အားလုံးသိရှိပြီးဖြစ်တဲ့အတိုင်း ယခုအခါမှာဆိုရင် ကမ္ဘာကြီးကပူနွေးလာပြီး သဘာဝဘေးအန္တရာယ်အမျိုးမျိုး ဖြစ်ပေါ်ခံစားနေရပါတယ်။ သစ်ပင်သစ်တောတွေ ပြုန်းတီးမှုကြောင့် အပူဒဏ်ကို ပြင်းပြင်းထန်ထန်ခံစားနေရပြီး အညာဒေသ တချို့မြို့တွေမှာ ယခုကတည်းက အပူချိန်တွေ တအားမြင့်တက်နေလို့ သက်ကြီးရွယ်အိုတွေ တော်တော်ထိခိုက်ခံစားနေကြရပါတယ်။ ဒါ့ကြောင့် လတ်တလောအပူဒဏ် ကာကွယ်နိုင်ဖို့ အပူရှောင်စခန်းတွေ စီမံပေးဖို့လိုသလို ရေရှည်အတွက် “နိုင်ငံတော်သာယာဖို့ သဘာဝပတ်ဝန်းကျင် ထိန်းသိမ်းစို့” ဆိုတဲ့ ဆောင်ပုဒ်နဲ့အညီ သဘာဝပတ်ဝန်းကျင် ထိန်းသိမ်းရေးနဲ့ သစ်ပင်စိုက်ပျိုးရေးကို အလေးထားဆောင်ရွက်သွားကြဖို့ မှာကြားလိုပါတယ်။

ခုအချိန်မှာ ကျွန်တော်တို့ဟာ ပြည်သူ့ဆန္ဒနဲ့အညီ ပြည်သူတွေလိုလားတဲ့ လမ်းကြောင်းမှန်ပေါ်ကို ပြန်ရောက်နေပါပြီ။ ဒီမိုကရေစီစာမျက်နှာသစ်၊ တစ်နည်းအားဖြင့်ပြောရရင် ဒုတိယစာမျက်နှာကို ရေးဆွဲကြဖို့ အစပြုနေကြပြီဖြစ်ပါတယ်။ ဒါ့ကြောင့် ကျွန်တော်တို့အနေနဲ့ ဥပဒေပြုရေးမဏ္ဍိုင်၊ အုပ်ချုပ်ရေးမဏ္ဍိုင်နဲ့ တရားစီရင်ရေးမဏ္ဍိုင်တို့အကြားမှာ ညှိညှိနှိုင်းနှိုင်း၊ တိုင်တိုင်ပင်ပင်နဲ့ နိုင်ငံ့အကျိုးကို ရှေးရှုဆောင်ရွက်သွားကြဖို့ မှာကြားလိုပါတယ်။ တွေ့ကြုံလာရမယ့် အခက်အခဲမှန်သမျှကို ဆွေးနွေးညှိနှိုင်းအဖြေရှာပြီး စည်းစည်းလုံးလုံး ဆောင်ရွက်သွားကြရမှာ ဖြစ်ပါတယ်။ “အစကောင်းမှ အနှောင်းသေချာ” ဆိုသလို အတိတ်ကလို နောက်ကြောင်း ပြန်လှည့်သွားရတာမျိုးမဖြစ်အောင် အားလုံးက ထိန်းထိန်းသိမ်းသိမ်း ဆောင်ရွက်သွားကြဖို့ တိုက်တွန်း မှာကြားလိုပါတယ်။

