لو تلاقينا حتشوفلي بنفس نظرة قبل ، ولا نظرتك تغيرت ؟

لو تعبت وجيتك ، حتحتويني زي قبل ، ولا حتردني فارغه ؟

و زعما قاعد تفكر فيا زي قبل ، ولا تفكيرك شغله حد تاني ؟

قاعد قبل ما ترقد ، تذكر في وصياتي ليك ، ولا بديت ترقد طول ؟

تعرف نضت اليوم نبكي ؟
حلمت بيك !
معش مفارقني حتى في نومي ! ، لهدرجة بديت مهووسه بيك ؟
به مش يقولو لما تحلم بحد معناها هوا مستاحشك هلبا ! ، انت مستاحشني .؟
مش يقولو لما تحلم بحد تحبه معناها ، هوا يبي يكلمك لاكن يكابر ! ، انت قاعد تكابر ؟
تعرف من الي نفتح عيوني لن نسكرهم واني نفكر فيك ؟
نفكر في كلامك ، في تصرفاتك قبل ، في كل شيء كان بينا !
مش يقولو لما تفكر بحد هلبا معناها حتى هوا يفكر فيك ! ، تفكر فيا ؟
تعرف محادثتنا حفظتها ! ، من كثر ما نقرأ فاها ؟
حفظت كل كلمة فاها ، و المحادثة حفظت دموعي من كثر ما بكيت علاها !
ملامح وجهك من كثر ما نشوف لصورك ! ، نقدر نرسمهم و اني مغمضه عيوني !
تعرف اني لما نسرح نفكر فيك ، ولما نفكر فيك نسرح !
مش يقولوا الانسان يقدر ينسى مع الوقت ؟
خيرني ما نسيتش !
لهدرجة انت خشيت قلبي !
لدرجة حتى اسمك يخليني نرععش !
اني ذابلة ، و مرهقة وتعبانة ، ومش قادرة ندير شيء في غيابك !
زعما انت تضايق ع خاطري ؟ ، ولا خلاص نسيتني !
قلبك يعصرك لما تسمع اسمي ، وعاقلك ياخدك لي ايامنا ، و لا خلاص محيتني من بالك .

أسممع !
نختصر عليك !
‏" نبي نقولك و نحكيلك ع كلشيء نمر بيه ، نبي نقولك اني نحبك ! ، و أن الوقت الي يمر بدونك و انت مش جنبي فيه ماليشي معنى، و أنك هني مستقر فيا وبين ضلوعي و روحي و في وسط قلبي ، نبي نقولك ع كل شيء يخطر في بالي و بدون خوف و بدون ما نفكر في الي حيصير بعدين !
اني منعرفش شيء ، و مانبيش نعرف شيء من الدنيا ! ، غير انت و حُبك انت 💛!
اما كلامك وتصرفاتك مهما كانت توجع ، و مهما كانت تحرق فيا ، ننسى فاها و منفكرش فاها
اني منذكرش الا في كلامك الي يريح في قلبي ، و أيامنا الحلوة مع بعض ،
وكل تفصيل صغير فيك و مهما كان عادي اني نحبه و نشوف فيه مُلفت !
نحبك و متأكده ان لو ادور الدنيا كلها ، بلاد بلاد ، مش حتلقى حد يحبك زي حبي ليك !
مانبيش منك شيء غير تنسى ، كل مشكله و كل موضوع خلاك تبعد عليا !
و تعطيني إيدك من جديد !
وخلينا نكملوا !
لان العمر بدونك ماليشي طعمة ، يا عمري 🖤.
و حياتي لو مكنتش فاها أنت منعتبرش فاها حياة 🖤.
نبيك تعرف وتتأكد أن حبي ليك يزيد مع كل يوم جديد 🖤.
نحبك 🖤.
ـ

الصحبة مش بأنك ، اتاجري بأسرار صاحبتك !
وبأنك تفتحي حياتها للضحك لما معش تلقي شن تهدرزي مع جماعتك !
و مش بأنك تبدي تتكلمي ع حاجات قدام الناس ع صاحبتك بش اضحكيهم !
انتي هكي مش صاحبة ،!
انتي هكي انسانه تافها هلبا

أني مشوشة !
مشوشة بشكل غريب !
مش قادرة نركز في شيء !
حاسه روحي نفكر في الماضي بشكل كبير اليومين هاذو !
و حانه للماضي و لي ناسه ،
الشعور غريب وملخبط !
الشعور يشبه انك تحاول تمشي في طريق ماليهاش نهاية .

