တရားမဝင်သစ်မျိုးစုံ၊ စားသောက်ကုန်ပစ္စည်းများ၊ လူသုံးကုန်ပစ္စည်းများ၊ လုပ်ငန်းသုံးပစ္စည်းများ၊ လိုင်စင်မဲ့ဆိုင်ကယ်နှင့် တရားမဝင်ကုန်ပစ္စည်းတင်ယာဉ်များ သိမ်းဆည်းရမိ

မတ် ၉၊ ၂၀၂၆

တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီ၏ ကြီးကြပ်ကွပ်ကဲမှုဖြင့် တရားမဝင်ကုန်သွယ်မှုများကို ဥပဒေနှင့်အညီ ထိရောက်စွာတားဆီးအရေးယူနိုင်ရေး ဆောင်ရွက်လျက်ရှိသည်။

ထိုသို့ဆောင်ရွက်လျက်ရှိရာ နေပြည်တော် တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ ဖေဖော်ဝါရီ ၂၈ ရက်တွင် တပ်ကုန်းမြို့နယ်၊ လယ်ဝေးမြို့နယ်နှင့် ဥတ္တရသီရိမြို့နယ်တို့အတွင်း၌ တရားမဝင်ကျွန်းသစ် ၁ ဒသမ ၄၇၀ တန်၊ အခြားသစ် ၆ ဒသမ ၂၆၂ တန် (စုစုပေါင်း ခန့်မှန်းတန်ဖိုးငွေကျပ် ၁၅၇၂၈၄၀) ကို သိမ်းဆည်းရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိသည်။

အရေးယူဆောင်ရွက်

ထို့အပြင် ကရင်ပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဖေဖော်ဝါရီ ၇ ရက်တွင် ဘားအံမြို့နယ် မြပြည်ကျေးရွာ၌ ယာဉ်တစ်စီးပေါ်မှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် စားသောက်ကုန်ပစ္စည်းလေးမျိုး (ခန့်မှန်းတန်ဖိုးငွေကျပ် ၁၀၆၃၀၀၀၀) နှင့် အဆိုပါပစ္စည်းများ တင်ဆောင်လာသည့် Toyota Hiace တစ်စီး (ခန့်မှန်းတန်ဖိုးငွေကျပ် ၄၅၀၀၀၀၀၀) (စုစုပေါင်းခန့်မှန်းတန်ဖိုးငွေကျပ် ၅၅၆၃၀၀၀၀) ကို သိမ်းဆည်းရမိခဲ့ပြီး ပို့ကုန်၊ သွင်းကုန်ဥပဒေနှင့်အညီ အရေးယူဆောင်ရွက်လျက်ရှိသည်။

ယင်းအပြင် ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ မတ် ၂ ရက်တွင် ပဲခူးမြို့နယ်နှင့် တောင်ငူမြို့နယ်တို့အတွင်း၌ တရားမဝင်ကျွန်းသစ် သုညဒသမ ၆၈၃ တန်၊ သစ်မာ ၁ ဒသမ ၄၁၇ တန် (ခန့်မှန်းတန်ဖိုးငွေ ၂၁၈၂၄၁၆ ကျပ်) ကို သိမ်းဆည်းရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိသည်။

အလားတူ မကွေးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ မတ် ၂ ရက်တွင် အောင်လံမြို့နယ်အတွင်း၌ လိုင်စင်မဲ့ဆိုင်ကယ်တစ်စီး (ခန့်မှန်းတန်ဖိုးငွေကျပ် ၁၀၀၀၀၀၀) ကို သိမ်းဆည်းရမိခဲ့ပြီး ပို့ကုန်၊ သွင်းကုန်ဥပဒေနှင့်အညီ အရေးယူဆောင်ရွက်လျက်ရှိသည်။

