اشيضرّك من تجي آسويعه
ولو جيّه بوجه زعلان

#عبدالكريم_القصاب


َ

يلغايب بروحي ومدري يمته تعود


انه بلياك لا سلة ولا عنكود




#عبدالكريم_القصاب

يل رحت من جم سنه

................شـو مــــا رحـت كلّك ؟

ويّــــاك كل شي خذت

................بس مـــــــا خذت ظلّك






#عبدالكريم_القصاب

لا يكَلبي
خاف فد يوم ويجون

دير بالك تنطي بيّه
لا تدك الهم مثل ما يشتهون



#عبدالكريم_القصاب

وين آلكَه جتف حتى آبجي وآرتاح ؟


بيّه آدمـــــــــــوع تكسر خاطر الله





#عبدالكريم_القصاب

ناس حتى آكَماط آبنها

آتشوفه عيب

وناس تنكَاد بحبل من روسها




#لـ عبد الكريم القصآب

فــدوه يا ليلي .... تعال
نــوب وحــدك

لا تجيــب طيوفهـم
خلنــي نايـم مالـي عيـن تشـــوفهــم



#عبدالكريم_القصاب

مامش سالفه اتكَصّرعباة الليل




#عبدالكريم_القصاب

اوداعتك كلّش نسيتك

اِلّا بلبل ظال من صوتك بروحي من

أسمعنّه بصفنتي

كلشي بيّه آيكَول آجيتك


#عبدالكريم_القصاب

ليش كل هذا البجي

وما خضّر كَرنفل ترابي ؟



#عبدالكريم_القصاب

يا فرحتي ، ولا طاري منك .
جاس كَلبي الليله .
أفّيش ، كلّش ريّعت .
الليله جم شباج عالجنه آنفتح ،
وكَلبي بمراجيح الله شابع نوم
والله براحتي آمخليني .




#عبدالكريم_القصاب

لا تجيني
لا بيقظه و لا طيوف
لا تجي ، لا ينز جرحي
جرحي مو أعمه ، يشوف

#عبدالكريم_القصاب

........ ليلة شذر .........

واهس وليله آمزركشه ،

والشذر رصّع عيني .

ليلة شذر معلوك وبرودة هوه ..

ونسيانك آمدفيني .

ليلة الما بيها جرس ...

دخان ما مش بيها ...

ولا خنكَه التبجّيني .

لو هيجي لو مو ليله .

شلّي بمناديل الدمع ؟

شلّي بأصابع ما يوجّن لي شمع ؟

شذره على فراش الدفو ...

ونجمه آبسما تكفيني .

يا فرحتي ، ولا طاري منك .....

جاس كَلبي الليله .

أفّيش ، كلّش ريّعت .

الليله جم شباج عالجنه آنفتح ،

وكَلبي بمراجيح الله شابع نوم ...

والله براحتي آمخليني .

اشكَد ورد يتعطر بروحي غنج ...

وآمنعّس آيشهّيني

اشكَد فراش آيحط عليْ ...

ويشمني ويغطيني

كلها وتريد آتذكّرك ،

وآتزاعل آنا وألله ،

وآنكر البينه وبيني !!

لا بويه شموازيني .

#عبدالكريم_القصاب

تسيل آنفاسك بروحي

خدر عذري

خدر مدري شني طعمه

وبعد ما آكَول

بعد بيه حجي وما آكَول

بعد هلكَد حجي

وما آكَول

لأنـك بالحجي تدري .






#لـ عبد الكريم القصآب

بلجي تندم
بلجي تزعل على السراب
بلجي بخيوط الضوه أيلاگيك وجهي
و تستحي من ادموع عيني


#عبدالكريم_القصاب

اسم الله آعلى العراق الخاصرة الحرة
اسم الله آعلى النثايه وعفّة الدرة
وعلى اليمّه ودللّول
وعلى آطويراتنا الكَمرة
بعد ، وآسم الله عالبرحيّه ذيج الزاجيه النخله
وكَصايبها
وگصايب كل حبايبها




#عبدالكريم_القصاب

هلاهل للشمس والگاع


اِجت
ها ذيچ هيه الشمس ، علْو أذراع
تلگوها بهلاهل تفگة نشمية
بطت ، مستحية عرگانة
نشفوها بشطافيكم
اِجت شگره الضفاير والمتون الكَاع
عفيه آزلام ماي العاصية ، والدهله والنعناع ،

ندهتوها
واجتكم بالذهب كلّه
اِجتكم بالذهب كلّه تحنّي الگاع ،
يل دمكم رفيفه شراع ،
بعدها بأول المركاض ، تصهل خيلكم نشطه
وندهتوها ذهب عرگان
وبعد بيكم وهج غيره اليعلّيها
وتوگف عدل فوگ الراس
دمكم موش حالوب اعلى صفنه وماع .
دمكم مهره حمره تفوج فوگ الفوگ
وتجيب الشمس للگاع
دمكم بالشمس طمّاع
دمكم حار كلّش ، يشلع الزنجار
وبيارغكم بعد شبرين من ألله
بيارغكم هلاهل تنده الغبشه ، وتطم العار .

يا لب الحچي والساس والنوماس ،
مابيكم سبوس الباع روحه بخردة للوصخين
تعرفون الدرب ، والعثره وين تصير ،
آووين آيوكّر الهدهد ، ومجان الذيب والخنزير.
وتْعرفون
ياهو من البيارغ ينشره وينباع.