ကျွန်တော်ခေါင်းဆောင်တဲ့ အစိုးရအဖွဲ့ကိုလည်း လုပ်ငန်းအတွေ့အကြုံရှိသူတွေ၊ နိုင်ငံ့အကျိုး ပြည်သူ့အကျိုးကို ရှေးရှုဆောင်ရွက်နိုင်မယ့်သူတွေ၊ အမှန်တကယ် လုပ်နိုင်ကိုင်နိုင်ရှိသူတွေနဲ့ရွေးချယ်ပြီး ယုံယုံကြည်ကြည်နဲ့ အားကိုးအားထားပြု ဖွဲ့စည်းထားတာဖြစ်ပါတယ်။ ဖြစ်ပျက်ကြုံတွေ့ခဲ့ရတဲ့ အတွေ့အကြုံတွေကို သင်ခန်းစာယူပြီး “သန့်ရှင်းတဲ့ အစိုးရ၊ ကောင်းမွန်တဲ့အုပ်ချုပ်မှု” ဖြစ်အောင် ကြိုးစားဆောင်ရွက်သွားကြရမှာ ဖြစ်ပါတယ်။ ဗဟိုအဆင့်ကဏ္ဍဆိုင်ရာ ပြည်ထောင်စုဝန်ကြီးဌာနများနဲ့ ဒေသဆိုင်ရာ တိုင်းဒေသကြီးနဲ့ ပြည်နယ်အစိုးရများ ပူးပေါင်းဆောင်ရွက်မှုနဲ့ ဦးတည်ချက်၊ ရည်မှန်းချက်တွေ အောင်မြင်အောင် ကြိုးစားဆောင်ရွက်သွားမှာဖြစ်ပါတယ်။ နိုင်ငံဖွံ့ဖြိုးတိုးတက်မှုနဲ့ ပြည်သူတွေရဲ့ လိုအပ်ချက်တွေကို ဥပဒေလုပ်ထုံးလုပ်နည်းများနဲ့အညီ ချို့ယွင်းအားနည်းမှုမရှိစေဘဲ ကိုယ်စွမ်းဉာဏ်စွမ်းရှိသမျှ ကြိုးစားဆောင်ရွက်သွားကြဖို့လည်း မှာကြားလိုပါတယ်။

နောက်မဏ္ဍိုင်ကြီးတစ်ခုဖြစ်တဲ့ တရားစီရင်ရေးအပိုင်းကလည်း အမှုအခင်းများကို တိတိကျကျ၊ မှန်မှန်ကန်ကန်၊ မြန်မြန်ဆန်ဆန် စီရင်ဆောင်ရွက်ပေးကြဖို့နဲ့ သမာသမတ်ကျကျ ဥပဒေနဲ့အညီ တိတိကျကျ ဆောင်ရွက်ပေးကြဖို့လည်း လိုအပ်ပါတယ်။ အပြစ်ရှိတဲ့သူကို ထိုက်သင့်တဲ့ ပြစ်ဒဏ်ချမှတ်ပေးနိုင်ဖို့လိုသလို တစ်ဖက်ကလည်း ပြည်သူတွေကို ရသင့်ရထိုက်တဲ့ တရားဥပဒေအကာအကွယ်ရအောင်လည်း လုပ်ပေးကြရမှာဖြစ်ပါတယ်။ ပြည်သူကအားကိုးတဲ့ တရားရုံးတွေ၊ ပြည်သူကယုံကြည်လေးစားတဲ့ တရားသူကြီးတွေဖြစ်အောင် ကြိုးစားပေးကြပါလို့ မှာကြားလိုပါတယ်။ နိုင်ငံသားအားလုံးဟာ ဥပဒေနဲ့ပတ်သက်ရင် တန်းတူခံစားခွင့်ရရှိစေဖို့နဲ့ တရားရေးမဏ္ဍိုင်ကို ဖြောင့်မတ်တည်ကြည်ခိုင်မာအောင် တည်ဆောက်သွားကြဖို့လည်း လိုအပ်ပါတယ်။