ထို့အပြင် မန္တလေးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဖေဖော်ဝါရီ ၂၄ ရက်တွင် စဉ့်ကိုင်မြို့နယ်၊ မြစ်သားမြို့နယ်နှင့် သာစည်မြို့နယ်တို့အတွင်း၌ တရားမဝင်အခြားသစ် ၁၇ ဒသမ ၂၃၄ တန် (ခန့်မှန်းတန်ဖိုးငွေ ၃၂၂၁၇၉၀၈ ကျပ်) နှင့် လိုင်စင်ရှိ သစ်တင်ယာဉ် Mazada Truck တစ်စီး (ခန့်မှန်းတန်ဖိုးငွေကျပ် ၃၀၀၀၀၀၀၀) (စုစုပေါင်းခန့်မှန်းတန်ဖိုးငွေ ၆၂၂၁၇၉၀၈ ကျပ်) ကို သိမ်းဆည်းရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိသည်။

ယင်းအပြင် ရှမ်းပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဖေဖော်ဝါရီ ၂၆ ရက်တွင် ပင်းတယမြို့နယ် ဟော်ကုန်းရပ်ကွက်၌ ယာဉ်တစ်စီးပေါ်မှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်း ၂၅ မျိုး (ခန့်မှန်းတန်ဖိုးငွေကျပ် ၁၂၅၂၂၈၀၀၀) နှင့် အဆိုပါပစ္စည်းများ တင်ဆောင်လာသည့် လိုင်စင်မဲ့‌ယာဉ်တစ်စီး (ခန့်မှန်းတန်ဖိုးငွေကျပ် ၄၅၀၀၀၀၀၀) (စုစုပေါင်းခန့်မှန်းတန်ဖိုးငွေကျပ် ၁၇၀၂၂၈၀၀၀) ကို သိမ်းဆည်းရမိခဲ့ပြီး ပို့ကုန်၊ သွင်းကုန် ဥပဒေနှင့်အညီ အရေးယူဆောင်ရွက်လျက်ရှိသည်။

ထို့အပြင် အကောက်ခွန်ဦးစီးဌာန၏ စီမံခန့်ခွဲမှုဖြင့် စစ်ဆေးမှုများ ဆောင်ရွက်ခဲ့ရာ မတ် ၁ ရက်နှင့် ၃ ရက်တို့တွင် ညောင်ခါးရှည်အမြဲတမ်းစစ်ဆေးရေးစခန်း၌ ယာဉ်တစ်စီးပေါ်မှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်းတစ်မျိုး၊ လုပ်ငန်းသုံးပစ္စည်းတစ်မျိုး (ခန့်မှန်းတန်ဖိုးငွေကျပ် ၁၄၀၀၀၀၀၀) နှင့် အဆိုပါပစ္စည်းများ တင်ဆောင်လာသည့် Ngwe Zin Yaw MPV Mini Bus တစ်စီး (ခန့်မှန်းတန်ဖိုးငွေကျပ် ၃၀၀၀၀၀၀၀) ကိုလည်းကောင်း၊ ရန်ကုန်အပြည်ပြည်ဆိုင်ရာလေဆိပ်၌ ခရီးသည်နှစ်ဦး၏ ဝန်စည်များအတွင်းမှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်းလေးမျိုး (ခန့်မှန်းတန်ဖိုးငွေကျပ် ၃၁၅၆၀၀၀၀) ကိုလည်းကောင်း (စုစုပေါင်းခန့်မှန်းတန်ဖိုးငွေကျပ် ၇၅၅၆၀၀၀၀) ကို သိမ်းဆည်းရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အမှုတွဲဖွင့်လှစ်ထားရှိသည်။

ဖေဖော်ဝါရီ ၇ ရက်၊ ၂၄ ရက်၊ ၂၆ ရက်၊ ၂၈ ရက်၊ မတ် ၁ ရက်၊ ၂ ရက် နှင့် ၃ ရက်တို့တွင် သိမ်းဆည်းရမိမှုစုစုပေါင်းမှာ အမှုတွဲ ၁၇ မှု (ခန့်မှန်းတန်ဖိုးငွေ ၃၆၈၃၉၁၁၆၄ ကျပ်) ကို သိမ်းဆည်းရမိခဲ့သည်။

