နမ်းစန်မြို့တွင် ရေကြီးရေလျှံ ချောင်းဘေးနေထိုင်သည့် ရေဘေးသင့်သူများကိုဘေးလွတ်ရာရွှေ့ပြောင်းပေး
NOM၊စက်တင်ဘာ၅၊၂၀၂၆
ရှမ်းပြည်နယ်၊ နမ့်စန်မြို့တွင် မိုးသည်းထန်စွာရွာသွန်းမှုကြောင့် စက်တင်ဘာ ၅ ရက်နံနက် ၈ နာရီခန့်မှစ တင်ကာ နမ့်လတ်ချောင်းရေမြင့်တက်ခဲ့ကြောင်း သိရသည်။
ထိုသို့ နမ့်လတ်ချောင်းရေမြင့်တက်မှုကြောင့် ချောင်းဘေးရှိ အမှတ်(၁)၊ (၃)၊ (၄)ရပ်ကွက်တို့ရှိနေအိမ်များအတွင်းသို့ ရေဝင်ရောက်မှုဖြစ်ပေါ်ခဲ့သဖြင့် ရေဘေးသင့်သူများအား မီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများက ရေဘေးလွတ်ကင်းရာသို့ကူညီရွှေ့ပြောင်းပေးခဲ့ကြကြောင်း သိရသည်။

ကျွန်းလှမြို့နယ်တွင် PDF အကြမ်းဖက်အဖွဲ့ထောင်ထားသည့် လက်လုပ်မိုင်းတစ်လုံးပေါက်ကွဲမှုကြောင့် နွားကျောင်းနေသည့် အပြစ်မဲ့အရပ်သားပြည်သူတစ်ဦး ထိခိုက်ဒဏ်ရာရ

NOM စက်တင်ဘာ ၆၊ ၂၀၂၆

စစ်ကိုင်းတိုင်းဒေသကြီး၊ ကန့်ဘလူမြို့နယ်ရှိ ကန့်ဘလူမြို့ (ခုတင်-၁၀၀) ပြည်သူ့ဆေးရုံသို့ စက်တင်ဘာလ ၄ ရက်နေ့ မွန်းလွဲ ၂ နာရီ ၅၀ မိနစ်အချိန်၌ မိုင်းပေါက်ကွဲစထိမှန်ဒဏ်ရာဖြင့် အမျိုးသားတစ်ဦးရောက်ရှိနေကြောင်း သတင်းအရ လုံခြုံရေး တပ်ဖွဲ့ဝင်များက သွားရောက်စစ်ဆေး၍ဖြစ်စဉ်အား စိစစ်ခဲ့ရာ နံနက် ၁၁ နာရီ ၄၀ မိနစ်တွင် ကျွန်းလှမြို့နယ်၊ ပိတောက်မြိုင်ရပ်ကွက်နေ ဦးကျော်စိုး (၆၁) နှစ်သည် အဆိုပါရပ်ကွက်ရှိ ဘိုးယားဆည်အနီး၌ နွားကျောင်းနေစဉ် PDF အကြမ်းဖက်အဖွဲ့ထောင်ထားသည့် လက်လုပ်မိုင်းတစ်လုံးအား နင်းမိပေါက်ကွဲခဲ့မှုကြောင့် ၎င်းတွင် ထိခိုက်ဒဏ်ရာများရရှိခဲ့ခြင်း ဖြစ်ကြောင်းသိရသည်။

NOM

ကျောက်ဆည်မြို့နယ်၊ ဇော်ဂျီမြစ်အတွင်း အမျိုးသားနှစ်ဦးရေဆင်းကူးရာ တစ်ဦးရေနစ်သေဆုံး

NOM စက်တင်ဘာ ၆၊ ၂၀၂၆

မန္တလေးတိုင်းဒေသကြီး၊ ကျောက်ဆည်မြို့နယ်၊ ဇော်ဂျီမြစ်အတွင်းယမန်နေ့ စက်တင်ဘာ ၅ ရက်မွန်းလွဲ ၂ နာရီခန့်က အမျိုးသားနှစ်ဦးရေဆင်းကူးရာ တစ်ဦးရေနစ်​သေဆုံးခဲ့ကြောင်း မြန်မာနိုင်ငံ လူမှုကယ်ဆယ်ရေး (ကျောက်ဆည်) အဖွဲ့မှတာဝန်ရှိသူတစ်ဦးကပြောသည်။

ဖြစ်စဥ်မှာ ကူမဲမြို့ကွက်သစ်ရပ်ကွက်တွင် နေထိုင်သည့် အသက် ၂၂ နှစ်ခန့်ရှိ အမျိုးသားနှစ်ဦးသည် အလည်လာပြီး ကျောက်ဆည်မြို့နယ်၊ ဇော်ဂျီမြစ်အတွင်း ရေဆင်းကူးရာမှ တစ်ဦးရေနစ်သေဆုံးခဲ့ခြင်းဖြစ်သည်။

