У нобелеўскай прамове Дзмітрый Муратаў згадаў Беларусь

10 снежня галоўнаму рэдактару «Новай газеты» Дзмітрыю Муратаву ўручылі Нобелеўскую прэмію міру. У сваёй прамове ён згадаў Беларусь у кантэксце катаванняў і парушэнняў грамадзянскіх свабод.

«Узнікла ілюзія, што можна дасягнуць прагрэсу тэхналогіямі і гвалтам, а не захаваннем правоў і свабод чалавека. Такі вось прагрэс без свабоды. У нас у краіне (і не толькі ў нас) папулярная думка: тыя палітыкі, якія пазбягаюць крыві, — слабыя людзі. А вось пагражаць свету вайной — абавязак сапраўдных патрыётаў», — сказаў Муратаў.

Рыгору Кастусёву працягнулі тэрмін знаходжання пад вартай да лютага

Старшыні Партыі БНФ Рыгору Кастусёву чарговы раз працягнулі тэрмін утрымання пад вартай яшчэ на два месяцы — да 12 лютага 2022 года. Пра гэта «Магілёўскаму рэгіёну» расказала дачка палітыка Кацярына Кастусёва.

Зараз Рыгор Кастусёў знаходзіцца ў рэспубліканскай турэмнай бальніцы ў СІЗА-1 па вуліцы Валадарскага ў Мінску, куды яго перавялі ў канцы лістапада з СІЗА КДБ у сувязі з абвастрэннем шэрагу хваробаў.

Кацярына Кастусёва кажа, што на мінулым тыдні яна наведала СІЗА-1 і паразмаўляла з дактарамі Рэспубліканскай бальніцы для асуджаных. Па яе словах, доктар пацвердзіў, што ў бацькі анкалагічнае захворванне, але разам з тым сцвярджаў, што патрэбы ў тэрміновай аперацыі пакуль што няма.

Рыгора Кастусёва затрымалі ў Шклове яшчэ 12 красавіка гэтага года. Кастусёва абвінавачваюць у змове з мэтай захопу ўлады. З таго часу палітык знаходзіцца за кратамі.

Адзін з заражаных «амікронам» у Ізраілі прыехаў з Беларусі

Пра гэта паведамляе Міністэрства аховы здароўя Ізраіля, піша мясцовае выданне israelinfo.

Агулам у краіне 87 пацверджаных і імаверных інфіцыраваных паўднёваафрыканскім штамам.

З 35 пацверджаных хворых 24 нядаўна вярнуліся з-за мяжы — з Паўднёвай Афрыкі, Англіі, ЗША, Францыі, ААЭ і Беларусі.

Яшчэ шэсць чалавек заразіліся ад тых, хто прыляцеў з-за мяжы. Пяцёра падхапілі інфекцыю ў Ізраілі з невядомых крыніц.

Гайдукевіч паставіў Ціханоўскую ў адзін шэраг з Ельцыным і чэчэнскімі сепаратыстамі

На Захадзе любяць здраднікаў і гатовыя насіць іх на руках. Такую думку данёс да тэлегледачоў БТ дэпутат Алег Гайдукевіч.

«На Захадзе любяць здраднікаў і тых, хто развальвае краіны. Паглядзіце, хто там герой: Гарбачоў, Ельцын, Нямцоў, Шушкевіч, Ціханоўская, Латушка, чэчэнскі сепаратыст. Лукашэнку яны ненавідзяць па адной простай прычыне — ён не аддаў сваю краіну ні разу. Вось здраднікаў там любяць, людзей, якія адстойваюць інтарэсы краіны, — не любяць», — падкрэсліў Алег Гайдукевіч.

Па яго словах, калі б Лукашэнка адмовіўся ад саюза з Расіяй і заявіў аб жаданні краіны ўступіць у Еўрапейскі саюз і НАТА, Захад бы насіў яго на руках, але пры гэтым «краіну знішчылі б».

