Иң тылсымлы, иң көтеп алынган һәм бөтен кешенең дә яраткан бәйрәме – Яңа ел якынлаша! Яңа ел - искиткеч вакыт. Бу әкият һәм өметләр вакыты. Һәр  кеше балачактан Яңа елны ничек каршы аласың, киләсе елны да шулай үткәрәсең дип ихлас күңелдән ышана.
Яңа ел бәйрәме – балачакка әйләнеп кайтыр өчен иң яхшы вакыт! 
24 нче декабрьдә В.Давыдов-Анатри исемендәге гаилә укуы китапханәсендә «Бәйрәм өстәле артында» фольклор-уен программасы үткәрелде. "Туган тел" халык традицияләре клубы активистлары яхшы кәеф белән уку залында җыелды. Бәйрәм башланыр алдыннан Яңа Чабаксар шәһәре татарлары автономиясе рәисе Минкадир Резяпов үз халкыңның телен, гореф-гадәтләрен һәм мәдәниятен саклауның һәм аларны үз нәселеңә тапшыруның мөһимлеген билгеләп үтте, катнашучыларны якынлашып килүче Яңа ел белән котлады, бүләкләр тапшырды. Программада җырлар, кызык табышмаклар, конкурслар, Кыш бабайдан матур сүз һәм гадәттәгечә бәйрәм чәй өстәле иде. Уку залында татар җырлары, татар милли бию көе яңгырады. Кыш бабай белән чыршы янында әйлән-бәйлән уйнау да, матур шигырьләр дә булды. Вакыт сизелми үтеп китте.
Мондый чараларда катнашу татар халкының гореф-гадәтләрен саклап калырга, халык бәйрәмнәренең, татар телен, моңын, биюенең бөтен ямен онытмаска мөмкинлек бирә.
Яңа Чабаксар татарлары исеменнән киләсе Яңа ел белән котлыйм. Бәйрәмегез мөбарәк, күңелле, куанычлы булсын. Эшләрегез уң булсын, чәчәк атсын, күңелегездәге мәрхәмәтлелек нуры җаныгызны тагын да ягымлы, матур итсен, ялкынландырып бизәсен. Бусагаларыгыздан караңгылык, хәвеф-хәтәр атлап кермәсен, бәла-каза йөрмәсен. Гаилә бәхетегез сүнмичә балкып торсын. Алды көннәрдә дә бергә булып, бердәм булып ,татар моңын һәм телен саклап, тыныч тормышта яшәргә насыйп итсен иде.
Гөлнар Калакова.