နောက်တစ်ချက်အနေနဲ့ အဂတိလိုက်စားမှုကင်းရှင်းအောင် ဆောင်ရွက်သွားကြဖို့လိုပါတယ်။ အဂတိလိုက်စားမှုဟာ နိုင်ငံရဲ့ဖွံ့ဖြိုးတိုးတက်မှုကို များစွာထိခိုက်စေပြီး လူတစ်ဦးချင်းစီရဲ့ အကျင့်စာရိတ္တနဲ့စိတ်ဓာတ်ကိုလည်း ပျက်စီးစေတာဖြစ်ပါတယ်။ သူများ မိုးခါးရေသောက်လို့ သောက်ရပါတယ်ဆိုရာကနေ တစ်စတစ်စအမြစ်တွယ်လာပြီး အကျင့်ပျက်ခြစားမှုတွေ များလာတာမျိုးမဖြစ်အောင် ထိန်းသိမ်းလုပ်ဆောင်ကြဖို့ လိုအပ်ပါတယ်။ အဓိက ကတော့ ကျွန်တော်တို့အစိုးရအဖွဲ့နဲ့ နိုင်ငံ့ဝန်ထမ်းများအပါအဝင် စီးပွားရေးလုပ်ငန်းရှင်များ၊ တိုင်းရင်းသားပြည်သူအားလုံး စိတ်ထားမှန်ကန်ကြဖို့နဲ့ စိတ်ကောင်းစေတနာတွေရှိကြဖို့ Mindset တွေကို ပြုပြင်ပြောင်းလဲနိုင်အောင် ကြိုးစားကြပါလို့ တိုက်တွန်းမှာကြား လိုပါတယ်။

ကျွန်တော်တို့အနေနဲ့ ပြည်ထောင်စုလွှတ်တော်ရှေ့မှောက်မှာ ကတိသစ္စာပြုထားကြတဲ့အတိုင်း ပြည်ထောင်စုသမ္မတ မြန်မာနိုင်ငံတော်နဲ့ နိုင်ငံသားများအပေါ် သစ္စာစောင့်သိရိုသေသွားကြရမှာ ဖြစ်ပါတယ်။ ဒို့တာဝန် အရေးသုံးပါးဖြစ်တဲ့ ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှုမပြိုကွဲရေးနဲ့ အချုပ်အခြာအာဏာ တည်တံ့ခိုင်မြဲရေးတို့ကို ထာဝစဉ်ဦးထိပ်ပန်ဆင် ဆောင်ရွက်သွားကြရမှာ ဖြစ်ပါတယ်။ နိုင်ငံတော်နဲ့ ပြည်သူအကျိုးကို အလေးထားပြီး နိုင်ငံတော်ဖွဲ့စည်းပုံအခြေခံဥပဒေကို ထိန်းသိမ်းစောင့်သိလိုက်နာရိုသေပြီး လုပ်ငန်းတာဝန်တွေကို ရိုးသားဖြောင့်မတ်စွာ ဆောင်ရွက်သွားကြဖို့ လိုအပ်တယ်ဆိုတာလည်း အလေးအနက်ထား မှာကြားလိုပါတယ်။

ဒီမိုကရေစီအသွင်ကူးပြောင်းရေးလုပ်ငန်းစဉ်တွေကို အခြေခံကောင်းကောင်းနဲ့ ခိုင်မာအားကောင်းအောင် တဖြည်းဖြည်းတည်ဆောက်သွားကြရမှာ ဖြစ်ပါတယ်။ အတိတ်က ကြုံတွေ့ခဲ့ရတာတွေကိုသင်ခန်းစာယူပြီး ချို့ယွင်းအားနည်းမှုနည်းနည်းနဲ့ ခိုင်မာအားကောင်းတဲ့ ဒီမိုကရေစီနိုင်ငံတော်ကြီးကို အောင်မြင်အောင်ဆက်လက်တည်ဆောက်သွားနိုင်ဖို့ မိမိတို့အားလုံး တက်ညီလက်ညီ ဆောင်ရွက်သွားကြဖို့ တိုက်တွန်းမှာကြားလိုပါတယ်။

