Бізнэсмен Аляксандр Кныровіч, які месяц таму выйшаў з турмы, з’ехаў з краіны

Пра гэта ён напісаў у фэйсбуку.

«Няма і не можа быць ніякай больш важнай каштоўнасці ў жыцці чалавека, чым свабода. Свабода думаць, гаварыць, рабіць.
Не азіраючыся... І гэта штодзённае адчуванне важнейшае за грошы, здароўе, сэкс і сацыяльны статус.

Адзін мой знаёмы, беларускі прадпрымальнік, днямі сказаў мне: «Я жыву, засунуўшы пачуццё ўласнай годнасці сабе ў ...». Я так не змагу. Я проста не змагу сябе ўгаварыць.

Таму — я паехаў. Вельмі спадзяюся, што не назаўсёды... Усё ж я вельмі люблю свой горад і ганаруся пераважнай большасцю людзей, якія яго атачаюць. Трымайцеся, дарагія мае героі!» — напісаў Кныровіч.

Нагадаем, што Кныровіч быў затрыманы ў 2017 годзе і атрымаў шэсць гадоў калоніі. У жніўні 2021 года ён выйшаў на волю.

Захварэлі на кавід бацькі Паўла і Ганны Севярынцаў. Канстанцін Севярынец у бальніцы на кіслародзе

«Тата зараз у інфекцыйнай бальніцы Віцебска з кавідам, падключылі кісларод. Мама пакуль дома, але таксама моцна захварэўшы», — напісала ў сваім фэйсбуку Ганна Севярынец.

«Цяпер толькі калі кожнаму з нас будзе трапляцца добры чалавек — толькі тады будзем жыць. … Мы ніколі не ўмелі заводзіць знаёмствы ў патрэбных сферах, няма нам на каго разлічваць, што прыйдзе і неяк па-асабліваму паставіцца, толькі надзея на добрых людзей. Віцебск, дарагі, хай у вас там усё яшчэ трымаюцца адно аднаго добрыя дактары і медсястрычкі», — напісала яна.

Ганна Севярынец просіць не пісаць і не тэлефанаваць бацьку, бо яму цяжка размаўляць, чытаць і пісаць.

Таццяна Севярынец — вядомая грамадская дзяячка, актывістка ТБМ. Канстанцін Севярынец — журналіст, пісьменнік, аўтар кніг для дзяцей.

Затрыманая хірург Магілёўскай абласной бальніцы. Яна мела дачыненне да тэлеграм-канала «Медики с Народом Могилев»

Доктар Магілёўскай абласной дзіцячай бальніцы Марыя Ляпёшкіна была затрыманая 13 верасня, на волю яна не выйшла.

Прычыны затрымання дакладна невядомыя. Аднак у праўладным канале з’явілася паведамленне пра захоп ГУБАЗіКам чата «Медики с Народом Могилев».

Першапачаткова ў апісанні чату было сярод іншага напісана: «Нашы патрабаванні: спыніць катаванні, збіццё і забойствы мірных грамадзян», а таксама «Ніякай палітыкі». Пасля захопу чату сілавікі пакінулі паведамленне «Да хуткай сустрэчы з кожным».

Чат «Медики с Народом Могилев» не знаходзіцца ў спісе экстрэмісцкіх матэрыялаў Міністэрства інфармацыі.

Марыя Ляпёшкіна — сківічны хірург, у лютым яна прамільгнула ў сюжэце АНТ пра тое, што магілёўская бальніца атрымала новае абсталяванне, а лекары асвойваюць новыя методыкі.

UPD 13:54. Марыю Ляпёшкіну аштрафавалі на 870 рублёў за распаўсюд экстрэмісцкіх матэрыялаў.

Мінчукі знаходзяць на тратуарах мёртвых птушак. Што здарылася?

У сацсетках абмяркоўваюць дзіўную карціну — дзясяткі мёртвых птушак на вуліцах Мінска. Сініцы, вераб’і… «Ці судны дзень наперадзе, ці чума якая», — каментуюць гараджане.

Папрасілі арнітолагаў патлумачыць, што здарылася.

