မရမ်းကုန်း ဟော့ပေါ့ဆိုင်အား လုယက်သူလေးဦးကို နှစ်ရက်အတွင်းဖမ်းမိ

NOM စက်တင်ဘာ ၄၊ ၂၀၂၆

ရန်ကုန်တိုင်းဒေသကြီး၊ မရမ်းကုန်းမြို့နယ်၊ (၁) ရပ်ကွက်၊ အလောင်းဘုရားလမ်း၊အမှတ် (၁၅၆) တွင် ဖွင့်လှစ်ထားသော Mr.Daddy Hot Pot &Grill ဟော့ပေါ့ဆိုင်အား စက်တင်ဘာလ ၂ ရက် ည ၁၀: ၁၇ နာရီက ဝင်ရောက် လုယက်သူ လေးဦးကို ယနေ့စက်တင်ဘာလ ၄ ရက်နေ့လယ်တွင် ဖမ်းဆီးရမိကြောင်းသိရသည်။

ဖြစ်စဉ်မှာ အဆိုပါဟော့ပေါ့ဆိုင်သို့စက်တင်ဘာလ ၂ ရက် ညဆိုင်ပိတ်ရန်ပစ္စည်းများသိမ်းနေစဉ် mask တပ်ထားသော အမျိုးသားလေးဦးဆိုင်အတွင်းဝင်လာကာ ဆိုင်ဝန်ထမ်း မခိုင်ခင်မိုးအား ဓားဖြင့်ထောက်ပြီး ကျန်ဝန်ထမ်းများကို မီးဖိုအတွင်းသွားရောက်စေခဲ့သည်။

ထို့နောက်ကောင်တာတွင် ထိုင်နေသော ဆိုင်ပိုင်ရှင်ဒေါ်ဖြိုးဇာလတ်၏ ယာပါး၊ ယာရင်အုံ၊ ဘယ်ရင်အုံတို့ကို ဆန်ထိုးပိုက်ဖြင့်ထိုးပြီး ဆိုင်ရှင်၏ တယ်လီဖုန်းနှစ်လုံး၊ ဝန်ထမ်းတစ်ဦး၏ ဖုန်းတစ်လုံးနှင့် ဆိုင်ရှင်၏ပိုက်ဆံအိတ်ကိုလုယူထွက်ပြေးသွားသည်။

ဆိုင်ရှင်ဒေါ်ဖြိုးဇာလတ်၏ အမှုဖွင့်တိုင်တန်းချက်အရ ရဲတပ်ဖွဲ့က CCTV မှတ်တမ်းများကို လိုက်လံစစ်ဆေးရာမှ လုယက်မှုကျူးလွန်သူများသည် မရမ်းကုန်းမြ်ု့နယ်၊(၁) ရပ်ကွက်၊ ဘုရင့်နောင်လမ်းရှိသီတာရေစင်တည်းခိုခန်းတွင် တည်းခိုသူများဖြစ်ကြောင်းသိရှိရသဖြင့်အမည်များရယူပြီး ဆက်လက်ရှာဖွေခဲ့သည်။

ယနေ့ စက်တင်ဘာလ ၄ ရက်နေ့လယ် ၁၂:၁၀ နာရီတွင် ပြစ်မှုကျူးလွန်သူတစ်ဦးဖြစ်သော ဆိုင်မွန်စွန်ကျဲထန်းကို ရွှေပေါက္ကံမြို့သစ်ကျန်စစ်သားလမ်းတွင်လည်းကောင်း၊ ၁၂:၂၀ နာရီတွင် ခန့်လင်းထွဋ်နှင့် ထက်အောင်ကို ပုဂံလမ်းပေါ်တွင်လည်းကောင်း၊ အေးမျိုးကျော်ကိုအင်းစိန်မြို့နယ်၊ ရွာမအရှေ့ရပ်ကွက်၊ အောင်သိဒ္ဓိလမ်း၌ နေ့လယ် ၁၂:၂၅ နာရီတွင်လည်းကောင်းဖမ်းဆီးရမိခဲ့သည်။

တရားခံများက ငွေကြေးလိုအပ်ချက်ကြောင့် သီတာရေစင်တည်းခိုခန်းတွင်တိုင်ပင်ပြီး လုယက်ခဲ့ခြင်းဖြစ်ကြောင်း၊ ဆိုင်ရှင်ကိုဆန်ထိုးပိုက်ဖြင့်ထိုးသူမှာ ထက်အောင်ဖြစ်ကြောင်း ဖော်ထုတ်သိရှိပြီး ဆိုင်ဝန်ထမ်းထံမှ လုယူသွားသော ဖုန်းကိုပြန်လည်သိမ်းဆည်းရမိကာ ကျန်ဖုန်းနှစ်လုံးနှင့် လုယူသွားသောငွေများပြန်လည်ရရှိရေး ဆက်လက်စစ်ဆေးနေကြောင်းသိရသည်။

NOM

အိုမန်ပင်လယ်ကွေ့အတွင်းရှိ အမေရိကန်ရေတပ် စစ်သင်္ဘောများထံသို့ အီရန်က ခရုစ်ဒုံးကျည်များဦးတည်ပစ်ခတ်မှု ဖြစ်ပွားခဲ့သည်။

အမေရိကန်၏ လေယာဉ်တင်သင်္ဘော စစ်အုပ်စုက တုံ့ပြန်တိုက်ခိုက်မှုများ ပြုလုပ်မလာနိုင်စေရန် ဟန့်တားရန်အတွက် တိုက်ခိုက်ခြင်းဖြစ်နိုင်သည်။

NOM