ထို့အတူ ကရင်ပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဖေဖော်ဝါရီ ၂၀ ရက်နှင့် ၂၂ ရက်တို့တွင် ဘားအံမြို့နယ် သာယာကုန်းကျေးရွာရှိ ခြံဝင်းတစ်ခုအတွင်းမှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လုပ်ငန်းသုံးပစ္စည်း ၁၁ မျိုး (ခန့်မှန်းတန်ဖိုးငွေကျပ် ၅၄၁၉၃၀၀၀၀) ကိုလည်းကောင်း၊ ဘားအံမြို့နယ် အမှတ် (၁) ရပ်ကွက်၌ ယာဉ်တစ်စီးပေါ်မှ တရားဝင်စာရွက်စာတမ်းအထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်း ၁၅ မျိုး (ခန့်မှန်းတန်ဖိုးငွေကျပ် ၂၈၁၆၀၀၀၀၀)နှင့် အဆိုပါပစ္စည်းများ တင်ဆောင်လာသည့် လိုင်စင်မဲ့‌ယာဉ်တစ်စီး (ခန့်မှန်းတန်ဖိုး ငွေကျပ် ၂၀၀၀၀၀၀၀) ကိုလည်းကောင်း (စုစုပေါင်းခန့်မှန်းတန်ဖိုး ငွေကျပ် ၈၄၃၅၃၀၀၀၀) ကို သိမ်းဆည်းရမိခဲ့ပြီး ပို့ကုန်၊ သွင်းကုန်ဥပဒေနှင့်အညီ အရေးယူဆောင်ရွက်လျက်ရှိသည်။

ထို့အပြင် စစ်ကိုင်းတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ မတ် ၄ ရက်တွင် ရွှေဘိုမြို့နယ် ပိတောက်ခေါင်းကျေးရွာ၌ လိုင်စင်မဲ့‌ဆိုင်ကယ်တစ်စီး (ခန့်မှန်းတန်ဖိုး ငွေကျပ် ၆၀၀၀၀၀) ကို သိမ်းဆည်းရမိခဲ့ပြီး ပို့ကုန်၊ သွင်းကုန်ဥပဒေနှင့်အညီ အရေးယူဆောင်ရွက်လျက်ရှိသည်။

ယင်းအပြင် မွန်ပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဖေဖော်ဝါရီ ၂၅ ရက်နှင့် မတ် ၄ ရက်တို့တွင် ဘီးလင်းမြို့နယ်၊ ကျိုက်မရောမြို့နယ်နှင့် ကျိုက်ထိုမြို့နယ်တို့အတွင်း၌ လိုင်စင်မဲ့‌ယာဉ်တစ်စီးနှင့် လိုင်စင်မဲ့‌ယာဉ်နှစ်စီး (ခန့်မှန်းတန်ဖိုးငွေကျပ် ၁၈၀၀၀၀၀၀) ကိုလည်းကောင်း၊ ဘီးလင်းမြို့နယ် သကြားစက်အနီး၌ ယာဉ်နှစ်စီးပေါ်မှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် စားသောက်ကုန်ပစ္စည်း ၄၇ မျိုး (ခန့်မှန်းတန်ဖိုး ငွေကျပ် ၁၉၉၉၇၄၀၀၀)နှင့် အဆိုပါပစ္စည်းများ တင်ဆောင်လာသည့် Nissan Atlas Light Truck တစ်စီး၊ Sun Win Express Bus တစ်စီး (ခန့်မှန်းတန်ဖိုးငွေကျပ် ၆၅၀၀၀၀၀၀) ကိုလည်းကောင်း၊ ပေါင်မြို့နယ် မုတ္တမကျေးရွာ၌ ယာဉ်လေးစီးပေါ်မှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်း ၂၇ မျိုး၊ လုပ်ငန်းသုံးပစ္စည်းသုံးမျိုး (ခန့်မှန်းတန်ဖိုး ငွေကျပ် ၈၈၅၃၈၀၈၀)နှင့် အဆိုပါပစ္စည်းများ တင်ဆောင်လာသည့် Toyota Probox သုံးစီး၊ Mazda Bongo တစ်စီး (ခန့်မှန်းတန်ဖိုးငွေကျပ် ၁၀၇၀၀၀၀၀၀) ကိုလည်းကောင်း (စုစုပေါင်းခန့်မှန်းတန်ဖိုးငွေ ကျပ် ၄၇၈၅၁၂၀၈၀) ကို သိမ်းဆည်းရမိခဲ့ပြီး ပို့ကုန်၊ သွင်းကုန်ဥပဒေနှင့်အညီ အရေးယူဆောင်ရွက်လျက်ရှိသည်။

