Лукашэнка пра Украіну: Валодзя Зяленскі выпадковы чалавек, украінскія вайскоўцы самі папрасілі Расію выратаваць Крым, ва ўкраінскай арміі фашызм

Лукашэнка ў інтэрв'ю прапагандысту Дзмітрыю Кісялёву выказаўся пра Украіну.

▫️«Некаторыя падраздзяленні, часткі і кіраўнікі даходзяць да фашызму».
▫️«Яны выйшлі на расейцаў, гэта было не на самым высокім узроўні… Вайскоўцы. Была размова (як звычайна… і завязалася размова, малайцы, вядома, украінцы), яны папярэдзілі расейцаў, што Крым будзе расійскім, калі мы не прымем пэўныя дзеянні. Ён не будзе і ўкраінскім. А чыім? Натаўскім».
▫️Са слоў беларускага палітыка, Уладзімір Пуцін прапаноўваў Пятру Парашэнку дапамогу ў аднаўленні Данбаса. «Пуцін мне проста пра гэта сказаў. Я гэта падкрэсліваў. І вы ведаеце, Парашэнка ўрэшце пагадзіўся. Але на працягу месяца ён пачаў усё рабіць наадварот. Чаму? Таму што хлопец знаходзіўся пад знешнім кіраваннем», — запэўнівае Лукашэнка.

Чытайце цалкам

Самы гуманны суд у свеце: мінчук ударыў кулаком у сківіцу кантралёра і атрымаў 2900 рублёў штрафу

33-гадовы мінчук ехаў у транспарце без квітка. На адным з прыпынкаў у салон увайшлі кантралёры, якія запатрабавалі ад мужчыны выйсці. У адказ той пачаў лаяцца, некалькі разоў штурхнуў кантралёрку і ўдарыў кулаком у сківіцу.

Была заведзеная крымінальная справа за гвалт у дачыненні да асобы, што выконвае службовыя абавязкі. Суд прызнаў мінчука вінаватым і прысудзіў яму штраф у памеры 100 базавых велічынь (2900 рублёў), яшчэ 700 рублёў мужчына сплаціць у рамках маральнай кампенсацыі.

Для параўнання: палітвязня Сяргея Верашчагіна за ўдар нагой міліцыянера пры затрыманні асудзілі на 5 гадоў калоніі. А барда Анатоля Кудласевіча аштрафавалі на 100 базавых велічынь за сцяг на балконе.

Самы гуманны суд у свеце: маладзечанец, які засунуў жонцы нажніцы ў рот ды пагражаў забойствам, атрымаў 1,5 года хатняй хіміі

«Ціск Масквы» і «гандляр савецкім паветрам». Што пішуць украінскія СМІ пасля таго, як Лукашэнка прызнаў Крым?

«Крым дэ-факта — гэта расійскі Крым, пасля рэферэндуму і дэ-юрэ ён стаў расійскім», — заявіў Аляксандр Лукашэнка ў інтэрв'ю расійскаму прапагандысту Кісялёву. Гэта адразу выклікала бурную рэакцыю і ў Беларусі, і ў Расіі. А як адрэагавалі ўкраінскія медыя?

▪️«Гаворка ідзе аб прызнанні часова акупаванага Крыма «расійскім» прыватнай асобай».
▪️«З 1994 года Лукашэнка прадае Крамлю байку аб хуткай інтэграцыі Расіі і Беларусі».
▪️«Масква правакуе канчатковы разрыў эканамічных адносін паміж Украінай і Беларуссю».

Чытайце цалкам па спасылцы

Закон аб персанальных даных цяпер будзе кантраляваць новы орган. Што зменіцца ў жыцці беларусаў?

Уступіў у сілу новы закон — аб персанальных даных, які закранае і простых беларусаў, і дзяржорганы, і бізнэс. Каб кантраляваць, як выконваецца закон, Аператыўна-аналітычны цэнтр пры адміністрацыі Лукашэнкі стварыў новы орган — Нацыянальны цэнтр абароны персанальных даных. Як будзе працаваць цэнтр і што зменіцца ў жыцці людзей, у нашым матэрыяле.

Чытайце па спасылцы.

Лукашэнка: У нас ужо ёсць С-400

Аляксандр Лукашэнка паведаміў, што ў Беларусі ў навучальным цэнтры ўжо ёсць С-400. Пра гэта ён расказаў у інтэрв'ю расійскаму тэлепрапагандысту Дзмітрыю Кісялёву.

