အပြည်ပြည်ဆိုင်ရာ အာကာသစခန်းအား အရေးပေါ်ထွက်ခွာရေးပြင်ဆင်ထားရန် နာဆာ​အမိန့်ထုတ်

နာဆာအဖွဲ့က အပြည်ပြည်ဆိုင်ရာအာကာသစခန်း (ISS) ပေါ်ရှိ အာကာသယာဉ်မှူးများအား လေယိုစိမ့်မှုကြောင့် ဖြစ်နိုင်ချေရှိသော ကယ်ထုတ်မှုအတွက် ၎င်းတို့၏ အာကာသယာဉ်အတွင်း ခိုလှုံရန်နှင့် အသင့်ပြင်ဆင်ထားရန် အမိန့်ပေးလိုက်သည်။

NOM

ပြည်ထောင်စုဝန်ကြီး ဒေါက်တာစိုးဝင်း အပြည်ပြည်ဆိုင်ရာရွှေ့ပြောင်းသွားလာရေးအဖွဲ့ (IOM) ရုံး အကြီးအကဲ Mr. Daihei Mochizuki ဦးဆောင်သည့် ကိုယ်စားလှယ်အဖွဲ့အား လက်ခံတွေ့ဆုံ

ဇွန် ၅၊ ၂၀၂၆

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းသည် အပြည်ပြည်ဆိုင်ရာ ရွှေ့ပြောင်းသွားလာရေးအဖွဲ့ (International Organization for Migration – IOM) ရုံးအကြီးအကဲဖြစ်သူ Mr. Daihei Mochizuki ဦးဆောင်သည့် ကိုယ်စားလှယ်အဖွဲ့အား ယနေ့မွန်းလွဲပိုင်းတွင် အဆိုပါဝန်ကြီးဌာန ဧည့်ခန်းမ၌ လက်ခံတွေ့ဆုံသည်။

တွေ့ဆုံစဉ် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနနှင့် IOM တို့အကြား လုပ်ငန်းများပူးပေါင်းဆောင်ရွက်နိုင်ရေးအတွက် နားလည်မှုစာချွန်လွှာ (MoU) လက်မှတ်ရေးထိုးနိုင်ရေး၊ လူကုန်ကူးမှုတားဆီးကာကွယ်ရေးနှင့် ပြန်လည်ထူထောင်ရေးလုပ်ငန်းများတွင် IOM နှင့် ပူးပေါင်းဆောင်ရွက်မှုများ၊ နိုင်ငံခြားသားဝန်ထမ်းများအတွက် ပြည်ဝင်ဗီဇာရရှိရေးနှင့် ပြည်တွင်းခရီးသွားလာခွင့်ကိစ္စများကို ရင်းနှီးပွင့်လင်းစွာ အမြင်ချင်းဖလှယ် ဆွေးနွေးကြ သည်။
တွေ့ဆုံပွဲသို့ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ညွှန်ကြားရေးမှူးချုပ်၊ ပြန်လည်ထူထောင်ရေးဦးစီးဌာန ညွှန်ကြားရေးမှူးချုပ်၊ ဒုတိယအမြဲတမ်းအတွင်းဝန်၊ ဘာသာရပ်ဆိုင်ရာ အရာထမ်းများနှင့် IOM ရုံးမှ ကိုယ်စားလှယ်များ တက်ရောက်ခဲ့ကြကြောင်း သိရသည်။

ပြည်ထောင်စုဝန်ကြီး ဦးမြင့်ကြိုင် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး၏ မြန်မာနိုင်ငံဆိုင်ရာကိုယ်စားလှယ် Mr. Barnaby Jones နှင့်အဖွဲ့အား လက်ခံတွေ့ဆုံ

ဇွန် ၅၊ ၂၀၂၆

လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်သည် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) ၏ မြန်မာနိုင်ငံဆိုင်ရာ ကိုယ်စားလှယ် Mr. Barnaby Jones နှင့် အဖွဲ့အား ယနေ့ ညနေ ၃ နာရီတွင် နေပြည်တော်ရှိ အဆိုပါဝန်ကြီးဌာန ပြည်ထောင်စုဝန်ကြီး၏ ဧည့်ခန်းမ၌ လက်ခံတွေ့ဆုံသည်။