နိဂုံးချုပ်အနေနဲ့ -

မိမိတို့အစိုးရအနေနဲ့ နိုင်ငံတော်နဲ့ပြည်သူကပေးအပ်လာတဲ့ တာဝန်တွေကို သစ္စာရှိရှိ၊ ကျေကျေပွန်ပွန် ထမ်းဆောင်သွားကြပါ၊
နိုင်ငံတော်ဖွံ့ဖြိုးတိုးတက်မှုနဲ့ ပြည်သူများလူမှုစီးပွားဘဝ ဖွံ့ဖြိုးတိုးတက်ရေးကို အလေးထားဆောင်ရွက်သွားကြပါ၊
အတိတ်ကကြုံတွေ့ခဲ့ရတဲ့ သင်ခန်းစာတွေကိုလေ့လာသုံးသပ်ပြီး နိုင်ငံနဲ့ပြည်သူ့အကျိုးကို ထိထိရောက်ရောက် မြန်မြန်ဆန်ဆန်၊ မှန်မှန်ကန်ကန် ဆောင်ရွက်ပေးကြပါ၊
ပြည်ထောင်စုနဲ့ တိုင်းဒေသကြီး၊ ပြည်နယ်များအချင်းချင်း ပေါင်းစပ်ညှိနှိုင်းပြီး နိုင်ငံရေး၊ စီးပွားရေး၊ ပညာရေး၊ လူမှုရေး စတဲ့ကဏ္ဍအသီးသီး တိုးတက်အောင် ပူးပေါင်းဆောင်ရွက်ပေးကြပါ၊
ပြည်သူလူထုရဲ့ ဆန္ဒသဘောထားနဲ့အညီ ခေတ်မီဖွံ့ဖြိုးတိုးတက်တဲ့ ဒီမိုကရေစီနိုင်ငံသစ်ကို ဦးတည်ချက်၊ ရည်မှန်းချက်များနဲ့အညီ စိတ်တူကိုယ်တူ အကောင်အထည်ဖော်ဆောင်ရွက်သွားကြပါစို့လို့ တိုက်တွန်းမှာကြားရင်း နိဂုံးချုပ်လိုက် ပါတယ်။

အားလုံးကို ကျေးဇူးတင်ပါတယ်။

ဒုတိယသမ္မတ ဒေါ်နန်းနီနီအေး အိန္ဒိယနိုင်ငံ ပြည်ပရေးရာဝန်ကြီးဌာန ဒုတိယဝန်ကြီး H.E. Mr. Kirti Vardhan Singh ကို လက်ခံတွေ့ဆုံ

ဧပြီ ၁၀၊ ၂၀၂၆

ပြည်ထောင်စုသမ္မတမြန်မာနိုင်ငံ ဒုတိယသမ္မတ ဒေါ်နန်းနီနီအေးသည် အိန္ဒိယနိုင်ငံ ပြည်ပရေးရာဝန်ကြီးဌာန ဒုတိယဝန်ကြီး H.E. Mr. Kirti Vardhan Singh ကို ယနေ့မွန်းလွဲပိုင်းတွင် နေပြည်တော်ရှိ နိုင်ငံတော်သမ္မတရုံး ဧည့်ခန်းမ၌ လက်ခံတွေ့ဆုံသည်။

တွေ့ဆုံစဉ် မြန်မာ - အိန္ဒိယ နှစ်နိုင်ငံအကြား ဆက်ဆံရေးနှင့် ပူးပေါင်းဆောင်ရွက်မှုတိုးမြှင့်ရေးဆိုင်ရာ ကိစ္စရပ်များ၊ အမျိုးသမီးနှင့် လူငယ်ကဏ္ဍဖွံ့ဖြိုးတိုးတက်ရေး ဆောင်ရွက်သွားမည့်ကိစ္စရပ်များ၊ နှစ်နိုင်ငံလူငယ်များအကြား ထိတွေ့ဆက်ဆံမှုမြင့်မားလာစေရေးအတွက် နှီးနှောဖလှယ်ပွဲများနှင့် လေ့လာရေးခရီးစဉ်များ၊ စာတမ်းဖတ်ပွဲများ ဆောင်ရွက်သွားနိုင်ရေးကိစ္စရပ်များနှင့်စပ်လျဉ်း၍ ရင်းနှီးပွင့်လင်းစွာ အမြင်ချင်းဖလှယ်ဆွေးနွေးကြပြီး လက်ဆောင်ပစ္စည်းများ အပြန်အလှန်ပေးအပ်ကြသည်။

