⛄️У ноч на сераду месцамі да мінус 23

Снег, калі і пройдзе, то толькі па паўднёвым усходзе Гомельскай вобласці. 

Уначы будзе 11-17 градусаў марозу, пры праясненнях — мінус 18-23. Напрыклад, у Езярышчы чакаецца да мінус 21.
Па Гомельшчыне будзе мінус 5-10.

Днём будзе ад мінус 4 па поўдні да 14 градусаў ніжэй за нуль па поўначы.

У Мінску ўначы чакаецца да мінус 14, столькі ж у Гродне. У Брэсце ўначы да мінус 10. Удзень у сталіцы чакаецца да мінус 11, у Гродне да мінус 9, у Брэсце да мінус 7.

❗️Паўлючэнка сказаў: «Ваша кампанія скончаная». Новыя падрабязнасці ад'езду Ціханоўскай з Беларусі

Святлана Ціханоўская распавяла, як выязджала з краіны пасля выбараў 2020 года. Дэталі тых падзей апублікаваў часопіс The New Yorker.

Нагадаем, што 10 жніўня 2020 года Ціханоўская прыехала ў ЦВК, дзе яе сустрэлі высокапастаўленыя сілавікі. Пасля кандыдатку ў прэзідэнты адвезлі на літоўскую мяжу.

Чытайце далей

«Гніда, прышчапляйся ад кавіду». Аператыўны штаб Маскоўскай вобласці апублікаваў рэкламу вакцынацыі з агрэсіўным заклікам

У афіцыйным тэлеграм-канале аперштаба Маскоўскай вобласці па барацьбе з каранавірусам з’явілася карцінка ў стылі савецкага агітацыйнага плаката. На ёй намаляваны Уладзімір Маякоўскі і агрэсіўны заклік прайсці вакцынацыю: «Чтоб в живых остаться, гнида, прививайся от ковида!»

Аўтары падкрэслілі, што не вітаюць грубасць, але прышчэпка — «вымушаная неабходнасць».

Гэта не першы выпадак незвычайнай рэкламы вакцынацыі: у кастрычніку абласны штаб публікаваў ролік з катом, які нецэнзурна заклікаў вакцынавацца, каб не разносіць бацылу.

Канцэрн Henkel вырашыў адмовіцца ад супрацоўніцтва з беларускімі тэлеканаламі

Нямецкі хімічны канцэрн Henkel вырашыў адмовіцца ад супрацоўніцтва з каналамі АНТ, СТБ і Беларусь-1. Пра гэта напісала Frankfurter Allgemeine Zeitung.

Гэта здарылася пасля публікацыі дакладу праваабарончай арганізацыі Libereco аб рэкламе заходніх кампаній на дзяржТБ Беларусі. Henkel аказаўся на трэцім месцы ў ліку заходніх рэкламадаўцаў на беларускіх тэлеканалах.

У канцэрне заявілі, што не будуць размяшчаць новую рэкламу на дзяржТБ.

«Мы вельмі сур'ёзна ставімся да крытыкі і адаптавалі нашу мясцовую маркетынгавую дзейнасць з улікам гэтага — сказаў прадстаўнік кампаніі Henkel па запыце FAZ. — Мы не забраніравалі новы рэкламны час на дзяржаўным тэлебачанні», — адказала Henkel.

Henkel — вядомы вытворца бытавой хіміі і касметыкі. Яму належаць такія брэнды, як Persil, Pril, Bref, Vernel, «Пемалюкс», «Ласка», «Дэні», Losk, Somat, Clin, Fa, Taft, Brillance, Shamtu, клей «Момант», Metylan, Ceresit ды інш.

У Маскве мужчына адмовіўся надзець маску і адкрыў страляніну ў шматфункцыянальным цэнтры

Загінулі два чалавекі.

Стралок затрыманы, ім аказаўся былы армейскі падпалкоўнік.