ရင်းနှီးပွင့်လင်းစွာ ဆွေးနွေး

တွေ့ဆုံစဉ် UNHCR ဝန်ထမ်းများ ပြည်တွင်းခရီးသွားလာမှုနှင့် လိုအပ်သည့် ကူညီထောက်ပံ့မှုများ ဆောင်ရွက်ရာတွင် သက်ဆိုင်ရာ ဒေသအာဏာပိုင်များသို့ အသိပေးဆောင်ရွက်နိုင်ရေးနှင့် တရားဝင်မှတ်ပုံတင်ဖွဲ့စည်းထားသည့် NGO ၊ INGO များဖြင့်သာ ဆက်သွယ်ဆောင်ရွက်နိုင်ရေး၊ UNHCR အနေဖြင့် သတင်းအချက်အလက်များ ထုတ်ပြန်ရာတွင် သက်ဆိုင်ရာဌာနအဖွဲ့အစည်းများ၏ အတည်ပြုထုတ်ပြန်ထားသည့် အချက်အလက်များ အသုံးပြုဆောင်ရွက်နိုင်ရေး၊ ဝန်ကြီးဌာနနှင့် UNHCR တို့အကြား ဆက်လက်လက်တွဲပူးပေါင်းဆောင်ရွက်သွားမည့်အခြေအနေများနှင့်စပ်လျဉ်း၍ ရင်းနှီးပွင့်လင်းစွာ အမြင်ချင်းဖလှယ် ဆွေးနွေးခဲ့ကြသည်။

တွေ့ဆုံပွဲသို့ ဒုတိယဝန်ကြီး ဦးလင်းဇော်ထွန်း၊ အမြဲတမ်းအတွင်းဝန်၊ လူဝင်မှုကြီးကြပ်ရေးဦးစီးဌာန ညွှန်ကြားရေးမှူးချုပ်နှင့် တာဝန်ရှိသူများ တက်ရောက်ခဲ့ကြောင်း သိရသည်။

တောင်တွင်းကြီးမြို့နယ်၊ ရေပြည့်ကျေးရွာနေ အပြစ်မဲ့အရပ်သားပြည်သူတစ်ဦးကို PDF အကြမ်းဖက်သမား ခြောက်ဦးက သတ်ဖြတ်သွား

NOM ဇွန် ၆၊ ၂၀၂၆

မကွေးတိုင်းဒေသကြီး၊ တောင်တွင်းကြီးမြို့နယ်၊ ရေပြည့်ကျေးရွာနေ ဦးရွှေအောင် (၄၃) နှစ်သည် ဇွန်လ ၅ ရက်နေ့ နံနက် ၉ နာရီ ၄၀ မိနစ်အချိန်၌ ၎င်း၏နေအိမ်တွင်ရှိနေစဉ် PDF အကြမ်းဖက်သမားခြောက်ဦးက ဆိုင်ကယ်သုံးစီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဦးရွှေအောင်တွင် ကျည်ထိမှန်ဒဏ်ရာ များရရှိကာ သေဆုံးသွားခဲ့ကြောင်း သိရသည်။

NOM

အိုဒက်ဆာဒေသတွင်ယူကရိန်းကခံစစ်လိုင်းကိုအကြီးအကျယ်တည်ဆောက်
NOM
အိုဒက်ဆာသာရုရှားလက်အောက် ကျရောက်သွားပါကယူကရိန်းသည်ကုန်းတွင်းပိတ်နိုင်ငံဖြစ်သွားမည့်အရေးရင်ဆိုင်နေရသဖြင့်ယူကရိန်းစစ်တပ်သည်အိုဒက်ဆာဒေသတွင်ခံစစ်လိုင်းကိုအကြီးအကျယ်တည်ဆောက်လျက်ရှိသည်။

