Жыхар Бабруйска захацеў павялічыць свой імунітэт мухаморамі. Усё скончылася біццём галавой маршрутак

Раніцай 8 кастрычніка ў Бабруйску 20-гадовы малады чалавек, выскачыўшы на праезную частку, пашкодзіў галавой лабавое шкло маршруткі, якая спынілася на святлафоры, а ў іншай — фару. Кіроўцы выклікалі міліцыю.

Хлопец растлумачыў, што прачытаў у інтэрнэце матэрыял аб павышэнні імунітэту з дапамогай сушаных мухамораў і вырашыў праверыць гэта на практыцы. Сабраўшы ў найбліжэйшым лесе каля 5 кг атрутных грыбоў, бабруйчанін дома загрузіў імі сушылку для гародніны. Затым, як рэкамендавалі ў сетцы, незадоўга да здарэння стаў прымаць мухаморы ў малых дозах. Паколькі нічога не адчуў ад ужывання «грыбнога прэпарата», праз тры дні павялічыў дазіроўку.

Дзеянні хлопца кваліфікаваныя па ч. 1 арт. 339 КК («Хуліганства»). Сваю віну ён прызнаў.

Увага! Няма ніводнага афіцыйнага клінічнага даследавання па ўжыванні мухамора ў якасці сродку для ўмацавання імунітэту. Не ешце атрутныя грыбы — гэта небяспечна для жыцця.

«Упершыню можаш прабегчыся не на месцы, а па-сапраўднаму — хаця б на 8-9 крокаў». Кранальнае з лістоў Ягора Марціновіча

Чалавек неверагоднай энергіі, галоўны рэдактар «Нашай Нівы» Ягор Марціновіч быў затрыманы 8 ліпеня. Як і наш кіраўнік аддзела рэкламы Андрэй Скурко, Ягор знаходзіцца ў ізалятары па абсурдным абвінавачванні нібыта за нясплату камунальных паслуг.

Лісты — гэта самае важнае, што ёсць сёння ў нас ад іх. І ў іх ад нас. Публікуем вытрымкі з лістоў Ягора калегам.

Чытайце па спасылцы

❗️Калі ласка, пішыце нашаніўцам:

СІЗА-1, вул. Валадарскага 2, 220030, г. Мінск
Скурко Андрэю Генадзевічу
Марціновічу Ягору Аляксандравічу

«Раю не адчайвацца і не страчваць надзею!» Выбітны адвакат Максім Знак, асуджаны на 10 год, даў інтэрв'ю з-за кратаў

Адзін з найлепшых беларускіх адвакатаў быў асуджаны на 10 гадоў калоніі ўзмоцненага рэжыму. У няволі ён прачытаў больш за 270 кніг, напісаў тысячы лістоў, безліч вершаў і кожны дзень працягвае рабіць планку і практыкаванні на прэс.

Напярэдадні этапу ў калонію Максім змог адказаць на некаторыя пытанні «Нашай Нівы» з СІЗА.

Вось толькі некаторыя цытаты:

▫️«Прысуд выклікаў стомленасць, расчараванне. Як пры абвінавачванні, так і пры вынясенні прысуду ніхто нават не спрабаваў прыбраць супярэчлівасці і дадаць крыху ахайнасці. Ніхто не спрабаваў зрабіць выгляд прыстойнасці прысуду».
▫️«Каб не згубіць веру ў справядлівасць, трэба разумець, што справядлівасць — спрадвечная каштоўнасць, якая дазволіла чалавецтву выжыць і развівацца. А любыя падзеі, сведкамі якіх мы сталі, — імгненні ў гісторыі. То чакайце».
▫️«Больш за ўсё з рэчаў і ежы ў няволі не хапае гітары і дранікаў».

Чытаць цалкам

Вакцынацыя супраць COVID-19 занесена ў нацыянальны каляндар прышчэпак

Пастанова Міністэрства аховы здароўя пашырае пералік прафілактычных прышчэпак па эпідэмічных паказаннях. У яго ўнесеная вакцынацыя супраць інфекцыі COVID-19 дарослых асоб ва ўзросце 18 гадоў і старэйшых.

«Забеспячэнне бяспекі краіны, абароны здароўя насельніцтва, прадухілення распаўсюджвання інфекцыі COVID-19 на тэрыторыі Беларусі — прыярытэтная задача аховы здароўя», — падкрэслілі ў прэс-службе.