У цэнтры Львова жанчына адкрыла фэйкавы абменнік. Мясцовага жыхара там адразу надурылі на 19 тысяч даляраў

Кіяўлянка разам з саўдзельнікамі арганізавала фіктыўны пункт абмену валют і табліцай з курсамі, апаратам для пералічвання і фальшывымі грашыма. На кручок трапіўся мясцовы жыхар, які аддаў махлярцы 19 тысяч даляраў.

У паліцыю паскардзіўся мужчына, які распавёў, што 29 лістапада ў адным з абменных пунктаў у цэнтры Львова касірка ўзяла ў яго грошы для абмену і сышла разам з імі праз заднія дзверы. Прычым мужчына аддаў 19 тысяч даляраў.

Паліцыя зазначае, што махлярка выкарыстала парык і падробленыя дакументы. Для пошуку патэнцыйных ахвяр жанчына давала анлайн-аб'явы пра абмен буйной сумы замежнай валюты, прапаноўваючы паніжаны курс.

Жанчыну затрымалі ў Кіеве, ёй пагражае пазбаўленне волі на тэрмін ад трох да васьмі гадоў.

444 навагоднія ёлкі ў кватэры: здаецца, гэты немец пабіў сусветны рэкорд

Томас Ерамін з Рынтэльна, што ў Ніжняй Саксоніі, любіць Каляды і Новы год і паставіў у сваёй кватэры 444 аздобленыя шарыкамі і мішурой ёлкі.

Прадстаўнік нямецкага Інстытута рэкордаў зайшоў у госці да 55-гадовага Томаса і яго жонкі Сюзаны, каб пераканацца ў тым, што ўсе заяўленыя на паперы штучныя дрэвы сапраўды ёсць у наяўнасці. У выніку калекцыя была прызнанаы новым сусветным рэкордам, піша Deutsche Welle.

Акрамя проста ярка ўпрыгожаных, ёсць у калекцыі і тэматычныя елкі: напрыклад, з персанажамі з «Зорных войнаў» або з гумовымі качачкамі. Ёлкі з гарышча Томас заўсёды дастае загадзя — ужо 1 жніўня, бо, апроч іншага, трэба развесіць 72 тысячы шароў. Самая вялікая ёлка, памерам 3,50 метра, вісіць на столі.

СМІ заўважылі, што пенсіі ў Мінску зменшыліся. Мінгарвыканкам хутка адрэагаваў — статыстыка з сайта знікла

Найбуйнейшы партал, прызнаны ўладамі экстрэмісцкім, звярнуў увагу на афіцыйную статыстыку па пенсіях у Мінску.

Журналісты заўважылі, што некаторыя віды пенсій зменшыліся.

Праз некалькі гадзін сваім артыкулам адказала агенцтва «Мінск-Навіны», заснавальнікам якога з'яўляецца Мінгарвыканкам.

У артыкуле тлумачыцца, якім чынам знізіліся ў Мінску пенсіі. Спецыялісты прыводзяць такі прыклад:

«На паверсе жывуць тры пенсіянеры. Адзін з іх атрымлівае 300 рублёў, іншы — 500 рублёў, трэці — 700 рублёў. Сярэдняя іх пенсія роўная 500 рублёў. Але калі заўтра той, хто атрымлівае 700 рублёў, захоча пераехаць, напрыклад, да сына ў Расію, то сярэдняя пенсія для дваіх астатніх суседзяў складзе 400 рублёў».

Але самае цікавае не гэта. Статыстыка па пенсіях з сайта Мінгарвыканкама зусім знікла.

Перад гэтым сайт перастаў публікаваць даныя па колькасці пенсіянераў у Мінску. За студзень-жнівень іх стала на 8,5 тысячы менш.