နတ်မောက်မြို့နယ်အတွင်း ကားနှစ်စီး ရေထဲမျောပါသွား အမျိုးသားတစ်ဦးသေဆုံး

NOM ဇွန် ၆၊ ၂၀၂၆

မကွေးတိုင်းဒေသကြီး၊ နတ်မောက်မြို့နယ်အတွင်း အင်းကုန်းကျေးရွာရှိ ချောင်းရိုးနှင့် တံခွန်တိုင်ကျေးရွာအနီးရှိ တံခွန်တိုင်ချောင်းအတွင်း တို့တွင် ယမန်နေ့( ဇွန် ၅ ရက်) ည ၇ နာရီကျော်က မိနစ်ပိုင်းသာခြားပြီးကားနှစ်စီး ရေထဲမျောပါသွားရာ အမျိုးသားတစ်ဦး သေဆုံးခဲ့သည်ဟု မကွေးတိုင်းဒေသကြီးမီးသတ်ဦးစီးမှူးရုံးမှ တာဝန်ရှိသူတစ်ဦးကပြောသည်။

ဖြစ်စဉ်မှာ နတ်မောက်မြို့နယ် အင်းကုန်းကျေးရွာအုပ်စု၊ အင်းကုန်းကျေးရွာ၊ ဇမ္ဗူထွန်း စက်သုံးဆီဆိုင် အနီးတွင် ည ၇ နာရီ ၄၄ မိနစ်ခန့်ကအမျိုးသားနှစ်ဦး၊ အမျိုးသမီးနှစ်ဦး၊ စုစုပေါင်း လေးဦး လိုက်ပါလာသော Hijet ယာဉ်တစ်စီးသည် ချောင်းရိုးအတွင်း ရေကျနေသည်ကိုဖြက်ကူးသည့်အတွက် ရေစီးဖြင့်မျောပါကြောင်း သတင်းအရ သွားရောက်ပြီး ချောင်းအတွင်းမှ Hijet ယာဉ်အား အသက်ကယ်ကြိုးများအသုံးပြု၍ ဆွဲတင်ခဲ့ရာ ည ၈ နာရီ ၅ မိနစ်အချိန်၌ ဘေးလွတ်ရာသို့ ပို့ဆောင်ပေးနိုင်ခဲ့ပြီး ဖြစ်စဉ်အတွင်းလူထိခိုက် ဒဏ်ရာရ သေဆုံးခြင်းမရှိကြောင်းသိရသည်။

အလားတူ နတ်မောက်မြို့နယ်၊ တံခွန်တိုင်ကျေးရွာအနီးရှိ တံခွန်တိုင် ချောင်းအား မကွေးဘက်မှ နတ်မောက်ဘက်သို့ ယာဉ်မောင်း ဦးချစ်မင်းသူ မောင်းနှင်လာသော Kluger ယာဉ်တစ်စီးသည် ဖြတ်ကူးစဉ် ချောင်းရေစီးနှင့် မျောပါသွားကြောင်းသတင်းရရှိသဖြင့် နတ်မောက်မြို့နယ် မီးသတ်စခန်းမှ တာဝန်ရှိသူများက ရှာဖွေကယ်ဆယ်ရေးဆောင်ရွက်ခဲ့ရာ ယာဉ်ပေါ်ပါ အမျိုးသားလေးဦးအနက် သုံးဦးအား ကယ်ဆယ်နိုင်ခဲ့ပြီး တစ်ဦးမှာပျောက်ဆုံးနေကြောင်းသိရသည်။

"ညကတော့ ရှာတယ်။ မတွေ့ဘူး။ ဒီနေ့ (ဇွန် ၆ ရက်) နံနက် ၇ နာရီ ၃၀ မိနစ်မှစရှာတယ်။ ၈ နာရီ ၄၀ မိနစ်မှာ ချောင်းအတွင်းမျောပါသွားသူရဲ့ရုပ်အလောင်းကို ရှာဖွေတွေ့ရှိခဲ့ပါယ်။ ကားကိုလည်း လွတ်ရာကိုဆွဲတင်ထားပါတယ်"ဟု မကွေးတိုင်းဒေသကြီး မီးသတ်ဦးစီးမှူးရုံးမှ တာဝန်ရှိသူတစ်ဦးကပြောသည်။

NOM

မြန်မာ တရုတ်တူညီအနာဂတ် လူ့အဖွဲ့အစည်း - အတူတကွ ဖော်ဆောင်မှုမျှဝေခြင်း အခမ်းအနားသို့ ရန်ကုန်တိုင်းဒေသကြီးဝန်ကြီးချုပ် ဦးအောင်နိုင်သူတက်ရောက်