ဖေဖော်ဝါရီ ၂၀ ရက်၊ ၂၂ ရက်၊ ၂၅ ရက်နှင့် မတ် ၄ ရက်တို့တွင် သိမ်းဆည်းရမိမှုစုစုပေါင်းမှာ အမှုတွဲ ၁၃ မှု (ခန့်မှန်းတန်ဖိုးငွေကျပ် ၁၃၂၂၆၄၂၀၈၀) ကို သိမ်းဆည်းရမိခဲ့သည်။ ထိုကဲ့သို့ တရားမဝင်တင်သွင်းလာမှုများကြောင့် တရားဝင်တင်သွင်းသည့် ကုန်သည်လုပ်ငန်းရှင်များအတွက် စျေးကွက်ယှဉ်ပြိုင်နိုင်မှုစွမ်းအားကျဆင်းခြင်းနှင့် ထိခိုက်နစ်နာမှုများ ဖြစ်ပေါ်နိုင်စေပြီး နိုင်ငံတော်အတွက် ရသင့်ရထိုက်သည့် အခွန်ဘဏ္ဍာဆုံးရှုံးနစ်နာခြင်းများ ဖြစ်ပေါ်စေနိုင်သည်။ သို့ဖြစ်ပါ၍ တရားမဝင်ကုန်စည်တင်သွင်းမှုများကို သက်ဆိုင်ရာတာဝန်ရှိသူများက ယခုထက် ပိုမိုတားဆီးစစ်ဆေးကြပ်မတ် ဆောင်ရွက်သွားမည်ဖြစ်ကြောင်း တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီမှ သိရသည်။

NOM

ရန်ကုန်တိုင်းဒေသကြီးအတွက် စုံ/မ ရက်နှင့်ပတ်သက်၍ စက်သုံးဆီရောင်းမည့်ညွန်ကြားချက် ထုတ်ပြန်

မတ် ၁၀၊ ၂၀၂၆

NOM

စစ်လိုလားတဲ့ အစ္စရေး ဘဏ္ဍာရေးဝန်ကြီး ၎င်း​၏သားဖြစ်သူ တိုက်ပွဲအတွင်း ဒဏ်ရာအပြင်းအထန်ရ

"အစ္စရေးနဲ့ လက်ဘနွန်နယ်စပ်မှာ ဟစ်ဇ်ဘိုလာအဖွဲ့ရဲ့ လက်တုံ့ပြန်တိုက်ခိုက်မှုကြောင့် အစ္စရေးစစ်သား ၈ ဦး ဒဏ်ရာရရှိခဲ့ရာမှာ အစ္စရေးဘဏ္ဍာရေးဝန်ကြီး ဘီဇာလယ် စမော့ထရစ်ချ် Bezalel Smotrich ရဲ့ သားဖြစ်သူလည်း မော်တာကျည်ဆန် အစအန ထိမှန်ခဲ့တယ်လို့ Al Jazeera သတင်းဌာနက ဖော်ပြပါတယ်။

အဆိုပါ ကျည်စဟာ သူ့ရဲ့ ကျောပြင်ကနေ ဝမ်းဗိုက်အထိ ဖောက်ဝင်သွားခဲ့ပြီး အသည်းကို စုတ်ပြတ်သွားစေကာ ဝမ်းဗိုက်အတွင်းက အကြီးဆုံး သွေးကြောမကြီးနဲ့ တစ်လက်မအကွာမှာ တန့်နေခဲ့တာ ဖြစ်ပါတယ်။

ဝန်ကြီး စမော့ထရစ်ချ် Smotrich ဟာ အီရန်၊ လက်ဘနွန်တို့နဲ့ စစ်ဖြစ်ဖို့နဲ့ ပါလက်စတိုင်းတွေကို အစုလိုက်အပြုံလိုက် ဆက်လက်သတ်ဖြတ်ဖို့ အမြဲတမ်း တောင်းဆိုနေခဲ့သူ ဖြစ်ပါတယ်။ အခုအခါမှာတော့ ဒီစစ်ပွဲရဲ့ အကျိုးဆက်ဟာ သူ့ရဲ့ မိသားစုဆီကိုပါ ရိုက်ခတ်လာခဲ့ပြီ ဖြစ်ပါတယ်။"