«Стварылі цэнтр, навучаем. Расія паставіла ў гэты цэнтр С-400. Мы павінны яго бачыць, вывучаць. Ужо ідзе вучоба, трэніроўкі і гэтак далей», — заявіў ён.

Адказваючы на ўдакладняючае пытанне, ён заявіў, што гэта не нейкая навучальная мадэль, а менавіта баяздольная тэхніка.

«Гэта значыць, С-400 цяпер у Беларусі ёсць?» — перапытаў Дзмітрый Кісялёў.

«Так, мы ў гэтым навучальным цэнтры навучаем нашых хлопцаў. Вось я хачу папрасіць прэзідэнта, каб гэты комплекс і застаўся тут», — заявіў Аляксандр Лукашэнка.

У інтэрв'ю ён таксама заявіў, што Беларусі для эфектыўнай абароны ад ракетнага нападу патрэбныя комплексы С-400 і С-500.

Шатландзец, вядучы эксперт па віскі, ужо 20 месяцаў сядзіць у строгай самаізаляцыі, бо баіцца згубіць нюх

У кожнага дзясятага з тых, хто пераставаў адчуваць пахі падчас кавіду, нюх не аднаўляецца нават праз некалькі тыдняў. Скажонае ўспрыняцце пахаў, ці парасмія, можа стаць сапраўдным праклёнам для некаторых людзей, чыя праца — нюхаць ці каштаваць. Пра тое, як эксперт па віскі ратуецца ад кавіду і магчымай парасміі.

Чытайце па спасылцы.

Брамнік беларускага гандбольнага клуба на апошніх секундах адбіў кідок, а пасля закінуў пераможны мяч

Гандбольны клуб «Мяшкоў Брэст» здабыў першую перамогу ў сёлетняй Лізе чэмпіёнаў над нарвежскім «Эльверумам».

Прычым вікторыю прынёс брамнік Іван Мацкевіч — на апошніх секундах ён адбіў кідок, а пасля закінуў мяч у пустую браму нарвежцаў. Тыя знялі брамніка ў спадзеве здабыць перамогу ў апошняй атацы.

Рэпер Аксімірон выдаў першы за 6 гадоў альбом і ў адным з трэкаў згадаў Лукашэнку

Адзін з найбольш папулярных расійскіх рэпераў 1 снежня апублікаваў альбом «Красота и уродство», у які ўвайшлі 22 трэкі. Гэта першы лонгплэй Аксімірона з 2015 года. У трэку «Окно в Париж» выканаўца згадаў Аляксандра Лукашэнку:

Как же Астана похорошела при Нур-Султане!
Кстати, реквизиты в описании
«Блаженны нищие духом» — так учит нас Священное Писание
Путин носит Celine, Лукашенко — Margiela

Margiela (Маржэла) — модны брэнд, заснаваны ў 1988 годзе бельгійскім куцюр’е Мартанам Маржэлам. Гэта загадкавы, упарты і ўплывовы дызайнер, яго фірмовы стыль – дэканструкцыя. Яго імперыя пачыналася з нічога, дакладней, з сэкандаў – ён рэзаў і перашываў рэчы адтуль.

Кампанія Meta (былы Facebook) заявіла, што выявіла сетку акаўнтаў беларускага КДБ, якія публікавалі фэйкі пра мігранцкі крызіс

Meta ў сваім афіцыйным паведамленні заявіла, што мае доказы таго, што беларускі КДБ выкарыстоўваў фэйкавыя акаўнты, якія выдавалі сябе за журналістаў і актывістаў, каб распальваць напружанасць у сувязі з мігранцкім крызісам на мяжы Беларусі і Польшчы.

Сцвярджаецца, што гэтыя акаўнты публікавалі крытыку Польшчы на ​​англійскай, польскай і курдскай мовах, уключаючы фатаграфіі і відэа пра польскіх памежнікаў, якія нібыта парушаюць правы мігрантаў. Каб зрабіць фальшывыя вобразы пераканаўчымі, некаторыя з уліковых запісаў маглі выкарыстоўваць тэхналогіі «дыпфейку»

Усяго Meta выявіла і выдаліла 41 акаўнт у Facebook, чатыры акаўнты ў Instagram і пяць груп у Facebook, як сцвярджаецца, звязаных з беларускім КДБ. Таксама кампанія выявіла асобную польскую сетку з фэйкавых акаўнтаў, якія выдавалі сябе за мігрантаў, што спрабавалі адгаварыць людзей ад уезду ў Еўрапейскі Саюз.