لذيذه آحرورة البيكم
آشكثر من ساسكم بيكم!
جمر غيرة وتتن حار وعتابه بطور عگار
وغنه آجنوبي
ونة لياويل ويلي اليشلع الصرّة
اليحلّي الگهْوَة المرّة .

اِيخسون الماعليهم لون حنطتكم
غريب الما آمهفيه بوجهه سعفتكم
غربه الماتبچّيهم نعاوي آمكم
المادگت بذنهم رنّة الفنجان
غريب الما آتسكره بحّة دويخل
ولاسوده آشلهاني بحنجرة مسعود ،
ولانخل السماوه وشاتل العودين
يادخانكم جرّة كحل للعين

هايسباع ،
اِيخسون الجاسوا آگذل من حرايركم
ايخسون الوذّنوا حيله بمنايركم
اِيخسون اللطخوا بالدم
فراشات ومراجيح وخبز فقرة
اِيخسه الباگ ، بأسم الله صرايركم
اِتخسه ذيج اللحايا الما تعرْف الله ،
وذاك التبّت اِيده الفكَس عين العيد ،
وحمّال الحطب واليضحك آمن آبعيد .
ايخسون آرحامهم نجسة .

هايسباع ، غُطّوهم ظهر الآحمر
الحراميه تفكَهم ورگ صفصافه
ايخسون آرحامهم نجسة
التفك من دونكم خرسة
غطّوهم ظهر لآحمر
ذوله آكشاش مَدّه وروجكم يصهل
ها يزلامنا آسم الله آعلى صافيكم
ها يزلامنا آسم الله آعلى عاليكم
بعدكم للنجم نيشان.

اسم الله آعلى العراق الخاصرة الحرة
اسم الله آعلى النثايه وعفّة الدرة
وعلى اليمّه ودللّول
وعلى آطويراتنا الكَمرة
بعد ، وآسم الله عالبرحيّه ذيج الزاجيه النخله
وكَصايبها
وگصايب كل حبايبها .

يا ولْد الشمس والماي ،
بعدها آخيولكم نشطه
وندهتوها ذهب عرگان
اجت ،
ها ، ذيج هيه الشس علْو آذراع.
وبعد تعله وبعد تعله ،
لمن توكَف عدل عالراس
لمن تصبح سنابلكم ضفاير نور
الجراد آيدوخ بيها وما يجد لزمه .

وآعاهدكم الحب يعود ،
أعاهدكم الراح يعود ،
أعاهدكم
يرد الله الصدك لمخاوي صفنتنه.
ومصيبتنه وصريفتنه
أعاهدكم ، يرد يونس لمحرابه ،
وصليب الهاجر بروحه وشرف سنجار ،
ويرد ميمر الجوبي وفر جفافيّه ،
وهلا وميّة هلا وميّه
وحمس كَهوه آعلى نايل حار ،
وترد بغداد باكر ، سورها آسم الله ،
وتراجيها النجوم وثوبها اللبلاب
بآصابعها تحنّي الباب ،
وتْمد من عشبها آبساط ، للغيّاب
وحمس كَهوه ومقام آوشار ،
و( هلا ويا نور عيني ويا هليّه ) ،
وترد دجله وفرات العافيه آذراعين
شبكَة ملگه فوگ الكَاع
شبكَة ملكَه موش آوداع
ويرد الطير والخير وأمان الله ،
والهور ومشاحيفه وغراريفه
وزوافيفه وسواليفه ،
ويرد البنّي والكَطان والشبوط ،
ويرد شط العرب بوسة ثلاث آشطوط .





#عبدالكريم_القصاب

................... حاسدني ......................

حـاسدني عليمـن ؟ أنـا آبدنيـــاي

.................لا سـن الضـحــك ، لابـال صـافــي

سِـبّاح آبشمـس ، ماشـابع آفيــاي

..................مـن طولــك ، ولا بيديــك غـافـــي

عود آتمـن عليْ جي رايـح وجاي

................. مــــن يمّــي وتــوجّـجني قــوافـــي !؟

صغـت لجلك كَلايد شعر شجّـــاي

................. وتراجي لاِذن طرشـه وما تـوافـــي

تمـر طايـر ولا جن تسـمع آنـــداي

.................. محـطـــات أنتظــاراتـي منـــافـــي

دقـو كَــعدة آمســـامر طبّي ودواي

.................. الهوى آمـن آبعيد يكتل مـا يشافـــي

دخــت ماحصـّـلت لاذيـج لا هــاي

.................. لا تـقبـل تواصـــــل ، لا تجــافــــي

دافي آبماي حسنك ، وانا بالـــــداي

................... بحــــرورة حسرتي آعليك دافـــــي

يجف كاسي بدَيْ مـــن لهبة آحشاي

................... ويظل بس جـام مـن يوصل آشفافي

أنا آمساهـر وناطـر كَيظي وشتــاي

................... وآنت آتفـز ضحى ونومـك عوافي

كـون البيّـه بيــك ، وتكَعـد آويــــاي

......... .......... جـا كَمْـت وبسـتـني وكَتلي كافــي

فرق بين اليحط آجدامـــــه بالمــــاي

..................... وبين اللي يدوس الجمــر حافـــي


#عبدالكريم_القصاب

تمر طاير ولا جن تسمع انداي



#عبدالكريم_القصاب

شيب الكَصايب حزن آبيض


،
#لـ عبد الكريم القصآب