بكل دول العالم اكو تطبيقات تخلي الجيران يتشاركون أغراضهم. ببريطانيا أكو "أوليو"، بأمريكا "نيبرغودز"، بهولندا "بيربي". الفكرة وحدة: واحد عنده غرض ما يستعمله، يخليه بمتناول واحد ثاني يحتاجه. إما هدية، أو إعارة، أو مقايضة. ملايين الناس بالعالم يستخدمون هاي التطبيقات، يوفرون فلوس، يقللون الهدر، ويتقربون من جيرانهم.

وآني من كنت صغير، أشوف بمحلتنا شي ما لكيته بأي مكان ثاني بالعالم. الجارة تطرق الباب تستعير شوية سكر، وأمي تنطيها . أبوي يستعير المنشار من جارنا ، والعمة تعطي ملابس أولادها اللي صغرت لجيرانها. كنا نسميها "لمّة المحلة". الكل يعرف الكل، والكل يعين الكل.

بس مع مرور السنين، شفت هاي اللمّة تختفي شوية شوية. الناس صارت بعيدة عن بعضها حتى وهي ساكنة بنفس البناية. البيوت مليانة أغراض ما تستعمل تكدس بالدواليب، وبنفس الوقت أكو عوائل تتحرج تطلب أو ما تكدر تشتري. الجار صار ما يعرف اللي بجنبه، والثقة بين الناس صارت قليلة.

لذلك سويت "لمّة". تطبيق يرجع هاي الروح بثوب عصري. مكان يخلي الجار يلكي جاره، يشارك اللي عنده زايد، ويلكي اللي يحتاجه بدون حرج. مو بس تطبيق لتبادل الأغراض، هو محاولة نرجع فيها شي خسرناه: اللمّة.