NOM ဇွန် ၆၊ ၂၀၂၆

မြန်မာ-တရုတ် နှစ်နိုင်ငံဆက်ဆံရေးဖွံ့ဖြိုးတိုးတက်မှုကို အလေးထားပြီး မဟာဗျူဟာမြောက် ဖလှယ်မှုများကို မြှင့်တင်ရန်၊ နိုင်ငံရေးအရ အပြန်အလှန် ယုံကြည်မှုကို နက်ရှိုင်းစေရန်နှင့် တရုတ်မြန်မာအနာဂတ် ကံကြမ္မာ အတူတကွဖော်ဆောင်သည့် လူ့အဖွဲ့အစည်း တည်ဆောက်ရာတွင် ပိုမိုနက်ရှိုင်း၍ ခိုင်မာသော တိုးတက်မှုများရရှိစေရန် မြန်မာ-တရုတ် နှစ်နိုင်ငံခေါင်းဆောင်များ၏ ရည်မှန်းချက်ကို အလေးအနက်ထား အကောင်အထည် ဖော်ဆောင်ရွက်သည့်အနေဖြင့် တရုတ်နိုင်ငံငြိမ်းချမ်းရေးနှင့် ဖွံ့ဖြိုးတိုးတက်ရေး ဖောင်ဒေးရှင်း၊ မြန်မာနိုင်ငံတရုတ်စက်မှုလက်မှုလုပ်ငန်းရှင်များအသင်းနှင့် မြန်မာတရုတ်ပူးပေါင်းဆက်ဆံရေးအသင်း တို့ပူးပေါင်းစီစဉ်ကျင်းပသည့် "မြန်မာတရုတ် တူညီအနာဂတ် လူ့အဖွဲ့အစည်း အတူတကွ ဖော်ဆောင်မှုမျှဝေခြင်း" အခမ်းအနားကို ရန်ကုန်မြို့မိုးကောင်းလမ်းရှိ မြဝတီမီဒီယာစင်တာ Ballroom ၌ ဇွန် ၆ ရက် နံနက် ၉ နာရီခွဲ၌ ကျင်းပရာ ရန်ကုန်တိုင်းဒေသကြီး ဝန်ကြီးချုပ် ဦးအောင် နိုင်သူကပြောကြားသည်။

အခမ်းအနားတွင် မြန်မာတရုတ်တူညီ အနာဂတ်လူ့အဖွဲ့အစည်းများမှအတူတကွ ဖော်ဆောင်မှုမျှဝေခြင်း ခေါင်းစဉ်အောက်တွင် မျိုးဆက်သစ်တာဝန်ထမ်းဆောင်နေကြသူ လူငယ်ရှစ်ဦးတို့က မြန်မာ-တရုတ်ချစ်ကြည်ရေး ဆောင်ရွက်ချက်များ၊အတွေ့အကြုံများကို ဆွေးနွေးတင်ပြကြသည်။

NOM

ရေတိုက်စား၍ ပျက်စီးခဲ့သည့်တင်းချောင်းတံတား ချဥ်းကပ်လမ်း ပြန်လည်ပြင်ဆင်ပြီး၍ ကားလေးများ ဖြတ်သန်းခွင့်ပြု

NOM ဇွန် ၆၊ ၂၀၂၆

ရေတိုက်စား၍ ပျက်စီးခဲ့သည့် ဧရာဝတီတိုင်းရှိ ဂျက်ကာ -စိန်တောင် မော်တင်လမ်း၏ တင်းချောင်းတံတားချဥ်းကပ်လမ်းအား ယနေ့ဇွန် ၆ ရက်နေ့တွင် ပြန်လည်ပြင်ဆင်ပြီး၍ ကားလေးများကို ဖြတ်သန်းခွင့်ပြုထားသည့်ဟု ဧရာဝတီတိုင်းအစီုးရအဖွဲ့မှ သတင်းထုတ်ပြန်ထားကြောင်းသိရသည်။