На сёння больш за 2 674 000 беларусаў атрымалі першую дозу вакцыны супраць COVID-19, з іх больш за 1 991 000 прайшлі поўны курс вакцынацыі.

Беларусь ізноў прапусціць «Еўрабачанне»

Еўрапейскі вяшчальны саюз апублікаваў спіс краін-удзельніц Еўрабачання-2022. Мяркуючы па ім, Беларусь зноў не будзе браць удзел у конкурсе.

У песенным конкурсе возьмуць удзел выканаўцы з 41 краіны свету.

Нагадаем, летась Беларусь не трапіла на Еўрабачанне. БТ вырашыла накіраваць на конкурс гурт «Галасы ЗМеста» з песняй «Я научу тебя». У песні быў палітычны змест, што супярэчыць правілам конкурсу. БТ выключылі з Еўрапейскага вяшчальнага саюза.

На Сяргея Міхалка завялі крымінальную справу пасля інцыдэнту ў Палтаве

20 кастрычніка беларускі музыкант падчас канцэрту ўдарыў гледача, які падышоў да сцэны і прад’яўляў яму прэтэнзіі.

Крымінальная вытворчасць распачатая па артыкуле «Хуліганства», Міхалку пагражае ад штрафу ў памеры 8500 грывень ($324) да 5 гадоў абмежавання волі.

Сяргей Міхалок з’яўляецца заслужаным артыстам Украіны.

Пачаўся збор грошай для дзіцячага беларускамоўнага праекту

Знаёмцеся! Гэта Казік, Нілка і Юзік — героі новага праекту «Вясёлы садок», цыклу забаўляльных і адукацыйных праграм, створаных з мэтай выхавання разумнага і вольнага пакалення для будучай Беларусі.

Яго робіць каманда прафесіяналаў, вядомыя па «Калыханцы»: Алена Гіронак, Эмілія Пранскуце, Іна Ганчар, Вераніка Пляшкевіч і Сяргей Жбанкоў. Выходзіць праграма будзе на першым беларускамоўным ютуб-канале Бэйбус.

Падтрымаць гэты годны праект па спасылцы.

Сабраная сума пойдзе на пакрыццё выдаткаў на стварэнне лялек для праграмы, а таксама на рэкламу, прасоўванне і развіццё праекту. Чым болей будзе сабраная сума — тым болей беларусаў дазнаецца пра «Вясёлы садок»!

Пасля крытыкі Лукашэнкі Мінздароўя адмяніла абавязковы масачны рэжым

На Нацыянальным прававым інтэрнэт-партале апублікавана пастанова Міністэрства аховы здароўя №111 ад 20 кастрычніка. З санітарных норм і правілаў, якія тычыліся супрацьдзеяння кавіду, выключаны пункт, што ўступіў у сілу з 9 кастрычніка, які абавязваў фізічных асоб пры наведванні аб'ектаў, арганізацый насіць маску і выконваць сацыяльную дыстанцыю. Тое ж тычылася пасажыраў грамадскага транспарту.

Нагадаем, што ў аўторак на нарадзе Лукашэнка раскрытыкаваў міністраў аховы здароўя і ўнутраных спраў за прымус і кантроль за абавязковым нашэннем масак. «Вам што, няма чым займацца? — спытаў ён у Кубракова. — Вы чаму закон парушаеце? У нас няма закону такога… Бачыце, людзей яны пачалі штрафаваць. Хто вам даў права на гэта?»

Аналагічнае рашэнне па адмене масачнага рэжыму было прынята і ў Мінску.

На здымках фільма акцёр Алек Болдуін выпадкова застрэліў аператара і параніў рэжысёра

Аператар Галіна Хатчынс загінула на здымках вестэрна «Раст» каля горада Санта-Фэ, у яе выпадкова стрэліў прадзюсар і выканаўца галоўнай ролі ў стужцы — папулярны галівудскі акцёр Алек Болдуін. Ад яго стрэлаў таксама пацярпеў рэжысёр фільма Джоэл Соўза, які знаходзіцца ў крытычным стане, піша Бі-бі-сі.

Інцыдэнт адбыўся падчас здымак сцэны, у якой Болдуін страляў халастымі патронамі. Зброя выкарыстоўвалася на пляцоўцы як прадмет рэквізіту.

Болдуіна апыталі паліцэйскія і адпусцілі. Ніхто на гэты момант не затрыманы.