Супрацоўніцу Акадэміі навук затрымалі і судзілі за свечку ў акне на гадавіну забойства Бандарэнкі 

Учора з'явілася інфармацыя пра затрыманне супрацоўніцы Акадэміі навук Наталлі Капыцька. Першапачаткова гаворка ішла пра тое, што жанчыну затрымалі за свечку, якую яна запаліла ў дзень смерці Рамана Бандарэнкі 12 лістапада 2020 года.

Навіна выклікала шмат пытанняў: чаму затрымалі толькі цяпер, што з тэрмінам даўніны і гэтак далей. Але высветлілася, што свечку Наталля запальвала 12 лістапада бягучага года.

То-бок у гадавіну забойства Бандарэнкі. Пра гэта @nashaniva расказаў муж мінчанкі.

Затрымалі жанчыну ўвечары 6 снежня.

«Наташу ўзялі за свечку ў акне ў памяць аб Рамане Бандарэнку. Цяпер яна на знакамітым Акрэсціна, — расказаў «Нашай Ніве» кампазітар Віктар Капыцька, муж Наталлі. — Яны прыязджалі на працу: Наталля працуе ў Акадэміі навук, старшы навуковы супрацоўнік, музыка, кандыдат мастацтвазнаўства. Але там яе не заспелі.

Выклікалі ў міліцыю, мы прыйшлі ўдваіх, паўгадзіны тлумачэнняў (я ў калідоры) — і арышт. Яны фоткалі ўсе вокны са свечкамі тады. Ездзілі і фоткалі. Так і патлумачылі». 

Суд прайшоў 7 снежня па скайпе, як кажа Віктар Капыцька. Наталлі прысудзілі 5 сутак арышту. Чаму затрымалі і судзілі менавіта Наталлю, да канца незразумела.

«Так, менавіта гэта я ўчора заявіў і спытаў у міліцыі, калі ўжо яны паведамілі аб затрыманні. Я ўласнік кватэры. Але іх гэта не цікавіла. Ім яна патрэбна была. А мяне пасля гэтага пытання адразу папрасілі выдаліцца», — кажа Віктар Капыцька.

Стала вядома, што за антысанкцыі ўводзіць Беларусь

Савет Міністраў прыняў пастанову №700 «Аб прымяненні спецыяльных мер у дачыненні да асобных відаў тавараў», у ім вызначаныя катэгорыі тавараў, забароненых да ўвозу і рэалізацыі ў Беларусі з краін ЕС, ЗША, Канады, Нарвегіі, Албаніі, Ісландыі, Паўночнай Македоніі, Злучанага Каралеўства, Чарнагорыі і Швейцарыі.

Гэта мяса-малочная прадукцыя, фрукты і гародніна, кандытарскія тавары, тлушч, соль і іншыя катэгорыі.

Забарона не закране тавары для асабістага спажывання, дзіцячага харчавання і крытычнага імпарту.

Пастанова будзе дзейнічаць на працягу 6 месяцаў з 1 студзеня 2022 года.

Які агульны спіс забароненых да ўвозу і рэалізацыі тавараў?

▫️жывыя свінні,
▫️мяса буйной рагатай жывёлы (БРЖ), свежае, ахалоджанае, замарожанае,
▫️свежая, ахалоджаная і замарожаная свініна,
▫️субпрадукты БРЖ і іншых жывёл,
▫️мяса і харчовыя субпрадукты хатняй птушкі,
▫️салёнае мяса, сушанае і вэнджанае, харчовая мука з мяса і мясных субпрадуктаў,
▫️малако і малочная прадукцыя, за выключэннем безлактознай прадукцыі,
▫️гародніна, за выключэнне пасяўнога матэрыялу,
▫️фрукты і арэхі,
▫️тлушч свіней, птушкі, БРБ, авечак і коз, лярд-стэарын і іншыя жывёльныя масла,
▫️каўбасы і аналагічныя прадукты,
▫️кандытарскія вырабы (акрамя какава-парашку),
▫️соль,
▫️іншыя харчовыя прадукты (коды ТН ЗЭД 1901 90, 2106 90).