ဧရာဝတီတိုင်းဒေသကြီး၊ ဂျက်ကာ- စိန်တောင် မော်တင်လမ်းမိုင် ၅၆/၀-၁ ကြားရှိ တံတားအမှတ် (၁/၅၇) အရှည် (၁၀၀) ပေရှိ တင်းချောင်းတံတားမှာ ဇွန် ၅ ရက်နံနက် ၆ နာရီခန့်တွင် မိုးသည်းထန်စွာရွာသွန်းမှုကြောင့် ပုသိမ်ဘက်ခြမ်း ချဉ်းကပ်လမ်းမှာ ရေတိုက်စားကာပျက်စီးမှုများဖြစ်ပေါ်ခဲ့ကြောင်း သိရသည်။

"ဒေသခံတွေနဲ့ ခရီးသွားပြည်သူတွေ အဆင်ပြေချောမွေ့စွာ ပြန်လည်သွားလာနိုင်ရေးအတွက် လမ်းဦးစီးဌာနက ပြင်ဆင်ရေးလုပ်ငန်းတွေကို မနေ့ကစတင်ဆောင်ရွက်ခဲ့တာပါ။ အခုဒီနေ့မှာတော့ ယာယီသွားလို့ရအောင် တစ်ခြမ်းကိုပြုပြင်ပြီးလို့ ကားလေးတွေတော့ စတင်ဖြတ်သန်းနေပါပြီ" ဟု ဒေသခံယာဉ်မောင်းတစ်ဦးကပြောသည်။

NOM

အမြန်လမ်းတွင် အဝေးပြေးခရီးသည်တင်ကားများမှစ၍ ကားခြောက်စီးဆင့်တိုက် ကိုးဦးဒဏ်ရာရ

NOM ဇွန် ၇၊ ၂၀၂၆

ရန်ကုန်-မန္တလေးအမြန်လမ်းမကြီးပေါ်၌ ဇွန် ၆ ရက် ည ၉ နာရီခွဲခန့်က အဝေးပြေးခရီးသည်တင်ကားများမှစ၍ ကားခြောက်စီးဆင့်တိုက်မှုဖြစ်ပွားခဲ့ကြောင်းသိရသည်။

ဖြစ်စဉ်မှာ အမြန်လမ်းမကြီးအတိုင်းမောင်းနှင်လာသည့် "ကောင်းမြတ်မန်း" အဝေးပြေးခရီးသည်တင်ကားသည် မိုင်တိုင်အမှတ် ၂၂၁/၇ အရောက် အရှိန်မထိန်းနိုင်ဘဲ Guard Rail တန်းအားဝင်တိုက်မိပြီးနောက် အမြန်လမ်းမကြီးပေါ်တွင် ကန့်လန့်ဖြတ် ရပ်တန့်သွားခဲ့ကြောင်းသိရသည်။

ဖြစ်စဥ်ကြောင့် အမြန်ယာဉ်ကြောတွင် ရပ်တန့်ထားသော Toyota Alphart ကား၊ အနှေးယာဉ်ကြောတွင် ရပ်တန့်ထားသော Toyota Harrier ကားနှင့် Isuzu ကားအား လားရာတူနောက်မှ မောင်းနှင်လာသော "သိန်းသန်းကုဋေ"အဝေးပြေးခရီးသည်တင်ကားနှင့် "ဇေယျာမြိုင်ကြီး"အဝေးပြေးခရီးသည်တင်ကားတို့က ထပ်ဆင့်ထပ်မံတိုက်မိခဲ့ကြသည်။

ဖြစ်စဥ်ကြောင့် "ဇေယျာမြိုင်ကြီး" အဝေးပြေးခရီးသည်တင်ကားနှင့် "သိန်းသန်းကုဋေ" အဝေးပြေးခရီးသည်တင် ကားတို့ပေါ်မှ လိုက်ပါလာသူ ကိုးဦးတွင် ထိခိုက်ဒဏ်ရာများ (မစိုးရိမ်ရ) ရရှိခဲ့သဖြင့် နေပြည်တော်ကုတင် (၁၀၀၀) ဆေးရုံသို့ ပို့ဆောင်ပေးခဲ့ကြကြောင်းသိရသည်။

