحو الباب شقتل ابوها بنت الكلب ، وبحر فاق وكان يصيح ابي يامنعاه انقذو ابي قبل ما تقتله ، فتحنا الباب حق الغرفه والرجال موجهه للألي ، وابسرنا امواج لما قشعر بدنا كله وهي بتتقفز في الغرفة تيك ، والرجال كان يقلها انبطحي على بطنش شقتل ابوش شقتلش وقرب شوية من الباب وحنا خلفه بنبسر ، ما درينا الا لما امواج وقفت وابسرت الرجال وكانت تقله اقتلني هيا ، ما درينا الا والرجال كان يرتجف بقوة وانا بنقله ارميها ارميها والرجال بيراجف ومقعي فمه ما قدرش حتى يتحرك ، ما درينا الا لما قربت لا عنده مسكت الألي وخبطته في صدر الرجال لما دهفته لا ورى ونكعته للارض ، وبعد ما سلبته السلاح وجهة الألي نحونا وبدأت امواج تطلق نار علينا وهي بتتقفز ، كلنا هربنا من الشقة وقد كنا سحبنا بحر والرجال لا والرجال بس اخوها كان في الشقه مثبتين له اخي واثنين رجال ، كلنا هربنا والعملاق قام ، وجرى لا باب الشقة وقفل الباب وكلنا واقفين عند الدرج مفتجعين لا يقع بنا شي ولا شي وفلتنا صاحب الألي داخل ،ما درينا الا وواحد من المستأجرين اطرح للارض وبيصيح رجلي رجلي ، جينا نبسره ورجله بتنزف دم وقع فيه طلقة ، ومادرينا الا وخمسه عسكر بيطلعو من الدرج جري وبيسألونا مابه جابرناهم وصلو وكان يصيحو لهم يسلمو انفسهم ، وما درو الا بطلق نار عرض الباب لما تكون واحد من العسكر في يده ، اقتحمو الشقه وبنسمع بس رصاص وصياح العملاق وامواج والعسكر ، وبعد دقيقه جينا نبسر وقد واحد من العسكر ميت ، والعملاق ميت وجنبه السلاح ، وامواج ، غارقة بدمها وهي حاضنه لأبو بحر من خلفه ويداتها في رقبته ، ومابش خمس دقايق الا وقد العسكر والاسعافات ملان العماره وقفلو الشارع وخرجونا كلنا من الشقة ، وصاحب الألي كان فاقد الوعي اسعفوه مع باقي المصابين وبحر ، وابو بحر خرجوه وهو مبهرر وبيبكي ، ذكرت ان ابي خرج يلاحق الحارس نزلت سريع ادورها خرجت لشارع ولقيت ابي والرجال قلت لهم اين الحارس قالو هرب ما قدرناش نمسكه ومشع مسدس وكان يطلق علينا فلتناه ورجعنا بس سمعنا طلقات رصاص رجعنا سريع ولقينا الحارس مغطى بدمه وواحد داعس له في صدرة والبندق في يده قلنا من انت قال انا ابن العاقل اللي جنبكم خرجو الناس تحوشو وبيقولو المجنون قتل الرجال انا ابسرت الطقومات والاسعافات خيرات فلت وجيت ابسر مابه ،قلي ماوقع ما عاد فعلتو اين الجنيه والعملاق وليش قد الحاره ملان عسكر وقامت القيامه قلت جي نطلع وشا اجابرك ، وبعد يومين لقيو في الشقة اكثر من ثلاثه الف سحر ، ودمم ميتات وقرون وسط الجدران وكتب سحر ، وفي غرفة الحارس اسحار وصور بطايق ناس وصور المستأجرين كلهم وتفاصيل عن حياتهم وبطايق ناس مفقودين من زمان واشياء تشيب الراس واخفو العسكر عننا حاجات من اللي لقيوهن في