«Белпошта» хоча абнавіць дызайн паштовых скрыняў. Да ўдзелу ў конкурсе запрашаюць усіх ахвотных

Конкурс працягнецца з 1 снежня да 28 лютага. Удзельнічаць могуць грамадзяне Беларусі, якім больш за 18 гадоў і якія пастаянна жывуць у РБ.

Дызайн-макет можа быць намаляваны ўручную або пры дапамозе праграмных прадуктаў. Разам з макетам трэба дасылаць заяўку, а таксама апісанне тэхнічных характарыстык скрыні.

Аб умовах конкурсу можна даведацца па спасылцы.

Экстрэмісцкім прызналі тэлеграм-канал «Ник и Майк».

«Ну, это пипец какой-то, Юра!». Следчыя паказалі відэа аварыі, у якой пацярпелі чатыры чалавекі

ДТЗ адбылося 3 ліпеня ў Асіповіцкім раёне. 43-гадовы мінчук абраў небяспечную хуткасць на грунтава-жвіровай дарозе, у выніку машыну занесла, пасля чаго яна ўрэзалася ў дрэва.

Пацярпелі чатыры чалавекі, у тым ліку і кіроўца, якога, мяркуючы па відэа, эмацыйна прасілі не ехаць хутка.

У выніку мінчука асудзілі на чатыры гады калоніі-пасялення. Машыну канфіскавалі.

Базанаў: На перакус і каву не пагаджаліся. Што перашкаджае падмяшаць штосьці псіхатроннае?

Дзяржаўныя СМІ амаль цалкам праігнаравалі тэму скандальнага затрымання кіраўніка АБФФ. Затое адразу па вяртанні Базанаў пагаварыў з газетай «Прэсбол», частка акцый якой якраз належыць федэрацыі футбола.

Базанаў распавёў, што з жонкай правёў у паліцэйскім пастарунку 8 з паловай гадзін:

— Провели там с женой восемь с половиной часов. Нам предлагали перекусить, попить кофе, но мы ни на что не соглашались. Что им мешает подмешать что-нибудь психотронное?

Псіхатронная зброя з’яўляецца выдуманай, яна нібыта пры дапамозе біялагічнай энергіі ўздзейнічае на мозг.

Судзілі Бабарыку, Знака і Калеснікаву, ліквідавалі «Вясну». Хто з суддзяў трапіў пад санкцыі ЕС

2 снежня ўступае ў сілу пяты пакет санкцыяў Еўрасаюза супраць беларускага рэжыму. У спісе асобаў, якія трапілі пад забарону, некалькі суддзяў і пракурор.

Расказваем, што пра іх вядома.

Чытайце па спасылцы

Суд пакараў турмой жыхарку Гомеля з псіхічным разладам за тое, што ўзяла за руку амапаўца

Суд у Гомелі вынес прысуд 49-гадовай Ларысе Кузьменка. За «гвалт над міліцыяй» (яна схапіла за руку супрацоўніка АМАП) жанчына пакараная 2 гадамі пазбаўлення волі ў калоніі агульнага рэжыму, паведамляе «Радыё Свабода».

У Ларысы дэпрэсія і клаўстрафобія. Яна са жніўня знаходзіцца ў турме.

27 верасня 2020 года ў Гомелі падчас акцыі пратэсту супрацоўнікі АМАП прымянілі слёзацечны газ і святлашумавую зброю. Падчас разгону дэманстрантаў Ларыса Кузьменка схапіла за руку супрацоўніка АМАП, чым «прычыніла яму фізічны боль». Пацярпелы на суд не з’явіўся.

Самы гуманны суд у свеце: мінчук ударыў кулаком у сківіцу кантралёра і атрымаў 2900 рублёў штрафу

Самы гуманны суд у свеце: маладзечанец, які засунуў жонцы нажніцы ў рот ды пагражаў забойствам, атрымаў 1,5 года хатняй хіміі

Паўсюдныя камеры назірання і сістэмы ідэнтыфікацыі па твары. Як лічбавыя тэхналогіі ўскладнілі працу шпіёнаў

Шпіёніць так, як раней, ужо не атрымаецца. У 2010 годзе выведнікі Масада распрацавалі план таемнага забойства палесцінскага баевіка ў Дубаі. У іх усё атрымалася, толькі не атрымалася зрабіць гэта таемна — камеры назірання здымалі іх перад і пасля таго, як яны надзелі маскіроўку.

Якія ёсць новыя выклікі шпіёнскай прафесіі, чытайце па спасылцы.

Лукашэнка — расійскаму прапагандысту: Назаві яшчэ адну такую краіну, дзе руская мова развіваецца на шкоду нацыянальнай

Лукашэнка ў размове з расійскім прапагандыстам Дзмітрыем Кісялёвым прызнаў, што руская мова ў Беларусі развіваецца на шкоду роднай беларускай.