ဓါတ်ပုံ- စမော့ထရစ်ချ်

NOM

မင်္ဂလာဒုံမြို့နယ်တွင် ငွေကျပ်သိန်း ၁,၇၀၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိ

မတ် ၁၀၊ ၂၀၂၆

မတ်လ ၇ ရက်နေ့ ၁၂၀၀ အချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်း အဖွဲ့သည် သတင်းအရ သက်သေများနှင့်အတူ မင်္ဂလာဒုံမြို့နယ်၊ ချစ်တီးကုန်းရပ်ကွက်၊ အောင်မင်္ဂလာအဝေးပြေးကားဝင်းအတွင်းရှိ ကားဂိတ်တွင် ပစ္စည်းလာရောက်ထုတ်ယူသူ တင်ဝင်း(ခ)အာရာဖတ် နှင့် စိုးနိုင်(ခ) ဆောလိမ် တို့အား စစ်ဆေးရှာဖွေရာ ၎င်းတို့ထုတ်ယူလာသည့် လေထိုးစက်အတွင်းမှ စိတ်ကြွရူးသွပ်ဆေးပြား ၁၇၀,၀၀၀ ပြား(ဒေသကာလတန်ဖိုးငွေကျပ်သိန်း ၁,၇၀၀)နှင့် လက်ကိုင်ဖုန်း ၂ လုံးတို့အား တွေ့ရှိသိမ်းဆည်းရမိခဲ့သဖြင့် တင်ဝင်း(ခ)အာရာဖတ်(၃၄)နှစ် နှင့် စိုးနိုင်(ခ)ဆောလိမ်(၂၅)နှစ်တို့အား မင်္ဂလာဒုံမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့် အရေးယူထားရှိပြီး ကွင်းဆက်များ ဆက်လက်ဖော်ထုတ်လျက်ရှိကြောင်းသိရသည်။

NOM

အမေရိကန်ရဲ့ သံတမန်ရေးရာဟာ အတုအယောင်တွေပဲ

အမေရိကန်နိုင်ငံရဲ့ သြဇာညောင်းတဲ့ သတင်းတင်ဆက်သူ တပ်ကာကာလ်ဆင် က အမေရိကန်နိုင်ငံရဲ့ နိုင်ငံတကာ ဆက်ဆံရေးနဲ့ သံတမန်ရေးရာ လုပ်ဆောင်ချက်တွေအပေါ် ဝေဖန်ထားတာ ဖြစ်ပါတယ်။

ပြီးခဲ့တဲ့နှစ် ဇွန်လနဲ့ ဒီနှစ် ဖေဖော်ဝါရီလတွေမှာ အီရန်နိုင်ငံနဲ့ လုပ်ဆောင်ခဲ့တဲ့ သံတမန်ရေးရာ ကြိုးပမ်းမှုတွေဟာ "အတုအယောင်" တွေသာ ဖြစ်ခဲ့မယ်ဆိုရင် ဒါဟာ အီရန်ဘက်က လုံခြုံစိတ်ချရပြီလို့ အထင်မှားအောင် လုပ်ပြီး ခိုးကြောင်ခိုးဝှက် တိုက်ခိုက်ဖို့ ပြင်ဆင်တာမျိုး ဖြစ်နေမယ်ဆိုရင် ဒါဟာ အလွန်တရာ အရှက်သိက္ခာမဲ့တဲ့ လုပ်ရပ်ဖြစ်တယ်လို့ ဆိုပါတယ်။

ဒီလိုမျိုးလှည့်ဖျားပြီး တိုက်ခိုက်တာဟာ "ပုလဲဆိပ်ကမ်း (Pearl Harbor)" တိုက်ခိုက်ခံရမှုထက် ဘာများ ပိုကောင်းနေမှာလဲလို့ မေးခွန်းထုတ်ထားပါတယ်။ ဒါဟာ အမေရိကန် နိုင်ငံသားတွေအတွက်ရော နိုင်ငံအတွက်ပါ အဆင့်အတန်းနိမ့်ကျတဲ့ လုပ်ရပ်ဖြစ်ပြီး ပါဝင်ပတ်သက်သူတွေကို အပြစ်ပေးသင့်တယ်လို့ ပြောဆိုထားပါတယ်။