Загінулая аператар — з Украіны. Яна скончыла Кіеўскі дзяржаўны універсітэт, пасля пераехала ў ЗША і зрабіла паспяховую кар'еру аператара.

Учора з’явілася інфармацыя, што з 1 лістапада ў Мінску таксісты і кур’еры павінны будуць мець сертыфікат аб вакцынацыі.

Сёння стала вядома, што рашэнне адмененае, як і патрабаванне аб абавязковым масачным рэжыме.

Як Інтэрпал — арганізацыя, што спрыяе правасуддзю — стала дапамагаць таталітарным рэжымам

Некалі гэтае паліцэйскае агенцтва дапамагала шукаць зніклых злачынцаў. Але нядаўна ў яго спісе для міжнароднага вышуку з’явіліся ўцекачы і дысідэнты.

Эксперты лічаць, што расце колькасць выпадкаў, калі краіны-чальцы арганізацыі выкарыстоўваюць Інтэрпал у мэтах набыцця палітычнага капіталу ці помсты апанентам аўтарытарных рэжымаў.

Чытайце далей

«Сённяшняя візітоўка Беларусі — палітычны тэрор». Таццяна Марыніч пра рэлакейт, палітыку і ПВТ

Таццяна Марыніч — кіраўнік стартап-хаба «Імагуру», які выкінулі з памяшкання мінскія ўлады. Цяпер «Імагуру» не толькі адноўлены, але мае офісы ў Мадрыдзе і Вільні, а таксама «Гугл» у партнёрах.

Таццяна пагаварыла з «Нашай Нівай» пра бізнэс і палітыку, а таксама распавяла, ад чаго з Беларусі бягуць айцішнікі.

▫️«Частка людзей, якія працягваюць працаваць у гэтай сістэме, — проста закладнікі. Я абсалютна не адчуваю ў іх бок злосці, негатыву».
▫️«Калі дзяржава прымусіць EPAM закрыць бізнэс у Беларусі, гэта будзе вельмі добра. Бо гэта будзе апошні цвік у труну рэжыму».
▫️«Стаўлюся да Румаса з павагай, бо ён у межах той сістэмы спрабаваў рабіць рэчы, якія іншыя чалавек на яго пасадзе нават не пачынаў бы».
▫️«ПВТ сёння проста орган, якім кіруе чалавек ці каманда, якія набліжаныя да Лукашэнкі. Гэта не мае нічога агульнага ані з інавацыйным бізнэсам, ані з высокімі тэхналогіямі».

Чытайце цалкам па спасылцы

У Латвіі закрылі тэлекампанію, якая рэтранслявала расійскі Першы канал. У адной з праграм заявілі, што ад каранавіруса дапамагае селядзец

Гэта быў самы папулярны тэлеканал на рускай мове.

Нацыянальная рада па радыё і тэлебачанні Латвіі заявіла, што «Першы балтыйскі канал» дапусціў тры парушэнні, што дало магчымасць ануляваць ліцэнзію.

Трэцім парушэннем была пагроза грамадскаму здароўю: у адной з праграм было сказана, што каранавірус не вельмі заразны, а абараніць сябе можна ўжываннем у ежу селядца.

Вяшчанне павінна быць спынена 26 кастрычніка. Паводле інфармацыі кампаніі Kantar, у верасні 2021 года ПБК быў самым папулярным рускім каналам у Латвіі, а таксама трэцім па папулярнасці каналам у краіне (разам з каналамі на латышскай мове). Каля 40% жыхароў Латвіі — рускамоўныя.

Урад Латвіі зацвердзіў лакдаўн да 15 лістапада з каменданцкай гадзінай з 20:00: што забаронена і што дазволена

Латвія гарыць ад кавіду. А мясцовыя, каб не рабіць прышчэпкі, гатовыя за грошы заражацца вірусам

Апублікаваны першы празаічны твор Язэпа Драздовіча, які чакаў публікацыі больш за стагоддзе

Мы ведаем Драздовіча як аўтара містычных «Касмавізій», а ягоная літаратурная спадчына малавядомая. Магчыма, адкрыццё першага твору дапаможа расшыфраваць сюжэты і тэмы знакамітага беларуса.