❓Пытанні і адказы па беларускіх антысанкцыях

▪️Цяпер з паліц увесь імпарт будуць здымаць?
Не. Пастанова не распаўсюджваецца на тавары, што былі ці будуць увезеныя да 1 студзеня 2022 года, калі яно ўступіць у сілу.

▪️Хто можа ўвозіць «санкцыёнку»?
Звычайныя людзі, калі вязуць з-за мяжы нешта для асабістага спажывання. Вытворцы для перапрацоўкі ў межах спецыяльных квот. 

▪️А што будзе замест забароненых тавараў?
Савет Міністраў у сваёй пастанове патрабуе ад Міністэрства сельскай гаспадаркі, «Белдзяржхарчпрама», аблвыканкамаў і Мінгарвыканкама забяспечыць «насычэнне ўнутранага рынку шырокім асартыментам харчовай прадукцыі вытворчасці Рэспублікі Беларусь».

▪️Відаць, цэны вырастуць?
Савет Міністраў таксама патрабуе, каб МАРГ, Мінсельгас і «Белдзяржхарчпрам», а таксама вытворцы і гандлёвыя арганізацыі прытрымліваліся «ўстаноўленага параметра індэкса спажывецкіх цэн».

▪️Калі пачне дзейнічаць забарона?
Пастанова будзе дзейнічаць на працягу 6 месяцаў з 1 студзеня 2022 года.

Задача з запалкамі

Камісія па пытаннях дзяржрэгулявання цэнаўтварэння пры Савеце Міністраў узгадніла павышэнне цэн на запалкі.

Юрыдычным асобам і індывідуальным прадпрымальнікам дазволілі падняць цэны на 9% у параўнанні з цэнамі на 28 лютага 2021 года.

Але ёсць дылема: карабок запалак каштуе 5 капеек. Падняць цану да 6 капеек будзе немагчыма, бо гэта павышэнне ажно на 20%.

На фоне размоваў аб пазбаўленні грамадзянства апанентаў рэжыму Лукашэнка раздаў беларускія пашпарты сотням украінцаў

У адпаведнасці з указам Лукашэнкі беларускае грамадзянства прынялі 448 грамадзян Украіны.

У грамадзянства прынятыя асобы, якія звярнуліся «пасля адпаведных даручэнняў» Лукашэнкі, якія былі дадзены ў час так званай «Вялікай размовы» 9 жніўня гэтага года.

Раней Лукашэнка ўжо падпісаў аналагічны ўказ, па якім у грамадзянства Беларусі прыняты 248 грамадзян Украіны.

Акрамя таго, падраздзяленні па грамадзянстве і міграцыі МУС аформілі рашэння аб прадастаўленні беларускага грамадзянства ў рэгістрацыйным парадку 485 грамадзянам Украіны.

У цэлым пасля «Вялікай размовы» Лукашэнкі каля 1,2 тысячы чалавек, якія прыбылі з Украіны, сталі беларускімі грамадзянамі.

Нагадаем, раней стала вядома, што ГУБАЗіК прапануе пазбаўляць беларускага грамадзянства тых, хто быў прызнаны вінаватым у здзяйсненні асобных катэгорый злачынстваў «экстрэмісцкага характару». Што пра гэта кажа закон?