ယူကရိန်းနိုင်ငံကို ကြားခံ (Proxy) အဖြစ် အသုံးပြုပြီး ရုရှားနဲ့ ဖြစ်ပွားနေတဲ့ ပဋိပက္ခကို ဘယ်လိုဖြေရှင်းကြမလဲ? "ငါတို့က စစ်တိုက်တယ်။ ယူကရိန်းလူမျိုးတွေကတော့ အသက်ပေးနေရတယ်" လို့ ထောက်ပြထားပါတယ်။

အီရန်ကို စစ်မကြေညာခင်ကတည်းက ဒီပြဿနာတွေကို ဖြေရှင်းထားသင့်တာပါ။ အခုတော့ ရုရှားက အီရန်ကို တိုက်ခိုက်ဖို့ လိုအပ်တဲ့ အချက်အလက်တွေကို ပြန်ပေးနေပြီ (အမေရိကန်က ယူကရိန်းကို ကူညီသလိုမျိုး) လို့ ဆိုပါတယ်။

အခုလို လုပ်ရပ်တွေကြောင့် ကမ္ဘာကြီးကို ပေးလိုက်တဲ့ သတင်းစကားကတော့ "အမေရိကန်ရဲ့ သံတမန်ရေးရာဟာ အတုအယောင်တွေပဲ" ဆိုတာ ဖြစ်နေပါတယ်။ ဆွေးနွေးပွဲတွေ လုပ်နေစဉ်မှာပဲ နောက်ကွယ်ကနေ တိုက်ခိုက်ဖို့ ပြင်ဆင်နေတာမျိုး ဖြစ်တဲ့အတွက် နောင်မှာ ဘယ်လိုပြဿနာမျိုးကိုမဆို ငြိမ်းချမ်းစွာ ဖြေရှင်းဖို့ ခက်ခဲသွားလိမ့်မယ်လို့ သတိပေးထားတာ ဖြစ်ပါတယ်။

NOM

"သိရှိနိုင်ပါရန်"

၂၀၂၆ ခုနှစ်၊ တက္ကသိုလ်ဝင်စာမေးပွဲနှင့် စက်မှု၊ စိုက်ပျိုး၊ မွေးမြူရေး တက္ကသိုလ်ဝင်စာမေးပွဲများ ကျင်းပနေသည့် ကာလအတွင်း ဆရာဆရာမများ၊ ကျောင်းသားကျောင်းသူများ၊ စာမေးပွဲတာဝန်ရှိသူများ၊ ကျောင်းသားမိဘပြည်သူများ သွားလာမှု အဆင်ပြေချောမွေ့စေရန်အတွက် အစီအမံများ ဆောင်ရွက်ထားကြောင်း သိရသည်။

ထိုသို့ဆောင်ရွက်ရာ၌ သက်ဆိုင်ရာတိုင်းဒေသကြီးနှင့် ပြည်နယ်အလိုက်မော်တော်ယာဉ် အသုံးပြုခွင့်ဆိုင်ရာ အစီအမံများအဖြစ် စာမေးပွဲအတွက် အသုံးပြုမည့်ယာဥ်တွင် “စာမေးပွဲတာဝန်” သို့မဟုတ် “Car Pass” ကတ်ပြားများကို ကားရှေ့မှန်တွင်ကပ်၍ အသုံးပြုခွင့်ပြုမည်ဖြစ်သလို စာမေးပွဲတာဝန်ခံယာဉ်များနှင့် ကျောင်းသား ကြို/ပို့ ယာဉ်များကို စုံ/မ အက္ခရာ( ခွဲခြားခြင်းမရှိဘဲ) သွားလာခွင့်ပြုမည်ဟုဆိုသည်။