Чытайце па спасылцы

Палітзняволеныя журналісткі Андрэева і Чульцова вызваляцца на два з паловай месяцы раней: ім пералічылі тэрмін зняволення

Гэта стала магчымым пасля ўнясення паправак у заканадаўства — суд пастанавіў пералічыць тэрміны пакарання з разліку 1 дзень у СІЗА = 1,5 дня знаходжання ў калоніі. Такім чынам, журналісткі павінны выйсці на волю 5 верасня 2022 года, пра гэта напісаў у фэйсбуку муж Кацярыны Андрэевай Ігар Ільяш.

Пуцін сыходзіць на самаізаляцыю

Прэзідэнт Расіі вымушаны сысці на самаізаляцыю праз выпадак каранавіруса ў ягоным атачэнні. З-за гэтага ён не паедзе на саміт ШАС і АДКБ — ён выступіць у фармаце відэаканферэнцыі.

На мінулым тыдні Пуцін сустракаўся ў Маскве з Лукашэнкам.

Біржавая цана газу ў Еўропе перавысіла $800 за тысячу кубаметраў. Расію вінавацяць у маніпуляцыі рынкам

Цэны на газ абнаўляюць максімумы. Сярод прычын — адмова «Газпрама» браніраваць магутнасці для транзіту праз Украіну перад запускам «Паўночнага патоку — 2». Запасы газу ў сховішчах Еўропы застаюцца ніжэйшымі пасля халоднай зімы.

Па тым, як «Газпрам» адрэагаваў на павышэнне коштаў, ясна, што кампанія рабіла так, каб падштурхнуць цэны ўверх, піша The Insider.

«Былі скарочаныя пастаўкі праз Беларусь і Польшчу, магутнасці «Паўночнага патоку — 1» ставіліся на прафілактыку, былі адмовы ад рэзервавання магутнасцяў праз Украіну, былі адмовы запаўняць падземныя газасховішчы. Гэтыя акцыі адбыліся ў перыяд высокіх коштаў, калі можна было выгадна прадаць газ. Гэтага не было, ёсць здагадкі, што гэта было зроблена наўмысна як акт газавай вайны або маніпуляцыі рынкам», — растлумачыў партнёр Rusenergy Міхаіл Круціхін.

Магчыма, ростам коштаў Расія хоча прымусіць пакупнікоў заключаць доўгатэрміновыя кантракты.

У Мінску машыністу вежавага крана на вышыні 40 метраў стала блага: дапамаглі ратавальнікі

Здарэнне адбылося сёння раніцай на праспекце Пераможцаў у Мінску.

Падчас працы на вышыні каля 40 метраў машыністу стала блага і ён не мог спусціцца самастойна, паведамілі ратавальнікі.

Мужчыну спусцілі пры дапамозе альпінісцкага абсталявання і рыштунку. Пасля агляду выратаваны быў шпіталізаваны з меркаваным дыягназам: нырачная коліка.

Памерла мастацтвазнаўца, прафесар Вера Пракапцова

Ёй было 74 гады.

«У нашай памяці Вера Паўлаўна Пракапцова назаўсёды застанецца як таленавіты вучоны і педагог, добразычлівы і адкрыты чалавек. Яе крэатыўнасць, жыццерадаснасць, мэтанакіраванасць, мудрасць — былі прыкладам для ўсіх», — гаворыцца ў спачуванні на сайце Беларускага ўніверсітэта культуры.

Вера Пракапцова была дачкой мастака Паўла Масленікава і жонкай дырэктара Мастацкага музея Уладзіміра Пракапцова.

Прызначаны новы кіраўнік Каталіцкага касцёла ў Беларусі

Ім стаў 52-гадовы Юзаф Станеўскі.

Юзаф Станеўскі нарадзіўся ў 1969 годзе пад Гроднам, вучыўся ў ваенна-тэхнічнай акадэміі, у Гродзенскай духоўнай семінарыі, у Люблінскім каталіцкім універсітэце ў Польшчы. Пасвячоны ў святары ў 1995 годзе. З 2005 года з'яўляўся рэктарам Вышэйшай духоўнай семінарыі ў Гродне.

У лістападзе 2013 года Папа Францішак прызначыў кс. Юзафа Станеўскага дапаможным біскупам Гродзенскай дыяцэзіі.

«Калегі восенню казалі: «Супакойся», а сёння пытаюцца, што рабіць». Сяргей Дылеўскі пра настроі на заводах і сваё жыццё цяпер

Былы старшыня страйкаму МТЗ Сяргей Дылеўскі з кастрычніка жыве ў Варшаве. Ён пакінуў краіну пасля 25 сутак арышту, жонка з сынам выехалі яшчэ раней з-за пагроз КДБ. Нядаўна Дылеўскі абвясціў, што заводы рыхтуюцца да забастоўкі.