Чытайце далей

«Пазбаўляюць магчымасці абараняцца. Ужо адразу б нас прыгаварылі. Навошта гэты фарс». Што піша Ціханоўскі маці з турмы

Маці Сяргея Ціханоўскага атрымала ліст ад сына з турмы, у якім ён піша пра адхіленне ягонай адвакаткі Наталлі Мацкевіч, што пазбаўляе яго магчымасці абараняцца ў судзе, піша @radiosvaboda.

«Прывітанне, мама! Як справы? Даўно тваіх лістоў ужо не бачыў. У мяне ўсё па-старому. Суд ужо хутка скончыцца. Ты ўжо, напэўна, ведаеш, што адхілілі майго адваката Наталлю Мацкевіч, якая ад самага пачатку займалася маёй справай (каля 500 дзён) і павінна была неўзабаве выступіць на спрэчках у судзе і заяўляць доказы ў маю абарону. Але гэта ўжо, напэўна, лічыцца злачынствам у нас у краіне. Акрамя таго, што суд закрыты і праходзіць у СІЗА, каб ніхто не змог даведацца праўду, то яшчэ і пазбаўляюць мяне магчымасці абараняцца, адхіляючы майго галоўнага абаронцу…

Дык ужо адразу б нас прыгаварылі. Навошта гэты фарс? Каму гэтая бачнасць патрэбна? Ніхто і так не верыць у гэтыя суды. Беражы здароўе».

Паглядзіце, як 74-гадовая бабуля з Ліды ездзіць на электраскутары

У Дануты Сільвановіч — сямёра дзяцей, 18 унукаў і трое праўнукаў. У свае 74 гады яна выдатна дае рады сучаснаму транспартнаму сродку — электраскутару, піша лідская раёнка.

Жанчына аднойчы ўбачыла, як па вуліцы на такім скутары ездзіць сусед. «Вось тое, што мне трэба!» — падумала Данута Іванаўна. Унукі і дзеці спачатку былі супраць, але пераканаць не змаглі. На электраскутары пенсіянерка ездзіць у краму, аптэку, а таксама на імшы ў касцёл.

У Бабруйску адмянілі забарону на наведванне начных клубаў невакцынаваным і курэнне кальяну

Нагадаем, што згодна з комплексным планам мер, распрацаваным Бабруйскім гарвыканкамам, непрышчэпленым ці без адмоўнага ПЛР-тэсту забаранялася ў начны час наведваць начныя клубы, казіно, рэстараны і падобныя забаўляльныя ўстановы. Таксама дакумент забараняў курэнне кальянаў.

Сёння стала вядома пра адмену гэтых пунктаў, а таксама абавязковага масачнага рэжыму ў грамадскіх месцах і транспарце.

Прэзідэнта Бразіліі, які адмаўляў каранавірус, сенат абвінаваціў у парушэнні санітарных мер і фальсіфікацыях

Спецыяльная камісія сената Бразіліі лічыць прэзідэнта краіны Жаіра Балсанару вінаватым у здзяйсненні дзевяці злачынстваў падчас пандэміі, паведамляе навінавы партал G1.

Раней сенат сфарміраваў спецыяльную камісію па расследаванні злачынстваў у сферы барацьбы з COVID-19. У справаздачы камісіі — 68 абвінавачванняў супраць фізічных асоб і кампаній, сярод іх — прэзідэнт Жаір Балсанару.

Балсанару абвінавачваюць у «эпідэміі са смяротным вынікам, парушэнні санітарных мер, шарлатанстве, падбухторванні да злачынства, фальсіфікацыі дакументаў, нерацыянальным выкарыстанні дзяржсродкаў, службовым злачынстве, злачынстве супраць чалавечнасці і парушэнні сацыяльных правоў».

Балсанару падчас пандэміі неаднаразова выступаў супраць вакцынацыі і ізаляцыйных мер.

«Службовым асобам прыйдзецца адказваць і перад законам, і перад людзьмі» — доктар Мікіта Салавей пра адмену масачнага рэжыму

Вядомы інфекцыяніст пракаментаваў адмену Мінздароўя абавязковага масачнага рэжыму ў грамадскіх месцах.

«Колькі яшчэ трэба сотняў смерцяў пацыентаў у дзень, каб вы дасталі свае языкі з аднаго месца і нарэшце пачалі рабіць усё магчымае для спынення вар'яцтва, якое робіцца з кавідам?»

Чытайце цалкам па спасылцы

Уся карціна дня — на nashaniva.com (З Беларусі — праз VPN). Што гэта і як усталяваць, чытайце тут.