NOM

အီရန်နိုင်ငံရဲ့ ဆိုင်းငံ့ (သိမ်းဆည်း) ခြင်းခံထားရတဲ့ ရန်ပုံငွေတွေကို အီရန်ထံ ပြန်လည်လွှဲပြောင်းပေးမယ့်အစား အီရန်စစ်ပွဲအတွင်း စီးပွားရေးအရ ထိခိုက်ပျက်စီးမှုတွေ ကြုံတွေ့ခဲ့ရတဲ့ ပင်လယ်ကွေ့ အာရပ်နိုင်ငံတွေကို အကူအညီပေးဖို့အတွက် အဆိုပါ အီရန်ပိုင်ငွေကြေးတွေကို အသုံးပြုသွားမယ့် စီမံကိန်းမူကြမ်းတစ်ခုကို အမေရိကန် ဘဏ္ဍာရေးဝန်ကြီး စကော့တ် ဘဲဆင့်တ် (Scott Bessent) က ရေးဆွဲနေကြောင်း CBS နှင့် NYP (New York Post) သတင်းဌာနများအရသိရသည်။

NOM

ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးခင်ဇော် ကချင်ပြည်နယ် ရွေးကောက်ပွဲကော်မရှင်အဖွဲ့ခွဲ ဝန်ထမ်းများနှင့်တွေ့ဆုံ
 
ဇွန် ၆၊ ၂၀၂၆
 
ပြည်ထောင်စုရွေးကောက်ပွဲကော်မရှင်အဖွဲ့ဝင် (ကချင်ပြည်နယ်တာဝန်ခံ) ဦးခင်ဇော်သည် ယနေ့နံနက်ပိုင်းတွင် မြစ်ကြီးနားမြို့ ဧရာဝတီ ဧည့်ရိပ်သာအစည်းအဝေးခန်းမ၌ ပြည်နယ်၊ ခရိုင်နှင့် မြို့နယ် ရွေးကောက်ပွဲကော်မရှင်အဖွဲ့ခွဲ အရာထမ်း၊ အမှုထမ်းများနှင့် တွေ့ဆုံသည်။
 
တွေ့ဆုံစဉ် ပြည်ထောင်စုရွေးကောက်ပွဲကော်မရှင် အဖွဲ့ဝင်က ဝန်ထမ်းများအနေဖြင့် မဲစာရင်းများ ပြည်စုံမှန်ကန်စေရေးအတွက် သက်ဆိုင်ရာဌာနဆိုင်ရာများနှင့် ပူးပေါင်း၍ လစဉ် စိစစ်ဆောင်ရွက်သွားရန်၊ မြန်မာအီလက်ထရောနစ် မဲပေးစက်များသည် ကြီးကြပ်ကန့်သတ်ပစ္စည်းများ ဖြစ်သောကြောင့် ထိခိုက်ပျက်စီးမှုမရှိစေရေး အထူးအလေးထားထိန်းသိမ်းကြရန်လိုအပ်ကြောင်း ဆွေးနွေးပြောကြားသည်။
 
ထို့နောက် တက်ရောက်လာသူများက မဲစာရင်းများ ပြည်စုံမှန်ကန်စေရေး၊ မဲပေးစက်များ စနစ်တကျ ထိန်းသိမ်းသွားမည့် လုပ်ငန်းအစီအမံများကို ဝိုင်းဝန်း အကြံပြုဆွေးနွေးတင်ပြကြရာ ပြည်နယ်တာဝန်ခံက လိုအပ်သည်များကို ဖြည့်စွက်ဆွေးနွေး ဖြည့်ဆည်းဆောင်ရွက်ပေးခဲ့ကြောင်းသိရသည်။

အစ္စရေးနိုင်ငံကို ကာကွယ်စောင့်ရှောက်ဖို့ စေလွှတ်ထားတဲ့ အမေရိကန်စစ်သားတွေရဲ့ ဖုန်းတွေကို အစ္စရေးထောက်လှမ်းရေးအဖွဲ့ (Mossad) က ကြားဖြတ်နားထောင်တာနဲ့ လျှို့ဝှက်စောင့်ကြည့်တာတွေ ပြုလုပ်ခဲ့ကြောင်း New York Times သတင်းစာအရ သိရသည်။