«Мы гаворым з табой на рускай мове. Назаві яшчэ адну такую краіну, дзе руская мова дзяржаўная. Добра дзяржаўная, афіцыйная, — дзе вось так вось развіваецца руская мова. Нават на шкоду, па-мойму, нашай нацыянальнай, роднай, беларускай мове», — дадаў Лукашэнка.

Нагадаем, менавіта Аляксандр Лукашэнка стаў адным з галоўных ініцыятараў увядзення рускай мовы ў якасці дзяржаўнай у Беларусі. З 1995 года сфера ўжывання беларускай мовы значна скарацілася. Справаводства, адукацыя і тэлебачанне былі ў значнай ступені русіфікаваныя.

Мінздароўя: Чарговая хваля каранавіруса ў Беларусі заканчваецца

З такой заявай 2 снежня выступіў міністр аховы здароўя Дзмітрый Піневіч.

— Гэтая чарговая хваля каранавіруса заканчваецца, і мы ўпэўнена ідзём уніз. Гэтая цяперашняя хваля была вышэйшая, чым папярэднія, і пытанне ў тым, наколькі нізка мы спусціліся паміж гэтымі хвалямі, — сказаў кіраўнік Мінздароўя.

Па словах Піневіча, у Беларусі ад COVID-19 прышчэплены звыш 3,5 млн чалавек, аднак медыкі плануюць давесці колькасць вакцынаваных да 5 мільёнаў.

Узровень барацьбы з экстрэмізмам у Беларусі: прызнаны экстрэмісцкім тэлеграм-канал «Критика чистого разума», у якога 147 падпісчыкаў.

Раней сёння стала вядома пра прызнанне экстрэмісцкімі каналаў Арцёма Шрайбмана і «Нік і Майк».

Санкцыйныя навіны: ЕС афіцыйна прыняў пяты пакет санкцый супраць Беларусі.

Таксама ЗША ўвялі новыя санкцыі па Беларусі — у спісе фізічныя і юрыдычныя асобы, а таксама транспартныя сродкі: Дзмітрый Баскаў, кіраўніцтва ГУБАЗіК: Андрэй Паршын, Дзяніс Чамаданаў і Міхаіл Бедункевіч, кіраўнік ДПК Анатоль Лапо, Дзмітрый Лукашэнка, а таксама «Прэзідэнцкі спартыўны клуб», «ГардСэрвіс», «Слаўкалій», «Белтэхэкспарт», «Агат», «Пеленг» і іншыя.

Абмежаванні закранулі 20 чалавек, 12 арганізацый і тры самалёты. Поўны спіс — па спасылцы.

Санкцыі пашырылі Вялікабрытанія і Канада: пад абмежаванні трапіў «Беларуськалій», супрацоўнікі ГУБАЗіК, прапагандысты (кшталту Гладкай і Азаронка)і іншыя асобы.

«Прыедзеш у Маскву, і цябе са «Спутнікам» пасадзяць на каранцін». Высвятляем, чаму Расія не прызнае сваю ж вакцыну

Аказваецца, беларусы, якія вакцынаваліся расійскім «Cпутнікам» у Беларусі, у Расіі лічацца непрышчэпленымі. Пра гэта «Нашай Ніве» расказалі чытачы. Чаму так адбываецца?

Што кажуць законы і чыноўнікі, чытайце па спасылцы.

У Заслаўі мужчына хацеў высушыць адзенне на абагравальніку, у выніку трапіў у бальніцу з апёкамі 20% цела

Сёння ноччу ў Заслаўскую бальніцу шпіталізавалі 52-гадовага мужчыну. Як паведамляе mlyn.by, ён сушыў адзенне на абагравальніку. Па неасцярожнасці яно загарэлася, у выніку чаго мужчына атрымаў апёкі рук і тулава, 20% цела.

У доме ўдалося пазбегчы вялікага пажару, ратавальнікі на месца здарэння не выязджалі. Падрабязнасці вясвятляюцца.

МЗС Украіны: Лукашэнка спаліў усе масты, зрабіўшы Беларусь варожай краінай

Цяпер Украіна разглядае Беларусь як варожую дзяржаву і не выключае не толькі магчымасць расійскага ўварвання з боку суседа з поўначы, але і ўдзелу ў ім беларускіх узброеных сіл.

Заява Лукашэнкі пра гатоўнасць наведаць Крым ператварылі гэтую краіну ў варожую для Украіны. Пра гэта ў інтэрв'ю латвійскаму парталу Sargs.lv заявіў міністр замежных спраў Украіны Дзмітрый Кулеба.

«Гэтай заявай Лукашэнка па сутнасці спаліў усе масты ў адносінах з Украінай, зрабіўшы Беларусь краінай, варожай для Украіны», — сказаў міністр, назваўшы Лукашэнку дыктатарам.

