У Мінску тысячы дэманстрантаў і сотні аўтамабілістаў застаюцца на вуліцы Кальварыйскай. Супраць іх толькі што зноў быў распылены слезацечны газ, паведамляе карэспандэнт Нашай Нівы з месца падзей. Людзі пераходзяць у іншае месца, але застаюцца на вуліцы. "Гэта штосьці незвычайнае", дадаў карэспандэнт. Нагадаем, што гэта тут недалёка абстрэльвалі дэманстрантаў з траўматычнай зброі, была параненая журналістка Нашай Нівы Наталля Лубнеўская.

АМАПаўцы напалі на дэманстрантаў, затрымліваюць у раёнах Парка Горкага, плошчы Якуба Коласа.

У Віцебску вялікая колькасць дэманстрантаў і аўтамабілістаў застаецца на вуліцах. Ідуць сутычкі.

Параненая сёння журналістка Нашай Нівы Наталля Лубнеўская шпіталізаваная ў Бальніцу хуткай медыцынскай дапамогі ў Мінску. Усё нармальна, костка не перабітая.

Журналісты ўпэўненыя, што ў іх цэлілі спецыяльна. Журналісты стаялі групкай. Іншаму журналісту, з партала Тутбай, куляй зрэзала шлейку ад бэджа. Журналісты былі ў камізэльках журналіст, іх не маглі не бачыць, было светла. Стралялі з высокага пункта - моста каля Кароны.

З такіх правакацый і пачалася сённяшняя спіраль насілля.

У раёне Кальварыйскай-Берута ў мужчыну трапіла граната са слезацечным газам. Яго стан нармальны, ён у прытомнасці, яна ўдарыла яму ў бок, паведамляе карэспандэнт Нашай Нівы, які быў сведкам гэтага.

У раёне метро Пушкінская людзі перагароджваюць тратуары міні-барыкадамі, баяцца атакі па тратуарах.

Ізноў атака святлошумавымі гранатамі на дэманстрантаў на Кальварыйскай у Мінску.

АМАП атакаваў святлошумавымі гранатамі дэманстрантаў на рагу Сурганава-Куйбышава ў раёне ўніверсама "Рыга" ў Мінску.

Мужчына ўстаў на калені перад альфаўцамі на метро Пушкінскай. Гэта жэст міру, сімвал мірнага пратэсту. Тое самае рабілі сёння дэманстранты ў Маладзечне перад шэрагам АМАПа.

МУС: Дэманстрант загінуў у раёне метро Пушкінская.

МУС сцвярждае, што ў руках у дэманстранта, які загінуў, узарвалася выбуховая прылада, але журналісты з месца падзеі перадаюць, што акурат нядаўна дэманстрантаў тут масіравана абстрэльвалі святлошумавымі гранатамі. Ішла сапраўдная кананада. Журналісты Нашай Нівы назіралі гэты абстрэл як з гатэля Арбіта, так і з боку Кальварыі.

МВД утверждает, что в руках у погибшего демонстранта взорвалось взрывное устройство, но журналисты с места события передают, что как раз недавно демонстрантов здесь массированно обстреливали светлошумовыми гранатами. Шла настоящая канонада. Журналисты Нашей Нивы наблюдали этот обстрел как из гостиницы Орбита, так и со стороны Кальварии.

З Уручча ў бок цэнтра Мінска ідзе калона цяжкай вайсковай тэхнікі.

Сутычкі каля "Рыгі" працягваюцца. Дэманстранты запускаюць феерверкі. АМАП атакуе іх святлошумавымі гранатамі.

Карэспандэнт Нашай Нівы назіраў, як каля метро Пушкінская падчас атакі амапаўцаў пенсіянеры стаялі і трымалі адкрытымі дзверы пад'ездаў, каб дэманстранты маглі схавацца.

Вось так выглядаюць барыкады ля “Рыгі”

У Мінску 10 жніўня ўсё пачыналася як абсалютна мірны пратэст пешаходаў і аўтамабілістаў. Формай пратэсту пераважна было стаянне ўздоўж вуліц, на якіх ездзілі і сігналілі аўтамабілісты. Такі пратэст ахапіў многія вуліцы.

Спіраль насілля пачалася з таго, што дэманстрантаў сталі абстрэльваць святлошумавымі гранатамі, слезацечным газам, гумовымі кулямі. Яны ў адказ сталі перагароджваць вуліцы, узводзіць барыкады ў розных месцах горада. Асноўнай тактыкай было разбягацца пры набліжэнні АМАПа, каб ізноў сабрацца, калі ён з'язджае. Асабліва зацятыя сутычкі адбыліся ў раёнах Кальварыйскай, метро Пушкінская, метро Спартыўная, універсама Рыга, галерэі Мінск. Каля метро Пушкінская загінуў дэманстрант, паведаміла МУС. Параненых дэманстрантаў вельмі, вельмі шмат.

Колькасць затрыманых - агромная, праваабаронцы не даюць рады падліку.

Жорсткі разгон дэманстрантаў, якія ўпарта не хацелі сыходзіць з вуліц, адбыўся таксама яшчэ ў дзясятку гарадоў краіны. У многіх гарадах разгон перарос у сутычкі з АМАПам, людзі аказвалі супраціў.

Сілавікі перакідваюць верталётамі падмацаванні з горада ў горад.

Супраць дэманстрантаў у Брэсце вывелі дэсантнікаў.

Беларусь такога яшчэ не бачыла.