У жыхара Баранавічаў знайшлі самаробны пісталет

Міліцыянеры ў адной з кватэр горада знайшлі прадмет, падобны да зброі, і больш за дзесяць патронаў. Эксперт высветліў, што гэта — самаробны пісталет са зменнымі стваламі розных калібраў. Большасць знойдзеных патронаў аказаліся прыдатнымі да стральбы.

Праводзіцца праверка.

Па Сочы ездзіла канапа на колах. Уладальніка аштрафавалі за тое, што быў непрышпілены

Мясцовы жыхар прыкруціў да звычайнай канапы колы і рухавік, каб ездзіць па горадзе. Ён тлумачыў, што сабраў агрэгат, каб «павесяліць людзей і паказаць заганы сучасных патрабаванняў да правіл дарожнага руху». Па словах гаспадара канапы, транспарт сабраны па ўсіх правілах тэхнічнага рэгламенту.

Але пасля ён быў спынены супрацоўнікамі дарожнай службы, канапу канфіскавалі і адправілі на штрафную паркоўку. А ўладальніка аштрафавалі за тое, што не быў прышпілены.

Даўгі беларусаў па крэдытах перавысілі 16,1 мільярда рублёў — гэта рэкорд

Пра гэта паведамляе Нацбанк у сваім Статыстычным бюлетэні.

У агульнай суме ўлічваюцца спажывецкія крэдыты, крэдыты на нерухомасць, на аўтамабілі, карты растэрміноўкі.

У параўнанні з пачаткам года агульны аб'ём запазычанасці па крэдытах фізічных асоб вырас на 90,6 мільёна рублёў. За жнівень гэты паказчык павялічыўся на 340,2 мільёна рублёў, а за ліпень — на 145,9 мільёна рублёў.

А вось даўгі па спажывецкіх крэдытах зноў пачалі падаць.

На 1 кастрычніка яны склалі 5 мільярдаў 237 мільёнаў рублёў. Гэтая сума на 12,4 мільёна менш, чым месяцам раней. Нагадаем, у жніўні запазычанасць па спажывецкіх крэдытах вырасла ўпершыню з верасня 2020 года — на 40,1 мільёна рублёў.

У Мінску пасля сутыкнення двух аўтобусаў пацярпелі пешаходы

Учора ўвечары ў Чыжоўцы кіроўца аднаго МАЗа няправільна абраў дыстанцыю і сутыкнуўся з другім. Пасля кантакту аўтобус збіў траіх пешаходаў, якія пераходзілі дарогу.

Пацярпелых шпіталізавалі.

У Беларусі забаранілі мармелад вядомай гандлёвай маркі

Забаранілі прадаваць тры віды жавальнага мармеладу Fruit-tella: «Звери MIX», «Крутой Мікс» і «YO!rms». Як сцвярджае Дзяржстандарт, у склад вырабаў уваходзяць сокі чорнай морквы і радыскі, з якіх недапушчальна па тэхрэгламенце Мытнага саюзу вырабляць сокі.

Хакеры сцвярджаюць, што ўзламалі базу Фонду сацыяльнай абароны насельніцтва. Яны апублікавалі даныя па найбліжэйшым коле Лукашэнкі

У пацверджанне групоўкай, якая называе сябе «Кіберпартызаны», былі апублікаваныя выпіскі з базы на высокапастаўленых чыноўнікаў, а таксама людзей з бліжэйшага кола Лукашэнкі. 

У базе ФСАН захоўваюцца наступныя звесткі: прозвішча, імя, пол, узрост, адрас, нумар пашпарту і ідэнтыфікацыйны нумар, месца працы, сума выплачаных падаткаў. У фонд выплачваюцца абавязковыя страхавыя ўзносы, узносы на прафесійнае пенсійнае страхаванне і шэраг іншых плацяжоў.

Раней хакеры заяўлялі пра ўзлом АІС «Пашпарт», базы ДАІ, іншых баз звестак МУС, у тым ліку архіў праслухоўвання службы ўласнай бяспекі і базу запісаў аператыўных дронаў.

У МУС ніяк не каментавалі гэтыя злівы, але ўлады заявілі пра стварэнне Нацыянальнага цэнтра абароны персанальных звестак.

Ад каранавіруса ў свеце памерла 5 мільёнаў чалавек

Такія звесткі апублікаваў Цэнтр рэсурсаў па каранавірусе ўніверсітэта Джона Хопкінса. Па стане на сённяшнюю раніцу ў свеце зафіксавана 246 743 962 выпадкі каранавіруса, ад якіх памерлі 5 000 425 чалавек. Сапраўдная лічба смерцяў, вядома, адрозніваецца ад статыстычных звестак, бо ў розных краінах розны падыход да кавідных падлікаў.

Больш за ўсё людзей ад каранавіруса памерла ў ЗША — 746 тысяч, далей ідуць Бразілія (608 тысяч), Індыя (458 тысяч), Мексіка (288 тысяч) і Расія (234 тысячы).

У Беларусі па афіцыйных звестках памёр 4631 чалавек.

У Хургадзе атруцілася 40 чалавек, сярод іх два непаўналетнія беларусы

У чатырохзоркавым гатэлі ў егіпецкай Хургадзе атруціліся больш за 40 чалавек. Па распараджэнні пракуратуры гатэль зачынены на нявызначаны тэрмін за парушэнне норм санітарнай бяспекі, усіх турыстаў рассялілі па іншых гасцініцах. Шэф-кухара гатэля затрымалі.