Аўстрыйская кампанія A1 адрэагавала на сітуацыю з Брэдзелевым, паабяцаўшы выкарыстаць усе даступныя сродкі для падтрымкі і абароны сваіх супрацоўнікаў у Беларусі.

Таксама кампанія асудзіла «ўварванне ў сферу асабістага жыцця аднаго са сваіх супрацоўнікаў».

У Францыі фермеры-пратэстоўцы залілі паліцэйскіх гноем

Пратэсты пачаліся з-за незадаволенасці экалагічнымі абмежаваннямі, якія перашкаджаюць вытворчасці. У мястэчку Мантабан супраць удзельнікаў забастоўкі выкарысталі вадамёты, у адказ на гэта пратэстоўцы аблілі сілавікоў тонамі смярдзючай жыжы з гною.

Улады прынялі рашэнне закрыць школы і шэраг грамадскіх службаў у горадзе, а таксама забараніць рух на найважнейшых дарогах у сувязі з маштабнымі акцыямі фермераў.

Пайшоў з жыцця народны артыст Беларусі дырыжор Міхаіл Фінберг

Яму ішоў 75 год.

Абяцала змякчыць прысуд. Родныя зняволеных паверылі мінчанцы і аддалі ёй больш за 30 тысяч рублёў

Мы ўжо пісалі аб тым, што з'явіліся людзі, гатовыя за грошы паручыцца за асуджаных. Днямі затрымалі 34-гадовую мінчанку, якую падазраюць у махлярстве. Яна брала грошы ў сваякоў зняволеных і абяцала палепшыць іх становішча.

Мінчанка пад рознымі імёнамі ўступала ў групы, у якіх размаўлялі сваякі падазраваных і асуджаных за незаконны абарот наркотыкаў. Яна заяўляла, што мае «плечы» ў сілавых структурах. Таму за грошы яна абяцала камусьці больш мяккі прысуд, камусьці замену рэжыму, а камусьці перавод у іншую выпраўленчую ўстанову.

З 2017 года ёй паверылі больш за 10 чалавек і перадалі суму каля 30 тысяч рублёў. Як паведамляе МУС, абяцанні свае яна не выканала, а атрыманыя грошы пакідала сабе.
У дачыненні да жанчыны завялі некалькі крымінальных спраў: за махлярства і падбухторванне да дачы хабару. Раней яна была судзімая за гандаль людзьмі.

«Пуцін — гэта маг, які дапамагае ўтрымліваць уладу». Як беларусы падселі на палітычныя расклады таро

Пакуль адны чытаюць прагнозы палітолагаў, іншыя глядзяць расклады таро. Варажба на палітыку раптоўна стала папулярнай — відэа збіраюць дзясяткі тысяч праглядаў. Таролагі прадказваюць лёс Бабарыкі, вынікі рэферэндуму і кар'еру Пракоп'ева.

Расказваем, што прагназуюць таролагі і як гэта ацэньвае псіхолаг.

Тэкст цалкам чытайце па спасылцы.

Урад забараніў вываз пшанічнай мукі

Пастанова Савета міністраў №709 забараняе вываз за межы краіны мукі з мяккай пшаніцы і спельты. Пры гэтым нельга вывозіць не толькі муку беларускай вытворчасці, але і замежнай.

Пры чым забарона дзейнічае і для краінаў-чальцоў ЕАЭС. Дакумент уступае ў сілу з сённяшняга дня і будзе дзейнічаць на працягу трох месяцаў.

Нагадаем, забарону на вываз пшанічнай мукі і грэчкі раней уводзілі у ліпені бягучага года. Яна дзейнічала да кастрычніка.

Рэцэпт на выходныя: запечаная індычка з лімонам і часныком

Калі даўно хацелі пакаштаваць запечаную індычку пад хрусткай скурачкай, то паспрабуйце гэты рэцэпт. Ідэальны на Каляды. Большасць інгрэдыентаў для гэтай стравы знойдзецца ў вашай кухоннай шафе.

