Менш чым праз месяц пасля запуску расійская авіякампанія адмяніла рэйсы з Гомеля ў Маскву

10 лістапада расійская авіякампанія Nordwind выканала першы рэйс з Масквы ў Гомель. Планавалася, што самалёты будуць лятаць тройчы на тыдзень.

Цяпер жа ў раскладзе кампаніі рэйсаў паміж Гомелем і Масквой няма, як і рэйсаў з Гродна, якія анансаваліся з 2 снежня.

Прычына — нізкая напаўняльнасць рэйсаў.

Польшча: На тэрыторыі Беларусі знаходзіцца каля сямі тысяч мігрантаў

Яшчэ каля 3 тысяч ужо адпраўленыя назад у Сірыю і Ірак, пра гэта заявіў прадстаўнік міністра-каардынатара спецслужбаў Польшчы Станіслаў Жарын.

Жарын таксама адзначыў, што назіраецца зніжэнне колькасці спробаў нелегальнага пранікнення мігрантаў у Польшчу, «аднак з гэтага не варта рабіць паспешных высноў аб заканчэнні крызісу».

Паводле яго ацэнкі, варта чакаць «вяртання да тактыкі адпраўкі невялікіх груп» для пошуку недастаткова добра абсталяваных месцаў на мяжы, што палегчыць яе незаконнае перасячэнне.

Нарвежскі футбольны клуб зрабіў форму з QR-кодам. Ён вядзе на артыкул пра парушэнне праў чалавека ў Катары, дзе пройдзе чэмпіянат свету

У стварэнні формы разам з клубам «Тромсё» ўдзельнічаў былы мігрант Малкольм Бідаль: яго арыштавалі ў Катары, калі ён для свайго блога асвятляў умовы працы ў краіне, паведамляецца на сайце клуба.

У лютым клубы «Тромсё», «Стромсгодсэт» і «Будзё-Клімт» заклікалі да байкоту чэмпіянату свету ў Катары.

Па звестках праваабаронцаў і СМІ, падчас будаўніцтва стадыёнаў і спартовых аб'ектаў да ЧС у Катары загінулі больш за 6,5 тысячы працоўных-мігрантаў з Індыі, Пакістана, Непала і іншых краін. Акрамя таго, ФІФА і ўрад Катара падазравалі ў змове — перамогу заяўкі краіны на правядзенне турніру палічылі вынікам карупцыйных дзеянняў.

35-гадовы вайсковец загінуў у турме ў Івацэвічах

СК паведаміў, што старшына ўнутранай службы загінуў сёння ноччу ад агнястрэльнага ранення падчас нясення службы ў выпраўленчай калоніі ў Івацэвічах.

Абставіны высвятляюцца.

Ад хрушчоўкі ў спальніку да новабудоўлі каля метро. Якія кватэры можна купіць да 40 тысяч даляраў

Долі ў кватэрах і зусім дабітыя хрушчоўкі ў спіс не ўключалі. Абралі аднапакаёўкі, у якіх не страшна жыць.

Чытайце і глядзіце па спасылцы

Некалі папулярны сэрвіс зацыкленных відэа Coub збіраюцца прадаваць

Кампанія «Камітэт» плануе ў найбліжэйшы час адшукаць новага ўладальніка для сэрвіса Coub. Хостынг з кароткімі зацыкленнымі відэа працуе з 2012 года, а пад кантроль «Камітэта» перайшоў летась, калі ў Coub скончыліся грошы на развіццё.

Штомесяц на хостынг запампоўваюць 65 тысяч ролікаў, а аўдыторыя Coub складае каля 3 мільёнаў чалавек.

Карыч распавёў пра актывацыю запаснога рухавіка ў галаве з-за санкцый

Драгамір Карыч, які з братам Багалюбам і іншымі членамі сям’і валодае забудоўшчыкам Dana Holdings, што сёлета трапіў пад санкцыі ЗША, сустрэўся з Лукашэнкам і распавёў пра эфект ад санкцый:

«Санкцыі даюць кожнай дзяржаве магчымасць актываваць запасны рухавік у галаве, каб паглядзець, дзе вы памыляліся, каб, выкарыстоўваючы вашы рэсурсы, выйсці са становішча, каб з’явілася больш магчымасцяў», — прыводзіць словы Карыча БелТА.