Кулеба распавёў, што ў Кіеве сур'ёзна разглядаюць не толькі магчымасць ўварвання расейскіх войскаў праз Беларусь, але і ўдзелу беларускіх вайскоўцаў у гэтай аперацыі.

Што цікавага адбылося ў беларускай музыцы за восень?

Нягледзячы на цёмны час для беларускай культуры, яна не стаіць на месцы. Падрыхтавалі для вас падборку музычных навін, а таксама новых альбомаў, кліпаў і песень, якія выйшлі ўвосень.

Чытайце па спасылцы.

Фільм тыдня: «Дом Gucci». Новая амбітная стужка Рыдлі Скота з гангстарамі, мафіёзі і забойствамі

Новы фільм Рыдлі Скота, які ўжо ідзе ў Мінску, варта паглядзець хаця б дзеля візуальнай эстэтыкі і добрай музыкі. Кожная інтэр’ерная сцэна, лакацыя, касцюм — як карціна. А таксама, каб нацешыцца ігрой Лэдзі Гагі.

Чытайце па спасылцы.

Расійскі парламентарый звязаў санкцыі супраць Беларусі з «каланізатарскай палітыкай Захаду»

Ніякія санкцыі супраць Беларусі не дапамогуць наладзіць жыццё ў разбураных Захадам краінах Блізкага Усходу і Афрыкі. Пра гэта заявіў кіраўнік камітэта Дзярждумы Расіі па міжнародных справах Леанід Слуцкі.

«Увядзенне санкцый супраць Беларусі ў сувязі з міграцыйным крызісам — крывадушная спроба перакласці адказнасць за наступствы каланізатарскай палітыкі калектыўнага Захаду ў найноўшай гісторыі», — напісаў Леанід Слуцкі.

«Ніякія рэстрыкцыі супраць беларускіх уладаў не дапамогуць наладзіць жыццё ў Іраку, Сірыі і астатніх краінах, разбураных заходнімі «цывілізатарамі». Гэтак жа, як не дапамогуць бежанцам вярнуцца ў свае дамы або здабыць новыя», — адзначыў дэпутат.

На ягоную думку, фактычна, Мінск цяпер «пакараны» за вынік дзеяння шматлікіх кааліцый на чале з ЗША.

Канфіскаваны форд Віктара Бабарыкі прадалі з аўкцыёну — заявіліся шэсць удзельнікаў

Сёння адбыўся аўкцыён, на якім прадавалі машыну Ford Fiesta 2015 года. Раней яна належала Віктару Бабарыку. Ford канфіскаваў ДФР, прадалі яго дзеля кампенсацыі «шкоды», якую нібыта нанёс банкір. 

У аўкцыёне ўдзельнічалі 6 чалавек. Стартавы кошт быў 17 тысяч беларускіх рублёў. 

У выніку пасля некалькіх крокаў машыну прадалі за 19 595 рублёў. Пакупнік невядомы. У яго ёсць дзесяць сутак, каб цалкам унесці грошы.

Як выглядалі панк-провады Ангелы Меркель?

Сёння адбылася ўрачыстая цырымонія з нагоды сыходу з пасады канцлера ФРГ Ангелы Меркель. Яна кіравала Германіяй 16 гадоў. На мерапрыемстве праз каранавірус прысутнічалі толькі 200 гасцей, яно прайшло ў абмежаваным фармаце.

Нагадаем, што для музычнага суправаджэння Меркель выбрала песні панк-рокершы Ніны Хаген і Хільдэгарды Кнеф, а таксама хрысціянскі гімн «Божа, мы славім цябе».

Відэа: Global News.

Meta запусціла платформу абароны ад порнапомсты: трэба даслаць свае аголеныя фота, каб іх ніхто не апублікаваў у сацсетках

Meta разам з брытанскай гарачай лініяй Revenge Porn Helpline запусціла платформу StopNCII.org. Абрэвіятура NCII азначае «абмен інтымнымі выявамі ў інтэрнэце без згоды». Кампанія лічыць, што публікацыя такіх фота можна знішчыць жыццё чалавека.

Кампанія прапанавала карыстальнікам, чые фатаграфіі ці відэа апублікавалі ці могуць апублікаваць у фэйсбуку і інстаграме, абраць файлы, якія сістэма змагла б аператыўна выявіць. Файлы ператвораць у лічбавы адбітак (хэш), які сацсеткі і будуць выкарыстоўваць.

Meta сцвярджае, што зыходны малюнак застанецца на прыладзе карыстальніка, яго нікуды не запампуюць і не будуць перадаваць. Аперацыя хэшавання незваротная — аднавіць арыгінальны файл будзе немагчыма.