បន្ទាយមានជ័យ ថ្ងៃទី២១ ខែសីហា ឆ្នាំ២០២៥.៖ ក្រោមកិច្ចសហការនិងការគាំទ្រពីសហគ្រិនខ្មែរ សាកលវិទ្យាល័យជាតិមានជ័យបានរៀបចំកម្មវិធីរូអាជីវកម្មនិស្សិតនៃកម្មវិធីសហគ្រិនមហាវិទ្យាល័យ រដូវកាលទី៣នាថ្ងៃទី២១ ខែសីហា ឆ្នាំ២០២៥នេះ ក្រោមវត្តមានដ៏ខ្ពង់ខ្ពស់ ឯកឧត្តម ជា សឿន សាកលវិទ្យាធិការ នៃសាកលវិទ្យាល័យជាតិមានជ័យ និង មានគណៈកម្មការវាយតម្លៃពី មន្ទីរពាណិជ្ជកម្មខេត្ត សមាគមសហគ្រិនវ័យក្មេងខេត្តបន្ទាយមានជ័យ គណៈគ្រប់គ្រង សាស្ត្រាចារ្យ ក្រុមនិស្សិតបេក្ខជននិស្សិតប្រមាណ ៣០ នាក់និងអ្នកចូលរួមទាំងអស់ សរុបប្រមាណ១៥០នាក់។
កម្មវិធីប្រកួតប្រជែងគំរូអាជីវកម្មនេះ រៀបចំកម្មវិធីបណ្តុះបណ្តាលរយៈពេល ៤ ថ្ងៃ សម្រាប់ផ្តល់ ចំណេះដឹងនិងគំនិតច្នៃប្រឌិតផ្សេងៗអោយមានគំនិត សហគ្រិនភាពនិងបានជម្រុញដល់និស្សិតអោយ មានការរៀបចំគំរូអាជីវកម្មថ្មី និងទទួលការរៀនសូត្របន្ថែមពីគ្រូបង្វឹករបស់ យើងទាក់ទងការរៀប ចំផែនការអាជីវកម្ម និងការផលិតផលគម្រូលើវិស័យកសិកម្ម និងបច្ចេកវិទ្យា។
ឯកឧត្តម ជា សឿនសាកលវិទ្យាធិការ នៃសាកលវិទ្យាល័យជាតិមានជ័យ បានមានប្រសាសន៍ថា សាកលវិទ្យាល័យជាតិមានជ័យមិនត្រឹមតែផ្តោតទៅ លើការបង្រៀន និងការស្រាវជ្រាវប៉ុណ្ណោះទេ សាកលវិទ្យាល័យក៍មានបេសកម្មតម្រង់ទិស និងអភិវឌ្ឍន៍សមត្ថភាពស្រាវជ្រាវដោយផ្សារភ្ជាប់ជាមួយ ឧស្សាហកម្មដើម្បីចូលរួមចំណែកក្នុងការអភិវឌ្ឍសេដ្ឋកិច្ចក្នុងខេត្តបន្ទាយមានជ័យ និងខេត្តជាប់ព្រំ ប្រទល់ផងដែរ។
លោកបន្ថែមថា កម្មវិធីនេះគឺជាផ្នែកមួយរបស់កម្មវិធីសហគ្រិនមហាវិទ្យាល័យ(UniPreneur) ដែល បង្កើតឡើងក្នុងគោលបំណងលើកកម្ពស់ នវានុវត្តភាពនិងសហគ្រិនភាព ទៅកាន់និស្សិតដោយ ប្រែក្លាយគំនិតច្នៃប្រឌិតរបស់និស្សិតឱ្យក្លាយទៅជាផលិតផលឬសេវាកម្ម ដែលអាចដោះស្រាយ បញ្ហាប្រឈមប្រចាំថ្ងៃរបស់ប្រជាជន វិស័យសាធារណៈនិងវិស័យឯកជនជាដើម។
ជាលទ្ធផលក្រុមជ័យលាភី៖
- លេខ១៖ក្រុមប៉ាតេភូមិខ្មុំ>>គម្រូអាជីវកម្ម ប៉ាតេសាច់មាន់ ទទួលបានទឹកប្រាក់៣,៦០០,០០០រៀល
- លេខ២៖ក្រុមTARO Coffee >>គម្រូអាជីវកម្ម កាហ្វេត្រាវ ទទួលបានទឹកប្រាក់២,៨០០,០០០រៀល
- លេខ៣៖ក្រុមE-Farmer>>គម្រូអាជីវកម្ម Ecomii-សាប៊ូដំឡូងមី ទទួលបានទឹកប្រាក់២,០០០,០០០រៀល
ក្រុមនិស្សិតឆ្នើមដែលទទួលបានជ័យលាភី នឹងមានឱកាសទៅចូលរួមក្នុងកម្មវិធីបណ្តុះគំនិតធុរកិច្ចថ្មី UnipreneurCamp រយៈពេល៣ថ្ងៃ ពីថ្ងៃទី១២ រហូត ដល់ ថ្ងៃទី១៤ ខែកញ្ញា ឆ្នាំ២០២៥ នៅសាកលវិទ្យាល័យជាតិមានជ័យ ក្នុងចំណោមនិស្សិតសាកលវិទ្យាល័យផ្សេងៗទៀតប្រមាណ៣០០ នាក់៕