@nashaniva пагаварыла з рабочым пра тое, чым ён цяпер зарабляе на жыццё і ці не наіўна казаць пра страйк, калі дзве папярэднія спробы праваліліся.

Чытайце па спасылцы

Дзмітрый Баскаў нядоўга заставаўся без працы. Лукашэнка зрабіў былога кіраўніка ФХБ, дыскваліфікаванага на 5 гадоў, сенатарам.

Колькі каштуе гадзіннік Дзмітрыя Баскава, які сёння стаў сенатарам?

Першай заявай на новай пасадзе стала «Я хачу прыносіць карысць людзям і сваёй краіне».

Перад гэтай навіной тэлеграм-канал «Пул Першага» апублікаваў фота цяпер ужо былога старшыні ФХБ і параіў звярнуць увагу на парламенцкі значок на лацкане пінжака Баскава, але @nashaniva звярнула ўвагу на іншы аксэсуар.

На руцэ маладога чыноўніка — элітны швейцарскі гадзіннік Ulysse Nardin. Колькі ён каштуе, чытайце па спасылцы.

За такія грошы можна купіць кватэру ў правінцыі.

Сёння жанчыны, апранутыя па схеме БЧБ, чыталі беларускую літаратуру ў адной з электрычак Гомельскай вобласці

Гэта акцыя ў падтрымку пенсіянерак, якіх судзілі за акцыю салідарнасці з палітвязнямі і якія ладзілі чытанні ў электрычцы.

19 ордэнаў і 86 медалёў. Віктар Шэйман атрымаў чарговую ўзнагароду

Сёння Лукашэнка ўручыў былому кіраўніку Упраўлення справамі прэзідэнта найвышэйшы па значнасці ордэн Айчыны I ступені. Цяпер у яго 19 ордэнаў і 86 медалёў.

Колькі месца яны займаюць, можаце прыкладна ўявіць на архіўным фота.

Кампанія «Праваабаронцы за свабодныя выбары ў Беларусі» заклікала ЦВК Грузіі перагледзець рашэнне аб акрэдытацыі Ярмошынай у якасці назіральніцы на мясцовых выбарах

Цэнтральная выбарчая камісія Грузіі акрэдытавала на мясцовыя выбары, якія пройдуць 2 кастрычніка, у якасці міжнародных назіральнікаў групу прадстаўнікоў ЦВК Беларусі і яе старшыню Лідзію Ярмошыну.

У сувязі з гэтым прадстаўнікі кампаніі «Праваабаронцы за свабодныя выбары» звярнуліся ў ЦВК Грузіі і заклікалі перагледзець прынятае рашэнне, піша @viasna96.

«Пры такіх акалічнасцях запрашэнне прадстаўнікоў ЦВК Беларусі і яе старшыні Лідзіі Ярмошынай для ўдзелу ў назіранні за мясцовымі выбарамі ў Грузіі з'яўляецца недапушчальным і па сутнасці будзе азначаць падтрымку грузінскімі інстытутамі, у першую чаргу, ЦВК Грузіі, фальсіфікацый вынікаў галасавання на выбарах у Беларусі, да якіх маюць непасрэднае дачыненне запрошаныя беларускія службовыя асобы», — гаворыцца ў паведамленні.

Пячнік, разьбяр па дрэве, пекар: якія новыя прафесіі прапанавалі мінскім школьнікам

Міністэрства адукацыі падрыхтавала новы спіс спецыяльнасцяў, па якіх можа весціся падрыхтоўка ў 10-х базавых класах. Усяго 72 прафесіі, паведамілі Мінск-навінам у Камітэце па адукацыі Мінгарвыканкама.

Летась у Мінску школьнікі навучаліся па 38. Сёлета дадаліся і новыя. Напрыклад, сталічныя ўстановы прафесійна-тэхнічнай адукацыі прапануюць старшакласнікам атрымаць спецыяльнасць печніка, разьбяра па дрэве, пекара, аператара электроннага набору і вёрсткі, слесара-зборшчыка бытавой тэхнікі, як распавялі ў Камітэце па адукацыі.