Шукайце яго па спасылцы

У Мінску мужчына пераходзіў праспект Незалежнасці. Яго насмерць збіла таксі, кіроўцу пагражае да 5 год

Усё здарылася сёння каля 4:15 ранку, паведамляе сталічная ДАІ. 39-гадовы кіроўца таксі праязджаў каля дома 95А. Перад ім мужчына пераходзіў праспект. У выніку таксіст наехаў на мужчыну. Пешаход памёр на месцы.

Следчы камітэт завёў крымінальную справу па ч.2 арт.317 Крымінальнага кодэкса «Парушэнне правіл дарожнага руху ці эксплуатацыі транспартнага сродка». Таксісту пагражае да 5 год пазбаўлення свабоды.

Глядзіце, якую форму апрануць беларускія спартоўцы на Алімпіядзе ў Пекіне

Учора Нацыянальны алімпійскі камітэт Беларусі святкаваў 30-годдзе з моманту заснавання. Напрыканцы мерапрыемства НАК паказаў форму беларускіх спартоўцаў для XXIV зімовых Алімпійскіх гульняў у Пекіне.

Спартсмены будуць выступаць у бела-блакітна-сіняй форме ад брэнда TEAM BY. На элементах формы ёсць лагатып IROS. НАК тлумачыць: назва пайшла ад імя старажытнагрэчаскага бога шчаслівага моманту Кайраса.

Дарэчы, на святкаванні прэм'ер-міністр Раман Галоўчанка ўручыў кіраўніцтву НАК, у прыватнасці Віктару Лукашэнку, ганаровую грамату Савета міністраў «за значны ўклад у рэалізацыю дзяржаўнай палітыкі ў сферы фізічнай культуры і спорту».

Развітанне з Міхаілам Фінбергам адбудзецца 13 снежня ў Белдзяржфілармоніі

«Уклад Міхаіла Якаўлевіча ў папулярызацыю беларускай музыкі і паэзіі складана пераацаніць: маэстра быў ідэйным натхняльнікам Нацыянальнага фестывалю беларускай песні і паэзіі, які ў 2021 годзе праводзіўся ў Маладзечне ў 20-ы раз, з'яўляўся музычным кіраўніком і членам арганізацыйнага камітэта Міжнароднага фестывалю мастацтваў «Славянскі базар у Віцебску», галоўным дырыжорам Міжнароднага конкурсу выканаўцаў эстраднай песні «Віцебск», ініцыяваў мноства праектаў, накіраваных на развіццё айчыннай музычнай культуры», — гаворыцца ў спачуваннях філармоніі.

«Доктар пацвердзіў рак». Якія навіны ў справе затрыманых па «замаху» на Лукашэнку?

Адваката Юрася Зянковіча, літаратуразнаўцу Аляксандра Фядуту і старшыню Партыі БНФ Рыгора Кастусёва затрымалі вясной у межах справы па «замаху» на Лукашэнку і членаў яго сям’і.

Усе яны з’яўляюцца абвінавачанымі па крымінальным артыкуле 357 («Змова або іншыя дзеянні, здзейсненыя з мэтай захопу дзяржаўнай улады»). Палітыкам пагражае ад 8 да 12 гадоў зняволення.

Што вядома па гэтай гучнай справе, чытайце ў нашым матэрыяле.

Макс Корж здымае ў Мінску новы кліп. Пра гэта паведамляе блогер Максім Пушкін.

А ўчора ноччу ў Instagram спевака з'явілася відэа з начнога Мінску, у якім ён разам з жонкай едзе па праспекце Незалежнасці. Паралельна гучыць новая песня.

«Выдатны трэк, каб праспяваць яго на «Алімпійскім» у Кіеве», – падпісаў пост спявак.