Міністр гандлю Калтовіч: Спадзяёмся, што харчовае эмбарга не адчуюць пакупнікі

«Прычына прыняцця гэтай пастановы — працяг санкцыйнага ціску на Беларусь і, па сутнасці, гэта з'яўляецца вымушанай мерай. <…> У сувязі з тым, што мы маем тавары крытычнага імпарту ў гэтым пераліку, будуць створаныя кампенсацыйныя механізмы пераарыентацыі пастаўшчыкоў на іншыя краіны або ўвозу такіх тавараў з дружалюбных краін. У гэтай сувязі мы спадзяёмся, што гэтыя меры не адчуюць пакупнікі. Акрамя таго, меры не распаўсюджваюцца на тавары, увезеныя для асабістага спажывання, тавары, якія выкарыстоўваюцца ў вытворчасці лекавых сродкаў, дзіцячага харчавання, якія рэалізуюцца ў гандлёвай сетцы для дзіцячага харчавання і гэтак далей, — растлумачыў міністр. — Таму думаю, што гэтая мера кропкавая і вельмі канкрэтная. Калі казаць пра суму, то Беларусь за 9 месяцаў імпартавала больш чым на $2 млрд харчавання. Каля чвэрці тавараў — у гэтым пераліку».

Якая адказнасць і ці будуць знішчаць бульдозерамі «санкцыёнку» — яшчэ два пытанні па антысанкцыях

▪️Хто будзе кантраляваць увоз забароненых тавараў і што з расійскай мяжой?
Згодна з дакументам, на забароненыя тавары будзе распаўсюджвацца дзеянне спецыяльнага дакумента — палажэння «Аб парадку дзеяння ў адносінах забароненых тавараў». У прыватнасці, пункта 2 і раздзел 2.

Пункт два кажа пра тое, што кантраляваць увоз забароненых тавараў будзе мытня. А беларуска-расійскі ўчастак мяжы будуць патруляваць спецыяльныя «мабільныя падраздзяленні» мытнікаў, міліцыі, пагранічнікаў, а таксама міністэрства сельскай гаспадаркі і падначаленых яму арганізацый.

▪️Ці будуць у Беларусі знішчаць санкцыёнку, як гэта рабілі ў Расіі?
Раздзел два палажэння «Аб парадку дзеяння ў адносінах забароненых тавараў» больш міласэрны, чым расійскае заканадаўства. Арганізацыю, што прывезла забаронены тавара, абавяжуць яго вывезці. А за непадпарадкаванне патрабаванню службовай асобы па артыкуле 24.3 КоАП пагражае штраф да 100 БВ.

Дзяржава будзе займацца імпартазамяшчэннем. Крута? Эканаміст: «Гэта ўдарыць па кішэні беларусаў»

Беларусь ва ўмовах заходніх санкцый плануе рэалізаваць праекты ў сферы імпартазамяшчэння на $9 мільярдаў, паведаміў міністр эканомікі Аляксандр Чарвякоў.

Паводле яго слоў, рэспубліка ў 2021 годзе сутыкнулася «з беспрэцэдэнтнымі выклікамі» — гэта пандэмія і санкцыі, якія абвешчаныя ў дачыненні да Беларусі. Чарвякоў абазначыў імпартазамяшчэнне «як інструмент процідзеяння санкцыям».

Але адкуль грошы? І ці пойдзе гэта на карысць спажыўцам?

Чытайце па спасылцы.

Кіраўнік мінскай IT-кампаніі абвясціў аб выдаленні бчб-эмодзі з працоўнага чата

У распараджэнні Dev.by аказаўся ліст супрацоўнікам, напісаны Тэйнам Лімэнам, кіраўніком мінскай студыі Wargaming Mobile. У ім Лімэн аб'яўляе аб «няпростым рашэнні» — выдаленні бчб-эмодзі з карпаратыўнага Slack і тлумачыць прычыны.

«Я разумею, што гэтае рашэнне многім можа не спадабацца, але спадзяюся, што ўсе зразумеюць прычыны, па якіх яно прынятае. Гэта няпростае рашэнне, але мы вельмі сур'ёзна ставімся да бяспекі кожнага. Дзякуй за ваша разуменне», — гаворыцца ў лісце.

Тэйн Лімэн — амерыканец, працуе ў Wargaming з 2015 года. Узначальваў глабальны паблішынг Wargaming America, быў выканаўчым прадзюсарам World of Tanks PC. З 2018 года кіруе мінскай студыяй WG Mobile.

Падборка аўтамабільных нумароў беларусаў у ЗША

Узята адсюль.