ရေဆင်းကူးရာမှ ရေနစ်ပျောက်ဆုံးနေကြောင်း သတင်းရရှိသဖြင့် ကျောက်ဆည်မြို့နယ် မီးသတ်စခန်းမှ မီးသတ်တပ်ဖွဲ့ဝင်များနှင့် မြန်မာနိုင်ငံ လူမှုကယ်ဆယ်ရေးကျောက်ဆည်အဖွဲ့တို့ ပူးပေါင်း၍ ရှာဖွေရေးလုပ်ငန်းများ ဆောင်ရွက်ခဲ့ပြီး သေဆုံးသူအား မြန်မာနိုင်ငံလူမှုကယ်ဆယ်ရေး
ကျောက်ဆည်အဖွဲ့မှ ကျောက်ဆည် မြို့ ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်းသိရသည်။

NOM

ရန်ကုန်-နေပြည်တော် ရထားလမ်းပိုင်းတွင် ပြေးဆွဲပေးနေသည့် အမှတ် (၈) အစုန် ရထားခဲဖြင့်ပစ်ပေါက်ခံရ

NOM စက်တင်ဘာ ၆၊ ၂၀၂၆

ရန်ကုန်-နေပြည်တော် ရထားလမ်းပိုင်းတွင် ပြေးဆွဲပေးနေသည့် အမှတ် (၈) အစုန် နေပြည်တော်-ရန်ကုန် DEMU လူစီးအမြန်ရထားတွဲအားစက်တင်ဘာ ၄ ရက် ညနေပိုင်းတွင် ခဲဖြင့်ပစ်ပေါက်ခံရသဖြင့် ရထားတွဲ၏ လေကာမှန် ပျက်စီးသွားခဲ့ကြောင်း မြန်မာ့မီးရထားမှ သတင်းထုတ်ပြန်ထားသည်။

အမှတ် (၈) အစုန် DEMU ရထားသည် ရန်ကုန်ဘူတာကြီးသို့ ခရီးဆုံးရောက်ရှိပြီးနောက် ရထားတွဲဆိုင်းအား သိမ်းဆည်းရန် စက်ခေါင်းစက်ရုံ (အင်းစိန်) သို့ ထွက်ခွာမောင်းနှင်စဉ် လမ်းညာဘက်ခြမ်းမှ ခဲဖြင့် ပစ်ပေါက်ခံရသည့်အတွက်ရထားတွဲဆိုင်း၏ ဒုတိယတွဲဖြစ်သည့် ပထမတန်း DEMU F-4030 တွဲ၊ ခုံအမှတ် 3A၊ 3B နှင့် 4A၊ 4B အကြားရှိ ပြတင်းပေါက်ဘေး လေကာမှန်မှာ ၂ လက်မခန့် ပေါက်ထွက်သွားပြီး မှန်များ ကြေမွကွဲအက်ခဲ့ကြောင်း သိရသည်။

ထိုသို့ဖြစ်ပွားချိန်တွင် အမှတ် (၈) အစုန်ရထားမှာ ခရီးဆုံးဘူတာသို့ ရောက်ရှိပြီး ရထားသိမ်းဆည်းရန် မိခင်စက်ရုံသို့ ဆက်လက်ထွက်ခွာနေခြင်းဖြစ်သဖြင့် ရထားပေါ်တွင်စက် ခေါင်းမောင်းနှင့် စက်မှုစက်ပြင်အဖွဲ့သာပါရှိခဲ့သောကြောင့်ခဲဖြင့်ပစ်ပေါက်ခံရသည့် ဖြစ်စဉ်ကို စက်ခေါင်းစက်ရုံ (အင်းစိန်) သို့ ရောက်ရှိချိန်မှသာ သိရှိခဲ့ခြင်းဖြစ်ပြီး ကျူးလွန်သူ ဖမ်းဆီးရမိရေးနှင့် ဥပဒေအရ အရေးယူနိုင်ရေးအတွက် အင်းစိန်နယ်မြေရဲစခန်းတွင် အမှုဖွင့်၍ ဆောင်ရွက်နေကြောင်း မြန်မာ့မီးရထားမှ သိရသည်။

ရထားပို့ဆောင်ရေးလုပ်ငန်း ဥပဒေ၊ အခန်း ၁၈၊ ပုဒ်မ ၇၉ (ခ) အရ ရထားကို တစ်စုံတစ်ရာဖြင့် ပစ်ပေါက်ခြင်း သို့မဟုတ် တစ်စုံတစ်ရာပြုလုပ်ခြင်းအတွက် ပြစ်ဒဏ်အနေဖြင့် ပုဒ်မ (၈၄) အရ ထိုသူကို အနည်းဆုံး ၅ နှစ်မှ ၂၀ နှစ်အထိမပိုသော ထောင်ဒဏ်ချမှတ်ရမည့်အပြင် ငွေဒဏ်ကို လည်းချမှတ်နိုင်ကြောင်းသိရသည်။