တွေ့ဆုံပွဲသို့ နိုင်ငံခြားရေးဝန်ကြီးဌာန ဒုတိယဝန်ကြီး ဦးနိုင်မင်းကျော်နှင့် တာဝန်ရှိသူများ တက်ရောက်ကြပြီး အိန္ဒိယနိုင်ငံ ပြည်ပရေးရာဝန်ကြီးဌာန ဒုတိယဝန်ကြီးနှင့်အတူ မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E.Mr. Abhay Thakur နှင့် တာဝန်ရှိသူများ တက်ရောက်ကြသည်။

NOM

အမရိကန်နှင့်ဆွေးနွေးပွဲတွင်အီရန်ပါလီမန်ဥက္ကဋ္ဌပြောသည့်စကား

အမေရိကန်နှင့် ဆွေးနွေးပွဲများ စတင်ခြင်းအပေါ် အီရန်ပါလီမန်ဥက္ကဋ္ဌ မိုဟာမက် ဘာဂါ ဂါလီဘတ်ဖ်က အောက်ပါအတိုင်းပြောကြားခဲ့သည်-

"ကံမကောင်းစွာပဲ အမေရိကန်များနှင့် ဆွေးနွေးပွဲများနှင့်ပတ်သက်သည့် ကျွန်ုပ်တို့၏ အတွေ့အကြုံသည် အမြဲတမ်း မအောင်မြင်မှုနှင့် ကတိကဝတ်များကို ချိုးဖောက်ခြင်းတို့ဖြင့် ဒွန်တွဲနေပါသည်။

အီရန်ဘက်က စိတ်စေတနာကောင်းများရှိသော်လည်း တစ်နှစ်အတွင်း နှစ်ကြိမ်တိုင်တိုင် ဆွေးနွေးပွဲများအလယ်တွင် ၎င်းတို့သည် ကျွန်ုပ်တို့ကို တိုက်ခိုက်ပြီး စစ်ရာဇဝတ်မှုများစွာကို ကျူးလွန်ခဲ့ကြသည်။

ကျွန်ုပ်တို့တွင် စိတ်ကောင်းစေတနာကောင်းများရှိသော်လည်း အမေရိကန်ကိုယုံကြည်မှုမရှိပါ။"

NOM

ဥပဒေကြောင်းအရ ဆောင်ရွက်ခြင်းဖြစ်ပါတယ်

Wall Street Journal သတင်းဌာန​၏ ဖော်ပြချက်အရ

"အမေရိကန်နှင့် ရင်းနှီးသော မဟာမိတ်ဖြစ်သည့် အာရှအစိုးရတစ်ခုမှ အကြံပေးပုဂ္ဂိုလ်တစ်ဦး၏ အဆိုအရ ၎င်းတို့သည်
အီရန်သံအမတ်နှင့် ညှိနှိုင်းမှုများ ပြုလုပ်နေပြီး ၎င်းတို့၏ သင်္ဘောများ ဟော်မုဇ် ရေလက်ကြား မှ ဘေးကင်းလုံခြုံစွာ ဖြတ်သန်းခွင့်ရရှိရန်အတွက် အခကြေးငွေများကို ဒစ်ဂျစ်တယ် ငွေကြေး သို့မဟုတ် တရုတ်ယွမ်ငွေကို အသုံးပြု၍ တိတ်တဆိတ် ပေးချေနိုင်ရန် ဆွေးနွေးနေကြသည်ဟု ဆိုသည်။"

NOM