حنقعد جنبك في الأيام السيئه قبل الحلوة و حتحكيلي على كل المشاكل الي تصيرلك و على كل الخراب الي حيحيط بيك ، و على كل الهموم الي حتواجهك ، و اني حنسمعلك ، و نوقف معاك🖤.

بديت كل يوم نكتشف في ثقب جديد في قلبي .

"تعرف هاذي اول مرة نحس فاها بأن اسمك غريب عليا ، اسم لا يعنيني ولا يخصني مش زي ما كان"

عن شعورك لما تبدأ في وسط الزحمة ، و جنبك هلبا ناس ، لاكن انت بروحك رغم كل شيء !
عندك حاجه في قلبك شاداتك ع كل شيء !
تحس روحك ، ماعندك حد قادر يخفف عليك !
تحس روحك ماتشبهه حد من الناس الي حايطه بيك كلها !
ديما تحس ان في حاجه غلط فيك ، تحس انك خلاص معش قادر تكمل!
وتعبان من كلشيء!
توصل لدرجة ان تراودك فكرة انك تمشي وتخلي كل شيء وراك بدون ما يهمك شيء،
تمشي بس ، مش مهم لوين ، المهم عندك انك تمشي و ترتاح من كلشيء .

اني توجع فيا الخدوش الي تحسبوها خفيفة !
الجروح الصغيره الي متنشافش لاكن توجع القلب .

مرات تبدأ ماتبي شيء من الدنيا!
غير انك تطلع منها .

اني محتاجه شيء واحد !
محتاجه نلقى حد يهتمم يعرف كيف يتعامل مع نقاط ضعفي.

أكثر إنسانة تضحك قدامهم ، وأكثر إنسانة تبكي بروحها.

أكثر إنسانه توقف مع الكل ، لاكن معمرها لقت حد واقف معاها .

خاطري يوم نحسس بنفس الفرحه الي يحسوا باها كلهم !
مرات تجيني اوقات نقول علاش اني ياربي !
نحس كأن غالطة في حاجه وربي يعاقب فيا علاها !
خاطري يوم نفرح بدون ما ي
كون قلبي مقهور من حاجه !
اني تعبتتت ، معش نقدر ونمثل أكثر منن هكي .

مافيش شيء يستمر معاي لفتره طويلة ، ديما كنت نمشي ونخلي في كل شيء الي نحبه ، والي نكرها ، الي نبيه ،و الي مانبيشي ، قضيت عمري كله وأني نحس ان لازم نمشي .....

تعرفوا فيا وجع !
مش زي اي وجع !
وجع من نوع تاني ،
نخاف ان نحكي ولا نقوله لاني نخاف نشوف نظرة الشفقه في عيونهم واني نحكي فيه !
وجع يخصني بروحي ، ويحرق فيا بروحي ، ويقتل فيا بروحي .

نستنى !
نوقف كل يوم في نفس المكان الي نبكي فيه في كل مرة واني نستنى !
نستنى تصير حاجه و لو بسيطه تغير من حياتي !
نستنى يصير اي تغير يفرحني !
نستنى ع امل ان حتصير حاجه !
وفي كل مره مكانش يصير شيء غير اني نرجع بنفس الصداع الي ياكل في راسي !
وبالنفس الضيقه يلي يتاكل في قلبي !
وبش انوض في اليوم الي بعده ونعاود نفس الشيء ، ونستنى .