Дзярждэп паведаміў аб падрыхтоўцы новага пакета санкцый ЗША супраць Беларусі

ЗША ў супрацоўніцтве з ЕС рыхтуюць дадатковы пакет санкцый у дачыненні да Беларусі з-за міграцыйнага крызісу на польска-беларускай мяжы. Пра гэта заявіў амерыканскі дзяржсакратар Энтані Блінкен падчас брыфінгу ў Рызе.

«Мы заклікаем рэжым неадкладна перастаць выкарыстоўваць мігрантаў як палітычную зброю», — заявіў Блінкен.

Ён адзначыў, што санкцыі рыхтуюцца ў «цеснай каардынацыі» з Еўрасаюзам і іншымі партнёрамі і саюзнікамі. ЗША ўскладаюць на афіцыйны Мінск адказнасць за «грэбаванне» правамі чалавека і дэмакратыяй.

«Я з дзяцінства ў харэаграфіі! Патрэбнае штосьці большае, каб мяне зламаць». Топ-10 натхняльных цытат з лістоў беларускіх палітвязняў

Адкрыты музей лістоў беларускіх палітвязняў сабраў у сябе на старонцы ўжо больш за 200 вестачак з-за кратаў. Абралі адтуль адны з самых моцных і натхняльных выказванняў.

Чытайце па спасылцы

«Калі б адкруціць час, я б пачала выказвацца раней». Аляксандра Герасіменя пра мужа, скандал з Базанавым і віншаванні Лукашэнкі

Сусветнавядомая плыўчыха Аляксандра Герасіменя пасля выбараў адкрыта асудзіла гвалт з боку сілавікоў. Яна, як і многія беларускія спартсмены, пасля гэтага была вымушаная з'ехаць. На «залатую рыбку», якой нядаўна ўручалі дзяржаўныя ўзнагароды, завялі крымінальную справу і сталі патрабаваць вярнуць участкак у Драздах.

Кіраўніца Фонду спартыўнай салідарнасці расказала «Нашай Ніве», чым скончылася гісторыя з домам, што яна думае пра Домрачаву і цяперашнюю сітуацыю. 

Чытайце па спасылцы

У Бранскай вобласці перакуліўся мікрааўтобус з беларусамі: адзін чалавек загінуў

Аварыя адбылася ў сераду раніцай на 105-м кіламетры аўтадарогі Бранск — Навазыбкаў — мяжа з Беларуссю каля Унечы. Кіроўца мікраўтобуса «Фальксваген» не даў рады кіраванню, выехаў на абочыну дарогі і ўрэзаўся ў слуп.

Аўтобус з'ехаў у кювет і перакуліўся, адзін пасажыр загінуў і яшчэ дваіх даставілі ў бальніцу з рознымі траўмамі.

«Загінулы і пацярпелыя — грамадзяне Беларусі, вярталіся дадому з Масквы. Аўтобус не рэйсавы, гэта прыватны транспарт», — паведамілі ТАСС у прэс-службе пракуратуры Бранскай вобласці.

Дом з фільма «Адзін дома» каля Чыкага размясцілі для браніравання на Airbnb

Дом сям'і Маккалістэраў з фільма «Адзін дома» выклалі на сайце арэнды жылля Airbnb. Маёнтак, размешчаны ў наваколлях Чыкага, здымаўся ў арыгінальнай франшызе і сіквеле карціны.

У доме чатыры гасцявыя пакоі, дзве спальні, якія ўжо ўпрыгожылі да Калядаў. Апісанне на сайце складзена ад імя старэйшага брата галоўнага героя фільма Кевіна — База Маккалістэра.

Гасцям прапануюць паесці піцу і макароны з сырам, а таксама сабраць набор Lego па матывах «Адзін дома», які можна будзе забраць з сабой.

Дом пакуль што можна забраніраваць на адзін дзень, 12 снежня. Цана на сайце яшчэ не пазначаная. Браніраванне адкрыецца 7 снежня ў 22:00.

Лукашэнка зноў дапусціў правядзенне датэрміновых прэзідэнцкіх выбараў, але не наступным летам

«Яны могуць максімум адбыцца ў тэрмін, але, магчыма, будуць і датэрміновыя выбары … на падставе, што прэзідэнт так вырашыць, ці ў пераходных палажэннях Канстытуцыі будуць замацаваныя іншыя тэрміны выбараў», — сказаў Лукашэнка ў інтэрв’ю Дзмітрыю Кісялёву.

Пры гэтым ён мае сумневы адносна таго, што прэзідэнцкія выбары адбудуцца ўжо наступным летам. «Не. Не, гэта будзе бачна. Нам да прэзідэнцкіх выбараў тры гады прыкладна-чатыры», — заўважыў Лукашэнка.