NOM

သာစည်မြို့နယ်နှင့် တောင်ကြီးမြို့တို့၌ ငွေကျပ်သိန်း ၁၄၀၀ တန်ဖိုးနှင့် တာချီလိတ်မြို့နယ်၌ ငွေကျပ်သိန်း ၆၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိ
 
ဇွန် ၆၊ ၂၀၂၆
 
သာစည်မြို့နယ်နှင့် တောင်ကြီးမြို့တို့တွင် ငွေကျပ်သိန်း ၁၄၀၀ တန်ဖိုးနှင့် တာချီလိတ်မြို့နယ်တွင် ငွေကျပ်သိန်း ၆၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့မှ သိရသည်။
 
ဖြစ်စဉ်မှာ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇွန် ၄ ရက် ည ၉ နာရီခွဲ တွင် သာစည်မြို့နယ် ကျွဲတပ်ဆုံကျေးရွာအနီး၌ တောင်ကြီးမှ ရန်ကုန်သို့ မောင်းနှင်လာသည့် ခရီးသည်တင် မော်တော်ယာဉ်အား ရပ်တန့်စစ်ဆေးရှာဖွေရာ ယာဉ်ပေါ်တွင် လိုက်ပါလာသော ခရီးသည် မြောက်ဥက္ကလာပ မြို့နယ် (ဌ) ရပ်ကွက်နေ သက်ကို ဝင်း (၃၆) နှစ်ထံမှ စိတ်ကြွရူးသွပ်ဆေးပြား ၉၀၀၀၀ (တစ်ပြား လျှင်ငွေကျပ် ၁၅၀၀ နှုန်းဖြင့် ၎င်းဒေသတန်ဖိုးငွေကျပ် သိန်း ၁၃၅၀)၊ မြန်မာငွေကျပ် ၃၀၀၀၀ တို့ကို ဖမ်းဆီးရမိပြီး ကွင်းဆက်ဖော်ထုတ်ချက်အရ ဇွန် ၅ ရက် နံနက် ၄ နာရီတွင် စိတ်ကြွရူးသွပ်ဆေးပြားများ ပို့ဆောင်ခိုင်းသူ တောင်ကြီးမြို့ ဘုရားဖြူရပ်ကွက် နယ်မြေ (၇)နေ စိုင်းညွန့် (ခ) မင်းညွန့် (၃၁) နှစ်၏ နေအိမ်အား ဝင်ရောက်ရှာဖွေရာ ၎င်းနှင့်အတူ တောင်ကြီးမြို့ ရေအေးကွင်းရပ်ကွက်နယ်မြေ (၁၅)နေ အောင်ကိုကို (ခ) သားငယ် (၄၁)နှစ်တို့ကို စိတ်ကြွရူးသွပ်ဆေးပြား ၁၀၀၀၀ (တစ်ပြားလျှင်ငွေကျပ် ၅၀၀ နှုန်းဖြင့် ၎င်းဒေသတန်ဖိုး ငွေကျပ်သိန်း ၅၀) နှင့်အတူ ဖမ်းဆီးရမိသဖြင့် သက်ကိုဝင်း၊ စိုင်းညွန့် (ခ) မင်းညွန့်နှင့် အောင်ကိုကို (ခ) သားငယ်တို့ကို မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားသည်။
 
အလားတူဇွန် ၅ ရက် မွန်းလွဲ ၁ နာရီခွဲတွင် မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ တာချီလိတ်မြို့နယ် မိုင်းကိုးကျေးရွာအုပ်စု ပါဘီး (၃) ကျေးရွာအနီးတွင် ကျိုင်းတုံမြို့နယ် ကတ်ထိုက်ကျေးရွာနေ လော်ပီး (၃၃) နှစ် မောင်းနှင်လာသော WAVE I 110 အမျိုးအစား ဆိုင်ကယ်အား စစ်ဆေးရှာဖွေရာ စိတ်ကြွရူးသွပ်ဆေးပြား ၁၀၀၀၀ (တစ်ပြားလျှင် ငွေကျပ် ၆၀၀ နှုန်းဖြင့် ၎င်းဒေသ တန်ဖိုးငွေကျပ် သိန်း ၆၀) အား ဖမ်းဆီးရမိသဖြင့် လော်ပီးအား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားရှိကြောင်းသိရသည်။