У бальніцу звярнуліся 40 чалавек, сярод іх двое непаўналетніх беларусаў, паведамляе МЗС Беларусі. У бальніцы ім аказалі патрэбную дапамогу, хутка яны будуць выпісаныя.

«Капітан сыходзіць апошнім, а не першым». Галоўны рэдактар «Нашай Нівы» даў інтэрв’ю з СІЗА

Галоўны рэдактар «Нашай Нівы» Ягор Марціновіч ад 8 ліпеня знаходзіцца за кратамі. Руская служба Бі-бі-сі праз ланцужок пасярэднікаў (іх не называюць па меркаваннях бяспекі) змагла задаць Ягору пытанні і атрымаць адказы на іх.

Чытайце па спасылцы

У Еўрасаюзе вызначыліся з крытэрыямі для пятага пакета санкцый супраць Беларусі. Ён можа быць прыняты да сярэдзіны лістапада

Крытэрыі былі пашыраныя, паведаміў брусэльскі карэспандэнт «Радыё Свабода» Рыхард Ёзвяк. Неўзабаве пачнецца фарміраванне спісу з фізічных і юрыдычных асоб.

Паводле Ёзвяка, пад санкцыі трапяць асобы, адказныя за арганізацыю ці дапамогу беларускім уладам у арганізацыі нелегальнай міграцыі ў краіны ЕС. У спіс таксама могуць патрапіць яшчэ тры буйныя банкі.

Чакаецца, што пяты пакет санкцый можа быць аб'яўлены да сярэдзіны лістапада.

Суд спагнаў з чыноўніка больш за 39 тысяч рублёў

Дырэктар дзяржаўнай арганізацыі зарабляў грошы ў парушэнне заканадаўства аб барацьбе з карупцыяй, паведамляе Гепракуратура. Ведамства ўстанавіла, што чыноўнік парушыў абавязацельства, па якім яму забаронена выконваць любую іншую аплатную работу, акрамя асноўнай.

З 21 мая 2014 года па 31 мая 2021 года ў іншай арганізацыі дзяржслужачы зарабіў амаль 40 тысяч рублёў. У добраахвотным парадку ён гэтыя грошы не вярнуў, таму быў пададзены пазоў у суд.

Суд задаволіў патрабаванні ў поўным аб'ёме.

У Краснаярскім краі знялі вальс аўтазакаў

Такім чынам супрацоўнікі службы выканання пакаранняў «павіншавалі» краснаярцаў з Днём аўтамабіліста. Шэсць КАМАЗаў для перавозкі зняволеных «станцавалі» вальс пад мелодыю «Амурскія хвалі».

На сайце рэгіянальнага ўпраўлення ФСВП напісалі, што «КАМАЗы рухаліся, як сапраўдныя артысты, грацыёзна абыходзілі адзін аднаго, выпісвалі неймаверныя па прыгажосці і складанасці піруэты».

У грамадскім транспарце забаранілі слова «маскі»? Цяпер дыктар кажа мудрагелістае «сродкі абароны органаў дыхання»

Чытачы @nashaniva даслалі ў рэдакцыю запісы антыкавідных абвестак у мінскім грамадскім транспарце. Цяпер дыктар кажа: «З мэтай прафілактыкі вострых рэспіраторных інфекцый рэкамендуем выкарыстоўваць сродкі абароны органаў дыхання».

Раней дыктар казаў слова «маскі».

Мы пазванілі ў Мінсктранс даведацца, як увогуле трэба разумець фразу «сродкі абароны органаў дыхання» — можа, гэта пра процівагазы?

Суразмоўца на іншым баку лініі пацвердзіў, што абвестка змянілася, але пад гэтай фразай трэба разумець менавіта «маскі». А чаму нельга тады так проста і сказаць, у Мінсктрансе не ведаюць. Пры гэтым на гарачай лініі некалькі разоў падкрэслілі, што «гэта толькі рэкамендацыя».

За $550 тысяч у цэнтры Мінска прадаецца «кватэра Людовіка XVI»

Такая абвестка з’явілася на Realt.by. У ёй гаворыцца, што ў 2015 годзе ва ўласніка ўзнікла ідэя зрабіць парыжскую кватэру ў стылі эпохі канца XVIII — пачатку XIX стагоддзяў. Для гэтага спатрэбіліся дзве кватэры ў сталінцы на Карла Маркса, вялікія грошы і жаданне.

За пяць гадоў быў створаны дом у доме — па перыметры кватэры былі ўмацаваныя сцены, унутры замянілі падлогі, сцены, столі. Уласнік (яго называюць Пётр) паўдзельнічаў у тым, каб гарадскія ўлады замянілі дах у доме і абнавілі фасад будынка.

У кватэры Пётр адлюстраваў дух эпохі Людовіка XVI — французскі дубовы паркет і дубовыя вокны, якія штучна састарылі, драўляныя сценавыя панэлі з разьбовым арнаментам, тэкстыльныя шпалеры і тэракотавая плітка.

Але як толькі ўласнік увасобіў мару ў жыццё, у яго памяняліся планы. Разам з сям'ёй Пётр пераехаў жыць у Варшаву і прадае сваю мінскую кватэру.

Цікава, што вясной 2019 года гэту кватэру ўжо спрабавалі прадаваць, але на $150 тысяч даражэй.