အလားတူ ပြင်ပဖြေကျောင်းသားများအနေဖြင့် မိမိတို့၏ “စာမေးပွဲဖြေဆိုခွင့် ကတ်ပြား” ပြသ၍ မော်တော်ဆိုင်ကယ်နှင့် မော်တော်ယာဉ်များ မောင်းနှင်ခြင်းတို့ကို သက်ဆိုင်ရာ ခရိုင်/မြို့နယ်ပညာရေးမှူးများနှင့် အထွေထွေ အုပ်ချုပ်ရေးမှူးများက ပူးပေါင်းဆောင်ရွက်ထားရှိကြောင်းလည်း သိရသည်။

အီရန်တော်လှန်ရေးအစောင့်တပ်ဖွဲ့ (IRGC) က ကာဒစ္စတန်ဒေသ၊ အယ်လ်ဟာရီယာ Al Harir အခြေစိုက်စခန်းရှိ အမေရိကန်စစ်ဌာနချုပ်ကို ဒုံးကျည် ၅ စင်းဖြင့် ပစ်ခတ်တိုက်ခိုက်ခဲ့ကြောင်း ထုတ်ပြန်လိုက်သည်။

NOM

ရန်ဖြစ်သည်ကို ဖြန်ဖြေပေးသည့်ရဲလှည့်ကင်းအဖွဲ့ကို ကားဖြင့်တိုက်ပြီးသံတုတ်ဖြင့် ရိုက်သဖြင့်ရဲတပ်ဖွဲ့ဝင်နှစ်ဦးသေဆုံး၊ ပြစ်မှုကျူးလွန်သူတစ်ဦးမှာ စသုံးလုံးမှ ဒုစုံစမ်းရေးမှူးဖြစ်နေ

NOM မတ် ၁၀၊ ၂၀၂၆

ရွှေပေါက်ကံမြို့သစ်၊ (၁၂) ရပ်ကွက်ခွဲ၊ ပုဂံလမ်းမကြီး (၁၂) စျေးထိပ်တွင် မတ်လ ၉ ရက်ည ၁၀:၃၀ နာရီအချိန်၌ ရန်ဖြစ်သည်ကိုလာရောက်ဖြန်ဖြေပေးနေသော ရဲလှည့်ကင်းတပ်ဖွဲ့ဝင်လေးဦးကို ကားဖြင့်ဝင်တိုက်ပြီး သံတုတ်များဖြင့်ရိုက်သဖြင့် ရဲတပ်ဖွဲ့ဝင်နှစ်ဦးသေဆုံးပြီး နှစ်ဦးပြင်းထန်စွာဒဏ်ရာရခဲ့ကြောင်းနှင့် ပြစ်မှုကျူးလွန်သူတရားခံတစ်ဦးသည် စသုံးလုံးမှဒုစုံစမ်းရေးမှူးဖြစ်ကြောင်းသိရသည်။

ဖြစ်စဥ်မှာ လှည့်ကင်းတပ်ဖွဲ့ဝင်များသည် ရန်ဖြစ်နေကြောင်းသတင်းအရ (၁၂) စျေးထိပ်သို့သွားရောက်ရာ ကားတစ်စီးသည် လမ်းပေါ်တွင် ကန့်လန့်ဖြတ်ရပ်ထားပြီး အရက်မူးနေသော ယာဥ်မောင်းမြတ်ကိုကိုက လှည့်ကင်းအဖွဲ့ဝင်များကို ခင်ဗျားတို့ကရဲတွေဖြစ်လို့ရှင်းပေးဟုပြောရာ ရဲတပ်ဖွဲ့ဝင်များကမေးမြန်းဖြန်ဖြေနေစဥ် မြတ်ကိုကို၏ဖခင် ဦးကြင်ခရမ်းနှင့် ညီဖြစ်သူ စသုံးလုံးမှ ဒုတိယစုံစမ်းရေးမှူး အေးမင်းတို့က နောက်ထပ်ကားတစ်စီးဖြင့် ရောက်လာပြီး သံတုတ်များဖြင့် ဝင်ရောက်ရိုက်နှက်သဖြင့် လှည့်ကင်းတပ်ဖွဲ့ကဖြန်ဖြေပြီး ဒဏ်ရာရသူများအားအမှုဖွင့်ရန်ဆေးစာယူရန်ဆောင်ရွက်ပြီးပြန်ထွက်စဥ် မြတ်ကိုကိုမှ ကားကိုပြန်ကွေ့ပြီး လှည့်ကင်းတပ်ဖွဲ့ဝင်လေးဦးကို ကားဖြင့်ဝင်တိုက်ပြီးသူ၏ဖခင်နှင့် အစ်ကိုဖြစ်သူ စသုံးလုံးမှ ဒုစုံစမ်းရေးမှူးဆိုသူတို့က လဲကျနေသည့်ရဲတပ်ဖွဲ့ဝင်များကိုသံတုတ်များဖြင့် ဝင်ရိုက်ရာရဲတပ်ဖွဲ့ဝင်နှစ်ဦးသေဆုံးပြီး နှစ်ဦးပြင်းထန် စွာဒဏ်ရာရသည့်အတွက် တရားခံများဖြစ်သော အမှတ် (၁၈၇)၊ ကုန်းဘောင် (၂) လမ်း၊ (၁၄) ရပ်ကွက်၊ရွှေပေါက်ကံမြို့သစ်နေယာဥ်မောင်းမြတ်ကိုကို၊ ဖခင်ဖြစ်သူဦးကြင်ခရမ်း၊ ညီဖြစ်သူစသုံးလုံးမှဒုတိယစုံစမ်းရေးမှူး အေးမင်းတို့ကိုလူသတ်မှုဖြင့်ဖမ်းဆီးအရေးယူထားကြောင်းသိရသည်။

