10-12 апрель көннәрендә Батыр муниципаль округы Кызыл Чишмә авылында урнашкан «Сәләт Батыр» яшьләр иҗтимагый үзәгендә II Бөтенроссия «Татар теле — халкым теле» иҗади конкурс һәм семинары үтте. Бирегә илебезнең Свердлау, Астрахань өлкәләреннән, Чуашстан һәм Татарстан республикаларының күп кенә мәктәпләреннән укытучылар җыелды. Конкурс бик үзенчәлекле булды. Монда төрле фәннәрне татар телендә укытучы мөгәллимнәр көч сынашты. Экспертлар 150 дән артык эш карап чыктылар, ә иң яхшы дип тапканнарын "Сәләт-Батырга" җыйдылар. Укытучылар тәҗрибә белән уртаклаштылар, түгәрәк өстәлләрдә һам һөнәри остахәнәләрдә катнаштылар. Дәресләр карап, экспертлардан киңәш - табыш алып,анализларын тыңлап, саллы фикерләр ишетү - һәрбер укытучы өчен бик кыйммәтле бүләк булды. Туган телдә дәресләрне замана таләпләренә буйсындырып үтемле итәргә зур этәргеч, профессиональ чыныгу һәм үсеш тә. «Татар теле халкым теле» семинарында экспертлар үз чыгышларын тәкъдим иттеләр, мөгаллимнәр тәҗрибәләре белән бүлештеләр, милли мәгариф темасына карата фикер алыштылар.
Конкурс - семинарын ябу тантанасында Батыр муниципаль округы башлыгы вазыйфасын вакытлыча башкаручы Равил Фәрәхетдин улы Ямалетдинов, Чуашстан Республикасы Диния нәзәрате рәисе Мансур хәзрәт Мәкъсут улы, Татарстан төбәк " Сәләт" яшьләр фонды генераль директоры Лениза Миннехәләф кызы, хезмәт ветераны Шакуров Тальгат абый, Чувашстан татарлары милли- мәдәни берләшмәсе әгьзалары Райлә Мәгьсум кызы, Гөлнур Нурулла кызы катнаштылар. Конкурста җиңүчеләргә котлау сүзләре яңгырады, истәлекле һәм кыйммәтле бүләкләр тапшырылды. Бу конкурс - семинарда җиңелүче булмады. Чөнки һәрбер катнашкан укытучы һәм укучы иң кыйммәтле бүләкләр: белем, тәҗрибә, ихлас аралашу, сәлкешләр дәрте, матур истәлекләр алдылар. Татар телен белгән, тарихын өйрәнгән, саклаган һәм татар булуы белән горурланган укытучылар - милләтебез хәзинәсе.
Тыныч илебездә - җиребездә милләтпәрвәр укытучылар һәм сәләтле укучылар булганда туган телебез гомерле булыр.