Карыч таксама заявіў, што Лукашэнка стварыў ідэальныя ўмовы для бізнэсу, але сёння даводзіцца працаваць не наўпрост, а праз розныя краіны.

Не трэба збіраць даныя па камуналцы і рабіць фота з канцэртаў. Няўжо настаўнікаў разгрузілі і далі магчымасць проста вучыць дзяцей?

Педагогі ў школе перыядычна скардзяцца на павышаную нагрузку: акрамя падрыхтоўкі ўрокаў і праверкі сшыткаў, яны вымушаныя рабіць разнастайныя справаздачы, якія не тычацца справы. Але напрыканцы лістапада ўступіла ў сілу распараджэнне віцэ-прэм'ера Мікалая Снапкова. Яно вызваляе педагогаў ад працы, не звязанай з іх непасрэднай прафесійнай дзейнасцю.

Аднак, як кажуць настаўнікі, яно пакуль чамусьці не працуе.

Чытайце па спасылцы

⛄️У ноч на сераду месцамі да мінус 23

Снег, калі і пройдзе, то толькі па паўднёвым усходзе Гомельскай вобласці. 

Уначы будзе 11-17 градусаў марозу, пры праясненнях — мінус 18-23. Напрыклад, у Езярышчы чакаецца да мінус 21.
Па Гомельшчыне будзе мінус 5-10.

Днём будзе ад мінус 4 па поўдні да 14 градусаў ніжэй за нуль па поўначы.

У Мінску ўначы чакаецца да мінус 14, столькі ж у Гродне. У Брэсце ўначы да мінус 10. Удзень у сталіцы чакаецца да мінус 11, у Гродне да мінус 9, у Брэсце да мінус 7.

❗️Паўлючэнка сказаў: «Ваша кампанія скончаная». Новыя падрабязнасці ад'езду Ціханоўскай з Беларусі

Святлана Ціханоўская распавяла, як выязджала з краіны пасля выбараў 2020 года. Дэталі тых падзей апублікаваў часопіс The New Yorker.

Нагадаем, што 10 жніўня 2020 года Ціханоўская прыехала ў ЦВК, дзе яе сустрэлі высокапастаўленыя сілавікі. Пасля кандыдатку ў прэзідэнты адвезлі на літоўскую мяжу.

Чытайце далей

«Гніда, прышчапляйся ад кавіду». Аператыўны штаб Маскоўскай вобласці апублікаваў рэкламу вакцынацыі з агрэсіўным заклікам

У афіцыйным тэлеграм-канале аперштаба Маскоўскай вобласці па барацьбе з каранавірусам з’явілася карцінка ў стылі савецкага агітацыйнага плаката. На ёй намаляваны Уладзімір Маякоўскі і агрэсіўны заклік прайсці вакцынацыю: «Чтоб в живых остаться, гнида, прививайся от ковида!»

Аўтары падкрэслілі, што не вітаюць грубасць, але прышчэпка — «вымушаная неабходнасць».

Гэта не першы выпадак незвычайнай рэкламы вакцынацыі: у кастрычніку абласны штаб публікаваў ролік з катом, які нецэнзурна заклікаў вакцынавацца, каб не разносіць бацылу.

Канцэрн Henkel вырашыў адмовіцца ад супрацоўніцтва з беларускімі тэлеканаламі

Нямецкі хімічны канцэрн Henkel вырашыў адмовіцца ад супрацоўніцтва з каналамі АНТ, СТБ і Беларусь-1. Пра гэта напісала Frankfurter Allgemeine Zeitung.

Гэта здарылася пасля публікацыі дакладу праваабарончай арганізацыі Libereco аб рэкламе заходніх кампаній на дзяржТБ Беларусі. Henkel аказаўся на трэцім месцы ў ліку заходніх рэкламадаўцаў на беларускіх тэлеканалах.

У канцэрне заявілі, што не будуць размяшчаць новую рэкламу на дзяржТБ.

«Мы вельмі сур'ёзна ставімся да крытыкі і адаптавалі нашу мясцовую маркетынгавую дзейнасць з улікам гэтага — сказаў прадстаўнік кампаніі Henkel па запыце FAZ. — Мы не забраніравалі новы рэкламны час на дзяржаўным тэлебачанні», — адказала Henkel.