NOM

ပထမဆုံးအကြိမ် ပိုက်ကျော်ခြင်းလိဂ်၂၀၂၆  ပြိုင်ပွဲကျပ်သိန်း ၈၀၀ ကျော်ချီးမြှင့်မည်

NOM မတ် ၁၀၊ ၂၀၂၆

အားကစားနှင့် ကာယပညာဦးစီးဌာန၊ မြန်မာနိုင်ငံ ပိုက်ကျော်ခြင်းအဖွဲ့ချုပ်မှ ကြီးမှူး၍ ကလပ်အသင်းများ ဖွံ့ဖြိုးတိုးတက်ရေးကော်မတီနှင့် ရွှေသံလွင်မီဒီယာတို့မှ ပူးပေါင်းစီစဉ်သည့် ပထမဆုံးအကြိမ်ပိုက်ကျော်ခြင်းလိဂ်၂၀၂၆  ပြိုင်ပွဲစာနယ်ဇင်းမိတ်ဆက်ပွဲကို မတ်လ ၁၄ ရက်နေ့တွင် စတင်ကျင်းပပြုလုပ်သွားမည်ဖြစ်ကြောင်း ယနေ့မွန်း လွဲ ၂ နာရီက တာ‌မွေမြို့နယ်၊ ရွှေထွဠ်တင်၀န်း၌ ပြုလုပ်သည့်စာနယ်ဇင်းရှင်းလင်းပွဲမှသိရသည်။
   
အဆိုပါပြိုင်ပွဲတွင် အမျိုးသမီးသုံးယောက်တွဲ ပြိုင်ပွဲဝင်အသင်း (၅) သင်း၊ အမျိုးသားပြိုင်ပွဲဝင် အသင်း (၁၀) သင်းမှ ပြိုင်ပွဲအမျိုးအစား နှစ်မျိုးအဖြစ် အမျိုးသားသုံးယောက်တွဲ၊ အမျိုးသားလေးယောက်တွဲ ပါဝင်ယှဉ်ပြိုင်ကြမည်ဖြစ်၍ ဆု‌ကြေးကျပ်သိန်း ၈၀၀ ကျော်ချီမြှင့်ပေးသွားမည်ဖြစ်သည်။

ပြိုင်ပွဲကို‌ နေ့စဥ် နံနက် ၁၀ နာရီမှ ည‌ နေ ၅ နာရီအထိ ယှဉ်ပြိုင်ကြမည်ဖြစ်ပြီး သု၀ဏ္ဏပိုက်‌ကျော်ခြင်း အားကစားရုံ၌ မည်သူမဆို ဝင်ကြေးအခမဲ့ဖြင့် ကြည့်ရှုအားပေးနိုင်ကြောင်းသိရသည်။