Henkel — вядомы вытворца бытавой хіміі і касметыкі. Яму належаць такія брэнды, як Persil, Pril, Bref, Vernel, «Пемалюкс», «Ласка», «Дэні», Losk, Somat, Clin, Fa, Taft, Brillance, Shamtu, клей «Момант», Metylan, Ceresit ды інш.

У Маскве мужчына адмовіўся надзець маску і адкрыў страляніну ў шматфункцыянальным цэнтры

Загінулі два чалавекі.

Стралок затрыманы, ім аказаўся былы армейскі падпалкоўнік.

У цэнтры Львова жанчына адкрыла фэйкавы абменнік. Мясцовага жыхара там адразу надурылі на 19 тысяч даляраў

Кіяўлянка разам з саўдзельнікамі арганізавала фіктыўны пункт абмену валют і табліцай з курсамі, апаратам для пералічвання і фальшывымі грашыма. На кручок трапіўся мясцовы жыхар, які аддаў махлярцы 19 тысяч даляраў.

У паліцыю паскардзіўся мужчына, які распавёў, што 29 лістапада ў адным з абменных пунктаў у цэнтры Львова касірка ўзяла ў яго грошы для абмену і сышла разам з імі праз заднія дзверы. Прычым мужчына аддаў 19 тысяч даляраў.

Паліцыя зазначае, што махлярка выкарыстала парык і падробленыя дакументы. Для пошуку патэнцыйных ахвяр жанчына давала анлайн-аб'явы пра абмен буйной сумы замежнай валюты, прапаноўваючы паніжаны курс.

Жанчыну затрымалі ў Кіеве, ёй пагражае пазбаўленне волі на тэрмін ад трох да васьмі гадоў.

444 навагоднія ёлкі ў кватэры: здаецца, гэты немец пабіў сусветны рэкорд

Томас Ерамін з Рынтэльна, што ў Ніжняй Саксоніі, любіць Каляды і Новы год і паставіў у сваёй кватэры 444 аздобленыя шарыкамі і мішурой ёлкі.

Прадстаўнік нямецкага Інстытута рэкордаў зайшоў у госці да 55-гадовага Томаса і яго жонкі Сюзаны, каб пераканацца ў тым, што ўсе заяўленыя на паперы штучныя дрэвы сапраўды ёсць у наяўнасці. У выніку калекцыя была прызнанаы новым сусветным рэкордам, піша Deutsche Welle.

Акрамя проста ярка ўпрыгожаных, ёсць у калекцыі і тэматычныя елкі: напрыклад, з персанажамі з «Зорных войнаў» або з гумовымі качачкамі. Ёлкі з гарышча Томас заўсёды дастае загадзя — ужо 1 жніўня, бо, апроч іншага, трэба развесіць 72 тысячы шароў. Самая вялікая ёлка, памерам 3,50 метра, вісіць на столі.

СМІ заўважылі, што пенсіі ў Мінску зменшыліся. Мінгарвыканкам хутка адрэагаваў — статыстыка з сайта знікла

Найбуйнейшы партал, прызнаны ўладамі экстрэмісцкім, звярнуў увагу на афіцыйную статыстыку па пенсіях у Мінску.

Журналісты заўважылі, што некаторыя віды пенсій зменшыліся.

Праз некалькі гадзін сваім артыкулам адказала агенцтва «Мінск-Навіны», заснавальнікам якога з'яўляецца Мінгарвыканкам.

У артыкуле тлумачыцца, якім чынам знізіліся ў Мінску пенсіі. Спецыялісты прыводзяць такі прыклад:

«На паверсе жывуць тры пенсіянеры. Адзін з іх атрымлівае 300 рублёў, іншы — 500 рублёў, трэці — 700 рублёў. Сярэдняя іх пенсія роўная 500 рублёў. Але калі заўтра той, хто атрымлівае 700 рублёў, захоча пераехаць, напрыклад, да сына ў Расію, то сярэдняя пенсія для дваіх астатніх суседзяў складзе 400 рублёў».

Але самае цікавае не гэта. Статыстыка па пенсіях з сайта Мінгарвыканкама зусім знікла.

Перад гэтым сайт перастаў публікаваць даныя па колькасці пенсіянераў у Мінску. За студзень-жнівень іх стала на 8,5 тысячы менш.